#LocalNews
Published_3 Jone 2022

ကော့သောင်း-ရနောင်း ရေလမ်းမှတစ်ဆင့် MOU လုပ်သား ၈၀ ဦး ထိုင်းနိုင်ငံသို့ ထပ်မံရောက်ရှိ ခဲ့ကြကြောင်း သိရသည်။

ယင်းအလုပ်သမားများမှာ ပြည်ပအလုပ်အကိုင်အကျိုးဆောင် ပွင့်ဖူးအောင် ကုမ္ပဏီနှင့် စာချုပ် ချုပ်ဆိုထားသူများ ဖြစ်ပြီး ဇွန်လ ၂ ရက်တွင် မင်္ဂလာဒုံလေဆိပ်မှ ကော့သောင်းသို့ လေကြောင်းဖြင့်သွားရောက်ကာ ယင်းမှ တစ်ဆင့် ကော့သောင်း - ရနောင်းဂိတ် ရေလမ်းမှ သွားရောက်ခဲ့ကြခြင်း ဖြစ်ကြောင်း သိရသည်။

အလုပ်သမား ၈၀ ဦးတွင် အမျိုးသား ၄၈ ဦး၊ အမျိုးသမီး ၃၂ ဦး ဖြစ်ပြီး ထိုင်းနိုင်ငံ၊ ပထုံဌာနီမြို့ရှိ food blessing co.ltd ပိုင် source အချည်ရည် စက်ရုံတွင် အလုပ်လုပ်ကြမည် ဖြစ်ကြောင်း သိရသည်။

ပြီးခဲ့သည့် မေလဒုတိယအပတ်မှစတင်၍ လက်ရှိအချိန်အထိ ပြည်တွင်းအလုပ်အကိုင်အကျိုးဆောင် အေဂျင်စီကုမ္ပဏီများမှ ထိုင်းနိုင်ငံသို့ MOU စနစ်ဖြင့် စေလွှတ်ပေးခဲ့သည့် အလုပ်သမားအရေအတွက် ၁၉၂၅ ဦးရှိပြီဖြစ်ကြောင်း သိရသည်။

ymg/mt
#Yangon_Media_Group

#DailyNews
Published - 3 June 2022

၁။ မျောက်ကျောက်ရောဂါသံသရှိပါကနီးစပ်ရာဆေးရုံ၊ ဆေးပေးခန်းများတွင် စစ်ဆေးကုသနိုင်ရန်ကြိုတင်ပြင်ဆင်ထားဟုဆို

၂။ ပြည်တွင်းတွင် ပန်းချီဈေးကွက်ကို ရင်းနှီးမြှုပ်နှံသူများပြားလာ

၃။ နေ့စဉ်မိုးလေဝသသတင်း။

၄။ တရုတ်နိုင်ငံတွင် ကျေးလက်ဒေသအထိ ပြန်လည်ပြည့်ဖြိုးမြဲစွမ်းအင်များ တိုးတက်ထုတ်လုပ်နေ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Pulished_ 3 June 2022

ထောက်ပံ့ဖြည့်ဆည်းဆောင်ရွက်မှု (Logistics Services) အပါအဝင် ကုန်စည်ပို့ဆောင်ရေးလုပ်ငန်းများအတွက် နိုင်ငံခြားသုံးငွေထားရှိခွင့်ပြုသည့် ပမာဏ သတ်မှတ်ချက်ကို ပို့ဆောင်ရေးနှင့် ဆက်သွယ်ရေးဝန်ကြီးဌာနမှ သက်ဆိုင်ရာအဖွဲ့အစည်းတွေဆီ အသိပေးအကြောင်းကြားထားတယ်လို့ သိရပါတယ်။

နိုင်ငံခြားသုံးငွေကြီးကြပ်မှုကော်မတီ၏ အစည်းအဝေးအမှတ်စဉ်(၂၀/၂၀၂၂)အရ မြန်မာ အပြည်ပြည်ဆိုင်ရာ ကုန်စည်ပို့ဆောင်ရေးဝန်ဆောင်မှုလုပ်ငန်းအသင်းဝင် ကုမ္ပဏီတစ်ခုကို လစဉ် အမေရိကန်ဒေါ်လာ ၃ သိန်းခန့် နိုင်ငံခြားငွေစာရင်းမှာ ထားရှိခွင့်ပြုပြီး ၃သိန်းထက် ကျော်လွန်သည့် ပမာဏကို မြန်မာကျပ်ငွေဖြင့် လဲလှယ်ရမည်ဟု သတ်မှတ်ထားရှိသည်။

မြန်မာ့ကုန်သွယ်ရေကြောင်းဆိုင်ရာ လုပ်ငန်းများဖွံ့ဖြိုးတိုးတက်ရေးအသင်းရဲ့ သင်္ဘောလိုင်း တစ်ခုကို အမေရိကန်ဒေါ်လာ ၂ သန်း ငွေစာရင်းထားရှိခွင့်ပြုပြီး ၂သန်းထက် ကျော်လွန်သည့် ပမာဏကို ကျပ်ငွေဖြင့် လဲလှယ်ရမည်ဟု ထုတ်ပြန်ချက်၌ဖော်ပြထားသည်။

နိုင်ငံတကာလေကြောင်း ကုန်စည်ပို့ဆောင်ရေးလုပ်ငန်းများ၊ နိုင်ငံတကာ လေကြောင်းလိုင်းများ အနေနှင့် မြေပြင်ဝန်ဆောင်မှု ဆောင်ရွက်ပေးနေသော ဝန်ဆောင်မှုလုပ်ငန်းများအတွက် လုပ်ငန်းတစ်ခုကို အမေရိကန်ဒေါ်လာ ၁ သိန်း ငွေစာရင်း ထားရှိခွင့်ပြုပြီး ၁သိန်းထက် ကျော်လွန်သည့် ပမာဏကို ကျပ်ငွေဖြင့် လဲလှယ်ရမည်ဖြစ်ကြောင်း ဖော်ပြထားသည်။

ထို့ပြင် သက်ဆိုင်ရာ ဌာန၊ အဖွဲ့အစည်းများ အနေဖြင့် နိုင်ငံခြားသုံးငွေ ထားရှိခွင့်ပြုသည့် ပမာဏအား သတ်မှတ်ခွင့်ပြုတာကို လိုက်နာဆောင်ရွက်ရမည်ဟု အသိပေးအကြောင်းကြားထားကြောင်းလည်း ထုတ်ပြန်ချက်အရ သိရသည်။

ymg/NN
#Yangon_Media_Group

#LocalNews
Published - 3 June 2022

မြန်မာ-ထိုင်း နယ်စပ်ကုန်သွယ်ရေးတွင် ပုံမှန်အနေအထား၏ ၇၅ ရာခိုင်နှုန်းခန့်ကုန်စည်စီးဆင်းမှုရှိနေပြီး နယ်စပ်ဂိတ်အများစုတွင် လူဝင်လူထွက်မရသေးကြောင်း မြဝတီနယ်စပ်ရှိကုန်သည်တစ်ဦးဖြစ်သူ ဦးဒေါက ပြောသည်။

"အခုချိန်ထိကတော့ ဘာအခက်အခဲမှမရှိသေးဘူး။ ပုံမှန်ပြန်ဖြစ်နေပြီ။ ကုန်စည်စီးဆင်းမှုကအစ အားလုံးအဆင်ပြေတယ်။ ၇၅ ရာခိုင်နှုန်းလောက်လည်ပတ်နေပြီလို့ ပြောလို့ရတယ်"ဟု ဦးဒေါကပြောသည်။

အဆိုပါ ထိုင်း-မြန်မာနယ်စပ်ဂိတ်များကို ၂၀၂၀ ပြည့်နှစ် မတ်လမှစတင်ပြီး ကိုဗစ်ကပ်ရောဂါ ကြောင့် ကုန်စည်စီးဆင်းမှုကိုသာ လက်ခံသော်လည်း လူဝင်လူထွက်ကို ပိတ်ထားခဲ့ခြင်း ဖြစ်သည်။

ယခုနှစ် ဧပြီ ၁ ရက်မှ မေလ ၂၀ ရက်အထိ ထိုင်း-မြန်မာနယ်စပ်ကုန်သွယ်မှုတန်ဖိုး အမေရိကန်ဒေါ်လာ ၆၄၆ ဒသမ ၉၄၈ သန်းခန့် ကုန်သွယ်မှုပြုလုပ်ထားကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ ထုတ်ပြန်သည့်စာရင်းများအရ သိရသည်။

လက်ရှိတွင် ဒေသတွင်းစီးပွာရေးမြှင့်တင်ရန်နှင့် နယ်စပ်ဖြတ်ကျော်ကုန်သွယ်ရေး ပြန်လည်စတင်ရန် ယခုလဆန်းတွင် ထိုင်း-မြန်မာ နယ်စပ်စစ်ဆေးရေးဂိတ်များဖွင့်ရန် စီစဉ်ထားသော်လည်း မြန်မာဘက်မှ အကြောင်းပြန်ကြားခြင်းမရှိသဖြင့် မဖွင့်လှစ်နိုင်သေးကြောင်း၊ ပြီးခဲ့သည့် ရက်များအတွင်း ထိုင်း-မြန်မာနယ်စပ်ရှိ နယ်စပ်ဖြတ်သန်းခွင့်ကိုင်ဆောင်ထားသူများအတွက် ချင်းခေါင်၊ မယ်ဆိုင်နှင့် ချင်းဆမ်ခရိုင်တို့ရှိ စစ်ဆေးရေးဂိတ်များကို ယနေ့ ဇွန် ၁ ရက်မှစ၍ ပြန်လည်ဖွင့်လှစ်ရန် ထိုင်း-မြန်မာနယ်စပ်ကုန်သွယ် ရေးကော်မတီ (TBC) က သဘောတူလိုက်ကြောင်း ဘန်ကောက်ပို့စ်သတင်းစာက ဖော်ပြထားသော်လည်း လက်ရှိတွင် ကော့သောင်း-ရနောင်းနယ်စပ်ဂိတ်တစ်ခုတည်းသာ လူဝင်လူထွက်ရကြောင်း သိရသည်။

ymg/sth
#Yangon_Media_Group

#LocalNews
Published_3 June 2022

‌
ကိုဗစ်ကြောင့် (၂)နှစ်ကျော်ကြာပိတ်ထားခဲ့ရသည့် ထိုင်း - မြန်မာနယ်စပ် ကော့သောင်း-ရနောင်းဂိတ်ကို ဇွန်လတစ်ရက်တွင် ပြန်ဖွင့်ခဲ့ပြီဖြစ်သည်။

ကော့သောင်းဒေသခံပြည်သူများအနေဖြင့် ထိုင်းနိုင်ငံ၊ ရနောင်းမြို့သို့ သွားရောက်လိုပါက Border Pass နယ်စပ်ဖြတ်ကျော်ခွင့်စာအုပ်ဖြင့် ရေလမ်းမှတစ်ဆင့် သွားရောက်နိုင်သည့်အပြင်နိုင်ငံကူးလက်မှတ်ကိုင်ဆောင်ထားသူများအနေဖြင့်လည်း ကိုဗစ်စည်းကမ်းချက်များနှင့်အညီ သွားရောက်နိုင်ပြီဖြစ်ကြောင်းသိရသည်။

ကော့သောင်းမြို့မှ ရနောင်းမြို့သို့ စက်လှေဖြင့်သွားရောက်ပါက စက်လှေခ အသွားဘတ် ၂၅၀ အပြန် ဘတ် ၂၅၀ စုစုပေါင်း ဘတ် ၅၀၀ ကုန်ကျမှာဖြစ်ပြီး နယ်စပ်ဖြတ်ကျော်ခွင့်ပြုရန်အတွက် မြန်မာဘက်မှာ တံဆိပ်တုံးထုခ ကျပ်ငွေ ၃၀၀ နှင့် ထိုင်းဘက်တွင် ဘတ် ၁၅၀ ပေးဆောင်ရမည်ဖြစ်ကြောင်းသိရသည်။

ymg/mt
#Yangon_Media_Group

#LocalNews
Published -3 June 2022

တရုတ်-မြန်မာလမ်းကြောင်းသစ် (ချုံချင့်-လင်ချမ်း-မြန်မာ) နိုင်ငံတကာအထူးရထားဖြင့် ပို့ဆောင်လိုက်သည့် ပထမဆုံးအသုတ်ကုန်ပစ္စည်းများ မြန်မာပြည်တွင်းသို့ဝင်ရောက်လာပြီဟု မြန်မာနိုင်ငံဆိုင်ရာ တရုတ်သံရုံးကထုတ်ပြန်လိုက်သည်၊၊

(ချုံချင့်-လင်ချမ်း-မြန်မာ)နိုင်ငံတကာအထူးရထားဖြင့်ရောက်လာသည့် ကုန်ပစ္စည်းများကိုချင်းရွှေဟော်နယ်စပ်ဂိတ်၌ ကုန်တင်ကားများဖြင့်ပြောင်းလဲကာ ကုန်းလမ်းခရီးဖြင့် မြန်မာပြည်တွင်းဝင်ရောက်လာခြင်းဖြစ်ပြီး နောက်ဆုံးဂိတ်ဖြစ်သည့်မန္တလေးကိုဆက်လက်ပို့ဆောင်သွားမည်ဖြစ်ပါသည်၊၊

တရုတ်-မြန်မာလမ်းကြောင်းသစ် (ချုံချင့်-လင်ချမ်း-မြန်မာ)နိုင်ငံတကာအထူးရထားသည် မေလ (၂၃)ရက်နေ့တွင် ချုံချင့်မြို့ ကော်ယွမ်ဆိပ်ကမ်း ယွီကြွေဘူတာမှ စတင်ထွက်ခွာလာခဲ့ပြီး (၂၈) ရက်နေ့တွင် တရုတ်-မြန်မာနယ်စပ်ဂိတ်သို့ရောက်ရှိကာ ဇွန်လ ၁၀ ရက်နေ့တွင် နောက်ဆုံးဂိတ် မန္တလေးသို့ရောက်ရှိမည်ဟုခန့်မှန်းရသည်ဟု ထုတ်ပြန်ချက်တွင် ဖော်ပြထားသည်၊၊

အဆိုပါရထားတွဲ၌ စံချိန်မီကွန်တိန်နာပေါင်း အလုံး ၆၀ သယ်ဆောင်လာရာ စက်ပစ္စည်းများ၊ အီလက်ထရောနစ်အပိုပစ္စည်းများ၊ ကားနှင့်ဆိုင်ကယ်အပိုပစ္စည်းများ စသည်တို့ပါဝင်ကြောင်းသိရသည်၊၊

ရထားတွဲသည် ယူနန်ပြည်နယ် လင်ချန်းနယ်စပ်ဂိတ်မှတစ်ဆင့်ပြည်ထွက်၍ ကားလမ်းနှင့်ရထားလမ်း ပူးပေါင်းပို့ဆောင်သည့်ပုံစံဖြင့် ၁၅ ရက်အကြာတွင် မြန်မာနိုင်ငံ မန္တလေးမြို့သို့ရောက်ရှိမည်ဟုဖော်ပြ ထားသည်၊၊

ခန့်မှန်းတွက်ချက်မှုအရ တရုတ်နိုင်ငံချုံချင့်နှင့်၊မြန်မာနိုင်ငံအကြား ကုန်စည်ပို့ဆောင်မှုကြာချိန်သည် သမားရိုးကျနည်းလမ်းထက် ရက် ၂၀ လျော့နည်းသွားမည်ဖြစ်ပြီး ကုန်စည်စီးဆင်းမှုအရင်းအနှီး ၂၀% လျှော့ချနိုင်မည်ဖြစ်ကြောင်း မြန်မာနိုင်ငံဆိုင်ရာ တရုတ်သံရုံး၏ယခင်ထုတ်ပြန်ချက်အရသိရသည်၊၊

ymg/tthl
#Yangon_Media_Group