#Local_News
Published_ 12 June 2022

ရှမ်းပြည်နယ်(မြောက်ပိုင်း)၊ ကွတ်ခိုင်မြို့တွင် ဇွန်လ ၉ ရက် နံနက်၉ နာရီ ၁၅ မိနစ်ခန့်က
မူးယစ်ဆေးဝါးများ ဖမ်းဆီးရမိခဲ့ကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားပါတယ်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့၀င်များပါ၀င်သော ပူးပေါင်းအဖွဲ့သည်
သတင်းအရ သက်သေများနှင့်အတူ ကွတ်ခိုင်မြို့၊ ရပ်ကွက်(၄)နေ မဟောင်ကွေ့ချိန် ၏နေအိမ်အား ၀င်ရောက်ရှာဖွေခဲ့ပါတယ်။

ထိုသို့ရှာဖွောရာ ၎င်းနှင့်အတူ နေအိမ်အတွင်းမှ စိတ်ကြွရူးသွပ်ဆေးပြား ၃၀၀၀၀ပြား(ကာလ ပေါက်စျေးတန်ဖိုးငွေကျပ် သိန်း ၃၀၀၊ ဘိန်းဖြူအလေးချိန် ၃၀
ဂရမ်(ကာလပေါက်စျေးတန်ဖိုးငွေကျပ် ၄.၅ သိန်း)နှင့် လက်ကိုင်ဖုန်း ၁ လုံးတို့အားတွေ့ရှိသိမ်းဆည်းရမိခဲ့ပါတယ်။

ထို့ကြောင့် မဟောင်ကွေ့ချိန် (၂၃)နှစ်အား ကွတ်ခိုင်မြို့မရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေအရ အမှုဖွင့်အရေးယူထားရှိပြီး ကွင်းဆက် များ ဖော်ထုတ်လျက်ရှိကြောင်း သိရပါတယ်။

ymg_mnn
#Yangon_Media_Group

#LocalNews
Published - 12 June 2022

မြန်မာစာကတိက အငြိမ်းစားဆရာမကြီးဒေါ်ညွန့်ညွန့်စိန် လက်ပြန်ကြိုးတုပ်ကာ အသတ်ခံရပြီး ဇွန်လ ၁၁ ရက် ညနေပိုင်းတွင် ရန်ကုန်တိုင်း၊ မရမ်းကုန်းမြို့နယ်အတွင်း ဖြစ်ပွားခဲ့ကြောင်း သတင်းရရှိသည်။

မရမ်းကုန်းမြို့နယ်၊ (၉)ရပ်ကွက်၊ ကမ္ဘာအေးဘုရားလမ်းပေါ်ရှိ ၎င်းနေထိုင်ရာ တိုက်ခန်းတစ်ခုအတွင်း အသတ်ခံရခြင်းဖြစ်ကြောင်း ဆရာမကြီး၏တပည့်ဖြစ်သူမှ လူမှုကွန်ရက်တွင် ရေးသားထားသည်။

ဆရာမကြီးဒေါ်ညွန့်ညွန့်စိန်သည် ၎င်းနေထိုင်ရာတိုက်ခန်းအတွင်းရှိ ခုတင်ဘေးကြမ်းခင်းပေါ်တွင် ဘေးတစ်စောင်းဒူးကွေးလျက် လက်နှစ်ဖက်အား ဖုန်းအားသွင်းကြိုးဖြင့် ချည်နှောင်ထားကာ ထိုးသွင်းဒဏ်ရာများဖြင့် သေဆုံးလျက်တွေ့ရှိခဲ့ရခြင်းဖြစ်ကြောင်း သိရသည်။

ရန်ကုန်အပါအဝင် အခြားသောမြို့များတွင် ခြိမ်းခြောက်လုယက်မှုများ၊ ဓားထောက်လုယက်မှုဖြစ်စဉ်များမှာ နေ့စဉ်ဖြစ်ပွားနေသည့်အပြင် နေ့လည် လူထူထပ်သည့်နေရာများတွင်ပါ လုယက်လူသတ်မှုဖြစ်စဥ်များ ဖြစ်ပွားနေကြောင်း သိရသည်။

ymg/sth
#Yangon_Media_Group

#LocalNews
Published - 12 June 2022

နိုင်ငံ၏ ရှေ့လုပ်ငန်းစဉ်များ ပူးပေါင်းဆောင်ရွက်နိုင်ရေးအတွက် PDF အပါအဝင် အဖွဲ့အစည်းအမျိုးမျိုးတို့အနေဖြင့် လက်နက်အပ်နှံပြီး ပြန်လည်ဝင်ရောက်ရန် နိုင်ငံတော်စီမံအုပ်ချုပ်ရေးကောင်စီမှ ဇွန်လ ၁၁ ရက် ညပိုင်းတွင် ထုတ်ပြန်ကြေညာခဲ့သည်။

တိုင်းရင်းသားလူမျိုးများစွာ နေထိုင်လျက်ရှိသည့် မြန်မာနိုင်ငံအတွက် အချင်းချင်းသွေးစည်းညီညွတ်မှုရှိမှသာ ပြည်ထောင်စုကြီးမပြိုကွဲဘဲ အချုပ်အခြာအာဏာတည်တံ့ခိုင်မြဲမည်ဆိုသည်ကို အတိတ်သမိုင်းမှ သင်ခန်းစာများရရှိခဲ့ပြီးဖြစ်ကြောင်း နစက ထုတ်ပြန်ချက်တွင်ဖော်ပြထားသည်။

ယင်းအပြင် နိုင်ငံရေးအရ သဘောထားကွဲလွဲမှု၊ တိုင်းရင်းသားအရေးအရ သဘောထားကွဲလွဲမှုများကြောင့် ပြည်တွင်းလက်နက်ကိုင်ပဋိပက္ခများဖြစ်ပွားခဲ့ရပြီး နိုင်ငံဖွံ့ဖြိုးတိုးတက်ရေးကို ထိခိုက်ခဲ့ရကြောင်း၊ အကြမ်းဖက်အုပ်စုများဖြစ်သည့် CRPH နှင့် NUG တို့မှ နိုင်ငံတော်အလုံးစုံပျက်သုဉ်းရေးကို ဦးတည်ကာ အကြမ်းဖက်သတ်ဖြတ်မှုများကို လုပ်ဆောင်ရန် စည်းရုံးသိမ်းသွင်းခံထားရသူများသည် PDF အပါအဝင် အဖွဲ့အစည်းအမျိုးမျိုးအမည်ခံ၍ လက်နက်ကိုင်ဆန့်ကျင်မှုများကို ပြုလုပ်လာခဲ့ကြကြောင်း အဆိုပါကြေညာချက်တွင်ဖော်ပြထားသည်။

ယင်းသို့ ဆောင်ရွက်နေမည်ဆိုပါက နိုင်ငံတော်တည်ငြိမ်အေးချမ်းရေးနှင့် ဒီမိုကရေစီထွန်းကားရေးကို ထိခိုက်နှောင့်နှေးစေမည်ဖြစ်ကြောင်း၊ ယင်းအပြင် ပါတီစုံဒီမိုကရေစီအထွေထွေရွေးကောက်ပွဲ ပြန်လည်ကျင်းပနိုင်ရေး၊ ဒီမိုကရေစီနှင့်ဖက်ဒရယ်စနစ်ကို အခြေခံသည့် ပြည်ထောင်စုကို တည်ဆောက်ရေးတို့အတွက် ပြည်သူလူထုတစ်ရပ်လုံးပူးပေါင်းဆောင်ရွက်မှသာ အဆင်ပြေချောမွေ့စွာဖြင့် ဆောင်ရွက်နိုင်မည်ဖြစ်ကြောင်း သိရသည်။

ယင်းကြောင့် PDF အပါအဝင် အဖွဲ့အစည်းအမျိုးမျိုးတို့အနေဖြင့် နိုင်ငံတော်၏ ရှေ့လုပ်ငန်းစဉ်များတွင် ပါဝင်ပူးပေါင်းဆောင်ရွက်နိုင်ရေး သတ်မှတ်စည်းကမ်းချက်များနှင့်အညီ ဥပဒေဘောင်အတွင်းသို့ လက်နက်အပ်နှံပြီး ပြည်သူ့ဘဝသို့ ပြန်လည်ဝင်ရောက်ခြင်း ပြုမည်ဆိုပါက ကြိုဆိုလက်ခံသွားမည်ဖြစ်ကြောင်း နိုင်ငံတော်စီမံအုပ်ချုပ်ရေးကောင်စီက အသိပေးထုတ်ပြန်ခဲ့သည်။

ymg/sth
#Yangon_Media_Group

#Local_News
Published_ 12 June 2022

ရခိုင်ပြည်နယ်၊ မောင်တောမြို့၌ ဇွန် ၈ ရက် နံနက် ၁၁ နာရီခွဲတွင်စိတ်ကြွရူးသွပ်ဆေးပြားများ ဖမ်းဆီးရမိခဲ့ကြောင်းသိရပါတယ်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့၀င်များပါ၀င်သော ပူးပေါင်းအဖွဲ့သည် သတင်းအရ သက်သေများနှင့်အတူ မောင်တောမြို့နယ်၊ မောင်တော-ကျီးကန်းပြင်ကားလမ်း၊ ဟာဘီကျေးရွာအနီးတွင် စိုးအောင်သိန်း စီးနင်းမောင်းနှင်လာသည့်မော်တော်ဆိုင်ကယ်အား ရပ်တန့်စစ်ဆေးရှာဖွေခဲ့ပါတယ်။

ထိုသို့ရှာဖွေရာ စိတ်ကြွရူးသွပ်ဆေးပြား ၉၇၅၀ ပြား (ကာလပေါက်စျေးတန်ဖိုးငွေကျပ် ၁၉၅ သိန်း)နှင့် လက်ကိုင်ဖုန်း ၁ လုံးတို့အား တွေ့ရှိသိမ်းဆည်းရမိခဲ့ပြီး စစ်ဆေးဖော်ထုတ်ချက်အရ မွန်းလွဲ ၁ နာရီ ၁၅ မိနစ်က မောင်တောမြို့၊ မြို့မအရှေ့ရပ်ကွက်တွင် ဒေါ်စိုးစိုးအေး(ခ)မိုးမိုးအေး(ခ)စိုးစိုး၊ ၀င်းချေ နှင့် အောင်နီလာ တို့အား လက်ကိုင်ဖုန်း ၃ လုံး နှင့် လည်းကောင်း၊ မွန်လွဲ ၂ နာရီက ဝေသာလီကျေးရွာတွင် စိန်လှထွန်း၊ အောင်ချမ်းအေး နှင့် အောင်မျိုး၀င်း တို့အား မော်တော်ဆိုင်ကယ် ၂ စီး၊ လက် ကိုင်ဖုန်း ၃ လုံးတို့နှင့်လည်းကောင်း၊ မွန်လွဲ ၃နာရီခွဲအချိန်တွင် ခရေမြိုင်ကျေးရွာရှိ သန်း၀င်း၏နေအိမ်အား ၀င်ရောက်ရှာဖွေရာ ၎င်းအားမတွေ့ရှိဘဲ ခိုင်မျိုးလင်းနှင့်အတူ နေအိမ်ခြံ၀င်းအတွင်းမှ စိတ်ကြွရူးသွပ်ဆေးပြား ၁၄၉၃၀ ပြား (ကာလပေါက်စျေးတန်ဖိုးငွေကျပ် ၂၉၈.၆ သိန်း) နှင့် လက်ကိုင်ဖုန်း ၁ လုံးတို့အားလည်းကောင်း၊ ညနေ ၄ နာရီ ၂၀ မိနစ်တွင် မြို့မအနာက်ရပ်ကွက်တွင် ဇော်မီအား လက်ကိုင်ဖုန်း ၁ လုံးနှင့်လည်းကောင်း တွေ့ရှိသိမ်းဆည်းရမိခဲ့ပါတယ်။

ထို့ကြောင့် စိုးအောင်သိန်း(၃၂)နှစ်၊ ဒေါ်စိုးစိုးအေး(ခ)မိုးမိုးအေး(ခ)စိုးစိုး(၄၅)နှစ်၊ ၀င်းချေ(၃၆)နှစ်၊ အောင်နီလာ (၅၄)နှစ်၊ စိန်လှထွန်း(၄၂)နှစ်၊ အာင်ချမ်းအေး(၃၈)နှစ်၊ အောင်မျိုး၀င်း(၃၁)နှစ်၊ ခိုင်မျိုးလင်း(၂၂)နှစ်၊ ဇော်မီ (၆၀)နှစ် နှင့် သန်းဝင်းတို့အား ပြင်ဖြူနယ်မြေရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေအရ အမှုဖွင့်အရေးယူထားရှိပြီး ကွင်းဆက်များ ဖော်ထုတ်လျက်ရှိကြောင်း သိရှိရပါတယ်။

ymg_mnn
#Yangon_Media_Group

#Local_News
Published_ 12 June 2022

ရန်ကုန်တိုင်းဒေသကြီး ဒဂုံမြို့သစ် (ဆိပ်ကမ်း)မြို့နယ်ရှိ ရတနာနှင်းဆီအိမ်ရာစီမံကိန်းမှ လူနေတိုက်ခန်းများ စတင်ရောင်းချပေးနေပြီဖြစ်ကြောင်း မြို့ ပြနှင့်အိမ်ရာဖွံ့ဖြိုးရေး ဦးစီးဌာနမှ သိရပါတယ်။

အဆိုပါစီမံကိန်းသို့ ဆောက်လုပ်ရေးဝန်ကြီးဌာန ဒုတိယဝန်ကြီးက ဇွန် ၁၁ ရက်တွင် ကွင်းဆင်းစစ်ဆေးခဲ့ကြောင်း သိရပါတယ်။

ရတနာနှင်းဆီအိမ်ရာမှာ အခန်းအကျယ် ၆၀၀ နဲ့ ၁၂၀၀ စတုရန်းပေကျယ်ဝန်းပြီး တစ်စတုရန်းပေ အနည်းဆုံးကျပ် ၁ သိန်းနှုန်းမှ စပြီးရောင်းချပေးနေပြီဖြစ်ကြောင်း သိရပါတယ်။

ဝယ်ယူလိုပါက ရတနာနှင်းဆီ အိမ်ရာအရောင်းခန်းမနှင့် ဗိုလ်တထောင်မြို့နယ်
မြို့ပြနှင့်အိမ်ရာဖွံ့ဖြိုးရေးဦးစီးဌာနမှာ ဆက်သွယ်ဝယ်ယူနိုင်ကြောင်း သတင်းရရှိပါတယ်။

ymg_mnn
#Yangon_Media_Group

#Local_News
Published_ 12 June 2022

ကျန်းမာရေးဝန်ကြီးဌာန၊ အစားအသောက်နှင့် ဆေးဝါးကွပ်ကဲရေးဦးစီးဌာနက ပြည်တွင်း၌ ရောင်းချနေသည့် အလှကုန်ပစ္စည်းများကို စစ်ဆေးခဲ့ရာ ဖော်ပြပါအလှကုန်ပစ္စည်း (၄) မျိုးသည် အစားအသောက်နှင့် ဆေးဝါးကွပ်ကဲရေး ဦးစီးဌာန၌ မှတ်တမ်းတင်ထားခြင်းမရှိသည့်အပြင် ကျန်းမာရေးအတွက် ဘေးအန္တရာယ်ဖြစ်စေနိုင်သော တားမြစ်ဓါတုပစ္စည်းများ ပါဝင်နေကြောင်း စစ်ဆေးတွေ့ရှိရသဖြင့် အများပြည်သူလူထုသုံးစွဲရန် မသင့်တော်ပါကြောင်း ထုတ်ပြန်ကြေညာလိုက်ပါတယ်။

တားမြစ်ဓါတုပစ္စည်းများသည် အရေပြားယားယံခြင်း၊ ရောင်ရမ်းခြင်း၊ အဖြူအနီကွက်များ ဖြစ်ခြင်း၊ အရေပြားမှတဆင့် ခန္ဓာကိုယ်အတွင်းသို့ စုပ်ယူ၍ထုံကျင်ခြင်း၊ ကြွက်သားတုန်ခါခြင်း၊ ပင်ပန်းနွမ်းနယ်ခြင်း၊ ခေါင်းကိုက်ခြင်းနှင့် စိတ်ကျရောဂါများအပြင် ရေရှည်သုံးစွဲပါက ကျောက်ကပ်ပျက်စီးခြင်းနှင့် အခြားရောဂါများဖြစ်ပွားနိုင်တယ်လို့ ဆိုပါတယ်။

အလှကုန်ပစ္စည်းတင်သွင်းဖြန့်ဖြူးရောင်းချသည့် ကုမ္ပဏီနှင့်လက်လီလက်ကားဆိုင်များသည် အစားအသောက်နှင့် ဆေးဝါးကွပ်ကဲရေးဦးစီးဌာနတွင် မှတ်တမ်းတင်ထားခြင်းမရှိသော အများပြည်သူသုံးစွဲရန်မသင့်ကြောင်း ကြေညာထားသည့် အလှကုန်ပစ္စည်းများ တင်သွင်းဖြန့်ဖြူးရောင်းချခြင်းများကို ကျင့်ဝတ်(Ethic)အရ လုံးဝမပြုလုပ်ရန်နှင့် လိုက်နာဆောင်ရွက်ခြင်းမရှိပါက သက်ဆိုင်ရာ အာဏာပိုင်အဖွဲ့အစည်းက ပြည်သူ့ကျန်းမာရေး ဆိုင်ရာ ဥပဒေပုဒ်မ ၃၊ အပိုဒ် (၃) (ဃ) အရ အရေးယူဆောင်ရွက်သွားမည်ဖြစ်ကြောင်း အသိပေးကြေညာထားခြင်း ဖြစ်ပါတယ်။

ymg_mnn
#Yangon_Media_Group.