#DailyNews
Published - 16 June 2022

၁။ တက္ကသိုလ်ဝင်တန်းအပြင်ဖြေ ဖြေမည့်သူများရှိလာမည်ဖြစ်၍ ပုဂ္ဂလိကကိုယ်ပိုင်ကျောင်းများတွင် အပ်နှံမည့်သူပိုများလာနိုင်

၂။ ဒလတံတားစီမံကိန်းနယ်မြေအနီးရှိ အိမ်၊ ခြံ၊ မြေဈေး မြင့်တက်သော်လည်း ရောင်းအားကျဆင်း

၃။ နေ့စဉ်မိုးလေဝသသတင်း။

၄။ ရာစုနှစ်ဝက်နီးပါးဖွင့်လှစ်ခဲ့သည့် ဟောင်ကောင်မှနာမည်ကျော် ရေပေါ်စားသောက်ဆိုင် ပိတ်သိမ်းလိုက်ရ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Published_ 16 June 2022

အိန္ဒိယနိုင်ငံ၊ နယူးဒေလီမြို့၊ Sushma Swaraj Bhawan ၌ ဇွန် ၁၅ ရက်က ကျင်းပပြုလုပ်ခဲ့တဲ့ (၂၄) ကြိမ်မြောက် အာဆီယံ-အိန္ဒိယ အဆင့်မြင့်အရာရှိကြီးများ အစည်းအဝေးသို့ မြန်မာအဆင့်မြင့်အရာရှိကြီးကိုယ်စား အိန္ဒိယနိုင်ငံဆိုင်ရာ မြန်မာသံအမတ်ကြီး ဦးမိုးကျော်အောင် တက်ရောက်ခဲ့ပါတယ်။

အစည်းအဝေးတွင် အိန္ဒိယအဆင့်မြင့် အရာရှိကြီး H.E. Mr. Saurabh Kumar နှင့် အာဆီယံ-အိန္ဒိယဆွေးနွေးဖက် ဆက်ဆံရေး ညှိနှိုင်းရေးမှူးဖြစ်သည့် စင်ကာပူ အဆင့်မြင့် အရာရှိကြီး H.E. Mr Albert Chua တို့က ပူးတွဲသဘာပတိအဖြစ် ဆောင်ရွက်ခဲ့ကြပါတယ်။

အဆိုပါအစည်းအဝေးတွင် အာဆီယံအဖွဲ့ဝင်နိုင်ငံများမှ အဆင့်မြင့်အရာရှိကြီးများ၊ ကိုယ်စားလှယ်များနှင့် အာဆီယံအတွင်းရေးမှူးချုပ်တို့ တက်ရောက်ခဲ့ကြကြောင်း သတင်းရရှိပါတယ်။

ymg-mnn
#Yangon_Media_Group

#LocalNews
Published - 16 June 2022

လူမှုကွန်ရက်ပေါ်တွင်ရောင်းနေသည့် ရေစင်ရေမန်း တွင် FDA ခွင့်ပြုချက် မပါသောကြောင့် သက်ဆိုင်ရာဝန်ကြီးဌာနမှ အရေးယူဆောင်ရွက်ပေးရန် တောင်းဆိုထားကြောင်း မြန်မာနိုင်ငံရေသန့်စက်ရုံလုပ်ငန်းရှင်များအသင်းမှ သိရသည်။

"ကျွန်တော်တို့ဆီကို တိုင်စာတတ်တယ်။ တိုင်စာထဲမှာ နှစ်သောင်းပေးပြီးဝယ်နေရတယ်။ FDA လက်မှတ်လည်းမပါဘူး။ သေချာစစ်ကြည့်လိုက်တော့လည်း FDA ခွင့်ပြုချက်မပါဘူး။ မပါတဲ့အတွက် ကျွန်တော်က မည်သည့်ရေသန့်ကိုမဆို မြန်မာတစ်နိုင်ငံလုံးမှာ ရောင်းမယ်ဆိုရင်တော့ FDA ခွင့်ပြုချက်လိုတယ်။ ဒါကြောင့် FDA လည်းမပါဘူး ဒီဟာကိုအရေးယူပေးပါဆိုပြီး လူမှုကွန်ရက်မှာ ကျွန်တော်ရေးထားတယ်"ဟု မြန်မာနိုင်ငံရေသန့်စက်ရုံလုပ်ငန်းရှင်များအသင်းမှ ဥက္ကဌ ဦးရဲထွဋ်က ပြောသည်။

လူမှုကွန်ရက်တွင်ရေးသားထားမှုကြောင့် အဆိုပါရေစင်ရေမန်းထုတ်သည့်စက်ရုံမှ မန်နေဂျာဆိုသူက သူတို့အနေဖြင့် လက်ရှိတွင်လည်း နာမည်ကြီးရေသန့်ထုတ်နေသည့်အတွက် FDA မလိုဟု ပြန်ပြောခဲ့ကြောင်း ၎င်းက ပြောသည်။

အဆိုပါ ရေစင်ရေမန်းကို ပြီးခဲ့သည့် ၂၀၂၁ ခုနှစ်ကပင် စတင်ရောင်းချခဲ့ကြောင်းလည်း သိရသည်။

ymg/sth
#Yangon_Media_Group

#LocalNews
Published _ 16 June 2022

ပြည်သူများ ဈေးနှုန်းသက်သာစွာဖြင့် ဝယ်ယူစားသုံးနိုင်ရေးအတွက် စိုက်ပျိုးမွေးမြူရေးလုပ်ငန်းများကို အောင်မြင်အောင်ဆောင်ရွက်၍ အသား၊ ငါးနှင့် ဟင်းသီးဟင်းရွက်များကို အပြည့်အဝထုတ်လုပ်ရန် ရည်ရွယ်ချက်များဖြင့် ညောင်နှစ်ပင်စိုက်ပျိုးမွေးမြူရေးအထူးဇုန် (၁)တွင် ဟင်းသီးဟင်းရွက် လက်ကားဈေး တည်ဆောက်သွားမည်ဖြစ်ကြောင်း ရန်ကုန်မြို့တော်စည်ပင်သာယာရေးကော်မတီမှ သိရသည်။

"စိုက်ဧကတွေ အားလုံး ပြည့်ဝစွာစိုက်ပျိုးပြီး မြေကိုအကျိုးရှိရှိအသုံးချဖို့နဲ့ စိုက်နည်းစနစ်တွေ မှန်ကန်စွာစိုက်ပျိုးဖို့၊ ရေတွေကိုလည်း အကျိုးရှိရှိအသုံးချဖို့၊ အထွက်နှုန်းကောင်းမွန်အောင်ဆောင်ရွက်ဖို့တွေအပြင် မွေးမြူရေးလုပ်ငန်းတွေ ဆောင်ရွက်ရာမှာ စနစ်တကျ မွေးမြူဖို့နဲ့ စိုက်ပျိုးမွေးမြူရေး ဆောင်ရွက်ဖို့အတွက် ခွင့်ပြုပေးထားတဲ့မြေတွေကို ပြည့်ပြည့်ဝဝ စိုက်ပျိုးမွေးမြူဖို့တွေအပါအဝင် စိုက်ပျိုးမွေးမြူရေးနဲ့ မသက်ဆိုင်တဲ့ မြေအသုံးချမှုမရှိစေဖို့ တာဝန်ရှိသူတွေအနေနဲ့ စနစ်တကျ ကြပ်မတ်ဆောင်ရွက်ဖို နိုင်ငံတော်အကြီးအကဲက လမ်းညွှန်မှာကြားခဲ့တာကြောင့် လမ်းညွှန်ချက်နဲ့အညီ မြေကွက်လပ်မရှိစေဘဲ အားလုံးစိုက်ပျိုး၊ မွေးမြူရေးလုပ်ဆောင်ကြဖို့အပြင် စိုက်ပျိုးမွေးမြူရေးလုပ်ငန်းရှင်များ အနေနဲ့ လုပ်ငန်းတွေ အကောင် အထည်ဖော်နိုင်ရေးအတွက် ရန်ကုန်မြို့တော်စည်ပင်သာယာရေးကော်မတီကလည်း လိုအပ်တာတွေ ပံ့ပိုးသွားမယ်" ဟု ရန်ကုန်တိုင်းဒေသကြီး စည်ပင်သာယာရေးဝန်ကြီး၊ ရန်ကုန်မြို့တော်စည်ပင်သာယာရေး ကော်မတီ ဥက္ကဋ္ဌ (မြို့တော်ဝန်) ဦးဗိုလ်ဌေးက ပြောသည်။

ညောင်နှစ်ပင်စိုက်ပျိုးမွေးမြူရေး အထူးဇုန်သည် ရန်ကုန်တိုင်းဒေသကြီး လှည်းကူးမြို့နယ်နှင့် မှော်ဘီမြို့နယ်အတွင်း ခရိုင်ချင်းဆက်လမ်း၏ မြောက်ဘက်၊ ရန်ကုန်-မန္တလေး အမြန်လမ်းမကြီးနှင့် ရန်ကုန်-ပြည်လမ်းအကြား တည်ရှိပြီး ရန်ကုန်မြို့တော်နေပြည်သူများ သား၊ ငါး ဟင်းသီးဟင်းရွက် စားသောက်ကုန် ဖူလုံစေရေးအတွက် တစ်ယူနစ်လျှင် ၅ ဧက အကျယ် အဝန်းရှိ မြေနေရာများဖော်ထုတ်၍ စိုက်ပျိုးမွေးမြူရေးလုပ်ငန်းများ ဆောင်ရွက်လျက်ရှိကြောင်း ယင်းမှ သိရသည်၊၊

ညောင်နှစ်ပင်စိုက်ပျိုး၊ မွေးမြူရေး အထူးဇုန်ဖွံ့ဖြိုးရေးတွင် အထူးဇုန် (၁) ၏ အကျယ်မှာ ၃၇၈၀ ဧက၊ အထူးဇုန် (၂)၏ အကျယ်မှာ ၄၉၀၁ ဧက၊ အထူးဇုန် (၃)၏ အကျယ်မှာ ၃၇၇၂ ဧကရှိပြီး ယခုအခါ စိုက်ပျိုးမွေးမြူရေး ဖြစ်ထွန်းအောင်မြင်စေရေးအတွက် ရန်ကုန်တိုင်းဒေသကြီးအစိုးရအဖွဲ့မှ ကြီးကြပ်ဆောင်ရွက်လျက်ရှိကြောင်းလည်း သိရသည်။

ymg/NN
#Yangon_Media_Group

#LocalNews
Published - 16 June 2022

'မရှိ၍ မလင်းသူမရှိစေရ'(မွန်ပြည်နယ်)အစီအစဥ်ဖြင့် ချောင်းဆုံမြို့နယ်က စီစစ်ပြီးခွဲစိတ်ရန် ကျန်ရှိတဲ့ လူနာ(၅)ဦးကိုဇွန်လ (၁၄)ရက်တွင် ထပ်မံခွဲစိတ်ပေးခဲ့ပြီး ဇွန်လ(၂၂)ရက်တွင်လည်းထပ်မံခွဲစိတ်ကုသ ပေးမည်ဖြစ်ကြောင်း သိရသည်၊၊

ချောင်းဆုံမြို့နယ်တွင်းက ကမာမိုကျေးရွာက ဒေါ်ခင်ကြည်၊ ကမာမိုကျေးရွာက ဒေါ်မြင့်မြင့်စိန်၊မုနိုင်းကျေးရွာကဒေါ်မြနွယ်၊ ကော့ဒကဲ့ကျေးရွာက ဒေါ်လွန်းအေးတို့ကိုဇွန်လ (၁၄)ရက်တွင်မျက်စိခွဲစိတ်ကုသ ပေးခဲ့သည်၊၊

မွန်ပြည်နယ်၊ ပြည်သူ့ကျန်းမာရေး/ကုသရေးဦးစီးဌာနမှူး ဒေါက်တာနန္ဒဝင်းဦးဆောင်၍ မွန်ပြည်နယ်ပြည်သူ့ကျန်းမာရေးဦးစီးဌာနက ဆောင်ရွက်ပေးနေတာဖြစ်ပြီးမော်လမြိုင်ဆေးရုံကြီးမှ ဆေးရုံအုပ်ကြီး မျက်စိဆရာဝန်ကြီးများ သူနာပြုဆရာ ဆရာမများက အလှူရှင်များ၏အလှူငွေဖြင့် ခွဲစိတ်ကုသပေးနေခြင်း ဖြစ်သည်၊၊

မွန်ပြည်နယ်အတွင်းရှိမျက်စိဝေဒနာရှင်များ မိမိတို့နီးစပ်ရာ ပြည်သူ့ကျန်းမာရေးဌာနများကို ဆက်သွယ်နိုင်ကြောင်းနှင့် အလှူရှင်များလည်း ဆက်သွယ်လှူဒါန်းနိုင်ကြောင်းသိရသည်၊၊

ymg/tthl
#Yangon_Media_Group

#LocalNews
Published_16 June 2022

ရန်ကုန်တိုင်းဒေသကြီး၊ မြောက်ဥက္ကလာပမြို့နယ်ရှိ ဧရာဝတီဘဏ်ခွဲတစ်ခုကို မီနီဘတ်စ်တစ်စီး ဝင်တိုက်မိ၍ ညစောင့်ဝန်ထမ်းတစ်ဦး ဒဏ်ရာရသွားကြောင်း တွဲလက်ကူမယ် 'ဌ'လူငယ် ပရဟိတအဖွဲ့က သိရသည်။

"ဘဏ်ညစောင့် ဝန်ထမ်း အသက်၄၂နှစ်အရွယ်လောက်ရှိတဲ့ အမျိုးသားပါ။ ဦးခေါင်းမှာ ၇ ချက် ချုပ်ရပါတယ်။ ပြီးတော့ ကျောရိုးထိခိုက်တာတွေကို ဓါတ်မှန်ရိုက်ပေးတယ်။ အဲဒီမီနီဘတ်စ်က အရှိန်လွန်ပြီး ဝင်တိုက်မိတာပါ။ ဘဏ်ရှေ့မှာ ဂပ်ထားတဲ့ ကားနှစ်စီးလည်း ထိသွားသေးတယ်"ဟု တွဲလက်ကူမယ် 'ဌ'လူငယ် ပရဟိတအဖွဲ့၏ တာဝန်ရှိသူက ပြောသည်။

ဇွန်လ ၁၆ ရက် နံနက်တစ်နာရီ မထိုးမီက ၁၂ နာရီကျော်က မြောက်ဥက္ကလာပမြို့နယ်၊ သီရိရတနာဝင်းရှေ့ရှိ ဧရာဝတီဘဏ်ကို အဆိုပါ မီနီဘတ်စ် အဝါရောင်ဝင်တိုက်မိသည့်အတွက် ဘဏ်ရှေ့ကားနှစ်စီးနှင့် ဘဏ်တံခါးများ ပျက်စီးခဲ့ပြီး အတွင်း၌ရှိနေသော ညစောင့်ဝန်ထမ်းနှစ်ဦးအနက်တစ်ဦးမှာ သံတံခါးဖြင့် ရိုက်မိကာ ဦးခေါင်းနှင့် ကျောရိုးထိခိုက်ဒဏ်ရာများရရှိခဲ့၍ မေဓာဝီဆေးရုံသို့ ပို့ဆောင်ပေးခဲ့ကြောင်း သိရသည်။

ယင်း မီနီဘတ်စ်ယာဉ်မှာ အောင်မင်္ဂလာအဝေးပြေးဘက်သို့ ထွက်ပြေးတိမ်းရှောင်သွားကြောင်းလည်း သိရသည်။

ymg/mt
#Yangon_Media_Group