#LocalNews
Published _ 22 June 2022

ရန်ကုန်တိုင်းဒေသကြီးတွင် ယခုနှစ်မိုးရာသီ၌ မိုးစပါးဧကပေါင်း ဆယ့်တစ်သိန်းခြောက်သောင်းလေးထောင့်ငါးရာ စိုက်ပျိုးရန် မျှော်မှန်းထားကြောင်း ရန်ကုန်တိုင်းဒေသကြီး စိုက်ပျိုးရေးဦးစီးဌာမှ သိရသည်။

လက်ရှိတွင် မြို့နယ်အချို့၌ ဧကပေါင်း ၁ သိန်းကျော်ခန့် စိုက်ပျိုးပြီးစီးနေကြောင်း၊ တိုက်ကြီး၊ ခရမ်း၊ ကျောက်တန်းမြို့နယ်များတွင် ပြီးခဲ့တဲ့ မေလမှ စတင်၍ မိုးကြိုအခြောက်ကျဲ စနစ်ဖြင့် စိုက်ပျိုးခဲ့ကြပြီး နောက်ပိုင်းတွင် တွံတေး၊ ကော့မှူး၊ လှည်းကူး၊ မှော်ဘီစသည့် မြို့နယ်တွေမှာ အစိုကျဲစနစ်ဖြင့် စိုက်ပျိုးလျက်ရှိကြောင်း သိရသည်။

ရန်ကုန်တိုင်း‌‌ဒေသကြီးအတွင်း မိုးစပါးကို စက်တင်ဘာလ လယ်တွင် ၉၀ ရာခိုင်နှုန်း ပြီးစီးသည်အထိ စိုက်ပျိုးကြပြီး ကျန်ရှိနေသည့် ၁၀ ရာခိုင် နှုန်းကို နိုဝင်ဘာလကုန်အထိ စိုက်ပျိုးကြကြောင်း သိရသည်။

ယခုနှစ် မိုးစပါးရာသီတွင် စပါးအမျိုးအစားပေါင်း ၃၅မျိုး စိုက်ပျိုးနေပြီး ရွှေဝါထွန်း၊ မနောသုခ၊ ဆင်းသွယ် စသည့် ပြည်ပသို့တင်ပိုရန် အရည်အသွေးမြင့် စပါးမျိုးများနှင့် ပြည်တွင်းစားသုံးရန် ပေါ်ဆန်းမွှေး၊ ဧရာ၊ မှော်ဘီသုံး စသည့် စပါးမျိုးများကို တိုးချဲ့စိုက်ပျိုးလာကြကြောင်း သိရသည်။

ymg/NN
#Yangon_Media_Group

#LocalNews
Published_22 June 2022

ရန်ကုန်ရှိ နှစ်ပေါင်း ၁၂ဝဝ ကျော်သက်တမ်းရှိ ရှေးဟောင်းဝေသာလီခေတ် ကြေးဆီမီးခွက်ကို ရခိုင်ပြည်နယ်သို့ ပြန်လည်ပို့ဆောင်ခဲ့ပြီ ဖြစ်ကြောင်း သိရသည်။

ယင်း ရှေးဟောင်းကြေးဆီမီးခွက်ကို ကိုင်ဆောင်ထားသည့် အမြင့်ပေ ၉ လက်မရှိသော ရုပ်တုကို အေဒီ ၃ ရာစုနှင့် ၈ ရာစုကြားကာလက သွန်းလုပ်ခဲ့ခြင်းဖြစ်နိုင်ကြောင်း၊ ရခိုင်သမိုင်းသုတေသီ ကျောက်စာဝန် ဦးစံရွှေဘုက ၁၉၂ဝ ပြည့်နှစ်ခန့်တွင် ရခိုင်ပြည်နယ်၊ မြောက်ဦးမြို့၊ ဝေသာလီကျေးရွာ၏ အရှေ့မြောက်ဘက် ဝေသာလီမြို့ဟောင်းထဲမှ တူးဖော်ရရှိခဲ့ခြင်းဖြစ်ကြောင်း သိရသည်။

ဦးစံရွှေဘုကတွေ့ရှိချိန်မှစ၍ ထိန်းသိမ်းလာခဲ့ပြီးနောက် ဦးစံရွှေဘု၏မြေးဖြစ်သူ ဒေါ်ခင်အေးဇံတိုမိသားစုက ၂ဝ၂ဝ ပြည့်နှစ်၊ ဇန်နဝါရီလ ၇ ရက်တွင် ရန်ကုန်မြို့ရှိ အမျိုးသားပြတိုက်၌ ရခိုင်တိုင်းရင်းသားလူမျိုးရေးရာဝန်ကြီး ဦးဇော်အေးမောင်တို့ထံ စာချုပ်စာတမ်းနှင့် လွှဲပြောင်းပေးအပ်ခဲ့ကြောင်း၊ ယင်းနောက် ဇွန်လ ၂၁ ရက်တွင် စစ်တွေမြို့ရှိ ဦးဥတ္တမခန်းမ၌ မိသားစုဝင်များကိုယ်စား ဦးတင်အောင်စိုး(ယဉ်ကျေးမှုဝန်ကြီးဌာန၊ ညွှန်ကြားရေးမှူး(ငြိမ်း)က ရခိုင်ပြည်နယ်ဝန်ကြီးချုပ် ဒေါက်တာအာင်ကျော်မင်းထံ လွှဲပြောင်းပေးအပ်ခဲ့ခြင်းဖြစ်ကြောင်း၊ အခမ်းအနားတွင် ပြည်ထောင်စုရွေးကောက်ပွဲကော်မရှင်အဖွဲ့ဝင် ဒေါ်နုမြဇံနှင့် တိုင်းရင်းသားလူမျိုးများရေးရာဝန်ကြီးဌာန ဒုဝန်ကြီး ဦးဇော်အေးမောင်တို့ တက်ရောက်ခဲ့ကြကြောင်း သိရသည်။

ယခုအခါ အဆိုပါကြေးဆီမီးခွက်ကို အများပြည်သူလာရောက်လေ့လာနိုင်ရန်ရည်ရွယ်၍ စစ်တွေမြိုရှိ ယဉ်ကျေးမှုပြတိုက်တွင် ထိန်းသိမ်းသွားမည်ဖြစ်ကြောင်း မြောက်ဦးရှေးဟောင်းအမွေအနှစ်ထိန်းသိမ်းစောင့်ရှောက်ရေးအဖွဲ့ဥက္ကဋ္ဌ ဒေါ်ခင်သန်းက YMG ကို ပြောသည်။

"ဇွန်လ ၂၀ ရက်နေ့က စစ်တွေကို လေယာဉ်နဲ့သယ်ယူခဲ့တယ်။ ဇွန်လ ၂၁ ရက်နေ့မှာ အခမ်းအနားနဲ့ အပ်နှံခဲ့တယ်။ ဒါက ဝေသာလီခေတ် ဆီမီးခွက်ဖြစ်တာကြောင့် ရခိုင့်အမွေအနှစ်ကို ရခိုင်မှာပြန်ပြီး ပြတိုက်မှာထားတယ်ဆိုတာ ကောင်းတယ်လေ။ Primary Resource ပျောက်ပျက်လို့မရတဲ့ ပစ္စည်းတွေဆိုတော့ ပြတိုက်မှာ တရားဝင်ထိန်းသိမ်းထားတာက အကောင်းဆုံးပါပဲ"ဟု ယင်းကပြောသည်။

ymg/mt
#Yangon_Media_Group

#LocalNews
Published_22 June 2022

ရန်ကုန်တိုင်းဒေသကြီး မှော်ဘီမြို့နယ်တွင်ဖမ်းမိသော ကာလတန်ဖိုး ငွေကျပ် ၄ ဒသမ ၂၁ ဘီလီယံတန်ဖိုးရှိ စိတ်ကြွရူးသွပ်ဆေးပြား ၄၂ သိန်းကျော်၏ ပိုင်ရှင်မှာမောင်တောမြို့မရဲစခန်း၌ ဖမ်းဆီးခံနေရသူဖြစ်ကြောင်း မူးယစ်ဆေးဝါး နှိမ်နင်းရေးအဖွဲ့က ထုတ်ပြန်ထားခြင်း ဖြစ်သည်။

ပြီးခဲ့သည့် ဇွန်လ ၁ ရက် ည ၁၀ နာရီခွဲအချိန် မှော်ဘီမြို့နယ်၊ မြောင်းတကာကျေးရွာ၊ အမှတ်(၁) ရပ်ကွက်ရှိ အောင်မင်းဆိုသူ၏နေအိမ်ကို သတင်းအရရှာဖွေရာ ခြံစောင့် ခင်မောင်ထွန်းနှင့် ကိုကိုနိုင်တို့ နှစ်ဦးနှင့်အတူ နေအိမ်မှသနပ်ခါးဘူးများ၊ ဇီးသီးထုပ်များနှင့် အုန်းသီးခြောက်များအတွင်းထည့်သွင်း သိုဝှက်ထားသည့် အဆိုပါ မူးယစ်ဆေးများကို ဖမ်းဆီမိခဲ့ခြင်း ဖြစ်ကြောင်း ထုတ်ပြန်ချက်တွင် ဖော်ပြထားသည်။

အဆိုပါ စိတ်ကြွရူးသွပ်ဆေးပြားများပိုင်ရှင် အောင်မင်းမှာ ၂၀၁၈ ခုနှစ်၊ သြဂုတ်လတွင် ရခိုင်ပြည်နယ်၊ မောင်တောမြို့နယ်၊ မြို့မကညင်တန်းကျေးရွာ၌ စိတ်ကြွရူးသွပ်ဆေးပြား ၁၄၇၇၅၀ ပြား ဖမ်းဆီးရမိမှုမှ ကွင်းဆက်တရားခံပြေးတစ်ဦးဖြစ်၍ ၂၀၂၂ ခုနှစ်၊ မေလ ၁၆ ရက်တွင် မောင်တောမြို့မရဲစခန်း၌ ဖမ်းဆီးခံနေရသူဖြစ်ကြောင်း၊ ၎င်းတိုအား ဥပဒေအရအရေးယူထားရှိပြီး ကွင်းဆက်ပြစ်မှုကျူးလွန်သူများအား ဆက်လက်စစ်ဆေး ဖော်ထုတ်လျက်ရှိကြောင်း သိရသည်။

ymg/mt
#Yangon_Media_Group

#LocalNews
Published _ 22 June 2022

ရေချို၊ ရေငံ ငါး သယံဇာတများ ကြွယ်ဝစွာတည်ရှိသည့် မြန်မာနိုင်ငံတွင် ပင်လယ်ငါးထုတ်လုပ်မှုအပါအဝင် ရေချိုငါးထုတ်လုပ်မှုများနှင့် ငါးဖမ်းဆီးရရှိမှုများ တစ်နှစ်ထက် တစ်နှစ်သိသိသာသာ လျော့နည်းလာကြောင်း သိရသည်။

မြန်မာ့ရေပိုက်နက်အတွင်း ငါးသယံဇာတတည်ရှိမှု အခြေအနေနှင့်စပ်လျဉ်း၍ နော်ဝေသုတေသန ရလဒ်များအရ မြန်မာ့ပင်လယ်ပြင်တွင် ငါးသယံဇာတများ သိသိသာသာလျော့နည်းလာပြီး ၂၀၁၈ ခုနှစ်က ရေပေါ်ငါးထုထည်ပမာဏမှာ လွန်ခဲ့သည့် ၁၉၇၉ ခုနှစ်၊ ၁၉၈၀ ပြည့်နှစ်များနှင့် နှိုင်းယှဉ်ပါက ၈၀ ရာခိုင်နှုန်းအထိ လျော့နည်းသွားကြောင်း စိုက်ပျိုးရေးမွေးမြူရေး နှင့်ဆည်မြောင်းဝန်ကြီးဌာန၊ ငါးလုပ်ငန်းဦးစီးဌာနမှ သိရသည်။

မြန်မာနိုင်ငံအနေဖြင့် မြစ်၊ ချောင်း၊ အင်းအိုင်များ ပေါများသောကြောင့် ငါးသယံဇာတများ ကြွယ်ဝသော နိုင်ငံဖြစ်ပြီး ကမ္ဘာပေါ်တွင် ငါးနှင့်သယံဇာတများပိုင်ဆိုင်မှု အဆင့် ၄ တွင်ရှိနေခြင်း ဖြစ်ကြောင်း သိရသည်။

ရေချိုငါးလုပ်ငန်းမှာ နိုင်ငံတော်၏ စီးပွားရေး၊ စားနပ်ရိက္ခာဖူလုံရေးနှင့် ကျေးလတ်ဒေသ အသက်မွေးဝမ်းကျောင်းအတွက် အဓိကအရင်းအမြစ်တစ်ခုဖြစ်ပြီး မြန်မာနိုင်ငံ ရေချိုငါးဖမ်းလုပ်ငန်းရဲ့ ထုတ်လုပ်မှုအနေဖြင့် အရှေ့တောင်အာရှနိုင်ငံများတွင် အမြင့်ဆုံးဖြစ်ပြီး ပြည်တွင်းငါးထုတ်လုပ်မှု၏ ၂၈ရာခိုင်နှုန်းခန့်ရှိကြောင်း ဌာန၏ စစ်တမ်းများအရသိရသည်။

ယင်းလုပ်ငန်း၏ ထုတ်လုပ်မှုသည် ၂၀၁၅ ခုနှစ်တွင် တန်ချိန် ၁ ဒသမ ၅သန်းအထိ ရှိခဲ့ပြီး လူဦးရေ ၁၅သန်းအတွက် အလုပ်အကိုင်အခွင့်အလမ်းများ ဖန်တီးပေးနေကြောင်း၊ ပြည်တွင်းငါးအစိုစားသုံးမှု ၂၇ ရာခိုင်နှုန်းကိုလည်း ထောက်ပံ့ပေးနေကြောင်း သိရသည်။

ymg/NN
#Yangon_Media_Group

#Local_News
Published - 21 June 2022

ဆရာတော်၊ သံဃာတော်တွေရဲ့ ပုံတူတွေ၊ ဘိုးမင်းခေါင်၊ အစ်မတော်မြနန်းနွယ်စတဲ့ ပုဂ္ဂိုလ်တွေရဲ့ပုံတူတွေကို ဆီလီကွန်ဖြင့်ပုံတူတော် ပြုလုပ်ပြီး ပူဇော်ကြသူတွေများပြားနေတယ်လို့ ပုံတူဆီလီကွန်ပန်းပုပြုလုပ်သူ ကိုစိုးသူဝင်းကပြောပါတယ်၊၊

#Yangon_Media_Group

#Local_News
Published_21 June 2022

ထိုင်း-မလေးရှား နယ်စပ်မှာ ထိုင်းနိုင်ငံသားတစ်ယောက် သေဆုံးခဲ့တဲ့ ကိစ္စနဲ့ပတ်သက်လို့ မြန်မာနိုင်ငံသားတစ်ယောက်ရဲ့ လက်ဗွေရာတွေ့တယ်လို့ ဆိုတဲ့အတွက် အဲဒီမြန်မာနိုင်ငံသားကို ထိန်းသိမ်းပြီး စစ်ဆေးနေပါတယ်။

#Yangon_Media_Group