#Local_News
Published - 30 June 2022

မသမာသူများမှ KBZ Pay အမည်ဖြင့် ငွေကြေးလိမ်လည်ထုတ်ယူမှုများရှိနေကြောင်း သိရသည်။

"ပထမတုန်းက MPT ရုံးချုပ်ကဆိုပြီး ဖုန်းဝင်လာတယ်။ MPT Bonus ရလို့ K Pay ထဲငွေထည့်ပေးချင်လို့ဆိုပြီး ပြောပါတယ်။ K Pay ထဲငွေဝင် မဝင်စစ်ခိုင်းပါတယ်။ မဝင်ဘူး ပြောတော့ ကျွန်တော်ပြောသလို တစ်ခုချင်းစီဆက်တိုက်လုပ်ပေးပါဆိုပြီး ပြောတယ်။ သူပြောတာတွေလိုက်လုပ်ရင်း ဖုန်းချပြီး ဖုန်းပြန်စစ်တော့ K Pay ထဲကငွေ အကုန်ပါသွားတယ်။ ကျွန်တော်သိသလောက်ကတော့ ကျွန်တော့်အသိတွေထဲမှာ သုံးလေးယောက်လောက် ပါသွားပြီးကြပြီ"ဟု ကိုယ်တိုင်ကြုံတွေ့ရသူတစ်ဦးက ပြောသည်။

အဆိုပါ လိမ်လည်မှုများကို အသက်အရွယ်ကြီးသူများအား ဦးတည်လုပ်ဆောင်နေကြကြောင်း လွန်ခဲ့သည့်နှစ်ရက်ခန့်က ကိုယ်တိုင်ကြုံတွေ့ခဲ့ရသူတစ်ဦးက ဆိုသည်။

"ည သန်းခေါင်လောက်မှာ မက်ဆေ့ချ်ပို့တယ်၊ Viber ကနေ ဝင်လာတာ၊ KBZ Pay အတုလေ မက်ဆေ့မဖတ်တော့ ဖုန်းပါခေါ်တာ၊ ည ၁၂ နာရီကြီး။ ကြည့်လိုက်တော့ အတုမှန်းသိလို့ Block လိုက်တယ်။ Viber အပြင် အခြားမက်ဆင်ဂျာတွေကနေ လိမ်နေကြတာလို့ မိတ်ဆွေတွေက အချင်းချင်းပြောကြတယ်။ အထူးသဖြင့် အသက်ကြီးသူတွေပေါ့။ သူတို့က သိပ်မသိကြဘူးလေ၊ pin နံပါတ်တောင်းတာနဲ့တင်ကြောက်လန့် ပြီးပေးလိုက်တော့ အကုန်ထုတ်သွားရောတဲ့"ဟု Kpay နှင့်ပတ်သက်၍ ကြုံတွေ့ရသူတစ်ဦးက ပြောသည်။

အဆိုပါ ဖြစ်စဉ်နှင့် ပတ်သက်၍ KBZPay အသုံးပြုသူများအနေဖြင့် မိမိထံမှ SMS ကုဒ်များ (OTP) နှင့် PIN (လျှို့ဝှက်နံပါတ်) များကို ဖုန်း သို့မဟုတ် အွန်လိုင်းမှတစ်ဆင့် မေးမြန်းတောင်းခံခြင်း ပြုလုပ်ပါက မပေးရန်နှင့် မည်သူနှင့်မှ မျှဝေသုံးစွဲခြင်းမပြုရန် လိုအပ်ကြောင်း၊ KBZ Pay ၏မှန်ကန်သည့်သတင်းအချက်အလက်များ၊ ပရိုမိုးရှင်းနှင့်ပတ်သက်သည့် သတင်းများအပါအဝင် အခြားဝန်ဆောင်မှုသတင်းများအားလုံးကို KBZ Pay ၏တရားဝင် Channel များဖြစ်သည့် အပြာရောင်အမှတ်အသားပါ KBZ Pay Facebook page၊ KBZ Pay Viber Community Channel၊ KBZPay Official Website နှင့် KBZ Pay App ရှိ KBZPay Official Account တို့တွင် အချိန်နှင့်တပြေးညီ တင်ပြပေးကြောင်း KBZ က ထုတ်ပြန်ထားသည်။

ယင်းအပြင် KBZ Pay အနေဖြင့် သုံးစွဲသူများ၏ PIN နံပါတ်၊ OTP နှင့်ကိုယ်ရေးအချက်အလက်များကို မည်သည့်အခါမျှ တောင်းခံမည်မဟုတ်ကြောင်း KBZ က သိပေးကြေညာထားသည်။

ymg/mt
#Yangon_Media_Group

#Local_News
Published_30 June 2022

မလေးရှားထိန်းသိမ်းရေးစခန်းများမှ မြန်မာနိုင်ငံသား ၇၅ ဦး ဇွန်လ ၂၉ ရက်တွင် ပြည်တော်ပြန်ခွင့်ရခဲ့ကြကြောင်း မလေးရှားနိုင်ငံရှိ မြန်မာသံရုံးက သိရသည်။

ယင်းတို့မှာ မလေးရှားနိုင်ငံတွင် ပြစ်ဒဏ်ကျခံပြီး၍ Bukitjali camp၊ Juru camp နှင့် melaka ထိန်းသိမ်းရေးစခန်းများတွင် ရောက်ရှိနေသူများထဲမှ မြန်မာနိုင်ငံသား ဖြစ်ကြောင်း စိစစ်မှန်ကန်သူများဖြစ်ကြောင်း သိရသည်။

အဆိုပါ မြန်မာနိုင်ငံသားများအား မြန်မာသံရုံး ၊ ကွာလာလမ်ပူမြို့မှ တာဝန်ရှိသူများက မြန်မာ့အပြည်ပြည်ဆိုင်ရာ လေကြောင်းလိုင်း (MAI) ကယ်ဆယ်ရေးလေယာဉ်ဖြင့် မြန်မာနိုင်ငံသို ပြန်လည်ပို့ဆောင်ပေးခဲ့ကြခြင်း ဖြစ်သည်။

ymg/mt
#Yangon_Media_Group

#Local_News
Published _ 30 June 2022

ပြည်သူများအနေဖြင့် ခရီးသွားလာရေး ပိုမိုအဆင်ပြေချောမွေ့စေရေးအတွက် Smart City Bus Line By Daewoo Bus မှ အဆင့်မြင့် မီနီဘတ်စ်များနှင့် ပဲခူး(ကလိ)-ရန်ကုန် (ထောက်ကြန့်)-ပြည်ခရီးစဉ်ကို ထပ်မံတိုးချဲ့ပြေးဆွဲသွားရန် စီစဉ်ထားကြောင်း သိရသည်။

လက်ရှိတွင် တိုးချဲ့ပြေးဆွဲပေးမည့် ယာဉ်လိုင်းသစ်အတွက် ခရီးစဉ်လမ်းကြောင်းများ စတင်ရေးဆွဲနေပြီး ပြေးဆွဲပေးမည့်အချိန်ကို လာမည့်ဇူလိုင်လ ပထမအပတ်တွင် ခန့်မှန်းရက်အတိအကျထပ်မံထုတ်ပြန်ပေးသွားမည်ဖြစ်ကြောင်း Smart City Bus Line By Daewoo Bus တာဝန်ရှိသူထံမှ သိရသည်။

"ကျွန်တော်တို့ အခုလက်ရှိ လူကြီးပိုင်းတွေနဲ့တွေ့ပြီး ပြေးဆွဲမယ့်ရက်အတိအကျကို ထုတ်ပြန်နိုင်ဖို့ ဆွေးနွေးနေပါတယ်။ လာမယ့် တစ်ပတ်အတွင်း ရက်အတိအကျကို ထပ်ထုတ်ပြန်သွားမှာပါ။ အခုကတော့ မဆုံးဖြတ်ရသေးတဲ့အတွက် ရက်အတိအကျကိုပြောလို့ မရသေးပါဘူး" ဟု Daewoo Bus ရန်ကုန်ဂိတ်မှ တာဝန်ရှိသူက ပြောသည်။

စက်သုံးဆီဈေး မြင့်တက်မှုကြောင့် ခရီးသည်အပြည့်အဝ မရရှိသည့်အတွက် ဇွန်လ ၁၀ ရက်မှာ ရပ်နားမည်ဟု ကြေညာခဲ့သောခူး -ရန်ကုန် Daewoo Bus ယာဉ်လိုင်းအနေဖြင့် ခရီးသည်များ၏ တောင်းဆိုမှုကြောင့် လုံးဝမရပ်နားဘဲ ပြန်လည် ပြေးဆွဲပေးနေခြင်း ဖြစ်သည်။

အဆိုပါ ယာဉ်လိုင်းကို ပြီးခဲ့သည့် ၂၀၂၂ ခုနှစ် နှစ်ဆန်းပိုင်းတွင် ရန်ကုန်-ပဲခူးကို ယာဉ်စီးခ ၃၀၀၀ ကျပ်ဖြင့် ရပ်၊ တင်၊ ချ စနစ်အသုံးပြု၍ တစ်နေ့လျင် ဘတ်စ်ကား ငါးစီးဖြင့် ပြေးဆွဲပေးခဲ့ခြင်းဖြစ်ကြောင်း သိရသည်။

ymg/NN
#Yangon_Media_Group

#Local_News
Published_30 June 2022

ထိုင်းနိုင်ငံသို့ MOU စနစ်ဖြင့် အလုပ်သမား ၈၀၀ ခန့် ဇွန်လ ၂၉ ရက်တွင် မြဝတီ - မဲဆောက်ချစ်ကြည်ရေးအမှတ် (၂) တံတားမှတစ်ဆင့် ထပ်မံသွားရောက်ခွင့်ရခဲ့ကြကြောင်း သိရသည်။

အဆိုပါ အလုပ်သမားများအား ယွန်းနဒီ၊ ဝင်းဖြိုးအောင်၊ စွမ်းတော်ဝင်၊ New Covenant Ovessea Employment၊ People Diligence အေဂျင်စီများ အနေဖြင့် တာဝန်ယူထားခြင်းဖြစ်ပြီး ယွန်းနဒီ အေဂျင်စီ ကုမ္ပဏီမှ စေလွှတ်သည့် လုပ်သား (၅၀) ဦးမှာ ထိုင်းနိုင်ငံ၊ လုပ်ဘူရီမြို့ရှိ စဟာဖန် ကြက်သားစက်ရုံသို့ သွားရောက်လုပ်ကိုင်ရမည် ဖြစ်ကြောင်း သိရသည်။

ယင်းအပြင် စွမ်းတော်ဝင် အေဂျင်စီမှ တာဝန်ယူ စေလွှတ်သည့် လုပ်သား (၄၀၀) ဦးမှာ ထိုင်းနိုင်ငံ၊ မဟာချိုင်မြို့ရှိ ငါးသေတ္တာ စက်ရုံသို့လည်းကောင်း၊ ဝင်းဖြိုးအောင် အေဂျင်စီမှ တာဝန်ယူစေလွှတ်သည့် လုပ်သား (၁၁၉) ဦးမှာ နခွန်လာချစီမာခရိုင်၊ ဆီခယုမြိုရှိ ထိုင်း - တရုတ် လျှပ်စစ်အမြန်ရထားလမ်း တည်ဆောက်ရေး လုပ်ငန်းခွင်သို့ လည်းကောင်း၊ New Covenant Ovessea Employment အေဂျင်စီမှ လုပ်သား (၂၀၀) ဦးမှာ ထိုင်းနိုင်ငံ၊ ဖစ်ဘူရီမြို့ရှိ၊ အီလက်ထရောနစ်စက်ရုံသို့လည်းကောင်း အသီးသီးသွားရောက်လုပ်ကိုင်ကြမည် ဖြစ်ကြောင်း သိရသည်။

ထို့အပြင် People Diligence အေဂျင်စီမှ လုပ်သား (၃၀) ဦး အနက် လုပ်သား (၁၀) ဦးမှာ နွန်းထဘူရီမြို့ရှိ ဆီဆိုင်၊ လုပ်သား (၂၀) ဦးမှာ ‌ပရိဘောဂစက်ရုံတို့တွင် အလုပ်လုပ်ကြရမည် ဖြစ်ကြောင်း သိရသည်။

ymg/mt
#Yangon_Media_Group

Published 29 June 2022

နစကဥက္ကဋ္ဌဗိုလ်ချုပ်မှူးကြီးမင်းအောင်လှိုင်ဟာ ထိုင်းဘုရင့်တပ်မတော်မှ ဒုတိယဗိုလ်ချုပ်ကြီး Apichet Suesat ကို နေပြည်တော်တွင် တွေ့ဆုံကာ နစကရဲ့ ဖိတ်ခေါ်ကမ်းလှမ်းချက်အရ  မြန်မာနိုင်ငံဘက်သို့ပြန်လည်ဝင်ရောက်လိုသူတွေ အလွယ်တကူဝင်ရောက်နိုင်ရေးကိစ္စကို ဆွေးနွေးခဲ့ကြတယ်လို့ နစကရဲ့ သတင်းထုတ်ပြန်ချက်အရသိရပါတယ်။

ထိုင်း ဒုတိယဗိုလ်ချုပ်ကြီး အာပီချက် ဆူဆက်ဟာ မြန်မာနိုင်ငံတွင် ကျင်းပခဲ့တဲ့ မြန်မာ-ထိုင်းဒေသဆိုင်ရာ နယ်ခြားကော်မတီ အစည်းအဝေးကို ထိုင်းဘုရင့်တပ်မတော်ဘက်မှ ဦးဆောင်ပြီးလာရောက်တက်ခဲ့တာဖြစ်ပါတယ်။

အချို့သော ကျောင်းသားကျောင်းသူ လူငယ်များနှင့် CDM ဝန်ထမ်းတွေ နယ်စပ်ဒေသတွေကနေ မြန်မာနိုင်ငံသို့ ဥပဒေဘောင်အတွင်း ပြန်လည်ဝင်ရောက်နိုင်ရေးအတွက် မြန်မာနိုင်ငံဘက်သို့ အလွယ်တကူ ပြန်လည်ဝင်ရောက်နိုင်ဖို့ ထိုင်းတပ်မတော်ဘက်က ကူညီဆောင်ရွက်ပေးသွားမည့် အခြေအနေတွေကိုလည်း အမြင်ချင်းဖလှယ်ခဲ့ကြတာဖြစ်တယ်လို့ သတင်းမှာ ဖော်ပြထားပါတယ်။

နစကဥက္ကဋ္ဌနှင့် ထိုင်းဒုတိယဗိုလ်ချုပ်ကြီးတို့ဟာ နှစ်နိုင်ငံတပ်မတော်များအကြား ချစ်ကြည်ရင်းနှီးမှုနှင့် ပူးပေါင်းဆောင်ရွက်မှု ပိုမိုတိုးတက်မြှင့်တင်ဆောင်ရွက်သွားမယ့်ကိစ္စတွေ၊နယ်စပ်ဒေသတည်ငြိမ်အေးချမ်းရေး၊တရားဥပဒေစိုးမိုးရေးနှင့် မူးယစ်ဆေးဝါးတားဆီးနှိမ်နှင်းရေးကိစ္စတွေနှင့် အခြားကိစ္စတွေပူးပေါင်းဆောင်ရွက်သွားမှာတွေကို ဆွေးနွေးခဲ့တယ်လို့ နစကရဲ့သတင်းထုတ်ပြန်ချက်အရ သိရပါတယ်။

အချို့သော ကျောင်းသားကျောင်းသူ လူငယ်များနှင့် CDM ဝန်ထမ်းတွေ နယ်စပ်ဒေသတွေကနေ မြန်မာနိုင်ငံသို့ ဥပဒေဘောင်အတွင်း ပြန်လည်ဝင်ရောက်နိုင်ရေးအတွက် မြန်မာနိုင်ငံဘက်သို့ အလွယ်တကူ ပြန်လည်ဝင်ရောက်နိုင်ဖို့ ထိုင်းတပ်မတော်ဘက်က ကူညီဆောင်ရွက်ပေးသွားမည့် အခြေအနေတွေကိုလည်း အမြင်ချင်းဖလှယ်ခဲ့ကြတယ်လို့ သတင်းမှာ ဖော်ပြထားပါတယ်။

Published_29 June 2022

အာဆီယံအလှည့်ကျဥက္ကဋ္ဌ၏ မြန်မာနိုင်ငံဆိုင်ရာအထူးကိုယ်စားလှယ်၊ ကမ္ဘောဒီးယားနိုင်ငံ ဒုတိယဝန်ကြီးချုပ်၊ နိုင်ငံခြားရေးနှင့် အပြည်ပြည်ဆိုင်ရာပူးပေါင်းဆောင်ရွက်ရေးဝန်ကြီး H.E.Mr.PRAK Sokhonn နှင့် ကိုယ်စားလှယ်အဖွဲသည် ရန်ကုန်မြိုသို့ရောက်ရှိလာကြောင်း သိရပါတယ်။

 အဆိုပါကိုယ်စားလှယ်အဖွဲ့အား နိုင်ငံခြားရေးဝန်ကြီးဌာန ဗဟာဗျူဟာလေ့လာရေးနှင့်လေ့ကျင့်ရေးဦးစီးဌာန ညွန်ကြားရေးမှူးချုပ် ဦးဇော်ဖြိုးဝင်း၊ သံတမန်ရေးရာဦးစီးဌာန ဒုတိယညွှန်ကြားရေးမှုးချုပ် ဦးဇော်ထွန်းဦးနှင့် တာဝန်ရှိသူများ၊ မြန်မာနိုင်ငံဆိုင်ရာ ကမ္ဘောဒီးယားနိုင်ငံသံအမတ်ကြီး H.E.Mr.CHHOUK Bunna နှင့် သံရုံးမှတာဝန်ရှိသူများက ရန်ကုန်အပြည်ပြည်ဆိုင်ရာလေဆိပ်၌ ကြိုဆိုခဲ့ကြပါတယ်။

H.E.Mr.PRAK Sokhonn နှင့် ကိုယ်စားလှယ်အဖွဲ၏ ခရီးစဉ်အတွင်း ၂၀၂၂-ခုနှစ်၊ မေ ၆ ရက်က ကျင်းပခဲ့သော အာဆီယံလူသားချင်းစာနာမှုဆိုင်ရာ အကူအညီပေးရေး အစည်းအဝေးရလဒ်များနှင့် အာဆီယံဘုံသဘောတူညီမှုငါးရပ် အကောင်အထည်ဖော်ဆောင်ရန်၊ ခရီးစဉ်အတွင်း တွေ့ဆုံမှုများမှတစ်ဆင့် အားလုံးပါဝင်နိုင်သော နိုင်ငံရေးဆွေးနွေးပွဲအတွက် အထောက်အကူဖြစ်စေရန်၊ မြန်မာနိုင်ငံအတွင်းဖြစ်ပွားနေသော ပဋိပက္ခများတွင် ငြိမ်းချမ်းသောနည်းလမ်းဖြင့် အမျိုးသားရေးပြန်လည်ရင်ကြားစေ့ရေး လုပ်ငန်းစဉ်တစ်ရပ်ကို အမြန်ဆုံးအကောင်အထည်ဖော်ဆောင်နိုင်ရန် ကြိုးပမ်းဆောင်ရွက်သွားမှာဖြစ်ကြောင်း သိရပါတယ်။

ymg_mnn