#Local_News
Published - 30 June 2022

မြန်မာနိုင်ငံဆိုင်ရာ တရုတ်သံရုံးမှ မေရီချက်ပ်မင်း နားမကြားသောကလေးများကျောင်းထံသို့ ၂၀၂၂-၂၀၂၃ ပညာသင်နှစ်အတွက် စားသောက်ကုန်ပစ္စည်းများလှူဒါန်းပေးအပ်ခဲ့ကြောင်း သိရသည်။

မြန်မာနိုင်ငံဆိုင်ရာ တရုတ်သံရုံး သံမှူးကြီး Mr. Zheng Zhihong က သံရုံးသည် မေရီချက်ပ်မင်း နားမကြားသော ကလေးများကျောင်း၏ တိုးတက်မှုနှင့် ကျောင်းသား ကျောင်းသူများ ကျန်းမာစွာကြီးပြင်းလာမှုကို အမြဲတစေဂရုပြုထောက်ခံအားပေးလျက်ရှိကြောင်း၊ ယင်းအပြင် သံရုံးမှ လွန်ခဲ့သည့် ၄ နှစ်အတွင်း၌ စုစုပေါင်း မြန်မာကျပ်ငွေ သန်း ၂၀၀ ခန့်အသုံးပြု၍ City Mart စူပါမားကတ်ကို တာဝန်လွှဲအပ်ပြီး လစဉ်ကျောင်းထံသို့ အရည်အသွေးမြင့် စားသောက်ကုန်များ ထောက်ပံ့ပေးခဲ့ကြောင်း သိရသည်။

ကိုဗစ်ကပ်ရောဂါကာလအတွင်း၌လည်း သံရုံးကကပ်ရောဂါကာကွယ်ရေးပစ္စည်းများလှူဒါန်း၍ ကပ်ရောဂါတိုက်ဖျက်ရေးတွင် ကူညီပေးခဲ့ကြောင်း၊ ယခုနှစ်တွင် မြန်မာကျပ်ငွေ သန်း ၂၀ ကျော်တန်ဖိုးရှိသည့် စားသောက်ကုန်များကို ဆက်လက်ထောက်ပံ့ပေးသွားမည်ဖြစ်ကြောင်း ပြောကြားခဲ့သည်။

ယင်းအပြင် ကျောင်းအုပ်ဆရာမကြီး ဒေါက်တာဒေါ်ခင်သီတာညွှန့်က သံရုံးမှ အဆက်မပြတ်လှူဒါန်းပေးအပ်သဖြင့် ကလေးများသည် အာဟာရပြည့်ဝသော အစားအသောက်များ စားသုံးနိုင်ပြီး ပိုမိုဖန်တီးမှုစွမ်းရည်ရှိသည့် လုပ်ဆောင်များ ဖော်ဆောင်ရန် အထောက်အကူပြုသောကြောင့် မေရီချက်ပ်မင်း နားမကြားသောကလေးများကျောင်းကိုယ်စား လှိုက်လှဲစွာကျေးဇူးတင်ရှိပါကြောင်း၊ လက်ရှိတွင် နေ့စဉ်စာသင်ကြားမှုအပြင် ကျောင်းမှ Beauty Saloon၊ ကွန်ပျူတာ၊ စက်ချုပ်နှင့် Massage သင်ခန်းစာများကိုလည်း သင်ကြားပေးနေကြောင်း၊ ယင်းတိုသည် သံရုံးမှလှူဒါန်းပေးအပ်မှုနှင့် ခွဲခြား၍မရကြောင်း ပြောကြားခဲ့သည်။

မြန်မာနိုင်ငံဆိုင်ရာသံရုံးသည် မြန်မာနိုင်ငံ ပြည်သူ့အကျိုးပြုလုပ်ငန်းကို အလွန်ဂရုပြု၍ တက်တက်ကြွကြွထောက်ခံအားပေးကာ ပြည်သူ့အကျိုးပြုလှူဒါန်းမှုစီမံကိန်းများစွာ ဖော်ဆောင်ခဲ့သည်။

ရန်ကုန်ကျေးလက်ပြည်သူနှင့် မသန်စွမ်းသူမိသားစုများအား စားနပ်ရိက္ခာထုပ်များ လှူဒါန်းခြင်း၊ ကျောင်းများထံသို့ ကပ်ရောဂါကာကွယ်ရေး ပစ္စည်းများလှူဒါန်းခြင်း၊ လျှပ်စစ်ရှားပါးသည့်ဒေသမှ ကျောင်းသား ကျောင်းသူများထံသို့ ဆိုလာမီးများလှူဒါန်းခြင်းတို့ ပါဝင်ပြီး မြန်မာနိုင်ငံရှိ အခြေခံပြည်သူများ လူနေမှုဘဝအခြေအနေကောင်းမွန်လာစေရန် ကူညီပေးကြောင်းသိရသည်။

သံရုံးအနေဖြင့် မြန်မာနိုင်ငံ နယ်ပယ်အသီးသီးမှ စေတနာရှင်များနှင့် အတူလက်တွဲ၍ မေရီချက်ပ်မင်း နားမကြားသောကလေးများကျောင်းနှင့် မြန်မာနိုင်ငံ လူမှုဖူလုံရေးလုပ်ငန်းအတွက် စေတနာနှင့်ခွန်အားများဖြင့် အကျိုးထမ်းဆောင်သွားမည်ဖြစ်ကြောင်းလည်း သိရသည်။

ymg/sth
#Yangon_Media_Group

#Local_News
Published - 29 June 2022

မြဝတီနယ်စပ်က တစ်ဆင့် ပြည်ပနိုင်ငံတွေကို တင်ပို့တဲ့ ပို့ကုန်တွေအားလုံးအတွင် အမေရိကန်ဒေါ်လာနဲ့ပဲ ဈေးနှုန်းသတ်မှတ်ခွင့် ပြုမယ်လို့ မြဝတီနယ်စပ်ကုန်သည်တွေက ပြောပါတယ်။

#Yangon_Media_Group

#Local_News
Published - 30 June 2022

မြန်မာ့အိုးစည်၊ ဒိုးပတ်တွေကို ထိုင်း၊ မလေးရှား၊ ဂျပန်၊ အမေရိကန်နိုင်ငံတွေကပြည်ပရောက်မြန်မာတွေအော်ဒါမှာ ယူမှုများနေပြီး ထိုင်းနိုင်ငံရောက် မြန်မာလူမျိုးတွေက မှာယူမှုအများဆုံးဖြစ်တယ်လို့ ဒို့ဗမာအိုးစည်နှင့်ဒိုးပတ်လုပ်ငန်းကကို ရန်အောင်ဝင်းက ပြောပါတယ်၊၊

#Yangon_Media_Group

#Local_News
Published_30 June 2022

ရှမ်းပြည်နယ်၊ တောင်ကြီးမြို့နယ်၊ ပင်းပက်ဒေသ၊ ပင်ငိုကျေးရွာအနီးရှိ အမှတ်(၂) သံမဏိစက်ရုံ (ပင်းပက်) စီမံကိန်းမှ သံစိမ်း (Pig Iron) ထုတ်လုပ်မည်ဖြစ်ကြောင်း စက်မှုဝန်ကြီးဌာနက သိရသည်။

ယင်းကြောင့် သံစိမ်းထုတ်လုပ်သည့် နောက်ဆုံးပေါ် နည်းပညာများရရှိရေး၊ စက်ပစ္စည်းများကို ကျွမ်းကျင်ပိုင်နိုင်စွာ ကိုင်တွယ်မောင်းနှင် အသုံးပြုနိုင်ရေးအတွက် လုပ်ဆောင်နေကြကြောင်းလည်း သိရသည်။

သံရိုင်းကို ကုတ်မီးသွေး(coke) ထုံးကျောက်များနှင့်ရော၍လေပြင်းမှုတ် မီးဖိုတွင်ထည့်ကျိုပါက သံစိမ်းခေါ်(pig iron)ကိုရရှိခြင်း ဖြစ်ကြောင်း၊ သံစိမ်းတွင် ကာဗွန်ပါဝင်မှု ၃ ဒသမ ၅ ရာခိုင်နှုန်းနှင့် ၄ ဒသမ ၅ ရာခိုင်နှုန်းကြား ပါဝင်ကြောင်းလည်း သိရသည်။

အမှတ်(၂)သံမဏိစက်ရုံ (ပင်းပက်)စီမံကိန်းသည် မြန်မာနိုင်ငံ၏ ပထမဦးဆုံး သံနှင့် သံမဏိစက်ရုံ စီမံကိန်းကြီးတစ်ခုဖြစ်ပြီး ပြည်တွင်းလိုအပ်ချက်ကို ဖြည့်ဆည်းပေးနိုင်ရုံသာမက အလုပ်အကိုင်အခွင့်အလမ်းများ ဖန်တီးပေးနိုင်မည့် စီမံကိန်းလည်းဖြစ်ကြောင်း စက်မှုဝန်ကြီးဌာန၏ မှတ်တမ်းများတွင် ဖော်ပြထားသည်။

ပြီးခဲ့သည့် မေလအတွင်းက အမှတ် (၂) သံမဏိစက်ရုံ (ပင်းပက်) စီမံကိန်းအတွက် ကြီးကြပ်ရန်ကော်မတီကို ပြင်ဆင်ဖွဲ့စည်းခဲ့ကြောင်း၊ စီမံကိန်းကို သတ်မှတ်ကာလအတွင်း အချိန်မီပြီးစီးအောင်မြင်စွာ လည်ပတ်နိုင်ရေး စီမံဆောင်ရွက်ရန်၊ နိုင်ငံခြားသားပညာရှင်များနှင့် လိုအပ်နေသည့် စက်နှင့် စက်ပစ္စည်းများအချိန်မီ ရောက်ရှိရေး ဆောင်ရွက်ရန်၊ နိုင်ငံခြားသားပညာရှင်များ နေထိုင်စားသောက်မှု အဆင်ပြေစေရေးနှင့် ကျန်းမာရေးစောင့်ရှောက်မှုများပေးနိုင်ရေး စီမံဆောင်ရွက်ရန်၊ နိုင်ငံခြားသားပညာရှင်များ၏ လုံခြုံရေးအတွက် စီစဉ်ဆောင်ရွက်ပေးရန်၊ စက်ရုံဝန်ထမ်းများအား နည်းပညာလွှဲပြောင်းပေးခြင်း (Technical Transfer)နှင့် စာတွေ့၊ လက်တွေ့သင်တန်းအစီအစဉ် (Training Program) အတွက် ရုရှားအစိုးရက ကူညီထောက်ပံ့ရန် ကမ်းလှမ်းထားသော ယူရို ၁၀ ဒသမ ၅ သန်းတန်ဖိုးရှိ နည်းပညာအကူအညီများရရှိနိုင်ရေး ရုရှားအစိုးရထံတောင်းခံရန်၊ စက်ရုံ၊ တည်ဆောက်ရေးစီမံကိန်းနှင့် နိုင်ငံခြားသားပညာရှင်များ ဟန်ချက်ညီစွာ ဆောင်ရွက်နိုင်ရေး ပေါင်းစပ်ညှိနှိုင်းဆောင်ရွက်ပေးရန်၊ ကြုံတွေ့နေရသော အခက်အခဲများ၊ ပြဿနာများကို ကူညီဖြေရှင်းဆောင်ရွက်ပေးရန် ပြင်ဆင်ဖွဲ့စည်းခြင်း ဖြစ်ကြောင်း သိရသည်။

ymg/mt
#Yangon_Media_Group

#Local_News
Published_ 30 June 2022

မြန်မာသံရုံး (တိုကျိုမြို့) မှ ၂၀၂၂ ခုနှစ်၊ ဇွန် (၁၆) ရက်မှ ဇွန် (၃၀) ရက်အတွင်း စိစစ်ပြီး နိုင်ငံခြားရေးဝန်ကြီးဌာနသို့ ပေးပို့ပြန်ကြားခဲ့တဲ့ အလုပ်ကမ်းလှမ်းစာ ၂၃၅ ခု နှင့် ပတ်သက်သည့် အချက်အလက်များအား အသိပေး ထုတ်ပြန်ထားပါတယ်။

မြန်မာသံရုံး (တိုကျိုမြို့) အနေဖြင့် အလုပ်သမားဝန်ကြီးဌာနက နိုင်ငံခြားရေး ဝန်ကြီးဌာနမှတစ်ဆင့် ပေးပိုလာတဲ့ အလုပ်ကမ်းလှမ်းစာများကို အချိန်နှင့်တစ်ပြေးညီစိစစ်ဆောင်ရွက်ပေးလျက်ရှိတယ်လို့ ထုတ်ပြန်ချက်မှာ ဖော်ပြထားပါတယ်။

ထိုသို့ စိစစ်ဆောင်ရွက်ရာတွင် ဂျပန်နိုင်ငံရှိ အလုပ်သမားကြီးကြပ်ရေး ကုမ္ပဏီနှင့် အလုပ်ခေါ်ယူသည့် စက်ရုံ/ ကုမ္ပဏီများသည် ဂျပန်နိုင်ငံတွင် တရားဝင် တည်ထောင်ထားခြင်း ရှိ/ မရှိ စာရွက်စာတမ်း အထောက်အထားများ စိစစ်ပြီး စိစစ်တွေ့ရှိချက်များ၊ သဘောထားမှတ်ချက်များကို နိုင်ငံခြားရေးဝန်ကြီးဌာနမှတစ်ဆင့် အလုပ်သမားဝန်ကြီးဌာနသို့ ပြန်လည်ပေးပို့လျက်ရှိကြောင်း သိရပါတယ်။

မြန်မာသံရုံး (တိုကျိုမြို့) မှစိစစ်ပြီး နိုင်ငံခြားရေးဝန်ကြီးဌာနသို့ ပေးပို့ပြန်ကြားခဲ့တဲ့ အလုပ်ကမ်းလှမ်းစာ ၂၃၅ ခုတွင် မြန်မာနိုင်ငံမှ အလုပ်သမားပေါင်း ၇၀၀ ကျော်ကို ခေါ်ယူသွားမှာ ဖြစ်ကြောင်း သိရပါတယ်။

ymg-mnn
#Yangon_Media_Group

#Local_News
Published_ 30 June 2022

၂၀၂၂ ခုနှစ် ဇူလိုင် ၃၁ ရက်တွင် သုံးနှစ်၊ သုံးလ၊ သုံးရက် အဓိဋ္ဌာန်ပြည့်၍ မိုင်းကျတ်အထက်ဂူမှ ထွက်တော်မူလာမည့် မိုင်းဖုန်းဆရာတော်အား လာရောက်ဖူးမြော်သူများ အဆင်ပြေစေရေး ပြင်ဆင်ဆောင်ရွက်လျက်ရှိကြောင်း သိရပါတယ်။

မိုင်းဖုန်းဆရာတော်သည် ရှမ်းပြည်နယ်(အရှေ့ပိုင်း)၊ မိုင်းဆတ်ခရိုင်၊ မိုင်းခုတ်မြို့၊ မိုင်းကျတ်ကျေးရွာအနီးရှိ မိုင်းကျတ်အထက်ဂူတွင် ၂၀၁၉ ခုနှစ် ဧပြီလ ၂၈ ရက်မှစတင်၍ အဓိဋ္ဌာန်ပြု တရားကျင့်ကြံအားထုတ်ခဲ့တာ ဖြစ်ပါတယ်။

ဆရာတော်အား အနယ်နယ်အရပ်ရပ်မှ လာရောက်ဖူးမြော်သူများအတွက် လမ်းပန်းဆက်သွယ်ရေး ကောင်းမွန်စေရေး၊ ကျန်းမာရေးဆိုင်ရာ စောင့်ရှောက်မှုပေးရေး၊ နေထိုင်တည်းခိုရေး၊ သောက်သုံးရေနှင့် လျှပ်စစ်မီးလိုအပ်ချက်များ အဆင်ပြေစေရေး ပြင်ဆင်ဆောင်ရွက်နေတာ ဖြစ်ပါတယ်။

မိုင်းကျတ်ဂူမှ ထွက်တော်မူလာတဲ့အခါ မိုင်းကျတ်အောက်ဂူတွင် အပူဇော်ခံ၍ တရားတော်များ ဟောကြားမည်ဖြစ်ပြီး မိုင်းဖုန်းဆရာတော် အဓိဌာန်ဝင်သည့် မိုင်းကျတ်ကျောက်ဂူသို့ မိုင်းဆတ်မြို့နှင့် မိုင်းပျဉ်းမြို့များမှတစ်ဆင့် သွားရောက်နိုင်ကာ အဆိုပါမြို့များနှင့် ၃၇ မိုင်ခန့်အကွာတွင် တည်ရှိကြောင်း သိရပါတယ်။

ymg-mnn
#Yangon_Media_Group