#Local_News
Published 20 February 2025
▪️ ယခုနှစ် ဇန်နဝါရီလအတွင်းတစ်နိုင်ငံလုံးအတိုင်းအတာဖြင့် Fire Hotspot ဖြစ်ပေါ်မှု ၁၀၀၀ကျော်ဖြစ်ပွားခဲ့ကြောင်း နေပြည်တော်၌ ဖေဖော်ဝါရီ ၁၈ ရက်မွန်းလွဲပိုင်းကကျင်းပသည့် မြန်မာ-ထိုင်း နယ်နိမိတ်ဖြတ်ကျော်မီးခိုးမြူငွေ့လေထုညစ်ညမ်းမှုတားဆီးကာကွယ်ရေးဆိုင်ရာ ပူးပေါင်းဖြေရှင်းဆောင် ရွက်ရေးကော်မတီ၏ (၁/၂၀၂၅)လုပ်ငန်းညှိနှိုင်းအစည်းအဝေးမှ သိရသည်။
▪️ ၂၀၂၅ ခုနှစ်၊ ဇန်နဝါရီလတွင် (၁၀၅၇)ကြိမ်ဖြစ်ပေါ်ခဲ့ခြင်းဖြစ်ကာ ASMC website မှရရှိသည့် Fire Hotspot ဆိုင်ရာအချက်အလက်များအရ တစ်နိုင်ငံလုံး အတိုင်းအတာဖြင့် ၂၀၂၅ ခုနှစ်၊ ဇန်နဝါရီလ၏ ပထမသီတင်းပတ်တွင် (၁၂၃)ကြိမ်၊ ဒုတိယသီတင်းပတ်တွင် (၂၀၁)ကြိမ်၊ တတိယသီတင်းပတ်တွင် (၂၈၆)ကြိမ်နှင့် စတုတ္ထ သီတင်းပတ်တွင် (၄၄၇) ကြိမ်ဖြင့် တဖြည်းဖြည်းမြင့်တက်လာကြောင်းသိရသည်။
▪️ အဆိုပါ Fire Hotspot ဖြစ်ပေါ်မှုမှာ ရှမ်းပြည်နယ်သည် (၂၅၅)ကြိမ်ဖြင့် အများဆုံးဖြစ်ပေါ်ခဲ့ပြီး ဒုတိယအနေဖြင့် စစ်ကိုင်းတိုင်းမှာ (၂၁၄)ကြိမ်ဖြစ်ပေါ်ခဲ့ကြောင်း၊ နှစ်စဉ်နွေရာသီကာလဖြစ်သည် မတ်၊ ဧပြီလများ၌ Hotspot အရေအတွက်ပိုမိုများပြားလာနိုင်သည့်အတွက် နေပြည်တော်၊ တိုင်းနှင့် ပြည်နယ်အလိုက် ပညာပေးဆွေးနွေးရေး၊ စစ်ဆေးရေးအဖွဲ့များအနေဖြင့် အသိပညာပေးဟောပြောခြင်းများ၊ စစ်ဆေးကြပ်မတ်ခြင်းနှင့် လိုက်နာမှုရှိစေရေးဆောင်ရွက်မှုများကို အထူးအလေးထားကြပ်မတ်ဆောင်ရွက်ရန် လိုအပ်ကြောင်း မြန်မာ-ထိုင်း နယ်နိမိတ်ဖြတ်ကျော် မီးခိုးမြူငွေ့လေထုညစ်ညမ်းမှု တားဆီးကာကွယ်ရေးဆိုင်ရာ ပူးပေါင်းဖြေရှင်းဆောင်ရွက်ရေးကော်မတီဥက္ကဋ္ဌ ကာကွယ်ရေးဝန်ကြီးဌာန ဒုတိယဝန်ကြီး ဗိုလ်ချုပ်ကိုလေးက အထက်ပါအစည်းအဝေး၌ ထည့်သွင်း ပြောကြားခဲ့ သည်။
▪️ ထို့အတူ ကွင်းဆင်းစစ်ဆေးရေးအဖွဲ့များအနေ ဖြင့် မြေပြင်ကွင်းဆင်းစစ်ဆေးတွေ့ရှိချက်များကို အချက်အလက်၊ ကိန်းဂဏန်း၊ မှတ်တမ်းဓာတ်ပုံများနှင့်တကွပေးပို့ကြရမည်ဖြစ်ပြီး မီးခိုးမြူငွေ့လေထုညစ်ညမ်းမှုလျော့ချနိုင်ရန် ကုန်းမြင့်လယ်ယာဖော်ထုတ်မှု၊ လယ်ယာထွက်အမှိုက်များစုပုံမီးရှို့မှုမရှိစေရေး၊ တောမီးရှို့မှုမရှိစေရေး ပညာပေးဆွေးနွေးမှုတို့ကို ပိုမိုတိုးမြှင့်လုပ် ဆောင်ကြရမည်ဟုလည်း မှာကြားခဲ့ ကြောင်းသိရသည်။
▪️ ထို့ပြင် ဒု-ဝန်ကြီး ဗိုလ်ချုပ်ဖြိုးသန့်မှလည်း ရွှေ့ပြောင်းတောင်ယာစနစ်မှ ကုန်းမြင့်လယ်ယာစနစ်သို့ ပြောင်းလဲနိုင်ရန် နေရာနှင့် ရေအရင်းအမြစ်ရှိပါက ဆိုလာရေတင်စနစ်ကိုဆောင်ရွက်သင့်ပြီး ကုန်းမြင့်လယ်ယာဆောင်ရွက်လိုသည့် နေရာများရှိလျင် နည်းပညာကူညီပေးမည်ဟု ပြောကြားခဲ့ကြောင်း သိရသည်။
#YMG/NN #Yangon_Times
