#Local_News
Published 03 April 2025

▪️ မိုးလေဝသသတင်းနှင့်ပတ်သက်၍ သင်္ချာပုံစံပြုမော်ဒယ်များခန့်မှန်းရက်ဝေးလျှင် မှန်ကန်မှုအလွန်နည်းတတ်ဟု မိုးလေဝသနှင့်ဇလဗေဒညွှန်ကြားမှုဦးစီးဌာနက ထုတ်ပြန်ထားသည်။

▪️ မိုးလေဝသနှင့်ဇလဗေဒ ညွှန်ကြားမှုဦးစီးဌာနအနေဖြင့် မတ်လ ၃၁ ရက် မြန်မာစံတော်ချိန် ၆ နာရီခွဲတွင် တိုင်းတာတွက်ချက်ခဲ့သော အဆိုပါဌာန၊ WRF မော်ဒယ်လ်၏ တိုင်းတာချက်၊ အင်္ဂလန်နိုင်ငံ၊ European Centre for Medium-Range Weather Forecasts (ECMWF) Data ကို အခြေခံတွက် ထုတ်ထားသည့် သင်္ချာပုံစံပြုမော်ဒယ်၊အမေရိကန်နိုင်ငံ၊ National Hurricane Center မှ Global Forecasting Model (GFS) Data ကို အခြေခံတွက်ထုတ်ထားသည့် တွက်ချက်ခန့်မှန်းမှုများ ကို ထုတ်ပြန်ဖော်ပြရာတွင် အထက်ပါအတိုင်း ဖော်ပြထားခြင်းဖြစ်သည်။

▪️ လက်ရှိလေထုအခြေအနေများပေါ်အခြေခံ၍ တွက်ချက်ထားသော သင်္ချာပုံစံပြုမော်ဒယ်များဖြစ်သည့် မိုးလေဝသ နှင့် ဇလဗေဒညွှန်ကြားမှုဦးစီးဌာန၊ WRF မော်ဒယ်လ်၏ မတ်လ ၃၁ ရက် မြန်မာစံတော်ချိန် ၆ နာရီခွဲ အချိန် ကို အခြေခံတွက်ထုတ်ထားသည့် သင်္ချာပုံစံပြုမော်ဒယ်၏ ခန့်မှန်းချက်အရ အရှေ့ဘက်မှ ရွေ့လျားလာသော လေပွေလှိုင်းများအရှိန်ကြောင့် မနက်ဖြန် ဧပြီလ ၄ ရက်ခန့်တွင် ဘင်္ဂလားပင်လယ်အော် အရှေ့တောင်ပိုင်း ၌လေထုမငြိမ်မသက်မှု ဖြစ်ပေါ်နိုင်သော်လည်း အားကောင်းလာနိုင်မည့် အခြေအနေ မရှိဘဲ အနောက်-အနောက်မြောက်ဘက်သို့ ရွေ့လျားကာ သီရိလင်္ကာနိုင်ငံနှင့် အိန္ဒိယနိုင်ငံတောင်ပိုင်းသို့ ဦးတည်ရွေ့လျားနိုင်ကြောင်း ခန့်မှန်းဖော်ပြထားသည်။

▪️ အင်္ဂလန်နိုင်ငံ၊ European Centre for Medium-Range Weather Forecasts (ECMWF) Data ၏ မတ်လ ၃၁ ရက် မြန်မာစံတော်ချိန် ၆ နာရီခွဲ အချိန်ကို အခြေခံတွက်ထုတ်ထားသည့် သင်္ချာပုံစံပြုမော်ဒယ်၏ ခန့်မှန်း ချက်အရ အရှေ့ဘက်မှ ရွေ့လျားလာသော လေပွေလှိုင်းများ အရှိန်ကြောင့် ဧပြီလ ၅ ရက်ခန့်တွင် ဘင်္ဂလား ပင်လယ်အော် အရှေ့တောင်ပိုင်းတွင် လေထုမငြိမ်မသက်မှု ဖြစ်ပေါ်နိုင်သော်လည်း အားကောင်းလာနိုင်မည့် အခြေအနေမရှိဘဲ အနောက်-အနောက်မြောက်ဘက်သို့ ရွေ့လျားကာ သီရိလင်္ကာနိုင်ငံ နှင့် အိန္ဒိယနိုင်ငံတောင် ပိုင်းသို့ ဦးတည်ရွေ့လျားနိုင်သည်ဟု ခန့်မှန်းဖော်ပြထားသည်။

▪️ အမေရိကန်နိုင်ငံ၊ National Hurricane Center မှ Global Forecasting Model (GFS) Data ၏ မတ်လ ၃၁ ရက် မြန်မာစံတော်ချိန် ၆ နာရီခွဲ အချိန်ကို အခြေခံတွက်ထုတ်ထားသည့် တွက်ချက်ခန့်မှန်းမှုများအရ အရှေ့ဘက်မှ ရွေ့လျားလာသော လေပွေလှိုင်းများအရှိန်ကြောင့် ဧပြီလ ၄ ရက် မှ ဧပြီလ ၈ ရက်အတွင်း ကပ္ပလီပင်လယ်ပြင်တွင် လေထုမငြိမ်မသက်မှုဖြစ်ပေါ်ရာမှ လေဖိအားနည်းရပ်ဝန်း(Low Pressure Area) တစ်ခုဖြစ်ပေါ်လာနိုင်ခြေရှိပြီး မုန်တိုင်းငယ်အဖြစ်သို့ရောက်ရှိကာ မြောက်-အနောက်မြောက်ဘက်သို့ ရွေ့လျားနိုင်ကာ ရခိုင်ကမ်းရိုးတန်း အနီးသို့ ရောက်ရှိနိုင်သည်ဟု ခန့်မှန်းဖော်ပြထားသည်။

▪️ သင်္ချာပုံစံပြုမော်ဒယ်များအနေဖြင့် ခန့်မှန်းသည့် ရက်ဝေးကွာပါက အသုံးပြုသည့် မော်ဒယ်အပေါ်မူတည်၍ ခန့်မှန်းချက်များ တစ်ခုနှင့်တစ်ခုမတူညီဘဲ မှန်ကန်နိုင်မှုမှာလည်း အလွန်နည်းတတ်ကြောင်း မိုးလေဝသနှင့်ဇလဗေဒ ညွှန်ကြားမှုဦးစီးဌာနက ထုတ်ပြန်ထားသည်။

▪️ ယင်းကြောင့် အများပြည်သူအနေဖြင့် ဆိုရှယ်မီဒီယာများနှင့်အွန်လိုင်းများတွင် လတ်တလောထုတ်ပြန်နေသော အခြေအမြစ်မရှိကောလာဟလသတင်းများကို မယုံကြည်ကြပါရန် နှင့် မိုးလေဝသနှင့်ဇလဗေဒညွှန်ကြားမှု ဦးစီးဌာနအနေဖြင့်လည်း ပြောင်းလဲနေသော သင်္ချာပုံစံပြုမော်ဒယ်များ၏ ခန့်မှန်းချက်များနှင့်ခေတ်မီမိုးလေဝသ တိုင်းတာရေး ကိရိယာများမှ တိုင်းတာရရှိသည့် အချက်အလက်များ အပေါ်အခြေခံ၍ ခန့်မှန်းချက်များနှင့် သတိပေးချက်များကို အချိန်နှင့်တစ်ပြေးညီ မြဝတီရုပ်မြင်သံကြား၊
မြန်မာ့ရုပ်မြင်သံကြားနှင့် နိုင်ငံပိုင်သတင်းမီဒီယာများမှ တရားဝင်ထုတ်ပြန်ပေးသွားမည်ဖြစ်ကြောင်းလည်း ဖော်ပြထားသည်။

▪️ ကမ္ဘာ့လေထု၏ဖြစ်စဉ်များကြောင့် မိုးလေဝသအခြေအနေများသည် အချိန်နှင့်အမျှပြောင်းလဲဖြစ် ပေါ်လျက် ရှိကြောင်း၊ မိုးလေဝသနှင့်ဇလဗေဒ
ညွှန်ကြားမှု ဦးစီးဌာနအနေဖြင့် အဆိုပါဖြစ်စဉ်များကို အချိန်နှင့်အမျှ စောင့် ကြည့် လေ့လာပြီး ခန့်မှန်းချက်၊ သတိပေးချက်နှင့် အခြေအနေသတင်းများကို ထုတ်ပြန်ပေးနေမည်ဖြစ်ကြောင်း သိရသည်။

#YMG/PP #Yangon_Times