၇ ဧပြီ ၂၀၂၅
ဆယ်စုနှစ်၃ခုကျော်ကြာပြီဖြစ်သည့် အထူးအစီရင်ခံစာ တင်သွင်းသူကဲ့သို့သော လက်တွေ့တန်ဖိုး ကင်းမဲ့ပြီး ထိရောက်မှုမရှိသည့် လုပ်ပိုင်ခွင့်များကို အဆုံးသတ် ရန် ကုလသမဂ္ဂအား တိုက်တွန်း လိုက်ပါတယ်။
ကုလသမဂ္ဂ လူ့အခွင့်အရေးဆိုင်ရာ မဟာမင်းကြီးနှင့် မြန်မာနိုင်ငံ လူ့အခွင့်အရေးအခြေအနေဆိုင်ရာ အထူးအစီရင်ခံစာတင်သွင်းသူတို့ရဲ့ မြန်မာနိုင်ငံဆိုင်ရာ အစီရင်ခံစာများအပေါ် ဆွေးနွေးခဲ့မှုများနှင့် ပတ်သက်ပြီး မြန်မာ နစက နိုင်ငံခြားရေးဝန်ကြီးဌာနက ဧပြီ ၆ ရက်နေ့တွင် ယင်းကဲ့သို့ တုန့်ပြန်ခဲ့ခြင်း ဖြစ်ပါတယ်။
ထိုသူတို့၏ အပြန်အလှန်ဆွေးနွေးမှုတွေဟာ အနှစ်သာရကင်းနေကြောင်းလည်း နိုင်ငံခြားရေး ဝန်ကြီးဌာနက ပြောပါတယ်။
မြန်မာနိုင်ငံမှာ ယခုလို သဘာဝငလျင်ဘေးနှင့်ကြုံတွေ့နေရချိန်တွင် အချို့နိုင်ငံတွေရဲ့ အပ်ကြောင်းထပ်နေတဲ့ ပြစ်တင်ဝေဖန်မှုတွေကို ဆက်လက်ရင်ဆိုင်နေရသည်မှာ လွန်စွာဝမ်းနည်းဖွယ် ကောင်းတယ်လို့လည်း နိုင်ငံခြားရေးဝန်ကြီးဌာနရဲ့ သတင်းထုတ်ပြန်ချက်မှာဖော်ပြထားပါတယ်။
ယခုအချိန်တွင် မြန်မာပြည်သူများ အမှန်တကယ် လိုအပ် သည်မှာ ကူညီဖေးမမှု၊ အကူအညီ၊ အပြုသဘောဆောင်သည့် ထိထွေ့ဆောင်ရွက်မှုနှင့် တစ်သားတည်း ဖြစ်မှုတို့သာဖြစ်တယ်လို့ နိုင်ငံခြားရေးဝန်ကြီးဌာနက ဝေဖန်လိုက်ပြီး ဝန်ထုတ်ဝန်ပိုးဖြစ်စေတဲ့ နိုင်ငံရေးသွတ်သွင်းသည့် ဆုံးဖြတ်ချက်အဆိုကို အလိုမရှိဘူးလို့လည်း တုန့်ပြန်လိုက်ပါတယ်။
ယခုအချိန်တွင် မြန်မာပြည်သူများနှင့် အတူတစ်သားတည်းရှိကြောင်း ပြသ၍ ဝမ်းနည်းကြောင်း သဝဏ်လွှာပေးပို့ခဲ့ကြသည့် ကုလသမဂ္ဂအေဂျင်စီများ အပါအဝင် နိုင်ငံများနှင့် အဖွဲ့အစည်းများ အားလုံးကိုကျေးဇူးတင်ပြီး ယင်းကဲ့သို့ အားပေးသည့် အပြုအမူများမှာ လူသားချင်းစာနာမှုဆိုင်ရာ ပူးပေါင်းဆောင်ရွက်မှုနှင့် ချစ်ကြည်ရင်းနှီးမှုကို ပြသရာရောက်တယ်လို့ နိုင်ငံခြားရေးဝန်ကြီးဌာနက ပြောပါတယ်။
ယခုကဲ့သို့ သဘာဝဘေးကြောင့်အခက်အခဲများ ကြုံတွေ့နေရသည့်ကာလတွင် မျှတ၍ လက်တွေ့ ဆန်သောချဉ်းကပ်မှုဖြင့် မြန်မာနိုင်ငံ၏ သဘာဝဘေးတုံ့ပြန်ရေး ကြိုးပမ်း ဆောင်ရွက်ချက်များကို ကူညီပံ့ပိုးရန်နှင့် မြန်မာပြည်သူများနှင့် တစ်သားတည်းရှိရန်လည်း ကုလသမဂ္ဂ ကို နိုင်ငံခြားရေးဝန်ကြီး ဌာနက တိုက်တွန်းလိုက်ပါတယ်။
မြန်မာနိုင်ငံ လူ့အခွင့်အရေးအခြေအနေဆိုင်ရာ အထူးအစီရင်ခံစာတင်သွင်းသူ Tom Andrews ရဲ့ တောက်လျောက်တင်သွင်းခဲ့တဲ့ အစီရင်ခံစာတွေဟာ မျှတမှုမရှိသည့် အခြေအမြစ်ကင်းသော တစ်ဖက် သတ်ရေးသားချက်တွေသာဖြစ်ပြီး ပညာရှင်မဆန်ဘူး လို့ ဆက်တိုက် ဝေဖန်ခံနေရတာဖြစ်ပါတယ်။
#ymg/knl
