၅ ဧပြီ ၂၀၂၅

အဆောက်အဦများတည်ဆောက်ရာတွင် ပေါ့ပေါ့တန်တန်ဆောင်ရွက်ခဲ့မှုများကြောင့် မလိုလားအပ်သည့် လူ့အသက်ဆုံးရှုံးမှုများစွာပေးဆပ်ခဲ့ရခြင်းဖြစ်တယ်လို့ နစက ဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ် မှူးကြီးမင်းအောင်လှိုင်ကပြောပါတယ်။

ဧပြီ ၅ ရက်က နေပြည်တော်တွင်ရှိ နစက ဥက္ကဋ္ဌရုံးအစည်းအဝေးခန်းမ၌ကျင်းပတဲ့ ပြည်ထောင်စုအစိုးရ အဖွဲ့ အထူးအစည်းအဝေးတွင် ဗိုလ်ချုပ်မှူးကြီးမင်းအောင်လှိုင်က ယင်းကဲ့သို့ သုံးသပ်ပြောဆိုခဲ့ခြင်းဖြစ် ပါတယ်။

နောင်တည်ဆောက်မည့်လုပ်ငန်းများတွင် SOP များ ရေးဆွဲထုတ်ပြန်၍ စနစ်တကျ ဆောင်ရွက်   သွားကြဖို့နှင့်  ဆောက်လုပ်ရေးလုပ်ငန်းများဆောင်ရွက်ရာတွင် နောင်တစ်ချိန်၌ ကြီးမားသော  ဆုံးရှုံးမှု များမဖြစ်စေရေး တာဝန်ရှိသူများက ကြပ်မတ် ဆောင်ရွက်သွားကြဖို့လည်း ဗိုလ်ချုပ်မှူးကြီးက တိုက်တွန်းမှာကြားတယ်လို့ နစကရဲ့သတင်းထုတ်ပြန်ချက်မှာဖော်ပြထားပါတယ်။

ယခုဖြစ်ပေါ်ခဲ့သည့်သင်ခန်းစာသည် အသက် ပေါင်းများစွာပေးဆပ်ခဲ့ရသည့်ဆုံးရှုံးမှုဖြစ်ပြီး ကြီးမားသည့် သင်ခန်းစာတစ်ခုပင်ဖြစ်တယ်လို့လည်း ဗိုလ်ချုပ်မှူးကြီးကပြောပါတယ်။

အဲဒါကြောင့် ငလျင်နှင့်ပတ်သက်ပြီး အဆောက်အဦများ ဆောက်လုပ်ရာတွင် ငလျှင်ဒဏ်ကိုခံနိုင်သည့် အဆောက်အဦများဖြစ်စေရေး အင်ဂျင်နီယာပိုင်းဆိုင်ရာ များကို စနစ်တကျစိစစ်တည်ဆောက်ရန် လိုမယ်လို့ ဗိုလ်ချုပ်မှူးကြီးက ဆက်လက်သတိပေးပြောကြားပါတယ်။

အထက်မြင့်နှင့် အခိုင်အမာအဆောက်အဦများဆောက်လုပ်ရာတွင် အနည်းဆုံး ရက်ချ်စတာစကေး ၈ အထိအထက်ခံနိုင်သည့်အဆောက်အဦများဖြစ်အောင် ဆောက် လုပ်ရေးပိုင်းဆိုင်ရာ တာဝန်ရှိသူများက စနစ်တကျ ကြပ်မတ်ဆောင်ရွက်သွားရမယ်လို့လည်း ဗိုလ်ချုပ်မှူးကြီးက မှာကြားပါတယ်။

အဆောက်အဦများ၏ ပြင်ပတွင် လူအများစု နေထိုင်နေရသဖြင့် ယာယီတဲများအားလုံးထုတ်ယူသုံးစွဲရန်၊  ဝမ်းရောဂါမဖြစ်စေရေးအတွက် သန့်ရှင်းရေးနှင့်ကျန်းမာရေးနှင့်ညီညွတ်သော ယာယီယင်လု့အိမ်သာများ တည်ဆောက်ရန်၊ဝမ်းရောဂါ ကာကွယ်ဆေးနှင့်ကုသဆေးများဖြည့်ဆည်းထားရှိရန်၊ သန့်ရှင်းသော သောက်သုံးရေများရရှိရန်အလေးပေးဖြည့်ဆည်းဆောင်ရွက်ကြရမယ်လို့လည်း ဗိုလ်ချုပ်မှူးကြီးက ပြောပါတယ်။

အဲဒီ့အပြင် ငလျင်ဘေးအလွန်ပြန်လည်ထူထောင်ရေးလုပ်ငန်းများဆောင်ရွက်ရမည့် ကိစ္စများကိုလည်း ဗိုလ်ချုပ်မှူးကြီးက ကဏ္ဍအလိုက်အသေးစိတ်မှာကြားခဲ့ကြောင်းသိရပါတယ်။

ပြင်းထန်ငလျင်လှုပ်ခတ်ခဲ့မှုကြောင့် ယခုအချိန်အထိ သေဆုံးသူ  ၃၄၅၅ ဦး၊ ထိခိုက်ဒဏ်ရာရရှိသူ ၄၈၄၀ ဦး၊ ပျောက်ဆုံးနေသူ ၂၁၄ ဦး စုစုပေါင်း ၈၆၀၀ ကျော်ခန့် ထိခိုက်သေဆုံးမှုခဲ့ရပါတယ်။ အသေးစိတ်စာရင်းမရရှိသေးသော်လည်း အဆောက် အဦးပေါင်း ၅၂၂၃ လုံး၊ စာသင်ကျောင်းပေါင်း ၁၈၂၄ ကျောင်း၊ ဘုန်းတော်ကြီး ကျောင်းနှင့် သီလရှင်စာသင်တိုက် ၂၇၅၂ ကျောင်း ထိခိုက်ပျက်စီးဆုံးရှုံးခြင်း၊ ဘုရား စေတီပေါင်း ၄၈၁၇ ခု ထိခိုက်ပျက်စီးဆုံးရှုံးခြင်း၊ ဆေးရုံဆေးခန်း ၁၆၇ ခုပျက်စီးခဲ့ရပါတယ်။

ရန်ကုန်-နေပြည်တော်-မန္တလေး သွားရထားလမ်းနှင့် ကားလမ်းများပျက်စီးခြင်းနှင့် အချို့ဘူတာများတွင် ပျက်စီးမှုများဖြစ်ပေါ်ခြင်း၊ တံတား ၁၆၉ စင်းပျက်စီးခြင်း၊ ဆည်မြောင်းတမံ ၁၉၈ ခုထိခိုက်ပျက်စီးမှုဖြစ်ပေါ်ခြင်း၊ အမြန်လမ်းမကြီးတစ်လျှောက် အပိုင်း ၁၈၄ ခုထိခိုက်ပျက်စီးမှုများလည်း ရှိခဲ့ပါတယ်။

ယခုအချိန်အထိ နိုင်ငံပေါင်း ၂၆ နိုင်ငံမှ အရေးပေါ်ကူညီကယ်ဆယ်ရေးအဖွဲ့များကလည်း မြန်မာနိုင်ငံမှကူညီကယ်ဆယ်ရေး အဖွဲ့များနှင့် အတူတကွ ပူးပေါင်း၍ ကယ်ဆယ်ရေးလုပ်ငန်းများကို ဆောင်ရွက်လျက်ရှိကြောင်းသိရှိရပါတယ်။

#ymg/knl