၄ ဧပြီ ၂၀၂၅

မြန်မာနိုင်ငံနှင့်အိန္ဒိယနှစ်နိုင်ငံ နယ်စပ်တစ်လျောက် သောင်းကျန်းသူများ၏လှုပ်ရှားမှုများ၊ နယ်စပ် ဖြတ်ကျော်မှုခင်းများ နှင့် လူကုန်ကူးကိစ္စများတွင် နှစ်ဘက်ပူးပေါင်းဆောင်ရွက်ကြရန်  နှစ်နိုင်ငံ ခေါင်းဆောင်များက သဘောတူညီခဲ့ကြပါတယ်။

မြန်မာ နစက ဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်နှင့် အိန္ဒိယနိုင်ငံ ဝန်ကြီးချုပ် Shri Narendra Modi တို့ ဘင်စတက် ထိပ်သီးအစည်းအဝေးသို့တက်ရောက်နေစဉ်အတွင်း ယနေ့ ဧပြီ ၄ရက်မနက်ပိုင်းက သီးခြားတွေ့ဆုံကြရာမှာ ယင်းကဲ့သို့သဘောတူညီခဲ့ကြတာဖြစ်တယ်လို့ နှစ်ဘက် သတင်းထုတ်ပြန်ချက်များအရသိရပါတယ်။

ဗိုလ်ချုပ်မှူးကြီးက မြန်မာငလျင်ကြီးအတွက် အိန္ဒိယ၏ အကူအညီပေးမှုများကို ကျေးဇူးတင်ကြောင်း ပြောကြားခဲ့ပြီး အိန္ဒိယဝန်ကြီးချုပ်မိုဒီကလည်း အိန္ဒိယနိုင်ငံသည် အခက်အခဲအကျပ်အတည်းကာလ တွင် မြန်မာနှင့်အတူရပ်တည်နေပြီး လိုအပ်လာပါက နောက်ထပ်အကူအညီများနှင့်အရင်းအမြစ်များ ထပ်မံပေးသွားမည်ဟုပြောခဲ့ကြောင်း အိန္ဒိယနိုင်ငံခြားရေးဝန်ကြီးဌာနက သတင်းထုတ်ပြန်ပါတယ်။

ဗိုလ်ချုပ်မှူးကြီးနှင့် မစ္စတာမိုဒီတို့သည် နှစ်နိုင်ငံအကြားချစ်ကြည်ရင်းနှီးမှုနှင့် ပူးပေါင်းဆောင်ရွက်မှုများ

မြှင့်တင် ရေးဆိုင်ရာကိစ္စရပ်များ၊ မြန်မာနိုင်ငံ တည်ငြိမ်အေးချမ်းရေး၊ သာယာဝပြောရေးနှင့် မြန်မာနိုင်ငံ၏ အချုပ်အခြာအာဏာပိုင်ဆိုင်မှုကို အလေးထားမှုအခြေအနေများ၊ နယ်စပ်ဒေသတည်ငြိမ်  အေးချမ်းရေး၊ တရားမဝင်လူကုန်ကူးမှုများ နှင့်လက်နက်မှောင်ခိုမှုများ ပပျောက်ရေး ပူးပေါင်းဆောင်  ရွက်သွားမည့်အခြေနေများကိုဆွေးနွေးခဲ့ကြပါတယ်။

ယင်းအပြင် မြန်မာနိုင်ငံအနေဖြင့် ပါတီစုံဒီမိုကရေစီလမ်းကြောင်းပေါ်၌ ဆက်လက်လျှောက်လှမ်းလျက်ရှိ  မှုနှင့်ယခုနှစ်ဒီဇင်ဘာလအတွင်း လွတ်လပ်ပြီးတရားမျှတသည့် ပါတီစုံဒီမိုကရေစီအထွေထွေ ရွေးကောက် ပွဲကျင်းပနိုင်ရေး ကြိုတင်ပြင်ဆင်ဆောင်ရွက်လျက်ရှိမှုအခြေအနေများနှင့်ပတ်သက်၍ ရင်းနှီးပွင့်လင်းစွာ  အမြင်ချင်းဖလှယ်ဆွေးနွေးခဲ့ကြတယ်လို့နစကရဲ့သတင်းထုတ်ပြန်ချက်မှာဖော်ပြထားပါတယ်။ တွေ့ဆုံပွဲသို့ ဗိုလ်ချုပ်မှူးကြီးမင်းအောင်လှိုင်နှင့်အတူကောင်စီတွဲဖက်အတွင်းရေးမှူး ဗိုလ်ချုပ်ကြီး ရဲဝင်းဦး၊ ပြည်ထောင်စုဝန်ကြီးများဖြစ်ကြသည့် ဦးသန်းဆွေ၊ ဗိုလ်ချုပ်ကြီး မိုးအောင်နှင့် ခရီးစဉ်တွင်

လိုက်ပါလာသည့် အဆင့်မြင့်အရာရှိကြီးများတက်ရောက်ကြပြီး အိန္ဒိယနိုင်ငံဝန်ကြီးချုပ်နှင့် အတူ အိန္ဒိယ  နိုင်ငံအစိုးရအဖွဲ့မှ တာဝန်ရှိသူများတက်ရောက်ခဲ့ကြကြောင်းသိရှိရပါတယ်။. #ymg/knl