Published-15 June 2024

ရန်ကုန်နယ်နမိတ်အတွင်းရှိ ရေမြောင်းနှင့်မြစ် ၊ချောင်းထွက်ပေါက်များသို့အမှိုက်စွန့်ပစ်ပါက ငွေဒဏ်အပြင် ထောင်ဒဏ် များပါချမှတ်နိုင်ကြောင်း ရန်ကုန်မြို့တော်စည်ပင်သာယာရေးကော်မတီမှ သိရသည်။

ရေမြောင်းများ၊ ချောင်းများ အတွင်းသို့ အမှိုက်များ စည်းကမ်းမဲ့ စွန့်ပစ်ခြင်းကြောင့် ရေမြောင်းများ ပိတ်ဆို့ပြီး ရေကြီးရေလျှံမှုများ ဖြစ်ပွားလေ့ရှိသဖြင့် ရန်ကုန်မြို့တော်စည်ပင်သာယာရေး ဥပဒေ(၂၀၁၈ ခုနှစ်) အခန်း (၂၉) တားမြစ်ချက် ပုဒ်မ ၃၁၇  ပုဒ်မခွဲ (ခ) တွင် ပြဌာန်းထားသည့် “ မည်သူမျှ မြို့တော်နယ်နိမိတ်အတွင်းရှိ အများပြည်သူဆိုင်ရာ လမ်းဘေးရေမြောင်းငယ်၊ ရေမြောင်းကြီး၊ မြစ်နှင့်မြစ်ထွက်ပေါက်များ၊ ချောင်းများအတွင်းသို့ စွန့်ပစ်ပစ္စည်းများ၊ ရေဆိုးများ စီးဝင်စေခြင်း၊ စွန့်ပစ်ခြင်း၊ ပိတ်ဆို့စေခြင်းမပြုရ” ဟူသည့် တားမြစ်ချက်ရှိကြောင်းသိရသည်။

ထို့ကြောင့်  မြို့တော်နယ်နိမိတ်အတွင်းရှိ အများပြည်သူဆိုင်ရာ လမ်းဘေးရေမြောင်းငယ်၊ ရေမြောင်းကြီး၊ မြစ်နှင့်မြစ်ထွက်ပေါက်များ၊ ချောင်းများအတွင်းသို့ စွန့်ပစ်ပစ္စည်းများ၊ ရေဆိုးများ စီးဝင်စေခြင်း၊ စွန့်ပစ်ခြင်း၊ ပိတ်ဆို့စေခြင်းမပြုရ” ဟူသည့် တားမြစ်ချက်ကို ကျူးလွန်ပါက “ငွေဒဏ်ကျပ် ၅ သောင်းမှ ကျပ်(၃) သိန်းအထိဖြစ်စေ၊ ထောင်ဒဏ်(၃)လ အထိဖြစ်စေ၊ ဒဏ်နှစ်ရပ်လုံးဖြစ်စေ ချမှတ်ရမည်” ဟူသော ပြစ်ဒဏ်သတ်မှတ်ချက် ရှိကြောင်း
သိရသည် ။

အဆိုပါ သတ်မှတ်ချက်ကို ပြည်သူများ သိရှိလိုက်နာပြီး မြို့တော်သန့်ရှင်းသာယာလှပရေးနှင့် ရေစီးရေလာ ကောင်းမွန်စေရေးတို့ အတွက် ရန်ကုန်မြို့ရှိ ချောင်း၊ မြောင်းများအနီး တားမြစ်အသိပေးနှိုးဆော် ဆိုင်းဘုတ်များအား  စိုက်ထူခြင်း၊ စာတန်းများ ချိတ်ဆွဲခြင်းတို့ကို ဆောင်ရွက်လျက်ရှိ ကြောင်းသိရသည်။

ထိုသို့ဆောင်ရွက်ရာတွင် လှိုင်သာယာ(အရှေ့ပိုင်း)မြို့နယ် အမှတ် (၇) ရပ်ကွက်၊ ရန်ကုန်-ညောင်တုန်းလမ်းနှင့် ဗိုလ်အောင်ကျော်လမ်းထောင့်တွင် အင်ဂျင်နီယာဌာန (ရေစီးရေလာ စီမံခန့်ခွဲမှု)က ရေစီးရေလာကောင်းမွန်စေရေးအတွက် မြောင်းအတွင်း အမှိုက်နှင့် နုန်းများ ဆယ်ယူ ရှင်းလင်းနေမှု၊ “ရေမြောင်းထဲသို့ အမှိုက်ပစ်ပါက ဥပဒေနှင့်အညီ ထိရောက်စွာအရေးယူမည်” စာသားပါ အသိပေးဆိုင်းဘုတ် စိုက်ထူနေခဲ့ကြောင်းသိရသည်။
Yangon_Times/NN
#Local_News
#Published_ 15 June 2024
#YMG #Yangon_Times #Yangon_Media_Group