#Local_News
Published 22 November 2023
ယခုနှစ် ၁၁ လကျော်အတွင်း မီးလောင်မှုကြောင့် ကျပ် ၁၆ ဘီလီယံကျော် ဆုံးရှုံးပြီး ယမန်နှစ်ကာလတူကထက်ဆုံးရှုံးမှုပိုများခဲ့ကြောင်း မြန်မာနိုင်ငံ မီးသတ်တပ်ဖွဲ့မှ သိရသည်။
၂၀၂၃ ခုနှစ်၊ ဇန်နဝါရီလ ၁ ရက်မှ နိုဝင်ဘာ ၂၁ ရက်နေ့အထိ မြန်မာနိုင်ငံတစ်ဝှမ်းမှာ မီးလောင်မှုဖြစ်ပွားခြင်းကြောင့် ကျပ်သန်းပေါင်း (၁၆,၈၆၉) ကျော် ဆုံးရှုးခဲ့ပြီးယမန်နှစ်ကာလတူကထက်မီးလောင်မှုကြောင့် ပျက်စီးဆုံးရှုံးမှုတန်ဖိုးမှာ ကျပ် (၁၀) ဘီလီယံကျော် ပိုမိုများပြားလာကြောင်းသိရသည်။
'မီးလောင်မှုအများစုက ပေါ့ဆမှုနဲ့ လျှပ်စစ်မီးကြောင့် ဖြစ်ပွားတာပါ။ မီးလောင်မှုလျော့နည်းဖို့က ပြည်သူလူထုက ပူးပေါင်းဆောင်ရွက်မှ ပိုပြီးအောင်မြင်နိုင်မှာပါ။ မီးသတ်ဆေးဗူးက နေရာတိုင်းမှာ ဝယ်လို့ရနေပါပြီ။ မီးလောင်တဲ့အခါ မီးတောက်သေးသေးလေးက စတာဖြစ်ပါတယ်။ နေအိမ်တိုင်း၊ နေရာတိုင်းမှာ မီးသတ်ဆေးဗူးကိုထားဖို့ တိုက်တွန်းလိုပါတယ်'ဟု မြန်မာနိုင်ငံ မီးသတ်တပ်ဖွဲ့မှ တာဝန်ရှိသူတစ်ဦးက ပြောသည်။
ယခု ၁၁ လကျော်ကာလတာအတွင်း မီးလောင်မှုအကြိမ်ပေါင်း ၁,၂၄၅ ကြိမ်အထိ ဖြစ်ပွားခဲ့ပြီး သေဆုံးသူ (၇၅) ဦးအထိရှိခဲ့ပြီး ဒဏ်ရာရရှိသူ (၁၈၄) ယောက် ရှိခဲ့ပြီး မီးဘေးဒုက္ခသည်ပေါင်း (၉,၇၂၁) ဦး ရှိကြောင်း သိရသည်။
သို့သော် ယမန်နှစ်အလားတူကာလတွင် မီးလောင်မှုအကြိမ်ရေ (၁,၄၀၀) ရှိခဲ့သည့် အတွက် ယခုနှစ်မှာ ဖြစ်ပွားမှုမှာ (၁၅၅) ကြိမ် လျော့နည်းကြောင်း သိရသည်။
ထို့အပြင်မီးလောင်မှုကြောင့် အိမ်ခြေအဆောက်အဦပေါင်း (၃,၁၀၀) ကျော်၊ စက်ရုံ/အလုပ်ရုံပေါင်း (၁၇) ရုံ၊ ဂိုထောင်ပေါင်း (၁၄၆) လုံး ဆုံးရှုံးခဲ့ကြောင်း သိရသည်။
#Local_News #မီးလောင်မှု #ယမန်နှစ်ကထက်ဆုံးရှုံးမှုပိုများ #YMG/ NN #Yangon_Times
