#Local_News
Published 13 November 2023
အလုပ်သမားဝန်ကြီးဌာနက သတ်မှတ်ထားသည့် အလုပ်သမား၁၀ဦးနှင့်အထက်ရှိသည့် လုပ်ငန်းများတွင် လုပ်ကိုင်နေသော အလုပ်သမားများအတွက် ထောက်ပံကြေးတစ်ရက်လျှင် ၁၀၀၀ ကျပ် မရရှိပါက အလုပ်သမားဝန်ကြီးဌာနကို တိုင်ကြားနိုင်ကြောင်း သိရသည်။
အဆိုပါ အပိုထောက်ပံကြေး ၁၀၀၀ ကျပ်ကို ၂၀၂၃ ခုနှစ် အောက်တိုဘာလ ၁ရက်ကစပြီးအလုပ်သမား ၁၀ဦးနှင့်အထက်ရှိသည့် လုပ်ငန်းများရှိ အလုပ်သမားများ ခံစားခွင့်ရရန် အတွက် အောက်တိုဘာ ၉ ရက်က အလုပ်သမားဝန်ကြီးဌာနက ထုတ်ပြန်ကြေညာခဲ့သော်လည်း အချို့ လုပ်ငန်းခွင်များတွင် မရရှိသည့် အလုပ်သမားများ ရှိနေကြောင်း သိရသည်။
''အလုပ်သမား ၁၀ဦးနဲ့ အထက်ရှိတဲ့ စက်ရုံအလုပ်ရုံတွေက အလုပ်သမားတွေ အကုန်ထောက်ပံ့ကြေး ၁၀၀၀ ကျပ်ရရမှာပါ မရဘူးဆိုရင် မြို့နယ်အလုပ်သမားရုံးကို လာတိုင်လို့ရပါတယ်၊ စက်ရုံက စက်ချုပ်သမားပဲရမယ် Helperတော့ မရဘူးဆိုတာ မရှိပါဘူး။ အနည်းဆုံးအခကြေးငွေ ၄၈၀၀ ကျပ်အပြင် အပိုထောက်ပံကြေး ၁၀၀၀ ကျပ်ရရပါမယ်''ဟု အလုပ်သမားဝန်ကြီးဌာနက တာဝန်ရှိသူကပြောသည်။
ယင်းအပိုထောက်ပံကြေး ၁၀၀၀ ကျပ် ကို ၁၉၅၁ ခုနှစ်ခွင့်ရက်နှင့်အလုပ်ပိတ်ရက်ဥပဒေအရ ရက်သတ္တပတ်အလုပ်ပိတ်ရက်နှင့် အများပြည်သူရုံးပိတ်များအတွက်ရရှိမှာဖြစ်ပြီး ခွင့်တိုင်ကြား ခြင်းမရှိဘဲ အလုပ်ပျက်ကွက်ပါက ပျက်ကွက်သည့်နေ့အတွက် အပိုထောက်ပံကြေးရရှိမည် မဟုတ်ကြောင်း သိရသည်။
သို့သော် အချိန်ပို လုပ်အားခတွက်ချက်ရာတွင် အနည်းဆုံးအခကြေးငွေ ၄၈၀၀ ကျပ် ပေါ် မူတည်ပြီးသာ တွက်ချက်ရမည်ဖြစ်ပြီး အပိုထောက်ပံ့ကြေးဖြစ်သောကြောင့် ထည့်သွင်း တွက်ချက်၍ မရကြောင်း ထည့်သွင်းတွက်ချက်ပါကလည်း အလုပ်ရှင်အလုပ်သမား သဘော တူညီမှုအပေါ် မူတည်ကြောင်း သိရသည်။
#Local_News #ထောက်ပံကြေးတစ်ရက်အတွက်၁၀၀၀ကျပ် #မရပါကတိုင်ကြားနိုင် #YMG/LW #Yangon_Times
