#Local_News
Published 12 October 2023

ရေကြီးနစ်မြုပ်မှု ဒဏ်အဆိုးရွားဆုံးခံခဲ့ရသည့် ပဲခူးမြို့နယ်အတွင်း ပြန်လည်ထူထောင်ေရးလုပ်ဆောင်ရာမှာ ရေဘေးသင့် ပြည်သူများ၏ စားဝတ်နေရေးအတွက် လိုအပ်ချက်တွေရှိလာမည်ဖြစ်ကြောင်း လူမှုကူညီရေးအသင်းများထံ ကသိရသည်။

အောက်တိုဘာ ၈ရက် ကတည်းက ရေကြီးခဲ့သည့် ပဲခူးမြို့ဟာ လက်ရှိမှာတော့ လမ်းမကြီးများနှင့် မြို့တွင်းကုန်းမြင့် နေရာများတွင် ရေများကျဆင်းသွားပြီး မြေနိမ့်ပိုင်းရှိ ရပ်ကွက်များမှာတော့ရေများ ကျန်ရှိနေသေးကြောင်း သိရသည်။

''ရေကမြို့တွင်းလမ်းမကြီးနဲ့ နေရာအချို့မှာတော့ ရေပြန်ကျပြီ မြေနိမ့်နေရာတွေကတော့ ဒူးလောက်၊ ပေါင်လောက်အထိ ရေရှိတဲ့နေရာတွေ ကျန်သေးတယ်၊ လက်ရှိတော့ ကယ်ဆယ်ရေးစခန်းတွေ ရှိတဲ့ ရေဘေးသင့်ပြည်သူတွေရဲ့ စားဝတ်နေရေးအတွက်က အဖက်ဖက်ကလှူဒါန်းထောက်ပံတဲ့အတွက် အဆင်ပြေတယ်၊ ပြန်လည်ထူထောင်ရေးမှာတော့ လိုအပ်ချက်တွေ ရှိလာမှာ၊ အခု ကျွန်တော်တို့အနေနဲ့ အဝတ်အထည်တွေ ဆန် ဆီ ဆား စတဲ့ စားသောက်ကုန်တွေ စပြီး စုနေတယ်၊ သူတို့တွေ ရေကျလို့ အိမ်ပြန်တဲ့အခါ သန့်ရှင်းရေးလုပ်ရမှာတွေနေထိုင်ဖို့ ပြင်ဆင်ရတာတွေ ရှိလာမှာဆိုတော့ သူတို့အတွက် စားဝတ်နေရေး လိုအပ်ချက်တွေ ရှိလာမှာပဲ''ဟုမဇ္ဇိုမ သုခ ဖောင်ဒေးရှင်း လူမှုကူညီရေး အသင်းဥက္ကဌ ကိုသန့်ဇင်မောင်က ပြောသည်။

လက်ရှိတွင် ရေပြန်ကျဆင်းလာပြီး နုန်းများတင်ကျန်နေသည့် ပဲခူးမြို့ပြည်သူ့ဆေးရုံကြီး ၊အ ထ က ၁ စာသင်ကျောင်းနှင့် မြို့မဈေးကြီးတို့တွင် ပဲခူးတိုင်းဒေသကြီး မီးသတ်စခန်းများမှ မီးသတ်ယာဉ် များ နှင့် မီးသတ်တပ်ဖွဲ့ဝင်များ၊ ဌာနဆိုင်ရာ အဖွဲ့အစည်းများ ပူးပေါင်းပြီး သန့်ရှင်းရေးလုပ်ငန်းများ လုပ်ဆောင်နေကြောင်း သိရသည်။

လမ်းပန်ဆက်သွယ်ရေး အနေနဲ့ ပဲခူးမြို့တွင် ယာဉ်အသေး အကြီးသွားလာလို့ ရနိုင်ပြီဖြစ်သော်လည်း ပဲခူးမြို့ဝင်ဂိတ်နားရှိ လမ်းမကြီးပေါ်တွင် ရေ ၃ပေခန့်ရှိတာကြောင့် ယာဉ်အသေးများ သွားလာလို့ မရသေးကြောင်း သိရသည်။

ပဲခူးမြို့နယ်သည် နှစ်ပေါင်း ၅၀ အတွင်း အဆိုးရွားဆုံး ရေကြီးနစ်မြုပ်မှုဒဏ်ခံခဲ့ရတာကြောင့် ပျက်စီးဆုံးရှုံးမှုများစွာဖြစ်ခဲ့ပြီး လူသေဆုံးမှုလည်းရှိခဲ့ကြောင်း သိရသည်။

#Local_News #ရေဘေးသင့်ပြည်သူများ #ရေကြီးနစ်မြုပ်ဒဏ်ခံခဲ့ရ
#YMG/LW #Yangon_Times