#Local_News
Published 13 Setember 2023

မြန်မာနိုင်ငံသားများသည် အဓမ္မလုပ်အားခိုင်းစေမှု၊ လိင်ပိုင်းဆိုင်ရာ ခေါင်းပုံဖြတ်မှု၊ အဓမ္မလက်ထပ်ထိမ်းမြားမှု စသည့် လူကုန်ကူးမှုပုံစံများဖြင့် ပြည်တွင်းအပါအဝင် အိမ်နီးချင်းနိုင်ငံများနှင့် အခြားနိုင်ငံများသို့ နှစ်စဉ်လူကုန်ကူးခြင်း ခံနေရကြောင်း ဒုတိယဗိုလ်ချုပ်ကြီး ရာပြည့်ကပြောသည်။

စက်တင်ဘာ၁၃ရက်တွင် ကျရောက်သည့် ဧကာဒသမအကြိမ်မြောက် မြန်မာနိုင်ငံလူကုန်ကူးမှုတိုက်ဖျက်ရေးနေ့သို့ ပေးပို့သည့် သဝဏ်လွှာတွင်ယင်းသို့ထည့်သွင်း ပြောကြားခဲ့ခြင်းဖြစ်သည်။

အစီရင်ခံစာထဲတွင် ပြည်တွင်းအလုပ်အကိုင်ရှားပါးမှု၊ လုပ်ခလစာနည်းပါးမှုအပါအဝင် ဘဝရပ်တည်ရန်ခက်ခဲသည့် အခြေအနေများကြောင့် ပြည်ပနိုင်ငံအသီးသီးသို့ တရားဝင်/တရားမဝင် ရွှေ့ပြောင်းသွားလာလုပ်ကိုင်ကြရာမှ ပွဲစားများ၏ မက်လုံးပေး စည်းရုံးမှုကြောင့်လည်းကောင်း၊ တရားဝင် အလုပ်သမားစေလွှတ်ရန် သဘောတူညီချက် လက်မှတ်ရေးထိုးထားခြင်းမရှိသော နိုင်ငံများသို့ တရားမဝင်ပို့ဆောင်ခံရခြင်းကြောင့်လည်းကောင်း လုပ်အားခေါင်းပုံဖြတ်မှုနှင့် လိင်ပိုင်းဆိုင်ရာ ခေါင်းပုံဖြတ် အမြတ်ထုတ်မှုတို့ကို ခံနေကြရကြောင်း ၎င်းကသဝဏ်လွှာတွင်ထည့်သွင်း ပြောကြားထားသည်။

မြန်မာနိုင်ငံအနေဖြင့် လူကုန်ကူးမှုတိုက်ဖျက်ရေးနေ့ကို ၂၀၀၇ ခုနှစ်က စပြီး ငါးနှစ်စီမံကိန်းချမှတ်ဆောင်ရွက်လာခဲ့ရာ လက်ရှိကာလမှာ စတုတ္ထငါးနှစ်စီမံကိန်း၂၀၂၂-၂၀၂၆ ခုနှစ်၏ ဒုတိယနှစ်ကာလကိုရောက်ရှိခဲ့ရာ ၂၀၂၂ စက်တင်ဘာလမှ ၂၀၂၃ ခုနှစ် သြဂုတ်လအထိ လူကုန်ကူးမှု ၃၇ ခုကို ဖေါ်ထုတ်အရေးယူနိုင်ခဲ့ပြီး အမှုများထဲကအမျိုးသား၁၉ ဦးနှင့် အမျိုး
သမီး၆၁ ဦး စုစုပေါင်း ၈၀ဦး ကို ကယ်ယူနိုင်ခဲ့ကြာင်း သိရပါသည်။

လူကုန်ကူးခံရသူများကို မူဆယ်၊ မန္တလေး၊ ကော့သောင်း၊ မြဝတီနှင့်ရန်ကုန်တို့တွင် ယာယီ လက်ခံစောင့်ရှောက်ရေးဂေဟာများ ဖွင့်လှစ်ထားပြီး လူကုန်ကူးခံရသူတွေရဲ့ အခြေခံလိုအပ်ချက်များဖြည့်ဆည်းဆောင်ရွက်ပေးနေကြောင်း သိရသည်။

၂၀၂၂ ခုနှစ်ဇန်နဝါရီမှ ၂၀၂၃ ခုနှစ် သြဂုတ်လ အထိ လူကုန်ကူးခံရသူကိန်းဂဏန်းများ အရ ၆၉ ဒသမ၄၂ရာခိုင်နှုန်းမှာ အမျိုးသမီးများနှင့် ကလေးသူငယ်များ ဖြစ်ပြီး၊ အဓမ္မလုပ်အားခိုင်းစေမှု မှာ၃၆ဒသမ၄ရာခိုင်နှုန်းရှိပြီးလိင်ပိုင်းဆိုင်ရာ ခေါင်းပုံဖြတ်မှုနှင့် အဓမ္မလက်ထပ်ထိမ်းမြားမှု မှာ၃၂ဒသမ၇ ရာခိုင်နှုန်းရှိတယ်လို့ လူကုန်ကူးမှုကာကွယ်တားဆီးနှိမ်နှင်းရေးအဖွဲ့၏အစီရင်ခံစာအရ သိရသည်။

#YMG/LW #Local_News #အဓမ္မလုပ်အားခိုင်းစေမှု #လူကုန်ကူးမှုခံနေရဟုဆို
#Yangon_Times