#Local_News
Published_ 18 August 2023

တရုတ်နိုင်ငံနှင့် အာဆီယံနိုင်ငံများအနေဖြင့် မြန်မာနိုင်ငံရှိ ကဏ္ဍများစွာတွင် ကုန်သွယ်မှုနှင့်ရင်းနှီးမြှုပ်နှံမှုများတိုးချဲ့ရန် အလားအလာများစွာရှိနေကြောင်း ကူမင်းမြို့၌ ကျင်းပသည့် (၅) ကြိမ်မြောက် တရုတ်-အရှေ့တောင်အာရှ စီးပွားရေးဖိုရမ်တွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနဝန်ကြီး ဦးအောင်နိုင်ဦးက အမှာစကား ပြောကြားရာ၌ ထည့်သွင်းပြောကြားခဲ့ပါတယ်။

ဩဂုတ် ၁၇ ရက် ဖိုရမ်ဖွင့်ပွဲအခမ်းအနားတွင် တရုတ်နိုင်ငံ ယူနန်ပြည်နယ်အစိုးရ ဒုတိယပြည်နယ် အုပ်ချုပ်ရေးမှူး Mr. Na Yunde ၊ အာဆီယံ-တရုတ်စင်တာမှ အထွေထွေအတွင်းရေးမှူး၊ တရုတ်နိုင်ငံ အပြည်ပြည်ဆိုင်ရာကုန်သည်များအသင်း ဥက္ကဋ္ဌတို့က အဖွင့်အမှာစကား ပြောကြားခဲ့ကြပါတယ်။

မြန်မာနိုင်ငံအနေဖြင့် တရုတ်နိုင်ငံနှင့်တကွ အရှေ့တောင်အာရှနိုင်ငံများနှင့် ကုန်သွယ်မှု၊ ရင်းနှီးမြှုပ်နှံမှုနှင့် အခြားသောနယ်ပယ်များတွင် ပိုမိုနီးကပ်စွာ ပူးပေါင်း ဆောင်ရွက်သွားမည်ဖြစ်ကြောင်း၊ တရုတ်နိုင်ငံနှင့် အရှေ့တောင်အာရှနိုင်ငံများအနေဖြင့် အနာဂတ်အလားအလာနှင့် အခွင့်အလမ်းကောင်းများကို ဖေါ်ထုတ်နိုင်ရန်အတွက် စီးပွားရေးအသိုက်အဝန်းများအကြား ပူးပေါင်းဆောင်ရွက်မှု ပိုမိုမြှင့်တင်ရန်လိုအပ်တယ်လို့ ဝန်ကြီးက ပြောပါတယ်။

(၅) ကြိမ်မြောက် တရုတ်-အရှေ့တောင်အာရှစီးပွားရေးဖိုရမ်၏ အလှည့်ကျ သဘာပတိအဖြစ် မြန်မာနိုင်ငံ ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် ဥက္ကဋ္ဌ ဦးအေးဝင်း က ဆောင်ရွက်ပြီး စီးပွားရေးပူးပေါင်းဆောင်ရွက်မှုဆိုင်ရာများကို ဆွေးနွေးပြောကြားခဲ့ပါတယ်။

ထို့ပြင် အရှေ့တောင်အာရှနိုင်ငံများမှ ကုန်သည်များနှင့် စက်မှုလက်မှုလုပ်ငန်းရှင်များ အသင်းများမှ ဥက္ကဋ္ဌများနှင့် တရုတ်နိုင်ငံယူနန်ပြည်နယ်ရှိ ပြည်နယ်ခွဲများမှ အစိုးရ ကိုယ်စားလှယ်များကလည်း ပါဝင်ဆွေးနွေးကြကြောင်း သိရပါတယ်။

#ygm_mnn #Local_News #တရုတ်နိုင်ငံ #အာဆီယံနိုင်ငံ #ရင်းနှီးမြှုပ်နှံမှုများတိုးချဲ့ #စီးပွားကူးသန်းဝန်ကြီးဆို #Yangon_Media_Group