#DailyNews
Published _ 7 November 2022

၁။ နိုဝင်ဘာလအစတွင် ပြည်ပခရီးသွားဧည့်သည်များ စတင်ဝင်ရောက်လာဟု UMTA ဥက္ကဋ္ဌပြော

၂။ အများပြည်သူယာဉ်လိုင်းများပေါ်တွင် လုယက်မှုတွေပိုမိုများပြားလာ

၃။ အခါကြီးရက်ကြီးတွေမှာ အဝေးပြေးယာဉ် လက်မှတ်ခတွေ ပိုမရောင်းရန်ညွှန်ကြားထား

၄။ အီမိုဂျီရုပ်ပုံများကို မျက်မှန်တပ်ပေးလို့ရအောင် ဖန်တီးပေးရန် အင်္ဂလန်ဆယ်ကျော်သက်မိန်းကလေးတိုက်တွန်း ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Local_News
Published_7 November 2022

ယခုဘဏ္ဍာနှစ်ရဲ့ ဧပြီလ ၁ ရက်ကနေ အောက်တိုဘာ ၂၈ ရက်အထိ ခုနှစ်လတာနီးပါးကာလအတွင်း ပြည်ပကို ရေထွက်ကုန်ပစ္စည်းတင်ပို့မှုမှ အမေရိကန်ဒေါ်လာ ၄၀၇ ဒသမ ၄၆ သန်းရရှိထားတယ်လို့ စီးပွားရေးနဲ့ ကူးသန်းရောင်းဝယ်ရေးဝန်ကြီးဌာနရဲ့ ဖော်ပြထားတဲ့ စာရင်းတွေအရ သိရပါတယ်။

 
#Yangon_Media_Group

#Local_News
Published _7 November 2022

လေယာဉ်တစ်စီး စစ်တွေလေဆိပ်သို့ဆင်းသက်ပြီးချိန် အင်ဂျင်ကို ငှက်ဝင်တိုက်မှုဖြစ်၍ လေယာဉ်အပြောင်းအလဲလုပ်ခဲ့ရကြောင်း ရခိုင်ပြည်နယ် အစိုးရအဖွဲ့က သိရသည်။

အဆိုပါအပြည်ပြည်ဆိုင်ရာ မြန်မာ့လေကြောင်းလိုင်း၊ လေယာဉ်အမျိုးအစား E-190၊ လေယာဉ် အမှတ် XY-ALO သည် ယနေ့ နိုဝင်ဘာလ ၇ ရက် နံနက် ၉ နာရီခန့်တွင် ရန်ကုန်မှ စစ်တွေလေဆိပ်သို့ဆင်းသက်ခဲ့ပြီး ခရီးသည်များဆင်းနေစဉ် လေယာဉ်အင်ဂျင်ကို ငှက်ဝင်တိုက်ခဲ့ခြင်း ဖြစ်သည်။

ခရီးသည်များ အားလုံးဆင်းပြီးနောက် လေယာဉ်ကို ကြည့်ရှုစစ်ဆေးခဲ့ရာ လေယာဉ်၏ယာဘက်အင်ဂျင်အတွင်း ငှက်တိုက်မိထားသည်ကိုတွေ့ရှိရသဖြင့် ရန်ကုန်ရုံးချုပ်မှ ငှက်တိုက်ခံထားရသော လေယာဉ်ပြုပြင်ပေးမည့် အင်ဂျင်နီယာများနှင့် နောက်ထပ်လေယာဉ်(၁)စီး ကို စေလွှတ်ပေးခဲ့ကြောင်း၊ ယင်းလေယာဉ်ဖြင့်ပင် ရန်ကုန်သို့ ပြန်လည်လိုက်ပါမည့်ခရီးသည်များအား ပြန်လည်သယ်ဆောင်လာခဲ့ရကြောင်းလည်း သိရသည်။

#ymg/mt
#Yangon_Media_Group

#Local_News
Published _ 7 november 2022

ရှမ်းပြည်နယ်(မြောက်ပိုင်း)၊တန့်ယန်းမြို့နယ်ရှိ ဟုန်ပန်းခြံလမ်းတွင် ယနေ့ နိုဝင်ဘာလ ၇ ရက် မွန်းတည့်ပိုင်းတွင် ကိုယ်ပိုင်ကားနှင့် ဆိုင်ကယ်တိုက်မိခဲ့သည့် ဖြစ်စဉ်ဖြစ်ပွားခဲ့ကြောင်း တန့်ယန်းမြို့နယ်အရန်မီးသတ်တပ်ရင်းထံမှ သိရသည်။

ယနေ့ မွန်းတည့်ချိန် ၁၂ နာရီခန့်က ဟုန်ပန်းခြံလမ်းရှိ လိမ္မော်ခြံအနီးတွင် TOYOTA Wish ကားနှင့် ဆိုင်ကယ်တိုက်မိ၍ ထိခိုက်ဒဏ်ရာရသူများရှိနေကြောင်း သတင်းရရှိသဖြင့် တန့်ယန်းမြို့နယ်အရန်မီးသတ်တပ်ရင်းမှ ကူညီကယ်ဆယ်ရေးလုပ်ငန်းများသွားရောက်ပြုလုပ်ခဲ့ကြောင်း သိရသည်။

ဖြစ်စဉ်ကြောင့် လူ၄ဦး ဒဏ်ရာရရှိခဲ့ကာ ထိခိုက်ဒဏ်ရာရရှိခဲ့သည့် အမျိုးသား ၁ ဦးနှင့်အမျိုးသမီး ၃ ဦး(စုစုပေါင်း ၄ ဦး)အား လူ နာတင်ကားများဖြင့် တန့်ယန်းမြို့နယ်ပြည်သူ့ဆေးရုံသို့ ဆေးကုသမှုခံယူရန် ပို့ဆောင်ပေးခဲ့ကြကြောင်း သိရသည်။

ဒဏ်ရာရရှိသူများမှာ စိုးရိမ်ရမှု အခြေအနေမရှိကြောင်းလည်း ၎င်းတို့ထံမှ သိရှိရသည်။

#ymg/NN
#Yangon_Media_Group

#Local_News
Published_ 7 November 2022

တန်ဆောင်မုန်းလပြည့်နေ့တွင် ရွှေတိဂုံစေတီတော်မြတ်ကြီးရှိ မြတ်စွာဘုရားရုပ်ပွားတော်များတွင် ရွှေကြာသင်္ကန်းဆက်ကပ်လှူတန်းခဲ့ကြောင်း ရွှေတိဂုံစေတီတော်ဂေါပကအဖွဲ့ဝင် ဦးဘိုးသင်းထံမှ သိရသည်၊၊

ရွှေတိဂုံစေတီတော်ဘဏာတော်ထိန်းဂေါပကအဖွဲ့မှ ကြီးမှူးကျင်းပတာဖြစ်ပြီး တန်ဆောင်မုန်းလပြည့်နေ့ မနက်ပိုင်းမှာ ဆွမ်းတော်ကြီးဆက်ကပ်လှူတန်းခြင်းနှင့် ရွှေကြာသင်္ကန်းများကို ရွှေတိဂုံစေတီတော်ရှိ မုခ်လေးမုခ်ကရုပ်ပွားတော် (၄)ဆူနဲ့ ပတ္တမြားမျက်ရှင်ရုပ်ပွားတော်(၁)ဆူစုစုပေါင်း ရုပ်ပွားတော် (၅)ဆူတွင် ဆက်ကပ်လှူတန်းဆက်ကပ်ခဲ့သည်၊၊

ကိုဗစ်ဖြစ်ပွားမှုများရှိနေသေးသလိုညမထွက်ရသည့်အချိန်များလည်းရှိနေသေးသည့်အတွက် ညလုံး ပေါက် ရက်ခတ်ယှဉ်ပြိုင်ရသည့် မသိုးသင်္ကန်းရက်ခတ်ပြိုင်ပွဲကို အခုနှစ်တွင်လည်း မကျင်းပဖြစ်သေး ကြောင်း ဂေါပကအဖွဲ့ထံမှသိရသည်၊၊

#ymg/tthl
#Yangon_Media_Group

#Local_News
Published_ 7 November 2022

ဗိုလ်တထောင်ကျိုက်ဒေးအပ်ဆံတော်ဦးစေတီတော်တွင် (၃၈) ကြိမ်မြောက် မသိုးရွှေကြာသင်္ကန်းယှဉ်ပြိုင်ရက်ခတ် ဆက်ကပ်ပူဇော်ပွဲ ဖွင့်ပွဲအခမ်းအနားကို ၂၀၂၂ ခုနှစ် နိုဝင်ဘာလ(၆)ရက်၌ကျင်းပခဲ့ကြောင်းသိရသည်၊၊

အခမ်းအနားကို ဗိုလ်တထောင်ကျိုက်ဒေးအပ်ဆံတော်ဦးစေတီတော်တိုးချဲ့ဓမ္မရင်ပြင်တော်ကြီး၌ ကျင်းပပြုလုပ်ခဲ့ခြင်းဖြစ်သည်၊၊

ဗိုလ်တထောင်ကျိုက်ဒေးအပ်ဆံတော်ဦးစေတီတော် (၃၈) ကြိမ်မြောက် မသိုးရွှေကြာသင်္ကန်းယှဉ်ပြိုင်ရက်ခတ်ပူဇော်ပွဲအခမ်းအနားကို ရန်ကုန်တိုင်းဒေသကြီး အစိုးရအဖွဲ့ ဝန်ကြီးချုပ် ဦးစိုးသိန်း၊ရန်ကုန်တိုင်းစစ်ဌာနချုပ် တိုင်းမှူး ဗိုလ်ချုပ် ညွန့်ဝင်းဆွေ ဧရာဝတီရေတပ်စခန်းဌာနချုပ် ဌာနချုပ်မှူး ဗိုလ်မှူးချုပ် အေးမင်းထွေး၊ လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးဝင်းတင့် စည်ပင်သာယာရေးဝန်ကြီး ဦးဘိုဌေး၊ လူမှူရေးဝန်ကြီး ဦးအောင်ဝင်းသိန်း၊ ဗိုလ်တထောင်ကျိုက်ဒေးအပ်ဆံတော်ဦးစေတီတော် အလှည့်ကျသဘာပတိ ဦးအောင်မြတ် ဗိုလ်တထောင်ကျိုက်ဒေးအပ်ဆံတော်ဦးစေတီတော် ဘဏ္ဍာတော်ထိန်းဂေါပကအဖွဲ့ဝင် ဦးဌေးဦး ဗိုလ်တထောင်ကျိုက်ဒေးအပ်ဆံတော်ဦးစေတီတော် ဘဏ္ဍာတော်ထိန်းဂေါပကအဖွဲ့ဝင် ဦးတင်ရှိန် ၊ ပွဲတော်ကျင်းပရေးအလှူရှင်ဖြစ်သော ရွှေသံလွင် ကုမ္ပဏီနာယကကြီး ဒေါက်တာဒေါ်နီနီတို့မှ ဖဲကြိုးဖြတ်၍ ဖွင့်လှစ်ခြင်း! (၃၈) ကြိမ်မြောက် မသိုးရွှေကြာသင်္ကန်းရက်ပြိုင်ပွဲအား စတင်ယှဉ်ပြိုင်ရက်ခတ်ပြီး ဖွင့်ပွဲအခမ်းအနားကို အောင်မြင်စွာ ကျင်းပခဲ့ကြောင်းသိရသည်၊၊

ရန်ကုန်တိုင်းဒေသကြီးအစိုးရအဖွဲ့ ဝန်ကြီးချုပ်အမှူးပြုသော ဧည့်သည်တော်များမှ မသိုးသင်္ကန်းယှဉ်ပြိုင်ရက်ခတ်မှုအား လှည့်လည်ကြည့်ရှုအားပေးခဲ့ကြသည်။

၂၀၁၉ခုနှစ်က'(၃၇)ကြိမ်မြောက်မသိုးရွှေကြာသင်္ကန်းယှဉ်ပြိုင်ရက်ခတ်ဆက်ကပ်ပူဇော်ပွဲ'ကျင်းပခဲ့ပြီး ကိုဗစ်ဖြစ်ပွားမှုများကြောင့် ယခု၂၀၂၂ခုနှစ်မှ '(၃၈)ကြိမ်မြောက်မသိုးရွှေကြာသင်္ကန်းယှဉ်ပြိုင်ရက်ခတ် ဆက်ကပ်ပူဇော်ပွဲ' ပြန်လည်ကျင်းပနိုင်ခဲ့ကြောင်းနှင့် မသိုးရွှေကြာသင်္ကန်းယှဉ်ပြိုင်ပွဲမှာ ရက်ကန်းစင်တော်(၂၄)စင်မှ ပါဝင်ယှဉ်ပြိုင်ကြမယ့်ရက်ကန်းစင်တော်အသင်းတွေကို ပထမဆုကျပ်(၁၀)သိန်း၊ဒုတိယ ဆုကျပ်(၇)သိန်း၊ တတိယဆုကျပ်(၅)သိန်းနဲ့ နှစ်သိမ့်ဆု(၂၁)ဆုကို ကျပ်(၃)သိန်းစီချီးမြှင့်ခဲ့ကြောင်း သိရသည်၊၊

#ymg/tthl
#Yangon_Media_Group