#Local_News
Published_20 December 2022

ဈေးကွက်အတွင်း ကြက်သွန်နီဈေးနှုန်းများပြန်လည်ကျဆင်းလာပြီဖြစ်ကြောင်း ရောင်းသူ၊ ဝယ်သူများထံမှ သိရသည်။

ဗီယက်နမ်နှင့် ထိုင်းနိုင်ငံတို့မှ တစ်နှစ်ပတ်လုံး ဝယ်လိုအားများနေသည့်အတွက် ကြက်သွန်နီဈေးနှုန်းသည် ယမန်နှစ်ထက် ဈေးကပိုမြင့်နေကြောင်း၊ ယင်းအပြင် ကြက်သွန်အသစ်ပေါ်ချိန်ဖြစ်သော်လည်း ပြီးခဲ့သည့်တစ်ပါတ်အထိ ဈေးနှုန်းမှာ ၅၀၀၀ အထိစံချိန်တင်မြင့်တက်ခဲ့ခြင်းဖြစ်သည်။

လက်ရှိဈေးကွက်ထဲတွင် ကြက်သွန်အကြီး တစ်ပိဿာ ၄၀၀၀ ကျပ်ဖြစ်ပြီး ကြက်သွန်အသေးတစ်ပိဿာ ၃၀၀၀ ကျပ်ရှိကြောင်း ရောင်းချသူထံမှသိရသည်။

ယင်းအပြင် ငရုတ်သီးကိုလည်း ထိုင်းနိုင်ငံနှင့် ဗီယက်နမ်မှဝယ်လိုအားများနေသည့်အတွက် တစ်ပိဿာ တစ်သောင်းဝန်းကျင်ခန့်အထိ ဆက်လက်မြင့်တက်နေကြောင်းသိရသည်။ နယ်မှ ရန်ကုန်(ဘုရင့်နောင်ကုန်စည်ဒိုင်)သို့ ကြက်သွန်ကားအစီးရေ နေ့စဉ် ၂၅ စီးဝန်းကျင်ဝင်ရောက်ကြောင်း ဘုရင့်နောင်ကုန်စည်ဒိုင်ဥက္ကဋ္ဌ ဦးခင်ဟန်၏ ပြောပြချက်အရ သိရသည်။

ယင်းအပြင် တစ်ရက်လျှင် ပျမ်းမျှ ကြက်သွန်နီ ကုန်ချိန်ပိဿာ(၂)သောင်း (၁)ပတ် အတွင်း စုစုပေါင်းပိဿာ(၁)သိန်းခွဲခန့် ကုန်စည်ဒိုင်သို့ ဝင်ရောက်နေပြီး မြို့ပေါ်မှာရှိ ကြက်သွန် ကုန်သည် သိုလှောင်ရုံများ၌ ကြက်သွန်နီပိဿာ ပျမ်းမျှ(၁)ပတ်အတွင်း ကုန်ချိန် (၃)သိန်းခွဲဝန်းကျင် ဝင်ရောက် အရောင်းအဝယ်ဖြစ်နေကြောင်း သိရသည်။

အခြေခံစားသောက်ကုန်စည်များထဲမှ တစ်ခုဖြစ်သည့် စားအုန်းဆီဈေးနှုန်းသည် ဈေးကွက်အတွင်းဆက်တိုက်လာကြောင်း သိရသည်။

#ymg/sth
#Yangon_Media_Group

#Local_News
Published _ 20 December 2022

ရန်ကုန်မြို့၊ ဒဂုံတောင် အမှတ်(105)ရပ်ကွက်မင်းရဲကောင်းပုံလမ်းနှင့် ရေနံသာလမ်းဘေးရှိ ဈေးဆိုင်အလွတ်ခုံပေါ်တွင် လွန်ခဲ့သော ၂ရက်ခန့် နေ့လည် ၁နာရီဝန်းကျင်လောက်တွင် ဒေါင်ဆင်ဒရုန်း ရောဂါခံစားနေရသည့် ကလေးငယ်တစ်ဦးကို လာရောက်စွန့်ပစ်မှုဖြစ်ပွားခဲ့ကြောင်း ရပ်ကွက်နေ ကလေးသူငယ်စောင့်ရှောက်ရေး အသင်းအဖွဲ့ထံမှ သိရသည်။

"အမတို့ဆီအကြောင်းကြားတော့ အုပ်ချုပ်ရေးမှူးရပ် တာဝန်ရှိတဲ့ စည်ပင်က လူကြီးတွေရယ်နဲ့ အမတို့ အဲ့နေရာရောက်သွားခဲ့ပါတယ်။ ကလေးလေးကို ရပ်ကွက်ကလူတွေပြောတာတော့ အမျိုးသမီးတစ်ဦးကချီလာတယ်လို့ ပြောတယ်။ ဘေးကနားဈေးဆိုင်လဲရှိတော့ ပထမက သတိမထားမိဘူး၊ နောက်တော့မှ ကလေးကတအားငိုတဲ့ အသံကြားမှ စွန့်ပစ်သွားမှန်းသိကြပြီး အမတို့ဆီဆက်သွယ်တာပါ။ အမတို့ရောက်တော့ ကလေးပုံစံက ဒေါင်းရောဂါသည်ပုံစံမျိုးနဲ့ဆင်တူနေတာကြောင့် သက်ဆိုင်ရာလူကြီးတွေနဲ့ လူမှုဝန်ထမ်းဦးစီးဌာနရဲ့ လူကယ်ပြန်ဌာနကို အကြောင်းကြားထားပါတယ်။ ကလေးလေးကိုတော့ အခုအမတို့ 105 မှာပဲ စောင့်ရှောက်ထားပါတယ်။ လူကယ်ပြန်ဌာနဆီမရောက်ခင် မိဘနဲ့တွေ့လိုတွေ့ငြားဆိုပြီး အမတို့က ကလေးပုံနဲ့တကွ စွန့်ပစ်ခံရကြောင်း တင်ပေးထားပါတယ်" ဟု အလင်းတန်း ကလေး သူငယ်ကာကွယ်စောက်ရှောက်ရေးအဖွဲ့မှ တာဝန်ရှိသူက YMG သို့ပြောခဲ့သည်။

ကလေးအား လူမှုရေးအသင်းအဖွဲ့အချို့ထံ ကူညီစောင့်ရှောက်ရန်အတွက် ဆက်သွယ်ထားရှိပြီး စွန့်ပစ်ခံရချိန်တွင် အဝတ်စားထုတ်လည်း ပါရှိကြောင်း သိရှိရသည်။

လက်ရှိတွင် ကလေးအား မိဘမှလာရောက်ခေါ်ယူချင်ပါက ခေါ်ယူ၍ရအောင် ရပ်ကွက်၌ တပတ်တိတိ စောင့်ရှောက်သွားမှာဖြစ်ကာ တပတ်ကျော်ပါက သက်ဆိုင်ရာ ဌာနမှ တာဝန်ရှိသူများ၏ လုပ်ထုံးလုပ်နည်းများအတိုင်း ဆောင်ရွက်သွားမည်ဟုလည်း သိရှိရသည်။

#Ymg/NN
#Yangon_Media_Group

#Local_News
Published_20 December 2022

ကိုရီးယားသမ္မတနိုင်ငံသို့ အစိုးရပြည်ပအလုပ်အကိုင်အေဂျင်စီမှတစ်ဆင့် EPS စနစ်ဖြင့် မြန်မာအလုပ်သမား ၁၀၀ ကျော်ကို ထပ်မံစေလွှတ်ခဲ့ကြောင်း ဆိုးလ်မြို့ မြန်မာသံရုံးမှ ထုတ်ပြန်ထားသည်။

အစိုးရပြည်ပအလုပ်အကိုင်အေဂျင်စီမှတစ်ဆင့် EPS စနစ်ဖြင့် စေလွှတ်သော Regular ကုန်ထုတ်လုပ်သား (၉၀) ဦး၊ CBT ကုန်ထုတ်လုပ်သာ (၇) ဦး၊ Re-entry ကုန်ထုတ်လုပ်သား (၁၃) စုစုပေါင်း (၁၁၀) ဦးကို စေလွှတ်ခဲ့ခြင်းဖြစ်ကြောင်း သိရသည်။

ယင်းအပြင် တောင်ကိုရီးယားနိုင်ငံသို့ EPS စနစ်ဖြင့် ဒီဇင်ဘာ ၂၆ရက်တွင် Regular(ကုန်ထုတ်လုပ်သား) ၊ Re-entry ကုန်ထုတ်၊ စိုက်ပျိုး၊ မွေးမြူရေးလုပ်သား ) စုစုပေါင်း ၁၄၉ ဦး ကိုထပ်မံစေလွှတ်သွားမည်ဖြစ်ကြောင်း သိရသည်။

အစိုးရ ပြည်ပအလုပ်အကိုင် အေဂျင်စီမှတစ်ဆင့် EPS စနစ်ဖြင့် လုပ်သားစေလွှတ်မှု ဒီဇင်ဘာလ ၂၀ ရက်အထိ မြန်မာလုပ်သား ၃၈၁ ဦးကိုစေလွှတ်ခဲ့ပြီးဖြစ်ကြောင်းသိရသည်။ တောင်ကိုရီးယားအစိုးရမှ မြန်မာလုပ်သားများကို ပြန်လည်လက်ခံပြီးနောက် သြဂုတ်လတွင် ပြန်လည်စေလွှတ်ခဲ့ခြင်းဖြစ်သည်။

#ymg/sth
#Yangon_Media_Group

#Local_News
Published _ 20 Published 2022

မလေးရှားနိုင်ငံ၊ ကလန်းမြို့တွင် အလုပ်မှ နေအိမ်သို့ ပြန်လာသည့် မြန်မာအမျိုးသားတစ်ဦးကို အမည်မသိလူတစ်စုမှ ဝိုင်းဝန်းရိုက်နှက်မှု ဖြစ်ပွားခဲ့ကြောင်း နှလုံးလှပရဟိတလူငယ်များသွေးလှူရှင်အဖွဲ့ထံမှ သိရသည်။

ဖြစ်စဉ်မှာဒီဇင်ဘာလ ၁၉ရက် ည ၁၀နာရီဝန်းကျင်ခန့်က မလေးရှားနိုင်ငံ၊ ကလန်းမြို့နေ ကိုရာဇာမျိုးသည် အလုပ်မှနေအိမ်သို့ ဆိုင်ကယ်ဖြင့် ပြန်လာစဉ် အမည်မသိလူတစ်စုမှ ဝိုင်းဝန်းရိုက်နှက်ခဲ့ကြောင်း သိရသည်။

လူတစ်စု၏ ဝိုင်းဝန်းရိုက်နှက်ခံရမှုကြောင့် ကိုရာဇာမျိုးသည် အရိုက်ခံရသည့်နေရာ၌ပင် မေ့လဲသွားခဲ့ပြီး ယနေ့ ဒီဇင်ဘာလ ၂၀ရက် နံနက် ၄နာရီခန့်တွင် ဝမ်းဗိုက်အားလက်ဖြင့်ဖိပြီး နေအိမ်သို့ပြန်ရောက်လာခဲ့သည်။

ထိုသို့ ဒဏ်ရာများဖြင့် အိမ်ပြန်ရောက်လာသည့်အတွက် ကိုရာဇာမျိုး၏ ဇနီးဖြစ်သူမှ အကူအညီတောင်းခံကာ ရှားအလမ်းဆေးရုံကြီးသို့ တက်ရောက်ကုသခဲ့ကာ လူနာရဲ့ဝမ်းဗိုက်အား ခွဲစိတ်ခဲ့ရပြီး ဒဏ်ရာများစွာဖြင့် ဆေးကုသလျက်ရှိနေကြောင်း အသင်းမှ သိရသည်။

ယင်းနောက် ဆေးရုံကိစ္စများ၊ ကုန်ကျငွေများ မတတ်နိုင်သဖြင့် နှလုံးလှပရဟိတလူငယ်များသွေးလှူရှင်အဖွဲ့ထံ အကူအညီတောင်းခံလာသည့်အတွက် ဆေးရုံသို့သွားရောက်ကာ လူနာကျန်းမာရေးအတွက် ရင်းဂစ် ၁၀၀၀ လှူဒါန်းခဲ့ကြောင်း အသင်းမှ သိရှိရသည်။

#Ymg/NN
#Yangom_Media _Group

#Local_News
Published_ 20 December 2022

တရုတ်နိုင်ငံမှ မီဒီယာစီမံခန့်ခွဲမှုဆိုင်ရာမွမ်းမံသင်တန်းကို အွန်လိုင်းမှတစ်ဆင့်ဖွင့်လှစ်ခဲ့ပြီး မြန်မာသင်တန်းသား(၁၉)ဦး ပါဝင်တက်ရောက်ခဲ့ကြောင်း မြန်မာနိုင်ငံဆိုင်ရာတရုတ်သံရုံးမှ သိရသည်၊၊

အဆိုပါ 'မြန်မာနိုင်ငံအဓိကမီဒီယာများ၏ အလယ်အလတ်အဆင့်နှင့် အဆင့်မြင့်စီမံခန့်ခွဲမှုဆိုင်ရာ မွမ်းမံသင်တန်း'ကို ဒီဇင်ဘာလ(၁၆)ရက်တွင် အွန်လိုင်းမှတစ်ဆင့်ဖွင့်လှစ်ခဲ့သည်၊၊

တရုတ်နိုင်ငံ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ကြီးမှူးကျင်းပ၍ အမျိုးသားရေဒီယိုနှင့်ရုပ်မြင်သံကြားဌာနချုပ် လေ့ကျင့်ရေးကျောင်းမှ တာဝန်ယူကျင်းပခဲ့ခြင်း ဖြစ်သည်၊၊

သင်တန်းဖွင့်ပွဲအခမ်းအနားသို့ မြန်မာနိုင်ငံဆိုင်ရာတရုတ်သံရုံး စီးပွားရေးသံမှူး Mr. Tan Shufu ၊ တရုတ်နိုင်ငံအမျိုးသားရေဒီယိုနှင့်ရုပ်မြင်သံကြားဌာနချုပ် အပြည်ပြည်ဆိုင်ရာပူးပေါင်းဆောင်ရွက်ရေးဦးစီးဌာန ဒုတိယညွှန်ကြားရေးမှူးချုပ် Ms. Yan Ni ၊ မြန်မာနိုင်ငံ ပြန်ကြားရေးဝန်ကြီးဌာန ပြန်ကြားရေးနှင့် ပြည်သူ့ဆက်ဆံရေးဦးစီးဌာန ဒုတိယညွှန်ကြားရေးမှူးချုပ် Mr. Kyaw Naing Tint၊ ဒုတိယညွှန်ကြားရေးမှူးချုပ် Ms. Cho Nwe Htay Win တို့တက်ရောက်ကြပြီး မြန်မာနိုင်ငံပြန်ကြားရေးဝန်ကြီးဌာနနှင့် အဓိကမီဒီယာများမှ သင်တန်းသား ၁၉ ဦး ပါဝင်တက်ရောက်ကြသည်။

သံမှူး Mr. Tan Shufu က မီဒီယာများသည် ပြည်သူချင်း ကူးလူးဖလှယ်မှု မြှင့်တင်ရေး၊ ပြည်သူချင်း စိတ်ချင်းဆက်နွှယ်မှု မြင့်မားရေး တို့အတွက် အရေးကြီးသော ပေါင်းကူးတံတားနှင့် ချိတ်ဆက်မှုဖြစ်ကြောင်း၊ တရုတ်-မြန်မာမီဒီယာများအကြား ကူးလူးဖလှယ်ရေးနှင့် ပူးပေါင်းဆောင်ရွက်ရေးသည် “Belt and Road” ကို တရုတ်-မြန်မာ အတူတည်ဆောက်မှု၏ အရေးကြီးသော အစိတ်အပိုင်းတစ်ခုဖြစ်ပြီး နှစ်ဦးနှစ်ဖက်ဆက်ဆံရေး ဖွံ့ဖြိုးတိုးတက်စေရေး၊ ယဉ်ကျေးမှု ကူးလူးဖလှယ်မှုနှင့် အပြန်အလှန်သင်ယူလေ့လာမှု မြှင့်တင်ရေးတို့၌ အရေးကြီးသောအခန်းကဏ္ဍမှ ပါဝင်ကြောင်း၊ နှစ်နိုင်ငံ ယဉ်ကျေးမှု ပေါင်းစည်းရေးနှင့် ပြည်သူချင်း စိတ်ချင်းယှက်နွှယ်မှုတို့ကို မြှင့်တင်ရန်၊ မီဒီယာ ကူးလူးဖလှယ်ပူးပေါင်းဆောင်ရွက်မှု၏ နက်ရှိုင်းမှုနှင့် ကျယ်ပြန့်မှုကို တိုးချဲ့ရန် ဆန္ဒရှိကြောင်း ပြောကြားသည်။

Ms. Yan Ni ကအမျိုးသားရေဒီယိုနှင့်ရုပ်မြင်သံကြားဌာနချုပ်သည် မြန်မာနိုင်ငံနှင့် ရင်းနှီးစွာလက်တွဲ၍ ကူးလူးဖလှယ်မှုနှင့် အပြန်အလှန်သင်ယူလေ့လာမှုများ မြှင့်တင်ကာ မီဒီယာလုပ်ငန်း စည်ပင်ဝပြောတိုးတက်ရေးအတွက် အတူတကွမြှင့်တင်ကြရန် ဆန္ဒရှိကြောင်း ပြောကြားခဲ့သည်။

Mr. Kyaw Naing Tint က တရုတ်နိုင်ငံနှင့် ချိတ်ဆက်ကူးလူးဖလှယ်မှုများ တိုးမြှင့်၍ နှစ်နိုင်ငံ မီဒီယာပူးပေါင်းဆောင်ရွက်မှု ဖွံ့ဖြိုးတိုးတက်လာစေရေးအတွက် အဆက်မပြတ် မြှင့်တင်ဆောင်ရွက်ရန် ဆန္ဒရှိကြောင်း ပြောကြားသည်။

ယခုသင်တန်းမှာ (၁၄) ရက် ကြာမြင့်မည်ဖြစ်ပြီး သင်တန်းတွင် မီဒီယာ ပေါင်းစပ်ဖွံ့ဖြိုးတိုးတက်ရေး အယူအဆများနှင့် လက်တွေ့စီမံခန့်ခွဲမှုများ၊ Omnimedia ခေတ်တွင် သတင်းတင်ဆက်ဖော်ပြမှုနှင့် မီဒီယာစီမံခန့်ခွဲမှုများ၊ New media လုပ်ငန်းလည်ပတ် စီမံခန့်ခွဲမှုနှင့် ဂလိုဘယ်လိုက်ဇေးရှင်းဗျူဟာ စသည့်သင်ခန်းစာများ ပါဝင်မည်ဖြစ်ကြောင်း သိရသည်၊၊

#ymg/tthl
#Yangon_Media_Group

#Local _News
Published _ 20 December 2022

ရန်ကုန်တိုင်း၊ ဗိုလ်တထောင်မြို့နယ်၊ မိသားစုရပ်ကွက်ရှိ ပန်းဆိုးတန်းဆိပ်ကမ်းမှ ဒလဆိပ်ကမ်းသို့ ခရီးသည်များတင်ဆောင်မောင်းနှင်လာသည့် ချယ်ရီ(၂) ရေယာဉ်ပေါ်တွင် ဒီဇင်ဘာလ ၁၈ ရက် ညနေ ၆ နာရီ ၄၀ မိနစ်ခန့်က လက်လုပ်မိုင်းပေါက်ကွဲ၍ ၁၇ ဦးဒဏ်ရာရခဲ့သည်။

ဖြစ်စဉ်တွင် ခရီးသည် အမျိုးသား၊ အမျိုးသမီး ၁၇ ဦးမိုင်းစထိမှန်ဒဏ်ရာများရရှိခဲ့သဖြင့် ဖြစ်စဉ်အား ပြင်းထန်စွာရှုတ်ချကြောင်း အသင်းအဖွဲများက အသီးသီးထုတ်ပြန်ခဲ့ကြသည်။

ဗုဒ္ဓဘာသာကလျာဏယုဝအသင်း YMBA(ဗဟို)၊ မြန်မာနိုင်ငံစာရေးဆရာအသင်း၊ မြန်မာနိုင်ငံသတင်းမီဒီယာကောင်စီ၊ မြန်မာနိုင်ငံဟာသပညာရှင်များအစည်းအရုံးများမှ ဖြစ်စဉ်အားလက်မခံနိုင်ကြောင်းနှင့် ပြင်းထန်စွာရှုတ်ချကြောင်းများ အသီးသီးထုတ်ပြန်ခဲ့ကြသည်။

ဖြစ်စဉ်အတွင်း မိုင်းစထိမှန်ဒဏ်ရာရရှိခဲ့သူ ၁၇ ဦးသည် ရန်ကုန်ပြည်သူ့ဆေးရုံကြီးတွင် ဆေးကုသမှုခံယူခဲ့ရကာ ပြစ်မှုကျူးလွန်သူများအား ဖမ်းဆီးရမိရေးအတွက် လုံခြုံရေးအဖွဲ့ဝင်များမှ ဆောင်ရွက်လျက်ရှိနေကြောင်း နစက၏ထုတ်ပြန်ချက်များအရ သိရှိရသည်။

#ymg/NN
#Yangon_Media_Group