#TV Yangon Times Matters အစီအစဉ်
Published - 8 Jan 2023

အစီအစဉ်တင်ဆင်သူ ဆရာဟိန်းလတ်က ဦးမျိုးသော် ဥက္ကဌ(အနော်ရထာပန်းချီပြခန်း) Chairman of Milky Way Group နှင့် အတူ

-"အနော်ရထာပန်းချီပြခန်း"ကို ပန်းချီဆရာတွေအတွက် ဆုံဆည်းရာအဖြစ် 2019 မှာ စတင်ဖွင့်လှစ်ခဲ့ခြင်းဖြစ်ကြောင်း

-မြန်မာနိုင်ငံတွင် ပထမဆုံးဖြစ်သည့် နိုင်ငံကျော်ပန်းချီဆရာကြီးများ၏ အဖိုးတန်ပန်းချီကားများနှင့် ရှေးဟောင်းပန်းချီကားကြီးများ သီးသန့်စုစည်းထိန်းသိမ်းပြသထားမည့် "Anawrahta Premium Lounge" ကို အနော်ရထာပန်းချီပြခန်းကြီးမှာ ထပ်မံတိုးချဲ့ဖွင့်လှစ်လိုက်ပြီဖြစ်ကြောင်း" စတဲ့ စိတ်ဝင်စားဖွယ်အကြောင်းအရာများကို ဆွေးနွေးခဲ့ကြပါတယ်။

#Yangon_Media_Group

#Local_News
Published_ 8 January 2022

ကချင်ပြည်နယ် မိုးညှင်းမြို့နယ်ရှိ မြန်မာနိုင်ငံ၌ အကြီးဆုံးကုန်းတွင်းရေချိုအိုင်ကြီးဖြစ်တဲ့ အင်းတော်ကြီးအိုင်နှင့် ဆက်စပ်ရေဝပ်ဒေသများတွင် ဒီဇင်ဘာလအတွင်း ဆောင်းခိုငှက်မျိုးစိတ်များနှင့် ဒေသရေပျော်ငှက်မျိုးစိတ်များ စုစုပေါင်း ၅၄ မျိုးနဲ့ အကောင်ရေ ၂သောင်း ၃ထောင်ကျော် စာရင်းကောက်ယူနိုင်ခဲ့ကြောင်း သိရပါတယ်။

၂၀၂၂ ခုနှစ် ဒီဇင်ဘာလအတွင်း စာရင်းကောက်ယူချက်အရ ဆောင်းခိုရေပျော် ငှက်မျိုးစိတ် ၃၄ မျိုး၊ အကောင်ရေ ၁၆၃၇၈ ကောင်နှင့် ဒေသရေပျော်ငှက်မျိုးစိတ် ၂၀ မျိုး၊ အကောင်ရေ ၆၆၉၀ စုစုပေါင်းအကောင်ရေ ၂၃၀၆၈ ကောင်ကို တာဝန်ရှိသူများက စာရင်းကောက်လမ်းကြောင်းများအတိုင်း တစ်ရက်လျှင်အဖွဲ့နှစ်ဖွဲ့စီခွဲ၍ ၎င်းအိုင်အတွင်း နှင့် ဆက်စပ်ချောင်းများတွင် စာရင်းကောက်ယူနိုင်ခဲ့ကြောင်း သိရပါတယ်။

အဆိုပါ ငှက်မျိုးစိတ်များဟာ ဒီဇင်ဘာလတွင်တွေ့ရှိရတဲ့ ဆောင်းခိုရေပျော် ငှက်မျိုးစိတ်များနှင့် ဒေသရေပျော်ငှက်မျိုးစိတ်များသည် ယခင်နှစ်နှင့်နှိုင်းယှဉ်ပါက ဆောင်းခိုရေပျော်ငှက်မျိုးစိတ် ၁ မျိုးနှင့် အကောင်ရေ ၃၄၀၀ ကျော် လျော့နည်းလျက်ရှိကြောင်း သိရပါတယ်။

ငှက်မျိုးစိတ်များ အများဆုံးကျက်စားလေ့ရှိတဲ့ ငှက်စာရင်းကောက် လမ်းကြောင်းတစ်ခုဖြစ်တဲ့ အင်းတော်ချောင်းအတွင်း စက်လှေဖြင့် ငှက်စာရင်းများ ကောက်ယူရာ၌ ရေမှော်နှင့်ဒိုက်များ ပိတ်မိနေခြင်းကြောင့် သွားလာရာတွင် အခက်အခဲများရှိနေခြင်းနဲ့ ကိုင်းတောများ ထူထပ်နေတာကြောင့် ငှက်မျိုးစိတ်များကို မြင်တွေ့နိုင်ရန်နှင့် အကောင်ရေတွက်ရာ၌ ခက်ခဲသဖြင့် ငှက်မျိုးစိတ်နှင့် အကောင်ရေများ မှတ်တမ်းတင်ရာတွင် ယခင်နှစ်ထက် လျော့နည်းလျက်ရှိတယ်လို့ ဆိုပါတယ်။

အင်းတော်ကြီး တောရိုင်းတိရစ္ဆာန်ဘေးမဲ့တော၌ အများဆုံးတွေ့ရှိရသည့် ဆောင်းခိုရေပျော်ငှက်မျိုးစိတ်များမှာ ရေကြက်ဒုံ၊ ဘဲဖြူနက်၊ တောငန်း၊ ခရုစုပ်အနက်၊ ကြိုးကြာ ခေါင်းမဲ၊ စင်ရော်ခေါင်းညို၊ စင်ရော်ခေါင်းမဲ၊ ဘဲနီစပ်၊ ဘဲကျားလေး၊ ဘဲဟင်္သာနှင့် ပို့ချပ်ဘဲ စသည်တို့ တွေ့ရှိရပြီး ရေပျော်ငှက်မျိုးစိတ်များ စာရင်းကောက်ယူခြင်းကို အင်းတော်ကြီး အိုင်၏ အရှေ့ဘက် လမ်းကြောင်းတွင်လည်းကောင်း၊ အနောက်ဘက်လမ်းကြောင်းတွင် လည်းကောင်း၊ အင်းတော်ချောင်း တစ်လျှောက် ချောင်းဘေးဝဲ/ယာနှင့် ဆက်စပ်ရေဝပ် ဒေသများရှိ ကွင်းဆင်းဆောင်ရွက်လျက်ရှိကြောင်း သိရပါတယ်။

အင်းတော်ကြီးအိုင်နှင့် ဆက်စပ်ရေဝပ်ဒေသများကို အရှေ့အာရှ-ဩစတြေးလျ ငှက်ပျံသန်းရာ လမ်းကြောင်းရှိ အရေးကြီးရေဝပ်ဒေသအဖြစ် ၂၀၁၄ ခုနှစ် ဒီဇင်ဘာ (၁၅) ရက်တွင် သတ်မှတ်ခဲ့ပြီး၊ ၂၀၀၃ ခုနှစ်တွင် အာဆီယံအမွေအနှစ်ဥယျာဉ်အဖြစ် လည်းကောင်း၊ ၂၀၁၆ ခုနှစ်တွင် ကမ္ဘာ့အဆင့် ရမ်ဆာရေဝပ်ဒေသ အဖြစ်လည်းကောင်း၊ ၂၀၁၇ ခုနှစ်တွင် ဇီဝအဝန်းနယ်မြေအဖြစ်လည်းကောင်း၊ ၂၀၁၉ ခုနှစ်တွင် Wetland Link Asia – Wli Asia အဖြစ်သတ်မှတ်ခံခဲ့ရတဲ့ တော်ဝင်အင်းကြီးလည်း ဖြစ်ပါတယ်။

ygm_mnn
#Yangon_Media_Group

#LocalNews
Published_ 8 January 2023

စစ်ကိုင်းတိုင်းဒေသကြီး၊ ပုလဲမြို့နယ်၊ ဇီးဖြူကုန်းကျေးရွာအတွင်း လက်နက်ကိုင်အဖွဲ့တစ်ခုက Drop Bomb များ ပစ်ချခဲ့သဖြင့် ကလေးငယ် ၃ ဦးအပါအဝင် ပြည်သူ ၇ ဦး ဒဏ်ရာရရှိခဲ့ကြောင်း နစက သတင်းထုတ်ပြန်ရေးအဖွဲ့က ထုတ်ပြန်လိုက်သည်။

ပြီးခဲ့သည့် ဇန်နဝါရီလ ၆ ရက် မွန်းလွဲ ၂ နာရီအချိန်ခန့်က ပုလဲမြို့ နယ်၊ ဇီးဖြူကုန်းကျေးရွာ အတွင်းသို့ လက်နက်ကိုင်အဖွဲ့တစ်ဖွဲ့က ကျေးရွာ၏မြောက်ဘက်နှင့် အရှေ့မြောက်ဘက်တို့မှနေ၍ Drone ယာဉ်များဖြင့် Drop Bomb ၇ လုံး အကြောင်းမဲ့လာရောက်ပစ်ချတိုက်ခိုက်ခဲ့ခြင်းဖြစ်ကြောင်း ယင်းထုတ်ပြန်ချက်တွင် ဖော်ပြထားသည်။

ယင်းကြောင့် Drop Bomb ၆ လုံးမှာ ကျေးရွာအတွင်းသို့ ကျရောက်ပေါက်ကွဲခဲ့သောကြောင့် အဆိုပါကျေးရွာအတွင်း နေထိုင်သည့် ပြည်သူများဖြစ်သည့် အသက် ၆၂ နှစ်အရွယ် ဒေါ်သေးတင် ၊အသက် ၄၅ နှစ်အရွယ် မညိုထွေး ၊ အသက် ၂၆ နှစ်အရွယ် မေဖြူဖြူသွဲ့ ၊အသက် ၁၇ နှစ်အရွယ် မောင်ဟိန်းထက်ဇော် ၊အသက် ၁၂ နှစ်အရွယ် မောင်ပြည့်စုံအောင် ၊အသက် ၉ နှစ်အရွယ် မောင်ဟန်မင်းထက် နှင့် အသက် ၂ နှစ်အရွယ် မောင်ပိုင်ပိုင်တို့တွင် ဗုံးစထိမှန်ဒဏ်ရာများရရှိခဲ့ကြခြင်းဖြစ်ကြောင်း ၎င်း ထုတ်ပြန်ချက်အရ သိရသည်။

ymg/mt
#Yangon_Media_Group

#LocalNews
Published_ 8 January 2023

ယခု ၂၀၂၃ ခုနှစ်တွင် ကလေးငယ်ဦးရေ ၇ သိန်းခွဲအတွက် ပညာရေးကို လက်လှမ်းမီသင်ယူနိုင်စေရန် ထောက်ပံ့ပေးသွားမည်ဖြစ်ကြောင်း UNICEF Myanmar က ထုတ်ပြန်ထားသည်။

အဆိုပါထုတ်ပြန်ချက်တွင် ကလေးငယ်ဦးရေ ၇ သိန်းခွဲအတွက် အစောပိုင်းလေ့လာသင်ယူရေးအခွင့်အလမ်းများနှင့် တစ်ဦးချင်းသင်ယူလေ့လာရေး အထောက်အကူပြုပစ္စည်းများ ပံ့ပိုးပေးခြင်း အပါအဝင် ပညာရေးကို လက်လှမ်းမီသင်ယူနိုင်စေရန်ပံ့ပိုးပေးသွားမည်ဖြစ်ကြောင်း ဖော်ပြထားသည်။

ယင်းအပြင် မြန်မာနိုင်ငံမှကလေးငယ်များ၊ ဆယ်ကျော်သက်၊ မိဘများနှင့်စောင့်ရှောက်မှုပေးသူ စုစုပေါင်းဦးရေ ၆ သိန်းကျော်ကို ရပ်ရွာအခြေပြု စိတ်ကျန်းမာရေးနှင့် လူမှုစိတ်ပိုင်းပံ့ပိုးမှုများ လက်လှမ်းမီနိုင်ရေး ပံ့ပိုးကူညီပေးရန်လည်း ရည်မှန်းချက်တစ်ခုဖြစ်ကြောင်းလည်း သိရသည်။

ပြီးခဲ့သည့် ၂၀၂၂ ခုနှစ်အတွင်းက လူတိုင်းအကျုံးဝင်ပညာရေးနှင့် အရေးပေါ်အခြေအနေပညာရေးပံ့ပိုးမှုအစီအစဉ်များက မြန်မာနိုင်ငံရှိပဋိပက္ခဖြစ်ပွားနေသည့် ဒေသများအပါအဝင် ပြည်နယ်နှင့်တိုင်းအသီးသီးရှိ မသန်စွမ်းကလေးငယ် ၁၀၀၀ ကျော်အား စဉ်ဆက်မပြတ်လေ့လာသင်ယူနိုင်စေရန် UNICEF Myanmar အနေဖြင့် ပံ့ပိုးပေးနိုင်ခဲ့ကြောင်းလည်း သိရသည်။

Photo-UNICEF Myanmar

ymg/mt

#Yangon_Media_Group

#LocalNews
Published_ 7 January 2023

နစက၏ ငြိမ်းချမ်းရေးဆွေးနွေးရေးအဖွဲ့နှင့် တိုင်းရင်းသားလက်နက်ကိုင် အဖွဲ့ ၃ ဖွဲ့ တို့ ဇန်နဝါရီလ ၅ ရက်မှ ၇ ရက်ထိ ၃ ရက်တာဆွေးနွေးညှိနှိုင်းချက်များအရ နှစ်ဖက်သဘောထားများကို ထပ်မံဆွေးနွေးကြပြီး အပြီးသတ်ရရှိလာသည့် သဘောတူညီချက်များကို အတည်ပြုလက်မှတ်ရေးထိုး၍ အပြန်အလှန်လဲလှယ်ခဲ့ကြကြောင်း နစက သတင်းထုတ်ပြန်ရေးအဖွဲ့က ထုတ်ပြန်သည်။

ယင်းသဘောတူညီချက်များကိုမူ ထုတ်ပြန်ချက်တွင် ဖော်ပြထားခြင်း မရှိပေ။

အဆိုပါ အဖွဲ့ ၃ ဖွဲ့မှာ “ဝ” ပြည်သွေးစည်းညီညွတ်ရေးပါတီ(UWSP)၊ အမျိုးသားဒီမိုကရက်တစ်မဟာမိတ်အဖွဲ့ (NDAA)နှင့် ရှမ်းပြည်တိုးတက်ရေးပါတီ(SSPP)တို့ဖြစ်ပြီး အဖွဲ့တစ်ခုစီမှ ကိုယ်စားလှယ်များအနေဖြင့် နေပြည်တော်ရှိ အမျိုးသားစည်းလုံးညီညွတ်ရေးနှင့် ငြိမ်းချမ်းရေး ဖော်ဆောင်မှုဗဟိုဌာန၌ အမျိုးသားစည်းလုံးညီညွတ်ရေးနှင့် ငြိမ်းချမ်းရေး ဖော်ဆောင်မှုညှိနှိုင်းရေးကော်မတီနှင့် ဆွေးနွေးခဲ့ကြခြင်းလည်း ဖြစ်သည်။

ယင်းတွင် နိုင်ငံတော်စီမံအုပ်ချုပ်ရေးကောင်စီအဖွဲ့ဝင်၊ ပြည်ထောင်စုအစိုးရ အဖွဲ့ရုံးဝန်ကြီးဌာန ပြည်ထောင်စုဝန်ကြီး၊ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီဥက္ကဋ္ဌ၊ နိုင်ငံတော်၏ငြိမ်းချမ်းရေးဆွေးနွေးရေးအဖွဲ့ခေါင်းဆောင် ဒုတိယဗိုလ်ချုပ်ကြီး ရာပြည့်၊ အဖွဲ့ဝင်များဖြစ်ကြသည့် နိုင်ငံတော်စီမံအုပ်ချုပ်ရေး ကောင်စီအဖွဲ့ဝင် ဒုတိယဗိုလ်ချုပ်ကြီး မိုးမြင့်ထွန်း၊ အမျိုးသားစည်းလုံးညီညွတ်ရေးနှင့် ငြိမ်းချမ်းရေး ဖော်ဆောင်မှုညှိနှိုင်းရေးကော်မတီ အတွင်းရေးမှူး ဒုတိယဗိုလ်ချုပ်ကြီး မင်းနောင်၊ ညှိနှိုင်းရေးကော်မတီအဖွဲ့ဝင်များဖြစ်ကြသည့် ဒုတိယဗိုလ်ချုပ်ကြီးမင်းနိုင်၊ ဒုတိယ ဗိုလ်ချုပ်ကြီး ဝင်းဗိုလ်ရှိန်နှင့် ဒုတိယဗိုလ်ချုပ်ကြီး အေးဝင်းတို့ နှင့် “ဝ”ပြည်သွေးစည်းညီညွတ်ရေးပါတီ (UWSP)မှ ဒုတိယဥက္ကဋ္ဌဦးလော့ယာကု၊ အမျိုးသားဒီမိုကရက်တစ်မဟာမိတ်အဖွဲ့ (NDAA)မှ ဒုတိယဥက္ကဋ္ဌ ဦးစန်ပေ့၊ ရှမ်းပြည်တိုးတက်ရေးပါတီ(SSPP)မှ ဒုတိယဥက္ကဋ္ဌ(၂) စဝ်ခွန်ဆိုင် နှင့် ငြိမ်းချမ်းရေးဆွေးနွေးရေး ကိုယ်စားလှယ်များ တက်ရောက်ခဲ့ကြခြင်း ဖြစ်ကြောင်း သိရသည်။

ymg/mt
#Yangon_Media_Group

#LocalNews
Published_ 7 January 2023

ရှမ်းပြည်နယ်(တောင်ပိုင်း)၊ ညောင်ရွှေမြို့နယ်၊ အင်းလေးဒေသအတွင်းသို့ အကြမ်းဖက်လုပ်ရပ်လုပ် ဆောင်ရွက်ရန်စီစဉ်လျက်ရှိသော အဖွဲ့များကို ကူညီဆောင်ရွက်ပေးလျက်ရှိသည့် ညောင်ရွှေမြို့နယ်၊ အင်းတိန်ကျေးရွာ၊ အင်းတိန်ညောင်အုပ်ကျောင်းတိုက်မှ ကျောင်းထိုင်ဆရာတော် ဥုးဇဝန(ခ)စိုးသန်းဝင်းအား ၂၀၂၂ ခုနှစ်၊ ဒီဇင်ဘာလ ၂၇ ရက် ညပိုင်းက ဖမ်းဆီးရမိခဲ့ပြီးနောက် ယင်း၏ ထွက်ဆိုချက်အရ ဆက်စပ်သူများကို ဖမ်းဆီးရမိခဲ့ကြောင်း နစက သတင်းထုတ်ပြန်ရေးအဖွဲ့က ထုတ်ပြန်လိုက်သည်။

ယင်းဒေသတွင် ၂၀၂၂ ခုနှစ် ဒီဇင်ဘာလ ၂၇ ရက် မှ ၂၀၂၃ ခုနှစ် ဇန်နဝါရီလ ၄ ရက်ထိ ဖမ်းဆီးရမိသူများမှာ အမျိုးသား ၇ ဦး၊ အမျိုးသမီး ၁ ဦး နှင့် သေဆုံးသည့် အလောင်း ၆ လောင်း၊ လက်နက်မျိုးစုံ ၁၂ လက်၊ ၄၀ မမ ဗုံးသီး ၁၀ လုံး၊ လက်ပစ်ဗုံး ၂၃ လုံး၊ နင်းမိုင်း ၉ လုံး၊ ကျည်မျိုးစုံ ၂၄၁၄ တောင့်၊ ကျည်အိမ်မျိုးစုံ ၂၅ ခု ၊ Drone ၁ စင်းတို့ကို ဖော်ထုတ်ဖမ်းဆီးသိမ်းဆည်းရမိခဲ့ကြောင်း ထုတ်ပြန်ချက်တွင် ဖော်ပြထားသည်။

ဥုးဇဝန(ခ)စိုးသန်းဝင်းအား ဖမ်းမိပြီးနောက် သန်းဇော်ဌေး(ခ)သားငယ်၊ ဇော်ဇော်အောင်(ခ)ဆရာကျောင်း၊အိုက်ရွန် ၊ တင်တင်ညို(ခ)မလေး ၊မင်းမင်းဦး တို့ကို ဆက်တိုက် ဖမ်းဆီးမိပြီးနောက် ဇော်ဇော်အောင်(ခ)ဆရာကျောင်း၏ ထွက်ဆိုချက်အရ ၂၀၂၃ ခုနှစ်၊ ဇန်နဝါရီလ ၃ ရက် နေ့လယ်ပိုင်းက လုံခြုံရေးပူးပေါင်းအဖွဲ့များက ညောင်ရွှေမြို့နယ်၊ လုံကန်ကျေးရွာ၊ တောင်တိုကျေးရွာ၊ တောင်ခြားပြင်ကျေးရွာအနီးတစ်ဝိုက်သို့ နယ်မြေရှင်းလင်းရေး ဆောင်ရွက်ခဲ့ရာ တောတွင်းလက်နက်ကိုင်အဖွဲ့အင်အား ၂၀ ဦးခန့်ကလုံခြုံရေးအဖွဲ့များကို လက်နက်ငယ်များဖြင့် စတင်ပစ်ခတ်တိုက်ခိုက်ခဲ့ကြောင်း ၊ ယင်းနောက် အပြန်အလှန် ပစ်ခတ်မှုဖြစ်ပွားခဲ့ရာ တစ်ဖက်အဖွဲ့က ဖိုးခွား(ခ)အင်းဖိုးခွား အပါအဝင် အမျိုးသား ၅ ဦး၏ အလောင်းများကိုတွေ့ရှိခဲ့ကြကြောင်း၊လုံခြုံရေးအဖွဲ့က နယ်မြေရှင်းလင်းရေးဆက်လက်ဆောင်ရွက်ခဲ့ရာ ဇန်နဝါရီလ ၄ ရက် နံနက်ပိုင်းတွင် ညောင်ရွှေမြို့နယ်၊ ကံရွာကျေးရွာအနီး၌ လုံခြုံရေးအဖွဲ့ကို ပစ်ခတ်မှုတွင်ပါဝင်ခဲ့သည့် တစ်ဖက်အဖွဲ့က ဇော်မျိုးအောင်၊ ဇွဲညီထွန်းတို့ကို ဖမ်းဆီးမိကာ ကတုံးဆိုသူကို သေဆုံးလျက် တွေ့ရှိခဲ့ကြောင်း သိရသည်။

ymg/mt
#Yangon_Media_Group