#Local_News
Published _28 January 2023

မွန်ပြည်နယ်၊ ကျိုက်ထိုမြို့နယ် မုပ္ပလင်ဘူတာနှင့် ကျိုက္ကသာဘူတာအကြား မိုင်တိုင်အမှတ်၊ ၈၈/၂၂-၂၄ ရှိ တံတားအမှတ်(၄၁)ကို ဇန်နဝါရီလ ၂၆ ရက် နံနက် ၄ နာရီခန့်အချိန် လက်နက်ကိုင်အဖွဲ့တစ်ဖွဲ့က မိုင်းထောင် ဖောက်ခွဲဖျက်ဆီးခဲ့ကြောင်း နစက သတင်းထုတ်ပြန်ရေးအဖွဲ့က သိရသည်။

ယင်း မိုင်းထောင်ဖောက်ခွဲခဲ့သောကြောင့် တံတားပျက်စီးခဲ့သည့်အပြင် မပေါက်ကွဲသေးသည့် လက်လုပ်မိုင်း(၁၀)လုံးကိုလည်း တွေ့ရှိရသည့်အတွက် မုပ္ပလင်-ကျိုက္ကသာ ရထားလမ်းပိုင်းကို ပိတ်ထားခဲ့ရကြောင်း၊ မိုင်းပေါက်ကွဲမှုကြောင့် တံတား၏ အပေါ်ချုပ်တန်းမိန်းခုံ(Top Cord) ပျက်စီးခဲ့ပြီး တံတားကြံ့ခိုင်မှုစစ်ဆေးပြုပြင်ကာ ရထားများ အမြန်ဆုံး ပြန်လည်ဖြတ်သန်းနိုင်ရေးအတွက် မြို့ပြအင်ဂျင်နီယာဌာန တံတားလုပ်ငန်းအဖွဲ့နှင့် တိုင်းအမှတ်(၈)ရှိ တာဝန်ရှိသူများက နေ့ရောညပါ ဆောင်ရွက်လျက်ရှိကြောင်း သိရသည်။

ရထားလမ်းပိတ်ဆို့မှုကြောင့် ဇန်နဝါရီလ ၂၆ ရက် နံနက်(၈)နာရီတွင် ရန်ကုန်မှ ထွက်ခွာလာသည့် ခရီးသည်(၄၃၀)ဦး လိုက်ပါလာသော အမှတ်(၈၉)အဆန် လူစီးရထားနှင့် နံနက်(၉)နာရီ တွင် မော်လမြိုင်မှ ထွက်ခွာလာသည့် ခရီးသည်(၆၅၇)ဦး လိုက်ပါလာသော အမှတ်(၉၀)အစုန် လူစီးရထားတို့ကို တံတားတစ်ဖက်တစ်ချက်တွင် ရပ်တန့်စေကာ ခရီးသည်များအား ရထားကူးပြောင်း လိုက်ပါစေခဲ့ရသည့်အတွက်လမ်းခရီးကြန့်ကြာမှုများ ဖြစ်ပေါ်ခဲ့ရကြောင်းလည်း သိရသည်။

အဆိုပါ တံတားမိုင်းဖောက်ခွဲ ဖျက်ဆီးမှုကြောင့် ဇန်နဝါရီလ ၂၇ ရက်တွင် ၎င်း လမ်းပိုင်းအတွင်း ပြေးဆွဲလျက်ရှိသည့် အမြန်ရထား(၄)စီး ဖျက်သိမ်းထားရကာ နေ့စဉ်ရထားစီး ခရီးသည် (၂၀၀၀) ကျော်ခန့် အခက်အခဲများစွာ ကြုံတွေ့ရကြောင်းလည်း သိရသည်။

ပြီးခဲ့သည့်၂၀၂၁ ခုနှစ်၊ ဖေဖော်ဝါရီလ(၁)ရက်မှ ၂၀၂၃ ခုနှစ် ဇန်နဝါရီလ ၂၆ ရက်ထိ မြန်မာ့မီးရထား၏ ရန်ကုန်-ပဲခူး-မော်လမြိုင် လမ်းပိုင်းအတွင်း တံတားမိုင်းခွဲခံရမှု(၆)ကြိမ်၊ သံလမ်းမိုင်းခွဲခံရမှု (၃)ကြိမ်၊ လက်လုပ်မိုင်းပေါက်ကွဲခြင်း၊ တွေ့ရှိခြင်း (၇)ကြိမ် ၊ ဘူတာရုံနှင့်ဝန်ထမ်း နေအိမ်များ မီးရှို့ဖျက်စီးခြင်း(၁)ကြိမ် ရှိကြောင်း၊ တစ်နိုင်ငံလုံးရှိ မြန်မာ့မီးရထားလမ်း ကွန်ယက်တစ်ခုလုံး၏ ရထားလမ်းနှင့် ရထားဘူတာ နယ်မြေများအတွင်း ဗုံးထောင်၊ မိုင်းခွဲ ဖျက်ဆီးခြင်း(၁၀၇)ကြိမ်၊ ရထားတံတားများကို မိုင်းခွဲဖျက်ဆီးခြင်း(၃၇)ကြိမ်၊ ဘူတာများကို မီးရှို့ဖျက်ဆီးခံရခြင်း(၁၀)ကြိမ် ရှိနေပြီ ဖြစ်ကြောင်းလည်း သိရသည်။

#ymg/mt
#Yangon_Media_Group

#Local_News
Published _28 January 2023

လျှပ်စစ်ကား အားသွင်းရန်နေရာများ နေပြည်တော်တွင်တည်ဆောက် ပြီးစီးပြီဖြစ်ကြောင်း သိရသည်။

နေပြည်တော်၊ သပြေကုန်းဈေးရှေ့တွင် MG ကုမ္ပဏီက ဆောက်လုပ်ခဲ့ခြင်းဖြစ်ကြောင်း သိရသည်။

ယင်းအပြင် စက်သုံးဆီအရောင်းဆိုင်ကြီး ၃၈ ဆိုင်တွင်လည်း လျှပ်စစ်ကား အားသွင်းရန်နေရာများထည့်သွင်းတည်ဆောက်ရန် လုပ်ဆောင်နေကြပြီဖြစ်ကြောင်း သိရသည်။

ယခုအခါ ရန်ကုန်-မန္တလေး အမြန်လမ်း ၁၁၅ မိုင်တွင်လည်း လျှပ်စစ်ကားအားသွင်းရန်‌နေရာများ တည်ဆောက်လျက်ရှိကြောင်း သိရသည်။

ယခုအခါပထမအကြိမ်အဖြစ် လျှပ်စစ်ယာဉ် အစီး ၄၀နှင့်ဆက်စပ်ပစ္စည်းများ ပြည်တွင်းသို့ ရောက်ရှိလာပြီ ဖြစ်ကြောင်း အမျိုးသားအဆင့် လျှပ်စစ်သုံးယာဉ်နှင့် ဆက်စပ်လုပ်ငန်းများ ဖွံ့ဖြိုးတိုးတက်ရေးဦးဆောင်ကော်မတီက ထုတ်ပြန်ထားသည်။

ယခုရောက်ရှိလာသော ယာဉ်များမှာ တရုတ်နိုင်ငံမှထုတ်လုပ်သည့် BYD အမျိုးအစား E2 Model ဖြစ်ပြီး လူစီးနှင့် တက္ကစီအဖြစ် စမ်းသပ်ပြေးဆွဲအသုံးပြုမည့် လျှပ်စစ်သုံးယာဉ်များဖြစ်ကြောင်း၊ အများပြည်သူအသုံးပြုနိုင်ရေး လျှပ်စစ်သုံးတက္ကစီအဖြစ် Chin Dwin Shan Construction Co., Ltd. မှ ရန်ကုန်လေဆိပ်တွင်အခြေပြု၍ တက္ကစီ ၁၀ စီး ၊ NPK Motors Co., Ltd. မှ နေပြည်တော် သပြေကုန်း ဈေးတွင်အခြေပြု၍ တက္ကစီ ၁၀ စီး ပြေးဆွဲကြမည်ဖြစ်ကြောင်း သိရသည်။

#ymg/mt
#Yangon_Media_Group

#Local_News
Published _28 January 2023

ဝေဇယန္တာလမ်းပေါ်တွင် ယနေ့ ဇန်နဝါရီလ ၂၇ ရက် ည သန်းခေါင် ၁၁ နာရီ ၄၅မိနစ်ခန့်က ကား ၅ စီး ဆင့်တိုက်၍ တစ်ဦးပြင်းထန်ဒဏ်ရာ ရရှိသည့်အတွက် သင်္ကန်းကျွန်း စံပြဆေးရုံသို့ ပို့ဆောင်လိုက်‌ကြောင်း
လိုက်ပါကူညီခဲ့သည့် Medical လူငယ်များ အသင်းက သိရသည်။

ဝေဇယန္တာလမ်းမကြီး Orange center နှင့် မျက်နှာချင်းဆိုင်ဘက်ခြမ်း၊ ချစ်သူကြီး ဘီယာဆိုင်ရှေ့တွင် တိုယိုတာ ဟာရီယာ အဖြူရောင်ကားက ရပ်ထားသော ကားများကို နောက်မှဝင်တိုက်မိခဲ့ခြင်းဖြစ်ကြောင်း သိရသည်။

ယင်းကြောင့် ဆိုင်ရှေ့လမ်မ၌ ကားရပ်မည့်နေရာ စနစ်တကျစီစဥ်ပေးနေသော ဘီယာဆိုင်က လုံခြုံရေးဝန်ထမ်းမှာ ထိခိုက်မိခဲ့ခြင်းဖြစ်ကြောင်းသိရသည်။

Photo - Medical လူငယ်များအသင်း
#Yangon_Media_Group

#Local_News
Published _28 January 2023

ဂျပန်နိုင်ငံအနောက်တောင်ပိုင်းရှိ Nagasaki ကမ်းလွန်ပင်လယ်ပြင်တွင် ဇန်နဝါရီလ ၂၅ ရက်က Jin Tian အမည်ရှိ ဟောင်ကောင်ကုန်တင်သင်္ဘောနစ်မြုပ်မှုတွင် မြန်မာ ၈ ဦးပါဝင်ခဲ့သည့်အနက် တစ်ဦးကိုအသက်ရှင်လျက် ကယ်ဆယ်နိုင် ပြီး ၂ ဦးအလောင်းရရှိကာ ၅ ဦး ပျောက်ဆုံးနေဆဲဖြစ်‌ကြောင်း တိုကျိုမြို့ရှိ ဂျပန်နိုင်ငံဆိုင်ရာ မြန်မာသံရုံးက ထုတ်ပြန်ထားသည်။

အဆိုပါ သင်္ဘောပေါ်တွင် သင်္ဘောသား ၂၂ ဦးပါရှိသည့်အနက် မြန်မာနိုင်ငံသား ၈ ဦးပါဝင်ကြောင်း၊ မြန်မာသံရုံး၊ တိုကျိုမြို့မှ ဂျပန်နိုင်ငံသက်ဆိုင်ရာ တာဝန်ရှိအဖွဲ့အစည်းများသို့ ဆက်သွယ်စုံစမ်းမှုအရရှာဖွေရေးနှင့် ကယ်ဆယ်ရေးလုပ်ငန်းများကို ဆောင်ရွက်ခဲ့ရာတွင် သင်္ဘောသား (၁၃)ဦးကို ရှာဖွေတွေ့ရှိခဲ့ကြောင်း၊ ၎င်းတို့အနက် မြန်မာနိုင်ငံသား (၃) ဦးပါဝင်ကာ (၂) ဦးမှာ အသက်ဆုံးရှုံးခဲ့ပြီး၊ (၁) ဦးမှာ အသက်ရှင်လျက်ရှိနေကြောင်း၊ ကျန်မြန်မာနိုင်ငံသား ၅ ဦးမှာ ပျောက်ဆုံးနေဆဲဖြစ်ကြောင်းနှင့် ကယ်ဆယ်ရေးလုပ်ငန်းများကို ဆက်လက်ဆောင်ရွက်နေဆဲဖြစ် ကြောင်း သိရသည်။

အသက်ဘေးမှ လွတ်မြောက်ခဲ့သည့် မြန်မာသင်္ဘောသားနှင့်ဇန်နဝါရီ လ၂၆ရက်တွင် အဆက်အသွယ်ရရှိခဲ့ပြီး ဘေးကင်းလုံခြုံသည့်နေရာသို့ရောက်ရှိပြီ ဖြစ်ကြောင်း၊ ပျောက်ဆုံး မြန်မာသင်္ဘောသားများ သတင်း ကို စုံစမ်းလျက်ရှိသည့်အပြင် အသက်ဘေးမှလွတ်မြောက်ခဲ့သည့် မြန်မာသင်္ဘောသားအတွက်လည်း လိုအပ် သည့် ထောက်ပံ့မှုကိစ္စရပ်များ၊ ကောင်စစ်ဆိုင်ရာကိစ္စရပ်များကို ဆောင်ရွက်ပေးလျက်ရှိကြောင်း အဆိုပါ ထုတ်ပြန်ချက်တွင်ဖော်ပြထားသည်။

#ymg/mt
#Yangon _Media_Group

#Local_News
Published _28 Jan 2023

မကွေးတိုင်းဒေသကြီး၊ ပခုက္ကူမြို့နယ်၊ ပဒိုင်းမြုံကျေးရွာအနီးရှိ Myanmar Effort Company Limited အထည်ချုပ်စက်ရုံမှ မန်နေဂျာ ဦးမျိုးဇင်ဝင်းနှင့် တရုတ်နိုင်ငံသူ အထည်ချုပ်ပညာရှင် Ms.GU ZHEN ZHEN တို့ ၂ ဦးအား နစက ဆန့်ကျင်ဖက်တစ်စုက ဇန်နဝါရီလ ၂၆ ရက် နံနက်ပိုင်းတွင် လက်နက်ဖြင့် လာရောက်ခြိမ်းခြောက် ဖမ်းဆီးသွား‌ကြောင်း နစကက သတင်းထုတ်ပြန်သည်။

အဆိုပါ နစက ဆန့်ကျင်ဖက်တစ်စုကမော်တော်ယာဉ်တစ်စီးဖြင့် လက်နက်ငယ်များကိုယ်စီ ကိုင်ဆောင်ရောက်ရှိ လာပြီး အဆိုပါစက်ရုံဝန်းအတွင်း စက်ရုံလုံခြုံရေးဆောင်ရွက်နေသည့် ဝန်ထမ်းများ အား သေနတ်ဖြင့် ခြိမ်းခြောက် ရိုက်နှက်ခဲ့ကြကာ စက်ရုံအတွင်းဝင်ရောက်၍ ဖမ်းဆီးသွားကြခြင်း ဖြစ်ကြောင်း သိရသည်။

ယင်းတို့နှစ်ဦးအပြင် Laptop တစ်လုံးနှင့် လုံခြုံရေးဝန်ထမ်းများ၏ လက်ကိုင်ဖုန်း ၃ လုံးတို့ကိုပါ ယူဆောင်၍ ၎င်းတို့မောင်းနှင်လာသည့် မော်တော်ယာဉ်ဖြင့် မြောက်ဘက်သို့ မောင်းနှင်ထွက်ပြေး သွားခဲ့ကြောင်း၊သိရသည်။

ယင်းနောက် အဆိုပါနေ့ နံနက် ၁၀ နာရီ ၄၅ မိနစ်ခန့်တွင် နစက ဆန့်ကျင်ဖက်တစ်စုက ပြောဆိုစေခိုင်းချက်အရ မန်နေဂျာဦးမျိုးဇင်ဝင်းက စက်ရုံအတွင်းရှိ ဖုန်းတစ်လုံးကို ဆက်သွယ်၍ ငွေကျပ်သိန်း ၁၀၀၀၀ ကို အသင့်ပြင်ဆင်ထားပြီး ပြန်လည်ဆက်သွယ်ပေးရန် ဖုန်းဖြင့်ဆက်သွယ်လာခဲ့ကြောင်း သိရသည်။

အဆိုပါ အထည်ချုပ်စက်ရုံတွင် စက်ရုံတာဝန်ခံအဖြစ် တရုတ်နိုင်ငံသား Mr. RAO MING CHUN အပါအဝင် တရုတ်နိုင်ငံသား အမျိုးသား ၅ ဦး၊ အမျိုးသမီး ၁ ဦးနှင့် ဝန်ထမ်း အမျိုးသား ၃၁၅ ဦး၊ အမျိုးသမီး ၇၈၅ ဦး စုစုပေါင်း ၁၁၀၀ ဦးရှိ‌ဆကြာင်း၊ယင်းစက်ရုံကို ၂၀၁၇ ခုနှစ်က စတင်တည်ဆောက်ခဲ့ပြီး ၂၀၁၈ ခုနှစ်တွင် စတင် လည်ပတ်ကာ အဝတ်အထည်များထုတ်လုပ်၍ တရုတ်နိုင်ငံသို့ Export ပြန်လည် တင်သွင်းနေသည့် စက်ရုံတစ်ခုဖြစ်ကြောင်း သိရှိရသည်။

#ymg/mt
#Yangon _Media_Group

Published 27 January 2023

နေပြည်တော်၊ ဒက္ခိဏသီရိမြို့ နယ်ရှိ မာရဝိဇယ ဗုဒ္ဓ ဥယျာဉ်တော်အတွင်းတည်ထားကိုးကွယ်မည့် မာရဝိဇယဗုဒ္ဓ ရုပ်ပွားတော်မြတ်ကြီး ရတနာပလ္လင်တော်ထက် ဗဟိုဌာနတွင် ဌာပနာတော်သွင်းလှူ ပူဇော်ခြင်း မဟာမင်္ဂလာအခမ်းအနားကို ယနေ့ ဇန်နဝါရီ(၂၇)နံနက်ပိုင်းက အဆိုပါဗုဒ္ဓဥယျာဉ်တော် အတွင်းရှိ မာရဝိဇယ ဗုဒ္ဓရုပ်ပွားတော်မြတ်ကြီး တည်ထားကိုးကွယ်မည့် ရတနာ ပလ္လင် တော် နေရာ၌ ကျင်းပပြုလုပ်ခဲ့ပါတယ်။

အဲဒီမင်္ဂလာအခမ်းအနားသို့ မာရဝိဇယရုပ်ပွားတော်မြတ်ကြီး တည်ဆောက် ရေး သြဝါဒါစရိယဆရာတော် နေပြည်တော်၊ ပျဉ်းမနားမြို့ ၊ ပါဠိတက္ကသိုလ်၊ မင်္ဂလာ ဇေယျုံကျောင်းတိုက် ပဓာနနာယက အဂ္ဂမဟာပဏ္ဍိတ သဒ္ဓမ္မဇောတိကဓဇ ဘဒ္ဒန္တ ဝိမလဗုဒ္ဓိ အမှူးပြုသည့် ဆရာတော်၊ သံဃာတော်များ ကြွရောက်ချီးမြှင့်တော်မူကြပြီး ဦးဆောင်ဘုရားဒါယကာ နစက ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင် နှင့် ဘုရားဒါယကာများ တက်ရောက် ကြည်ညို ခဲ့ကြပါတယ်။

 အစီအစဉ်အရထို့နောက် ဦးဆောင်ဘုရားဒါယကာ ဦးဆောင်ပြီး မာရဝိဇယဗုဒ္ဓ ရုပ်ပွားတော်မြတ်ကြီး ရတနာပလ္လင်တော်ထက် ဗဟိုဌာနရှိ ဌာပနာတိုက်တော်တွင်းသို့ ထည့်သွင်းပူဇော်မည့် (၇)ရက် သား၊ သမီး၊ ဘုရားဒါယကာ၊ ဒါယိကာမများ၊ စေတနာရှင်၊ အလှူရှင်များ စုပေါင်းလှူဒါန်းထားသည့် ဗုဒ္ဓမြတ်စွာဘုရား၏ ဇာတာတော်များ၊ အဖိုးတန် ရွှေငွေ ကျောက်သံပတ္တမြားများ၊ နိုင်ငံတကာမှ ငွေဒင်္ဂါးပြားများကို ဌာပနာရွှေသေတ္တာတော်များ အတွင်းသို့ ထုံးတမ်းစဉ်လာ များနှင့်အညီ ထည့်သွင်းပြီး နံ့သာမှုန့်များ ပက်ဖြန်း ပူဇော်ခဲ့ကြပါတယ်။

မင်္ဂလာအချိန်တော်ကျရောက်တဲ့အခါ  ပါဠိဆရာတော်ကြီးနှင့် ဦးဆောင်ဘုရားဒါယကာ ဗိုလ်ချုပ်မှူးကြီး မင်းအောင်လှိုင်တို့က မာရဝိဇယဗုဒ္ဓ ရုပ်ပွားတော်မြတ်ကြီး ရတနာပလ္လင်တော်ထက် ဗဟိုဌာနနေရာရှိ ဌာပနာတိုက်တော်များအတွင်းသို့ (၇)ရက် သား၊ သမီး၊ ဘုရား ဒါယကာ၊ ဒါယိကာမများ၊ စေတနာရှင်၊ အလှူရှင်များ စုပေါင်းလှူဒါန်းထားသည့် ဗုဒ္ဓမြတ်စွာ ဘုရား၏ ဇာတာတော်များ၊ အဖိုးတန် ရွှေငွေ ကျောက်သံ ပတ္တမြားများ၊ နိုင်ငံတကာမှ ငွေဒင်္ဂါးပြားများ ထည့်သွင်းထားသည့် ဌာပနာ ရွှေသေတ္တာတော်များနှင့် မာရဝိဇယဗုဒ္ဓ ရုပ်ပွားတော်တည် ကဗ္ဗည်းမော်ကွန်းကျောက်စာတော် တို့ကို သတ်မှတ်ဌာပနာတော် နေရာအသီးသီးတွင် ထုံးတမ်းစဉ်လာများနှင့်အညီ သွင်းလှူ ပူဇော်ကြခဲ့တယ်လို့ နစကရဲ့သတင်းထုတ်ပြန်ချက်မှာဖော်ပြထားပါတယ်။

-ymg/knl

#Myanmar

#Myanmar_Buddhism