#Local_News
Published-16-8-2023

သိမ်ကြီးဈေး D ရုံ အပေါ်ထပ်ကားပါကင်၌ အိမ်စီးကားတစ်စီး အရှိန်လွန်ကျွံကျမှုတစ်ခု ယနေ့ ဩဂုတ်လ ၁၆ ရက် နံနက်ပိုင်းက ဖြစ်ပွားခဲ့ကြောင်း လူမှုကွန်ရက်စာမျက်နှာတွင် ပျံနှံ့ခဲ့သည်။

ယင်းဖြစ်စဉ်နှင့်ပတ်သက်၍ သူမ၏ ဖေ့စ်ဘွတ်လူမှုစာမျက်နှာတွင် ခင်မင်နေကြသူများက စိုးရိမ်ကြောင်းနှင့် ဂရုတစိုက်မောင်းနှင်လိုကြောင်း သတိပေးစကားများလည်းဆိုထားသည်။

အဆိုပါ ကားပိုင်ရှင်အမျိုးသမီးငယ်ကလည်း သူမ၏ လူမှုကွန်ရက်စာမျက်နှာတွင် ဖေ့စ်ဘွတ်က သတင်းမေးသူများအား ကျေးဇူးတင်ကြောင်း ရေးသားထားသည်။

ယာဉ်ပိုင်ရှင်အမျိုးသမီးငယ်ကလည်း"ပို့စ်ဖျက်ပြေးတယ်ပြောတဲ့ဟာ​တွေ မမြင်မှာဆိုတင်ပေးတာနော် ဟုတ်တယ်ငါ့ကားဘာဖြစ်လဲ"ဟု တုန့်ပြန်ထားပြီး၊ အဆိုပါ ပို့စ်အောက်တွင် စကေးကြမ်းတဲ့အစ်မ လူဘာမှမဖြစ်လို့တော်သေးတယ်ဆိုသည့် စိုးရိမ်စကားများဆိုထားသည်။

သူမ အနေဖြင့် ကားဝယ်စဉ်ကာလက ကြိုက်လို့ဝယ်လိုက်ပြီး ပါကင်‌တော့မထိုးတက်ဘူး ဟု စနောက်ရေးထားသည့် ပို့စ်အတိုင်း တိုက်ဆိုင်စွာ ယခုကဲ့သို့ယာဉ်မတော်တဆမှုဖြစ်ပွားခဲ့သည့်အပေါ် ဝိုင်းဝန်းစနောက်မှုများလည်း ရှိနေခြင်းလည်းဖြစ်သည်။

#YMG/my #Local_News #သိမ်ကြီးဈေးကားပါကင် #အိမ်စီးကားတစ်စီးအရှိန်လွန်တိုက်မိ
#Yangon_Times

#Local_News
Published-16 August 2023

ဂျပန်နိုင်ငံ International Association of Traffic and Safety Sciences (IATSS) မှ ကြီးမှူးကျင်းပသည့် The 65th and 66th IATSS Forum သို့ စိတ်ပါဝင်စားသူများ မည်သူမဆိုလျှောက်ထားနိုင်ရန် ကုန်သည်စက်မှုအသင်းချုပ်မှ အသိပေးကြေညာထားသည်။

65th IATSS Forum ကို ၂၀၂၄ ခုနှစ်၊ မေလမှ ဇူလိုင်လအထိ လည်းကောင်း၊ 66th IATSS Forum စက်တင်ဘာလမှ နိုဝင်ဘာလအထိ လည်းကောင်း ကျင်းပသွားမည်ဖြစ်ပြီး မြန်မာနိုင်ငံမှ Forum တစ်ကြိမ်တွင် (၂)ဦးစီ Forum နှစ်ကြိမ်အတွက် စုစုပေါင်း (၄)ဦးကို IATSS Forum Committee မှ လုပ်ထုံးလုပ်နည်းများနှင့်အညီ အပြီးသတ်ရွေးချယ်အတည်ပြုပေးမည်ဖြစ်သည်ဟု သိရသည်။

တက်ရောက်ခွင့်ရရှိပါက အသွားအပြန်လေယာဉ်စရိတ်နှင့် နေထိုင်စားသောက်စရိတ်များကို ဂျပန်ဘက် မှ ကျခံပေးမည်ဖြစ်ပြီး Forums များသို့ ပူးတွဲပါ သတ်မှတ်အရည်အချင်းများနှင့် ကိုက်ညီသော ကုန်သည်စက် မှုအသင်းချုပ်နှင့် ညီနောင်အသင်းများမှ အမှုဆောင်များ(သို့) ဝန်ထမ်းများ၊ အသင်းချုပ် အသင်းဝင် ကုမ္ပဏီများ၏ ဒါရိုက်တာ အဖွဲ့ဝင်များ (သို့) ဝန်ထမ်းများ လျှောက်ထားနိုင်သည်ဟု သိရသည်။

အရှေ့တောင်အာရှဒေသနိုင်ငံအသီးသီးမှ လူငယ်လူရွယ်များအနေဖြင့် တိုးတက်လျက်ရှိသည့် ခေတ်သစ်ဂျပန်နိုင်ငံ၏ သိပ္ပံ၊ နည်းပညာနှင့် ယဉ်ကျေးမှုအခန်းကဏ္ဍများကို လေ့လာနားလည်သဘောပေါက် ပြီး မိမိတို့နိုင်ငံ တိုးတက်ရေးအတွက် နက်ရှိုင်းသော အမြင်၊ ကျယ်ပြန့်သော ရှုထောင့်မှ ပါဝင်လှုပ်ရှား ဆောင်ရွက်နိုင်ရန် ရည်ရွယ်၍ IATSS Forum ကို ကျင်းပပြုလုပ်ခြင်းဖြစ်သည်။

လျှောက်ထားလိုသူများအနေဖြင့် ပူးတွဲပါလျှောက်လွှာနှင့်အတူ အောက်တိုဘာလ(၃၁)ရက်နေ့ နောက်ဆုံးထားပြီး IATSS Forum Myanmar Committee ၊ MIA Office, 6th Floor, UMFCCI Office Tower သို့ လူကိုယ်တိုင်လာရောက်လျှောက်ထားနိုင်သည်ဟု သိရသည်။

#Local_News #IATSS Forum #အခမဲ့တက်ရောက်နိုင်
#Yangon_Times/PP

#Local_News
Published_ 16 August 2023

၂၀၂၃ ခုနှစ်၊ အောက်တိုဘာ (၁)ရက်မှ (၁၅) ရက်အထိ စမ်းသပ် သန်းခေါင်စာရင်း ကို တိုင်းဒေသကြီး/ ပြည်နယ်အားလုံးမှ မြို့နယ် ၂၀ ကို ရွေးချယ်ပြီး စာရင်းကောက်ကွက် ၁၀၀ ကို နမူနာရွေးချယ်ကောက်ယူသွားမည်ဖြစ်ကြောင်း လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနဝန်ကြီး ဦးမြင့်ကြိုင်က ဝန်ကြီးဌာနမှ တာဝန်ရှိသူများနှင့် တွေ့ဆုံစဉ် တိုက်တွန်းမှာကြားခဲ့ပါတယ်။

လက်ရှိတွင် နိုင်ငံတော်အစိုးရ၏ ရှေ့လုပ်ငန်းစဉ် (၅)ရပ်အနက် အရေးအကြီးဆုံး လုပ်ငန်းစဉ်မှာ “ဆန္ဒမဲပေးပိုင်ခွင့်ရှိသူအားလုံး၏ အခွင့်အရေးများ နစ်နာမှုမရှိစေရေးနှင့် နည်းလမ်းကျနမှန်ကန်မှုရှိသည့် အထွေထွေရွေးကောက်ပွဲ တစ်ရပ်ဖြစ်စေရေး ဆောင်ရွက် ခြင်း၊ အရေးပေါ်ကာလဆိုင်ရာ ပြဋ္ဌာန်းချက်များနှင့်အညီ ဆောင်ရွက်ခြင်းတို့ပြီးစီးပါက လွတ်လပ်ပြီးတရားမျှတသော ပါတီစုံဒီမိုကရေစီ အထွေထွေရွေးကောက်ပွဲကျင်းပ၍ ထွက်ပေါ်လာသည့်အစိုးရအား နိုင်ငံတော်တာဝန် လွှဲအပ်နိုင်ရေး ဆက်လက်ဆောင်ရွက် သွားမည်” ဆိုသည့် လုပ်ငန်းစဉ် ဖြစ်တယ်လို့ ဆိုပါတယ်။

ဇန်နဝါရီ (၃၁) ရက်အထိ e-ID Software ဖြင့်ထုတ်ယူထားသည့် အိမ်ထောင်စု စာရင်းနှင့် တိုက်ဆိုင်စစ်ဆေးကောက်ယူခဲ့သည့် အိမ်ထောင်စု (၁၂) သန်းကျော်၊ လက်ရှိ ဒေသ၌ အိမ်ထောင်စုမရှိသဖြင့် အလွတ်ပုံစံများဖြင့် ကောက်ယူခဲ့သည့်အိမ်ထောင်စု ၂ ဒဿမ ၈) သန်းကျော်၊ စုစုပေါင်းအိမ်ထောင်စု ၁၄ ဒသမ ၈ သန်းကျော် ကောက်ယူပြီးစီးပြီ ဖြစ်ကြောင်း သိရပါတယ်။

ဇူလိုင် (၃၁) ရက်အထိ လူဦးရေ ၃ ဒသမ ၃ သန်းကျော် ၉၇ ဒသမ ၀၆ ရာခိုင်နှုန်းကို နိုင်ငံသားစိစစ်ရေးကတ်ပြား ထုတ်ပေးနိုင်ခဲ့ပြီးဖြစ်ကြောင်း သိရပါတယ်။ ထို့ပြင် e-Government စနစ်၏ အခြေခံအကျဆုံးဖြစ်သည့် e-ID စနစ်လုပ်ငန်းကို ဆောင်ရွက်လျက်ရှိရာတွင် လက်ရှိ ကောက်ယူ ရရှိသည့် ကိုယ်ရေးအချက်အလက်များကို e-ID ကိုယ်ရေးအချက်အလက် မှတ်ပုံတင်ခြင်းစနစ် အတွင်းသို့လည်းကောင်း၊ အိမ်ထောင်စုစာရင်း မှတ်ပုံတင်ခြင်း ဆော့ဝဲလ်ပရိုဂရမ်အတွင်းသို့ လည်းကောင်း ထည့်သွင်းလျက်ရှိရာ ၂၀၂၃ ခုနှစ်၊ ဩဂုတ် (၁၀) ရက်အထိ လူဦးရေ (၅၁)သန်းကျော်၊ အိမ်ထောင်စု(၁၃)သန်းကျော် ထည့်သွင်းထားပြီးဖြစ်ကြောင်း သတင်းရရှိပါတယ်။

#ygm_mnn #Local_News #စမ်းသပ်သန်းခေါင်စာရင်း #နမူနာရွေးချယ်ကောက်ယူ
#Yangon_Media_Group

#Local_News
Published-16 August 2023

မာရဝိဇယဗုဒ္ဓရုပ်ပွားတော်မြတ်ကြီးသို့လာရောက်သူများ လက်ကိုင်ဖုန်းဖြင့် ဓာတ်ပုံရိုက်လျှင် ငွေ ၅၀၀၀ ကျပ် ပေးရမည်ဟု သတ်မှတ်ချက်အပေါ် ဝေဖန်မှုများရှိလာပြီးနောက် ယနေ့ သြဂုတ်လ ၁၆ ရက်တွင် ပေးရန်မလို တော့ကြောင်း နစက သတင်းထုတ်ပြန်ရေးက ထုတ်ပြန်လိုက်သည်။

ရည်ရွယ်ချက်မှာ မာရဝိဇယဗုဒ္ဓရုပ်ပွားတော်မြတ်ကြီးနှင့် ဥယျာဉ်တော် ကြီး ရေရှည်တည်တံ့ခိုင်မြဲစေရန်အတွက် လိုအပ်သည့် ပြုပြင်ထိန်းသိမ်းခြင်းလုပ်ငန်းများ ဆောင်ရွက်ရာတွင် ကုသိုလ်တော်ဖြစ် ပါဝင်နိုင်ရေးအတွက် ဖြစ်ကြောင်း ယင်းထုတ်ပြန်ချက်တွင် ဖော်ပြထားသည်။

မာရဝိဇယဗုဒ္ဓရုပ်ပွားတော်မြတ်ကြီးသို့လာရောက်သူများအား သြဂုတ်လ ၂၀ ရက်မှစ၍ ရင်ခွင်ပိုက် မပါဘဲ ကလေး၊လူကြီး တစ်ဦးလျှင် ဝင်ကြေး ၁၀၀၀ ကျပ် ၊နိုင်ငံခြားသားတစ်ဦးလျှင် အမေရိကန် ၁၀ ဒေါ်လာ။ အပျော်ရိုက်ကင်မရာ ၅၀၀၀ ကျပ်၊ အလှဓါတ်ပုံရိုက်ခြင်း Video ရိုက်ခြင်း အပါ ၅၀၀၀၀ ကျပ်။(နာရီဝက်ပိုတိုင်း-၅၀၀၀ ကျပ်)၊ယာဉ်ဝင်ခွင့်(၁)စီးလျှင်(ကား Parking အထိ)၂၀၀၀၀ ကျပ်၊Buggy (၁)စီးလျှင်(၄ ယောက်စီး)( ၁ )နာရီ ၁၀၀၀၀ ကျပ် ဖြစ်ကြောင်း အဆိုပါ ထုတ်ပြန်ချက်တွင် ဖော်ပြထားသည်။

မာရဝိဇယဗုဒ္ဓရုပ်ပွားတော်မြတ်ကြီးအား ယနေ့ သြဂုတ်လ ၁၆ ရက်ထိ အခမဲ့ဖူးမြော်နိုင်မည်ဟု သတ်မှတ်ထား သော်လည်း ဩဂုတ်လ ၁၇ ရက်မှ ၁၉ ရက်အထိ ရက် ထပ်မံတိုးမြှင့်ကြောင်း ယမန်နေ့က ကြေညာထားသည်။

#Local_News #မာရဝိဇယ ဗုဒ္ဓရုပ်ပွားတော်မြတ်ကြီး
Yangon_Times/PP

#Local_News
Published-16-8-2023

2023-24 AFC Cup (Preliminary Round- 2)ပြိုင်ပွဲအတွက် ယနေ့ ညနေ ၃ နာရီ မိနစ် ၃၀ အချိန်တွင် ရန်ကုန်ယူနိုက်တက်အသင်းနှင့် ဘရူနိုင်းအသင်းတို့ ရန်ကုန်မြို့၊ သုဝဏ္ဏဘောလုံးကွင်းအတွင်း ယှဉ်ပြိုင်ကစားသွားကြမည်ဖြစ်သည်။

ယင်းနှင့်ပတ်သက်၍ ယမန်နေ့က ပွဲကြိုသတင်းစာရှင်းလင်းပွဲတစ်ခု ပြုလုပ်ခဲ့ပြီး၊ ယင်းသတင်းစာရှင်းလင်းပွဲတွင် ရန်ကုန်ယူနိုက်တက်အသင်းခေါင်းဆောင်ဖြစ်သူက အကောင်းဆုံးပြင်ဆင်ထားပြီး နိုင်မှတ်သုံးမှတ်ရရှိရန် ကြိုးစားသွားမည်ဖြစ်ကြောင်း ပြောကြားသည်။

အဆိုပါ ပွဲစဉ်အတွက် ရန်ကုန်ယူနိုက်တက်အသင်း၏ တရားဝင် ဖေ့ဘွတ်စ်လူမှုကွန်ရက်စာမျက်နှာကတဆင့် Live Stream ထုတ်လွှင့်ပြသွားမည်ဖြစ် ကြောင်း သိရသည်။

ပွဲကြိုသတင်းစာရှင်လင်းပွဲတွင် ရန်ကုန်ယူနိုက်တက်အသင်း နည်းပြချုပ် ဂတ်ဇီ က " ပွဲအတွက် ဖိအားရှိမနေဘဲ နိုင်ပွဲအတွက်သေချာပြင်ဆင်ထားပါတယ်။ ပြိုင်ဘက်အသင်းက ဘရူးနိုင်းကလပ်အသင်းဆိုပေမယ့် စနစ်တကျဖွဲ့စည်းထားတဲ့အသင်းဖြစ်လို့ အထင်သေးလို့မရပါဘူး။ခန္ဓာကိုယ် ကြံ့ခိုင်မှု ကွာဟချက်တွေရှိတဲ့အတွက် ခက်ခဲမယ့်ပွဲစဉ်တစ်ပွဲပါ။ ဒါ့ပေမယ့် ပြိုင်ဘက်ကို အနိုင်ယူပြီးနောက်တဆင့်ကိုတက်နိုင်မယ်လို့ ယုံ ကြည်ချက်ရှိပါတယ်"ဟု ပြောကြား ထားသည်။

ဘရူနိုင်းအသင်းအနေဖြင့် လက်ရှိတွင် စင်ကာပူလိဂ်တွင် ကစားနေပြီး၊ နိုင်ငံ ခြားသား ကစားသမားများ အများဆုံးပါဝင်နေသည့် အသင်းတစ်ခုလည်းဖြစ်သည်။

ရန်ကုန်ယူနိုက်တက်အသင်းနှင့် ဘရူနိုင်းကလပ်အသင်း (DPMM FC )၏  AFC Cup ခြေစစ်ပွဲကို ကွင်း၀င်ကြေးအခမဲ့နှင့် ကားအကြိုအပို့စီစဉ်ပေးသွားမည်ဖြစ်‌ကြောင်း ရန်ကုန်ယူနိုက်တက်အသင်း၏ ဖန်ကလပ်က အသိပေးထားသည်။

#YMG/my #Local_News #ရန်ကုန်ယူနိုက်တက် #ဘရူနိုင်းအသင်း
#Yangon_Times

#Local_News
Published-16 August 2023

ရန်ကုန်တိုင်းဒေသကြီး၊ ဒဂုံမြို့သစ်(တောင်ပိုင်း)မြို့နယ်ရှိ သုခဒဂုံပြည်သူ့အငှားအိမ်ရာတွင် နေထိုင်ကြမည့်သူများ သွားလာရေး အဆင်ပြေ‌စေရန်အတွက် YBS ယာဉ်လိုင်း(၅)လိုင်း စီစဉ်ပြေးဆွဲပေးသွားမည်ဟု ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ (YRTC)မှ တွဲဖက်အတွင်းရေးမှူး ဦးလျန်ကျင့်မန်က ပြောကြားသည်။

အဆိုပါအိမ်ရာဝင်းအတွင်း နေထိုင်သူများအဆင်​ပြေစေရန် ယာဥ်လိုင်းကော်မတီ ၄ခု မှ ယာဥ်လိုင်းနံပါတ် ၇၁၊ ၁၂၇၊ ၈၁၊ ၄၆နှင့် ၁ တို့ ပြေးဆွဲပေးသွားမည်ဖြစ်ကြောင်းသိရသည်။

"ဆောက်လုပ်ရေးဝန်ကြီးဌာန၊အိုးအိမ်ဦးစီးဌာနကနေပြီးတော့ တောင်ဒဂုံမှာ သုခဒဂုံ ပြည်သူ့အငှားအိမ်ရာတည်ဆောက်ထားတာရှိပါတယ်။ အဲဒီအိမ်ရာမှာနေထိုင်ကြမယ့်ပြည်သူတွေအဆင်ပြေစေဖို့အတွက် ဆောက်လုပ်ရေးဝန်ကြီးဌာနကလည်း YBSယာဥ်လိုင်းတွေ အတွက် မြေဧဏ ၅ဧကလောက် ပေးထားတာရှိပါတယ်။ YBS ယာဥ်လိုင်းတွေပြေးဆွဲတဲ့အခါ ယာဥ်လိုင်းနံပါတ် ၅ခုနဲ့ပြေးဆွဲပေးဖို့စီစဥ်ဆောင်ရွက်နေပါတယ်"ဟု ဦးလျင်ကျင့်မန်ကဆိုသည်။

သုခဒဂုံအိမ်ရာဝင်းအထိ ပြေးဆွဲသွားမည့်ယာဥ်လိုင်း၅လိုင်းနဲ့ပတ်သက်၍ အဆင်မပြေမှုများရှိလျှင် YRTC သို့ သတင်းပေးပို့နိုင်ပြီး ဝန်ဆောင်မှုကောင်းမွန်စွာဖြင့် ပို့ဆောင်ပေးနိုင်ရန်စီစဥ်နေကြောင်းလည်း သိရသည်။

သုခဒဂုံအိမ်ရာတွင် ပထမအဆင့်အဖြစ် လက်ရှိတွင် အခန်းပေါင်း ၁၁၆၈ ခန်းပြီးစီးနေပြီး ​ြသဂုတ်လတွင်နေထိုင်နိုင်ပြီဟုသိရပြီးဒုတိယအဆင့်အနေဖြင့် လာမယ့်ဒီဇင်ဘာလတွင် အခန်းပေါင်း ၈၀၀ ကျော်ထပ်မံပြီးစီးမည်ဟု သိရပြီး ၂၀၂၄ခု နှစ် ဧပြီလတွင် အငှားအိမ်ရာစီမံကိန်း ပြီးစီးမည်ဟု သိရသည်။

ယင်းအပြင် အဆိုပါအိမ်ရာဝင်းအတွင်း ယာယီစျေးတစ်ခုစတင်တည်ဆောက်ရန်ဆောင်ရွက်နေပြီး နောက်ပိုင်းတွင် စူပါမားကတ်များ လာရောက်ဖွင့်လှစ်ပေးနိုင်ရန်အထိ ဆောင်ရွက်ပေးသွားမည်ဟု မြို့ပြနှင့်အိမ်ရာဖွံ့ဖြိုးရေးဦးစီးဌာနကသိရသည်။

#Local_News #သုခဒဂုံပြည်သူ့အငှားအိမ်ရာ #YBS ယာဉ်ပြေးဆွဲပေး
#Yangon_Times/PP