Published_ 02 November 2023

တရုတ်နိုင်ငံမှ Industrial and Commercial Bank of China (ICBC) ရန်ကုန်ဘဏ်ခွဲသည် နယ်စပ်ဖြတ်ကျော် ဘဏ်အချင်းချင်းအကြား ယွမ်ငွေပေးချေမှု(CIPS)စနစ်တွင် အဖွဲ့ဝင်ဘဏ်အဖြစ် ပါဝင်လာပြီး ယွမ်ငွေပေးချေမှု လုပ်ငန်းများကို စတင်လုပ်ဆောင်နေကြောင်း မြန်မာနိုင်ငံဆိုင်ရာ တရုတ်သံရုံးမှသိရသည်။

အဆိုပါ Industrial and Commercial Bank of China (ICBC) ရန်ကုန်ဘဏ်ခွဲ၏ နယ်စပ်ဖြတ်ကျော် ဘဏ်အချင်းချင်းအကြား ယွမ်ငွေပေးချေမှုစနစ် (CIPS) တွင် တိုက်ရိုက်အဖွဲ့ဝင်ဘဏ်အဖြစ် လုပ်ငန်းစတင်ခြင်း အခမ်းအနားကို နိုဝင်ဘာလ ၁ ရက်နေ့တွင် ရန်ကုန်မြို့၌ ကျင်းပခဲ့သည်။

အခမ်းအနားတွင် သံအမတ်ကြီး Mr. Chen Hai က ‘ICBC ရန်ကုန်ဘဏ်ခွဲသည် CIPS စနစ်တွင် တိုက်ရိုက် အဖွဲ့ဝင်ဘဏ်အဖြစ် ပါဝင်ခြင်းကို ဂုဏ်ပြုခဲ့ပြီး ၂၀၂၁ ခုနှစ်တွင် တရုတ်-မြန်မာနှစ်နိုင်ငံက ယွမ်ငွေဖြင့် နယ်စပ်ကုန်သွယ်ရေးကို စာရင်းရှင်းလင်းသည့်စနစ် စတင်ထူထောင်ပြီးနောက် CIPS စနစ်ကို မြန်မာနိုင်ငံ၌ စတင်အသုံးပြုခြင်းဖြစ်ကြောင်း၊ ယင်းသည် တရုတ်-မြန်မာနှစ်နိုင်ငံက ယွမ်ငွေဖြင့် ပူးပေါင်းဆောင်ရွက်မှုတွင် ရရှိသည့် နောက်တစ်ခုအရေးပါတိုးတက်မှုဖြစ်ကာ ယွမ်ငွေကို မြန်မာနိုင်ငံ၌ အသုံးပြုခြင်းကို ပိုမိုတိုးတက်မှုအား ကိုယ်စားပြုနေကြောင်း၊ နှစ်နိုင်ငံဘဏ္ဍာရေး ပူးပေါင်းဆောင်ရွက်မှုနက်ရှိုင်းရေးနှင့် တရုတ်-မြန်မာကုန်သွယ်ရင်း နှီးမြှုပ်နှံမှု မြှင့်တင်ရေးအတွက် အကျိုးရှိကြောင်း၊ တရုတ်-မြန်မာနယ်ပယ်အသီးသီးမှ ပုဂ္ဂိုလ်များကလည်း အခွင့်အလမ်းကို အမိအရ ဆုပ်ကိုင်၍ တတိယအကြိမ်မြောက် “Belt and Road” နိုင်ငံတကာပူးပေါင်း ဆောင်ရွက် မှု ထိပ်သီးဖိုရမ်၏ သဘောတူညီချက်ရလဒ်များကို အတူတကွကြိုးပမ်းဖော်ဆောင်ကာ CIPS ဘဏ္ဍာရေး ဝန်ဆောင်မှုကို ကောင်းမွန်စွာအသုံးပြု၍ ငွေကြေးဆိုင်ရာ ပေါင်းစပ်ပါဝင်မှုကို မြှင့်တင်ပြီး နှစ်နိုင်ငံစီးပွားရေး အပြန်အလှန်အကျိုးပြု ဖွံ့ဖြိုးတိုးတက်မှုကို တိုးမြှင့်သွားရန် မျှော်လင့်ကြောင်း’ ထည့်သွင်းပြောကြားခဲ့သည်။

မြန်မာနိုင်ငံတော် ဗဟိုဘဏ်ဥက္ကဋ္ဌ ဒေါ်သန်းသန်းဆွေကလည်း ‘ ICBC ရန်ကုန်ဘဏ်ခွဲသည် CIPS စနစ်တွင် တိုက်ရိုက်အဖွဲ့ဝင် ဘဏ်အဖြစ် ပါဝင်ခြင်းသည် မြန်မာနိုင်ငံရှိ ဘဏ္ဍာရေးအဖွဲ့အစည်းများက မိမိနိုင်ငံ၌ပင် CIPS တစ်ကမ္ဘာလုံး စာရင်းရှင်းလင်းမှု ကွန်ရက်အား တိုက်ရိုက်အဆင်ပြေထိ ရောက်စွာ ပါဝင်နိုင်ခြင်းကို ဆိုလိုနေကြောင်း၊ တရုတ်နိုင်ငံသည် မြန်မာနိုင်ငံ၏ အကြီးဆုံးကုန်သွယ်ရေးမိတ်ဖက်နှင့် အကြီးဆုံးနိုင်ငံခြား ရင်းနှီးမြှုပ်နှံမှု နိုင်ငံဖြစ်ကြောင်း၊ CIPS စနစ်နှင့် ချိတ်ဆက်ခြင်းသည် မြန်မာ-တရုတ် နှစ်ဖက်ကုန်သွယ်ရေး၊ ရင်းနှီးမြှုပ်နှံမှုများ တိုးမြှင့်၍ သက်ဆိုင်ရာ ဆုံးရှုံးနိုင်ခြေများကို လျှော့ချပေးမည်ဖြစ်ကြောင်း’ အခမ်းအနား၌ ပြောကြားခဲ့သည်။

အောက်တိုဘာလ ၁၈ ရက်နေ့တွင် ICBC ရန်ကုန်ဘဏ်ခွဲသည် CIPS စနစ်နှင့် အောင်မြင်စွာချိတ်ဆက်ခဲ့ပြီး အောက်တိုဘာလ ၂၃ ရက်နေ့တွင် မြန်မာနိုင်ငံ၏ ပထမဆုံး CIPS တိုက်ရိုက်ဘဏ်အဖွဲ့ဝင်အနေဖြင့် နယ်စပ်ဖြတ်ကျော် ဘဏ်အချင်းချင်းအကြား ယွမ်ငွေပေးချေမှုလုပ်ငန်းကို စတင်လုပ်ဆောင်ခဲ့ကြောင်း မြန်မာနိုင်ငံဆိုင်ရာ တရုတ်သံရုံး၏ ထုတ်ပြန်ချက်အရသိရသည်။
#Yangon_Times/tthl
#Local_News
#Published_ 02 November 2023
#YMG #Yangon_Times #Yangon_Media_Group

Published_ 02 November 2023

ထိုင်းနိုင်ငံသို့ မြန်မာလုပ်သားများ ပို့ဆောင်ခွင့်ရှိသည့် လိုင်စင်ရ ပြည်ပအလုပ်အကိုင်အကျိုးဆောင် အေဂျင်စီများအနက် အေဂျင်စီ (၁၀) ခုကို ယာယီပိတ်သိမ်းထားကြောင်း အလုပ်
သမားဝန်ကြီးဌာန၏ ထုတ်ပြန်ချက်အရ သိရသည်။

ယခု၂၀၂၃ ခုနှစ် အောက်တိုဘာ (၃၁)ရက်အထိ ထိုင်းနိုင်ငံသို့ လုပ်သားပို့ဆောင်စေလွှတ်ခွင့်ရသည့် အေဂျင်စီ စုစုပေါင်း (၁၅၇) ခုရှိသည့်အနက် အေဂျင်စီ (၁၀) ခုကို ယာယီပိတ်သိမ်းလိုက်ခြင်းဖြစ်ကြောင်း သိရသည်။

အဆိုပါ ယာယီပိတ်ထားသည့် အေဂျင်စီများမှာ Aung Kaung Mon Co.,Ltd , Diamond Bagan General Services Co.,Ltd , JMK Services Co.,Ltd , New Three Diamonds Co.,Ltd , Phyu Sin May Services Co.,Ltd , Shwe Lwin Lwin Trading Co.,Ltd , Shwe Phyo Thar Co.,Ltd , Star Yadanar Co.,Ltd , Top Choice Manpower Co.,Ltd , Win Phyo Aung Co.,Ltd, တို့ ဖြစ်ကြောင်း သိရသည်။

ထို့အပြင် ယာယီပိတ်သိမ်းခံရသည့် အေဂျင်စီများကို (၆) လ မှ (၁) နှစ်အထိ ယာယီပိတ်သိမ်းထားခြင်းဖြစ်ပြီး အေဂျင်စီကုမ္ပဏီ (၁၄၇) ကသာ မြန်မာလုပ်သားများအတွက် လုပ်ငန်းများ ဆက်လက်ဆောင်ရွက်နေကြောင်း သိရသည်။

အဆိုပါ မြန်မာလုပ်သားများအတွက် လုပ်ငန်းများ ဆက်လက်ဆောင်ရွက်နေသည့် အေဂျင်စီစာရင်း အသေးစိတ်ကို Safe Migration တွင် ကြည့်ရှုနိုင်ကြောင်း သိရသည်။
#Yangon_Times/NN
#Local_News
#Published_ 02 November 2023
#YMG #Yangon_Times #Yangon_Media_Group

Published_ 02 November 2023

ထိုင်းနိုင်ငံအတွင်း ရောက်ရှိနေသည့် အထောက်အထားမဲ့ မြန်မာအလုပ်သမားများ Certificate of Identity- CI ဖြင့် တရားဝင်နေထိုင် လုပ်ကိုင်ခွင့် ရရှိစေရေး အပါအဝင် မြန်မာရွှေ့ပြောင်းအလုပ်သမားများ အရေးနှင့် စပ်လျဉ်း၍ထိုင်းနိုင်ငံ၊ အလုပ်သမားဝန်ကြီးဌာနမှ တာဝန်ရှိသူများနှင့် ပြည်ထောင်စုဝန်ကြီး ဦးမြင့်နောင်တို့ တွေ့ဆုံ ဆွေးနွေးခဲ့ကြကြောင်း သိရသည်။

တရုတ်ပြည်သူ့ သမ္မတနိုင်ငံ၊ နန်နင်းမြို့၌ ၂၀၂၃ ခုနှစ်၊ နိုဝင် ဘာလ (၃) ရက်မှ (၄) ရက်အထိ ကျင်းပမည့် အာဆီယံ - တရုတ်ဖိုရမ်သို့ တက်ရောက်ရန်အတွက် တရုတ်နိုင်ငံသို့ လေကြောင်း ခရီးဖြင့် သွားရောက်စဉ်အတွင်း ထိုင်းနိုင်ငံ၊ သုဝဏ္ဏဘူမိအပြည်ပြည်ဆိုင်ရာလေဆိပ်တွင် ရောက်ရှိရပ်နားစဉ် အလုပ်သမားဝန်ကြီးဌာန ပြည်ထောင်စုဝန်ကြီး ဦးမြင့်နောင်နှင့်အဖွဲ့သည် နိုဝင်ဘာ ၂ရက် နံနက်ပိုင်းတွင် ၄လေဆိပ်ရှိ အထူးဧည့်သည်တော်ခန်းမတွင် ထိုင်းနိုင်ငံ၊ အလုပ်သမားဝန်ကြီးဌာန ဝန်ကြီး Mr.Phiphat Ratchakitprakarn ဦးဆောင်သည့် ထိုင်းနိုင်ငံဘက်မှ အလုပ်သမားရေးရာ တာဝန်ရှိသူများနှင့် တွေ့ဆုံ၍ မြန်မာရွှေ့ပြောင်းအလုပ်သမားရေးရာ ကိစ္စရပ်များ ဆွေးနွေးခဲ့ခြင်းဖြစ်သည်။

အဆိုပါကဲ့သို့ ဆွေးနွေးရာတွင် နှစ်နိုင်ငံ အလုပ်သမားရေးရာ ပူးပေါင်းဆောင်ရွက်ခြင်းဆိုင်ရာ နားလည်မှု စာချွန်လွှာ (MoU) သက်တမ်းတိုး လက်မှတ်ရေးထိုးရေး ကိစ္စရပ်များ၊ MoU လူသစ်စေလွှတ်ခြင်းနှင့် MoU U-turn စနစ်ဖြင့် လူဟောင်းပြန်လည် စေလွှတ်ခြင်းများအတွက် နှစ်နိုင်ငံပူးပေါင်းအကောင် အထည်ဖော်ဆောင်ရွက်နိုင်ရေး လုပ်ငန်းစဉ်များအား ဆွေးနွေးခဲ့ကြောင်းသိရသည်။

ထို့အပြင် ထိုင်းနိုင်ငံတွင် ယာယီနေထိုင် အလုပ်လုပ်ကိုင်ခွင့်အတွက် အမည်စာရင်း တင်သွင်းထားသည့် အလုပ်သမားများကို (ပန်းရောင်ကတ်) ထုတ်ပေးနိုင်ရေး ကိစ္စရပ်များအား နှစ်နိုင်ငံအကျိုးရလဒ်ကောင်းများ ပေါ်ထွက်စေရေး တို့ကိုလည်း ဆွေးနွေးညှိနှိုင်းခဲ့ကြကြောင်း သိရသည်။
#Yangon_Times/NN
#Local_News
#Published_ 02 November 2023
#YMG #Yangon_Times #Yangon_Media_Group

Published_ 02 November 2023

အင်ဒိုနီးရှားနိုင်ငံသို့ လယ်ယာထွက်ကုန်ပစ္စည်းများ တင်ပို့ရာတွင်ပိုးသတ်ဆေး၊ ဓါတ်ကြွင်းနှင့် မှိုအဆိပ်သင့်ရောဂါအန္တရာယ်ကင်းရှင်းသည့် ISO ထောက်ခံချက်ရရှိ ခဲ့ပြီဖြစ်ကြောင်း နိုဝင်ဘာလ (၁) ရက်နေ့က ရန်ကုန်မြို့ရှိ ကုန်သည်စက်မှုအသင်းချုပ် (UMFCCI)၌ ပြုလုပ်သည့် မြန်မာနိုင်ငံမှ အင်ဒိုနီးရှားနိုင်ငံသို့ တင်ပို့မည့် လယ်ယာထွက်ကုန်များတွင် ဓါတ်ခွဲစမ်းသပ် စစ်ဆေးခြင်းဆိုင်ရာ လိုအပ်ချက်၊ အကြံပြုချက်များအတွက် တွေ့ဆုံညှိနှိုင်းပွဲမှ သိရသည်။

အဆိုပါ အင်ဒိုနီးရှားနိုင်ငံသည် ၄င်းတို့၏ Food Safety Law အရ လယ်ယာထွက်ကုန်များ တင်ပို့သည့်အခါ Food Safety ကို ပထမဆုံး‌တောင်းဆိုသော နိုင်ငံဖြစ်ပြီး သက်ဆိုင်ရာနိုင်ငံ၏ အသိအမှတ်ပြုဓါတ်ခွဲခန်းက အသိအမှတ်ပြု လက်မှတ်ရရန်တောင်းဆိုထားခြင်းဖြစ်ကြောင်း၊ မြန်မာနိုင်ငံတွင် ယခင်က လယ်ယာထွက်ကုန်များ စစ်ဆေးနိုင်ရန် ဓါတ်ခွဲခန်းတပ်ဆင်ပစ္စည်း၊ ကျွမ်းကျင်ဝန်ထမ်းများဖြင့် အဆင်သင့် မဖြစ်သေးသည့်အတွက် ပြည့်စုံစွာဆောင်ရွက်နိုင်မှု မရှိသေးခဲ့သော်လည်း ယခုအခါတွင် ဓာတ်ခွဲစစ်ဆေးမှု အဆင်သင့်ဖြစ်နေပြီ ဖြစ်ပြီး၊ အင်ဒိုနီးရှားနိုင်ငံသို့ လယ်ယာထွက်ကုန်ပစ္စည်းများ တင်ပို့သည့်အခါ ပိုးသတ်ဆေး၊ ဓါတ်ကြွင်းနှင့် မှိုအဆိပ်သင့်ရောဂါ အန္တရာယ်ကင်းရှင်းစေရန် မြန်မာနိုင်ငံဖက်က အစဉ်တစိုက်ကြိုးပမ်းခဲ့ရာ ယခုအခါ ISO 17025 ထောက်ခံချက် ရရှိခဲ့ပြီ ဖြစ်သည့်အပြင် လယ်ယာထွက်ကုန် ပို့ကုန် လုပ်ငန်းများအနေဖြင့် ကောင်းမွန်သော ဈေးကွက်သို့ ဂုဏ်သိက္ခာရှိစွာ တင်ပို့ရောင်းချနိုင်ပြီ ဖြစ်ကြောင်းသိရသည်။

ကုန်သည်စက်မှုအသင်းချုပ် ဒုတိယဥက္ကဋ္ဌ ဦးရဲမင်းအောင်က “ အင်ဒိုနီးရှားနိုင်ငံနှင့် မြန်မာနိုင်ငံအကြား Sanitary and Phytosanitary မှာ ချောမွေ့သော ကူးသန်း ရောင်းဝယ်မှုများ ဖြစ်ခဲ့သလို ခက်ခဲသော ကာလများလည်း ကြုံတွေ့ခဲ့ရတာရှိပါတယ်။

နိုင်ငံတော်မှ ပြည်ပသို့ တင်ပို့မဲ့ လယ်ယာထွက်ကုန်များကို နိုင်ငံတကာအသိအမှတ်ပြု ISO လက်မှတ်ရရှိအောင် ဆောင်ရွက်ပေးတာဖြစ်တဲ့အတွက် တောင်သူ လယ်သမားများအတွက်လည်း အဆင်ပြေသလို ပို့ကုန်လုပ်ငန်းရှင်များ အတွက်လည်း အကျိုးကျေးဇူးများ ခံစားနိုင်ရပါတယ်၊ အင်ဒိုနီးရှားနိုင်ငံဟာ အရှေ့တောင်အာရှမှာ လူဦးရေများတဲ့အတွက် လယ်ယာထွက်ကုန်များ ပိုမိုလိုအပ်သလို၊ မိမိတို့နိုင်ငံအတွက် ဈေးကွက် ချဲ့ထွင်ရန်လည်းလိုအပ်ပါတယ်၊ ကြီးမားသော ဈေးကွက်မှာ အရည်အသွေး ကောင်းမွန်စွာ ပေးပို့နိုင်ဖို့အတွက် အရေးကြီးပါတယ်၊ ယခုလိုဆွေးနွေးပွဲမှာ ဓါတ်ခွဲ စစ်ဆေးခြင်းဆိုင်ရာ လိုအပ်ချက်များကို အကြံပြုဆွေးနွေးပေးဖို့ ဖိတ်ခေါ်ပါတယ်”ဟု ပြောကြားခဲ့သည်။

ထို့အပြင် နိုင်ငံတကာကုန်သွယ်မှု ဆောင်ရွက်သည့်အခါ ဝယ်ယူမည့်နိုင်ငံ၏ လိုအပ်ချက်၊အကန့်အသတ်၊ စံသတ်မှတ်ချက်များအား သိရှိရန်လိုအပ်ကြောင်း စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာနစိုက်ပျိုးရေးဦးစီးဌာန ညွှန်ကြားရေးမှူးချုပ် ဒေါက်တာရဲတင့်ထွန်းက ပြောသည်။

" လိုအပ်ချက်ကို ပြည့်မီအောင် မပို့နိုင်ပါက ကုန်ပစ္စည်းများ ဆိပ်ကမ်းကနေ ပြန်ပို့ခံရမှုများ ကြုံတွေ့နိုင်ရပါတယ်၊ ယနေ့ဆွေးနွေးပွဲက လယ်ယာ ထွက်ကုန်များတွင် ဓါတုဓာတ်ကြွင်းတွေ ၊ ပါဝင်နိုင်တဲ့ မှိုအဆိပ်အသင့်မှု၊ အဆိပ်သင့်ပစ္စည်းများကို စစ်ဆေးရတာဖြစ်ပါတယ်၊ အင်ဒိုနီးရှားနိုင်ငံအပါအဝင် အခြားနိုင်ငံများကို တင်ပို့မဲ့ ပစ္စည်းအားလုံးကို နမူနာယူပြီး စစ်ဆေးနိုင်တဲ့ အခြေအနေမျိုးမရှိပါဘူး၊ နိုင်ငံတကာမှာလည်း ဒီလိုပဲဖြစ်ပါတယ်၊ လုပ်ငန်းရှင်များအနေနဲ့ မိမိတို့တင်ပို့မဲ့ ပို့ကုန်မှာ ကိုယ်စားပြုမဲ့ သီးနှံSampleပစ္စည်းကိုသာ ဓါတ်ခွဲခန်းကို ပေးပို့စေလိုပါတယ်၊ ပို့ကုန် ကိုယ်စားပြုမဲ့ သီးနှံSampleကို ယူတတ်ဖို့လိုပါတယ်၊ တောင်သူများကလည်း ပိုးသတ်ဆေး၊ ဓါတ်ကြွင်းမပါအောင် လိုက်နာနိုင်အောင် ဆောင်ရွက်သင့်ပါတယ်၊ လုပ်ငန်းရှင်များက တောင်သူများကို အသိပညာပေး၊ နည်းပညာပေး၊ လုပ်ငန်းများတွင်လည်း တိုက်တွန်း ဆောင်ရွက်ပေးစေလိုပါတယ်” ဟု ပြောကြားခဲ့သည်။

စိုက်ပျိုးရေး ဦးစီးဌာန၏ စိုက်ပျိုးရေးထွက်ကုန်များ စစ်ဆေးရေးဓါတ်ခွဲခန်း (Agricultural Products Analytical Lab - APAL)သည် ISO 17025 ကို ရရှိခဲ့ပြီး အင်ဒိုနီးရှားနိုင်ငံဘက်မှ အတည်ပြုလက်ခံသော ဓါတ်ခွဲခန်း ဖြစ်ကြောင်း၊ အင်ဒိုနီးရှားအတွက်သာမက အခြားနိုင်ငံများနှင့် ပြည်တွင်း Food Safety အတွက် စစ်ဆေးမှုများကိုပါ ဆောင်ရွက်နိုင်သည့် နိုင်ငံတကာ အဆင့်မီ ဓါတ်ခွဲစမ်းသပ်မှုလုပ်ငန်းကို စတင် ဆောင်ရွက်နိုင်ပြီ ဖြစ်ကြောင်း သိရသည်။
#Yangon_Times/NN
#Local_News
#Published_ 02 November 2023
#YMG #Yangon_Times #Yangon_Media_Group

မြန်မာ့လက်မှုလုပ်ငန်းများ ပြန်ရှင်သန်အောင် ရှော့ပင်းစင်တာများတွင် အရောင်းပြပွဲများ ပြုလုပ်မည်

‘မြန်မာ့လက်မှုလုပ်ငန်းရှင်တွေအနေနဲ့ တစ်ဦးချင်းစီက လုပ်ငန်းရှင်သန်နိုင်အောင် ကြိုးပမ်းနေသလို အသင်းအနေနဲ့လည်း လက်မှုလုပ်ငန်းတွေ ရှင်သန်လည်ပတ်နိုင်အောင် ပြည်တွင်းဈေးကွက်နေရာရဖို့ ရှော့ပင်းစင်တာတွေမှာ လက်မှုအရောင်းပြပွဲတွေ ပြုလုပ်ပြီး ကြိုးပမ်းရုန်းကန်နေတယ်’ မြန်မာ့လက်မှုအနုပညာအသင်းဥက္ကဌဦးသာဓု
‌#Yangon_Times/tthl
#Local_News
#Published_ 02 November 2023
#YMG #Yangon_Times #Yangon_Media_Group

ပြည်ပတင်ပို့နိုင်မည့် ဂျင်းအခက်များ ယခုလကုန်ပိုင်းမှ ထွက်ရှိမှာဖြစ်ပေမယ့် ဘင်္ဂလားဒေရှ် မှ ကုန်သည်တွေဝယ်ယူရန် ကြိုတင်ရောက်ရှိနေ

ပြည်ပကိုတင်ပို့ နိုင်မယ့် အရည်သွေးရှိ ဂျင်းအခက်အရင့်တွေဟာ ယခုလကုန်ပိုင်းမှ ဈေးကွက် အတွင်း ရောက်ရှိမှာ ဖြစ်ပေမယ့် ဘင်္ဂလားဒေရှ်မှ ကုန်သည်တွေဝယ်ယူရန် ကြိုတင်ရောက်ရှိနေ တယ်လို့ ရှမ်းပြည်နယ်အောင်ပန်းရှိ ကုန်သည်တွေထံက သိရပါတယ်။
‌#Yangon_Times/LW
#Local_News
#Published_ 02 November 2023
#YMG #Yangon_Times #Yangon_Media_Group