#Local_News

Published 20 November 2024

▪️ သွားလာရေးနှင့် လူမှုရေးခက်ခဲသောဒေသများနှင့် ကိုယ်ပိုင်အုပ်ချုပ်ခွင့်ရဒေသ (၆)ခုတို့မှ ၂၀၂၄ ခုနှစ်၊ တက္ကသိုလ်ဝင်စာမေးပွဲအောင်မြင်သည့် ကျောင်းသား၊ ကျောင်းသူများအားဆေးတက္ကသိုလ်ဝင်ခွင့် လျှောက်လွှာခေါ်ယူနေကြောင်း ကျန်းမာရေးဝန်ကြီးဌာနမှ သိရသည်။

▪️ နိုင်ငံတော်မှ ထုတ်ပြန်ထားသော ဒေသစရိတ်ခံစားခွင့်ရှိသည့် သွားလာရေးနှင့် လူမှုရေးခက်ခဲသောဒေသများနှင့် ကိုယ်ပိုင်အုပ်ချုပ်ခွင့်ရဒေသ ၆ခု (နာဂ၊ဓနု၊ပအိုဝ်း၊ပလောင်၊ကိုးကန့်၊ဝ တို့မှ ၂၀၂၄ ခုနှစ်၊ တက္ကသိုလ်ဝင်စာမေးပွဲ ကို သိပ္ပံဘာသာတွဲဖြင့် အောင်မြင်ပြီး ခြောက်ဘာသာစုစုပေါင်းရမှတ် ၄၅၀ နှင့်အထက် ရှိသူများအနက် အင်္ဂလိပ်စာ၊ ဓာတုဗေဒ၊ ဇီဝဗေဒ သုံးဘာသာ စုစုပေါင်းရမှတ် (အများ/အနည်း )ပေါ်မူတည်၍ သတ်မှတ်ချက်များနှင့်ကိုက်ညီ သူများကို လူတွေ့နှုတ်မေးစာမေးပွဲစစ်ဆေးပြီး ဆေးတက္ကသိုလ် ဝင်ခွင့်အတွက် ရွေးချယ်ခေါ်ယူသွားမည်ဖြစ်သည်။

▪️ ထို့ကြောင့် ဝေးလံခက်ခဲသောဒေသများနှင့် ကိုယ်ပိုင်အုပ်ချုပ်ခွင့်ရဒေသများရှိ စာစစ်ဌာနများမှ အောင်မြင်ပြီး သတ်မှတ်ချက်များနှင့်ပြည့်စုံ၍ ရမှတ်အကျုံးဝင်သူများသည် ကျန်းမာရေး လူ့စွမ်းအား အရင်းအမြစ်ဦးစီးဌာန ၊နေပြည်တော် ၊ဖုန်း-၀၆၇-၃၄၁၁၂၃၉ နှင့် E-mail This email address is being protected from spambots. You need JavaScript enabled to view it. တို့သို့ ရုံးချိန်အတွင်း ဆက်သွယ်စုံစမ်းမေးမြန်းနိုင်ကြောင်း သိရသည်။

#YMG/NN #Yangon_Times

#Local_News
Published 20 November 2024

▪️ ပြည်သူ့ကျန်းမာရေးဦးစီးဌာနအပါအဝင် ဦးစီးဌာန အချို့ လစ်လပ်နေရာများအတွက် ဝန်ထမ်း ၅၀၀ခန့်ခေါ်ယူ နေကြောင်း ယင်းဌာနများမှ သိရသည်။

▪️ ထိုသို့ခေါ်ယူရာတွင် ပြည်သူ့ကျန်းမာရေးဦးစီးဌာနများတွင် လစ်လပ်လျက်ရှိသော အငယ်တန်းအင်ဂျင်နီယာ(၂) ရာထူး (၇၀)နေရာအတွက် အလုပ်လျှောက်လွှာခေါ်ယူနေကြောင်း သိရသည်။

▪️ ထို့အပြင် ပြည်သူ့အင်အားဦးစီးဌာနတွင် ယာယီနေ့စား (၁၀၀)ဦး ခန့်ထားရန် အလုပ်လျှောက်လွှာခေါ်ယူနေပြီး လူမှုဝန်ထမ်းဦးစီးဌာနတွင် လစ်လပ်လျက်ရှိသော ဖော်ပြပါရာထူး (၃၂၆)နေရာများအတွက် အလုပ်လျှောက်လွှာခေါ်ယူနေကြောင်း သိရသည်။

#YMG/NN #Yangon_Times

#Local_News
Published 20 November 2024

▪️ ယခု ၂၀၂၄-၂၀၂၅ ခုနှစ်၊ မိုးစပါးရာသီ၌ နေပြည်တော်အပါအဝင် တိုင်းနှင့်ပြည်နယ် ငါးခု၌သဘာဝမြေဩဇာများပေါင်းစပ်အသုံးပြုမှုဆိုင်ရာ သုတေသနစံပြကွက် (၃၉)ကွက်ဆောင်ရွက်ခဲ့ကြောင်း မြန်မာနိုင်ငံဆန်စပါးအသင်းချုပ်မှ သိရသည်။

▪️ ထိုသို့ ဆောင်ရွက်ရာတွင်  နေပြည်တော်၊ ရန်ကုန်တိုင်းဒေသကြီး၊ ပဲခူး တိုင်းဒေသကြီး၊ မန္တလေးတိုင်းဒေသကြီးနှင့် ဧရာဝတီတိုင်းဒေသကြီးတို့တွင် စုစုပေါင်း (၃၉)ကွက် ဆောင်ရွက်ခဲ့ခြင်းဖြစ်သည်။

▪️ စိုက်ပျိုးရေးဦးစီးဌာန၊ မြန်မာနိုင်ငံဆန်စပါးအသင်းချုပ်နှင့် သဘာဝမြေဩဇာထုတ်လုပ်သည့် ကုမ္ပဏီများပူးပေါင်း၍ တောင်သူလယ်သမားများ သဘာဝမြေဩဇာသုံးစွဲမှုတိုးမြှင့်သုံးစွဲခြင်းဖြင့် စပါးအထွက်နှုန်းပိုမိုကောင်းမွန်ခြင်း၊ ကုန်ကျစရိတ်သက်သာ၍ ဝင်ငွေပိုမိုစေခြင်း၊ ရေရှည်တည်တံ့သည့် စိုက်ပျိုးထုတ်လုပ်မှုဖြစ်စေခြင်း၊ စိုက်ပျိုးရေး အလေ့အကျင့်ကောင်းများရရှိစေခြင်းစသည့် ရည်ရွယ်ချက်များဖြင့် ၂၀၂၄-၂၀၂၅ ခုနှစ်၊ မိုးစပါးရာသီတွင် သဘာဝ မြေဩဇာများပေါင်းစပ်အသုံးပြုမှုဆိုင်ရာ သုတေသနစံပြကွက်များကို ဆောင်ရွက်ခဲ့ခြင်းဖြစ်ကြောင်းသိရသည်။

▪️ အဆိုပါ သုတေသနစံပြကွက်များအား တောင်သူပညာပေးပြသခြင်း၊ စံကွက်ရိတ်သိမ်းခြင်းများကို ဒေသအလိုက် စံပြကွက်များတွင် ဆောင်ရွက်လျက်ရှိရာ အောက်တိုဘာ  ၂၉ရက်နေ့တွင် ပဲခူးတိုင်းဒေသကြီး၊ သနပ်ပင်မြို့နယ်တွင် လည်းကောင်း၊ နိုဝင်ဘာ ၅ရက်နေ့တွင်၊ ပဲခူးတိုင်းဒေသကြီး၊ အုတ်တွင်းမြို့နယ်တွင်လည်းကောင်း၊ နိုဝင်ဘာ၁၉ရက်နေ့တွင် ပဲခူးတိုင်းဒေသကြီး၊ ပြည်မြို့နယ်လည်းကောင်း ဆက်လက် ဆောင်ရွက်ခဲ့ကြောင်း သိရသည်။

▪️ ယင်းတောင်သူပညာပေးပြသပွဲသို့ စိုက်ပျိုးရေးဦးစီးဌာနနှင့် ဌာနဆိုင်ရာများမှ တာဝန်ရှိသူများ၊ မြန်မာနိုင်ငံဆန်စပါး အသင်းချုပ်နှင့် သက်ဆိုင်ရာ သဘာဝမြေဩဇာကုမ္ပဏီများမှ တာဝန်ရှိသူများ၊ ဒေသရှိတောင်သူလယ်သမားများ ပါဝင်တက်ရောက်ခဲ့ကြကြောင်း သိရသည်။

#YMG/NN #Yangon_Times

#Local_News
Published_ 20 November 2024

▪️ ၂၀၂၀ ပြည့်နှစ် ပါတီစုံဒီမိုကရေစီအထွေထွေရွေးကောက်ပွဲမှာ ဖြစ်ပွားခဲ့တဲ့ “မဲမသမာမှု နှင့် တရားမဲ့ပြုကျင့်မှုများ” ကို စုံစမ်းစစ်ဆေးတွေ့ရှိချက်များနှင့်စပ်လျဉ်း၍ ပြည်တွင်း၊ ပြည်ပမှ လေ့လာလိုသူများအနေဖြင့် Website နှင့် Mobile Application တို့တွင် ဘာသာစကား ၅ မျိုးဖြင့် လေ့လာဖတ်ရှုနိုင်မယ်လို့ သိရပါတယ်။

▪️ မြန်မာ၊ အင်္ဂလိပ်၊ တရုတ်၊ ရုရှား၊ ဂျပန် စတဲ့ ဘာသာစကား(၅)မျိုးနဲ့ လွှင့်တင်မှာစ်၍ လေ့လာဖတ်ရှုလိုသူများသည် https://2020election.uec.gov.mm တွင်လည်းကောင်း၊ Mobile Application ကို အဆိုပါ Website တွင် Download ရယူ၍ လည်းကောင်း လေ့လာဖတ်ရှုနိုင်မယ်လို့ ဆိုပါတယ်။

▪️ အဆိုပါ Website နဲ့ Mobile Application တို့၌ ရွေးကောက်ပွဲအကြိုကာလတွင် ကြိုတင် ကြံစည်ဆောင်ရွက်ခဲ့မှုများ၊ ရွေးကောက်ပွဲကာလတွင် ဆောင်ရွက်ခဲ့မှုများ၊ ရွေးကောက်ပွဲ အလွန်ကာလ ဖြစ်စဉ်များ၊ မြန်မာနိုင်ငံတစ်ဝန်းလုံး ရွေးကောက်ပွဲကျင်းပခဲ့တဲ့ မြို့နယ် ၃၁၅ မြို့နယ်၌ မဲစာရင်း စိစစ်ခြင်းနှင့် မြေပြင်ကွင်းဆင်းစစ်ဆေးဆောင်ရွက်ခြင်း၊ ရွေးကောက်ပွဲ ဖြစ်စဉ်တစ်ခုလုံးအပေါ် ခြုံငုံစစ်ဆေးတွေ့ရှိချက်၊ ၂၀၂၀ ပြည့်နှစ် ပါတီစုံဒီမိုကရေစီအထွေထွေ ရွေးကောက်ပွဲရလဒ်များကို ပယ်ဖျက်ခြင်း၊ ရွေးကောက်ပွဲအပေါ် သုံးသပ်ချက်၊ မှတ်တမ်း ဓာတ်ပုံများ စသည်ဖြင့် ရွေးကောက်ပွဲတွင် ဖြစ်ပွားခဲ့တဲ့ မဲမသမာမှုနဲ့ တရားမဲ့ပြုကျင့်မှုများ အပေါ်စုံစမ်းစစ်ဆေးတွေ့ရှိချက်များကို တစ်နေရာတည်းတွင် ကဏ္ဍစုံလင်စွာ လေ့လာဖတ်ရှုနိုင်မယ်လို့ ဖော်ပြထားပါတယ်။

#Ymg_mnn #Yangon_Media_Group

#Local_News
Published 20 November 2024

▪️ ပို့ဆောင်ရေးနှင့် ဆက်သွယ်ရေးဝန်ကြီးဌာန မြန်မာ့စာတိုက်လုပ်ငန်းမှ သိပ္ပံနှင့်နည်းပညာဝန်ကြီးဌာန မြန်မာနိုင်ငံအင်ဂျင်နီယာပညာရေး နှစ်(၁ဝဝ)ပြည့်အထိမ်းအမှတ် အတည်ပြုရွေးချယ်ထားသည့် အမှတ်တံဆိပ် Logo အား အထူး ထုတ် စာပို့တံဆိပ်ခေါင်းအဖြစ် သတ်မှတ်ပြီး ရောင်းချပေးသွားမည်ဖြစ်ကြောင်း သိရသည်။

▪️ အဆိုပါ အင်ဂျင်နီယာပညာရေး နှစ်(၁၀၀)ပြည့်အထိမ်းအမှတ် (၂၀၀ ကျပ်တန်) စာပို့တံဆိပ်ခေါင်းသစ်ကို ၂ဝ၂၄ ခုနှစ်၊ နိုဝင်ဘာလ ၂၁ ရက်၊ မြန်မာသက္ကရာဇ် ၁၃၈၆ ခုနှစ်၊ တန်ဆောင်မုန်းလပြည့်ကျော်(၆)ရက် (ကြာသပတေးနေ့) နံနက် ၉ နာရီခွဲမှစတင်၍ ‌စာတိုက်ကြီးများ၌ ရောင်းချပေးသွားမည်ဖြစ်ကြောင်း သိရသည်။

▪️ ထိုသို့ ရောင်းချရာတွင် နေပြည်တော်ဗဟိုစာတိုက်ကြီး၊ ရန်ကုန်စာတိုက်ကြီး၊ မန္တလေးစာတိုက်ကြီးတို့နှင့် တိုင်းဒေသကြီး/ပြည်နယ်များရှိ စာတိုက်ကြီးများတွင် တစ်ပြိုင်တည်း ရောင်းချပေးသွားမည် ဖြစ်သည်။

▪️ ထို့အပြင်  အထူးအစီအစဉ်တစ်ရပ်အနေဖြင့် နေပြည်တော်ဗဟိုစာတိုက်ကြီး၊ ရန်ကုန်စာတိုက်ကြီးနှင့် မန္တလေးစာတိုက်ကြီး တို့တွင် ၂ဝ၂၄ ခုနှစ်၊ နိုဝင်ဘာလ ၂၁ ရက်တွင်ဝယ်ယူသော စာပို့တံဆိပ်ခေါင်းများပေါ်တွင် နေ့စွဲအမှတ်အသားတံဆိပ်ရိုက်နှိပ်ပေးသွားမည်ဖြစ်ကြောင်း သိရသည်။

#YMG/NN #Yangon_Times

#Local_News
Published_ 20 November 2024

▪️ Charities Aid Foundation (CAF) မှ ထုတ်ပြန်တဲ့ ၂၀၂၄ ကမ္ဘာ့ပေးကမ်းမှုညွှန်းကိန်း 2024 World Giving Index (WGI) အရ အင်ဒိုနီးရှားသည် ၂၀၁၇ ခုနှစ်တွင် မြန်မာနိုင်ငံကို သာလွန်ခဲ့ပြီး ပထမနေရာကို ရယူခဲ့ပြီးနောက် ယခု ၂၀၂၄ ခုနှစ်အထိ ၇ နှစ်ဆက်တိုက် ပထမနေရာတွင် ဆက်လက်ရပ်တည် နေခဲ့ကြောင်း သိရပါတယ်။

▪️ အဆိုပါ စစ်တမ်းကို ၂၀၂၃ ခုနှစ်တွင် ကောက်ယူခဲ့ပြီး နိုင်ငံနှင့် နယ်မြေပေါင်း ၁၄၂ ခုတို့မှ ပါဝင်သူ ၁၄၅,၇၀၂ ဦးတို့ ဖြေဆိုခဲ့ကြပါတယ်။

▪️ ဖြေဆိုသူများက ဖြေဆိုချိန်တွင် ပြီးခဲ့သောလက ၎င်းတို့ရဲ့ လုပ်ဆောင်ချက်များနဲ့ ပတ်သက်တဲ့ မေးခွန်းသုံးခုကို ဖြေကြားကြရတာ ဖြစ်ပါတယ်။ ချို့ငဲ့သူများကို ကူညီသော အသင်းအဖွဲ့ကို ငွေကြေး လှူဒါန်းခဲ့ပါသလား၊ အဖွဲ့အစည်းတခုခုအတွက်သင့်အချိန်ပေးပြီး စေတနာဝန်ထမ်း လုပ်ကိုင်ခဲ့ပါသလား၊ အကူအညီ လိုအပ်နေသော လူစိမ်းတယောက်ယောက် သို့မဟုတ် သင်မသိသောသူတစ်ဦးဦးကို သင်ကူညီခဲ့ပါသလားဆိုတဲ့ မေးခွန်းတွေကို ဖြေကြားရတာ ဖြစ်ပါတယ်။

▪️ အင်ဒိုနီးရှားသည် ရမှတ် ၇၄ မှတ်ဖြင့် ထိပ်ဆုံးနေရာကို ရရှိခဲ့ပြီး၊ ဒုတိယနေရာမှ ကင်ညာက ၆၃ မှတ်၊ စင်ကာပူ က ၆၁ မှတ်ဖြင့် တတိယနေရာကို ရရှိခဲ့ပါတယ်။

▪️ မြန်မာ က အမှတ် ၅၀ မှတ်ဖြင့် အဆင့် ၁၉ တွင် ရပ်တည်နေခဲ့ပြီး ကမ္ဘာ့ပျမ်းမျှ ညွှန်းကိန်းရမှတ်မှာ ၄၀ ဖြစ်ပါတယ်။

#Ymg_mnn #Yangon_Media_Group