#local_news
Published_ 24 Feb 2022

၂၀၂၁ ခုနှစ် ဖေဖော်ဝါရီ ၁ ရက်မှ၂၀၂၂ ခုနှစ် ဇန်နဝါရီ ၃၁ ရက်အထိ ရင်းနှီးမြှုပ်နှံမှု ကဏ္ဍ ၁၂ ခုတွင် လုပ်ငန်းပေါင်း ၄၄ ခု စုစုပေါင်း အမေရိကန်ဒေါ်လာ ၃၈၂၃ ဒသမ ၀၁၅ သန်း ခွင့်ပြုပေးခဲ့ကြောင်း နစကရဲ့ ပြန်ကြားရေးဝန်ကြီး ဦးမောင်မောင်အုန်းက ပြည်ပမီဒီယာများရဲ့မေးမြန်းမှုမှာ ဖြေကြားထားပါတယ်။

ယင်းတို့အနက် လျှပ်စစ်ကဏ္ဍတွင် ရင်းနှီးမြှုပ်နှံမှုပမာဏ အမေရိကန်ဒေါ်လာ ၃၀၆၂ ဒသမ ၁၃၈ သန်းဖြင့် ပထမ၊ အခြားဝန်ဆောင်မှုကဏ္ဍတွင် ရင်းနှီးမြှုပ်နှံမှုပမာဏ အမေရိကန် ဒေါ်လာ ၂၃၇ ဒသမ ၅၆၄ သန်းဖြင့် ဒုတိယ၊ စက်မှုကဏ္ဍတွင် အမေရိကန် ဒေါ်လာ ၁၉၉ ဒသမ ၈၉၄ သန်းဖြင့် တတိယအများဆုံး ရင်းနှီးမြှုပ်နှံထားတယ်လို့ ဆိုပါတယ်။

နိုင်ငံအလိုက်အနေဖြင့် ယူနိုက်တက်ကင်းဒမ်းနိုင်ငံက ရင်းနှီးမြှုပ်နှံမှုပမာဏ အမေ ရိကန်ဒေါ်လာ ၂၅၀၄ ဒသမ ၄၃၅ သန်းဖြင့်အများဆုံးဖြစ်ပြီး၊ ဂျပန်နိုင်ငံမှ ရင်းနှီးမြှုပ်နှံ မှုပမာဏ အမေရိကန်ဒေါ်လာ ၅၁၆ ဒသမ ၄၂၉ သန်းဖြင့် ဒုတိယ၊ စင်ကာပူနိုင်ငံမှ ရင်းနှီးမြှုပ်နှံမှုပမာဏ အမေရိကန်ဒေါ်လာ ၄၄၂ ဒသမ ၂၀၂ သန်းဖြင့် တတိယ အများဆုံး ရင်းနှီးမြှုပ်နှံထားကြောင်း သိရပါတယ်။

မြန်မာနိုင်ငံမှ ထွက်ခွာသွားခဲ့သည့် စီးပွားရေးလုပ်ငန်းရှင်များသည် ပြီးခဲ့သည့် ၂၀၂၁ ခုနှစ် မေလမှစ၍ ပြန်ဝင်လာခဲ့ကြသည်မှာ ရင်းနှီးမြှုပ်နှံမှုနှင့် နိုင်ငံခြားစီးပွား ဆက်သွယ်ရေးဝန်ကြီး ဌာနအနေဖြင့် Business visa ထောက်ခံဆောင်ရွက်ပေးပြီး Relief Flight များဆောင်ရွက်ပေးခဲ့သည့် ကုမ္ပဏီပေါင်း ၃၂၀၀ ကျော်ရှိကာ နိုင်ငံခြားသားအရေ အတွက်အားဖြင့် ၉၀၁၀ ရှိပြီး၊ ပြည်ပနိုင်ငံကြီးများ၏ ဖိအားပေးမှုကြောင့် ထွက်ခွာသွားသည့် ကုမ္ပဏီကြီးများရှိသကဲ့သို့ အသစ်ဝင်လာသည့် ကုမ္ပဏီများလည်း ရှိတယ်လို ပြည်ထောင်စုဝန်ကြီးက သတင်းထောက်ကို ဖြေကြားခဲ့ပါတယ်။

ymg-mnn
#Yangon_Media_Group 

 #LocalNews
Published -24 Feb 2022
ရန်ကုန်တိုင်းဒေသကြီးတာမွေနှင့်မြောက်ဥက္ကလာပမြို့နယ်တို့ တွင် ငွေကျပ်သိန်း၆၀၀ကျော်တန်ဖိုးရှိစိတ်ကြွရူးသွပ်ဆေးပြားဖမ်းဆီးရမိခဲ့တယ်လို့ မူးယစ်ဆေးဝါးတားဆီးနှိမ်နှင်းရေးရဲတပ်ဖွဲ့ ကနေသိရပါတယ်။

ဖြစ်စဥ်မှာဖေဖော်ဝါရီလ ၂၃ ရက်နေ့ ၄နာရီ မိနစ်၃၀အချိန် ရန်ကုန်တိုင်းဒေသကြီးရဲတပ်ဖွဲ့ မှတပ်ဖွဲ့ဝင်များနှင့် လုံခြုံရေးတပ်ဖွဲ့ဝင်များ ပါဝင်သော ပူးပေါင်းအဖွဲ့သည် သတင်းအရ သက်သေများနှင့်အတူ တာမွေမြို့နယ်၊ တာမွေကြီး(က+ဂ)ရပ်ကွက်နေ ခင်မောင်စိုး(ခ)အာဂျူမူလ္လာ နေအိမ်အား ဝင်ရောက်ရှာဖွေရာ ၎င်းအားနေအိမ်တွင်တွေ့ရှိပြီး နေအိမ်အတွင်းမှ စိတ်ကြွရူးသွပ်ဆေးပြား ၂၁၀၀၀ ပြား(ဒေသကာလပေါက်ဈေးတန်ဖိုးငွေကျပ်သိန်း ၂၁၀)အား တွေ့ရှိသိမ်းဆည်း ရမိခဲ့သဖြင့် ခင်မောင်စိုး(ခ)အာဂျူမူလ္လာ(၂၇)နှစ်အား တာမွေမြို့ မရဲစခန်းတွင် မူးယစ်ဆေးဝါးနှင့်စိတ်ကိုပြောင်းလဲ စေသောဆေးဝါးများဆိုင်ရာဥပဒေအရ အမှုဖွင့်အရေးယူထားရှိပြီး ကွင်းဆက်များ ဖော်ထုတ်လျက်ရှိတယ်လို့ သိရပါတယ်။

ထို့အပြင်ဖေဖော်ဝါရီလ ၂၂ ရက်နေ့ ကလည်း မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့၀င်များပါ၀င်သော ပူးပေါင်းအဖွဲ့သည် သတင်းအရ သက်သေများနှင့်အတူ မြောက်ဥက္ကလာပမြို့နယ်၊ ရွှေပေါက်ကံ(၁၄/၈)ရပ်ကွက်၊ ဟံသာ၀တီလမ်းနှင့် ရာဇဓိရာဇ်(၃)လမ်းထောင့်အနီးတွင် ကျော်ကျော်မင်း မောင်းနှင်လာသည့် မော်တော်ဆိုင်ကယ် အားရပ်တန့်စစ်ဆေးရှာဖွေရာ ၎င်းထံမှ စိတ်ကြွရူးသွပ်ဆေးပြား ၄၀၀၀၀ ပြား(ဒေသကာလပေါက်စျေးတန်ဖိုး ငွေကျပ်သိန်း ၄၀၀)နှင့် လက်ကိုင်ဖုန်း ၁ လုံးတိုအား တွေ့ရှိသိမ်းဆည်းရမိခဲ့တယ်လို့ သိရပါတယ်။

ထပ်မံစစ်ဆေးဖော်ထုတ်ချက်အရ စိတ်ကြွ ရူးသွပ်ဆေးပြားများအား အဆိုပါရပ်ကွက် ညောင်ဦးလမ်းနေ ကျော်လင်းခိုင် ထံမှ ၀ယ်ယူခဲ့ကြောင်း ပေါ်ပေါက်ကာကျော်လင်းခိုင် ၏ နေအိမ်အား ၀င်ရောက်ရှာဖွေရာ ၎င်းအားမတွေ့ရှိဘဲ နေအိမ်အတွင်းမှ ICE (မက်သ်အဖက်တမင်း)အလေးချိန် ၃၅ ဂရမ်(ဒေသကာလပေါက်စျေးတန်ဖိုးငွေကျပ် ၁၂.၂၅ သိန်း)အား ထပ်မံ တွေ့ရှိသိမ်းဆည်းရမိခဲ့သဖြင့် ကျော်ကျော်မင်း(၄၂)နှစ် နှင့် ကျော်လင်းခိုင် တိုအား ရွှေပေါက်ကံနယ်မြေရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အမှုဖွင့်အရေးယူထားရှိပြီး ကွင်းဆက်များ ဖော်ထုတ်လျက်ရှိတယ်လို့သိရပါတယ်။
ymg/hm

#Yangon_Media_Group 

#LocalNews
Published - 24 Feb 2022

ဒေါ်အောင်ဆန်းစုကြည်၏ သက်တော်စောင့် ချယ်ရီထက် အတွက် ထွက်ဆိုကြမည့်သက်သေများ ယနေ့ ဖေဖော်ဝါရီလ ၂၄ ရက်တွင် မလာရောက်သည့်အတွက် စစ်ဆေးမှု မပြုလုပ်ခဲ့ရကြောင်း ယင်း၏ ရှေ့နေက YMG ကို ပြောသည်။

"ချယ်ရီထက်ဘက်က သက်သေထွက်မယ့်သူတွေ ဒီနေ့ မလာကြဘူး။ဒါကြောင့် နောက်တစ်ပတ်ကို ချိန်းဆိုလိုက်ပါတယ်။သူ့ဘက်က စာရင်းပေးထားတဲ့ သက်သေ ၄ ယောက် ရှိပါတယ်" ဟု ရှေ့နေက ဆိုသည်။

ပြီးခဲ့သည့် ဖေဖော်ဝါရီလ ၁၇ ရက် ရုံးချိန်းတွင် ချယ်ရီထက်က မိမိအနေဖြင့် ပြစ်မှုမြောက်စေသည့်ကိစ္စများ မလုပ်ခဲ့ကြောင်း သူ့ကို စွဲဆိုထားသော ဆူပူစေရန်လှုံ့ဆော်မှု ရာဇသတ်ကြီးဥပဒေပုဒ်မ ၅၀၅-က နှင့် ပတ်သက်၍ တရားခွင်တွင် ပြောဆိုခဲ့သည်။

ချယ်ရီထက်ကို ပြီးခဲ့သည့် ဇန်နဝါရီလ ၁၃ ရက်တွင် ပုဒ်မ ၅၀၅ (က) အမှုအတွက် အပြစ်ရှိကြောင်းစွဲချက်တင်ခဲ့ခြင်းလည်း ဖြစ်သည်။

၂၀၂၁ ခုနှစ် ဇွန်လက NLD ပါတီရဲ့ ဘီးလင်းမြို့ နယ် လွှတ်တော်အမတ် ဒေါ်သီရိရတနာက တောတွင်းစခန်းချနေပုံ ၊လက်နက်ကိုင်ဆောင်ထားသည့်မှတ်တမ်းဓာတ်ပုံများ၊ NUG ၏ သတင်းထုတ်ပြန်ချက်များ ၊ပြည်ပသတင်းဌာနများ၏သတင်းရုပ်သံဖိုင်များ စသည်တို့ ကို အပြန်အလှန်ပေးပို့ ခဲ့ကြသည်ဆိုကာ ရဲတပ်ဖွဲ့ က ချယ်ရီထက်ကို အမှုဖွင့်ခဲ့ခြင်းဖြစ်သည်။ယခုအခါ ချယ်ရီထက်ကို ရဲစည်းကမ်းထိန်းသိမ်းရေး ဥပဒေ ဖြင့် ထောင်သုံးနှစ်ချထားကြောင်းလည်း သိရသည်။

ymg/mt
#Yangon_Media_Group

#LocalTravel
Published 24 Feb 2022

ပဲခူးတိုင်းဒေသကြီးအတွင်း သဘာဝအခြေခံခရီးသွားလုပ်ငန်းများ ၊ ဒေသအခြေပြု ခရီးသွား လုပ်ငန်း ၊ လူထုအခြေပြု ခရီးသွားလုပ်ငန်းသစ်များကို ဖော်ထုတ်သွားမည် ဖြစ်ကြောင်း ပဲခူးတိုင်းဒေသကြီး အစိုးရအဖွဲ့ က သိရသည်။

"ဟိုတယ်နှင့်ခရီးသွားလာရေးဝန်ကြီးဌာနနဲ့ ပူးပေါင်းပြီးတော့ ပြီးခဲ့တဲ့လက ပျူမြို့ဟောင်း ခရီးသွားလုပ်ငန်း မြှင့်တင်နိုင်ရေး အပျော်တမ်း စက်ဘီးစီးပွဲတော်ကို လုပ်ခဲ့တယ်။အခုသဘာဝအခြေခံ ခရီးသွားလုပ်ငန်းတွေ၊ ဒေသအခြေပြုခရီးသွား လုပ်ငန်းတွေနဲ့ လူထုအခြေပြု ခရီးသွားလုပ်ငန်းသစ်တွေကို ဖော်ထုတ်ဖို့ လုပ်နေတယ်။ ဒေသတွင်း ခရီးသွားလုပ်ငန်း ဖွံ့ ဖြိုးလာရင် ဟိုတယ်လုပ်ငန်း၊ စားသောက်ကုန်လုပ်ငန်း၊ သယ်ယူပို့ ဆောင်ရေးလုပ်ငန်း ၊ အခြားဝန်ဆောင်မှုလုပ်ငန်းတွေလည်း ကျွဲကူးရေပါဆိုသလို ဖြစ်လာမှာပေါ့ ၊ အလုပ်အကိုင်အခွင့်အလမ်းတွေလည်း ရလာမှာပဲလေ"ဟု အစိုးရအဖွဲ့ တာဝန်ရှိသူက ပြောသည်။

ပြီးခဲ့သည့် ဇန်နဝါရီလက ပဲခူးတိုင်းဒေသကြီးအတွင်း အပျော်တမ်း စက်ဘီးစီးပွဲတော်ကို အားကစားသမား ၃၅၀ ကျော်ဖြင့် ကျင်းပပေးခဲ့ခြင်း ဖြစ်သည်။

ပဲခူးတိုင်းဒေသကြီးအတွင်း ဟိုတယ်လုပ်ငန်းရှင်များ၊ ဧည့်လမ်းညွှန်များနှင့် ဟိုတယ်ဝန်ဆောင်မှုဝန်ထမ်းများ ၉၅ ရာခိုင်နှုန်းကျော်ကို ကိုဗစ်-၁၉ ရောဂါ ကာကွယ်ဆေးထိုးနှံပေးခဲ့ပြီးဖြစ်ကြောင်း၊ကိုဗစ်-၁၉ ရောဂါ ကာလအလွန် ခရီးသွားလုပ်ငန်းများ ဖွံ့ ဖြိုးတိုးတက်စေရန်အတွက် ခရီးစဉ်ဒေသများ သန့်ရှင်းသပ်ရပ်စေရေး၊ လမ်းညွှန်ဆိုင်းဘုတ်များ စနစ်တကျ တပ်ဆင်ထားနိုင်ရန်နှင့် Public Toilet များ နိုင်ငံတကာအဆင့်မီမြှင့်တင်နိုင်ရေး ကြိုတင်ပြင်ဆင်လည်း စီစဉ်နေကြကြောင်း သိရသည်။

ပဲခူးတိုင်းဒေသကြီးအတွင်း ၂၀၂၁ ခုနှစ် ဖေဖော်ဝါရီလမတိုင်မီက ဟိုတယ်၊ တည်းခိုရိပ်သာ ၇၇ ခုနှင့် အခန်း ပေါင်း ၂၂၇၂ ခန်းရှိခဲ့ရာ ယခုအခါ ဟိုတယ်၊တည်းခိုရိပ်သာ ၈၈ လုံးနှင့် အခန်းပေါင်း ၂၅၉၉ ခန်း ရှိခဲ့ပြီး ဖြစ်ကြောင်း၊ဟိုတယ်၊ တည်းခိုရိပ်သာ ၁၁ ခုနှင့် အခန်းပေါင်း ၃၂၇ ခန်းပိုလာခြင်းဖြစ်ပြီး ကျန်းမာရေးဝန်ကြီးဌာန၏ ကိုဗစ်-၁၉ ရောဂါ ကြိုတင်ကာကွယ်ရေး စည်းကမ်းချက်များနှင့်အညီ ဖွင့်လှစ်ကြရန် သက်ဆိုင်ရာမှ စစ်ဆေး ဆောင်ရွက်သွားမည်ဖြစ်ကြောင်းလည်း သိရသည်။

ymg/mt
#Yangon_Media_Group