#DailyNews
Published _ 13 October 2022

၁။ တိုက်ခိုက်မည်ဆိုသည့်စကားထက် ဆွေးနွေးခြင်းက ပဋိပက္ခကိုလျော့ကျစေ၍ EAO များနှင့်ဆုံတွေ့ရန် RCSS ကမ်းလှမ်းချက်ကို ကြိုဆိုဟု PPST ဆို

၂။ မြို့ပတ်ရထားများ စီးနင်းမည့် ခရီးသည်နည်းပါးနေဟု ရုံပိုင်ချုပ်ကြီးပြော

၃။ မြန်မာ-ထိုင်းနယ်စပ်ကုန်သွယ်ရေး ယခင်နှစ်ထက် ကန်ဒေါ်လာ ၂၈၄ သန်းကျော်မြင့်တက်လာ

၄။ ရှေးရိုးစွဲဆော်ဒီအာရေဗျနိုင်ငံတွင် အမျိုးသမီးငယ်များ တိုင်ဖက်အကသင်ယူလာကြ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Local_News
Published_13 October 2022

ယနေ့ အောက်တိုဘာလ( ၁၃ ရက်နေ့ ) ထိ ရန်ကုန်မှာ ရောင်းချပေးနေတဲ့ မီးလင်းရွှေအတုံးအခဲ (၁၂) ပိဿာကျော်ချခဲ့ပြီးဖြစ်တယ်လို့ ရန်ကုန်တိုင်းရွှေလုပ်ငန်းရှင်များအသင်းဥက္ကဋ္ဌ ဦးမျိုးမြင့်က YMG ကိုပြောပါတယ်။

#Yangon_Media_Group

#Local_News
Published_12 October 2022

တရုတ်နိုင်ငံ ယူနန်ပြည်နယ် တယ်ဟုန်ခရိုင် ချန်းဖုန်းမြို့နယ် လားရင်းနဲ့ ထိစပ်နေတဲ့ ကချင်ပြည်နယ် ဗန်းမော်ခရိုင် (မိုးမောက်) လွယ်ဂျယ်မြို့က နှစ်နိုင်ငံကုန်သွယ်ရာ လွယ်ဂျယ် - လားရင်း နယ်စပ်လမ်းကြောမှာ ကိုဗစ်စစ်ဆေးတဲ့လုပ်ငန်းကို ထပ်တိုးလုပ်ဆောင်လိုက်ပါတယ်။

#Yangon_Media_Group

#Local_News
Published_13 October 2022

ထားဝယ်အထူးစီးပွားရေးဇုန်ကို ရင်းနှီးတည်ဆောက်သူအသစ် ထပ်မံဖိတ်ခေါ်နိုင်ရေး နိုင်ငံတကာလုပ်ထုံးလုပ်နည်းတွေနှင့်အညီ ဆောင်ရွက်မည်ဟု အထူးစီးပွားရေးဇုန်ဆိုင်ရာ ဗဟိုအဖွဲ့ဥက္ကဋ္ဌအဖြစ် တာဝန်ယူထားသည့် ဒုတိယဗိုလ်ချုပ်မှူးကြီးစိုးဝင်းက ပြောသည်။

အဆိုပါ ထားဝယ်အထူးစီးပွားရေးဇုန်(SEZ)ကို ၂၀၀၈ ခုနှစ်တွင် စတင်အကောင်အထည်ဖော်ခဲ့သော်လည်း သိသာထင်ရှားသည့် တိုးတက်မှုများ မရှိခဲ့သည့်အတွက် ရင်းနှီးတည်ဆောက်သူအဖြစ် ရွေးချယ်ခဲ့သော အီတာလျံ-ထိုင်းကုမ္ပဏီ (ITD) ကို စာချုပ်ရပ်ဆဲခြင်း ပြုလုပ်ထားပြီးဖြစ်ကြောင်း ထည့်သွင်းပြောကြားခဲ့သည်။

မြန်မာနိုင်ငံတွင် အထူးစီးပွားရေးဇုန် သုံးခုကိုအကောင်အထည်ဖော်ဆောင်ရွက်လျက်ရှိပြီး သီလဝါအထူးစီးပွားရေးဇုန်ကို ဂျပန်နိုင်ငံနှင့်လည်းကောင်း၊ ကျောက်ဖြူအထူးစီးပွားရေးဇုန်ကို တရုတ်နိုင်ငံနှင့်လည်းကောင်း၊ ထားဝယ်အထူးစီးပွားရေးဇုန်ကို ထိုင်းနိုင်ငံနှင့်လည်းကောင်း ပူးပေါင်းအကောင်အထည်ဖော်ဆောင်ရွက်နေကြောင်း သိရသည်။

ယင်းတွင် ထားဝယ်အထူးစီးပွားရေးဇုန်စီမံကိန်းသည် ကြန့်ကြာမှုရှိခြင်း၊ ဘဏ္ဍာရေးဆိုင်ရာ တာဝန်များကို ပျက်ကွက်ခြင်း၊ ဘဏ္ဍာငွေ အထောက်အထား မတင်ပြနိုင်ခြင်းအစရှိသည့် အချက်များကြောင့် ITD နှင့် ကနဦးအဆင့် စီမံကိန်းလုပ်ငန်း (၉)ခုအတွက် ချုပ်ဆိုထားသည့် လုပ်ငန်းဆောင်ရွက်ခွင့် စာချုပ်အားလုံးကို ၂၀၂၀ နှစ်ကုန်ပိုင်းကတည်းက ဖျက်သိမ်းခဲ့ခြင်းဖြစ်ကြောင်း သိရသည်။

အဆိုပါ SEZ ကို ကနဦးနှင့် ပင်မစီမံကိန်းဟု အပိုင်း (၂)ပိုင်းခွဲထားပြီး ကနဦးအဆင့်တွင် ကန်ဒေါ်လာ (၁)ဘီလီယံတန် စက်မှုဇုန်၊ ဓါတ်အားပေးစက်ရုံ၊ ဆိပ်ကမ်းငယ်၊ LNG ဓာတ်ငွေ့ရည်ဆိပ်ကမ်း အပါအဝင် အခြေခံအဆောက်အအုံများ တည်ဆောက်သွားရန် လျာထားကြောင်းသိရသည်။

#ymg/sth
#Yangon_Media_Group

#Local_News
Published _ 13 october 2022

ပြင်ဦးလွင်မြို့ရှိ နေအိမ်တစ်အိမ်၌ လူသတ်မှုဖြစ်ပွားခဲ့ပြီး တစ်ဦး သေဆုံးကာ သုံးဦးဒဏ်ရာရရှိခဲ့ကြောင်း ပြင်ဦးလွင်မြို့ လူမှုကူညီကယ်ဆယ်ရေးအသင်းတစ်ခုထံမှ သိရှိရသည်။

ယနေ့ နံနက်ပိုင်းတွင် မန္တလေးတိုင်း၊ ပြင်ဦးလွင်မြို့၊ ရေချမ်းအိုး (မြောက်) ပါရမီလမ်းရှိ နေအိမ်တစ်အိမ်အတွင်း ထိုးသွင်းဒဏ်ရာများဖြင့် သေဆုံးနေသူတစ်ဦးနှင့် ဒဏ်ရာရထားသူ သုံးဦးတွေ့ရှိသည့်အတွက် ဆေးရုံကြီးသို့ ပို့ဆောင်ထားကြောင်း ပြင်ဦးလွင် (အခမဲ့) နာရေးကူညီမှုအသင်းက ၎င်း၏ လူမှုကွန်ယက်စာမျက်နှာမှာ အသိပေးထားသည်။

အဆိုပါဖြစ်စဉ်နှင့်ဆက်လျဉ်း၍ YMG မှ ဆက်သွယ်မေးမြန်းရာ ပြင်ဦးလွင် နာရေးကူညီမှုအသင်းရဲ့ ပြောကြားချက်အရ " ဖြစ်စဉ်အတိအကျကိုအတည်ပြုနိုင်ခြင်းမရှိသေးပါဘူး။ အဲ့ကိစ္စနဲ့ပတ်သတ်ပြီး အစည်းအဝေး ပြုလုပ်နေဆဲပါ" ဟု ပြန်လည်ဖြေကြားခဲ့သည်။

ဒေသခံများမှလည်း နေအိမ်အတွင်း သူခိုးဝင်ရောက်ရာမှ တစ်ဆင့်အိမ်ရှင် အမျိုးသားဖြစ်သူ အသတ်ခံရတာဖြစ်ကြောင်း မှတ်ချက်ပေးကြသော်လည်း တိတိကျကျ အတည်ပြုနိုင်ခြင်း မရှိသေးပါဘူး။

ပြီးခဲ့သည့် စက်တင်ဘာလကလည်း ပြင်ဦးလွင်မြို့၊ အောင်ချမ်းသာကျေးရွာအုပ်စု၊ စည်ကားကျေးရွာ (၃)လမ်းရှိ ကြက်ခြံတစ်ခြံ၌ အမျိုးသမီး ငါးဦး မိသားစုလိုက် အသတ်ခံရသည့်ဖြစ်စဉ်တစ်ခုလည်း ဖြစ်ပွားခဲ့ကြောင်း သိရသည်။

#ymg/NN
#Yamgon_Media_Group

#Local_News
Published_ 13 October 2022

မြန်မာနိုင်ငံမှထုတ်လုပ်သော ကားတာယာများကို ဘရာဇီးလ်နိုင်ငံအခြေစိုက် Sunamerica ကုမ္ပဏီက ဝယ်ယူတင်သွင်းလိုကြောင်း ကမ်းလှမ်းမှုတွေ ပြုလုပ်လာကြောင်း မြန်မာကုန်သွယ်မှုမြှင့်တင်ရေးအဖွဲ့မှ သိရပါတယ်။

မြန်မာနိုင်ငံကထုတ်လုပ်တဲ့ ကားတာယာတွေ အထူးသဖြင့် အချင်းဝက် ၁၃ လက်မ၊ ၁၄ လက်မနဲ့ ထရပ်ကားတာယာတွေကို ဝယ်ယူဖို့စိတ်ဝင်စားကြောင်း ဆော်ပိုလိုမြို့ အခြေစိုက် ကုမ္ပဏီက ကမ်းလှမ်းထားတယ်လို့ ဆိုပါတယ်။

အဆိုပါ ကုမ္ပဏီက The National Institute of Metrology Quality and Technology အသိအမှတ်ပြု လက်မှတ်ရရှိထားပြီး သီရိလင်္ကာ၊ တရုတ်၊ ပါကစ္စတန်နိုင်ငံတို့မှ မော်တော်ဆိုင်ကယ်နဲ့ စက်ဘီးတာယာတွေကို တင်သွင်းနေတဲ့ ကုမ္ပဏီဖြစ်ပါတယ်။

မြန်မာနိုင်ငံမှ ကားတာယာထုတ်လုပ်တဲ့ စက်ရုံတွေအနေနဲ့ ဘရာဇီးလ်နိုင်ငံကို တာယာတင်ပို့လိုတယ်ဆိုရင် ပူးပေါင်းဆောင်ရွက်နိုင်တယ်လို့ ဆိုပါတယ်။

ဒါ့ကြောင့် စိတ်ဝင်စားတဲ့ကုမ္ပဏီတွေအနေနဲ့ ကားတာယာတွေ တင်ပို့ရောင်းချလိုပါက မြန်မာကုန်သွယ်မှုမြှင့်တင်ရေးအဖွဲ့၊ ကုန်သွယ်မှုဖွံ့ဖြိုးရေးဌာနခွဲ ဖုန်း ၀၆၇-၃၄၀၈၆၂၂ ၊ ၀၆၇-၃၄၀၈၆၂၃ တို့ကို ချိတ်ဆက်ဆောင်ရွက်နိုင်တယ်လို့ ကြေညာထားပါတယ်။

#ygm_mnn
#Yangon_Media_Group