#Local_News
Published_19 October 2022

မြို့တွင်းပြေးဆွဲနေသည့် YBS ယာဉ်လိုင်းများ၏ ယာဉ်စီးခနှုန်းထားကို ခရီးစဉ်မှတ်တိုင်အလိုက် ကျပ် ၄၀၀ အထိကောက်ခံခွင့်ပြုထားကြောင်း YRTC မှ တွဲဖက်အတွင်းရေးမှူး ဦးလျန်ကျင့်မာန်ကပြောသည်။

YBS ခရီးသည်တင်ယာဉ်လိုင်းအများစုသည် အောက်တိုဘာ ၁ ရက်မှစတင်၍ ယာဉ်စီးခကို ၄၀၀ ကျပ်သို့ တိုးမြှင့်ကောက်ခံနေခြင်းဖြစ်ကြောင်း သိရသည်။ YRTC အနေဖြင့် ယာဉ်စီးခကို ခရီးစဉ်မှတ်တိုင်အရေအတွက်လိုက် ကောက်ခံခွင့်ပြုထားခြင်းဖြစ်ကြောင်း သိရသည်။

“ဒါကတိုးကောက်တယ်လို့ ပြောလို့တော့မရဘူး။ ခရီးစဉ်အစ/အဆုံးကို ၄၀၀ အထိကောက်ခံခွင့်ပြုထားတယ်။ အကုန်လုံးကဈေးတက်နေတော့ YBS ယာဉ်လိုင်းတွေလည်း အခက်အခဲတွေရှိတယ်။ ဒါကြောင့်ခွင့်ပြုထားတာပါ။ အဲဒီထက်ပိုကောက်တယ်ဆိုရင်တော့ အရေးယူဆောင်ရွက်သွားမှာပါ”ဟု YRTC မှ တွဲဖက်အတွင်းရေးမှူး ဦးလျန်ကျင့်မာန်ကပြောသည်။

လက်ရှိအချိန်ထိ ယာဉ်စီးခပိုမိုကောက်ခံသည့် YBS ယာဉ်လိုင်းပေါင်း ၅၀၀ ကျော်ကို အရေးယူဆောင်ရွက်ထားကြောင်း သိရသည်။ ရန်ကုန်မြို့တွင်း၌ နေ့စဉ်ယာဉ်လိုင်းပေါင်း ၁၁၆ လိုင်း၊ ယာဉ်အစီးရေ ၃၂၅၀ စီးပုံမှန်ပြေးဆွဲပေးနေပြီး ခရီးသည် ၁၃ သိန်းဝန်းကျင်ကို နေ့စဉ်ပို့ဆောင်ပေးနေကြောင်း၊ ယင်းအပြင် YPS ကတ်စနစ်ဖြင့်စီးနင်းသူခရီးသည်ဦးရေမှာ ငါးသောင်းပတ်ဝန်းကျင်ရှိကြောင်းသိရသည်။

“ YBS ယာဉ်စီးခက တစ်လိုင်းနဲ့တစ်လိုင်းကောက်တာမတူဘူး။ အဲဒီတော့ ကတ်နဲ့စီးရတာက ပိုအဆင်ပြေတော့ ကတ်နဲ့ပဲစီးဖြစ်တော့တယ်။ ယာဉ်လိုင်းအားလုံးတော့ ကတ်စနစ်က မရသေးဘူး။ အခုအားလုံးက အစစအရာရာဈေးတက်နေတော့လည်း ဘာမှတော့ မပြောလိုပါဘူး”ဟု YBS စီးသည့်ခရီးသည်တစ်ဦးက ပြောသည်။

#ymg/sth
#Yangon_Media_Group

#Local_News
Published_19 October 2022

ရန်ကုန်တိုင်းဒေသကြီး၊ အင်းစိန်မြို့နယ်၊ အင်းစိန်ဗဟိုအကျဉ်းထောင်၌ ပေါက်ကွဲမှုဖြစ်ပွား၍ အကျဉ်းဦးစီးဌာနမှ ဝန်ထမ်းအချို့နှင့် အပြစ်မဲ့အရပ်သားပြည်သူ ၈ ဦး သေဆုံးကာ ၁၈ ဦးဒဏ်ရာရခဲ့ကြောင်း နစက သတင်းထုတ်ပြန်ရေးအဖွဲ့က သိရသည်။

ယနေ့အောက်တိုဘာလ နံနက် ၉ နာရီ ၄၀ မိနစ်အချိန်ခန့်က အဆိုပါဗဟိုအကျဉ်းထောင်၏ ဝင်ထွက်ဂိတ်ပေါက်ရှိ အကျဉ်းသားများအတွက် ပါဆယ်ထုပ်လက်ခံသည့် အဆောက်အဦအတွင်းနှင့် အပြင်ဘက်တို့တွင် အကြမ်းဖက်သမားများ၏ ပါဆယ်ထုပ်များအတွင်း မိုင်းများထည့်သွင်းဖောက်ခွဲခဲ့မှုကြောင့် ပေါက်ကွဲမှုများဖြစ်ပွားခဲ့ခြင်းဖြစ်ကြောင်း ယင်းထုတ်ပြန်ချက်တွင် ဖော်ပြထားသည်။

အဆိုပါ ပေါက်ကွဲမှုများကြောင့် အခင်းဖြစ်နေရာအနီးရှိ အကျဉ်းထောင်တပ်သားများဖြစ်သည့် ကျော်ဇင်ဦး၊ ချစ်မိုးဝေနှင့် ပိုးအိစံ၊ အကျဉ်းသားများအတွက် ပါဆယ်ထုပ်လာရောက်ပေးပို့သူများဖြစ်ကြသည့် ဒေါ်သင်းသင်းချို(၅၄)နှစ်၊ မယွန်းမီမီကျော်(၁၀)နှစ်၊ ဒေါ်သိန်းကြွယ်(၅၆)နှစ်နှင့် စိစစ်ဆဲ အမျိုးသမီး ၂ ဦး၊ စုစုပေါင်း ၈ ဦး တို့ မိုင်းစထိမှန်ဒဏ်ရာများရရှိကာ အခင်းဖြစ်နေရာ၌ သေဆုံးသွားခဲ့ကြကြောင်း သိရသည်။

ယင်းအပြင် အကျဉ်းထောင် လက်ထောက်ကြီးကြပ်ရေးမှူး(၁) ဒေါ်သိင်္ဂီဝင်းမြင့်၊ အကျဉ်းထောင်တပ်သား ဇေယျာခင်စိုး၊ ထွန်းထွန်းနိုင်၊ သူရိန်ထွေး၊ သဒ္ဒါဖူးကိုကိုနှင့် အကျဉ်းသားများအတွက် ပါဆယ်ထုပ်လာရောက်ပေးပို့ သူများဖြစ်ကြသည့် မောင်ဖြိုးသူလျှံ (ခ)ပိုင်ပိုင်(၉)နှစ်၊ ကိုရန်နိုင်(၃၅)နှစ်၊ ကိုစည်သူအောင်(၃၈)နှစ်၊ မောင်ပြည့်စုံဖြိုး(၁၇)နှစ်၊ ကိုထက်နိုင်ထွန်းရှိန်(၃၃)နှစ်၊ ဒေါ်ဇာခြည်လွင်(ခ)မလုံးစီ(၄၃)နှစ်၊ မအေးစန္ဒာစိုး(၂၁)နှစ်၊ ဒေါ်မျိုးပပဝင်း(၄၁)နှစ်၊ မမေသွန်းနဒီနိုင်(၁၇)နှစ်၊ ဒေါ်နော်ဝါးဖော(၅၀)နှစ်၊ မဆွေသူအောင်(၂၉)နှစ်၊ မဇင်မာဝင်း(၃၄)နှစ်၊ ဒေါ်မိုးသီတာ(၅၃)နှစ် စုစုပေါင်း ၁၈ ဦးတွင် မိုင်းစ ထိမှန် ဒဏ်ရာများအသီးသီးရရှိခဲ့ကြကြောင်း သတင်းထုတ်ပြန်ချက်တွင် ဖော်ပြထားသည်။

ယခုအခါ ထိခိုက်ဒဏ်ရာရရှိသူများအား အင်းစိန်မြို့နယ် ပြည်သူ့ဆေးရုံသို့ ပို့ဆောင်ထားရှိကာ လိုအပ်သော ဆေးဝါးကုသမှုများ ဆောင်ရွက်ပေး လျက်ရှိကြောင်း၊ လုံခြုံရေးတပ်ဖွဲ့ဝင်များက ပေါက်ကွဲမှုဖြစ်ပွားသည့်နေရာအား မိုင်းရှင်းလင်းရေးများဆောင်ရွက်ခဲ့ရာ ပေါက်ကွဲမှုဖြစ်ပွားခဲ့သည့် အဆောက်အဦအတွင်းမှ ကြွပ်ကြွပ်အိတ်ဖြင့် ထုပ်ပိုးထားသည့် ပါဆယ်ထုပ်အတွင်းမှ လက်လုပ်မိုင်းတစ်လုံးကို ထပ်မံတွေ့ရှိသိမ်းဆည်းရမိခဲ့ကြောင်းလည်း သိရသည်။

#ymg/mt
#Yangon_Media_Group

 #LocalNews

Published _19 October 2022

CHINA (HONGKONG MACAU) ENTERPRISE ASSOCIATION IN MYANMAR က ရွှေပြည်သာမြို့နယ်နှင့် လှိုင်သာယာမြို့နယ် အခြေခံပြည်သူများအား ဆန်အိတ် ၃၀၀၀ ကျော် လှူဒါန်းခဲ့ကြကြောင်း အဆိုပါ အသင်းက သိရသည်။

"ကျွန်တော်တို့က ရွှေပြည်သာမှာ ဆန်အိတ်(၁၅၅ဝ)၊လှိုင်သာယာမြို့နယ်(အရှေ့ပိုင်း)မှာ ဆန်အိတ်(၇၇၅) ၊လှိုင်သာယာမြို့နယ် (အနောက်ပိုင်း)မှာ ဆန်အိတ်(၇၇၅) ကိုပြီးခဲ့တဲ့ ရက်က လှူဒါန်းခဲ့ပါတယ်။ အဲဒီဆန်တွေကို ရန်ကုန်တိုင်းဒေသကြီးအစိုးရအဖွဲ့ ရဲ့ ခွင့်ပြုချက်နဲ့သက်ဆိုင်ရာမြို့နယ်စီမံအုပ်ချုပ်ရေးရုံးတွေကတစ်ဆင့် အချိုးကျ ခွဲဝေလှူဒါန်းခဲ့တာပါ"ဟု ယင်းအသင်း၏ ဥက္ကဌ MR.YU JIAN CHEN က ပြောသည်။

CHINA (HONGKONG MACAU) ENTERPRISE ASSOCIATION IN MYANMAR အသင်းဥက္ကဋ္ဌ Mr Yu Jian Chen အနေဖြင့် ကိုယ်ပိုင်ဆန်အိတ် (၁၄၀၀)၊ CHINA HONGKONG MACAU ENTERPRISE ASSOCIATION IN MYANMAR အသင်းအဖွဲ့ဝင် (၁၆)ဦးအနေဖြင့် ဆန်အိတ် (၁၇၀၀) စုစုပေါင်းဆန်အိတ် (၃၁၀၀) တို့ကို လှူဒါန်းခဲ့ကြခြင်း ဖြစ်ကြောင်း သိရသည်။

"အခုကာလမှာ ပြည်သူတွေ ကျန်းမာရေး၊ စီးပွားရေး ကျပ်တည်းနေကြတယ်၊ အဓိကအားဖြင့် ရွှေပြည်သာမြို့နယ်နဲ့ လှိုင်သာယာမြို့နယ်တွေမှာ နေထိုင်တဲ့ ပြည်သူတွေထဲမှာ ကျပ်တည်းတဲ့သူတွေ ရှိနေတာကို သိရတာကြောင့် လှူဖြစ်တာပါ"ဟု MR.YU JIAN CHEN က ဆိုသည်။

#ymg/mt
#Yangon_Media_Group

#Local_News
Published_19 October 2022

နိုင်ငံခြားငွေလဲလုပ်ငန်းလုပ်ကိုင်နေသည့် ကုမ္ပဏီတစ်ခု၏ လုပ်ငန်းလိုင်စင်ကို ဗဟိုဘဏ်က ဖျက်သိမ်းလိုက်‌ကြောင်း သတင်းထုတ်ပြန်ထားသည်။

ဗဟိုဘဏ်ခွင့်ပြုလိုင်စင်ရရှိထားသည့် Thomas Khanno ကုမ္ပဏီသည် ငွေလဲလှယ်လုပ်ငန်းလုပ်ကိုင်ရာတွင် နိုင်ငံခြားသုံးငွေ စီမံခန့်ခွဲမှု ဥပဒေ၊ နိုင်ငံခြားသုံးငွေ စီမံခန့်ခွဲမှု စည်းမျဉ်း၊ ညွှန်ကြားချက်၊ လုပ်ထုံး လုပ်နည်းတွေနှင့်အညီ ဆောင်ရွက်ခြင်းမရှိဘဲ နိုင်ငံခြားသုံးငွေ စီမံခန့်ခွဲမှု ဥပဒေကို ဖောက်ဖျက်ခဲ့‌ကြောင်းဗဟိုဘဏ်က ကြေညာထားသည်။

ယင်းသို့ဖောက်ဖျက်မှုကြောင့် လုပ်ငန်းလိုင်စင်ဖျက်သိမ်းလိုက်ခြင်းဖြစ်‌ကြောင်း ဗဟိုဘဏ်ထုတ်ပြန်ချက်တွင် ဖော်ပြထားသည်။

ယင်းအပြင် ပြီးခဲ့သည့်ရက်ပိုင်းအတွင်ကလည်း တရားဝင် ငွေလဲလှယ်ရေးလုပ်ငန်းလိုင်စင်မရှိဘဲ နိုင်ငံခြားငွေ လဲလှယ်ရေး ဆောင်ရွက်နေသည့် လူမှုကွန်ရက် စာမျက်နှာတွေကို အရေးယူဆောင်ရွက်နေကြောင်း ဗဟိုဘဏ်က ထုတ်ပြန်ထားသည်။

#ymg/sth
#Yangon_Media_Group

#Local_News
Published_ 19 October 2022

မွေးရာပါ အူများဝမ်းဗိုက်အပြင်သို့ရောက်ရှိနေသည့် ကလေးငယ်အား စဝ်စံထွန်းပြည်သူ့ဆေးရုံကြီးတွင် အောင်မြင်စွာ ခွဲစိတ်ကုသမှု ဆောင်ရွက်ပေးခဲ့ကြောင်း ကျန်းမာရေးဝန်ကြီးဌာနမှသိရသည်၊၊

မွေးရာပါ အူများ ဝမ်းဗိုက်အပြင်သို့ ရောက်ရှိနေသည့် (Gastroschisis with preterm low birth weight) အသက် (၄)ရက်သား မွေးကင်းစကလေး မိန်းကလေး Baby နန်းမွေဖောင်ကို ၂၀၂၂-ခုနှစ်၊ စက်တင်ဘာလ (၃၀)ရက်နေ့တွင် စဝ်စံထွန်းပြည်သူ့ ဆေးရုံကြီး၌ ပါမောက္ခ(ခွဲစိတ်) ပါမောက္ခ‌‌‌‌ဒေါက်တာအောင်ခိုင်ဇံ၊ လက်ထောက်ဆရာဝန် ဒေါက်တာ ထက်အောင်ကျော်နှင့် ပါမောက္ခ(မေ့ဆေး) ‌ဒေါက်တာဖုန်းမြင့်တို့ ဦးဆောင်သောအဖွဲ့က အူများကို ဝမ်းဗိုက်အတွင်းပြန်လည်ထည့်သွင်းပေးသည့် ခွဲစိတ်ကုသမှု (Primary Closure)ကို အောင်မြင်စွာ ဆောင်ရွက်ပေးခဲ့ခြင်းဖြစ်သည်။

ကိုယ်ဝန်လမစေ့သေးသော်လည်း ရေမွှာပေါက်ခြင်းကြောင့် အဆိုပါကလေးငယ်ကို ၂၀၂၂-ခုနှစ်၊ စက်တင်ဘာလ (၂၆)ရက်နေ့၊ ညနေ (၆:၁၅)နာရီ အချိန်တွင် ရှမ်းပြည်နယ်၊ ခိုလမ်ပြည်သူ့ဆေးရုံ (ခုတင်-၁၀၀)၌ အရေးပေါ်ရိုးရိုးမွေးဖွားပေးခဲ့ခြင်းဖြစ်ပြီး မွေးဖွားချိန်တွင် ကလေးငယ်မှာ ကိုယ်အလေးချိန် (2.2 kg) ရှိခဲ့ပါကြောင်းနှင့် ယင်းနေ့ ည (၈:၀၀)နာရီအချိန်တွင် ခိုလမ်ပြည်သူ့ဆေးရုံမှ ဆေးရုံအုပ် ဒေါက်တာလင်းထင်ကျော်နှင့် အဖွဲ့က ဝမ်းဗိုက်အပြင်ဘက် ရောက်ရှိနေသည့်အူများကို အရေးပေါ်ယာယီကုသမှု ဆောင်ရွက်ပေးခဲ့ကာ စက်တင်ဘာလ(၂၇)ရက်တွင် တောင်ကြီးမြို့၊ စဝ်စံထွန်းပြည်သူ့ဆေးရုံကြီးသို့ လွှဲပြောင်းပေးပိုခဲ့ခြင်း ဖြစ်ကြောင်းသိရသည်၊၊

အဆိုပါ ကလေးငယ်၏ ကျန်းမာရေးအခြေအနေကောင်းမွန်သောကြောင့် အောက်တိုဘာ(၃)ရက်တွင် ဆေးရုံမှဆင်းခွင့်ပြုခဲ့ပြီး အောက်တိုဘာ(၁၁)ရက်တွင် ရက်ချိန်းပြန်လည်ပြသခဲ့ပြီး ကျန်းမာရေးကောင်းမွန်ပါကြောင်း သိရသည်၊၊

#ymg/tthl
#Yangon_Media_Group

#Local_News
Published_ 19 October 2022

လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနဝန်ကြီး ဦးမြင့်ကြိုင်သည် ကုလသမဂ္ဂဒုက္ခသည်များဆိုင်ရာ မဟာမင်းကြီးရုံး (UNHCR) ၏ မြန်မာနိုင်ငံဆိုင်ရာ ဌာနေကိုယ်စားလှယ် Ms. Hai Kyung Jun နှင့်အဖွဲ့ကို အောက်တိုဘာ ၁၈ ရက် မွန်းလွဲပိုင်းတွင် နေပြည်တော်၌ လက်ခံတွေ့ဆုံဆွေးနွေးခဲ့ပါတယ်။

ထိုသို့တွေ့ဆုံစဉ် ဝန်ကြီးဌာနနှင့် UNDP-UNHCR တို့အကြားနားလည်မှုစာချွန်လွှာ လက်မှတ်ရေးထိုး၍ ရခိုင်ပြည်နယ်၊ ဘူးသီးတောင်နှင့် မောင်တောမြို့နယ်များအတွင်း ဒေသခံပြည်သူများအတွက် အကျိုးသက်ရောက်မှု ထိရောက်မြန်ဆန်သည့် လုပ်ငန်းဆိုင်ရာစီမံကိန်းများ အကောင်အထည်ဖော်ဆောင်ရွက်မှု၊ MoU မူဘောင်အရ ရခိုင်ပြည်နယ် ဖွံ့ဖြိုးတိုးတက်ရေးလုပ်ငန်းများ ပူးပေါင်းဆောင်ရွက်နေမှုတို့ကို ဆွေးနွေးခဲ့ပါတယ်။

ရခိုင်ပြည်နယ်မှ နေရပ်စွန့်ခွာသွားသူများ ပြန်လည်လက်ခံရေးအတွက် မြန်မာ-ဘင်္ဂလားဒေ့ရှ် နှစ်နိုင်ငံပူးပေါင်းဆောင်ရွက်နေမှုနှင့်
ယင်းလုပ်ငန်းစဉ်အပေါ် မလိုလားသည့် အဖွဲ့များက နှောင့်ယှက်ဟန့်တားဆောင်ရွက်နေမှုကိုလည်း ပြောကြားခဲ့ပါတယ်။

ထို့ပြင် ရခိုင်ပြည်နယ်အတွင်း လုံခြုံရေးအခြေအနေအရ ဆောင်ရွက်နိုင်သမျှနေရာများကို သွားရောက်ဆောင်ရွက်ခွင့်ရရှိရေး ကူညီဆောင်ရွက်ပေးနိုင်ရေး အခြေအနေများ၊ မောင်တောဒေသတွင် တာဝန်ထမ်းဆောင်နေသည့် UNHCR ဝန်ထမ်းများ နေခွင့်နှင့် ခရီးသွားလာခွင့် ထပ်မံတိုးမြှင့်တင်ပြမှုအပေါ် ခွင့်ပြုပေးနိုင်ရေး အခြေအနေကို ပြောကြားခဲ့ပါတယ်။

မြန်မာနိုင်ငံအနေဖြင့် နေရပ်စွန့်ခွာသွားသူများ ပြန်လည်လက်ခံရေးအတွက်အဆင်သင့်ပြင်ဆင်ဆောင်ရွက်ထားရှိမှုနှင့် ယင်းသို့ဆောင်ရွက်မှုအပေါ် ကုလသမဂ္ဂ အပါအဝင် နိုင်ငံတကာအဖွဲ့အစည်းများသို့ ပြန်လည်ရှင်းလင်းပြောကြားပေးနိုင်ရေး အခြေအနေများနှင့်စပ်လျဉ်း၍ ရင်းနှီးပွင့်လင်းစွာ အမြင်ချင်းဖလှယ်ဆွေးနွေးခဲ့ကြကြောင်း သတင်းရရှိပါတယ်။

#ygm_mnn
#Yangon_Media_Group