၅ ဇန်နဝါရီ ၊၂၀၂၅
အမေရိကန်ရဲ့ ရွေးကောက်ခံသမ္မတ ဒေါ်နယ်ထရမ့်က သူ သမ္မတအဖြစ် ကျမ်းကျိန်မယ့် ဇန်နဝါရီ ၂၀ ရက်နေ့မှာ အမေရိကန်အလံ တိုင်တစ်ဝက်ဆက်လက်လွှင့်ထူထားမယ့်ကိစ္စကို ပြီးခဲ့တဲ့သောကြာနေ့က အပြစ်တင်လိုက်ပါတယ်။
ဒီဇင်ဘာ ၂၉ရက်က ကွယ်လွန်ခဲ့တဲ့ အမေရိကန်သမ္မတဟောင်း ဂျင်မီကာတာအတွက် ဝမ်းနည်းခြင်း အထိမ်းအမှတ်အဖြစ် အမေရိကန်အလံကို ရက်ပေါင်း ၃၀ တိတိ တိုင်တစ်ဝက်လွှင့်ထူဖို့ သမ္မတဘိုင်ဒင်က အမိန့်ထုတ်ပြန်ခဲ့တာ ဖြစ်ပါတယ်။
ဇန်နဝါရီ ၉ရက်နေ့မှာ ဝါရှင်တန်မှာပြုလုပ်မယ့် ကာတာအတွက်အောက်မေ့ဖွယ်အခမ်းအနားသို့ တက်ရောက်မယ်လို့ ကြေညာထားတဲ့ ထရမ့်က သမ္မတအသစ်အဖြစ် သူကျမ်းသစ္စာကျိန်ဆိုနေစဉ်အတွင်း အမေရိကန်အလံ တိုင်တစ်ဝက်လွှင့်ထူထားရှိနေမယ့် အပေါ် သူ့ရဲ့ ထရု ဆိုရှယ်မီဒီယာပေါ်ကနေ သောကြာနေ့က ပို့စ်တစ်ခုရေးတင်ခဲ့ပါတယ်။
“ ဒီမိုကရက်တွေဟာ ကျွန်တော်တို့ရဲ့ အံ့ချီးဖွယ်အမေရိကန်အလံကို ကျွန်တော်ကျမ်းကျိန်နေစဉ်အတွင်း တိုင်တစ်ဝက် ဆက်လွှင့်ထားနိုင်ဖို့အရေး အတော်စိတ်လှုပ်ရှားနေကြတယ်” လို့ ထရမ့်ကရေးခဲ့ပါတယ်။
“ သူတို့က အဲဒါကို သိပ်ကောင်းတယ်ပေါ၊ ပြီးတော့ ဒါကို သိပ်ပျော်နေကြတာ။ သူတို့ ကျွန်တော်တို့ နိုင်ငံကို မချစ်ဘူး။ ကိုယ့်ကိုကိုယ်ပဲချစ်ကြတာ” လို့ထရမ့်ကပြောပါတယ်။
ပြီးခဲ့တဲ့အပတ်က ကာတာသေဆုံးခဲ့ရတဲ့အတွက် အမေရိကန်အလံဟာ အနာဂတ်သမ္မတရဲ့ ကျမ်းကျိန်ပွဲ မှာ ပထမဆုံးအဖြစ် တိုင်တစ်ဝက်လွှင့်ထူလိမ့်မယ်” လို့ ထရမ့်ကပြောပါတယ်။
ဘယ်သူမှ ဒါကိုမမြင်ချင်ဘူး။ အမေရိကန်တွေက အဲဒီအတွက် ပျော်ရွှင်မှာမဟုတ်ဘူး။ ဘာဖြစ်မလဲ ကြည့် ကြတာပေါ့ လို့ထရမ့်ကဆိုပါတယ်။
အိမ်ဖြူတော်ပြောရေးဆိုခွင့်ရ ကာရင်း ယွန်းပီယဲက သူတို့အနေနှင့် ဆုံးဖြတ်ချက်ကိုပြန်ပြင်ဖို့ အစီအစဉ်မရှိဘူးလို့ ပြောပါတယ်။
Source Reuters
