#World_Health
Published 1 March 2023
အဝလွန်ခြင်းပြဿနာကြောင့် လူတစ်ဦးရဲ့အသက်သေဆုံးနိုင်ချေ ၂၂ ရာခိုင်နှုန်းကနေ ၉၁ ရာခိုင်နှုန်းအထိများနိုင်ကြောင်း သိပ္ပံပညာရှင်များတွေ့ရှိခဲ့ရာ မူလကထင်ထားတာထက် ပိုများနေပါတယ်။
ကမ္ဘာတဝှမ်းမှာ အဝလွန်ခြင်းဝေဒနာ ပိုပြီးအဖြစ်များလာကြကာ အမေရိကန်မှာဆိုရင် အရွယ်ရောက်ပြီးသူ ၄၁.၉ ရာခိုင်နှုန်းက အဝလွန်ဝေဒနာခံစားနေရကြောင်း အမေရိကန်ရောဂါထိန်းချုပ်ကာကွယ်ရေးစင်တာ (CDC)ကဆိုပါတယ်။
အဝလွန်ခြင်းရှိ/မရှိကို BMI ဖြင့် တိုင်းတာလေ့ရှိပြီး BMI တန်ဖိုး ၁၈.၅ အောက်ဆိုရင် ကိုယ်အလေးချိန်လျော့နည်းတယ်လို့ ယူဆကာ BMI ၂၅ ကျော်ရင် ကိုယ်အလေးချိန်များတယ်လို့ ယူဆပြီး BMI ၃၀ ကျော်ရင်တော့ အဝလွန်တယ်လို့ သတ်မှတ်ပါတယ်။
ကိုယ်အလေးချိန်အခြေအနေကို BMI ဖြင့်တိုင်းတာခြင်းက သိပ်ပြီးယေဘုယျမကျဘူးလို့ ဆိုနေကြပေမယ့်လည်း လူတစ်ယောက် ကိုယ်အလေးချိန်လျော့နေလား အဝလွန်နေလားဆိုတာကို တိုင်းတာဖို့အတွက် BMI ကို အသုံးပြုနေဆဲပါ။
ကိုယ်အလေးချိန်နည်းခြင်းနဲ့ အဝလွန်ခြင်း နှစ်ရပ်စလုံးက အသက်ဆုံးပါးနိုင်ချေမြင့်မားနိုင်တယ်လို့ ယူဆပြီး လေ့လာမှုများပြုလုပ်ခဲ့ကြပါတယ်။
သုတေသီများက ၁၉၈၈ မှ ၂၀၁၅ အတွင်း သေဆုံးသူပေါင်း ၄,၅၀၀ အပါအဝင် လူပေါင်း ၁၈,၀၀၀ ခန့်ကို လေ့လာဆန်းစစ်ခဲ့ကြပါတယ်။
ရှိသင့်ရှိထိုက်တဲ့ BMI ဟာ အသက်အန္တရာယ်အနည်းဆုံး အခြေအနေဖြစ်ပြီး ကိုယ်အလေးချိန်လျော့နည်းခြင်းကလည်း အသက်သေဆုံးနိုင်ချေ ထူးထူးခြားခြားများလာတာမျိုး မရှိပါဘူး။
ယခုလေ့လာတွက်ချက်မှုများအပြီးမှာတော့ BMI မြင့်မားခြင်းကြောင့် လူကြီးတွေမှာ အသက်ဆုံးပါးနိုင်ချေက အရင်လေ့လာထားတာတွေထက် ၈ ဆမျှ ပိုများနေပါတယ်။
၂၀၂၂ လေ့လာမှုတစ်ခုမှာ အသက်ကြီးသူတွေမှာ BMI ကို ထိန်းသိမ်းထားခြင်းဖြင့် အယ်လ်ဇိုင်းမားရောဂါကို အကောင်းဆုံးကာကွယ်နိုင်တယ်လို့ သိရပါတယ်။
အဝလွန်ရာကနေ ကိုယ်အလေးချိန်ကျသွားအောင် ပြုလုပ်တာထက်စာရင် အနည်းငယ်ဝနေတဲ့အခြေအနေကို ဆက်လက်ထိန်းသိမ်းထားနိုင်ပါက ပိုပြီးကျန်းမာစေနိုင်ကြောင်း ဖော်ပြထားပါတယ်။
#Source: The Jerusalem Post #World_Health #BMI #အဝလွန် #(၉၀)ရာခိုင်နှုန်း #အသက်ဆုံးပါးနိုင် #YMG#Yangon_Media_Group
