Published 10 January 2024
အမေရိကန် ကာကွယ်ရေးဝန်ကြီး လွိုက်အော်စတင် ဆီးကျိတ်ကင်ဆာ ခံစားနေရတာကို အင်္ဂါနေ့မတိုင်ခင်အထိ သမ္မတဂျိုးဘိုင်ဒင် မသိရှိခဲ့ရဘူးလို့ အိမ်ဖြူတော်က ပြောကြားလိုက်ပါတယ်။
လွိုက်အော်စတင် ရောဂါခံစားနေရကြောင်းကို လူသိရှင်ကြား ထုတ်ဖော်ပြောကြားပြီး မိနစ်ပိုင်းအကြာမှာမှ ဘိုင်ဒင်က သိရှိခဲ့ရတာ ဖြစ်ပါတယ်။
အသက် ၇၀ ရှိပြီဖြစ်တဲ့ အော်စတင်ဟာ ဇန်နဝါရီ ၁ ရက်နေ့ကတည်းက ဝေါလ်တာရိဒ် အမျိုးသားစစ်ဆေးရုံမှာ တက်ရောက်နေခဲ့ရပါတယ်။
ဒါကို ပင်တဂွန်စစ်ဌာနချုပ်က ထုတ်ဖော်ပြောကြားခြင်း မရှိတာကြောင့် နောက်ကွယ်မှာ နိုင်ငံရေးပဋိပက္ခများ ရှိနေခဲ့ပါတယ်။
အော်စတင်ရဲ့ လက်ထောက် ကက်သလင်းဟစ်ခ်ကိုယ်တိုင် ရက်အနည်းငယ်ကြာတဲ့အထိ ဒီအကြောင်းကို မသိရှိရဘဲ ကာကွယ်ရေးဝန်ကြီးရဲ့ တာဝန်တွေကို လုပ်ဆောင်ပေးဖို့ ဇန်နဝါရီ ၂ ရက်နေ့က မှာကြားခံခဲ့ရပါတယ်။
‘’အော်စတင် ဆေးရုံတက်နေရတာကို ကြာသပတေးနေ့ မတိုင်ခင်အထိ ဘိုင်ဒင်မသိခဲ့ရပါဘူး။
ဆေးရုံတက်ရတဲ့ အကြောင်းအရင်းက ဆီးကျိတ်ကင်ဆာကြောင့်ဆိုတာ ဒီမနက်မတိုင်ခင်အထိ မသိခဲ့ရပါဘူး’’ လို့ အိမ်ဖြူတော်မှ ပြောရေးဆိုခွင့်ရှိသူ ဂျွန်ကာဘီက ပြောပြသွားပါတယ်။
အော်စတင်နဲ့ ဘိုင်ဒင်တို့ စနေနေ့က စကားပြောဆိုခဲ့ပေမယ့် ဆီးကျိတ်ကင်ဆာအကြောင်း ဘာကြောင့် မသိရှိရလဲဆိုတာကို သေချာမသိရပါဘူး။
အီရတ်မှာ ဦးဆောင်ပြီးတိုက်ပွဲဝင်ခဲ့တဲ့ အငြိမ်းစား ကြယ် ၄ ပွင့်ဗိုလ်ချုပ်ကြီး အော်စတင် တာဝန်ဝတ္တရားများ ပျက်ကွက်နေတဲ့ အထောက်အထားကို ရီပတ်ဘလစ်ကန်များက အခွင့်ယူပြီး တရားဝင်စုံစမ်းစစ်ဆေးမှုများ ပြုလုပ်ခဲ့ပါတယ်။
ယူကရိန်းနဲ့ အစ္စရေးလ်တို့မှာ စစ်ပွဲတွေဖြစ်နေတဲ့ကြားက အိမ်ဖြူတော်နဲ့ လက်ထောက်ဝန်ကြီးကပင် ရောဂါအကြောင်း မသိရှိရတာဟာ အတော်ကိုလက်မခံနိုင်စရာဖြစ်ကြောင်း လွှတ်တော်ကိုယ်စားလှယ် မိုက်ခ်ရော်ဂျာစ်က အော်စတင်ထံသို့ အင်္ဂါနေ့က စာရေးသားပေးပို့ခဲ့ပါတယ်။
အော်စတင်ဟာ ဒီဇင်ဘာ ၂၂ ရက်နေ့က ဆီးကျိတ်ကင်ဆာ ကုသမှုခံပြီးနောက် မူးဝေခြင်း၊ ဝမ်းဗိုက် တင်ပါး ခြေထောက်တို့မှာ ပြင်းထန်စွာ နာကျင်ကိုက်ခဲခြင်း ပြဿနာများ ခံစားရတာကြောင့် ဇန်နဝါရီ ၁ ရက်နေ့မှာ ဝေါလ်တာရိဒ်ဆေးရုံသို့ လူနာတင်ကားဖြင့် ခေါ်ဆောင်ခံခဲ့ရပါတယ်။
ဆီးလမ်းကြောင်း ပိုးဝင်နေတယ်လို့ တွေ့ရှိပြီးနောက် ဇန်နဝါရီ ၂ ရက်နေ့မှာ အထူးကြပ်မတ်ဆောင်သို့ ပို့ဆောင်ခဲ့ပါတယ်။
ဆက်လက်လေ့လာရာမှာ ဝမ်းဗိုက်အတွင်း အရည်များစုစည်းပြီး အူသိမ်လုပ်ဆောင်ချက်များကို ထိခိုက်စေတာဖြစ်ကြောင်း၊ ဒါဟာ အစာအိမ်မှ နှာခေါင်းသို့ ပိုက်ပြွန်ဖြင့် စစ်ထုတ်ကုသစဥ်က ကျန်ခဲ့တဲ့ အူလမ်းကြောင်း အကြွင်းအကျန်များကြောင့်လို့ ဆေးရုံက ပြောပြခဲ့ပါတယ်။
ရောဂါပိုးကူးစက်ခြင်းက ကင်းရှင်းပြီဖြစ်ကာ ပြန်လည်သက်သာမှုနှုန်းက နှောင့်နှေးနိုင်ပေမယ့် အပြည့်အဝ ကောင်းလာနိုင်တယ်လို့ မျှော်လင့်ကြောင်း ပင်တဂွန်က ထုတ်ပြန်ထားပါတယ်။
ဇန်နဝါရီ ၄ ရက်နေ့မတိုင်ခင်အထိ ကာကွယ်ရေးဝန်ကြီး ဆေးရုံတက်နေရတဲ့အကြောင်းကို ရွေးကောက်ပွဲထပ်မံ ယှဥ်ပြိုင်ရန် ကြိုးပမ်းနေတဲ့ ဘိုင်ဒင်မသိခဲ့တာနဲ့ ပတ်သက်ပြီး နိုင်ငံရေးဝေဖန်သံများ ထွက်ပေါ်နေတာကို အစိုးရက ဖုံးဖိရန်ခက်ခဲနေပါတယ်။
ဒေါ်နယ်ထရမ့် အပါအဝင် အထင်ကရ ရီပတ်ဘလစ်ကန် အချို့က အော်စတင်ကို ရာထူးမှဖယ်ရှားရန် တောင်းဆိုနေကြပါတယ်။
ဒါပေမဲ့ အငြိမ်းစား ကြယ် ၄ ပွင့်ဗိုလ်ချုပ်ကြီးဟာ ရာထူးမှနုတ်ထွက်ရန် အစီအစဥ်မရှိသလို ဘိုင်ဒင်ကလည်း သူ့ကိုမဖယ်ရှားလိုဘူးလို့ ပင်တဂွန်က ဆိုလိုက်ပါတယ်။
Source: Reuters
#World_News
#Published_ 10 January 2024
#YMG #Yangon_Times #Yangon_Media_Group #YMG_News
