#World_Health
Published 25 November 2023
အသက်ကြီးလာတဲ့အခါမှာ လူအများစု ဆံပင်ဖြူတာဟာ သဘာဝဖြစ်စဥ်တစ်ခု ဖြစ်ပါတယ်။
ဆံပင်မွေးညင်းပေါက်တွေမှာ ရောင်ခြယ်ဆဲလ်များ နည်းပါးလာတာကြောင့် ဆံပင်ဖြူလာရခြင်း ဖြစ်ပါတယ်။
ဆံပင်ရဲ့ သဘာဝအရောင်ကို ဖြစ်စေတဲ့ မယ်လာနင် ရောင်ခြယ်ပစ္စည်းတွေဟာ အသက်ကြီးလာတဲ့အခါ နည်းပါးလာပြီး လုံးဝမထုတ်လုပ်နိုင်တော့တဲ့အခါ ဆံပင်ဖြူသွားစေပါတယ်။
ဆံပင်ဖြူရခြင်းဖြစ်စဥ်ရဲ့ အကြောင်းအရင်းများကို ဖော်ပြလိုက်ပါတယ်။
(၁) မျိုးရိုး
ဆံပင်ဖြူခြင်း ဖြစ်စဥ်ဟာ မျိုးရိုးလိုက်ခြင်းနဲ့ များစွာသက်ဆိုင်နေပါတယ်။
မျိုးရိုးထဲမှာ စောစီးစွာဆံပင်ဖြူသူရှိရင် မျိုးရိုးလိုက်တတ်ပြီး အချို့မျိုးဗီဇတွေဟာ မယ်လာနင်ထုတ်လုပ်မှုကို ပြောင်းလဲစေပါတယ်။
လူမျိုးအနေနဲ့ဆိုရင် အသားဖြူသူတွေက အသားညိုသူတွေထက် စောစီးစွာ ဆံပင်ဖြူတတ်ပါတယ်။
(၂) စိတ်ဖိစီးမှု
ဖိစီးမှုက ဆံပင်ဖြူခြင်းကို တိုက်ရိုက်ဖြစ်စေတာ မဟုတ်ပေမယ့် ကာလကြာရှည်စွာ ဖိစီးခြင်းနဲ့ အရွယ်မတိုင်ခင် ဆံပင်ဖြူခြင်းတို့ကြား ဆက်စပ်မှုရှိနေပါတယ်။
ဖြစ်နိုင်တာကတော့ ဖိစီးမှုဖြစ်တဲ့အခါ ဆံပင်ရောင်ခြယ်ပစ္စည်း ထုတ်လုပ်မှုကို အနှောင့်အယှက် ဖြစ်စေပြီး မယ်လာနင် နည်းပါးစေတာ ဖြစ်နိုင်ဖွယ်ရှိပါတယ်။
(၃) ဆေးလိပ်သောက်ခြင်း
စီးကရက်တွေမှာ ပါဝင်တဲ့ ဓာတုပစ္စည်းတွေ၊ အဆိပ်အတောက်တွေက ဆံပင်မွေးညင်းပေါက်နဲ့ မယ်လာနင်ထုတ်လုပ်မှုကို ထိခိုက်စေပါတယ်။
ဆေးလိပ်ငွေ့တွေက ခန္ဓာကိုယ်ထဲမှာ ဓာတ်တိုးဖိစီးခြင်းကို ဖြစ်စေပြီး ဆဲလ်တွေကို ထိခိုက်စေကာ စောစီးစွာ ဆံပင်ဖြူစေပါတယ်။
(၄) အာဟာရဓာတ်ချို့တဲ့ခြင်း
မယ်လာနင်ထုတ်လုပ်ရာမှာ အချို့အာဟာရဓာတ်တွေက မရှိမဖြစ် လိုအပ်ပါတယ်။
ဗိုက်တာမင် ဘီ၁၂၊ ဒီ၊ အီး၊ သံဓာတ်တို့လို အာဟာရဓာတ်တွေ ချို့တဲ့ပါက မယ်လာနင် ထုတ်လုပ်မှုနဲ့ ဆံပင်ကျန်းမာရေးကို ထိခိုက်စေပါတယ်။
အာဟာရဓာတ်ချို့တဲ့ရုံ တစ်ခုတည်းဖြင့် ဆံပင်ဖြူစေတာ မဟုတ်ဘဲ ဆံပင်ဖြူတဲ့နှုန်းကို မြန်စေတာသာ ဖြစ်ပါတယ်။
(၅) ရောဂါများ
အချိုု့သောရောဂါတွေက ကျန်းမာရေးကို ဆိုးရွားစေပြီး ဆံပင်ရောင်ခြယ်ပစ္စည်းတွေကို ထိခိုက်စေပါတယ်။
ခရုသင်းသမင်ဖြူလိုမျိုး ရောဂါတွေဟာ အရေပြားမှာ ရောင်ခြယ်ပစ္စည်းဆုံးရှုံးပြီး အဖြူကွက်များဖြစ်ပေါ်ကာ ဆံပင်ကိုပါ ထိခိုက်စေပါတယ်။
ခုခံအားကျဆင်းတဲ့ ရောဂါတွေဟာလည်း မယ်လာနင်ထုတ်လုပ်မှုကို ထိခိုက်စေပါတယ်။
သိုင်းရွိုက်ဟော်မုန်း အတက်အကျ ပြောင်းလဲတဲ့အခါ ဆံပင်ကျန်းမာရေးကိုလည်း ထိခိုက်စေပါတယ်။
(၆) လေထုညစ်ညမ်းမှုများ
မော်တော်ယာဥ်များမှ ထုတ်လွှတ်ငွေ့များ၊ စက်မှုပိုင်းမှ အညစ်အကြေးများ၊ သတ္တုကြီးများနဲ့ ဓာတုပစ္စည်းများမှ ညစ်ညမ်းအရာတွေက ခန္ဓာကိုယ်ထဲမှာ ဓာတ်တိုးဖိစီးမှု ဖြစ်ပေါ်စေပြီး မယ်လာနင်ထုတ်လုပ်မှု ထိပါးစေကာ ဆံပင်ရောင်ခြယ်ကို လျော့ပါးစေပါတယ်။
အမှန်တကယ်တော့ ဆံပင်က အဖြူရောင်ပြောင်းသွားတာ မဟုတ်ဘဲ မွေးညင်းပေါက်အသစ်ကနေ အရောင်မပါတဲ့ ဆံပင်အသစ် ထွက်လာတာဖြစ်ပါတယ်။
ဆံပင်ဖြူကို နုတ်လိုက်ရင် နောက်ထပ် ဆံပင်ဖြူများစွာ ထွက်လာတယ်ဆိုတာ မသေချာပေမယ့် ဆံပင်နုတ်လိုက်တဲ့အခါ မွေးညင်းပေါက်ကို ထိခိုက်စေပါတယ်။
#World_Health #ဆံပင်ဖြူခြင်း #Source: New York Post
