Published 01 November 2023

ဂါဇာကမ်းမြောင်ရှိ လူဦးရေထူထပ်ရာ ဒုက္ခသည်စခန်းတစ်ခုကို အစ္စရေးလ်မှ လေကြောင်းတိုက်ခိုက်မှုများ ပြုလုပ်ခဲ့ရာ ပါလက်စ်တိုင်းဘက်မှ အနည်းဆုံးလူ ၅၀ နဲ့ တပ်မှူးတစ်ယောက် သေဆုံးခဲ့ကာ ဆေးပညာရှင်များက ထိခိုက်သူများကို အသည်းအသန် ကုသပေးနေကြပြီး ဆေးရုံစင်္ကြံတွေမှာပင် ခွဲစိတ်ခန်းများ ပြုလုပ်ဆောင်ရွက်နေကြပါတယ်။

အစ္စရေးလ်တို့က လေကြောင်းကနေ ပစ်ခတ်တိုက်ခိုက်မှုတွေကို ပြုလုပ်နေတာ ရက်သတ္တပတ်အချို့ ရှိနေပြီဖြစ်ပြီး ဂါဇာမှာ တင့်ကားများဖြင့် ချီတက်နေတာ ၄ ရက်ရှိပြီဖြစ်ပါတယ်။

ဂါဇာရှိ အကြီးဆုံး ဒုက္ခသည်စခန်း ဂျဘလီယာမှာ တိုက်လေယာဥ်များဖြင့် တိုက်ခိုက်ခဲ့ရာမှာ အီဘရာဟင်ဘီယာရီကို သတ်ပစ်နိုင်ခဲ့ကြောင်း အစ္စရေးလ်ကာကွယ်ရေးတပ် (IDF)က ထုတ်ပြန်ကြေညာလိုက်ပါတယ်။

ထိုလူဟာ အလွန်အရေးကြီးတဲ့ ပုဂ္ဂိုလ်ဖြစ်ပြီး အောက်တိုဘာ ၇ ရက်နေ့ အစ္စရေးလ်ကို ကျူးကျော်အကြမ်းဖက်တဲ့ ဖြစ်ရပ်မှာ စီစဥ်ဆောင်ရွက်သူလို့တောင် ပြောလို့ရကြောင်း IDF မှ ပြောရေးဆိုခွင့်ရှိသူ ဒုဗိုလ်မှူးကြီး ဂျိုနသန်ကွန်ရီကပ်စ်က ပြောပြသွားပါတယ်။

ဘီယာရီရှိနေတဲ့ မြေအောက်လှိုဏ်ခေါင်းထဲမှာပဲ ရှိနေတဲ့ ဟားမတ်စ်တိုက်ခိုက်ရေးသမား ဒါဇင်ခန့်ဟာလည်း တိုက်ခိုက်ခံရစဥ် သေဆုံးသွားခဲ့တယ်လို့ ကွန်ရီကပ်စ်က ဆိုပါတယ်။

ပါလက်စ်တိုင်း ကျန်းမာရေးအာဏာပိုင်များကတော့ ဒုက္ခသည်စခန်းမှ အနည်းဆုံး လူ ၅၀ သေဆုံးကာ ၁၅၀ ဒဏ်ရာရခဲ့တယ်လို့ ထုတ်ပြန်ထားပါတယ်။

ဟားမတ်စ်ဘက်မှ ပြောရေးဆိုခွင့်ရှိသူတစ်ဦးက တိုက်ခိုက်မှုအတွင်း အကြီးတန်းအရာရှိ တစ်ဦးတစ်ယောက်မျှ သေဆုံးခြင်းမရှိဘဲ ဒါဟာ အရပ်သားတွေကို သတ်ဖို့ အစ္စရေးလ်တို့ အကြောင်းပြတာဖြစ်ကြောင်း ဆိုလိုက်ပါတယ်။

၁၉၄၈ ခုနှစ် အစ္စရေးလ်နဲ့ စစ်ဖြစ်ကတည်းက ဒုက္ခသည်မိသားစုတွေ နေထိုင်နေတဲ့ ဂျဘလီယာမှာ သေဆုံးသူနဲ့ ဒဏ်ရာရသူ ၄၀၀ ခန့်ရှိတယ်လို့ ဟားမတ်စ်က ထုတ်ပြန်ထားပါတယ်။

ပေါက်ကွဲမှုများကြောင့် အဆောက်အအုံပျက်တွေနဲ့ ကျင်းဝတွေ ကျန်နေခဲ့ပါတယ်။

ဂါဇာမှအရပ်သားတွေကို မြောက်ပိုင်းနေရာကနေ စွန့်ခွာထွက်ပြေးဖို့ အစ္စရေးလ်က အကြိမ်ကြိမ် သတိပေးနေခဲ့ကာ အများအပြားက တောင်ဘက်သို့ တိမ်းရှောင်ထွက်ပြေးကြပေမယ့် ထွက်မပြေးတဲ့သူတွေလည်း များစွာရှိနေပါတယ်။

ဝါရှင်တန်မှာ စစ်ပွဲဆန့်ကျင်ရေး ဆန္ဒပြသူများက ကွန်ဂရက်လွှတ်တော် ကြားနာမှုမှာ ဝင်ရောက်နှောင့်ယှက်ပြီး ချက်ချင်း အပစ်အခတ်ရပ်ရန်၊ ဂါဇာမှကလေးတွေကို ကာကွယ်ရန်၊ လူမျိုးသုဥ်းသတ်ဖြတ်တာကို အားမပေးရန် တောင်းဆိုနေကြပါတယ်။

ဆေးဝါးမလုံလောက်မှု၊ ဓာတ်အားပြတ်တောက်မှု၊ တိုက်ခိုက်ခံရမှုများ အဆက်မပြတ် ကြုံတွေ့နေရကာ ဂါဇာမှဆရာဝန်များ နေ့ရောညပါ အလုပ်လုပ်နေရပါတယ်။

ဟားမတ်စ်တို့က ဓားစာခံများကို လာမယ့်ရက်များအတွင်း ပြန်လွှတ်ပေးမယ်လို့ ကြားဝင်ဖြန်ဖြေသူများကို ပြောကြားထားပါတယ်။
Source: Reuters
#Yangon_Times
#World_News
#Published 1 November 2023
#YMG #Yangon_Times #Yangon_Media_Group