#Asia_News
Published 30 August 2023
ထိုင်းနိုင်ငံဝန်ကြီးချုပ်ဟောင်း သက်ဆင်ရှင်နာဝက်ထရာရဲ့ ရှေ့နေက သက်ဆင်အတွက် ထိုင်းဘုရင်းမင်းမြတ်ထံမှ လွတ်ငြိမ်းချမ်းသာခွင့် တောင်းခံရန် လိုအပ်တဲ့ စာရွက်စာတမ်းအားလုံး ပြင်ဆင်နေပါတယ်။
ရှေ့နေဝင်ယက်ချာတ်မွန်ထရီက လွတ်ငြိမ်းချမ်းသာခွင့် တင်မယ့်နေ့ကိုတော့ မစီစဥ်ရသေးဘူးလို့ ပြောပြခဲ့ပါတယ်။
သာမန်အားဖြင့် အကျဥ်းကျကာလသက်တမ်းရဲ့ ၃ ပုံ ၁ ပုံ ပြီးဆုံးထားသူတွေ ဒါမှမဟုတ် အနည်းဆုံးထောင်ဒဏ် ၈ နှစ် ကျခံထားပြီးသူတွေက ထိုင်းဘုရင်မင်းမြတ်ထံမှ လွတ်ငြိမ်းချမ်းသာခွင့် တင်သွင်းနိုင်ပြီ ဖြစ်ပါတယ်။
ကိုယ်တိုင်ပြည်နှင်ဒဏ်ပေးပြီး ၁၅ နှစ်အကြာမှာ ထိုင်းနိုင်ငံသို့ ပြန်လာတဲ့ အသက် ၇၄ နှစ်ရှိသက်ဆင်ကို အထက်တရားရုံးကနေ ထောင်ဒဏ် ၈ နှစ်ပြစ်ဒဏ်ချမှတ်ခဲ့ရာ ဩဂုတ် ၂၂ ရက်နေ့က ဘန်ကောက်ရမန်အကျဥ်းထောင်ရှိ သီးသန့်နေရာသို့ ပို့ဆောင်ခဲ့ပါတယ်။
၁၃ နာရီအတွင်းမှာပဲ ရင်ဘတ်အောင့်ခြင်း၊ သွေးတိုးခြင်း၊ သွေးထဲအောက်ဆီဂျင် နည်းပါးခြင်းတို့ ခံစားခဲ့ရကာ ရဲဌာနအထွေထွေဆေးရုံသို့ လွှဲပြောင်းခဲ့ရပါတယ်။
သက်ဆင်ရဲ့ အငယ်ဆုံးသမီး ပယ်ထုံတန်က သူ့အဖေထံသို့ တနင်္လာနေ့မွန်းလွဲနဲ့ အင်္ဂါနေ့မနက်ပိုင်းတို့မှာ သွားရောက်လည်ပတ်ခဲ့ကာ သူ့ရဲ့နှလုံးအခြေအနေကို အစိုးရိမ်ဆုံးဖြစ်တယ်လို့ ဆိုပါတယ်။
သူ့အဖေက အားအင်ကုန်ခမ်းနေပေမယ့် သူမကို စကားပြောနိုင်သေးကြောင်း ဖွေထိုင်းပါတီရုံးချုပ်မှာ သတင်းထောက်တွေကို ပြောကြားခဲ့ပါတယ်။
ကိုဗစ်ကာလအစတုန်းကလည်း သက်ဆင်ဟာ ကိုဗစ်-၁၉ရောဂါ ကူးစက်ခဲ့ပြီး အထူးကြပ်မတ်ဆောင်မှာ ၉ ရက်နေခဲ့ရကာ ဆေးရုံမှာ တစ်လကြာအောင် နေထိုင်ခဲ့ရပါတယ်။
သက်ဆင်ဟာ ရဲဌာနအထွေထွေဆေးရုံမှာ ဆက်ရှိနေမှာဖြစ်ပြီး ပုဂ္ဂလိကဆေးရုံသို့ ရွှေ့ပြောင်းရန် အစီအစဥ်မရှိကြောင်း ပြောကြားခဲ့ပါတယ်။
အချိန်ဘယ်လောက်ကြာတဲ့အထိ ဆေးရုံတင်ထားရဦးမလဲဆိုတာကို မေးမြန်းရာမှာ ဆရာဝန်တွေက တိကျတဲ့အဖြေ မပေးဘူးလို့ ဖြေကြားခဲ့ပါတယ်။
ဆေးရုံရဲ့ VIP အခန်းမှာ ရှိနေတယ်ဆိုတာကို ငြင်းပယ်လိုက်ကာ အခန်းကနေကြည့်ရင် ထိုင်းတော်ဝင်ရဲဌာနရုံးကို တွေ့ရကြောင်း ပြောကြားသွားပါတယ်။
ဘုရင်မင်းမြတ်ထံမှ လွတ်ငြိမ်းချမ်းသာခွင့် တောင်းခံတာနဲ့ ပတ်သက်ပြီး မေးမြန်းရာမှာ ဒါဟာ သူ့အဖေရဲ့ဆုံးဖြတ်ချက်ဖြစ်ပြီး မိသားစုဝင်တွေကတော့ သူ့ကိုထောက်ပံ့သွားမှာ ဖြစ်ကြောင်း ပြောပြခဲ့ပါတယ်။
သက်ဆင်မှာ နှလုံးရောဂါ၊ အဆုတ်ရောဂါ၊ သွေးတိုးရောဂါ၊ ခါးဆစ်ရိုးကျွံခြင်း စတဲ့ ရောဂါကြီး ၄ ခုခံစားနေရကြောင်း အကျင့်ပျက်ခြစားတိုက်ဖျက်ရေးဌာနက အစောပိုင်းက ဖော်ပြခဲ့ပါတယ်။
#Source: Bangkok Post #Asia_News #ဝန်ကြီးချုပ်ဟောင်းသက်ဆင် #လွတ်ငြိမ်းချမ်းသာခွင့် #Yangon_Times
