#WorldHealth
Published 29 April 2022
သွေးတိုးဝေဒနာခံစားနေရပြီး နေ့စဉ်သွေးပေါင်ကျဆေးသောက်သုံးနေရသူများအနေနဲ့ မကြာခင်ထိုးဆေးဖြင့် ကုသနိုင်တော့မှာဖြစ်ပါတယ်။
အဆိုပါထိုးဆေးကို ၆ လခြားပြီးတစ်နှစ် ၂ ကြိမ်ထိုးနှံရကာ အမျိုးသားကျန်းမာရေ;ဝန်ဆောင်မှု(NHS)မှ လူနာများနဲ့ လက်ရှိစမ်းသပ်လျက်ရှိပါတယ်။
သွေးပေါင်ကျထိုးဆေးကို လာမယ့် ၃ နှစ်မှ ၅ နှစ်အတွင်းရရှိနိုင်မယ်လို့ ပညာရှင်များမျှော်လင့်လျက်ရှိပြီး အင်္ဂလန်မှ သွေးတိုးရောဂါရှင် ၁၄ သန်းအတွက် အားထားရာဖြစ်လာနိုင်မှာဖြစ်ပါတယ်။
Zilebesiran သွေးပေါင်ကျဆေးဟာ angiotensinogen ပရိုတိန်းကိုပစ်မှတ်ထားတာဖြစ်ပါတယ်။
angiotensinogen ကို အသည်းမှထုတ်လုပ်ပြီး သွေးပေါင်ချိန်ထိန်းညှိရာမှာ အရေးပါပါတယ်။
ဒီထိုးဆေးက လူနာရှင်တွေအတွက် လက်တွေ့ထိရောက်မှုရှိစေမှာဖြစ်ပြီး နေ့စဉ်ဆေးသောက်ဖို့မေ့လျော့တတ်တဲ့အခြေအနေမျိုးမှ ကင်းဝေးစေမှာပါ။
Alnylam Pharmaceuticals နဲ့ NIHR တို့မှ ထောက်ပံ့တဲ့စမ်းသပ်မှုမှာ zilebesiran ထိုးဆေးရဲ့ဘေးကင်းစိတ်ချရမှုနဲ့ သွေးတိုးရောဂါဝေဒနာရှင်တွေမှာ သွေးပေါင်ချိန်ကိုဘယ်လောက်အထိ ထိရောက်စွာထိန်းချုပ်နိုင်သလဲဆိုတာကို လေ့လာမှာဖြစ်ပါတယ်။
အသုံးအများဆုံး သွေးပေါင်ကျဆေးတွေဖြစ်တဲ့ ACE inhibitors တွေဟာ သွေးကြောကျဉ်းပြီးသွေးပေါင်တက်စေတဲ့ပရိုတိန်းအင်ဇိုင်းကို တားဆီးပေးပါတယ်။
လူနာ ၈၄ ယောက်ကို ပထမအဆင့်စမ်းသပ်မှုပြုလုပ်ရာမှာ ဆေးတစ်ကြိမ်ထိုးခြင်းဖြင့် ၃ ပတ်နောက်ပိုင်း ဟော်မုန်းပမာဏ ၉၀ ရာခိုင်နှုန်းလျှော့ချပေးနိုင်တာကို တွေ့ရှိခဲ့ကြပါတယ်။
အဲဒီနောက် သွေးပေါင်ချိန်ထိန်းသိမ်းပေးတဲ့အာနိသင်က ၁၂ ပတ်ကျော်ကြာရှည်ခံတာကြောင့် သိပ္ပံပညာရှင်တွေက ဒီထက်တာရှည်ခံစေနိုင်ဖို့ မျှော်လင့်နေကြပါတယ်။
အဆိုပါထိုးဆေးကို အရေပြားအောက်ထိုးသွင်းရတာဖြစ်ပြီး တစ်နှစ် ၂ ကြိမ်ထိုးနှံရမှာဖြစ်ပါတယ်။
အမေရိကန်မှာ သွေးတိုးရောဂါကုသခံနေရသူ ၃၄ သန်းရှိနေပါတယ်။
သွေးတိုးရောဂါက သိသားထင်ရှားတဲ့ဝေဒနာမျိုးမတွေ့ရတတ်ပေမယ့် မကုသဘူးဆိုရင်တော့ နှလုံးရောဂါနဲ့ နှလုံးသွေးကြောပြတ်ခြင်းတို့ ဖြစ်တတ်ပါတယ်။
တစ်နှစ် ၂ ကြိမ်ထိုးဆေးဖြင့်ကုသခြင်းက အချိန်အတိုင်းအတာတစ်ခုအထိ တာရှည်ခံမယ်ဆိုပါက နေ့စဉ်ဆေးသောက်နေရတဲ့လူနာတွေအတွက် အစားထိုးကုသနိုင်တော့မှာဖြစ်ပါတယ်။
Source: DailyMail
#Yangon_Media_Group
