Published: 31 August 2021
အက်ဇ်မာရိုင်းအာမက်ဒီ ဩဂုတ် ၂၉ရက် တနင်္ဂနွေညနေ အလုပ်ကနေ ကဘူးလ်ကအိမ်ကို ပြန်ရောက်တဲ့အချိန်မှာ ခါတိုင်းလိုပဲ ကလေးတွေက ပွက်လောညံပြီး သူ့ကို ကြိုခဲ့ကြပါတယ်။သူသားနှင့်သမီးတွေ၊ပြီးတော့ တူနှင့် တူမတွေ တစ်အုပ်ကြီးပါ။
သူက သူ့ရဲ့ အဖြူရောင်ဆီဒင်ကားလေးကို ကွာဂျာဘာဂါက သူ့ရဲ့ သာမန်အိမ်ကလေးရဲ့ အိမ်ဝင်လမ်းကလေးထဲ မောင်းသွင်းလာပါတယ်။ ကွာဂျာဘာဂါဟာ အာဖဂန်မြို့တော် ကဘူးလ်ရဲ့ အနောက်မြောက်ဘက်က လူဦးရေထူထပ်တဲ့ ရပ်ကွက်တစ်ခုပါ။ သူက သူ့ကားသော့ကို သားအကြီးဆုံးကို လှမ်းပေးလိုက်ပြီး ကားကို ပါကင်ထိုးခိုင်းလိုက်ပါတယ်။
ကလေးတစ်ပြုံတစ်ခေါင်းကြီးက ကားထဲဝင်လိုက်ကြတယ်။ ပါကင်ထိုးတာကို သူတို့ကလိုက်စီးရတာ စွန့်စားခန်းတစ်ခု အလား ထင်နေကြတယ်။ အဲဒီအချိန်မှာ အက်ဇ်မာရိုင်းက ဘေးကရပ်ကြည့်နေပါတယ်။
အဲဒီအချိန်မှာ အာဖဂန်ရဲ့ ကောင်းကင်ပြာကြီးမှာ ဒုံးကျည်တစ်စင်းဟာ ဆူးဆူးဝါးဝါးအော်ပြီး ဝင်ချလာပြီး အဲဒီကားကို ကြေက်မက်ဘွယ်ကောင်းတဲ့အားကြီးနှင့် ထိမှန်သွားပြီး လူ၁၀ဦးရဲ့အသက်ကို တမဟုတ်ချင်းပဲ ဇိဝိန်ခြွေသွားပါတော့တယ်။
အမေရိကန်ပြည်ထောင်စုကတော့ သူတို့ဟာ တနင်္ဂနွေနေ့က ပေါက်ကွဲနိုင်တဲ့ပစ္စည်းတွေတနင့်တပိုးနှင့်ကားတစ်စီးကို လေကြောင်းကနေ တိုက်ခိုက်ဖျက်စီးပစ်လိုက်တယ်လို့ ကြေညာခဲ့့ပါတယ်။ သူတို့က ကဘူးလ်လေဆိပ်ကို အိုင်အက်စ်ရဲ့ ကားဗုံးနှင့် တိုက်ခိုက်ဖို့လို့ ကွဲလွဲစွာပြောထားပါတယ်။
တနင်္လာနေ့မှာတော့ သူတို့ဟာ အကြီးအကျယ်အမှားတစ်ခုလုပ်ခဲ့သလို ဖြစ်ခဲ့ရပါပြီ။
“ဒုံးကျည်ဟာ ကလေးတွေအပြည့်နှင့် အိမ်ထဲက ကားကို ထိမှန်ခဲ့ပြီး သူတို့အားလုံးအသတ်ခံလိုက်ကြရပါတယ်” လို့ အက်ဇ်မာရိုင်းရဲ့ ညီ အိုင်မဲလ်အာမက်ဒီ ကပြောပါတယ်။
မိသားစုဝင် ၁၀ဦး လေကြောင်းတိုက်ခိုက်မှုကြောင့်သေဆုံးခဲ့ရတာမှာ သူ့သမီးအရင်းနှင့် အခြားကလေးငါးဦးပါသွားတယ်လို့ အိုင်မဲလ်က ပြောပါတယ်။
တနင်္လာနေ့မှာ အေအက်ဖ်ပီဟာ တိုက်ခိုက်မှုခံခဲ့ရတဲ့ နေရာကို သွားရောက်ကြည့်ရှုခဲ့ပါတယ်။ အိုင်မဲလ်ဟာ သူ့မိသားစုဝင် အများစု သင်္ဂြိုလ်ဖို့ ဆွေမျိုးတွေ လာကူမှာကို စိတ်မရှည်စွာ စောင့်ဆိုင်းနေတာကို တွေ့ရပါတယ်။
“ကျွန်တော့်အစ်ကိုနှင့်သူ့ကလေးလေးယောက်လုံး အသတ်ခံလိုက်ရတယ်။ ကျွန်တော်က သမီးငယ်လေးနှင့် တူတူမတွေပါ ဆုံးရှုံးရတယ်”လို့ သူက ဖြေမဆည်နိုင်ပြောပြပါတယ်။
“ ကဘူးလ်တိုက်ခိုက်မှုအပြီးမှာ အရပ်သားသေကြေပျက်စီးမှု သတင်းတွေရထားပါတယ်” လို့ အမေရိကန်စစ်တပ် ပြောရေးဆိုခွင့်ရသူ ဗိုလ်ကြီး ဘီလ်အာဘန်က သတင်းထုတ်ပြန်ချက်ထဲမှာ ပြောထားပါတယ်။
အဲဒီစကားတွေက အိုင်မဲလ်အတွက်တော့ မရိုးသားတဲ့စကားတွေပါ။ သူ့အစ်ကိုကို တစ်ကိုယ်တော် ကားဗုံးတိုက်ခိုက်မယ့် အိုင်အက်စ် စာနာသူတစ်ဦး နှင့် မှားယွင်းမှတ်ယူသွားနိုင်တယ်လို့ သူကခက်ခက်ခဲခဲ ယုံကြည်နေနိုင်ပါတယ်။
အက်ဇ်မာရိုင်းဟာ အင်န်ဂျီအိုတစ်ခုမှာ အလုပ်လုပ်နေတဲ့ အင်ဂျင်နီယာတစ်ဦးဖြစ်ပါတယ်။ လှိုင်းကြီးလေထန်ကာလမှာ ခက်ခက်ခဲခဲရုန်းကန်နေရတဲ့ သာမန်အာဖဂန်တစ်ဦးဖြစ်ပါတယ်။
ပြီးခဲ့တဲ့ကြာသပတေးနေ့က လူအပ်ကြီးတွေက အာဖဂန်ကနေ လေယာဉ်နှင့် ထွက်ခွာနေကြစဉ် လေဆိပ်အဝင်မှာ အသေခံဗုံးခွဲပြီး ကြီးမားတဲ့ ပေါက်ကွဲမှုကြီးဖြစ်ပြီးကတည်းက အမေရိကန်က အတော်စိတ်တိုနေခဲ့တာပါ။
အဲဒီအသေခံဗုံးခွဲမှုမှာ အာဖဂန် အယောက် ၁၀၀နီးပါးနှင့် အမေရိကန်စစ်သား ၁၃ဦး သေဆုံးခဲ့ကြရပါတယ်။ နှစ်ပေါင်းနှစ်ဆယ် ကြာညောင်းခဲ့တဲ့ ရက်စက်တဲ့စစ်ပွဲအပြီး အမေရိကန်စစ်သားတွေ နောက်ဆုံး ဆုတ်ခွာဖို့ ရက် အနည်းငယ် အလိုမှာ ဖြစ်ခဲ့တာပါ။
နောက်ကြောင်းပြောရရင် အမေရိကန်ထောက်လှမ်းရေးက လာအံ့ဆဲဆဲ တိုက်ခိုက်မှုနောက်တစ်ခုရှိတယ် ဆိုပြီး သတိပေးအပြီးမှာ တနင်္ဂနွေနေ့က အမေရိကန်စစ်တပ်ဟာ အဲဒါမဖြစ်ပွားခင် ရပ်တန့်ပစ်လိုက်နိုင်ခဲ့တယ်လို့ ပြောဆိုခဲ့တာပါ။
“ တိုက်ခိုက်မှုရဲ့ ရလဒ်တွေအပေါ် ကျွန်တော်တို့ ချင့်တွက်နေပါတယ်။ အိုင်အက်စ်အိုင်အစက်-ကေရဲ့ လေဆိပ်ကိုတိုက်ခိုက်မှု လုပ်ခါနီးမှာ ဖြတ်တောက်နိုင်ခဲ့တာကို ကျွန်တော်တို့သိပါတယ်” လို့ အာဘန်က တနင်္ဂနွေနေ့တုန်းက ပြောခဲ့တာပါ။
“ ကားကိုဖျက်ဆီးလိုက်တာကြောင့် အင်အားပြင်းထန်များပြားတဲ့ ပေါက်ကွဲမှုကြီးဖြစ်ခဲ့တယ်ဆိုတာ ကျွန်တော်တို့သိပါတယ်။ ကားထဲမှာ ပေါက်ကွဲနိုင်တဲ့ ပစ္စည်းအများအပြားရှိတာကြောင့် အဲဒါကနေ နောက်ထပ် သေကြေပျက်စီးမှုတွေ ဖြစ်ကောင်းဖြစ် နိုင်ခဲ့တာပါ။ ဒါပေမယ့် ဘာတွေဖြစ်ခဲ့သလဲဆိုတာ သိပ်မရှင်းလင်းသေးပါဘူး။ ထပ်ပြီး စုံစမ်းစစ်ဆေးနေပါတယ်” လို့ သူက ပြောခဲ့ပါတယ်။
ပေါက်ကွဲသံကြီးကြားပြီးတဲ့နောက် အရပ်ကလူတွေ ကူညီဖို့ရောက်လာခဲ့ကြပါတယ်။
“ ကားထဲမှာ ကလေးတွေအကုန်သေကုန်ကြပြီ။ လူကြီးတွေက ကားအပြင်မှာ အသတ်ခံကြရတယ်။ ကားက မီးလောင်နေတယ်။ ကျွန်တော်တို့ ခန္ဓာကိုယ်အစိတ်အပိုင်းတောင် ရှာလို့မတွေ့ဘူး” လို့ ဆာဗီယာ ဆိုသူက ပြောပါတယ်။
“ အပြစ်မရှိတဲ့လူတွေ အသက်ဆုံးရှုံးနိုင်ခဲ့တဲ့အတွက် ကျွန်တော်တို့ အထူးပဲစိတ်မကေင်းဖြစ်ရပါတယ်” လို့ အမေရိကန်စစ်တပ်ပြောရေးဆိုခွင့်ရသူက သတင်းထုတ်ပြန်ချက်ထဲမှာ ပြောဆိုထားပါတယ်။
ဒါပေမယ့် အဲဒီစကားက အိမ်နီးချင်းနောက်ထပ်တစ်ယောက်ဖြစ်တဲ့ ရာရှစ်နိုရီအတွက်လည်း မရိုးသားတဲ့ စကားလို့ပဲ ထင်စေပါတယ်။
“ တာလီဘန်တွေက ကျွန်တော်တို့ကို သတ်တယ်။ အိုင်အက်စ်တွေက ကျွန်တော်တို့ကိုသတ်တယ်။ အမေရိကန်တွေက ကျွန်တော်တို့ကို သတ်တယ်” လို့ သူကပြောပါတယ်။
“ကျွန်တော်တို့ကလေးတွေကို သူတို့က အကြမ်းဖက်တွေလို့ ထင်နေကြသလားဗျာ” လို့ သူကပြောလိုက်ပါတယ်။
Source: AFP US Drone Strike wiped out Kabul family: brother says
