#Local_News
Published 17 September 2024

▪️ ပြီးခဲ့သည့်ရက်ပိုင်းအတွင်းက မြန်မာနိုင်ငံရှိတိုင်းနှင့်ပြည်နယ်အချို့တွင်‌ ဖြစ်ပွားခဲ့သည့် ရေကြီး၊‌ ရေလျှံမှုများ အတွက် အာဆီယံမှပေးပို့မည့် လူသားချင်းစာနာမှုအကူအညီတချို့ ရောက်ရှိမည်ဖြစ်ကြောင်း အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီအစည်းအဝေး (၂/၂၀၂၄)မှ သိရသည်။

▪️ အဆိုပါ အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီအစည်းအဝေး (၂/၂၀၂၄) ကို စက်တင်ဘာ ၁၆ ရက် မွန်းလွဲပိုင်းတွင် နေပြည်တော်ရှိ လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန စုပေါင်းခန်းမ၌ကျင်းပရာ အမျိုးသား သဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီဥက္ကဋ္ဌ နိုင်ငံတော်စီမံအုပ်ချုပ်ရေးကောင်စီ ဒုတိယဥက္ကဋ္ဌ ဒုတိယဝန်ကြီးချုပ် ဒုတိယဗိုလ်ချုပ်မှူးကြီးစိုးဝင်း တက်ရောက်အမှာစကားပြောကြားသည်။

▪️ ထိုသို့ပြောကြားရာတွင် နိုင်ငံတကာအကူအညီအနေဖြင့်  ယခုလည်း အာဆီယံ မှ ပေးပို့မည့် လူသားချင်းစာနာမှု အကူအညီတချို့ ရောက်ရှိတော့မည်ဖြစ်ပြီး AHA Center မှ နိုင်ငံတွင်း ညှိနှိုင်းဆောင်ရွက်ရေးအဖွဲ့ (In-Country Liaison Team – ICLT) ကလည်း မြန်မာနိုင်ငံကိုလာရောက်ပြီး ဘေးအန္တရာယ်ဆိုင်ရာ သတင်းအချက် အလက်ထုတ်ပြန်ရေးနှင့် နိုင်ငံတကာအကူအညီများ တိုးတက်ရရှိရေးအတွက် ပူးပေါင်းကူညီဆောင်ရွက်မည်ဖြစ်ကြောင်း သိရသည်။

▪️ ဘင်္ဂလားပင်လယ်အော် အနောက်မြောက်ပိုင်းတွင်ဖြစ်ပေါ်ခဲ့သည့် အားကောင်းသောမုန်တိုင်းငယ်နှင့် တောင်တရုတ်ပင်လယ်တွင်ဖြစ်ပေါ်ခဲ့သော တိုင်ဖွန်းမုန်တိုင်းရာဂီ အရှိန်ကြောင့် စက်တင်ဘာ ၉ ရက်မှ ၁၅ ရက်အတွင်း ကချင်ပြည်နယ်၊ တနင်္သာရီတိုင်းဒေသကြီးနှင့် ရခိုင်ပြည်နယ်တို့မှအပ နေပြည်တော်ကောင်စီနယ်မြေနှင့် ကျန်တိုင်းဒေသကြီးနှင့် ပြည်နယ်များတွင် ရေကြီးရေလျှံခြင်း၊ မြေပြိုခြင်းများဖြစ်ပေါ်ခဲ့ခြင်းဖြစ်သည်။

▪️ ယင်းဖြစ်စဉ်နှင့်စပ်လျဉ်း၍ ကူညီကယ်ဆယ်ရေးလုပ်ငန်းများက သက်ဆိုင်ရာအဖွဲ့အစည်းနှင့် တာဝန်ရှိသူများက ရေကြီးရေလျှံနေသည့်နေရာများအား ခက်ခက်ခဲခဲဖြင့် သွားရောက်ဆောင်ရွက်ခဲ့ရကြောင်း၊ ရေကြီးရေလျှံမှုကြောင့် ပျက်စီးဆုံးရှုံးမှုများနှင့် စပ်လျဉ်း၍ စက်တင်ဘာ ၁၅ ရက်နေ့တင်ပြမှုအရ တိုင်းဒေသကြီးနှင့်ပြည်နယ် ၇ ခုရှိ မြို့နယ် ၆၉ မြို့နယ်တွင် သေဆုံးမှုအနေဖြင့် နေပြည်တော်တွင် ၄၇ ဦး၊ ကရင်ပြည်နယ်တွင် ငါးဦး၊ မန္တလေးတိုင်းဒေသကြီးတွင် ၇၆ ဦး၊ ရှမ်းပြည်နယ်တွင် ၄၃ ဦးနှင့် ဧရာဝတီတိုင်းဒေသကြီးတွင် တစ်ဦးရှိနေကြောင်း သိရသည်။

▪️ ထို့အပြင်  ပျက်စီးမှု၊ သေဆုံးပျောက်ဆုံးမှုများကို အတည်ပြုထုတ်ပြန်သွားရန်လိုကြောင်း၊ တိုင်းဒေသကြီးနှင့် ပြည်နယ် ၉ ခုတွင် ယာယီရေဘေး ကယ်ဆယ်ရေးစခန်း ၃၈၈ ခုဖွင့်လှစ်ပြီး ကျန်းမာရေးနှင့် ညီညွတ်ပြီး အာဟာရပြည့်ဝသည့် စားရေး၊ သန့်ရှင်းသော သောက်သုံးရေရရှိရေး၊ ကျန်းမာရေးနှင့် အဝတ်အထည်ရရှိရေးတို့ကို တာဝန်ရှိသူများနှင့် အလှူရှင်များက လှူဒါန်းကူညီ ဆောင်ရွက်ပေးလျက်ရှိကြောင်းသိရသည်။

▪️ ရေကြီး၊ရေလျှံမှုဖြစ်စဉ်များကြောင့် ထိခိုက်ပျက်စီးသေဆုံးမှု အနေဖြင့် စက်တင်ဘာ ၁၅ ရက် စာရင်း ဇယားများအရ နိုင်ငံအဝန်း၌ မြို့နယ် ၆၉ မြို့နယ်မှ လူနေအိမ် ၁၀၈၃ လုံး၊ ရုံးဌာန အဆောက်အဦ ၁၄၆ လုံး၊ စာသင်ကျောင်း ၁၀၂၃ ကျောင်း၊ ဘာသာရေးကျောင်း ၃၈၂ ကျောင်း၊ လမ်း/တံတားပျက်စီးမှု ၁၇၇ ခု၊ လျှပ်စစ်မီးတိုင် ၉၆၃ တိုင်၊ ဆက်သွယ်ရေးတိုင် ၈၂ တိုင် ထိခိုက်ပျက်စီးခဲ့ကာ သေဆုံးသူ ၁၇၂ ဦး၊ မျောပါပျောက်ဆုံးသူ ၃၈ ဦးရှိပြီး တိရစ္ဆာန်သေဆုံးမှုအနေဖြင့် ၁၀၅၃၈၈ ကောင်ရှိကြောင်း ကနဦးသိရှိရပြီး ရေဘေးသင့်ဒေသများသို့ လိုအပ်သည့်ကူညီကယ်ဆယ်ရေးလုပ်ငန်းများနှင့် ပြန်လည်ထူထောင်ရေးလုပ်ငန်းများကို အချိန်နှင့်တစ်ပြေးညီ ဆောင်ရွက်နိုင်ရန် သဘာဝဘေးအန္တရာယ်စီမံခန့်ခွဲမှုကော်မတီ (Disaster Management Committee)ဖွဲ့စည်းပြီး ၂၄ နာရီ အရေးပေါ်ရုံးခန်း ဖွင့်လှစ်ထားရှိကြောင်း သိရသည်။

#YMG/NN #Yangon_Times

၁၇ စက်တင်ဘာ ၂၀၂၄

နစက အဖွဲ့ဝင်၊ ဒုတိယဝန်ကြီးချုပ်နှင့် ကာကွယ်ရေးဝန်ကြီးဌာနပြည်ထောင်စုဝန်ကြီးဗိုလ်ချုပ်ကြီး တင်အောင်စန်းသည် တရုတ်ပြည်သူ့သမ္မတနိုင်ငံ ဗဟိုစစ်ကော်မရှင် ဒုတိယဥက္ကဋ္ဌ ဗိုလ်ချုပ်ကြီးဟဲဝေတုန် (General He Weidong) နှင့် တရုတ်    ပြည်သူ့သမ္မတနိုင်ငံ ဘေဂျင်းမြို့တော်တွင် တွေ့ဆုံ၍ နှစ်နိုင်ငံနယ်စပ်ဒေသများ တည်ငြိမ်အေးချမ်းရေးနှင့် တရားဥပဒေစိုးမိုး    ရေးအပါအဝင် ကာကွယ်ရေးပူးပေါင်းဆောင်ရွက်ရေး ကိစ္စတွေကို ဆွေးနွေးခဲ့တယ်လို့ နစကရဲ့ သတင်းထုတ်ပြန်ချက်အရသိရပါတယ်။

ဗိုလ်ချုပ်ကြီးတင်အောင်စန်းသည် တရုတ်ပြည်သူ့သမ္မတနိုင်ငံအမျိုးသား ကာကွယ်ရေးဝန်ကြီးဌာနဝန်ကြီး ဗိုလ်ချုပ်ကြီး  တုန်ကျွင်း (Admiral Dong Jun)၏ ဖိတ်ကြားချက်အရ ပေကျင်းမြို့၌ ကျင်းပပြုလုပ်သည့် (၁၁) ကြိမ်မြောက် ပေကျင်း   ရှန်ကျန်း ဖိုရမ် (11th Beijing Xiangshan Forum) သို့ ပါဝင်တက်ရောက်ခဲ့စဉ်မှာ တရုတ်ဗဟိုစစ်ကော်မရှင် ဒုတိယ ဥက္ကဋ္ဌနှင့် ပေကျင်းမြို့ ပိုင်ယိခန်းမ (Bayi Hall) ၌ စက်တင်ဘာ ၁၃ရက်က တွေ့ဆုံဆွေးနွေးစဉ် အဆိုပါကိစ္စရပ်များကို ဆွေးနွေး     ခဲ့တာဖြစ်ပါတယ်။

ဗိုလ်ချုပ်ကြီးတင် အောင်စန်းသည် တရုတ် ဗိုလ်ချုပ်ကြီး ဟဲဝေတုန်နှင့်တွေ့ဆုံစဉ် နှစ်နိုင်ငံနယ်စပ်ဒေသများ တည်ငြိမ်    အေးချမ်းရေးနှင့် တရားဥပဒေစိုးမိုးရေး၊ ကာကွယ်ရေးဆိုင်ရာ နယ်ပယ်ကဏ္ဍစုံ၌ ပူးပေါင်းဆောင်ရွက်မှုများ တိုးမြှင့်ရေး၊ နှစ်နိုင်ငံဆွေမျိုးပေါက်ဖော် ချစ်ကြည်ရင်းနှီးမှု ပိုမိုခိုင်မာစေရေး၊ စစ်ဘက်နည်းပညာကဏ္ဍ ပူးပေါင်းဆောင်ရွက်မှုများ ဆက်လက်တိုးမြှင့်ဆောင်ရွက်ရေး၊ လေ့ကျင့်ရေးနှင့် သင်တန်းသားများစေလွှတ်ရေး၊ ဒေသတွင်းနှင့် မြန်မာနိုင်ငံ၏ လတ်တလောအခြေအနေများကို ရင်းနှီးပွင့်လင်းစွာ အမြင်ချင်းဖလှယ်ဆွေးနွေးခဲ့ကြတယ်လို့ နစကရဲ့ သတင်းထုတ်ပြန်ချက်   မှာဖော်ပြထားပါတယ်။

ခရီးစဉ်အတွင်းဗိုလ်ချုပ်ကြီးတင်အောင်စန်းအဖွဲ့သည် တရုတ်နိုင်ငံပေကျင်းမြို့ အခြေစိုက်အဆင့်မြင့် စက်မှုနည်းပညာ ဆိုင်ရာ   ကုမ္ပဏီများသို့ သွားရောက်လေ့လာခဲ့ပြီး လေကြောင်းနည်းပညာဆိုင်ရာ ခေတ်မီထုတ်ကုန်များ၊ မောင်းသူမဲ့   လေယာဉ်     ထုတ်လုပ်မှုများ၊ အီလက်ထရောနစ် စစ်ဆင်ရေးနှင့် လေကြောင်းရန်ကာကွယ်ရေးနည်းပညာဆိုင်ရာ စစ်လက်နက်  ပစ္စည်းများကို လေ့လာကြည့်ရှုခဲ့ပြီး နည်းပညာပူးပေါင်းဆောင်ရွက် နိုင်မှုအခြေအနေများကို ကုမ္ပဏီများမှ တာဝန်ရှိသူများနှင့် ဆွေးနွေးညှိနှိုင်ခဲ့တယ်လို့လည်း သတင်းထုတ်ပြန်ထား ပါတယ်။

 (၁၁) ကြိမ်မြောက် ပေကျင်း ရှန်ကျန်းဖိုရမ် (11th Beijing Xiangshan Forum) သို့ နိုင်ငံပေါင်း ၁၀၀ ကျော်မှ ဒုတိယ    ဝန်ကြီးချုပ်များနှင့် ကာကွယ်ရေးဝန်ကြီး ၂၂ ဦး၊ ဒုတိယဝန်ကြီးများ၊ နိုင်ငံတကာအဖွဲ့အစည်းများမှ ကျွမ်းကျင်ပညာရှင်    များအပါအဝင် ကိုယ်စားလှယ်စုစုပေါင်း ၁၈၀၀ ကျော် တက်ရောက်ခဲ့ကြကြောင်းလည်းသိရှိရပါတယ်။

#ymg/knl

#World_News
Published 17 September 2024
▪️ ရုရှားတပ်မတော်ရဲ့ ပုံမှန်စစ်အင်အားကို တပ်သား တစ်သိန်းရှစ်သောင်းတိုးမြှင့်ကာ တာဝန်ထမ်းဆောင်နေတဲ့ စစ်မှုထမ်းပေါင်း ၁ သန်းခွဲသို့ရောက်ရှိရန် သမ္မတ ဗလာဒီမာပူတင်က တနင်္လာနေ့မှာ မိန့်ကြားလိုက်ပြီး ဒါဟာ တရုတ်ပြီးရင် ကမ္ဘာပေါ်မှာ ဒုတိယစစ်အင်အားအကြီးဆုံး ဖြစ်လာမှာပါ။

▪️ ကရင်မလင်ဝက်ဘ်ဆိုက်မှ ထုတ်ပြန်တဲ့အမိန့်အရ လက်နက်ကိုင် တပ်ဖွဲ့တစ်ခုလုံးရဲ့ အင်အားကို ၂.၃၈ သန်းအထိ တိုးမြှင့်ခိုင်းကာ ထိုထဲက ၁ သန်းခွဲက တာဝန်ထမ်းဆောင်နေတဲ့ စစ်မှုထမ်းတွေ ဖြစ်ရမယ်လို့ ပူတင်က မိန့်ကြားခဲ့တာ ဖြစ်ပါတယ်။

▪️ စစ်ရေးစောင့်ကြည့်ရေးအဖွဲ့ တစ်ခုဖြစ်တဲ့ နိုင်ငံတကာ ဗျူဟာလေ့လာရေး အဖွဲ့အစည်း(IISS)ရဲ့ အချက်အလက်များအရ ဒီလိုအင်အားမြှင့်တင်လိုက်ပါက ရုရှားဟာ တာဝန်ထမ်းဆောင်နေတဲ့ တိုက်ခိုက်ရေး စစ်သည်အရေအတွက်မှာ အမေရိကန်နဲ့ အိန္ဒိယတို့ကို ကျော်သွားမှာဖြစ်ပြီး တရုတ်ပြီးရင် ဒုတိယအများဆုံး ဖြစ်လာမှာပါ။

▪️ တရုတ်ကတော့ တာဝန်ထမ်းဆောင်နေတဲ့ စစ်မှုထမ်းအင်အား ၂ သန်းကျော်ရှိနေပါတယ်။

▪️ ဒါဟာ ၂၀၂၂ ဖေဖော်ဝါရီလ ယူကရိန်းပဋိပက္ခနောက်ပိုင်း တတိယအကြိမ်မြောက် စစ်အင်အားတိုးချဲ့လာတာ ဖြစ်ပါတယ်။

▪️ ရုရှားတပ်တွေက စစ်မြေပြင်နယ်စပ် ၁၀၀၀ ကီလိုမီတာခန့်ရှိတဲ့ နေရာတွေထဲက ယူကရိန်းအရှေ့ဘက်မှာ တွန်းအားပေးနေပြီး ရုရှား ခါ့စ်ဒေသမှ ယူကရိန်းတပ်များကို ဖယ်ရှားဖို့ ကြိုးစားနေပါတယ်။

▪️ ရုရှားဟာ ယူကရိန်းထက် လူဦးရေ ၃ ဆကျော်ပိုများသလို စစ်ပွဲမှာပါဝင်ဖို့ အကျိုးအမြတ်ခံစားခွင့် စာချုပ်များဖြင့် အောင်မြင်စွာ တပ်သားစုဆောင်းထားနိုင်ပေမယ့် စစ်မြေပြင်မှာ အဆုံးအရှုံးများခဲ့ပြီး စစ်ပွဲအဆုံးသတ်နိုင်မယ့် အခြေအနေလည်း မတွေ့ရသေးပါဘူး။

▪️ ရုရှားအောက်လွှတ်တော် ကာကွယ်ရေးကော်မတီဥက္ကဌ အန်ဒရီကာတာပိုလော့ဗ်က တာဝန်ထမ်းဆောင်နေတဲ့ စစ်တပ်အင်အား တိုးချဲ့ရတာဟာ လက်ရှိ နိုင်ငံတကာ အခြေအနေများနဲ့ ယခင်နိုင်ငံခြား မိတ်ဖက်များရဲ့ အပြုအမူပုံစံများကြောင့် တိုးချဲ့ရတာဖြစ်ကြောင်း ပြောသွားပါတယ်။

▪️ ရုရှားစစ်တပ်အနေနဲ့ စစ်အင်အား ၁ သန်းခွဲထားရှိဖို့ ဖြစ်နိုင်ပေမယ့် စစ်တပ်လိုအပ်ချက်နဲ့ မကိုက်ညီရင် အဆင်မပြေနိုင်ကြောင်း၊ ဒီအတွက် ကာကွယ်ရေးစရိတ်ကို တကယ်မြှင့်တင်နိုင်ပါ့မလားဆိုတာ စဉ်းစားစရာဖြစ်ကြောင်း နိုင်ငံတကာ ငြိမ်းချမ်းရေးစောင့်ကြည့်ရေး အဖွဲ့မှ ရုရှားစစ်ရေးကျွမ်းကျင်သူ ဒါရာမက်ဆီကော့က ပြောလိုက်ပါတယ်။

#Source: Reuters

#World_Science
Published 17 September 2024

▪️ ကမ္ဘာဂြိုဟ်အတွက် ဒုတိယမြောက်လတစ်စင်း မကြာခင် ထွက်ပေါ်လာမှာဖြစ်ကာ ရက်သတ္တပတ် အနည်းငယ်သာ ကြာမြင့်မှာဖြစ်ပါတယ်။

▪️ အဲဒါကို မမြင်ရတာလည်း ဖြစ်ရင်ဖြစ်နိုင်ပါတယ်။
စက်တင်ဘာလအကုန်မှာ ဂြိုဟ်မွှားတစ်ခုက ကမ္ဘာဂြိုဟ်အတွက် လတစ်စင်းအဖြစ် ၂ လမပြည့်အောင် ပြောင်းလဲသွားမှာ ဖြစ်ပါတယ်။

▪️ ဂြိုဟ်မွှားစောင့်ကြည့်ရေးစနစ် ATLAS က ဩဂုတ် ၇ ရက်နေ့မှာ 2024 PT5 လို့အမည်ပေးထားတဲ့ ဂြိုဟ်မွှားကို တွေ့ရှိခဲ့တာ ဖြစ်ပါတယ်။

▪️ ထိုဂြိုဟ်က ကမ္ဘာ့ဆွဲငင်အားထဲ မရောက်ခင် လက်ရှိမှာ လမ်းကြောင်းတစ်ခုပေါ် ရှိနေပါတယ်။
စပိန်နိုင်ငံ တက္ကသိုလ်တစ်ခုမှ ကားလို့စ်နဲ့ ရာအူးလ်ဒီလာဖွန်တေမာကို့စ်တို့က ဖော်ပြခဲ့တာ ဖြစ်ပါတယ်။

▪️ ထိုဂြိုဟ်သိမ်ဟာ စက်တင်ဘာ ၂၉ ရက်နေ့ကနေ နိုဝင်ဘာ ၂၅ ရက်နေ့အထိ ကမ္ဘာကို တစ်ပတ်နီးပါး လှည့်ပတ်မှာဖြစ်ကာ ထွက်ခွာသွားလိမ့်မယ်လို့ ပြောပါတယ်။

▪️ ဒီအဖြစ်မျိုးက ရှားပါးပေမယ့် အရင်ကလည်း ဖြစ်ဖူးပါတယ်။
ဒီအရာက အတုအပမဖြစ်နိုင်ဘဲ အမှတ်တကယ် နက္ခတ်အဖွဲ့အစည်းမှ ဖြစ်နိုင်တယ်လို့ ဆိုပါတယ်။

▪️ 2024 PT5 က အာဂျူနာဂြိုဟ်သိမ် လမ်းကြောင်းမှ အစပြုတာဖြစ်နိုင်ပြီး ကမ္ဘာဂြိုဟ်နဲ့ ပတ်လမ်းကြောင်းဆင်တူတဲ့ ကမ္ဘာ့အနီးအနားဝတ္ထုများ ရှိတဲ့နေရာဖြစ်ပါတယ်။

▪️ ဒီအကြောင်းတွေကို နက္ခတ္တပညာရှင် တိုနီဒန်းက X ဆိုရှယ်မီဒီယာမှာ ဖော်ပြထားပါတယ်။
၂၀၂၅ ဇန်နဝါရီ ၉ ရက်နေ့မှာ ပြန်သွားမှာဖြစ်ပြီး ၂၀၅၅ မတိုင်ခင်အထိ နောက်ထပ်ရောက်ရှိမှာ မဟုတ်ပါဘူး။

#Source: WION

#World_Health
Published 17 September 2024

▪️ ဆော်ဒီအာရေဗျရှိ ဖေဆယ်ဘုရင်ဆေးရုံနဲ့ သုတေသနဌာနဟာ ပထမဆုံး စက်ရုပ်စနစ် အပြည့်အဝအသုံးပြုတဲ့ နှလုံးအစားထိုးခွဲစိတ်မှုကို ကြာသပတေးနေ့က ပြုလုပ်ခဲ့ကြောင်း ဆော်ဒီမီဒီယာတစ်ခုက ဖော်ပြပါတယ်။

▪️ နှလုံးရောဂါ နောက်ဆုံးအဆင့်ဖြစ်နေတဲ့ အသက် ၁၆ နှစ်အရွယ်လူနာကို ခွဲစိတ်ခဲ့တာဖြစ်ကာ စက်ရုပ်နှင့် အနည်းဆုံးခွဲစိတ်ဝင်ရောက်ခြင်း ပရိုဂရမ်ရဲ့ ညွှန်ကြားရေးမှူး နှလုံးခွဲစိတ်အကြီးအကဲ ဒေါက်တာ ဖာရက်စ်ခါလီယယ်ရဲ့ ထိန်းချုပ်မှုဖြင့် ၂ နာရီခွဲခန့် ကြာမြင့်ခဲ့ပါတယ်။

▪️ ခွဲစိတ်ရေးအဖွဲ့ဟာ လူနာကို ခွဲစိတ်မှုမပြုလုပ်ခင် ၃ ရက်အတွင်း ၇ ကြိမ်တိုင်အောင် စမ်းသပ်လေ့ကျင့်ခဲ့ပါတယ်။

▪️ ဒီလိုနည်းလမ်းဖြင့် ပြုလုပ်ခြင်းက နှလုံးအစားထိုး ခွဲစိတ်မှုမှာ အရင်ကလို ရင်ဘတ်ကို ခွဲရပြီး ပြန်လည်သက်သာရန် လနဲ့ချီစောင့်ဆိုင်းဖို့ မလိုအပ်တော့ဘူးလို့ မျှော်လင့်ရပါတယ်။

▪️ စက်ရုပ်နည်းပညာက ခွဲစိတ်မှုအတိုင်းအတာ အနည်းဆုံးသာ ပြုလုပ်ရတာကြောင့် နာကျင်မှုနည်းပါးခြင်း၊ ပြန်လည်သက်သာချိန် နည်းပါးခြင်း၊ နောက်ဆက်တွဲဆိုးကျိုး နည်းပါးခြင်း၊ လူနာရဲ့ ဘဝနေထိုင်မှု သိသိသာသာ မြင့်မားခြင်းတို့ ရရှိနိုင်မှာဖြစ်ပါတယ်။

▪️ ကမ္ဘာ့ပထမဆုံး စက်ရုပ်ဖြင့် နှလုံးအစားထိုးခွဲစိတ်ခြင်းဟာ ဒီအဖွဲ့အစည်းအတွက်သာမက ၂၀၃၀ ဆော်ဒီရည်မှန်းချက်ဖြစ်တဲ့ အထူးပြုဆေးလောကမှာ ကမ္ဘာ့မှာဦးဆောင်သူ ဖြစ်လာရေးအတွက်ပါ အပြောင်းအလဲဖြစ်လာကာ လူတွေရဲ့ ဘဝနေထိုင်မှု တိုးတက်လာစေရန် ဆန်းသစ်တီထွင်မှုဖြင့် ကုသခြင်းဖြစ်တယ်လို့ ဒေါက်တာက ဆိုပါတယ်။

▪️ ကျန်းမာရေးစောင့်ရှောက်မှု တိုးတက်ရေးကို ထောက်ပံ့ပေးနေတဲ့ တိုင်းပြည်ခေါင်းဆောင်ပိုင်းကိုလည်း ချီးကျူးပြောဆိုသွားပါတယ်။

#Source: The Jerusalem Post

ဂါဇာဒေသ၌ ငြိမ်းချမ်းရေးပြန်လည်ဖော်ဆောင်ကြရန် စစ်ဘေးသင့်ဂါဇာပြည်သူများ အနူးအညွတ်မေတ္တာရပ်ခံ

အော့စ်လိုဝမ်းသဘောတူညီမှု လက်မှတ်ရေးထိုးခြင်း ၃၁ နှစ်ပြည့်မြောက်တဲ့ သောကြာနေ့မှာ စစ်ဘေးသင့်ဂါဇာကမ်းမြောင်မှ ပြည်သူများက ငြိမ်းချမ်းရေး ပြန်လည်ယူဆောင်ပေးဖို ဆန္ဒပြင်းပြစွာ မေတ္တာရပ်ခံခဲ့ကြပါတယ်။
#World_News
Published 16 September 2024
# စစ်ဘေးသင့်ဂါဇာပြည်သူ #ငြိမ်းချမ်းရေးပြန်လည်ဖော်ဆောင်
#YMG #Yangon_Times #Yangon_Media_Group

#Daily_News
Published 16 September 2024

၁။ ရေဘေးသင့်ပြည်သူများ သောက်သုံးရေကြောင့် ရောဂါမရအောင်ဆောင်ရွက်ပေးမည်ဟုဆို

၂။ ပြည်ပနိုင်ငံပေါင်း၄၀ကျော်သို့ ကန်ဒေါ်လာ သန်း၁၃၀ ကျော်တန်ဖိုးရှိ ငါးမျိုးစုံတင်ပို့ထား

၃။ ရွှေဈေး ကျပ်တစ်သိန်းခန့်မြင့်တက်

၄။ ဂါဇာဒေသ၌ ငြိမ်းချမ်းရေးပြန်လည်ဖော်ဆောင်ကြရန် စစ်ဘေးသင့်ဂါဇာပြည်သူများ အနူးအညွတ်မေတ္တာရပ်ခံ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

မုန်တိုင်းငယ်အရှိန်ကြောင့် စက်တင်ဘာလ (၁၆)ရက်ကစပြီး နောက်(၂၄)နာရီအတွင်း ရခိုင်၊ စစ်ကိုင်း၊ ချင်းမှာမိုးသည်းထန်ပြီး သဘာဝဘေးကြုံနိုင်တယ်လို့ မိုးလေဝသနှင့်ဇလဗေဒညွှန်ကြားမှုဦးစီးဌာနမှ သိရပါတယ်။
#Local_News
Published 16 September 2024
#မုန်တိုင်းငယ်အရှိန် #သဘာဝဘေးကြုံနိုင်
#YMG/tthl #Yangon_Times

#Local_News
Published 16 September 2024

▪️ နေပြည်တော်မြို့အဝင်၊ ရာဇသင်္ဂဟလမ်းမကြီးပေါ်မှာ မြို့အဝင်မုခ်ဦးပုံစံ (Conceptual Design) ဒီဇိုင်းရေးဆွဲပေးပို့ရန် နေပြည်တော်စည်ပင်သာယာရေးကော်မတီမှ ဖိတ်ခေါ်ထားကြောင်း သိရသည်။

▪️ ကိုယ်တိုင်ရေးဆွဲထားသည်ဆိုသည့်ဝန်ခံချက်နှင့်  ဒီဇိုင်းရေးဆွဲသူကိုယ်တိုင် စိတ်ကူးအကြံဉာဏ်များကို Presentation ပြုလုပ်ရန်လည်း လိုအပ်ပြီး ပေးပို့လာသောဒီဇိုင်းများထဲမှ ရွေးချယ်ခံရ သော ဒီဇိုင်းများအတွက် ထိုက်သင့်သောချီးမြင့် ငွေများပေးအပ်သွားမည်ဖြစ်သည်ဟုဆိုသည်။

▪️ မုခ်ဦးပုံစံတွင်မြန်မာမှုစုလစ်မွမ်းချွန်ပုံစံထည့်သွင်းရန်လိုအပ်ပြီး အလျား၂၀၀ပေ၊အနံ၅၀ပေခန့် (Clear Span ၁၁၈ပေ)ရှိမည့်မုခ်ဦးအတွက် ဒီဇိုင်းရေးဆွဲရမည်ဖြစ်ပြီးစက်တင်ဘာလ(၃၀)ရက် နောက်ဆုံးထားကာ နေပြည်တော် စည်ပင်သာယာရေးကော်မတီ၊ အင်ဂျင်နီယာဌာန (အဆောက်အအုံ)သို့  အဖွဲ့လိုက်ဖြစ်စေ၊ တစ်ဦးချင်းဖြစ်စေ အရေအတွက် အကန့်အသတ်မရှိ ပေးပို့နိုင်ကြောင်း သိရသည်။

#YMG/tthl #Yangon_Times

#Local_News
Published 16 September 20224

▪️ အီရတ်နိုင်ငံ၌ အခက်အခဲကြုံတွေ့နေရသည့် ချင်းနှင့်ရခိုင်တိုင်းရင်းသူနှစ်ဦးအား အမိနိုင်ငံသို့ ပြန်လည်ခေါ်ဆောင်ခဲ့ကြောင်း သိရသည်။

▪️ နိုင်ငံတော်အစိုးရအနေဖြင့် ပြည်ပတွင်ရောက်ရှိနေသည့် အမိနိုင်ငံ သားများ အခက်အခဲကြုံတွေ့ရပါက နိုင်ငံသားများအပေါ် အလေးအနက် တန်ဖိုးထားသည့်အနေဖြင့်မည်သို့သောအခြေအနေနှင့် တွေ့ကြုံရသည်ဖြစ်စေ မြန်မာသံရုံးနှင့် မြန်မာကောင်စစ်ဝန်ချုပ်ရုံးတို့သည် သက်ဆိုင်ရာ သံရုံးများနှင့် ချိတ်ဆက်၍ အမိနိုင်ငံသားများမြန်မာနိုင်ငံသို့ အမြန်ဆုံး အေးချမ်းလုံခြုံစွာ ပြန်လည်ရောက်ရှိနိုင်ရန် စီစဉ်ဆောင်ရွက်ပေးလျက်ရှိခြင်းဖြစ်သည်။

▪️ ထိုသို့ ဆောင်ရွက်ပေးရာတွင်  အီရတ်နိုင်ငံအာဘေးမြို့၌ အခက်အခဲကြုံတွေ့နေရသည့် မြန်မာနိုင်ငံသားချင်းတိုင်းရင်းသူ Lal Lawm Tluangi နှင့် ရခိုင်တိုင်းရင်းသူ မစန္ဒီလင်းတို့အား အမိနိုင်ငံသို့ အမြန်ဆုံးပြန်လည်ပို့ဆောင်နိုင်ရန်ကိုင်ရိုမြို့ရှိ မြန်မာသံရုံးသည် ကာဒစ္စတန်ကိုယ်ပိုင်အုပ်ချုပ်ခွင့်ရဒေသ အစိုးရထံသံတမန်စာပေးပို့၍ ညှိနှိုင်းဆောင်ရွက်ခြင်း၊ SEED Organi-zation နှင့် ပူးပေါင်းဆောင်ရွက်ခြင်းတို့ဖြင့် ၎င်းတို့နှစ်ဦးသည် မြန်မာနိုင်ငံသို့ ပြန်လည်ထွက်ခွာ ခွင့် (Exit permit) ရရှိခဲ့ရာ စက်တင်ဘာ ၁၂ ရက်တွင် Erbil – Istanbul – Bangkok – Yangon ခရီးစဉ်ဖြင့် ထွက်ခွာခဲ့ကြပြီး စက်တင်ဘာ ၁၄ ရက် နံနက် ၁၁ နာရီခွဲတွင် ရန်ကုန်မြို့သို့ ပြန်လည်ရောက်ရှိခဲ့‌ ကြောင်း သိရသည်။

▪️ နိုင်ငံတော် အစိုးရသည် ပြည်ပတွင် အလုပ်လုပ်ကိုင်စဉ် အခက်အခဲကြုံတွေ့ရသည့် မြန်မာနိုင်ငံသားများအား မြန်မာ သံရုံးနှင့် မြန်မာကောင်စစ်ဝန်ချုပ်ရုံးတို့မှ ညှိနှိုင်းကူညီဆောင်ရွက်မှုဖြင့် အမိနိုင်ငံသို့ ပြန်လည်ခေါ်ဆောင်ပေးလျက်ရှိကြောင်း သိရသည်။

#YMG/NN #Yangon_Times

၁၆ စက်တင်ဘာ ၂၀၂၄

“စူပါတိုင်ဖွန်းယာဂီဟာ မြန်မာနိုင်ငံနေရာအများစုကို ထိခိုက်စေခဲ့ပြီး မြန်မာနိုင်ငံရဲ့မကြာသေးခင်သမိုင်းကြောင်းအရ အဆိုး  ရွားဆုံး ရေကြီးမှုတစ်ခုဖြစ်ခဲ့ရတယ်” လို့  မြန်မာနိုင်ငံဆိုင်ရာ ကမ္ဘာ့စားနပ်ရိက္ခာအစီအစဉ် ဌာနေကိုယ်စားလှယ် ရှီလာ   မက်သယူးက သတင်းထုတ်ပြန်ချက်မှာ ပြောဆိုထားတယ်လို့ အေအက်ဖ်ပီက သတင်းရေးသားပါတယ်။

ဒါပေမယ့် စိုက်ပျိုးရေးလုပ်ငန်းတွေပေါ် ထိခိုက်မှုအသေးစိတ် အတိအကျကို မသိရသေးဘူးလို့ သူမက ဆက်ပြောပါတယ်။

“ ဒါပေမယ့် သေချာတာတစ်ခုကတော့ စားနပ်ရိက္ခာလုံခြုံရေးအပေါ် ထိခိုက်မှုကတော့ အကြီးအကျယ်ပျက်စီးတာပဲ”လို့ သူမကဖြည့်စွက်ပြောပါတယ်။

မြန်မာနိုင်ငံမှာရေကြီးရေလျှံမှုကြောင့်  ၁၁၃ ဦးသေဆုံးခဲ့ပြီး လူပေါင်း သုံးသိန်းနှစ်သောင်းကျော်ကို ရွှေ့ပြောင်းပေးခဲ့ရပါတယ်။

မြန်မာနိုင်ငံမှာ ၂၀၁၁ခုနှစ်နှင့် ၂၀၁၅ တို့မှာ ရေကြီးရေလျှံမှုဆိုးဆိုးရွားရွားဖြစ်ခဲ့ပြီး လူပေါင်း ၁၀၀ ကျော်သေဆုံးခဲ့ပါတယ်။  ၂၀၀၈ခုနှစ် နာဂစ်ဆိုင်ကလုံးမုန်တိုင်းကြောင့်  လူပေါင်း ၁၃၈,၀၀၀ ကျော် သေဆုံးပျောက်ဆုံးဖြစ်ခဲ့ရပါတယ်။

နောက်ဆုံးအကျပ်အတည်းကြောင့် အစိုးရအနေနှင့် နိုင်ငံခြားအကူအညီကို မတောင်းခံစဖူး တောင်းခံခဲ့ပါတယ်။ အိမ်နီးချင်း အိန္ဒိယက ရိက္ခာခြောက်၊အဝတ်အစားနှင့်ဆေးဝါး ၁၀ တန်ကူညီဖို့ရှိနေပါတယ်။

Source AFP

ရွှေရည်ညွန်းဈေးကျပ်တစ်သိန်းခန့် အထိမြင့်တက်လာတယ်လို့ ရန်ကုန်တိုင်းဒေသကြီး ရွှေလုပ်ငန်းရှင်များအသင်းက သိရပါတယ်။
#Local_News
Published 16 September 2024
#ရွှေဈေးမြင့်တက် #ရွှေရည်ညွန်းဈေး
#YMG/NN #Yangon_Times