Published_ 26 February 2024

နိုင်ငံတော်အနေဖြင့် လျှပ်စစ်မော်တော် ယာဉ်များနှင့်ပတ်သက်၍ မူဝါဒများ ရေးဆွဲ၍ ဖွံဖြိုးတိုးတက်အောင် ပံ့ပိုးဆောင်ရွက် ပေးလျက်ရှိသဖြင့် လျှပ်စစ်ဘတ်စ်များ တပ်ဆင်ထုတ်လုပ်မည့် လုပ်ငန်းများကို လျင်မြန်စွာ အကောင်အထည်ဖော်ဆောင်ရန် စက်မှုဝန်ကြီး ဒေါက်တာချာလီသန်းက တိုက်တွန်းပြောကြားခဲ့ပါတယ်။

စက်မှုဝန်ကြီး ဒေါက်တာချာလီသန်းသည် ဖေဖော်ဝါရီ ၂၅ ရက် နံနက်ပိုင်းတွင် ရန်ကုန်တိုင်းဒေသကြီး မင်္ဂလာဒုံမြိုနယ် ထောက်ကြန့်ရှိ Daewoo Bus များ ထုတ်လုပ် သည့် အလုပ်ရုံသိုရောက်ရှိပြီး ထုတ်လုပ်တပ်ဆင်ထားသည့် Daewoo Bus များကို လှည့်လည်ကြည့်ရှုစစ်ဆေးသည်။

ကုမ္ပဏီတာဝန်ရှိသူများအနေဖြင့် လူမှုတာဝန်သိမှုလုပ်ငန်းများ ဆောင်ရွက်ပေးရန်၊ လျှပ်စစ်သုံးမော်တော်ယာဉ်များအတွက် Charging Station နှင့် ရွှေ့လျား Charger တို့ကို သတ်မှတ်ချက်များနှင့်အညီ ဆောင်ရွက်ပေးဖို့ ပြောကြားခဲ့ပါတယ်။

ထို့ပြင်ဝန်ကြီးသည် ပဲခူးတိုင်းဒေသကြီး ရေနီမြိုရှိ စက္ကူစက်ရုံ(ရေနီ)သို ရောက်ရှိပြီး အသေးစားပျော့ဖတ်နှင့် စက္ကူထုတ်လုပ်သည့်စက်များ ပြုပြင်နေမှုနှင့် ချိန်ညှိခြင်းလုပ်ငန်း ဆောင်ရွက်နေမှုတို့ကို စစ်ဆေးခဲ့ပြီး စက်အရန်ပစ္စည်းများ ထုတ်လုပ်ပေးသည့် စက်ပစ္စည်းများ ပြုပြင်မွမ်းမံပေးရသည့် စက်ပစ္စည်းများကို ကောင်းမွန်အောင် ပြုပြင်ထားဖို့ ပြောကြားခဲ့တယ်လို့ သိရပါတယ်။
Ymg_mnn
#Yangon_Media_Group
#Local_News
#Published_ 26 February 2024
#YMG_News #Yangon_Times #Yangon_Media_Group

Published 26 February 2024

တရုတ်နည်းပညာကုမ္ပဏီကြီး Honor က Magic 6 Pro စမတ်ဖုန်းအသစ်ကို ဖေဖော်ဝါရီ ၂၅ ရက်နေ့မှာ တစ်ကမ္ဘာလုံးအတွက် ထုတ်လုပ်မိတ်ဆက်လိုက်ပါတယ်။

ယင်းတို့ပြသခဲ့တဲ့ AI လုပ်ဆောင်ချက်တစ်ခုဟာ အသုံးပြုသူတွေရဲ့ မျက်လုံးကို လိုက်လံမှတ်သားပြီး ဖုန်းမျက်နှာပြင်ကို ကြည့်လိုက်ရုံဖြင့် ယင်းတို့ရဲ့ မော်တော်ကားတွေကို အဝေးကနေ ဖွင့်ခြင်း၊ ရွှေ့ခြင်းတို့ ပြုလုပ်နိုင်မှာ ဖြစ်ပါတယ်။

ထိုနည်းပညာက တရုတ်မှာ ထွက်ရှိပြီးသားဖြစ်ပြီး နိုင်ငံရပ်ခြားတွေမှာ အသုံးပြုနိုင်ရန် ကုမ္ပဏီက ကြိုးပမ်းနေပါတယ်။

၂၀၂၀ နိုဝင်ဘာလမှာ Huawei Technologies က Honor ကို ရောင်းချခဲ့ကာ အခုဆိုရင် တရုတ်နိုင်ငံပိုင် Shenzhen Zhixin New Information Technology ကုမ္ပဏီမှ ပိုင်ဆိုင်ထားတာ ဖြစ်ပြီး ပြီးခဲ့တဲ့ တနင်္ဂနွေနေ့ မတိုင်ခင်အထိ ထိုနည်းပညာဟာ တရုတ်ပြည်မှာသာ ရရှိခဲ့တာပါ။

ဘာစီလိုနာမှာ တနင်္လာနေ့က စတင်မယ့် နှစ်စဉ်ကမ္ဘာလုံးဆိုင်ရာ မိုဘိုင်းကွန်ဂရက် (MWC)ပွဲကြီးမတိုင်ခင် နည်းပညာနဲ့ ဆက်သွယ်ရေး ကုမ္ပဏီများက ထုတ်ကုန်အသစ်များ၊ လုပ်ဆောင်ချက်အသစ်များကို ထုတ်လုပ်ပြသလာကြကာ ဖွံ့ဖြိုး AI ဖြင့် စီးပွားရေးကဏ္ဍ မြှင့်တင်ရန် ကြိုးပမ်းလာကြပါတယ်။

စမတ်ဖုန်း ထုတ်လုပ်သူတွေက စိတ်လှုပ်ရှားဖွယ် ကောင်းတဲ့ AI စနစ်များဖြင့် ဈေးကွက်မြှင့်တင်ရန် မျှော်လင့်နေပေမယ့် ဖွံ့ဖြိုး AI တွေဟာ တရားရေးဆိုင်ရာ၊ လူမှုကျင့်ဝတ်ဆိုင်ရာ စိုးရိမ်စရာတွေ ဖြစ်လာနိုင်တယ်လို့ ကျွမ်းကျင်သူများက ဆိုလာကြပါတယ်။

တရုတ်စမတ်ဖုန်းဈေးကွက်မှာ Apple ၊ Oppo တို့လို အမှတ်တံဆိပ်တွေနဲ့ ယှဉ်ပြိုင်နေရတဲ့ Honor က ChatGPT လိုမျိုးနည်းပညာတစ်ခုဖြစ်တဲ့ LlaMA 2 စနစ်ကိုလည်း ထည့်သွင်းရန် ကြိုးပမ်းနေပါတယ်။

၂၀၂၃ မှာ တရုတ်ပြည်အတွင်း Apple က ဈေးကွက်ရှယ်ယာ ၁၇.၃ ရာခိုင်နှုန်းရှိပြီး Honor ကတော့ ၁၆.၈ ရာခိုင်နှုန်းရှိကြောင်း နိုင်ငံတကာ အချက်အလက် ကော်ပိုရေးရှင်းမှ သိရပါတယ်။

ဒါ့အပြင် Honor က အက်ပ်လီကေးရှင်းတွေကို စက်ပစ္စည်းတစ်ခုကနေ နောက်တစ်ခုသို့ ပွတ်ဆွဲလိုက်ရုံဖြင့် ရွှေ့ပြောင်းနိုင်မယ့် AI လုပ်ဆောင်ချက်ပါဝင်တဲ့ MagicBook Pro 16 လက်ပ်တော့အသစ်ကိုလည်း ပြသခဲ့ပါတယ်။
Source: CNA
#World_News
#Published_ 26 February 2024
#YMG_News #Yangon_Times #Yangon_Media_Group

Published 26 February 2024

ဝက်သက်ကာကွယ်ရေး အတိုင်းအတာများ အရေးတကြီး မဆောင်ရွက်ဘူးဆိုရင် ကမ္ဘာနိုင်ငံအားလုံးရဲ့ တဝက်ကျော်လောက်ဟာ ယခုနှစ်အကုန်မှာ ဝက်သက်ရောဂါပျံ့ပွားခြင်း အန္တရာယ် အလွန်မြင့်မားနေကြောင်း WHO က အင်္ဂါနေ့မှာ သတိပေးလိုက်ပါတယ်။

ကိုဗစ်၁၉ ကပ်ရောဂါကာလတွေမှာ ဝက်သက်ကာကွယ်ဆေး မထိုးကြတာကြောင့် နေရာအများအပြားမှာ ဝက်သက်ကူးစက်မှု မြင်တွေ့လာရပါတယ်။

ကာကွယ်ဆေး မထိုးခဲ့ရတာကို အလျင်အမြန် မဖာထေးနိုင်ဘူးဆိုရင် ဝက်သက်ပျံ့နှံ့လာလိမ့်မယ်လို့ WHO မှ နာတာရှာခရိုးခရော့ဖ်က ဂျီနီဗာမီဒီယာရှင်းလင်းပွဲမှာ ပြောကြားလိုက်ပါတယ်။

အစိုးရတွေဘက်က စီးပွားရေးပြဿနာတွေ၊ ပဋိပက္ခတွေလောက် ဒီရောဂါကို အရေးမစိုက်တာကြောင့် ကလေးတွေကို ကာကွယ်ပေးဖို့ အလောတကြီး တောင်းဆိုလိုက်ပါတယ်။

ဝက်သက်ဟာ လေထဲကနေ အလွန်ကူးစက်တတ်တဲ့ ဗိုင်းရပ်စ်မျိုးဖြစ်ပြီး အသက် ၅ နှစ်အောက်ကလေးတွေမှာ အများဆုံး ကူးစက်တတ်ပါတယ်။

ကာကွယ်ဆေး ၂ ကြိမ်ထိုးပြီး ရောဂါကာကွယ်နိုင်ကာ ၂၀၀၀ ခုနှစ်နောက်ပိုင်း အသက်ပေါင်းသန်း ၅၀ ကျော်ကို ကယ်ဆယ်ထားနိုင်ခဲ့ပါတယ်။

ယမန်နှစ်ကတော့ ရောဂါကူးစက်မှု ၇၉ ရာခိုင်နှုန်းမြင့်တက်လာတယ်လို့ WHO အချက်အလက်များအရ သိရပါတယ်။

ဆင်းရဲတဲ့နိုင်ငံတွေမှာ သေနှုန်းမြင့်မားပြီး အဆင့်မြင့်တဲ့နိုင်ငံတွေနဲ့ အလယ်အလတ် နိုင်ငံတွေမှာလည်း အန္တရာယ်များလာနိုင်ပါတယ်။
Source: The Jerusalem Post.
#World_Health
#Published_ 26 February 2024
#YMG_News #Yangon_Times #Yangon_Media_Group

Published 26 February 2024

အစ္စရေးလ်နိုင်ငံ ဘားအီလန်တက္ကသိုလ်မှ သုတေသီများက ဓာတ်ခွဲခန်းထုတ် ဝှေးစေ့များဖန်တီးကာ အမျိုးသားများ မျိုးမပွားနိုင်တဲ့ ပြဿနာကို ဖြေရှင်းနိုင်ရန် ရည်ရွယ်နေပါတယ်။

ကြွက်ဝှေးစေ့မှ ထုတ်ယူထားတဲ့ ဆဲလ်များဖြင့် အင်္ဂါတုများ ဖန်တီးခဲ့တာဖြစ်ပြီး ကြွက်တွေရဲ့ သဘာဝဝှေးစေ့ လုပ်ဆောင်ချက် တည်ဆောက်ပုံတွေအတိုင်း ဆင်တူနေပါတယ်။

ဒေါက်တာ နစ်ဇန်ဂိုနင်ဦးဆောင်တဲ့ သုတေသီအဖွဲ့က မျိုးမပွားနိုင်တဲ့ ပြဿနာကို ဖြေရှင်းနိုင်ရန် လူသားပင်မစတမ်ဆဲလ်တွေကနေ လူသားဝှေးစေ့လိုမျိုး ရရှိအောင် ဖန်တီးနိုင်ဖို့ ရည်ရွယ်ထားပါတယ်။

သုတ်ပိုးနည်းပါးခြင်း၊ ပုံစံမူမမှန်ခြင်းတို့ကြောင့် မြုံတာဖြစ်တယ်လို့ သိထားကြပေမယ့် ဘာအကြောင်းကြောင့်လဲ၊ ဘယ်လိုဗီဇပြောင်းလဲမှုကြောင့်လဲ၊ ဝှေးစေ့လုပ်ဆောင်ချက်တွေ ဘာတွေပြောင်းသွားလဲ ဆိုတာတွေကိုတော့ အတိအကျ မသိရသေးဘူးလို့ ဆိုပါတယ်။

အခုတော့ ဖန်တီးထားတဲ့ အင်္ဂါတုတွေနဲ့ လေ့လာနိုင်တော့မယ်လို့ ဂိုနင်က ဆိုပါတယ်။

ဇီဝပညာရှင်တွေဟာ ပင်မစတမ်ဆဲလ်ကနေ ဦးနှောက်၊ ကျောက်ကပ်၊ အူတို့နဲ့ ဆင်တူတဲ့ သုံးဖက်မြင် အင်္ဂါတုတွေကိုလည်း ထုတ်လုပ်ထားပြီး ဖြစ်ပါတယ်။

ကြွက်ဝှေးစေ့တုတွေဟာ အချိန် ၉ ပတ်လောက်အထိ ကောင်းစွာလုပ်ဆောင်နိုင်ပြီး သုတ်ပိုးဖြစ်ပေါ်ရန် လုံလောက်တဲ့ အချိန်ပမာဏ ဖြစ်ပါတယ်။

ဝှေးစေ့တွေရဲ့ အဓိကလုပ်ဆောင်ချက် ၂ မျိုးက သုတ်ပိုးဆဲလ်များ ထုတ်လုပ်၊ သိုလှောင်၊ ရင့်မှည့်ခြင်းနဲ့ တက်စ်တိုစတီရုန်း ဟော်မုန်းထုတ်လုပ်ခြင်းတို့ ဖြစ်ပါတယ်။

မွေးမြူရေးလုပ်ငန်းမှာလည်း ဒီနည်းပညာကို အသုံးပြုမယ်ဆိုရင် လိုချင်တဲ့ တိရိစ္ဆာန် အထီးအမတွေကို ရရှိနိုင်ပြီး ထုတ်လုပ်ရေးပိုင်းမှာ တိုးတက်စေနိုင်တယ်လို့ ဆိုလိုက်ပါတယ်။
Source: New York Post
#World_Science
#Published_ 26 February 2024
#YMG_News #Yangon_Times #Yangon_Media_Group

၂၅ ဖေဖော်ဝါရီ ၂၀၂၄

ထိုင်းဝန်ကြီးချုပ် ဆရက်သာ သာဗီဆင်းဟာ စနေနေ့ညနေပိုင်းမှာ သုဝဏ္ဏဘူမိလေဆိပ်ကို ကြိုတင်အသိမပေးဘဲ ရှောင် တစ်ခင် ဝင်ရောက်စစ်ဆေးပြီး လေဆိပ်မှာ ဆိုက်ရောက်နှင့်ထွက်ခွာခရီးသည်တွေအတွက် လုပ်ငန်းစဉ်တွေဟာ စိတ်ပျက်စရာ    ကောင်းနေဆဲပဲဆိုတာ တွေ့ရှိခဲ့ရတယ်လို့ဆိုပါတယ်။

ဆရက်သာဟာ သူ့ရဲ့ အိတ်စ်(တွစ်တာ)အကောင့်ကနေ စနေနေ့ညမှာ အဲဒါကိုကြေညာခဲ့တာဖြစ်ပါတယ်။ သူဟာ ယခုစစ်ဆေး  မှုမတိုင်ခင် ဖေဖော်ဝါရီ (၅)ရက်နေ့မနက်ပိုင်းမှာလည်း အဲဒီလေဆိပ်ကို မပြောမဆိုဘဲ ရှောင်တစ်ခင်ဝင်စစ်ဆေးခဲ့ပါသေး တယ်။

“ သုဝဏ္ဏဘူမိလေဆိပ်က ဝန်ဆောင်မှုစနစ်ကို  လေဆိပ်ကို ကြိုတင်အကြောင်းမကြားဘဲ ကျွန်တော်သွားစစ်ကြည့်တာ။ အဲဒီလိုမျိုး မနက်ပိုင်းမှာ တစ်ခါ ကျွန်တော်လုပ်ခဲ့သေးတယ်။ ဒီနေ့တော့ ညနေပိုင်းလာစစ်ဆေးကြည့်တာ။ ခရီးသည်တွေ ပုံနေတာပဲ” လို့ သူက အိတ်စ်စာမျက်နှာမှာ ပို့စ်ရေးတင်ခဲ့ပါတယ်။

ဆိုက်ရောက်နှင့်ထွက်ခွာ လုပ်ငန်းစဉ်တွေဟာ သိပ်ရှည်လျားနေတုန်းပဲလို့သူတွေ့ခဲ့တယ်လို့ ဝန်ကြီးချုပ်က ပြောပါတယ်။

“ ခရီးသည်ကားထဲက ထွက်တဲ့အချိန်ကစပြီး ချက်အင်ကောင်တာဝင်လာ။ ပြီးတော့လုံခြံရေးစနစ်ကိုဖြတ်သန်း။ နောက်ဆုံး လေယာဉ်စောင့်ဖို့ လေဆိပ်ထဲရောက်သွားချိန်အထိ ကျွန်တော်အချိန်မှတ်ထားတယ်”

“ ဆိုက်ရောက်အတွက်လည်း ခရီးသည် လေယာဉ်ပေါ်ကဆင်းလာပြီး လူဝင်မှုကောင်တာတွေကိုရောက်တဲ့အထိ အချိန်မှတ် ထားတယ်။ လုပ်ငန်းစဉ်တွေ အဆင့်လိုက်အားလုံးအသေးစိတ် ကျွန်တော်စစ်ကြည့်တယ်။ အဲဒီအခါ အချိန်အတော်ကြာတာပဲ လို့တွေ့ရတယ်” လို့ သူကပြောပါတယ်။

ဆရက်သာက တာဝန်ခံအရာရှိတွေကို သူတို့အနေနှင့်လုပ်ငန်းဆောင်ရွက်တဲ့အချိန်တွေ လျှော့ချပေးနိုင်မလားမေးကြည့်တယ်။  အဖြေကတော့ လုပ်ငန်းတွေဆောင်ရွက်တဲ့အချိန်က သိပ်မသေချာဘူးလို့ပြောတယ်လို့ဆိုပါတယ်။

“ ဒီကိစ္စ အလျင်စလိုကို တိုးတက်မှုရှိဖို့လိုပြီ” လို့ ဆရက်သာကပြောပါတယ်။

သူ့အနေနှင့် ထိုင်းလေဆိပ်အာဏာပိုင်ဌာနနှင့် လူဝင်မှုဌာနက အရာရှိကြီးတွေကို လူတွေအများဆုံးဖြစ်နေတဲ့ အချိန်တွေမှာ အလုပ်ခန်းထဲကနေထွက်ပြီး သူတို့ကိုယ်တိုင် လာကြည့်စေချင်တယ်လို့ပြောပါတယ်။အဲဒါမှသာ ဘယ်နေရာမှ တစ်ဆို့နေတယ် ဆိုတာကို သူတို့တွေ့ရှိအဖြေရှာနိုင်ကြလိမ့်မယ်လို့ ထိုင်းဝန်ကြီးချုပ်ကပြောပါတယ်။

“ ကျွန်တော် လေဆိပ်ကို နောက်တစ်ခေါက် မပြောဘဲ လုပ်ငန်းအဆင့်ဆင့်ကို အသေးစိတ် ထပ်လာစစ်ဦးမယ်” လို့ ဆရက်သာက အိစ်စာမျက်နှာပို့စ်မှာရေးသားထားပါတယ်။

“ ကျွန်တော်တို့ဟာ ထိုင်းနိုင်ငံကို လေကြောင်းပျံသန်းရေး ဗဟိုချက်မဖြစ်အောင် တွန်းတွန်းတိုက်တိုက်လုပ်နေတယ်။ နိုင်ငံခြား ကမ္ဘာလှည့်ခရီးသွားတွေကို တံခါးဖွင့်ထားတယ်။ အုဲါကြောင့် လုပ်ငန်းလည်ပတ်နေတဲ့ အရာရှိတွေဟာ ဝန်ဆောင်မှုစိတ်ဓာတ် မွေးဖို့လိုတယ်။ ကမ္ဘာလှည့်ခရီးသွားတွေကို စောင့်ရှောက်ရမယ်။ အဲဒါမှသာ သူတို့ လေယာဉ်တွေထဲကနေ ထွက်ခွာသွာတဲ့ အချိန်မှာ ကျေနပ်အထင်ကြီးပြီး ကျန်ခဲ့လိမ့်မယ်” လို့ သူကပြောလိုက်ပါတယ်။

@ ymg/knl

@Source_Nation

25 February 2024

ပြည်နယ်နှင့် တိုင်း‌ဒေသကြီးအဆင့် "ဘိလိယက်နှင့် စနူကာပြိုင်ပွဲ"ကို ဖေဖော်ဝါရီ(၂၄)ရက်မှ မတ် (၁)ရက်အထိ ကျင်းပသွားမည်ဖြစ်ကြောင်းသိရသည်။

၂၀၂၃-၂၀၂၄ ခုနှစ် ပြည်နယ်နှင့် တိုင်းဒေသကြီး ဘိလိယက်နှင့် စနူကာပြိုင်ပွဲကို  နေပြည်တော်ဝဏ္ဏသိဒ္ဓိအားကစားကွင်းရှိ ဘိလိယက်နှင့် စနူကာအားကစားရုံ၌ ကျင်းပသွားမည်ဖြစ်သည်။

ပြိုင်ပွဲသို့ ပြိုင်ပွဲဝင်အမျိုးသားအသင်း ၁၃ သင်းနှင့် အမျိုးသမီး အသင်း ၁၀ သင်းတို့ ဝင်ရောက်ယှဉ်ပြိုင်သွားမည်ဖြစ်ရာ အားကစားကို စိတ်ပါဝင်စားသည့် မိဘပြည်သူများအနေဖြင့် မည်သူမဆို (အခမဲ့) လာရောက်ကြည့်ရှုအားပေးနိုင်ကြောင်း သိရသည်။

၂၀၂၃-၂၀၂၄ ခုနှစ် ပြည်နယ်နှင့် တိုင်းဒေသကြီး ဘိလိယက်နှင့် စနူကာပြိုင်ပွဲ ဖွင့်ပွဲအခမ်းအနားကို 
ဖေဖော်ဝါရီလ(၂၅)ရက်တွင်ကျင်းပခဲ့ပြီး အခမ်းအနားသို့ နိုင်ငံတော်စီမံအုပ်ချုပ်ရေးကောင်စီအဖွဲ့ဝင် ဒေါ်ဒွဲဘူ၊ ပိုးရယ်အောင်သိန်း၊ ဒေါက်တာမှုထန်၊ ဒေါက်တာဘရွှေ၊ ခွန်စံလွင်၊ ဦးရွှေကြိမ်းနှင့် ဦးရန်ကျော်၊ ပြည်ထောင်စုဝန်ကြီးများ၊ ဒုတိယဝန်ကြီးများ၊ ဌာနဆိုင်ရာ တာဝန်ရှိသူများ၊ မြန်မာနိုင်ငံ ဘိလိယက်နှင့်စနူကာအဖွဲ့ချုပ်တို့မှ တာဝန်ရှိသူများ၊ ဖိတ်ကြားထားသည့် ဧည့်သည်တော်များ၊ ပြိုင်ပွဲဝင်အသင်းများ မှ အုပ်ချုပ်သူ/နည်းပြများနှင့် အားကစားသမားများ တက်ရောက်ကြသည်။

အခမ်းအနားတွင် မြန်မာနိုင်ငံ အိုလံပစ်ကော်မတီဥက္ကဋ္ဌ အားကစားနှင့် လူငယ်ရေးရာဝန်ကြီးဌာန ပြည်ထောင်စုဝန်ကြီး ဦးမင်းသိန်းဇံက ပြည်နယ်နှင့် တိုင်းဒေသကြီး ဘိလိယက်နှင့် စနူကာပြိုင်ပွဲသို့ လာရောက် ယှဉ်ပြိုင်ကြသည့် အားကစားမောင်/မယ်များသည် မိမိတို့ကိုယ်စားပြုယှဉ်ပြိုင်သည့် ပြည်နယ်နှင့် တိုင်းဒေသကြီးအသင်း အနိုင်ရရှိရေးအတွက် မိမိတို့၏ အစွမ်းအစ၊ အရည်အသွေးများကို အစွမ်းကုန်ဖော်ထုတ်ပြသပြီး ကြိုးစားယှဉ်ပြိုင်သွားကြစေလိုကြောင်း၊ အားကစားသမားအချင်းချင်း ချစ်ကြည်ရင်းနှီးစွာ အားကစားစိတ်ဓာတ်အပြည့်အဝဖြင့် အကောင်းဆုံး ပါဝင်ယှဉ်ပြိုင်သွားရန် လိုအပ်ကြောင်း၊ 

ထို့ပြင် အားကစားသမားကောင်းများ ပီသစွာ သတ်မှတ်ထားသည့် စည်းမျဉ်း/ စည်းကမ်းများကို လေးစားလိုက်နာကြစေလိုကြောင်း၊ ယခု ပြိုင်ပွဲမှတစ်ဆင့် နိုင်ငံတော်က အားထားရသည့် နိုင်ငံ့ဂုဏ်ဆောင် အားကစားသမားကောင်းများ ဖြစ်လာအောင် ကြိုးစားသွားကြရန် တိုက်တွန်းမှာကြားရင်း ၂၀၂၃-၂၀၂၄ ခုနှစ် ပြည်နယ် နှင့်တိုင်းဒေသကြီး ဘိလိယက်နှင့် စနူကာပြိုင်ပွဲကို ဖွင့်လှစ်ပေးလိုက်ကြောင်း ပြောကြားခဲ့သည်။
Yamgon_Times/tthl
#Local_News
#Published_ 25 February 2024
#YMG_News #Yangon_Times #Yangon_Media_Group

Published 25 February 2024

တနင်္သာရီတိုင်းဒေသကြီး၊ ထားဝယ်နှင့်လောင်းလုံးမြို့တွင် အမြင့်ဆုံးအပူချိန်စံချိန်သစ်တင်ခဲ့ကြောင်း 
မိုးလေဝသနှင့် ဇလဗေဒညွှန်ကြားမှုဦးစီးဌာန၏ ထုတ်ပြန်ချက်အရသိရသည်။

၂၀၂၄ ခုနှစ်၊ ဖေဖော်ဝါရီလ ၂၅ ရက်နေ့တွင် မိုးလေဝသနှင့် ဇလဗေဒညွှန်ကြားမှုဦးစီးဌာနမှ ထုတ်ပြန် သည့် ဖေဖော်ဝါရီလ၏ အမြင့်ဆုံးအပူချိန်စံချိန်သစ်များအဖြစ်ထုတ်ပြန်လိုက်ခြင်း ဖြစ်သည်။

ထားဝယ်တွင် ယခင်က အမြင့်ဆုံးအပူချိန်စံချိန် ၃၈ ဒီဂရီစင်တီဂရိတ်ပဲရှိခဲ့ရာမှ ဖေဖော်ဝါရီလ၂၄ရက်တွင် အမြင့်ဆုံးအပူချိန်စံချိန်သစ်အဖြစ် ၃၈.၃ ဒီဂရီစင်တီဂရိတ်အထိရှိကာ စခန်းဖွင့်သည့်နှစ်မှစပြီး နှစ်ပေါင်း(၇၈)နှစ်အတွင်းအပူဆုံး အပူချိန်အဖြစ် စံချိန်တင်ခဲ့ခြင်းဖြစ်သည်။

လောင်းလုံးတွင် ယခင်က အမြင့်ဆုံးအပူချိန်စံချိန် ၃၇.၅ ဒီဂရီစင်တီဂရိတ်ပဲရှိခဲ့ရာမှ ဖေဖော်ဝါရီ လ၂၄ရက်တွင် အမြင့်ဆုံးအပူချိန်စံချိန်သစ်အဖြစ် ၃၇.၈ ဒီဂရီစင်တီဂရိတ်အထိရှိကာ စခန်းဖွင့်သည့်နှစ်မှစပြီး နှစ်ပေါင်း(၄၁)နှစ်အတွင်းအပူဆုံး အပူချိန်အဖြစ် စံချိန်တင်ခဲ့ခြင်းဖြစ်သည်။

တနင်္သာရီတိုင်းဒေသကြီးသည်မြန်မာနိုင်ငံတောင်ပိုင်းဒေသတွင်ပါဝင်ပြီးယခုနှစ်တွင်  အယ်နီညိုသက်ရောက်နိုင်သည့် ဒေသတစ်ခုဖြစ်ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနမှသိရသည်။
Yamgon_Times/tthl
#Local_News
#Published_ 25 February 2024
#YMG_News #Yangon_Times #Yangon_Media_Group

၂၅ ဖေဖော်ဝါရီ ၂၀၂၄

ရှန်ဟိုင်းပူးပေါင်းဆောင်ရွက်ရေးအဖွဲ့ SCO ကို ကမ္ဘာကြီးတည်ငြိမ်မှုဖော်ဆောင်တဲ့ နေရာတစ်ခုဖြစ်အောင် ဖန်တီးတည်  ဆောက်ကြဖရာမှ အဖွဲ့ဝင်တွေပူးပေါင်းဆောင်ရွက်ကြဖို့တရုတ်နိုင်ငံတော်ကောင်စီဝင်နှင့် တရုတ်နိုင်ငံခြားရေးဝန်ကြီး   ဝမ်ယီ က ပြောကြားခဲ့ပါတယ်။ကြာသပတေးနေ့က ဘေဂျင်းမြို့တော်မှာကျင်းပတဲ့ SCO အတွင်းရေးမှူးချုပ်ရုံး နှစ်(၂၀)ပြည့်အခမ်း အနားကိုတက်ရောက်ရင်း ပြောကြားခဲ့တာ ဖြစ်ပါတယ်။

Source CCTV+

တပိုတွဲလပြည့်နေ့၌ မန်းရွှေစက်တော်ဘုရားဖူးများ တည်းခိုဆောင်အားလုံး ပြည့်လုနီးပါးဖြစ်နေ
'ပွဲတော်အစမှတော့ ဘုရားဖူးပါးတယ်၊ အခု ကျောင်းစာမေးပွဲ တော်တော်များများပြီးသွားတော့ ဘုရားဖူးများလာတယ်၊ တပိုတွဲလပြည့်‌နေ့လည်းဖြစ်လို့ ကျွန်တော့်ဆီမှာတော့ အခန်း‌တွေ ပြည့်သွားပြီ၊ မတ်လ၊ တပေါင်းလထဲမှာလည်း ခရီးသွားအများဆုံးပါ။ '
Yangon Times/NN
#Local_News
#Published_ 24 February 2024
#YMG_News #Yangon_Times #Yangon_Media_Group

Published 25 February 2024

SKY EXPO ဗီယက်နမ် နိုင်ငံတကာပြပွဲဗဟိုဌာန၏
(၁၅)ကြိမ်မြောက် ဗီယက်နမ် နိုင်ငံတကာပရိဘောဂနှင့် အိမ်အသုံးအဆောင်ပစ္စည်းများပြပွဲအခမ်း အနားကို ဖေဖော်ဝါရီ ၂၆ ရက်မှ ၂၉ ရက်အထိဗီယက်နမ်နိုင်ငံ ဟိုချီမင်းမြို့၌ကျင်းပသွားမည် ဖြစ်ကြောင်းသိရသည်။

အဆိုပါအခမ်းအနားကို စီးပွားရေးနှင့် ကူးသန်း ရောင်းဝယ်ရေးဝန်ကြီးဌာန ဒုတိယဝန်ကြီး ဦးမင်းမင်း ဦးဆောင်သည့် မြန်မာကိုယ်စားလှယ်အဖွဲ့တို့တက်ရောက်ကြမည်ဖြစ်သည်။

မြန်မာကိုယ်စားလှယ်အဖွဲ့အနေဖြင့် ကုန်စည်ပြပွဲသို့ တက်ရောက်ပြီး ဗီယက်နမ်နိုင်ငံရှိ အုန်းသီးစိုက်ပျိုးထုတ်လုပ်တင်ပို့မှု အခြေအနေများကို လေ့လာကာ စိုက်ပျိုး ထုတ်လုပ်မှု နည်းပညာဆိုင်ရာကိစ္စများကို ဆွေးနွေးသွားမည်ဖြစ်သည်။

ယင်းပြပွဲသည် နိုင်ငံတကာမှ ပရိဘောဂပစ္စည်းများနှင့် အိမ်အလှဆင်ပစ္စည်းများ ထုတ်လုပ်သူ၊ ရောင်းချသူ၊ ဝယ်ယူသူအစရှိသည့် စီးပွားရေးလုပ်ငန်းရှင်များအကြား ပူးပေါင်းဆောင်ရွက်နိုင်ခြင်း၊ စီးပွားရေးလုပ်ငန်းရှင်များအကြား တိုက်ရိုက်တွေ့ဆုံဆွေးနွေးမှုများ ပြုလုပ်ပြီး စီးပွားရေးပူးပေါင်း ဆောင်ရွက်ရေးဆိုင်ရာ အခွင့်အလမ်းကောင်းများ ရရှိကာ မြန်မာ့ပရိဘောဂထုတ်ကုန်ပစ္စည်းများကို နိုင်ငံတကာဈေးကွက်သို့ ပိုမိုချဲ့ထွင်တင်ပို့နိုင်ပြီး ကုန်သွယ်မှုလုပ်ငန်းများ ပိုမိုတိုးမြှင့်နိုင်မည်ဖြစ်သည်။

မြန်မာကိုယ်စားလှယ်အဖွဲ့တွင် မြန်မာကုန်သွယ်မှုမြှင့်တင်ရေးအဖွဲ့ ဒုတိယညွှန်ကြား‌ရေးမှူးချုပ်၊ မြန်မာနိုင်ငံသစ်သီးဝလံပန်းမန်နှင့် ဟင်းသီးဟင်းရွက်စိုက်ပျိုး ထုတ်လုပ်တင်ပို့ရောင်းချသူများအသင်း ဒုတိယဥက္ကဋ္ဌ၊ မြန်မာနိုင်ငံ အုန်းသီးစိုက်ပျိုးထုတ်လုပ်တင်ပို့ရောင်းချသူများအသင်းဥက္ကဋ္ဌနှင့် အသင်းဝင်လုပ်ငန်းရှင်များ လိုက်ပါသွားကြောင်း သိရသည်။
Yamgon_Times/tthl
#Local_News
#Published_ 25 February 2024
#YMG_News #Yangon_Times #Yangon_Media_Group

Published 25 February 2024

(၉၂)ကြိမ်မြောက် မော်လမြိုင်မြို့၏ နှစ်ကျိပ်ရှစ်ဆူဘုရား လှည့်လည်ပူဇော်ပွဲနှင့်ဆုချီးမြှင့်ပွဲများကို(၄)ရက်တိုင်တိုင် ကျင်းပခဲ့ကြောင်း မော်လမြိုင်မြို့ရှိလူမှုကူညီ‌ရေးအဖွဲ့များထံမှသိရသည်။

လှည့်လည်ပူဇော်ခံပွဲကို မော်လမြိုင်မြို့တွင်း၌
ပထမရက်‌ ဖေ‌ဖော်ဝါရီလ၂၁ရက်‌တွင်ကျောက် တန်းရပ်ကွက်မှ မုပွန်၊သီရိမြိုင်၊မောင်ငံ၊အောက် လမ်းမကြီးတစ်လျှောက် ဘိုကုန်းရပ်ကွက် သံလွင်ဟိုတယ်ထိ လည်းကောင်း၊

ဒုတိယရက်ဖေ‌ဖော်ဝါရီလ၂၂ရက်‌တွင် ငန်းတေးရပ်ကွက်မှ မြိုင်သာယာရပ်ကွက် လမ်းအတိုင်းတက္ကသိုလ်လမ်းမကြီးအတိုင်း စျေးကြိုအဝိုင်းအထိ လည်းကောင်း၊

တတိယရက်ဖေ‌ဖော်ဝါရီလ၂၃ရက်တွင် ဇေယျာသီရီရပ်ကွက် လမ်းမကြီးမှ ဒေါ်လန်းရပ်အနီးအထိ လည်းကောင်း၊ 

စတုတ္ထရက်ဖေ‌ဖော်ဝါရီလ၂၄ရက်‌တွင် သာသနာ့ဗိမာန်တော်ကြီးမှ ကျိုက်သုတ်ဘုရားအထိ လည်း ကောင်းလှည့်လည် အပူဇော်ခံခဲ့သည်။

ဖေဖော်ဝါရီလ(၂၄)ရက်တွင် မော်လမြိုင်မြို့နယ်လုံးဆိုင်ရာနှစ်ကျိပ်ရှစ်ဆူဘုရားရှင်များဒေသစာရီကြွချီလာစဉ်နောက်ဆုံးနေ့၌ဥပ္ပဿကာများအားဆုချီးမြှင့်ခြင်းအခမ်းအနားကို‌ကျင်းပခဲ့ပြီး 

၁။ပထမဆု- ဘုရားအမှတ်(၄)ညောင်လေးပင်ရပ်
၂။ဒုတိယဆု- ဘုရားအမှတ်(၁)ပန်းပဲတန်အပေါ်
၃။တတိယဆု-ဘုရားအမှတ်(၂၆)မုပွန်ရပ်
၄။စတုတ္ထဆု-ဘုရားအမှတ်(၂၂)‌အောင်ချမ်းသာရပ်
၅။ပဉွမဆု-ဘုရားအမှတ်(၇ )သီရိမြိုင်ရပ်
၆။အထူးဆု-ဘုရားအမှတ်(၅)သင်္ဘောလဲရပ်
၇။အထူးဆု-ဘုရားအမှတ်(၈)ကုန်းတန်းရပ်
၈။အထူးဆု-ဘုရားအမှတ်(၁၃)အုန်းတောရပ်
၉။အထူးဆု-ဘုရားအမှတ်(၁၄)ပန်းပဲတန်းရပ်
၁၀။အထူးဆု-ဘုရားအမှတ်(၁၉)နတ်မှော်တန်းရပ်
တို့အားဆုချီးမြှင့်ခဲ့ကြောင်းသိရသည်။

မော်လမြိုင်မြို့၏ နှစ်ကျိပ်ရှစ်ဆူဘုရားပူဇော်ပွဲကို ၁၉၁၆ ခုနှစ်တွင် ပန်းဘဲတန်းရပ်ကွက်မှ စတင်ကာ ကုသလဝါယမအသင်းက ဦးဇိနစေတီတော်ကို ဘုရားမီးပူဇော်ရန် ရည်ရွယ်ချက်ဖြင့် စတင်ခဲ့ကြောင်း သိရသည်။
Yamgon_Times/tthl
#Local_News
#Published_ 25 February 2024
#YMG_News #Yangon_Times #Yangon_Media_Group