#Daily_News
Published_ 26 February 2024

၁။ ဒေသ(၄)ခုမှ Passport လျှောက်မည့်သူများ အွန်လိုင်းဘိုကင်စနစ်ဖြင့် ကိုယ်တိုင် Passport လျှောက်ထားနိုင်

၂။ မှိုအနက် Black Oyster မျိုးထုပ်များ နယ်စုံမှ မှာယူမှု များပြား

၃။ ဆိတ်သားသ-တ်ဈေးကွက် တစ်ပိသာ ကျပ် ၁၀၀၀ကျော် မြင့်တတ်

၄။ အလိုအလျောက် ထိန်းချုပ်ရေးစနစ်အပြည့် ဇိမ်ခံအိမ်ယာဥ်အား တရုတ်ကုမ္ပဏီကြီးနှစ်ခု ပူးပေါင်းထုတ်လုပ် ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG_News #Yangon_Media_Group

 
ခရမ်းချဉ်သီးစိုက်ပျိုးတဲ့ခြံတွေမှာ ရောင်းချရတဲ့ ဈေးနှုန်းဟာ ခရမ်းချဉ်သီး တပိသာကို ကျပ်၁၀၀ ဝန်းကျင်သာရတဲ့ အတွက် အချို့တောင်သူတွေဟာ လုပ်အားခနဲ့ သယ်ယူစရိတ်တွေ ထပ်မံမဆုံးရှုံး ချင်တာကြောင့်  ခရမ်းချဉ်သီးခူးစွပ်မှု ကို ရပ်နား ထားရတယ်လို့ ဆိုပါတယ်။
Yangon Times/LW
#Local_News
#Published_ 26 February 2024
#YMG_News #Yangon_Times #Yangon_Media_Group

" ရေရှားပါးတဲ့ ဒလမြို့နယ်အပါအဝင် ရန်ကုန်မြို့ရှိရပ်ကွက်၊‌ ကျေးရွာ အသီးသီးမှာ မိုးရေခံကန်‌၊ ရေစုဆောင်းကန်‌၊ အဝီစိတွင်းတွေ တူးဖော်ပေးတာတွေကို ကူညီဆောင်ရွက်သွားဖို့ရှိတယ် " ရှင်သန်ရေးကူညီမှုအသင်း ဥက္ကဌဦးထွန်းထွန်းဦး
Yangon Times/tthl
#Local_News
#Published_ 26 February 2024
#YMG_News #Yangon_Times #Yangon_Media_Group

Published 26 February 2024

( ၇၇ )နှစ်မြောက် မွန်အမျိုးသားနေ့အခမ်းအနားကို ယမန်နေ့က မွန်ပြည်နယ် ပေါင်မြို့နယ်တွင် ပြုလုပ်ခဲ့ကြောင်းပွဲကျင်းပ‌ရေးကော်မတီမှ သိရသည်။

ပေါင်မြို့နယ် ကဒါရပ်ကွက်၊ ကမ္ဘာအေးစေတီဘုရား၌ဖေဖော်ဝါရီ၂၅ရက်နေ့က ကျင်းပခဲ့ခြင်းဖြစ်သည်။

ထိုသို့ ကျင်းပခြင်းဖြင့် မွန်တိုင်းရင်းသားများ စည်းလုံးညီညွတ်စွာဖြင့် ဘိုးဘွားများချမှတ်ထားသည့် ရိုးရာဓလေ့ထုံးတမ်းများကို ဖော်ထုတ်နိုင်ပြီး မွန်လူငယ်များအနေဖြင့် မိမိတို့၏ တိုင်းရင်းသားစာပေ၊ ဘာသာစကား၊ ယဉ်ကျေးမှုထုံးတမ်းတို့ကို မပျောက်မပျက်စေရန်  ဂရုပြုကာ လက်ဆင့်ကမ်းထိန်းသိမ်းသွားနိုင်ရန် ရည်ရွယ်ကြောင်း သိရသည်။

ယင်းအခမ်းအနား၌ မွန်အမျိုးသားနေ့အလံလွှ့င်ထူပြီး တာဝန်ရှိသူများက ဖဲကြိုးဖြတ် ဖွင့်လှစ်ခြင်း၊ မွန်အမျိုးသားများ စာပေနှင့် ယဉ်ကျေးမှုများ မပပျောက်စေရန် ထိန်းသိမ်းစောင့်ရှောက်ရန် လိုအပ်ကြောင်း ဟောပြောခြင်း၊ သံဃာတော်များထံမှ တရားနာယူပြီး ဆွမ်းနှင့်လှူဖွယ်များ ဆပ်ကပ်လှူဒါန်းခြင်း၊ ဧည့်ခံကျွေးမွေးခြင်းများပြုလုပ်ခြင်း၊ အားကစားပြိုင်ပွဲများ၊ မွန်အကပဒေသာများဖြင့် ကျင်းပပြုလုပ်ခဲ့ကြောင်း သိရသည်။
Yangon Times/NN
#Local_News
#Published_ 26 February 2024
#YMG_News #Yangon_Times #Yangon_Media_Group

Published 26 February 2024

ပဲမျိုးစုံ ဈေးနှုန်းနှင့်အတူ ပဲကြီးဈေးများပါ ကျဆင်းနေကြောင်း မန္တလေးပဲနှမ်းဈေးကွက်မှ သိရသည်။

ယနေ့တွင်ပဲကြီး ၅၅ဒဿမ ၂၅ ပိဿာ ဝင်တစ်အိတ်လျှင် ကျပ် ၃၁၀,၀၀၀ မှ ၃၂၀,၀၀၀ကျပ် အထိဈေးနှုန်းရှိနေပြီး တစ်လတာအတွင်းတစ်အိတ်လျှင် ကျပ် လေးသောင်းခန့်အထိကျဆင်းနေကြောင်းသိရသည်။

" ပြည်ပတင်ပို့တဲ့ ပဲတွေလည်းအိန္ဒိယ ဘက်က သတင်းစကားတွေကြောင့် ကျလာတယ်၊ ပဲကြီးက ပြည်တွင်းအဓိကစားတာပေမယ့် သူလဲကျတယ်၊ အသစ်‌ဝင်တာလည်းများတယ်၊ ဝယ်လိုအားလည်းကျတယ်ပေါ့ ၊ အဲ့တာကြောင့်ကျတာ " ဟု ပဲနှမ်းကုန်သည် ဦးမျိုးကြီးက ပြောသည်။

ပဲကြီးသီးနှံအခြောက် အား ပဲကြော်၊ ပဲကြီးလှော်၊ ပဲဖူးကြော်၊ နှစ်ပြန်ကြော် စသည်ဖြင့် ပဲကြော်ဖိုလုပ်ငန်းသမားများက ထုတ်လုပ်ရောင်းချကြကြောင်းသိရသည်။

"ပဲကြီးကအစိုလည်းစားကြတယ်၊အခြောက်လည်းစားကြတယ်၊ အဓိက  ပဲကြော်ဖိုလုပ်ငန်းသမားတွေက  ဝယ်ယူသိုလှောင်ကြတယ်" ဟု၎င်းကဆက်ပြောသည်။

  ပဲကြီးသီးနှံသည် မိုးနှောင်းကာလဖြစ်သော ဇူလိုင်လနှင့် ဩဂုတ်လများတွင် စတင်စိုက်ပျိုးလာကြပြီး မြန်မာလအနေဖြင့် တော်သလင်းလကုန်အမီ အပြီးစိုက်ပျိုးကြကြောင်းသိရသည်။

ထို့အပြင် မိုးစပါးစိုက်ပျိုးသည့်ဒေသများတွင် မိုးစပါးစိုက်ပျိုးစဉ်ကာလ လယ်ကန်သင်းဘောင်များတွင် ပဲကြီးသီးနှံအား စိုက်ပျိုးကြပြီး ၊ မြေအမျိုးအစားအားလုံးတွင် စိုက်ပျိုးဖြစ်ထွန်းနိုင်သော်လည်း နုန်းမြေကိုပို၍ ကြိုက်နှစ်သက်ကြောင်းသိရသည်။

မိုးစပါးစိုက်ပျိုးမှုမရနိုင်သောဒေသများတွင် ပဲကြီးသီးနှံကို ဇူလိုင်လတွင်စတင်စိုက်ပျိုးကြပြီး နိုဝင်ဘာလအတွင်း ပန်းပွင့်ကာ ဇန်နဝါရီလတွင် ပဲကြီးသီးနှံများကို စတင်ခူးဆွတ်နိုင်ပြီဖြစ်ကြောင်း၊ ထို့ကြောင့် ဈေးကွက်အတွင်းသို့ ပဲကြီးသီးနှံအသစ်များသည် နှစ်ဆန်းပိုင်းကာလမှစ၍ဝင်ရောက်လာကာ ဖေဖော်ဝါရီလနှင့် မတ်လများတွင် ပဲအထွက်လှိုင်ချိန်ဖြစ်၍ ဈေးကွက်သို့လည်း ပဲကြီးသီးနှံများဝင်ရောက်မှုများပြားလာခဲ့ကြောင်း သိရသည်။
Yangon Times/NN
#Local_News
#Published_ 26 February 2024
#YMG_News #Yangon_Times #Yangon_Media_Group

Published 26 February 2024

  ထိုင်းနိုင်ငံ၊ မြောက်ပိုင်းပြည်နယ် (၉) ခုဖြစ်သည့် ချင်းမိုင်၊ ချင်းရိုင်၊ မယ်ဟောင်ဆောင်၊ လန်ဖုန်း၊ လန်ပန်း၊ ဥဿရာဒစ်၊ ဖယောင်း၊ ဖရဲ၊ နန်ပြည်နယ်များတွင် အလုပ်လုပ်ကိုင်နေသော မြန်မာနိုင်ငံသားများ ဝင်ငွေခွန် ၂% ထမ်းဆောင်ရန် အတွက် မြန်မာကောင်စစ်ဝန်ချုပ်ရုံး ချင်းမိုင် မြို့ က ဖေဖေါ်ဝါရီ ၂၆ ရက် တွင် အသိပေး ထုတ်ပြန်ကြေညာထားသည်။

  အဆိုပါ မြောက်ပိုင်းပြည်နယ် (၉)ခု၌ အလုပ်လုပ်ကိုင်နေသော မြန်မာနိုင်ငံသားများတွင် စက်ရုံ/ အလုပ်ရုံ၊ စိုက်ပျိုး/ မွေးမြူရေး၊ ဆောက်လုပ်ရေး၊ ဝန်ဆောင်မှုလုပ်ငန်း၊ အထွေထွေလုပ်သား စသည့် ကာယလုပ်သားများ (Blue Collar)များ၏ လစဉ်ဝင်ငွေကို ၇၅၀၀ ဘတ် နှုန်းထား သတ်မှတ်ပြီး ဝင်ငွေခွန် ၂% အရ ၁၅၀ ဘတ် လစဉ်ပေးသွင်းရမည်ဖြစ်သည်။ 

  ယင်းလစဉ်အခွန် ၂%၊ ၁၅၀ ဘတ် ပေးသွင်း ခြင်းဖြင့် လစဉ် ၇၅၀၀ ဘတ်နှင့် ညီမျှသော မြန်မာကျပ်ငွေကို ငွေဖြူအဖြစ် ခံစားခွင့်ရရှိကာ မြန်မာနိုင်ငံသို့ ပြန်ရောက်ချိန်တွင် အိမ်၊ ခြံ၊ မြေ၊ တိုက်ခန်း၊ မော်တော်ယာဉ် စသည် တို့ကို ဝယ်ယူရာ၌ စုဆောင်းထားသော ငွေဖြူစာရင်းအပေါ် တွက်ချက်၍ ဝင်ငွေခွန် လျော့ပေါ့ ပေးခြင်းကို ခံစားခွင့်ရရှိမည်ဖြစ်ကြောင်းသိရသည်။

  ထို့အပြင် ထိုင်းနိုင်ငံ  မြောက်ပိုင်းပြည်နယ် (၉)ခုရှိ ကုမ္ပဏီများ (ရေကြောင်းကုမ္ပဏီအပါအဝင်)၊ ဆေးရုံများ၊ တက္ကသိုလ်/ ကောလိပ်များ၊ ဆောက်လုပ်ရေးအင်ဂျင်နီယာများ၊ စက်ရုံ/ အလုပ်ရုံ အင်ဂျင်နီယာလုပ်ငန်းများ စသည်တို့တွင် အလုပ်လုပ်ကိုင်နေကြသည့် ဉာဏလုပ်သား (White Collar) များ၏ ဝင်ငွေခွန်ကို ကောက်ခံရာတွင် လစာဝင်ငွေအပေါ် ၂% အခွန်တွက်ချက်ထားသော်လည်း ထိုင်းနိုင်ငံတွင် အခွန်ဆောင်ထားခြင်းရှိပါက ၂% အခွန်တွက်ချက်ရငွေမှ နုတ်၍ ကျန်ငွေကိုသာ ပေးသွင်းရမည်ဖြစ်ကြောင်း ကြေညာချက်တွင်ဖေါ်ပြထားသည်။

 ငွေဖြူခံစားခွင့်အနေဖြင့် ၄၁၁၀၀ ဘတ်နှင့် ညီမျှသော မြန်မာကျပ်ငွေကိုသာ ခံစားနိုင်မည်ဖြစ်သည်။
 (White Collar အခွန်ထမ်းများသည် မြန်မာကောင်စစ်ဝန်ချုပ်ရုံးသို့ အခွန်လာရောက် ထမ်းဆောင်ချိန်တွင် သက်ဆိုင်ရာကုမ္ပဏီ/ဌာန ၏ Pay Slip၊ သို့မဟုတ် Salary Certificate နှင့် Tax Slip များကို ယူဆောင်လာရမည် ဖြစ်သည်။

စက်ရုံ/ အလုပ်ရုံ၊ ဆောက်လုပ်ရေးလုပ်ငန်းခွင်များမှ လုပ်သားများအတွက် ဖြည့်စွက် ဆောင်ရွက်ရမည့်ပုံစံကို သံရုံးလူမှုကွန်ယက်စာမျက်နှာ တွင်ဖေါ်ပြထားပြီး စက်ရုံ၏ တာဝန်ရှိသူများက လုပ်သား တစ်ဦးချင်းစီအတွက် ဖော်ပြပါပုံစံတွင် ဖြည့်စွက်ပြီး ငွေသားဖြင့် မြန်မာကောင်စစ်ဝန်ချုပ်ရုံးသို့ လာရောက်ပေးသွင်းနိုင်ကြောင်းသိရသည်။ တစ်ဦးလျှင် ၂၀၂၃ ခုနှစ်၊ အောက်တိုဘာလ မှ ၂၀၂၄ ခုနှစ် ဖေဖော်ဝါရီလ အထိ တစ်လ လျှင် ၁၅၀ ဘတ်နှုန်းဖြင့် ၅ လစာ၊ ၇၅၀ ဘတ် အခွန်ပေးသွင်းရမည်ဖြစ်ပြီး နောက်ပိုင်းကာလ များ၌ လစဉ်၊ သို့မဟုတ် ၃ လ တစ်ကြိမ်၊ သို့မဟုတ် ၆ လ တစ်ကြိမ်၊ သို့မဟုတ် ၉ လ တစ်ကြိမ် ပေးသွင်းနိုင်ကြောင်းသိရသည်။
Yangon Times/LW
#Local_News
#Published_ 26 February 2024
#YMG_News #Yangon_Times #Yangon_Media_Group

26 February 2024

အိုမန်နိုင်ငံတွင်ယာဉ်မတော်ဆမှုဖြင့်ကွယ်လွန်သွားသည့်မနွယ်နွယ်လွင်ဖြစ်စဉ်နှင့်ပတ်သက်၍ ရီရတ်ဒ်မြို့ရှိမြန်မာသံရုံးမှ တရားဝင်ထုတ်ပြန်ချက်ထုတ်ပြန်လိုက်ကြောင်းသိရသည်။

ထုတ်ပြန်ချက်တွင် ယခုရက်ပိုင်းတွင် အိုမန်နိုင်ငံ၊Salalahမြို့၌ ယာဉ်မတော်ဆမှုဖြင့်ကွယ်လွန်သွားသည့်မနွယ်နွယ်လွင်ဖြစ်စဉ်နှင့်ပတ်သက်၍ လူမှုကွန်ရက်စာမျက်နှာပေါ်တွင် ထင်မြင်ချက်များ၊‌ ကောလဟာလများသည် မဟုတ်မှန်ကြောင်း၊ဖြစ်ရပ်မှန်နှင့်ကွဲလွဲနေကြောင်း၊

မြန်မာသံရုံးအနေဖြင့် အိုမန်နိုင်ငံတွင် ယာဉ်မတော်ဆမှုဖြင့်မနွယ်နွယ်လွင်ကွယ်လွန်သွားသည့်ဖြစ်စဥ်ကိုသိရှိချိန်မှစပြီး အိမ်ရှင်နှင့်တာဝန်ရှိသူများထံမှ သတင်းအချက်အလက်များ၊ဓာတ်ပုံများ၊ဆေးစာများ၊ သေမှုသေခင်းအစီရင်ခံစာများ၊Death Certificate တို့ကိုရယူဆောင်ရွက်ခဲ့ကြောင်း၊ အိုမန်တာဝန်ရှိသူများ၏စာရွက်အထောက်အထားအရ ယာဉ်မတော်တဆမှုဖြင့်သေဆုံးရခြင်းဖြစ်ကြောင်း ၊

ဆက်လက်၍မြန်မာသံရုံးအနေဖြင့်မနွယ်နွယ်လွင်၏ မိသားစုဝင်များကို အသိပေးခြင်း၊ စာရွက်စာတမ်းနှင့်ဓာတ်ပုံများပေးပို့ခြင်း၊ နှစ်သိမ့်အားပေးခြင်းများဆောင်ရွက်ခဲ့ပြီး ကျန်ရစ်သူ မိသားစု(ဖခင်)၏ဆန္ဒအရ အိုမန်နိုင်ငံမှာဘဲသဂြိုဟ်ရန်ကူညီ‌‌ ဆောင်ရွက်ပေးခဲ့ကြောင်း၊

အိုမန်နိုင်ငံ၊Salalahမြို့ရှိမြန်မာမိတ်ဆွေတစ်ဦးအား မနွယ်နွယ်လွင်၏ဈာပနကိုစီစဉ်ဆောင်ရွက်ခိုင်းခဲ့ပြီး ‌ဖေဖော်ဝါရီလ(၂၀)ရက်တွင် ဈာပနပြုလုပ်ပြီး အိမ်ရှင်နှင့်မြန်မာမိတ်ဆွေတစ်ဦးတို့သာ မှတ်တမ်းဓာတ်ပုံနှင့်ဗီဒီယိုရိုက်ကူးခွင့်ရပြီး မြန်မာသံရုံးနှင့် မိသားစုဝင်များထံတိုက်ရိုက်ပေးပို့ခဲ့ကြောင်း၊

မနွယ်နွယ်လွင်၏ဈာပနကို ရီရတ်ဒ်မြို့ရှိမြန်မာသံရုံး၏မေတ္တာရပ်ခံချက်ကြောင့် Salalahမြို့ရှိ မြန်မာအသိုက်အဝန်းမှမြန်မာနိုင်ငံသား (၄)‌ဦး၊အိမ်ရှင်မိသားစုဝင်များနှင့် တာဝန်ရှိသူအချို့တက်ရောက်‌ခဲ့ကြောင်း၊

မီးသဂြိုဟ်ပြီးနောက်အရိုးပြာအိုးကို မိခင်၊ဖခင်နှင့် မိသားစုဝင်များ၏ဆန္ဒအရ အရိုးပြာအိုးကိုမြန်မာ နိုင်ငံသို့ပြန်မယူတော့ဘဲ အိုမန်နိုင်ငံ၊Salalahမြို့ရှိ ပင်လယ်ကမ်းခြေတွင် အရိုးပြာများကို ဖေဖော်ဝါရီ ၂၁ရက်တွင်မျောခဲ့ကြောင်း၊

မနွယ်နွယ်လွင်၏မိသားစုဝင်များမှ သမီးဖြစ်သူ၏ ဖြစ်စဉ်၊ဖြစ်ရပ်များ၊သဂြိုဟ်ခြင်းကိစ္စရပ်များတွင် လိုအပ်သည်များကိုကူညီဆောင်ရွက်ပေးသည့်အတွက်ကျေးဇူးတင်ကြောင်း စာပေးပို့လာသည်ဟု ရီရတ်ဒ်မြို့ရှိမြန်မာသံရုံးမှထုတ်ပြန် ဖော်ပြထားကြောင်းသိရသည်။
Yangon Times/tthl
#Local_News
#Published_ 26 February 2024
#YMG_News #Yangon_Times #Yangon_Media_Group

Published 26 February 2024

  အထူးကုဌာနများ ဖွင့်လှစ်ထားရှိသော ခုတင်(၁၀၀)နှင့်အထက် ပြည်သူ့ဆေးရုံများတွင် ပါမောက္ခ၊ အထူးကုဆရာဝန်ကြီးများ ကြည့်ရှုကုသပေးသည့် အထူးကုပြင်ပလူနာဌာန ကြည့်ရှုမှုအချိန်ကို ၂၀၂၃ ခုနှစ် ဩဂုတ်မှစတင်၍ တိုးမြှင့်ဆောင်ရွက်ပေးလျက်ရှိပြီး ယခင်ကနံနက်ပိုင်းသာ ကြည့်ရှု ကုသ ပေးနိုင်ရာမှ ယခုအခါမွန်းလွဲပိုင်းအထိ တိုးချဲ့ဆောင်ရွက်ပေးသွားမည်ဖြစ်ကြောင်း ကျန်းမာရေးဝန်ကြီးဌာန၏ သတင်း ထုတ်ပြန်ချက်အရ သိရသည်။

 နိုင်ငံတော်စီမံအုပ်ချုပ်ရေးကောင်စီ၏ လူမှုရေးဦးတည်ချက် တစ်ရပ်ဖြစ်သော တစ်မျိုးသားလုံး သက်ရှည်ကျန်းမာကြံ့ခိုင်ရေးအတွက် ပြည်သူအားလုံးအကျုံးဝင်မည့် ကျန်းမာရေးစောင့်ရှောက်မှုကို မြှင့်တင်ဆောင်ရွက်ရာတွင် ပြည်သူများလိုအပ်သော ကျန်းမာရေးစောင့်ရှောက်မှုကို လက်လှမ်းမီရရှိခြင်းဖြင့် လူတိုင်းသက်တမ်းစေ့ အသက်ရှည်စွာနေထိုင်နိုင်စေရေးအတွက် ကျန်းမာရေးဝန်ကြီးဌာနသည် လုပ်ငန်းစဉ်များချမှတ်ဆောင်ရွက်လျက်ရှိကြောင်း သိရသည်။

ပြည်သူများအနေဖြင့် အထူးကုဆရာဝန်ကြီးများနှင့်ပြသလိုပါက ဒေသန္တရဆေးခန်းများ၊ မြို့နယ်ပြည်သူ့ဆေးရုံများ၊ ပုဂ္ဂလိကဆေးရုံ၊ ဆေးခန်းများမှတစ်ဆင့် ရောဂါအမျိုးအစားအလိုက် အထူးကုပြင်ပ လူနာဌာနများသို့ ညွှန်းပို့သည့်စာ(referral letter)နှင့်အတူ ပြသနိုင်ပြီး အထူးကုပြင်ပလူနာဌာနများတွင်နေ့ရက်၊ အချိန်မှန်ကန်စွာ ပြသနိုင်ရေးအတွက် လာရောက်ပြသခြင်းမပြုမီ မိမိတို့ပြသလိုသော ဆေးရုံကြီးများ၏ အထူးကုပြင်ပလူနာ အချိန်ဇယားကို ကြိုတင်သိရှိရန် လိုအပ်ကြောင်းနှင့် ပြည်သူ့ဆေးရုံကြီးများ၏ အထူးကု ပြင်ပလူနာအချိန်ဇယားကို သက်ဆိုင်ရာဆေးရုံကြီးများတွင် အများပြည်သူ အလွယ်တကူသိရှိနိုင်အောင် Vinyl/board များဖြင့် ကြေညာထားခြင်း၊ ကုသရေးဦးစီးဌာန Website စာမျက်နှာ www.doms.gov.mm ၌ ဖော်ပြထားခြင်းတို့ကို ဆောင်ရွက်ထားရှိကြောင်း သိရသည်။
Yangon Times/LW
#Local_News
#Published_ 26 February 2024
#YMG_News #Yangon_Times #Yangon_Media_Group

ပြည်တွင်း ဝယ်လိုအား မြင့်လာတဲ့ အတွက်ဆိတ်သားသ-တ်ဈေးကွက် မှာ ယခင် တပတ်ထက် ကျပ် ၁၀၀၀ကျော် မြင့် တတ်လာတယ်လိုh ဆိတ်မွေးမြူရေး လုပ်ငန်းရှင် များထံက သိရပါတယ်။  ပြီးခဲ့တဲ့ လ ပိုင်း တွေကဈေးကွက် အေးခဲ့ပေမယ့် ယခုတရုတ်နှစ်ကူးကာလမှာ အရောင်းဝယ် ကောင်းလာတယ်လို့ ဆိုပါတယ်။
Yangon Times/LW
#Local_News
#Published_ 26 February 2024
#YMG_News #Yangon_Times #Yangon_Media_Group

မှိုအနက်မျိုးက နောက်ပိုင်းမှာ ငွေနှင်းမှိုကို လွှမ်းမိုးသွားမယ့် အနေအထားရှိတယ်

'မှိအနက်Black Oysterက ငွေနှင်းမှို အုပ်စုထဲကပဲ၊ ထိုင်းကနေ မျိူးဝင်တာသုံးလပဲရှိသေးတယ်၊ အခုနေရာအစုံလောက် မျိုးပြန့်သွားပြီ၊ ထောက်ကြံ့က တစ်ခြံလုံးအပြတ်ယူလို့ ရောင်းတာရပ်လိုက်ရတယ်'
Yangon Times/NN
#Local_News
#Published_ 26 February 2024
#YMG_News #Yangon_Times #Yangon_Media_Group

နယ်မှသူတွေ အွန်လိုင်းစနစ်နဲ့Passport ကိုယ်တိုင်လျှောက်နိုင်ပြီ။ " မန္တလေး၊ ပုသိမ်၊နေပြည် တော်နဲ့ ပဲခူးမြို့တို့ရှိ ရုံးခွဲတွေမှာ လာမယ့်ဖေဖော်ဝါရီ  (၂၆) ရက်မှစတင်ပြီး Online booking စနစ်ဖြင့် Passport တွေကို မိမိတို့ကိုယ်တိုင်လျှောက်ထားနိုင်‌တော့မှာ ဖြစ်တယ်" နိုင်ငံကူးလက်မှတ်ထုတ်ပေးရေးအဖွဲ့
Yangon Times/tthl
#Local_News
#Published_ 26 February 2024
#YMG_News #Yangon_Times #Yangon_Media_Group

Published 26 February 2024

ကမ္ဘာ့ထိပ်တန်း ဆန်တင်ပို့သည့်နိုင်ငံများတွင် မြန်မာနိုင်ငံသည် တင်ပို့မှုအများဆုံး အဆင့်  အနေဖြင့်နံပါတ် ၈ ကိုချိတ် ထားကြောင်း Seasia Statsသတင်းဌာနမှ သိရသည်။

၂၀၂၃/၂၀၂၄ ခုနှစ်၌ နိုင်ငံတကာသို့ ဆန်တင်ပို့မှုအများဆုံး ၁၀နိုင်ငံစာရင်းတွင် အိန္ဒိယနိုင်ငံသည်ပထမ ၊ထိုင်းနိုင်ငံသည်ဒုတိယ ၊ဗီယက်နမ်နိုင်ငံသည် တတိယနှင့် မြန်မာနိုင်ငံသည် အဌမနေရာ၌ နေရာယူထားခြင်းဖြစ်သည်။

မြန်မာ့ဆန်များကို အိမ်နီချင်းနိုင်ငံများဖြစ်သည့် တရုတ်၊ အင်ဒိုနီးရှား၊ ဖီလစ်ပိုင်စသည့်နိုင်ငံများအပြင် ဥရောပဈေးကွက်သို့လည်းတင်ပို့နေခြင်းဖြစ်ပြီး ပုံမှန်အားဖြင့် ပြည်ပသို့နှစ်စဉ်တန်ချိန် ၂ ဒသမ ၁ သန်းတင်ပို့လေ့ရှိသော်လည်း ယခုဘဏ္ဍာနှစ်တွင် တန်ချိန် တစ်သန်းကျော်သာ တင်ပို့နိုင်ရန်ခန့်မှန်းထားကြောင်းမြန်မာနိုင်ငံဆန်စပါးအသင်းချုပ်မှ သိရသည်။

မြန်မာနိုင်ငံသည် ပြည်ပနိုင်ငံများသို့ ဆန်နှင့်ဆန်ကွဲများတင်ပို့ရာတွင်  ၂၀၂၄ -၂၀၂၅ ဘဏ္ဍာရေးနှစ်တွင် ပြည်ပသို့ ဆန်တန်ချိန် (၂) သန်းနီးပါးတင်ပို့ရန် လျာထားပြီး အမေရိကန်ဒေါ်လာ သန်းတစ်ထောင် ဝင်ငွေရရှိရန် ခန့်မှန်းထားကြောင်း သိရသည်။

ပြည်ပသို့ ဆန် တင်ပို့ရာတွင် တန်ချိန်များများ တင်ပို့ခြင်းထက် ဝင်ငွေပိုရသည့် ဆန်ကွဲ၊ ဆန်ဖြူနှင့်ပေါင်းဆန်အပါအဝင် တန်ဖိုးမြင့် ဆန်များကို ဦးစားပေးတင်ပို့ရောင်းချနိုင်ရန် စီစဉ်ထားကြောင်းလည်း ပြီးခဲ့သည့်သတင်းစာရှင်းလင်းပွဲ၌ မြန်မာနိုင်ငံဆန်စပါးအသင်းချုပ်ဥက္ကဌကပြောကြားထားသည်။
Yangon Times/NN
#Local_News
#Published_ 26 February 2024
#YMG_News #Yangon_Times #Yangon_Media_Group