#Local_News
Published-1 March 2024

၁၁နီးပါးကာလအတွင်း ပြည်ပသို့ကန်ဒေါ်လာသန်း‌ပေါင်း ၁၂၀၀ကျော် တန်ဖိုးရှိသည့်ပဲမျိုးစုံ တန်ချိန် ၁၃ သိန်းနီးပါးတင်ပို့ထားကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ သိရသည်။

ထိုသို့တင်ပို့ ရာတွင်(၂၀၂၃-၂၀၂၄) ဘဏ္ဍာနှစ် ဧပြီ ၁ရက်  မှ ဖေဖော်ဝါရီ ၂၃ရက်နေ့ အထိ)ပင်လယ်ရေကြောင်းမှအမေရိကန်ဒေါ်လာ(၁၀၉၂.၀၈၈)သန်းတန်ဖိုးရှိသည့် ပဲမျိုးစုံတန်ချိန်  (၁၂၉၀၅၀၆.၅၁၂)နှင့်  နယ်စပ်မှအမေရိကန်ဒေါ်လာ (၁၂၂.၈၇၀) သန်းတန်ဖိုးရှိသည့် ပဲမျိုးစုံတန်ချိန် (၁၄၁၆၁၉.၄၆၉) တန်၊ စုစုပေါင်းအမေရိကန်ဒေါ်လာ(၁၂၁၄.၉၅၈) သန်းတန်ဖိုးရှိသည့် (၁၄၃၂၁၂၅.၉၈၁) တန်ကို တင်ပို့နိုင်ခဲ့ကြောင်း သိရသည်။

မြန်မာနိုင်ငံ စိုက်ပျိုးမြေဧရိယာ၏ (၂၀%)ခန့်သည် ပဲမျိုးစုံ စိုက်ပျိုးနေပြီး ပဲမျိုးစုံ စိုက်ဧက၏ (၇၂%) သည်မတ်ပဲ၊ ပဲတီစိမ်း၊ ပဲစဉ်းငုံများဖြစ်ပြီး ပဲလွန်း၊ မြေထောက်ပဲ၊ ထောပတ်ပဲ၊ ပဲယင်း၊ ကုလားပဲ၊ ပဲပုပ်၊ စားတော်ပဲနှင့် အခြားပဲများလည်း စိုက်ပျိုးကြကြောင်း သိရသည်။

လက်ရှိတွင် စိုက်ပျိုးရေးကိုအခြေခံသည့်နိုင်ငံဖြစ်သည့်အားလျော်စွာ မြန်မာနိုင်ငံမှ တင်ပို့သည့် ပို့ကုန်အများစုသည် လယ်ယာထွက်ကုန်ပစ္စည်းများဖြစ်ပြီး ပဲမျိုးစုံသည်လည်း အဓိက ပို့ကုန်တစ်မယ်ဖြစ်ကြောင်း၊ မြန်မာနိုင်ငံမှ ပြည်ပသို့ ပဲမျိုးစုံတင်ပို့မှုအနေဖြင့် ၂၀၂၂-၂၀၂၃ ဘဏ္ဍာနှစ်စာရင်းများအရ ပင်လယ်ရေကြောင်းမှအမေရိကန်ဒေါ်လာ (၁၂၆၁.၈၇၄)သန်း တန်ဖိုးရှိသည့်ပဲမျိုးစုံ (၁၆၄၀၇၇၇) တန်၊  နယ်စပ်မှ အမေရိကန်ဒေါ်လာ (၂၀၈.၇၈၉)သန်းတန်ဖိုးရှိသည့် ပဲမျိုးစုံ (၂၇၈၃၇၉) တန်၊  စုစုပေါင်းအမေရိကန်ဒေါ်လာ (၁၄၇၀.၆၆၃) သန်းတန်ဖိုးရှိသည့် ပဲမျိုးစုံ(၁၉၁၉၁၅၆) တန်၊  တင်ပို့နိုင်ခဲ့ကြောင်း သိရသည်။

#Local_News #၁၁နီးပါးကာလ #ကန်ဒေါ်လာသန်း‌ပေါင်း၁၂၀၀ကျော် #၁၃သိန်းနီးပါးတင်ပို့ #YMG/NN #Yangon-Times

#Local_News
Published 1 March 2024

၂၀၂၄ ခုနှစ်တက္ကသိုလ်ဝင်စာမေးပွဲကို ရခိုင်ပြည်နယ်အတွင်း လက်ရှိဖြစ်ပေါ်နေတဲ့အခြေအနေကြောင့် စာစစ်ဌာန ၆၉ ခုဖြင့်သာ ကျင်းပစစ်ဆေးသွားမှာဖြစ်ကြောင်း ရခိုင်ပြည်နယ်ဝန်ကြီးချုပ် ဦးထိန်လင်းက ပြောသည်။

ဖေဖော်ဝါရီလ ၂၉ ရက် မနက်ပိုင်းက ရခိုင်ပြည်နယ်အစိုးရအဖွဲ့ရုံး၊ အစည်းအဝေးခန်းမမှာကျင်းပသည့် ရခိုင်ပြည် နယ်အတွင်း ၂၀၂၃-၂၀၂၄ ပညာသင်နှစ်တက္ကသိုလ်ဝင်စာမေးပွဲမေးခွန်း၊ အဖြေလွှာပို့ဆောင်နိုင်ရေးနှင့် စာမေးပွဲ အောင် မြင်စွာကျင်းပနိုင်ရေးညှိနှိုင်းအစည်းအဝေးတွင် ပြောကြားခဲ့ခြင်း ဖြစ်သည်။

၂၀၂၄ခုနှစ် တက္ကသိုလ်ဝင်စားမေးပွဲကို မတ်လ ၁၁ရက်နေ့မှ မတ်လ ၁၉ ရက် နေ့အထိ မြန်မာတနိုင်ငံလုံးတွင် တပြိုင်တည်း ကျင်းပမည်ဖြစ်ရာ ရခိုင်ပြည်နယ်အတွင်း လက်ရှိဖြစ်ပေါ်နေတဲ့အခြေအနေကြောင့် စာစစ်ဌာန ၆၉ ခုဖြင့် ကျင်းပစစ်ဆေးသွားမည်ဖြစ်ပြီး စာစစ်ဌာနများကို တတည်နေရာပြောင်း စစ်ဆေးခြင်း သင့်တော်ရာစာစစ်ဌာနအလိုက်ပေါင်းပြီး စစ်ဆေးတာတွေ ဆောင်ရွက်သွားမည် ဖြစ်ကြောင်း သိရသည်။

၂၀၂၄ ခုနှစ်တက္ကသိုလ်ဝင်စာမေးပွဲကို မသမာမှုကင်းရှင်းစွာဖြင့် အေးချမ်းတည်ငြိမ်စွာ ကျင်းပနိုင်ရန် အတွက် ပြည်နယ်အဆင့်ဦးစီးကော်မတီများ ဖွဲ့စည်းပြီး စနစ်တကျ ဆောင်ရွက်ထားကြောင်း စာမေးပွဲကျင်းပနေစဉ် အတွင်းစည်းလုံခြုံရေးများကို အထူးအလေးပေးကြီးကြပ်ဆောင်ရွက်မည်ဖြစ်ကာ စာမေးပွဲအဖြေလွှာတွေကို သက်ဆိုင်ရာ ခရိုင်ပညာရေးမှူးရုံးတွေကို ပေးပို့ထားပြီး စာစစ်ဌာနတွေကို အချိန်နှင့် တစ်ပြေးညီ ဖြန့်ဝေပေးနိုင်ရေးစီစဉ်ဆောင်ရွက်ပေးသွားမှာဖြစ်ကြောင်း မေးခွန်းလွှာများကိုလည်း အချိန်မီ ပေးပို့နိုင်ရေးစီစဉ်ဆောင်ရွက်ထားပြီးဖြစ်ကြောင်း သိရသည်။

#Local_News #၂၀၂၄ ခုနှစ်တက္ကသိုလ်ဝင်စာမေးပွဲ #စာစစ်ဌာန၆၉ခုဖြင့်ကျင်းပ #YMG/LW #Yangon_Times

"ကျွန်တော်တို့ အစ်မကြီး(ဒေါ်တင်တင်မြ)ဆီ ဖုန်းဆက်သွယ်မေးမြန်းကြည့်လိုက်တော့ နေမကောင်းလို့ဆေးရုံတက်နေရတာမဟုတ်ဘဲ ကျန်းမာရေးစစ်ဆေးမှုခံယူဖို့ ဆေးရုံတက်နေတာလို့ပြောပါတယ်"
#Local_News
Published_ 1 March 2024
#ဂန္တဝင်အဆိုတော်ကြီးဒေါ်တင်တင်မြ #ကျန်းမာရေးစောင့်ရှောက်မှုခံယူ
#tthl #Yangon_Times

'စားသုံးသူတွေကဒီကာလအတွင်းခရီးသွားကာလဖြစ်တာရယ်၊ စာမေးပွဲကာလဖြစ်တာ‌တွေကြောင့် ဝယ်လိုအား‌ လျော့ပြီး ပြည်တွင်းစားဆန်တွေဈေးကျနေတာပါ၊'
#Local_News
Published_ 1 March 2024
#ဆန်ဈေးကျ #ဝယ်လိုအား‌လျော့
#YMG/NN #Yangon_Times

#Local_News
Published 1 March 2024

နိုင်ငံ့ဂုဏ်ဆောင် မျက်မမြင်အားကစားသမားကောင်းများ ပေါ်ထွက်နိုင်ရေးနှင့် မြန်မာ့တီးဝိုင်းနှင့် နိုင်ငံတကာတီးဝိုင်းများ သင်ကြားပေးနိုင်‌ရေးဆောင်ရွက်ရန် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာစိုးဝင်းက ပြောကြားခဲ့သည်။

ကြည့်မြင်တိုင် မျက်မမြင်သင်တန်းကျောင်းနှင့် ရွှေဂုံတိုင်ကလေးပြုစုရေးဌာနများသို့ သွားရောက်ကြည့်ရှုစစ်ဆေးစဉ် ပြည်ထောင်စုဝန်ကြီးက ပြောကြားခဲ့ခြင်းဖြစ်သည်။

ပြည်ထောင်စုဝန်ကြီးက မျက်မမြင်သင်တန်းသား သင်တန်းသူများအတွက် ခေတ်မီသင်ကြားမှုစနစ်များနှင့် သင်ထောက်ကူပစ္စည်းများ အသုံးပြုနိုင်ရန်အတွက် လေ့လာပြီး လိုအပ်ချက်များတင်ပြရန်၊ သက်မွေးအတတ်ပညာများကို ယခုထက်ပို၍ အမျိုးအစား ပိုမိုသင်ကြားပေးနိုင်ရေးဆောင်ရွက်ရန်၊ မျက်မမြင်များကို မြန်မာ့တီးဝိုင်းနှင့် နိုင်ငံတကာတီးဝိုင်းများ သင်ကြားပေးနိုင်‌ရေးဆောင်ရွက်ရန်၊ ရှေးဟောင်းအဆောက်အအုံအား ရေရှည်တည်တံ့ရေး သက်ဆိုင်ရာဦးစီးဌာနသို့ အချိန်နှင့်တစ်ပြေးညီ တင်ပြဆောင်ရွက်သွားရန်နှင့် နိုင်ငံ့ဂုဏ်ဆောင် မျက်မမြင်အားကစားသမားကောင်းများ ပေါ်ထွက်နိုင်ရေး မသန်စွမ်းအားကစားအဖွဲ့ချုပ်နှင့်ဆက်သွယ်၍ စနစ်တကျ လေ့ကျင့်ပေးရန်မှာကြားရာတွင်ထည့်သွင်း‌ပြောကြားခဲ့ခြင်းဖြစ်သည်။

အဆိုပါကျောင်းတွင် လက်ခံစောင့်ရှောက်ထားသော အသက်(၆)နှစ်မှ (၁၈)နှစ်အတွင်း မျက်မမြင်ကျောင်းသား ကျောင်းသူ ၁၁၁ ဦးကို မျက်မမြင်လက်စမ်းစာ (Braille Letter) ဖြင့် မူလတန်းပညာရေးကို ကျောင်းတွင်းပညာရေးအဖြစ် သင်ကြားပေးနေမှု၊ အလယ်တန်း၊ အထက်တန်း၊ တက္ကသိုလ်ပညာရပ်များကို Inclusive Educationဖြင့် ပညာရေးဝန်ကြီးဌာနများမှ ဖွင့်လှစ်ထားသောကျောင်းများတွင် ဆက်လက်သင်ကြားပေးနေမှု၊ Japan Heart အဖွဲ့နှင့် ပူးပေါင်း၍ တစ်နှစ်သင်တန်းအဖြစ် ဖွင့်လှစ်သင်ကြားပေးသည့် ဂျပန်နည်းစနစ်ဆိုင်ရာ ဆေးပညာအကြောပြင် အနှိပ်သင်တန်း လက်တွေ့သင်ကြားပို့ချနေမှု၊ ကြည့်မြင်တိုင်မျက်မမြင်ကျောင်း၏ အကြောပြင်အနှိပ်သင်တန်း နှစ်နှစ်သင်ကြားပို့ချနေမှု၊ ဆက်တီခုံကြိမ်ထိုးနေမှုနှင့် ပလတ်စတစ်ခြင်း ရက်လုပ်နေမှုများကို ကြည့်ရှုစစ်ဆေးခဲ့ကြောင်းသိရသည်။

ထို့အပြင်  ပြည်ထောင်စုဝန်ကြီးသည် မျက်မမြင်စစ်တုရင်သင်ကြားနေခြင်းနှင့် Goal Ball အားကစားနည်းလေ့ကျင့်နေမှုကို ကြည့်ရှုစစ်ဆေးခဲ့ကြောင်းသိရသည်။

ထို့‌နောက် ဗဟန်းမြို့နယ် အလယ်ရွှေဂုံတိုင်လမ်းရှိ ရွှေဂုံတိုင်ကလေးပြုစုရေးဌာနသို့သွားရောက်၍ စောင့်ရှောက်ထားရှိသော ကလေးသူငယ်များအား ပြုစုစောင့်ရှောက်ပေးနေမှုအခြေအနေများကို ကြည့်ရှုစစ်ဆေးပြီး တာဝန်ရှိသူများ၏ တင်ပြချက်များအပေါ် လိုအပ်သည်များ ညှိနှိုင်းပေါင်းစပ်ဆောင်ရွက်ပေးခဲ့ကြောင်း သိရသည်။

#Local_News #နိုင်ငံ့ဂုဏ်ဆောင်မျက်မမြင် #YMG/NN #Yangon-Times #မြန်မာ့တီးဝိုင်း #နိုင်ငံတကာတီးဝိုင်း

#Local_News
Published-24 March 2024

ရန်ကုန်ဆိပ်ကမ်းများသို့ လာမည့်မတ်လအတွင်း နိုင်ငံတကာကုန်သေတ္တာတင် သင်္ဘော (၅၅) စင်းဝင်ရောက်ဆိုက်ကပ်မည်ဖြစ်ကြောင်း မြန်မာ့ဆိပ်ကမ်းအာဏာပိုင်မှ သိရသည်။

ပြီးခဲ့သည့် ၂၀၂၃ ခုနှစ် ဇန်နဝါရီမှ ဒီဇင်ဘာလကုန်ထိ တစ်နှစ်တာကာလအတွင်း ရန်ကုန်ဆိပ်ကမ်းများသို့ နိုင်ငံတကာ သင်္ဘောလိုင်းများမှ ကုန်သေတ္တာတင်သင်္ဘော (၆၄၅) စင်း ဝင်ရောက်ခဲ့ပြီး ၂၀၂၄ ခုနှစ် အတွင်း ပြီးခဲ့သည့် ဇန်နဝါရီလတွင် (၄၉) စင်း၊ ဖေဖော်ဝါရီလတွင်(၅၃)စင်း ဝင်ရောက်ဆိုက်ကပ်ခဲ့ကြောင်းသိရသည်။

ရန်ကုန်ဆိပ်ကမ်းဧရိယာတွင် အပြည်ပြည်ဆိုင်ရာ ရေယာဉ်ကြီးများ ဆိုက်ကပ်နိုင်သည့် ဆိပ်ကမ်းတံတား (၂၇) စင်း၊ ရန်ကုန်သီလဝါအပြင်ဆိပ်ကမ်းဧရိယာတွင် ဆိပ်ကမ်းတံတား (၁၉) စင်း စုစုပေါင်း (၄၆) စင်းဖြင့် ဝန်ဆောင်မှု ပေးနေခြင်းဖြစ်ကြောင်း သိရသည်။

မြန်မာနိုင်ငံသည် နိုင်ငံတကာနှင့် ကုန်သွယ်မှုလုပ်ငန်းများကို ပင်လယ်ရေကြောင်း ကုန်သွယ်ရေးလမ်းကြောင်းမှ ပိုမိုဆောင်ရွက်နေရာ ရန်ကုန်အပြည်ပြည်ဆိုင်ရာဆိပ်ကမ်းများသို့ အပြည်ပြည်ဆိုင်ရာကုန်သေတ္တာ တင်သင်္ဘောများ လစဉ်ပုံမှန်ဝင်ရောက်ဆိုက်ကပ်လျက်ရှိကြောင်း သိရသည်။

ပြီးခဲ့သည့် ၂၀၂၂ ခုနှစ်တွင် နိုင်ငံတကာ သင်္ဘောလိုင်းများ၏ ကုန်သေတ္တာတင်သင်္ဘော ၆၄၇ စင်းဝင်ရောက်ခဲ့သည်။

#Local_News #ရန်ကုန်ဆိပ်ကမ်း #ကုန်သေတ္တာတင်သင်္ဘော(၅၅)စင်း #ဝင်ရောက်ဆိုက်ကပ်မည် #YMG/NN #Yangon_Times

မတ်လ ၁ရက်နေ့ စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီရဲ့ ဈေးနှုန်းထုတ်ပြန်ချက်အရ ပြည်တွင်း စက်သုံးဆီအမျိုးအစားအလိုက် တစ်လီတာကိုကျပ် ၅ဝမှ၈၀ကျပ်ဝန်းကျင်ဈေးပြန်ကျလာတယ် လို့ သိရပါတယ်။
#Local_News
Published_ 1 March 2024
#စက်သုံးဆီဈေးကျ #သိုလှောင်ဖြန့်ဖြူးခြင်းလုပ်ငန်း
#YMG/LW #Yangon_Times

သင်္ကြန်တွင်းရိပ်သာဝင်မည့်သူများ ကြိုတင်စာရင်း‌ပေးသွင်းနိုင်ပြီ။ မိုးကုတ်ဝိပဿနာအဖွဲ့ချုပ်မှာ သင်္ကြန်တရားစခန်းကို ဧပြီလ(၁၄) ရက်ကစပြီး (၂၃)ရက်ပြီးမှာဖြစ်ပြီး ယောဂီသူတော် စင်(၂၈၀)မှ(၃၀၀)ဦးအထိ လက်ခံသွားဖို့ရှိတယ်
#Local_News
Published_ 1 March 2024
#သင်္ကြန်ရိပ်သာဝင်မည့်သူ #ကြိုတင်စာရင်း‌ပေးသွင်း
#tthl #Yangon_Times

#Local_News
Published 1 March 2024

ဂျပန်နိုင်ငံသို့ သွားရောက်ရန်အတွက် ပြည်ဝင်ခွင့်ဗီဇာ လျှောက်ထားမှုတွေ အလွန်များပြားနေသဖြင့် တယ်လီဖုန်း ဖြင့် ကြိုတင်ရက်ချိန်းယူမှုကို ခတ္တခဏရပ်နားမည်ဖြစ်ကြောင်း မြန်မာနိုင်ငံဆိုင်ရာ ဂျပန်သံရုံးကမေတ္တာရပ်ခံထားကြောင်း သိရသည်။

လက်ရှိတွင် ပြည်ဝင်ခွင့်ဗီဇာလျှောက်ထားမှုများ အလွန်များပြားလျက်ရှိသဖြင့် လျှောက်ထားသူများအတွက် ပိုမို လွယ်ကူအဆင်ပြေစေရန် တယ်လီဖုန်းဖြင့် ကြိုတင်ရက်ချိန်းရယူခြင်းကို ခေတ္တခဏရပ်နားထားပြီး လတ်တလောတွင် အီးမေးလ်ဖြင့်သာ လက်ခံလျက်ရှိပါသောကြောင့် နားလည်ပေးနိုင်ပါရန် မေတ္တာရပ်ခံထားသည်။

အီးမေးလ်ဖြင့် ကြိုတင်ရက်ချိန်းရယူရာတွင် အီးမေးလ်ကို အကြောင်းပြန်ရန်အတွက် အချိန်အနည်းငယ် ကြန့်ကြာနိုင်သော်လည်း အီးမေးလ်တစ်စောင်ရရှိပါက မပျက်မကွက် အကြောင်းပြန်ပေးမည်ဖြစ်သောကြောင့် စိတ်မပူကြပါရန် လည်း ဂျပန် သံရုံး က ရေးသားထားသည်။

ထို့ပြင် တယ်လီဖုန်းဖြင့် ပြည်လည်ရက်ချိန်းရယူနိုင်မည့်အချိန်ကို ထပ်မံအသိပေး အကြောင်းကြားပေးသွားမည်ဖြစ်ကြောင်း သိရသည်။

#Local_News #ဂျပန်ပြည်ဝင်ခွင့်ဗီဇာလျှောက်ထားသူများ #ခတ္တခဏရပ်နားမည် #ဂျပန်သံရုံးမေတ္တာရပ်ခံ #YMG/LW #Yangon_Times

#World_News
Published 01 March 2024

ဘင်္ဂလားဒေ့ရှ်နိုင်ငံ မြို့တော်ဒါကာရှိ ၆ ထပ်တိုက်တစ်လုံးဟာ ညဘက်ကြီး အကြီးအကျယ် မီးလောင်ကျွမ်းခဲ့သဖြင့် အနည်းဆုံး လူ ၄၃ ဦးသေဆုံးကာ ဒါဇင်ခန့်ဒဏ်ရာရခဲ့ကြောင်း ကျန်းမာရေးဝန်ကြီးဌာနက ထုတ်ပြန်လိုက်ပါတယ်။

ကြာသပတေးနေ့က ဘိုင်လီလမ်းမပေါ်ရှိ နာမည်ကြီးဒံပေါက်ဆိုင်တစ်ဆိုင်မှာ မီးအစပြုခဲ့တာဖြစ်ပြီး အခြားအထပ်များသို့ အလျင်အမြန် ပျံ့နှံ့သွားခဲ့တယ်လို့ မီးသတ်အရာရှိများက ဆိုပါတယ်။

ကျန်းမာရေးဝန်ကြီး ဆာမန်တာလယ်ဆင်က ဒါကာဆေးဘက်ဆိုင်ရာ ကောလိပ်ဆေးရုံသို့ သွားရောက်ခဲ့ပြီးနောက် အနည်းဆုံး လူ ၄၃ ဦးသေဆုံးပြီး မီးလောင်ဒဏ်ရာရထားတဲ့ ၂၂ ဦးကို ဆေးရုံမှာကုသပေးနေတယ်လို့ သောကြာနေ့အစောပိုင်းမှာ သတင်းထောက်တွေကို ပြောကြားခဲ့ပါတယ်။

မီးလောင်ဒဏ်ရာ အပြင်းအထန်ရထားတဲ့ ၂၂ ယောက်စလုံး အရေးပေါ်အခြေအနေ ဖြစ်နေကြတယ်လို့ ဆိုပါတယ်။

မီးလောင်ကျွမ်းရတဲ့ အကြောင်းအရင်းကို သေချာမသိရသေးဘဲ မီးသတ်အဖွဲ့ ၁၃ ဖွဲ့မှ ၂ နာရီကျော်ကြာ ကြိုးပမ်းမီးသတ်ခဲ့ပြီးနောက် ထိန်းချုပ်နိုင်ခဲ့တယ်လို့ မီးသတ်အရာရှိများက ပြောပြပါတယ်။

ပြတင်းပေါက်ကွဲတစ်ခုကနေ ခုန်ထွက်ပြီး မီးဘေးကြားက သီသီလေး လွတ်မြောက်ခဲ့တဲ့ မိုဟာမက်အယ်တက်ဖ်က ယင်းကိုယ်တိုင် လွတ်မြောက်ခဲ့ပေမယ့် လုပ်ဖော်ကိုင်ဖက် ၂ ဦးကတော့ သေဆုံးသွားကြောင်း သတင်းထောက်တွေကို ပြောပြပါတယ်။

သောကြာနေ့ အစောပိုင်းမှာ မီးလောင်ကျွမ်းမှုကြောင့် သေဆုံးသွားသူတွေရဲ့ သက်ဆိုင်သူများ ဆေးရုံသို့ ရောက်ရှိလာကာ အလောင်းတွေကို လက်ခံရယူခဲ့ကြသလို အချို့ကတော့ အရေးပေါ်ဌာန အပြင်ဘက်မှာ ပူဆွေးဝမ်းနည်းနေကြပါတယ်။

သေဆုံးသွားသူအများစုက အသက်ရှူကြပ်တာကြောင့် ဖြစ်ကြပြီး အချို့ကတော့ တိုက်ပေါ်ကခုန်ချရင်း သေဆုံးခဲ့ကြတာ ဖြစ်ပါတယ်။

မီးသတ်သမားတွေက ကရိန်းများဖြင့် တိုက်ပေါ်ကလူတွေကို ကယ်ဆယ်ခဲ့ကြပြီး ဂတ်စ်ယိုစိမ့်မှု ဒါမှမဟုတ် ဂတ်စ်မီးဖိုကနေ မီးစတင်ခဲ့တာ ဖြစ်မယ်လို့ ဘင်္ဂလားဒေ့ရှ် မီးသတ်ဌာနနဲ့ အရပ်ဘက်ကာကွယ်ရေး ညွှန်ကြားရေးမှူး ဗိုလ်ချုပ်ကြီး မိန်းအူဒင်က ပြောပြခဲ့ပါတယ်။

ထိုအဆောက်အအုံ အထပ်တိုင်းမှာ ဂတ်စ်အိုးများရှိနေပြီး အလွန်အန္တရာယ်များတဲ့ တိုက်ဖြစ်ကာ အဖြစ်အပျက်ကို စုံစမ်းရန် အဖွဲ့ဝင် ၅ ဦးပါဝင်တဲ့ ကော်မတီကို ဖွဲ့စည်းလိုက်ပါတယ်။

ဘင်္ဂလားဒေ့ရှ်မှာ ပြည်တွင်းစီးပွားရေး ရုတ်တရက် ထိုးတက်လာပေမယ့် ဘေးကင်းလုံခြုံမှုအပိုင်းမှာတော့ စိတ်ချရခြင်းမရှိဘဲ ပြီးခဲ့တဲ့နှစ်များအတွင်း မီးဘေးကြောင့် လူပေါင်းရာချီ သေဆုံးခဲ့ပါတယ်။

#World_News #ခြောက်ထပ်အဆောက်အအုံမီးလောင် #အနည်းဆုံး(၄၃)ဦးသေဆုံး #Source: Reuters

#Local_News
Published_ 1 March 2024

မဲခေါင်-လန်ချန်းရန်ပုံငွေဖြင့် မြန်မာ-ထိုင်း-လာအို နယ်စပ်ဖြစ်သည့် တာချီလိတ်ခရိုင်အတွင်းလေထု အရည်အသွေးနှင့်ရာသီဥတုတိုင်းတာရေးစက် (၁၇)မျိုးကို ဝယ်ယူတပ်ဆင်တိုင်းတာခြင်းများကို ထိ‌ရောက်စွာဆောင်ရွက်နိုင်ခဲ့ကြောင်း သိရသည်။

မဲခေါင်-လန်ချန်း ပူးပေါင်းဆောင်ရွက်ရေးဆိုင်ရာ အထူးရန်ပုံငွေ(၂၀၂၁)ဖြင့်  “နယ်စပ်ဖြတ်ကျော် မီးခိုးမြူငွေ့ညစ်ညမ်းမှုနှင့်ပတ်သက်၍ လေထုအရည်အသွေး စောင့်ကြည့်တိုင်းတာစစ်ဆေးခြင်းနှင့် ဆန်းစစ်ခြင်းဆိုင်ရာ စီမံကိန်း”ဆောင်ရွက်ခဲ့ပြီး ယင်းစီမံကိန်းဖြင့် တိုင်းတာရေးစက်များကို ဝယ်ယူတပ်ဆင်တိုင်းတာနိုင်ခဲ့ခြင်းဖြစ်သည်ဟုဆိုသည်။

စီမံကိန်းပိတ်ပွဲအခမ်းအနားတွင် သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန ပြည်ထောင်စုဝန်ကြီးက ယခုစီမံကိန်းကာလ နှစ်နှစ်နှင့် ခြောက်လတာကာလအတွင်း လေထုအရည်အသွေးဆိုင်ရာ အဓိက Parameter ၁၁ မျိုးနှင့် ရာသီဥတုဆိုင်ရာ Parameter ခြောက်မျိုးကို တိုင်းတာနိုင်သည့် ရွေ့လျားလေထုအရည်အသွေးတိုင်းတာရေး စက်ကိရိယာများဝယ်ယူပြီး မြန်မာ၊ လာအိုနှင့် ထိုင်းနိုင်ငံတို့၏ နယ်စပ်ဖြစ်သည့် တာချီလိတ်ခရိုင်အတွင်း ပတ်ဝန်းကျင်လေထုအရည်အသွေးတိုင်းတာခြင်း လုပ်ငန်းများကို ထိထိရောက်ရောက် ဆောင်ရွက်နိုင်ခဲ့ကြောင်း၊ 

ဝန်ထမ်းများ၏ စွမ်းဆောင်ရည်မြင့်မားလာစေရန်အတွက် လေထုအရည်အသွေးတိုင်းတာခြင်းဆိုင်ရာ သင်တန်း၊ ရွေ့လျားလေထုအရည်အသွေးတိုင်းတာရေး စက်ကိရိယာကိုင်တွယ်အသုံးပြုခြင်း သင်တန်းနှင့် နယ်စပ်ဖြတ်ကျော် မီးခိုးမြူငွေ့ညစ်ညမ်းမှု ထိန်းချုပ်ရေးဆိုင်ရာသင်တန်းများ ဖွင့်လှစ်ပို့ချနိုင်ခဲ့ပြီး စီမံကိန်းဧရိယာအတွင်းရှိ ဒေသခံများကို မီးခိုးမြူငွေ့ညစ်ညမ်းမှုနှင့်ပတ်သက်၍ အသိပညာပေးလုပ်ငန်းများကိုလည်း ကျယ်ကျယ်ပြန့်ပြန့်ဆောင်ရွက်ပေးနိုင်ခဲ့ကြောင်း၊

နှစ်စဉ်ပွင့်လင်းရာသီတွင် တွေ့ကြုံရသည့် တောမီးလောင်ကျွမ်းခြင်းနှင့် အခြားမီးလောင်ကျွမ်းမှုများကြောင့် ဖြစ်ပေါ်လာသည့် မီးခိုးမြူငွေ့ညစ်ညမ်းမှုပြဿနာများကို ဖြေရှင်းဆောင်ရွက်နိုင်ရန်အတွက် မြန်မာနိုင်ငံအနေဖြင့် ဒေသအဆင့်နှင့် နိုင်ငံတကာအဆင့် ပူးပေါင်းဆောင်ရွက်မှုများကို တိုးမြှင့်ဆောင်ရွက်လျက်ရှိကြောင်း၊

 မြန်မာ-တရုတ် နှစ်နိုင်ငံဗဟိုအစိုးရများအကြား တောမီးအန္တရာယ်ဆိုင်ရာ ပူးတွဲကာကွယ်ရေးကော်မတီ ဖွဲ့စည်းထားရှိပြီး သက်ဆိုင်ရာဌာန၊ အဖွဲ့အစည်းများနှင့်ပူးပေါင်း၍ တောမီးကာကွယ်ရေးလုပ်ငန်းများကို အကောင်အထည်ဖော်ဆောင်ရွက်လျက်ရှိကြောင်း ပြောကြားခဲ့သည်။

အခမ်းအနားသို့  ပြည်ထောင်စုဝန်ကြီး ဦးခင်မောင်ရီ၊ ဒုတိယဝန်ကြီး ဦးမင်းသူ၊ ရှမ်းပြည်နယ် သယံဇာတရေးရာဝန်ကြီး၊ အမြဲတမ်းအတွင်းဝန်နှင့် ဌာနမှတာဝန်ရှိသူများ၊ မဲခေါင်-လန်ချန်း ပူးပေါင်းဆောင်ရွက်ရေးအဖွဲ့မှ တာဝန်ရှိသူများ၊ မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံသံရုံးမှ ကိုယ်စားလှယ်များ တက်ရောက်ကြသည်။

အဆိုပါ စီမံကိန်းကို မဲခေါင်-လန်ချန်း ပူးပေါင်းဆောင်ရွက်ရေးဆိုင်ရာ အထူးရန်ပုံငွေ(၂၀၂၁)ဖြင့် ၂၀၂၁ ခုနှစ် စက်တင်ဘာလမှ ၂၀၂၄ ခုနှစ် မတ်လအထိ စီမံကိန်းကာလ ၂ နှစ် ၆ လသတ်မှတ်၍ ပတ်ဝန်းကျင်ထိန်းသိမ်းရေး ဦးစီးဌာနရုံးချုပ်နှင့် ရှမ်းပြည်နယ်အရှေ့ပိုင်း၊ တာချီလိတ်ခရိုင်တို့တွင် အကောင်အထည်ဖော် ဆောင်ရွက်ခဲ့ခြင်းဖြစ်ကြောင်း သိရသည်။

#Local_News #မြန်မာ-ထိုင်း-လာအို #လေထုအရည်အ‌သွေး #tthl #Yangon_Times

#Local_News
Published 1March 2024

ရန်ကုန်တိုင်းဒေသကြီး၊ ကြည့်မြင်တိုင်မြို့နယ်၊ ဗားကရာဆိပ်ကမ်းအနီး၊ ရန်ကုန်မြစ်အတွင်း သင်္ဘောမီးလောင်မှုဖြစ်ပွားကြောင်း မြန်မာနိုင်ငံမီးသတ်တပ်ဖွဲ့၏ သတင်းထုတ်ပြန်ချက်အရ သိရသည်။

မတ်လ ၁ရက်နေ့ နံနက် ၂နာရီ ၂၃မိနစ်ခန့်က လောင်ကျွမ်းခဲ့ခြင်းဖြစ်ပြီး မီးလောင်မှုဖြစ်ပွားကြောင်း သတင်းရရှိသဖြင့် ကြည့်မြင်တိုင်မြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီး၊ အလုံမြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီး၊ ကမာရွတ်မြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီး၊ စမ်းချောင်းမြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီး ထွက်ခွာငြိမ်းသတ်ခဲ့သောကြောင့် နံနက် ၃နာရီ ၃၅မိနစ်တွင် မီးငြှိမ်းခဲ့ကြောင်း သိရသည်။

"ဆီတင်သင်္ဘောလောင်တာလို့တော့ကြားတယ်။ ပေါက်ကွဲသံတွေနဲ့ မြေကြီးပါတုန်တယ်"ဟု ကြည့်မြင်တိုင်မြို့နယ် နေသူ တစ်ဦးကပြောသည်။

အဆိုပါ သင်္ဘောမီးလောင်သည့်အကြောင်းရာနှင့် ဆုံးရှုံးမှုတန်ဖိုးများကို သက်ဆိုင်ရာက စစ်ဆေးလျက်ရှိပြီး သတင်း ထုတ်ပြန်မှု မရှိသေးကြောင်း သိရသည်။

#Local_News #ရန်ကုန်မြစ်အတွင်း #ဘင်္ဘောတစ်စီး မီးလောင်မှုဖြစ် #YMG/LW #Yangon_Times