Published_ 11 March 2024

ပေကျင်းမြို့၊ အာဆီယံကော်မတီ (ACB) ၏ ချစ်ကြည်ရေး ဘိုးလင်းပြိုင်ပွဲအား Bao Long Bowling and Golf Sport Bar ၌ တရုတ်နိုင်ငံဆိုင်ရာ မြန်မာသံအမတ်ကြီး ဦးတင်မောင်ဆွေက မတ် ၉ ရက်၌ ဦးဆောင်ကျင်းပခဲ့ကြောင်း သိရပါတယ်။

အဆိုပါပြိုင်ပွဲ၌ မြန်မာသံအမတ်ကြီးက မြန်မာသံရုံးမှ ACB အလှည့်ကျဥက္ကဋ္ဌအဖြစ် ဆောင်ရွက်စဉ် ချစ်ကြည်ရေးဘိုးလင်းပြိုင်ပွဲကို တာဝန်ယူကျင်းပရသည့် အတွက် ဝမ်းမြောက်ဂုဏ်ယူပါကြောင်း၊ ပေကျင်းမြို့အခြေစိုက် အာဆီယံနိုင်ငံသံရုံးများနှင့် တရုတ် နိုင်ငံခြားရေးဝန်ကြီးဌာနနှင့် အာဆီယံ-တရုတ် ဗဟိုဌာနအတွင်းရေးမှူးချုပ်ရုံး (ACC) တို့အကြား ချစ်ကြည်ရင်းနှီးမှု၊ စည်းလုံးညီညွတ်မှု မြှင့်တင်ဖို့ဖြစ်တယ်လို့ ဆိုပါတယ်။

အာဆီယံ-တရုတ် တူညီသည့် အနာဂတ်အသိုက်အဝိုင်း အကောင်ထည်ဖော်ဆောင် နိုင်ရေးကိုရှေးရှု၍ ရည်ရွယ်ကျင်းပခြင်းဖြစ်ရာ ပိုမိုခိုင်မြဲသည့် ဆက်ဆံရေးကို ရရှိစေနိုင်မယ်လို့ ဆိုပါတယ်။

ACB Bowling ပြိုင်ပွဲသို့ မြန်မာသံအမတ်ကြီးအပါအဝင် ဘရူနိုင်း၊ ဖိလစ်ပိုင်၊ စင်ကာပူနိုင်ငံတို့မှ သံအမတ်ကြီးများနှင့် ကမ္ဘောဒီးယား၊ အင်ဒိုနီးရှား၊ လာအို၊ မလေးရှား၊ ထိုင်း၊ ဗီယက်နမ်နိုင်ငံတို့မှ သံရုံးကိုယ်စားလှယ်များ၊ တရုတ်နိုင်ငံခြားရေးဝန်ကြီးဌာနနှင့် အာဆီယံ-တရုတ် ဗဟိုဌာန၊ အတွင်းရေးမှူးချုပ်ရုံး (ACC) တို့မှ အဆင့်မြင့်အရာရှိကြီများ နှင့် တာဝန်ရှိသူများက တစ်သင်းလျှင် ကစားသမား (၄)ဦးစီ ဝင်ရောက်ယှဉ်ပြိုင်ခဲ့ပြီး လာအိုနိုင်ငံမှ ပထမဆု၊ ကမ္ဘောဒီးယားနိုင်ငံမှ ဒုတိယဆု၊ ဖိလစ်ပိုင်နိုင်ငံမှ တတိယဆု ရရှိခဲ့ ကြောင်း သတင်းရရှိပါတယ်။
Ymg_mnn
#Local_News
#Published_ 11 March 2024
#YMG_News #Yangon_Times #Yangon_Media_Group

Published 11 March 2024

မန္တလေးတိုင်းဒေသကြီး၊ ညောင်ဦးမြို့နယ်၊ ကုန်းတန်းကြီးကျေးရွာအုပ်စု၊ တုရင်တောင်စွယ်တော်မြတ် စေတီအတက်/အဆင်းလမ်း တွင် ဘုရားဖူး ယာဉ်(၁)စီး တိမ်းမှောက်ကာ ၅ဦးထိခိုက်ဒဏ်ရာရရှိခဲ့ကြောင်းညောင်ဦးမြို့နယ်မီးသတ်တပ်ဖွဲ့၏ သတင်းထုတ်ပြန် ချက် အရသိရသည်။

မတ်လ ၁၁ရက် ၁၁နာရီ အချိန်ခန့်က ဖြစ်ပွားခဲ့ ခြင်း ဖြစ်ကာသတင်းရရှိသဖြင့် ညောင်ဦးခရိုင်မီးသတ်စခန်းမှ အုပ်ချုပ်မှုယာဉ်(၁)စီး၊ ရှာဖွေကယ်ဆယ်ရေးယာဉ်(၁)စီး၊ သန္ဓေမီးသတ်တပ်ဖွဲ့ဝင်များ၊ အမှတ်(၅)အရန်မီးသတ်စခန်းမှ အရန်မီးသတ်တပ်ဖွဲ့ဝင်များ၊ လူမှုကူညီရေးအသင်းမှ ယာဉ်(၂)စီး၊ Bagan Rescue အသင်းမှ အဖွဲ့ဝင်များဖြင့် ကယ်ဆယ်ရေးလုပ်ငန်းများ သွားရောက်ဆောင်ရွက်ခဲ့ကြောင်း သိရသည်။

အဆိုပါ ဘုရားဖူးယာဉ်မှာ စွယ်တော်မြတ်စေတီအားဖူးမျှော်ပြီး ပြန်ဆင်းလာရာ ယာဥ်ကြံ့ခိုင်မှု အားနည်းမှုကြောင့် ဘရိတ်ပေါက်ပြီး လမ်းဘေးတိမ်းချော်ပြီး ကားမှောက်သည့် ဖြစ်စဥ် ဖြစ်ပွားခဲ့ကြောင်း သိရသည်။

ယာဥ်ပေါ်တွင် ယာဥ်မောင်းအပါအဝင် ဘုရားဖူခရီးသည် အမျိုးသား ၆ ဦး၊ အမျိုးသမီး ၆ ဦး၊ ပေါင်း ၁၃ ဦးပါရှိပြီး ယာဥ်တိမ်းမှောက်မှုကြောင့် အမျိုးသား ၁ ဦး အမျိုးသမီး ၄ ဦး ပေါင်း ၅ ဦးတို့ ထိခိုက်ဒဏ်ရာရရှိခဲ့ကြောင်း သိရသည်။

ထိခိုက်ဒဏ်ရာရသူများအား ညောင်ဦးခရိုင်ပြည်သူ့ဆေးရုံကြီးသို့ အမှတ် ၅ အရန်မီးသတ်မှ လူမှုကူညီရေးယာဥ် ၂ စီးနှင့် Bagan Rescue အသင်းပိုင် Ambulance ယာဥ် ၁ စီးတို့ဖြင့် ကူညီပို့ဆောင်ပေးခဲ့ကြောင်းသိရသည်။
Yangon Times/LW
#Local_News
#Published_ 11 March 2024
#YMG_News #Yangon_Times #Yangon_Media_Group

Published_ 11 March 2024

ဗိုလ်တထောင်ကျိုက်ဒေးအပ်ဆံတော်ဦးစေတီတော်မြတ်ကြီးသို့ထိုင်းဘုရင်ကိုးကွယ်သည့်ဘုန်းတော်ကြီးနှင့် ထိုင်းဒုရဲချုပ်တို့လာရောက်ဖူးမြော်ခဲ့ကြောင်းဂေါပကအဖွဲ့၏ထုတ်ပြန်ချက်အရ သိရသည်။

မတ်လ(၈)ရက်တွင်ထိုင်းနိုင်ငံ ဘုရင်မင်းမြတ်ကိုးကွယ်သော ထိုင်းနိုင်ငံဘုန်းတော်ကြီး Somdet Phar Maharatchamongkhonlamuli Aiemsa. Ard နှင့် ထိုင်းနိုင်ငံ ဒုတိယရဲချုပ် Pol.Gen. Chinnapat Sarasinတို့ပါဝင်သော ထိုင်းကိုယ်စား လှယ်အဖွဲ့တို့ လာရောက်ဖူး‌မြော်ခဲ့ခြင်းဖြစ်သည်။

အဆင်ပါအဖွဲအား အလှည့်ကျသဘာပတိ ဦးအောင်မြတ် နှင့် ရုံးအဖွဲ့မှူး ဦးကျော်နိုင်ထွန်း တို့ မှ ခရီးဦးကြိုဆို၍ အဆိုပါ အဖွဲ့မှ ဆံတော်မြတ်ရတနာ ၊ ဆံတော်တိုက်ပြခန်း ၊ နန်းဦးဘုရားကြီး တို့အား ပန်း၊ရေချမ်း၊ဆီမီးများ ဆက်ကပ်လှူဒါန်းပြီး ရွှေသင်္ကန်းအလှူတော်ငွေကျပ် ( ၂၉၂၀၀၀/) ( ကျပ်နှစ်သိန်းကိုးသောင်းနှစ်ထောင်တိတိ) ၊ ထိုင်းဘတ် ( 38100) နှင့် US $ ( 400) အား ဘဏ္ဍာတော်ထိန်းဂေါပကအဖွဲ့ထံ ပေးအပ်လှူဒါန်းခဲ့ပြီး ဘဏ္ဍာတော်ထိန်းဂေါပကအဖွဲ့မှ ဂုဏ်ပြုမှတ်တမ်းလွှာနှင့် ဆံတော်မြတ်ရတနာ ဓာတ်ပုံအား အမှတ်တရလက်ဆောင်အဖြစ် ပြန်လည်ပေးအပ်ခဲ့သည်ဟုဆိုသည်။

ထို့နောက် ဗိုလ်တထောင်ရောဟဏီ ဘိုးဘိုးကြီး ၊ အစ်မတော်မြနန်းနွယ် နှင့် တန်ဆောင်းအသီးသီးရှိ ဘုရားများအား လှည့်လည်ဖူးမြှော်ကြည်ညို ကြ၍ နံနက် ( ၁၀ : ၀၀) မိနစ်အချိန်တွင် ပြန်လည် ထွက်ခွာသွားကြောင်း ဖော်ပြထားသည်။
Yangon Times/tthl
#Local_News
#Published_ 11 March 2024
#YMG_News #Yangon_Times #Yangon_Media_Group

Published 11 March 2024

ရုရှားနဲ့ စစ်ပွဲအဆုံးသတ်ရေး ညှိနှိုင်းဆွေးနွေးရန် ပုပ်ရဟန်းမင်းကြီး ဖရန်ဆစ်ရဲ့ တောင်းဆိုချက်ကို ယူကရိန်းက တနင်္ဂနွေနေ့မှာ ငြင်းပယ်လိုက်ပြီး ပုပ်ရဟန်းမင်းဟာ အမှန်တကယ် ကြားဝင်ဖျန်ဖြေသကဲ့သို့ ဆောင်ရွက်နေကြောင်း ယူကရိန်းသမ္မတ ဗိုလိုဒီမီယာဇယ်လန်စကီက ပြောကြားလိုက်သလို နိုင်ငံခြားရေးဝန်ကြီးကတော့ ယူကရိန်းဟာ ဘယ်တော့မှ အရှုံးပေးမှာ မဟုတ်ဘူးလို့ အသိပေးလိုက်ပါတယ်။

ပဋိပက္ခတစ်ခုမှာ တစ်ဖက်ဖက်က အခြေအနေ ဆိုးရွားလာပြီဆိုရင် အလံဖြူထောင်ပြီး ညှိနှိုင်းဆွေးနွေးရဲတဲ့ သတ္တိရှိရမယ်လို့ ဖရန်ဆစ်က ပြောသွားခဲ့တာ ဖြစ်ပါတယ်။

ယူကရိန်းစစ်ပွဲ ဆွေးနွေးရာမှာ အလံဖြူပြတာတွေ၊ အရှုံးပေးတာတွေ စတဲ့ အသုံးအနှုန်းများ အသုံးပြုခဲ့တဲ့ ဖရန်ဆစ်ရဲ့ ပထမဆုံးအင်တာဗျူး ဖြစ်တယ်လို့ ယူဆရပြီး အတိတ်က ဆွေးနွေးဖို့ လိုအပ်ခဲ့တဲ့ဖြစ်ရပ်ကို ရည်ညွှန်းခဲ့တာ ဖြစ်ပါတယ်။

ဇယ်လန်စကီက ဖရန်ဆစ်နဲ့ သူ့မှတ်ချက်စကားတွေကို တိုက်ရိုက်ရည်ညွှန်းတာ မဟုတ်ပေမယ့် ဘာသာရေးပုဂ္ဂိုလ်တွေက ယူကရိန်းအတွင်းထဲမှာ ကူညီပေးနေတယ်လို့ ဆိုလိုက်ပါတယ်။

သူတို့က ဆုတောင်းမှုတွေ၊ ဆွေးနွေးမှုတွေ၊ ကောင်းမှုကုသိုလ်တွေနဲ့ ကူညီပေးနေကြောင်း၊ ဒါဟာ ဘုရားကျောင်းနဲ့ သက်ဆိုင်သူတွေရဲ့ အလုပ်ဖြစ်ကြောင်း ဇယ်လန်စကီက မိန့်ခွန်းပြောကြားသွားပါတယ်။

နိုင်ငံခြားရေးဝန်ကြီး ဒီမစ်ထရိုကူလေဘာက X ဆိုရှယ်မီဒီယာမှာ ဖော်ပြထားရာမှာ သတ္တိရှိတဲ့သူဆိုတာ အငြင်းပွားမှုတစ်ခုမှာ မှန်ကန်တဲ့ဘက်ကနေ ရပ်တည်ရဲရတယ်လို့ ဆိုပါတယ်။

ယင်းတို့အလံဟာ အဝါရောင်နဲ့ အပြာရောင်သာဖြစ်ပြီး အသက်သေသေ ရှင်ရှင် ဒီအလံကိုပဲ သက်သေပြုသွားမှာ ဖြစ်ကြောင်း၊ အခြားဘယ်အလံမှ ထူမှာမဟုတ်ကြောင်း ရေးသားခဲ့ပါတယ်။

ဒါ့အပြင် ဒုတိယကမ္ဘာစစ်အတွင်း ဂျာမနီမှ နာဇီတွေကို ပုပ်ရဟန်းမင်း ပီယပ်စ်(၁၂) မဆန့်ကျင်ခဲ့ဘူးဆိုတဲ့ စွပ်စွဲချက်တွေကိုလည်း ထောက်ပြလိုက်ပါတယ်။

အတိတ်က အမှားမျိုးကို ထပ်မံမပြုလုပ်ဘဲ ကျူးကျော်ခံနေရတဲ့ ယူကရိန်းနဲ့ နိုင်ငံသားတွေကို ထောက်ခံအားပေးဖို့ တိုက်တွန်းလိုက်ပါတယ်။

ယူကရိန်းမှ အရှေ့ဘက် ရိုက်ကက်သလစ် ဘုရားကျောင်း အကြီးအကဲ ဂိုဏ်းချုပ်ကြီး ဆဗီယာတိုဆလပ်ဗ်ရှက်ဗ်ရွှတ်ကလည်း ဖရန်ဆစ်ရဲ့စကားကို ငြင်းပယ်လိုက်ပါတယ်။

ယူကရိန်းအရာရှိများနဲ့ ယူကရိန်းကို ထောက်ခံတဲ့ ဥရောပအရာရှိများကလည်း ပုပ်ရဟန်းမင်းပြောကြားတာတွေကို ရှုတ်ချလိုက်ပါတယ်။
Source: Reuters
#World_News
#Published_ 11 March 2024
#YMG_News #Yangon_Times #Yangon_Media_Group

ဧပြီလနောက်ပိုင်းမှာ မွေးမြူရေးဆိတ်တွေအနေနဲ့ ရောဂါဖြစ်ပွားမှုနည်းပြီး စားကျက်မြေလည်း ကောင်းမွန်တဲ့အချိန် ဖြစ်တဲ့အတွက် ဆိတ်မွေးမြူသူတွေအနေနဲ့ တိုးချဲ့မွေးမြူမှု အများဆုံးပြုလုပ်တဲ့ ကာလဖြစ်တယ်လို့ ဆိုပါတယ်။
Yangon Times/LW
#Local_News
#Published_ 11 March 2024
#YMG_News #Yangon_Times #Yangon_Media_Group

"ဒီနေ့မြန်မာစာကတော့ လွယ်‌တယ်။ အချိန်မစေ့ခင်ပြီးလို့ထွက်လာသူတွေရှိတယ်။
မိဘတွေအနေနဲ့ကတော့ အအောင်အကျမရှိ Grate A,B,C နဲ့ခွဲမှာဆိုတာကို မသိကြောင်းနဲ့ ဒီနှစ်အတွက်စာမေးပွဲ အောင်ဖို့ သိပ်စိတ်ပူပေမယ့် အမှတ်ကောင်းကောင်းမရမှာ ဂုဏ်ထူးရမှတ်မရမှာကို စိုးရိမ်တယ်။
Yangon Times/tthl
#Local_News
#Published_ 11 March 2024
#YMG_News #Yangon_Times #Yangon_Media_Group

မော်တင်စွန်းဘုရားပွဲတော်စတင်၊ နဂါးစာအာဟာရဒါနပြုလုပ်သူများပြား
' မော်တင်စွန်းဘုရားပွဲတော် ကာလမလို့ နဂါးစာပူဇော်တာ များပါတယ်၊ မူလဒါယကာဇေယျသေနနဂါးမင်းကို ပူဇော်ကြတာပါ၊ နဂါးစာဖော်တော်တစ်ခုကျပ်နှစ် သောင်းကနေ နှစ်သိန်းအထိရှိ ပါတယ်၊ အဓိဌာန်ဆုတောင်းပြည့်သူတွေက လည်း ထပ်လှူကြတယ်၊ မလာနိုင်သူတွေက ငွေလှမ်းလွှဲပြီး ပူဇော်တာတွေလည်းရှိပါတယ်
Yangon Times/NN
#Local_News
#Published_ 11 March 2024
#YMG_News #Yangon_Times #Yangon_Media_Group

Published 11 March 2024

ပဲခူးတိုင်းဒေသကြီး၊ တောင်ငူမြို့ကန်ရိုး သုသာန် ရှေ့ တွင် ယာဉ်တစ်စီး အရှိန်လွန်ကာ လမ်းဘေးရှိ သစ်ပင်အား ဝင်ရောက်တို-က်မိမှု ဖြစ်ပွားရာ ယာဉ်ပေါ်ပါ အမျိုးသား (၃)ဦး ထိခိုက်ဒဏ်ရာများ ရရှိခဲ့ကြောင်း ဒေသခံများနှင့် ပရဟိတအသင်းများထံမှ သိရသည်။

မတ်လ (၁၀)ရက်၊ ည (၁၀) နာရီ (၂)မိနစ်အချိန်ခန့်က Fit shuttle အဖြူရောင်မှာ မောင်းနှင်လာရာ အရှိန်လွန်ပြီး လမ်းဘေးရှိ သစ်ပင်အား ဝင်ရောက်တို-က်မိခဲ့ခြင်းဖြစ်ကြောင်း သိရသည်။

အဆိုပါ ဖြစ်စဉ်ကြောင့် ယာဉ်ပေါ်ပါ အမျိုးသား (၃)ဦးမှာ (စိုးရိမ်ရ) ထိခိုက်ဒဏ်ရာများ ရရှိခဲ့သောကြောင့် ပရဟိတအသင်းအဖွဲ့ Ambulance ယာဉ်များဖြင့် တောင်ငူဆေးရုံကြီး အရေးပေါ်ဌာနသို့ ပို့ဆောင်ထားကြောင်း သိရသည်။
Yangon Times/LW
#Local_News
#Published_ 11 March 2024
#YMG_News #Yangon_Times #Yangon_Media_Group

Published 11 March 2024

ရန်ကုန်တိုင်း‌ဒေသကြီး သုံးခွမြို့နယ် ၌ယခု မိုးစပါးနှင့်ဆောင်းသီးနှံအတွက် ကျပ်သိန်းပေါင်း ခြောက်သောင်းကျော်စိုက်ပျိုး စရိတ်ချေးငွေချထားပေးကြောင်းမြန်မာ့လယ်ယာဖွံ့ဖြိုးရေး ဘဏ်ခွဲမှ သိရသည်။

အဆိုပါ သုံးခွမြို့နယ် မြန်မာ့လယ်ယာဖွံ့ဖြိုးရေး ဘဏ်ခွဲသည်  ၂၀၂၃-၂၀၂၄ စိုက်ပျိုးရာသီ၌ မိုးစပါးအတွက် တစ်ဧက လျှင် ကျပ် ၁၅၀၀၀၀ နှုန်းဖြင့် ၃၀၂၉၁ ဧကအတွက် ကျပ် ၄၅၄၃၆ ဒသမ ၅ သိန်းတွက်ထုတ်ချေးပေးခဲ့ခြင်းဖြစ်သည်။

ထို့အပြင် ဆောင်းသီးနှံ သီးထပ်ပဲတီစိမ်းစိုက်ပျိုး  ထုတ်လုပ်ရန် တစ်ဧက ကျပ်တစ်သိန်းနှုန်းဖြင့် ၂၂၃၂၃ ဧက အတွက် ကျပ် ၂၂၃၂၃ သိန်းထုတ်ချေးပေးထားခဲ့ကြောင်းသိရသည်။

သုံးခွမြို့နယ်သည် မိုးစပါးအပြင် ဆောင်းသီးနှံအဖြစ်ပဲတီစိမ်းများကိုအဓ်က စိုက်ပျိုးလေ့ရှိရာ ယင်းဒေသမှထွက်ရှိသည့် ပဲတီစိမ်းအား ပြည်ပတင်ပို့သည့်ဈေးကွက်၌ လူကြိုက်များလေ့ရှိကြောင်းသိရသည်။
Yangon Times/NN
#Local_News
#Published_ 11 March 2024
#YMG_News #Yangon_Times #Yangon_Media_Group

Published 11 March 2024

ပင်ပန်းနွမ်းနယ်ခြင်း၊ စိတ်ဖိစီးခြင်း၊ အစားအသောက် စတဲ့ အချက်တွေက မှတ်ဉာဏ်ပိုင်းကို သက်ရောက်မှုရှိနေပါတယ်။

အာဟာရနဲ့ ပတ်သက်လာရင် ဗိုက်တာမင် ဘီ၁၂ ချို့တဲ့ခြင်းက အရေးပါဆုံးတွေထဲက တစ်ခုဖြစ်ပါတယ်။

ဗိုက်တာမင် ဘီ၁၂ ချို့တဲ့ပါက ခန္ဓာကိုယ်ထဲမှာ ဆိုးကျိုးများစွာ ဖြစ်ပေါ်နိုင်ပြီး မှတ်ဉာဏ်ဆိုးဆိုးရွားရွား ဆုံးရှုံးတာလည်း ပါဝင်နေပါတယ်။

ရင်းနှီးချစ်ခင်သူတွေရဲ့ နာမည်တွေကို မေ့လျော့တဲ့အထိ ဆိုးရွားနိုင်ပါတယ်။

ဗိုက်တာမင် ဘီ၁၂ ကို အမဲသား၊ ကြက်သား၊ ငါးတို့မှာ တွေ့ရသလို ကြက်ဥနဲ့ နို့ထွက်ပစ္စည်းတွေမှာလည်း တွေ့ရပါတယ်။

အသားစားတဲ့ သူတွေမှာတောင် ဘီ၁၂ ချို့တဲ့နိုင်ပြီး ပုံမှန်ဖြည့်စွက်ပေးဖို့ လိုအပ်နိုင်ပါတယ်။

ဘီ၁၂ စုပ်ယူခြင်းဟာ အစာအိမ်အတွက် အရေးပါပြီး အစာအိမ်မကောင်းသူတွေမှာ ဘီ၁၂ စုပ်ယူမှုအားနည်းပြီး အက်ဆစ်လျှံတက်ခြင်း၊ ရင်ပူခြင်း၊ အစာခြေပြဿနာဖြစ်ခြင်းတို့ ဖြစ်နိုင်ပါတယ်။

အားနည်းခြင်း၊ အိပ်မပျော်ခြင်း၊ ကိုယ်အလေးချိန် မထိန်းနိုင်ခြင်း၊ ဆံပင်ကျွတ်ခြင်း၊ မှတ်ဉာဏ်ဆုံးရှုံးခြင်းတို့ ခံစားရပြီဆိုရင် ဗိုက်တာမင် ဘီ၁၂ ဆုံးရှုံးခြင်းရှိမရှိ စစ်ဆေးသင့်ပါတယ်။
Source: The Jerusalem Post.
#World_Health
#Published_ 11 March 2024
#YMG_News #Yangon_Times #Yangon_Media_Group

Published 11 March 2024

တစ်နေ့ကို ခြေလှမ်း ၁၀၀၀၀ ကနေ ၁၂၀၀၀ အထိ လျှောက်တဲ့သူတွေဟာ ခန္ဓာကိုယ်ထုထည်ညွှန်းကိန်းနဲ့ ခန္ဓာကိုယ်အဆီ ရာခိုင်နှုန်း လျော့ကျနိုင်တယ်လို့ လေ့လာချက်တွေမှာ တွေ့ရှိထားပါတယ်။

ဒါ့အပြင် ကြားဖြတ်လေ့ကျင့်ခန်းတွေပါ ပြုလုပ်ပါက ကိုယ်အလေးချိန် ကျဖို့လွယ်တယ်လို့လည်း တွေ့ရှိထားပါတယ်။

ပြုလုပ်တဲ့အခါ ဘယ်လောက်အထိ ပြင်းပြင်းထန်ထန် ပြုလုပ်လဲဆိုတာက ကယ်လိုရီလောင်ကျွမ်းခြင်းနဲ့ နှလုံးအသက်ရှူလမ်းကြောင်းစနစ်တို့ တိုးတက်ခြင်းတို့နဲ့ ပတ်သက်နေတယ်လို့က နည်းပြဆရာ ဒင်းနစ်မစ်လက်စ်က ပြောပြသွားပါတယ်။

စက္ကန့် ၃၀ မှ ၆၀ ခန့် ခပ်မြန်မြန်လမ်းလျှောက်ခြင်းကို ၅ မိနစ်တစ်ခါ ပြုလုပ်ပြီး စက္ကန့် ၃၀ ကို ခပ်ဖြည်းဖြည်း လျှောက်သင့်တယ်လို့ အကြံပြုလိုက်ပါတယ်။
အလေးအပင်ကိုင်ဆောင်ပြီး လျှောက်ခြင်း၊ ကုန်းတက်လျှောက်ခြင်းတို့က ပိုပြီးထိရောက်စေပါတယ်။

လေ့ကျင့်ခန်းလုပ်စဥ်ပြုလုပ်ပြီး ကြားဖြတ်ထပ်လုပ်ပါက အောက်ဆီဂျင်သုံးစွဲမှု ပိုများတာကြောင့် ကယ်လိုရီတွေ ဆက်လက်လောင်ကျွမ်းတယ်လို့ ဆိုပါတယ်။

ကျန်းမာရေးနဲ့ ညီညွတ်တဲ့ အစားအစာနဲ့ လေ့ကျင့်ခန်းပြုလုပ်ခြင်းကို တွဲဖက်ကျင့်ကြံပါက ပိုမိုထိရောက်မှုရှိပြီး တစနေ့တာမှာ ကယ်လိုရီအများအပြား လောင်ကျွမ်းစေတယ်လို့ မစ်လက်စ်က ပြောပြပါတယ်။

ကြားဖြတ်လေ့ကျင့်ခန်း ပါသည်ဖြစ်စေ မပါသည်ဖြစ်စေ လမ်းလျှောက်ခြင်းဖြင့် သွေးပေါင်ကျခြင်း၊ စိတ်ခံစားမှုကောင်းမွန်ခြင်း၊ အရိုးသန်မာခြင်း၊ အစာကြေလွယ်ခြင်းစတဲ့ ကျန်းမာရေးအကျိုးကျေးဇူးများ ရရှိစေပါတယ်။

လူတွေဟာ ပြေးသည်ဖြစ်စေ အေးဆေးလမ်းလျှောက်သည်ဖြစ်စေ ပျမ်းမျှအားဖြင့် တစ်မိုင်ကို ၁၀၀ ကယ်လိုရီခန့် လောင်ကျွမ်းစေနိုင်ပါတယ်။
Source: New York Post.
#World_Health
#Published_ 11 March 2024
#YMG_News #Yangon_Times #Yangon_Media_Group

Published_10 March 2024

မန္တလေးတိုင်းဒေသကြီး၊ ကျောက်ဆည်မြို့နယ်၊ ရန်ကုန်- မန္တလေး ရထားလမ်းပိုင်းအတွင်း ကျောက်ဆည်-မင်းစုဘူတာအကြား၊ မိုင် ၃၅၃/၂၄ နှင့် ၃၅၄/၁ ကြား တံတားအမှတ် ၇၃၈ ၏ အစုန်/အဆန် ပေ ၂၀ သံ ဘောင်တံတားနှင့် ကွန်ကရစ်တံတားများ ပေါ်တွင် ယနေ့ မတ်လ ၁၀ ရက် က မိုင်းပေါက်ကွဲမှု ဖြစ်ပွားခဲ့ ကြောင်းသိရသည်။

ယင်းကြောင့် နယ်မြေခံလုံခြုံရေးအဖွဲ့မှ သွားရောက် စစ်ဆေးခဲ့ရာ တံတားများရှိ အရှေ့ဘက်ခြမ်းသံ လမ်းများ (၂)ပေခန့်စီ ပြတ်ထွက်နေပြီး မကွဲသေး သော လက်ကျန် မိုင်း(၁)လုံး လည်းတွေ့ရှိခဲ့သဖြင့် မင်းစု-ကျောက် ဆည် အစုန်အဆန်လမ်းပိုင်း များကို နံနက်၈ နာရီ ၅၀ မိနစ်အချိန်တွင် ခေတ္တပိတ်ခဲ့ကာ မပေါက်ကွဲသေး သည့် မိုင်းကိုသက်မဲ့ပြုလုပ် ရှင်းလင်းခြင်းများဆောင်ရွက်ခဲ့ကြောင်း သိရသည်။

ရထားလမ်းပိုင်းအမြန်ဆုံးပြန်လည်ဖွင့်လှစ်နိုင်ရေးအတွက် မြန်မာ့မီးရထား ဝန်ထမ်းများ က ချက်ချင်းပြုပြင် ခဲ့သဖြင့် ကျောက်ဆည်-မင်းစု အဆန် လမ်းပိုင်းကို မွန်းလွဲ၁ နာရီ ၆ မိနစ်နှင့် အစုန်လမ်းပိုင်းကို ညနေ ၃ နာရီ ၂၀ မိနစ် အချိန် တို့တွင် အသီးသီးပြန်လည်ဖွင့်လှစ်ပေးနိုင်ခဲ့ကြောင်း သိရသည်။

အဆိုပါဖြစ်စဉ်ကြောင့် လူစီးရထားများကြန့်ကြာမှုမရှိသော်လည်း ကုန်ရထားများ ကြန့်ကြာမှုဖြစ်ပေါ်ခဲ့ ကြောင်း၊၇၅ ပေါင်သံလမ်း၊ ကွန်ကရစ် ဇလီဖားတုံးနှင့် သစ်သား ဇလီဖားတုံးများ ပျက်စီးဆုံးရှုံးမှု ဖြစ်ပေါ်ခဲ့ကြောင်း သိရသည်။

ပြီးခဲ့သည့်၂၀၂၁ ခုနှစ်၊ ဖေဖော်ဝါရီလ(၁)ရက်မှ စ၍ ယခုအချိန်အထိ မြန်မာ့မီးရထားလမ်းကွန်ယက်တစ်ခု လုံးတွင် ရထားလမ်းနှင့် ရထားဘူတာ နယ်မြေအတွင်း ဗုံးထောင်မိုင်းခွဲဖျက်ဆီးခံရမှု(၁၃၀)ကြိမ်၊ ရထားတံ တားများကို မိုင်းခွဲဖျက်ဆီးခံရမှု (၄၉) ကြိမ်၊ ဘူတာအဆောက်အဦနှင့် ဝန်ထမ်းနေအိမ်များမီးရှို့ဖျက်ဆီးခံရမှု (၁၂)ကြိမ် ရှိပြီ ဖြစ်ကြောင်း သိရသည်။
Yangon_Times/PP
#Local_News
#Published_ 10 March 2024
#YMG_News #Yangon_Times #Yangon_Media_Group