Published_ 20 March 2024

ပအိုဝ်းအမျိုးသားနယ်မြေများအတွင်း လက်နက်ကိုင်ပဋိပက္ခ ကိုမတ်လ (၂၃) ရက်မှ ဧပြီလ(၂၃)ရက်ထိ တစ်လကြာ ပစ်ခတ်တိုက်ခိုက်မှု ရပ်စဲကြရန် ပအိုဝ်းအမျိုးသားလက်နက်ကိုင် အင်အားစုများ အားလုံးသို့ အလေးအနက်ထား မေတ္တာရပ်ခံ‌ကြောင်း PNLO ၏ ထုတ်ပြန်ချက်တွင် ဖော်ပြထားသည်။

လာမည့်မတ်လ-၂၄ ရက်တွင်ကျရောက်မည့် ပအိုဝ်းတစ်မျိုးသားလုံးက အထွဋ်အမြတ်ထားသော “ပအိုဝ်းအမျိုးသားနေ့”(၇၅)နှစ်ပြည့် စိန်ရတုအခါသမယနှင့် တိုက်ဆိုင်သည့်အတွက် အားလုံးကဂုဏ်ပြုကြရန် အထူးလိုအပ်သောကြောင့်ဖြစ်ကြောင်း လည်း ယင်းတွင်ဖော်ပြထားသည်။

ယင်းသို့ အနည်းဆုံး တစ်လကြာ "ပစ်ခတ်တိုက်ခိုက်မှု"ရပ်စဲကြပါက ထိုကာလအတောအတွင်း ပအိုဝ်းအမျိုးသားနေ့ပွဲတော်များကို နေရာအနှံ့ အောင်မြင်စွာ ကျင်းပနိုင်မည်ဖြစ်ခြင်း။ ပအိုဝ်းအမျိုးသား စည်းလုံးညီညွတ်ရေးအတွက် စည်းရုံးဟောပြောမှုများကို ပြုလုပ်ကျင်းပ ခြင်း ၊ ပဋိပက္ခများလျှော့ကျစေနိုင်ခြင်း။ တန်ခူးလပြည့်နေ့ အခါကြီးရက်ကြီးတွင် ဓလေ့ထုံးစံများအတိုင်း အလှူအတန်းများပြုလုပ် နိုင်ခြင်း။ နိုင်ငံတကာအလှူရှင်များထံမှ ပံ့ပိုးကူညီသော ရိက္ခာဆန်အပါအဝင် လူသားချင်းစာနာ ထောက်ထားမှုဆိုင်ရာ အကူအညီများကို အတိဒုက္ခရောက်နေကြသော စစ်ပြေးစစ်ရှောင် ဒုက္ခသည်များထံသို့ ပို့ဆောင်ကူညီနိုင်မည်ဖြစ်ခြင်းတို့ကြောင့် အမျိုးသားအကျိုးစီးပွားကိုရှေ့ရှု၍ တပေါင်းလပြည့်နေ့မှ တန်ခူးလပြည့်နေ့အ ထိ အပစ်အခတ်ရပ်စဲရေးအတွက် မေတ္တာရပ်ခံပန်ကြားခြင်းဖြစ်ကြောင်းလည်း ၎င်းတွင်ဖော်ပြထားသည်။

ထို့အပြင် ပအိုဝ်းရဟန်းသံဃာအစုအဖွဲ့များ၊ ပအိုဝ်းစာပေနှင့်ယဉ်ကျေးမှုအဖွဲ့များ၊ ပအိုဝ်းလူငယ်အစည်းအရုံး၊ ပအိုဝ်းအမျိုးသမီးသမဂ္ဂ၊ ပအိုဝ်းအရပ်ဖက်အဖွဲ့အစည်းများနှင့် လူမှုကူညီရေး အသင်းအဖွဲ့များ အားလုံးတို့ကလည်း ပစ်ခတ်တိုက်ခိုက်မှုရပ်စဲရေး ပန်ကြားလွှာကို ဝိုင်းဝန်းထောက်ခံပြီး ကြေညာ ချက်များ အလားတူထုတ်ပြန်ကြပါရန် နှိုးဆော်ပါကြောင်း ပအိုဝ်းအမျိုးသားလွတ်မြောက်ရေးအဖွဲ့ချုပ်(PNLO)၏ ဦးဆောင်နာယက ဗိုလ်မှူးကြီး ခွန်ဥက္ကာက လက်မှတ်ထိုး ထုတ်ပြန်ထားကြောင်းသိရသည်။
Yangon Times/PP
#Local_News
#Published_ 20 March 2024
#YMG_News #Yangon_Times #Yangon_Media_Group

Published_ 20 March 2024

လုံခြုံရေးအခြေအနေအရတက္ကသိုလ်ဝင်စာမေးပွဲ ဖြေဆိုခွင့်ဆုံးရှုံးခဲ့သူများအတွက် အထူးအစီအစဉ်တစ်ရပ်ဆောင်ရွက်ပေးမည်ဖြစ်ကြောင်းမြန်မာနိုင်ငံစာစစ်ဦးစီးဌာနမှထုတ်ပြန်လိုက်သည်။

ယခုနှစ်တက္ကသိုလ်ဝင်တန်းစာမေးပွဲဖြေဆိုရန် မှတ်ပုံတင်ထားပြီးမှ လုံခြုံရေးအခြေအနေအရ ဖြေဆိုခွင့်ဆုံးရှုံးခဲ့ရသည့် ကျောင်းသား ကျောင်းသူများအတွက် အထူးအစီအစဉ်တစ်ရပ်ဖြင့် တိုင်းဒေသကြီးနှင့်ပြည်နယ်အစိုးရတို့၏ပံ့ပိုးကူညီမှုဖြင့် သတ်မှတ်ထားသည့်အခြေခံပညာကျောင်းများရှိ စာစစ်ဌာနများသို့ ကျောင်းသား၊ကျောင်းသူများကို စုစည်းခေါ်ယူ၍ စာမေးပွဲဖြေဆို‌စေခြင်းကို  ဆောင်ရွက်ပေးမည်ဖြစ်ကြောင်း၊
‌
ဖြေဆိုရမည့်နေ့ရက်နှင့် စာစစ်ဌာနများကို ထပ်မံထုတ်ပြန်သွားမည်ဖြစ်ကြောင်း မြန်မာနိုင်ငံစာစစ်ဦးစီးဌာနမှ မတ်လ(၁၉)ရက်၌ထုတ်ပြန်လိုက်ကြောင်း သိရသည်။
Yangon Times/tthl
#Local_News
#Published_ 20 March 2024
#YMG_News #Yangon_Times #Yangon_Media_Group

Published 20 March 2024

မြောက်ကိုရီးယားနိုင်ငံရဲ့ ကာကွယ်ရေးစွမ်းရည် ဖွံ့ဖြိုးရေး အစီအစဥ် တစ်စိတ်တစ်ပိုင်းအဖြစ် တာလတ်ပစ် အသံထက်မြန်ဒုံးကျည် အမျိုးအစားသစ်အတွက် အစိုင်အခဲလောင်စာသုံးအင်ဂျင် မြေပြင်စမ်းသပ်မှုကို ခေါင်းဆောင် ကင်မ်ဂျုံအန်းက ကြီးကြပ်ညွှန်ကြားခဲ့ကြောင်း နိုင်ငံပိုင် KCNA သတင်းဌာနက ဗုဒ္ဓဟူးနေ့မှာ ဖော်ပြလိုက်ပါတယ်။

အင်္ဂါနေ့ နံနက်ပိုင်းနဲ့ မွန်းလွဲပိုင်းတို့မှာ အနောက်ဘက် ကမ်းရိုးတန်းအနီး ဆိုဟေးဂြိုဟ်တုလွှတ်တင်ရေး စခန်းကြီးကနေ စမ်းသပ်ခဲ့တာ ဖြစ်ပါတယ်။

စမ်းသပ်မှု အကြီးအကျယ် အောင်မြင်တဲ့အတွက် အသံထက်မြန် တာလတ်ပစ်ပဲ့ထိန်းဒုံးကျည်အသစ် ထုတ်လုပ်မှုပြီးမြောက်ခြင်း အချိန်ဇယားအရ စီမံကိန်းရှေ့ဆက်နိုင်မှာ ဖြစ်တယ်လို့ ဖော်ပြထားပါတယ်။

မြောက်ကိုရီးယားဟာ ဇန်နဝါရီလကလည်း အစိုင်အခဲလောင်စာသုံးအင်ဂျင် အသစ်တစ်မျိုးကို အသုံးပြုကာ တာလတ်ပစ် အသံထက်မြန်ဒုံးကျည်နဲ့ ပဲ့ထိန်းနိုင်တဲ့ ထိပ်ဖူးပစ်ခတ်ပုံတို့ကို စမ်းသပ်ခဲ့ပါသေးတယ်။

KCNA က အင်ဂျင်ရဲ့ အသေးစိတ်အချက်အလက်တွေနဲ့ စမ်းသပ်ပုံ နည်းပညာသဘောသဘာဝကိုတော့ မဖော်ပြထားပါဘူး။

တိုင်းပြည်လုံခြုံရေးနဲ့ မြောက်ကိုရီးယား တပ်မတော် လိုအပ်ချက်အရ ထိုလက်နက်စနစ်ရဲ့ စစ်ရေးဗျူဟာမြောက်တန်ဖိုးဟာ တိုက်ချင်းပစ်ပဲ့ထိန်းဒုံးကျည်လောက်ကို ကြီးမားတယ်ဆိုတာ လက်ခံရမှာဖြစ်ပြီး ရန်သူတွေဆိုရင် ဒီအကြောင်းကို ပိုပြီးသဘောပေါက်မှာဖြစ်ကြောင်း ကင်မ်ဂျုံအန်းက ဆိုလိုက်ပါတယ်။
Source: Reuters
#World_News
#Published_ 20 March 2024
#YMG_News #Yangon_Times #Yangon_Media_Group

Published 20 March 2024

အစာအိမ်အူလမ်းကြောင်းဟာ ရှုပ်ထွေးတဲ့စနစ်တစ်ခုဖြစ်ပြီး အစာခြေခြင်း၊ အာဟာရစုပ်ယူခြင်း၊ ခန္ဓာကိုယ်မှ အညစ်အကြေးစွန့်ထုတ်ခြင်းတို့ ပြုလုပ်ပေးပါတယ်။

ထိုစနစ်မှာ အစာအိမ်၊ အူသိမ်၊ အူမကြီး၊ စအို စတဲ့အင်္ဂါများ ပါဝင်ပါတယ်။

ဘက်တီးရီးယား၊ ဗိုင်းရပ်စ်၊ မှိုစတဲ့ အူလမ်းကြောင်း အဏုဇီဝပိုးမွှား ထရီလီယံနဲ့ချီ ရှိနေပါတယ်။

အချို့သော ဟင်းရွက်တွေနဲ့ ဟင်းခတ်ပစ္စည်းတွေက အူလမ်းကြောင်းပိုးမွှားများကို အကျိုးပြုပြီး အထူးသဖြင့် အူလမ်းကြောင်းကျန်းမာရေးကို ကောင်းမွန်စေပါတယ်။

နနွင်းမှာပါဝင်တဲ့ ကာကူမင်ဒြပ်ပေါင်းက ရောင်ရမ်းခြင်းနဲ့ ဓာတ်တိုးခြင်းကို ဆန့်ကျင်ပေးတဲ့ အစွမ်းသတ္တိရှိပြီး အူလမ်းကြောင်းကျန်းမာရေးကို အကျိုးပြုစေမယ့် အခြားပစ္စည်းများကိုလည်း ဖော်ပြလိုက်ပါတယ်။
 
(၁) ဂျင်းက အစာခြေစနစ် ကောင်းမွန်စေပြီး အူလမ်းကြောင်း ဘက်တီးရီးယားများကို အကျိုးပြုပါတယ်။
 
(၂) ကြက်သွန်ဖြူက အကျိုးပြုပိုးမွှားတွေကို အားပေးပြီး ရောဂါပိုးဆန့်ကျင်ပေးတဲ့ အစွမ်းသတ္တိရှိပါတယ်။
 
(၃) အော်ရီဂါနို ဟင်းခတ်အမွှေးအကြိုင်က ရောဂါပိုးဆန့်ကျင်တဲ့အာနိသင်ရှိပြီး အူလမ်းကြောင်းပိုးမွှားတွေကို အကျိုးပြုပါတယ်။
 
(၄) ပူရှိန်းက လေပွခြင်း အစာမကြေခြင်းတို့ကို သက်သာစေပြီး အချို့သော အန္တရာယ်ပြုပိုးမွှားများကို ဆန့်ကျင်ပေးပါတယ်။
 
(၅) သစ်ကြံပိုးခေါက်ကလည်း ပိုးမွှားဆန့်ကျင်ပေးနိုင်ကာ သွေးတွင်းသကြားဓာတ်ကို ထိန်းညှိပေးပါတယ်။
 
(၆) စမုန်စပါးဟာ လေပွခြင်းကို သက်သာစေပြီး ရောဂါပိုးမွှားဆန့်ကျင်ပေးတဲ့ အစွမ်းသတ္တိရှိပါတယ်။
 
(၇) ကမ်မိုမိုင်ဆေးဘက်ဝင်အပင်က ရောင်ရမ်းခြင်းကို ဆန့်ကျင်ပေးကာ အစာခြေစနစ်ကို ကောင်းမွန်စေပါတယ်။
 
(၈) နွယ်ချိုမြစ်က အစာခြေကျန်းမာရေးကို ကောင်းစေပြီး ရောင်ရမ်းခြင်းကို ဆန့်ကျင်ပေးပါတယ်။
 
(၉) ပင်စိမ်းရွက်ကလည်း ရောဂါပိုးမွှားဆန့်ကျင်ပေးကာ ရောင်ရမ်းခြင်းကို ဆန့်ကျင်ပေးပါတယ်။
Source: DoctorNDTV.
#World_Health
#Published_ 20 March 2024
#YMG_News #Yangon_Times #Yangon_Media_Group

Published 20 March 2024

လူတွေရဲ့ ဘဝသက်တမ်းမှာ အသက်ရှည်ကျန်းမာဖို့အတွက် အချို့အရာတွေက လက်လှမ်းမမီသလို လုပ်လို့ရနိုင်တဲ့အရာတွေလည်း ရှိပါတယ်။

မျိုးရိုးဗီဇအရ အယ်လ်ဇိုင်းမားရောဂါ ဖြစ်နိုင်ခြေများတဲ့ သူတွေတောင် ကျန်းမာရေးနဲ့ ညီညွတ်စွာ ပြုမူနေထိုင်ပါက နှစ်ပေါင်းများစွာတိုင်အောင် ရောဂါလက္ခဏာ ကင်းဝေးစေနိုင်တယ်လို့ နယူးဂျာစီ ဟက်ကင်ဆက်မယ်ရီဒီယန်ကျန်းမာရေးမှ ဒေါက်တာ ဂယ်ရီစမောလ်က ပြောပြပါတယ်။

ကျန်းမာအသက်ရှည်ရန်အတွက် အရေးအကြီးဆုံး ပြုမူနေထိုင်ပုံ ၅ မျိုးကို စမောလ်က မျှဝေသွားပါတယ်။
 
(၁) အကောင်းမြင်တတ်ပါ
အကောင်းမြင်တတ်သူတွေဟာ ရုပ်ပိုင်းဆိုင်ရာနဲ့ စိတ်ပိုင်းဆိုင်ရာ အခက်အခဲများ နည်းပါးခြင်း၊ နာကျင်ခံစားရမှု နည်းပါးခြင်း၊ ခွန်အားပိုရှိပြီး ပျော်ရွှင်အေးချမ်းကြရပါတယ်။

ပိုပြီး အကောင်းရှုမြင်တတ်ရန် ကြိုးပမ်းခြင်းဖြင့် စိတ်နေစိတ်ထားလည်း ပြောင်းလဲလာနိုင်ပါတယ်။
 
(၂) တက်ကြွလှုပ်ရှားစွာနေထိုင်ပါ
ပုံမှန်လှုပ်ရှားလေ့ကျင့်တာဟာ ပျမ်းမျှနေထိုင်သက်တမ်း ကြာရှည်လာတာနဲ့ ဆက်စပ်နေပါတယ်။

အစပိုင်းမှာ ခက်ခဲတတ်ပေမယ့် လုပ်ပြီးတဲ့အခါမှာတော့ အားပိုရှိခြင်း၊ အိပ်ကောင်းစားကောင်းခြင်း၊ နောက်ထပ်ပြုလုပ်ရန် စိတ်ပါခြင်းတို့ ရလာပြီး သွေးလှည့်ပတ်မှု ကောင်းမွန်ခြင်း၊ ပျော်ရွှင်မှုဟော်မုန်း ထွက်စေခြင်း၊ ဦးနှောက်ဆဲလ် ချိတ်ဆက်မှုအားကောင်းခြင်း၊ နှလုံးကျန်းမာရေး မြှင့်တင်ခြင်းတို့ ပေးစွမ်းနိုင်ပါတယ်။
 
(၃) ကျန်းမာရေးနှင့်ညီညွတ်စွာ စားသုံးပါ
ကျန်းမာစွာ စားသောက်ခြင်းဖြင့် နှလုံးရောဂါ၊ ကင်ဆာ၊ အသက်အရွယ်နဲ့ဆိုင်တဲ့ အခြားရောဂါများမှ ဖြစ်နိုင်ခြေနည်းစေပြီး ဓာတ်တိုးဆန့်ကျင်ပစ္စည်း ပါဝင်တဲ့ အသီးအရွက်တွေက အိုမင်းရင့်ရော်ခြင်းကို ဖြစ်စေတဲ့ ဓာတ်တိုးခြင်းကို လျှော့ချပေးပါတယ်။

အဆင့်ဆင့်ထုပ်ပိုးထားတဲ့ စားစရာတွေနဲ့ သန့်စင်ပြီး သကြားတွေကိုလျှော့ချပြီး ဆီးချိုရောဂါဖြစ်နိုင်ခြေကို လျှော့ချနိုင်ပါတယ်။
 
(၄) ဖိစီးမှုလျှော့ချပါ
ကာလကြာရှည်စွာ စိတ်ဖိစီးခြင်းက ဒီမန်ရှာရောဂါနဲ့ နှလုံးပြဿနာများ ဖြစ်စေနိုင်ပါတယ်။
တရားထိုင်ခြင်းနဲ့ အကြောလျှော့ လေ့ကျင့်ခန်းများက စိတ်ခံစားမှုကို တိုးတက်စေပြီး မှတ်ဉာဏ်စွမ်းရည် မြှင့်တင်ပေးပါတယ်။
 
(၅) မိမိကျန်းမာရေးကို ထိန်းသိမ်းစောင့်ရှောက်ပါ
တရားထိုင်ခြင်း၊ ကျန်းမာရေးနဲ့ ညီညွတ်စွာ စားသောက်နေထိုင်ခြင်းတို့ဖြင့် နာတာရှည်ရောဂါများ ကာကွယ်နိုင်မှာဖြစ်ပြီး ရောဂါရှာဖွေစစ်ဆေးမှုများကို ပုံမှန်ပြုလုပ်သင့်ပါတယ်။
Source: New York Post.
#World_Health
#Published_ 20 March 2024
#YMG_News #Yangon_Times #Yangon_Media_Group

မြောက်ဗီယက်နမ်စစ်သားဟောင်း ဒိုဒုဒယူဟာ နှစ် ၂၀ ကျော်ကြာမြင့်ခဲ့တဲ့ ဗီယက်နမ်စစ်ပွဲမှာ အသက်ရှင်ကျန်သူ ဖြစ်ပေမယ့် အမေရိကန်စစ်တပ်မှ အသုံးပြုခဲ့တဲ့ အဆိပ်အတောက်မြင့်မားတဲ့ ပေါင်းသတ်ဆေး အေးဂျင့်အောရင့်ချ်ရဲ့ နောက်ဆက်တွဲဒဏ်တွေကို ခံစားနေရဆဲဖြစ်ပြီး သူ့ရဲ့ကလေး ၁၂ ဦး သေဆုံးထားရပါတယ်။
#World_History
#Published_ 19 March 2024
#YMG_News #Yangon_Times #Yangon_Media_Group

#Daily_News
Published_ 19 March 2024

၁။ ထိုင်းနိုင်ငံမှချီးမြှင့်သည့် Asia Top Awards ဆုကို သရုပ်‌ဆောင်အလင်းရောင်၊ ရှမ်းအဆိုတော် The Sai နှင့်ဒါရိုက်တာ‌ကျော်ကျော်ဝင်းတို့ ရရှိ

၂။ ကြက်သွန်ဖြူဈေး ဆက်တိုက်ကျလာပြီး တစ်ပိသာ ကျပ် ၅၀၀၀  ဝန်းကျင်သို့ ရောက်ရှိလာဟုဆို

၃။ တာကောတံတား ယာဉ်ကြောပိတ်ဆို့မှုများ ဖြစ်နေပြီး တာလေတံတား ဝိတ်လျော့တင်နေရ၍ ထိုင်းသို့ ပြောင်းတင်ပို့ရာ၌ အခက်အခဲရှိနေ

၄။ ဗီယက်နမ်စစ်ပွဲအတွင်း အမေရိကန်စစ်တပ်မှ ကျဲချခဲ့သည့် ပေါင်းသတ်ဆေးအဆိပ်သည် ယနေ့ထက်တိုင် ဗီယက်နမ်မျိုးဆက်သစ်များကို ဘေးသင့်လျက်ရှိ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG_News #Yangon_Media_Group

၂၀ မတ် ၂၀၂၄

လယ်သမားတွေ ရိုးပြတ်မီးရှို့သော နေရာတွေမှ ထွက်ရှိတဲ့ ပြောင်းသီးနှံတွေ တင်သွင်းခြင်းကို ယခုနှစ်မှစတင်ကာပိတ်ပင်ဖို့ အတွက် ထိုင်းအစိုးရအဖွဲ့က အင်္ဂါနေ့ (မတ် ၁၉)ရက်နေ့မှာ အတည်ပြုလိုက်ပါတယ်။

အဲသလို ပိတ်ပင်ခြင်းဟာ ထိုင်းနိုင်ငံအနေနှင့် အိမ်နီးချင်းနိုင်ငံတွေဆီကနေ နှစ်စဉ်  ထွက်ရှိရောက်ရှိတဲ့ မီးခိုးငွေ့ကို လျှော့ချ ပစ်နိုင်ဖို့ ရည်ရွယ်တယ်လို့ဆိုပါတယ်။

အစိုးရအဖွဲ့ဟာ ကူးသန်းရောင်းဝယ်ရေးဝန်ကြီးဌာနကို ယင်းနှင့်ပတ်သက်လို့ ပြင်ဆင်ဆောင်ရွက်ဖို့ ညွှန်ကြားလိုက်တယ်လို့ အစိုးရအဖွဲ့ ပြောရေးဆိုခွင့်ရသူ ချိုင်း ဝါချာအွန်ကေက ပြောပါတယ်။

အိမ်နီးချင်းနိုင်ငံတွေက လယ်ကွင်းတွေမီးရှို့တဲ့အတွက် ဖြစ်ပေါ်ရတဲ့ လေထုညစ်ညမ်းမှုအပေါ် အစိုးရရဲ့ စိုးရိမ်ပူပန်မှုကို ယခု အရေးယူဆောင်ရွက်မှုက ဖော်ပြနေတာဖြစ်တယ်လို့ သူကပြောပါတယ်။ တာဝန်ရှိ အရာရှိကြီးတွေအနေနှင့် ဂြိုဟ်တုဓာတ်ပုံ တွေကိုအသုံးပြုကာ ပြောင်းစိုက်တဲ့ ဒေသတွေကို ကြည့်ရှသွားမယ်လို့ မစ္စတာချိုင်းက ပြောပါတယ်။

မည်သည့် သွင်းကုန်ပိတ်ပင်မှုမျိုးမဆို ကမ္ဘာ့ကုန်သွယ်ရေးအဖွဲ့ရဲ့ စည်းမျဉ်းတွေနှင့် ကိုက်ညီရလိမ့်မှာဖြစ်ပြီး ယခုနှစ် ထွက်ပေါ် လာမယ်လို့မျှော်လင့်ထားတဲ့ သန့်ရှင်းလေဥပဒေကို စောင့်ဆိုင်းနေတယ်လို့လည်းသူကပြောပါတယ်။

ထိုင်းနိုင်ငံဟာ နှစ်စဉ် ပြောင်း တန်ချိန် ၈.၉ သန်း လိုအပ်မှုရှိပါတယ်။ ပြည်တွင်းထုတ်လုပ်မှုက တစ်နှစ်ကို တန်ချိန် ၄.၉ သန်း ရှိပါတယ်။

ထိုင်းနိုင်ငံဟာ  အိမ်နီးချင်းနိုင်ငံတွေကနေ နှစ်စဉ် ပြောင်းတန်ချိန် ၁.၆သန်းတင်သွင်းနေရပါတယ်။ အဲဒီအထဲမှာ  မြန်မာနိုင်ငံ ကနေ တန်ချိန် ခြောက်သိန်းမှ ခုနှစ်သိန်းအထိ လာအိုမှ တန်ချိန် သုံးသိန်းမှလေးသိန်းအထိနှင့် ကမ္ဘောဒီးယားမှ တန်ချိန် တစ်သိန်းခန့် တင်သွင်းနေရတာဖြစ်ပါတယ်။

ကျန်တန်ချိန်နှစ်သန်းကိုတော့ အခြားနိုင်ငံများမှတင်သွင်းနေပြီး အများစုမှ ဘရာဇီးမှဖြစ်ကြောင်းသိရှိရပါတယ်။

Source Bangkok Post

#ymg/knl

#world_News

#Thailand

#Business

မွန်ပြည်နယ်၊ ကျိုက်ထိုမြို့နယ်က ကျိုက်ထီးရိုးစေတီတော်မှာ ဘုရားဖူးတွေ တစ်ရက်ကို  ပျှမ်းမျှသုံးထောင်က‌နေ ခုနှစ်ထောင်အကြားဖူးမျှော်နေပြီး ထိုင်းဘုရားဖူးတွေကတော့ အုပ်စုလိုက်လာရောက်နေကြတယ်လိုh ဘဏ္ဍာတော်ထိန်းဂေါပကအဖွဲ့ထံက သိရပါတယ်။
Yangon Times/NN
#Local_News
#Published_ 19 March 2024
#YMG_News #Yangon_Times #Yangon_Media_Group

သင်္ကြန်ကာလမှာ ရေပြတ်လတ်သွားတဲ့ ‌ဘုန်းကြီးကျောင်း၊ တရားရိပ်သာ၊ ဘိုးဘွားရိပ်သာ၊ နေအိမ်တွေအနေနဲ့ ရှင်သန်ရေးကူညီမှုအသင်းအပါအဝင် ရန်ကုန်ရှိ လူမှုကူညီရေးအဖွဲ့တွေကို ဆက်သွယ်အကူအညီ တောင်းခံနိုင်မှာဖြစ်တယ်။ ရှင်သန်ရေးကူညီမှုအသင်း ဥက္ကဌ ဦးထွန်းထွန်းဦး
Yangon Times/tthl
#Local_News
#Published_ 19 March 2024
#YMG_News #Yangon_Times #Yangon_Media_Group

Published_ 19 March 2024

ယခုရက်ပိုင်းတွင် ဒေသ(၁၅)ခု၌မိုးထစ်ချုန်းရွာ သွန်းမည်ဖြစ်ပြီး နေ့အပူချိန်(၄၀) ဒီဂရီစင်တီဂရိတ်ကျော်သော မြို့(၁၅)မြို့ရှိလာကြောင်း မိုးလေဝ သနှင့်ဇလဗေဒညွှန်ကြားမှုဦးစီးဌာနမှ သိရသည်။

မတ်လ(၂၀)ရက်မနက်ပိုင်းအထိခန့်မှန်းချက်မှာစစ်ကိုင်းတိုင်းဒေသကြီးအထက်ပိုင်း၊ တနင်္သာရီ တိုင်းဒေသကြီး၊ ကချင်ပြည်နယ်၊ ရှမ်းပြည်နယ် (တောင်ပိုင်းနှင့် အရှေ့ပိုင်း)၊ ချင်းပြည်နယ်၊ ကယားပြည်နယ်၊ ကရင်ပြည်နယ်နှင့် မွန်ပြည်နယ်တို့တွင် နေရာကွက်ကျား မိုးအနည်းငယ် ထစ်ချုန်းရွာနိုင်သည်ဟုဆိုသည်။

မတ်လ(၂၀)ရက်(၂၁)ရက်အတွင်း တနင်္သာရီတိုင်းဒေသကြီး၊ ကချင်ပြည်နယ်နှင့် ရှမ်းပြည်နယ်တို့တွင် နေရာစိပ်စိပ်နှင့် နေပြည်တော်၊ စစ်ကိုင်း တိုင်းဒေသကြီး၊ မန္တလေးတိုင်းဒေသကြီး၊ မကွေးတိုင်းဒေသကြီး၊ ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ ချင်း ပြည်နယ်၊ ရခိုင်ပြည်နယ်၊ ကယားပြည်နယ်၊ ကရင်ပြည်နယ်နှင့် မွန်ပြည်နယ်တို့တွင် နေရာကွက်ကျားမှ နေရာကျဲကျဲ မိုးထစ်ချုန်းရွာနိုင်ကြောင်းဖော်ပြထားသည်။

ထူးခြားသည့် နေ့အပူချိန်များမှာ ချောက်မြို့တွင် (၄၁)ဒီဂရီဆဲလ်စီးယပ်နှင့် ရွှေဘိုမြို့၊ မြင်းမူမြို့၊ မြင်းခြံမြို့၊ မကွေးမြို့၊ အောင်လံမြို့၊ တောင်တွင်းကြီးမြို့၊ အမ်းမြို့၊ ပြည်မြို့၊ တောင်ငူမြို့၊ ရွှေကျင်မြို့၊ သာယာဝတီမြို့၊ ဖြူးမြို့၊ လေးထပ်ပြင်မြို့နှင့် မြဝတီမြို့တို့တွင် (၄၀)ဒီဂရီ ဆဲလ်စီးယပ်စီရှိခဲ့ကြောင်း သိရသည်။
Yangon Times/tthl
#Local_News
#Published_ 19 March 2024
#YMG_News #Yangon_Times #Yangon_Media_Group

Published_ 19 March 2024

ရန်ကုန်တိုင်းဒေသကြီးအတွင်းရှိကိုယ်ပိုင်ကျောင်း (သို့မဟုတ်) ပုဂ္ဂလိကကျောင်းများ မှတ်ပုံတင်ခြင်းဆိုင်ရာ စိစစ်ခြင်းလုပ်ငန်းများကို လိုက်လံဆောင်ရွက်ပေးလျက်ရှိကြောင်း ရန်ကုန်တိုင်းဒေသကြီး၊ကိုယ်ပိုင်ကျောင်း (သို့မဟုတ်) ပုဂ္ဂလိကကျောင်းများ ကြီးကြပ်ရေးအဖွဲ့မှ  သိရသည်။

အဆိုပါ ကိုယ်ပိုင်(သို့မဟုတ်)ပုဂ္ဂလိကအဆင့်မြင့်ပညာကျောင်း၊ ကိုယ်ပိုင်(သို့မဟုတ်) ပုဂ္ဂလိကနည်းပညာနှင့် သက်မွေးဆိုင်ရာပညာရေးနှင့် လေ့ကျင့်ရေးကျောင်း၊ နိုင်ငံတကာသင်ရိုး ညွှန်းတမ်းနှင့် သင်ကြားသောကိုယ်ပိုင် (သို့မဟုတ်) ပုဂ္ဂလိကကျောင်းများ၊ နိုင်ငံခြားသား ပုဂ္ဂလိကျောင်းဆရာပါဝင်သော ကိုယ်ပိုင် (သို့မဟုတ်) ပုဂ္ဂလိကကျောင်းများ မှတ်ပုံတင်ခြင်းဆိုင်ရာ စိစစ်ခြင်းလုပ်ငန်းများကို လိုက်လံဆောင်ရွက်လျက် ရှိခြင်း ဖြစ်သည်။

၂၀၂၃ - ၂၀၂၄ ပညာသင်နှစ်တွင်ရန်ကုန်တိုင်းဒေသကြီးအတွင်း၌ ပုဂ္ဂလိက အဆင့်မြင့် ပညာကျောင်း (တက္ကသိုလ်၊ ကောလိပ်၊ စင်တာ) နိုင်ငံတကာသင်ရိုးညွှန်းတမ်းနှင့် သင်ကြားသည့်  ပုဂ္ဂလိကကျောင်း ၈၄၂ ကျောင်းရှိရာ ဥပဒေနှင့်အညီ မှတ်ပုံတင်ခြင်းဆိုင်ရာ စစ်ဆေးခြင်းလုပ်ငန်းများ ဆက်လက်လုပ်ဆောင်သွားမည်  ဖြစ်ကြောင်း သိရသည်။
Yangon Times/NN
#Local_News
#Published_ 19 March 2024
#YMG_News #Yangon_Times #Yangon_Media_Group