၅ ဧပြီ ၂၀၂၄

အနောက်နိုင်ငံများသည်  အခြအနေကို မတည်ငြိမ်စေဖို့နှင့် ကိုလိုနီလက်သစ်ရည်မှန်းချက်များ သွတ်သွင်းဖို့ အတွက် မြန်မာနိုင်ငံတွင် အစွန်းရောက်အုပ်စုများကို ထောက်ခံအားပေးလုပ်နေတယ်လို့ ကုလသမဂ္ဂဆိုင်ရာ ရုရှားသံအမတ်ကြီး ဗာဆီလီ နီဘင်ညာက ကုလသမဂ္ဂ လုံခြုံရေးကောင်စီမှာဧပြီ ၄ရက်က ပြောကြားလိုက်ပါတယ်။

ရုရှားအစိုးရအနေနှင့် ရခိုင်ပြည်နယ်က အစွန်းရောက်တွေ အထူးသဖြင့် Arakan Army လို့ဆိုတဲ့  အဖွဲ့ရဲ့ လှုပ်ရှားမှုတွေ အပေါ် စိုးရိမ်ပူပန်မှုတွေရှိတယ်လို့ သံအမတ်ကြီးကပြောပါတယ်။

“ အဲဒီ တပ်တွေ (ယေဘုယျအားဖြင့် ဆန့်ကျင်ဖက်လက်နက်ကိုင်တွေ) ကို အနောက်နိုင်ငံတွေက ထောက်ခံအားပေးနေပြီး သူတို့ရဲ့ ကိုလိုနီလက်သစ်ရည်မှန်းချက်တွေရရှိဖို့ အသုံးချနေတယ်ဆိုတဲ့ အထောက်အထားအများကြီးရှိနေပါတယ်။ တစ်ပြိုင် နက်တည်းလိုပါပဲ အမေရိကန်၊ဗြိတိန်နှင့် သူတို့ရဲ့ မဟာမိတ်တွေဟာ ဒုက္ခသည်တွေပြန်လက်ခံပေးဖို့ မြန်မာခေါင်းဆောင်တွေ   ကို ဖိအားတိုးမြှင့်ပေးဖို့ လူသိရှင်ကြားတောင်းဆိုနေကြတယ်။ အဲဒီလိုလုပ်ခြင်းဖြင့် သူတို့ဟာ ရခိုင်ပြည်နယ်ရဲ့ အခြေအနေ တွေကို ပိုမိုမတည်ငြိမ်အောင်မီးထိုးပေးနေပြီး IDP စခန်းတွေရဲ့အခြေအနေတွေကိုလည်း ပိုမိုဆိုးရွားအောင်လုပ်နေကြတယ်” လို့ သူကဆက်ပြောပါတယ်။

အနောက်နိုင်ငံတွေဟာ ဒေသအတွင်းမှာ သူတို့ရဲ့ကိုယ်ပိုင် ပထဝီနိုင်ငံရေး အကျိုးစီးပွားကိုပဲမြှင့်တင်ဖို့ပဲ စိတ်ဝင်စားကြတယ်” လို့ ရုရှားသံအမတ်ကြီးကပြောပါတယ်။ မြန်မာအာဏာပိုင်တွေဟာ သူတို့လိုအပ်ချက်တွေ ဖြည့်ဆည်းလို့မရနိုင်အောင် လုပ်နေကြတယ်လို့လည်းသူကပြောပါတယ်။

မြန်မာနိုင်ငံရဲ့ ပြည်တွင်းပြဿနာဖြေရှင်းရေးအတွက် လမ်းစကရှင်းပါတယ်”လို့သူကဆိုပါတယ်။

“ ၂၀၂၁ဖေဖော်ဝါရီကတည်းကရှိခဲ့တဲ့ အရေးပေါ်အခြေအနေအောက်မှာ အခြေအနေတွေကို ပုံမှန်ဖြစ်ဖို့ မျှော်မှန်းပြီး အနောက်အုပ်စုရဲ့လှုံ့ဆော်သွေးထိုးမှုကြောင့် လက်နက်ကိုင်အုပ်စုတွေက ငြင်းပယ်နေကြတဲ့ အမျိုးသားပြန်လည် ပေါင်းစည်းရေးကိုဆက်သွားတာနှင့် လူနည်းစုတွေအခြေစိုက်တဲ့ ရခိုင်ပြည်နယ်နှင့် အခြားဒေသတွေကနယ်မြေတွေမှာ လူမှုစီးပွား ဖွံ့ဖြိုးတိုးတက်ရေးစီမံကိန်းတွေ အကောင်အဖည်ဖော်ဖို့ဖြစ်တယ်” လို့ သံအမတ်ကြီးကပြောပါတယ်။

ရုရှားနိုင်ငံဟာ မြန်မာနိုင်ငံရဲ့ ကိုယ်ပိုင်အချုပ်အခြာအာဏာ နယ်မြေတည်တံ့ခိုင်မြဲမှုနှင့် လွတ်လပ်မှုတို့ကိုပထမဦးစားပေး ထားရှိတယ်လို့ သူကပြောပါတယ်။

“ အဲဒါကြောင့် ကျွန်တော်တို့ဟာ စိတ်ဝင်စားမှုရှိတဲ့အဖွဲ့အစည်းအားလုံးနှင့် အပြုသဘောဆောင်ဆွေးနွေးပြီး မြန်မာ  အစိုးရနှင့်အတူ  ထိရောက်တဲ့ ပူးပေါင်း ဆောင်ရွက်မှုတွေကနေ ရခိုင်ပြည်နယ်တစ်ဝန်းမှာ အခြေအနေတွေဖြေရှင်းဖို့ နိုင်ငံတကာအကူအညီတွေတိုးမြှင့်ရေး အကောင်းဆုံးနည်းလမ်းတွေကိုအကောင်အထည်ဖော်ဖို့ အာရုံစိုက်ထားပါတယ်” လို့ သူကပြောပါတယ်။

အနောက်နိုင်ငံတွေရဲ့ ပထဝီနိုင်ငံရေးအစီအစဉ်တွေအကြိုက် ဘက်လိုက်မှုမရှိကြတဲ့ မိတ်ဆွေတွေအားလုံး ကျွန်တော် တို့နှင့် အတူပူးပေါင်းလုပ်ဆောင်ကြဖို့ ဖိတ်ခေါ်တိုက်တွန်းပါတယ်လို့လည်း သံအမတ်ကြီးက ပြောပါတယ်။

Source TASS

Published_ 05 April 2024

ဒုတိယကမ္ဘာစစ်အတွင်းမြန်မာနိုင်ငံသို့စစ်ကူလာစဉ် ကျဆုံးခဲ့သည့် တရုတ်အဝေးရောက်မဟာမိတ်တပ်မှ အာဇာနည်များအတွက် ကန်တော့ပွဲအခမ်းအနားများကျင်းပပေးခဲ့ပြီးဦးညွှတ်ကန်တော့ခဲ့ကြောင်း  မြန်မာနိုင်ငံဆိုင်ရာတရုတ်သံရုံးမှသိရသည်။

ဧပြီလ ၄ ရက်နေ့၌ ကျရောက်သည့် တရုတ်သင်္ချိုင်းကန်တော့ပွဲအခါသမယတွင် ကန်တော့ပွဲအခမ်းအနားများကျင်းပပေးခဲ့ခြင်းဖြစ်သည်။

အဆိုပါနေ့တွင် ပဲခူးတိုင်း တောင်ငူမြို့သို့ ခရီးနှင်၍ မြန်မာနိုင်ငံဆိုင်ရာ တရုတ်သံအမတ်ကြီး Mr. Chen Hai သည်သံရုံးမှအရာရှိများကို ဦးဆောင်ကာ  မြန်မာနိုင်ငံ တရုတ်လုပ်ငန်းရှင်များအသင်း၊ မြန်မာနိုင်ငံရှိ တရုတ်အဝေးရောက်မဟာမိတ်တပ်၏ မျိုးဆက်များ၊ တရုတ်နွယ်ဖွားကိုယ်စားလှယ်များနှင့် မြန်မာနိုင်ငံအခြေစိုက်တရုတ်မီဒီယာများနှင့်အတူ မြန်မာနိုင်ငံသို့စစ်ကူလာစဉ် ကျဆုံးခဲ့သည့် တရုတ်အဝေးရောက်မဟာမိတ်တပ်မှ အာဇာနည်များကို ဦးညွတ်ကန်တော့ခဲ့ကြခြင်းဖြစ်သည်။

သံအမတ်ကြီး Mr. Chen Hai က အမှာစကားပြောကြားရာတွင်" လွန်ခဲ့သည့် ၈၂ နှစ်တုန်းက တရုတ်အဝေးရောက်မဟာမိတ်တပ်ပေါင်းသိန်းချီက မြန်မာနိုင်ငံသို့လာရောက် တိုက်ပွဲဝင်ခဲ့ရာ  သွေးသားနဲ့ အသက်များဖြင့် တရုတ်နိုင်ငံ၏ ဂျပန်ကျူးကျော်မှုခုခံရေး စစ်ပွဲသမိုင်းတွင် မော်ကွန်းတင်ထိုက်သောစာမျက်နှာကို ရေးသားခဲ့ပြီး အာရှတိုက် ပစိဖိတ်သမုဒ္ဒရာစစ်ပွဲနှင့် ကမ္ဘာ့ဖက်ဆစ်တော်လှန်ရေးစစ်ပွဲအောင်နိုင်ရေးအတွက် အရေးပါအကျိုးထမ်းဆောင်ခဲ့ကြောင်း၊ တရုတ်အဝေးရောက်မဟာမိတ်တပ်များ၏ တိုင်းပြည်ချစ်စိတ်သည် အမြဲထွန်းလင်းတောက်ပနေမည်ဖြစ်ပြီး တရုတ်-မြန်မာ ဆွေမျိုးပေါက်ဖော်ချစ်ကြည်ရေးသံယောဇဉ်သည်လည်း ခေတ်အဆက်ဆက် လက်ဆင့်ကမ်းသွားမည်ဖြစ်ကြောင်း၊ မိမိတို့သည် အာဇာနည်များ၏အမွေကိုဆက်ခံကာ တိုင်းပြည်ချစ်စိတ်ဓာတ် ပြန့်ပွားအောင်လုပ်ဆောင်ပြီး တရုတ်-မြန်မာအေးအတူပူအမျှ အသိုက်အဝန်းတည်ဆောက်ရေး၊ တရုတ်အမျိုးသားကြီးမြတ်သောပြန်လည်နိုးထရေး ‌ဖော်ဆောင်ရန်အတွက် ကြိုးပမ်းသွားရမည်ဖြစ်ကြောင်း" ပြောကြားခဲ့သည်။

တောင်ငူမြို့သည် ဒုတိယကမ္ဘာစစ်ကာလအတွင်း တရုတ်အဝေးရောက်မဟာမိတ်တပ်က ဖက်စစ်ဂျပန်ကို တိုက်ပွဲဝင်ခုခံတိုက်ခိုက်သည့် သမိုင်းဝင်တည်နေရာဖြစ်သည်ဟုဆိုသည်။

သံအမတ်ကြီး Mr. Chen Hai နှင့် နယ်ပယ်အသီးသီးမှကိုယ်စားလှယ်များက တရုတ်အဝေးရောက်မဟာမိတ်တပ် အမှတ်တရကျောက်တိုင်တွင် ပန်းခြင်း၊ ပန်းခွေများချပြီးနောက် အားလုံးအတူတကွ ငြိမ်သက်၍ ဦးညွတ်ကန်တော့ခဲ့ကြသည်။  

အာဇာနည်များအား ဦးညွတ်ကန်တော့သည့်အခမ်းအနားပြီးနောက် တက်ရောက်လာကြသူများက တရုတ်အဝေးရောက်မဟာမိတ်တပ်အထိမ်း အမှတ်ကျောက်တိုင်ကိုဂါရဝပြုပြီး တရုတ်အဝေးရောက်မဟာမိတ်တပ်များ ဂျပန်ကျူးကျော်မှုခုခံရေးပြတိုက်ကို လေ့လာကြည့်ရှုကာ တရုတ်အဝေးရောက်မဟာမိတ်တပ် အာဇာနည်များ၏ တရားမျှတမှုအတွက် အသက်ပေးဆပ်ကာ ဖက်ဆစ်ဂျပန်ကိုခုခံသော ထွန်းပြောင်သည့်သမိုင်းကို ပြန်ပြောင်းအောက်မေ့ခဲ့သည်ဟု‌ ဖော်ပြထားသည်။

ထိုနေ့တွင် မြန်မာနိုင်ငံဆိုင်ရာ တရုတ်သံရုံးနှင့် ကောင်စစ်ဝန်ရုံး၏ တောင်းဆိုချက်အရ မြန်မာနိုင်ငံရှိ တရုတ်လုပ်ငန်းအဖွဲ့အစည်းများနှင့် ဒေသခံတရုတ်နွယ်ဖွား အသင်းအဖွဲ့များက တရုတ်အဝေးရောက် မဟာမိတ်တပ်များ တိုက်ပွဲဝင်ခဲ့သော ရေနံချောင်းနှင့် မြစ်ကြီးနားမြို့နယ်တို့ရှိ တရုတ်အဝေးရောက်မဟာမိတ်တပ်၏ အောက်မေ့ဖွယ်အထိမ်းအမှတ် အဆောက်အအုံတွင် ပန်းခြင်း၊ ပန်းခွေများချပြီး ကန်တော့ခဲ့ကြကြောင်းသိရသည်။
Yangon_Times/tthl
#Local_News
#Published_ 05 April 2024
#YMG_News #Yangon_Times #Yangon_Media_Group

Published 05 April 2024

နေတိုး(NATO)အဖွဲ့ဝင်နိုင်ငံတွေဟာ ရုရှားပဲ့ထိန်းဒုံးကျည် တိုက်ခိုက်မှုတွေကနေ ယူကရိန်းကို ကာကွယ်ရန်အတွက် နောက်ထပ် လေကြောင်းကာကွယ်ရေးလက်နက်များ ထောက်ပံ့သွားရန် ကြာသပတေးနေ့က သဘောတူညီခဲ့ကြပါတယ်။

နေတိုးမဟာမိတ်အဖွဲ့ကြီးရဲ့ ၇၅ နှစ်ပြည့် အထိမ်းအမှတ်မှာတော့ စစ်ပွဲတွေနဲ့သာ လွှမ်းမိုးနေပါတယ်။

ယူကရိန်း နိုင်ငံခြားရေးဝန်ကြီး ဒီမစ်ထရိုကူလေဘာက နေတိုးမှ ဝန်ကြီးများနဲ့ တွေ့ဆုံခဲ့ပြီး နောက်ထပ် လေကြောင်းကာကွယ်ရေး လက်နက်သစ်များ ထောက်ပံ့ပေးရန် တောင်းဆိုခဲ့ပြီးနောက် မဟာမိတ်တွေက ယူကရိန်းတို့ အရေးတကြီး လိုအပ်နေတာကို သဘောပေါက်ကြောင်း နေတိုးအထွေထွေ အတွင်းရေးမှူးချုပ် ယန်းစ်စတိုလ်တန်ဘာ့ဂ်က ပြောပြပါတယ်။

အခုဆိုရင် မဟာမိတ်တွေက သူတို့ရဲ့လက်နက်တိုက်တွေထဲမှာ ရှိသမျှပစ္စည်းတွေနဲ့ ထောက်ပံ့သွားမှာ ဖြစ်တဲ့အပြင် ပေးပြီးသား လက်နက်တွေမှာလည်း လက်နက်ခဲယမ်းနဲ့ အပိုပစ္စည်း အလုံအလောက်ရှိဖို့လည်း သေချာလုပ်ပေးသွားမှာ ဖြစ်ကြောင်း ပြောပြသွားပါတယ်။

တရုတ်၊ မြောက်ကိုရီးယား၊ အီရန်တို့လို နိုင်ငံတွေက ရုရှားကို ထောက်ပံ့နေတာကြောင့် ယူကရိန်းကို ပိုပြီးထောက်ပံ့ပေးဖို့က အလွန်အရေးကြီးကြောင်း အမေရိကန် နိုင်ငံခြားရေးဝန်ကြီး အန်တိုနီဘလင်ကန်က ဆိုပါတယ်။

ယနေ့သိသမျှဆိုရင် အမေရိကန် အပါအဝင် အားလုံးဟာ နှစ်ဆထောက်ပံ့သွားမှာ ဖြစ်ပြီး ယူကရိန်းလိုအပ်သမျှကို ရှာဖွေသွားကြမယ်လို့ မျှော်လင့်ကြောင်း ဘလင်ကန်က ပြောပြသွားပါတယ်။

နေတိုးမွေးနေ့ပါတီကို ဖျက်လိုဖျက်ဆီး မလုပ်ချင်ပေမယ့် ရုရှားလေကြောင်းတိုက်ခိုက်မှုတွေကို ခံနေရတဲ့ ယူကရိန်းတွေကိုယ်စား ဝမ်းနည်းကြောင်း ကူလေဘာက သတင်းထောက်တွေကို ပြောပြလိုက်ပါတယ်။

ကြာသပတေးနေ့ ညပိုင်းကြီးမှာ ရုရှားဒရုန်းတိုက်ခိုက်မှု ပြုလုပ်ခဲ့ရာ ခါကိဗ်မြို့ရှိ လူနေအိမ်များနဲ့ စွမ်းအင်စက်ရုံတို့ကို ထိမှန်ခဲ့သဖြင့် လူအများအပြားသေဆုံးကာ လူပေါင်း ၃ သိန်းခွဲအတွက် လျှပ်စစ်ဓာတ်အား ပြတ်တောက်ခဲ့တယ်လို့ ယူကရိန်းအရာရှိများက ဆိုပါတယ်။

ရုရှားက တစ်လကို စစ်မှုထမ်း ၃ သောင်းခန့် ခေါ်ယူနေဟန်ရှိပြီး စစ်မြေပြင်မှာ ဆုံးရှုံးမှုများကိုဖြည့်တင်းကာ ဆက်လက်တိုက်ခိုက်နေပေမယ့် အဓိကတိုက်ခိုက်ရေးအတွက် လိုအပ်တဲ့ ကျွမ်းကျင်သူများနဲ့ လက်နက်ခဲယမ်းများကတော့ ပြတ်လပ်နေဆဲဖြစ်တယ်လို့ နေတိုးအရာရှိတစ်ဦးက ပြောပြပါတယ်။

ယူကရိန်းကို စစ်ရေးထောက်ပံ့ရာမှာ ပူးပေါင်းဖို့ အစီအစဥ်များကို နေတိုးဝန်ကြီးများက သဘောတူခဲ့ကြပေမယ့် စတိုလ်တန်ဘာ့ဂ်မှ အဆိုပြုတဲ့ ၁၀၀ ဘီလီယံယူရို ငါးနှစ်စာထောက်ပံ့ငွေကို နေတိုးအဖွဲ့ဝင်များ လက်ခံမှာလားဆိုတာတော့ ရှင်းရှင်းလင်းလင်း မသိရသေးပါဘူး။

လာမယ့် နိုဝင်ဘာလ အမေရိကန်သမ္မတ ရွေးကောက်ပွဲမှာ ဒေါ်နယ်ထရမ့်သာ ဂျိုးဘိုင်ဒင်ကို အနိုင်ရသွားပါက နေတိုးမဟာမိတ်ရဲ့ အနာဂတ်ကို ဥရောပခေါင်းဆောင်များက စိုးရိမ်နေကြသလို အမေရိကန်လွှတ်တော်မှာ ကြန့်ကြာနေတဲ့ ဘီလီယံတန် ယူကရိန်းထောက်ပံ့ရေးအတွက်လည်း ပူပန်နေကြပါတယ်။
Source: Reuters
#World_News
#Published_ 05 April 2024
#YMG_News #Yangon_Times #Yangon_Media_Group

Published 05 April 2024

တစ်နေ့တာအတွက် အရေးကြီးတဲ့ ညစာကို ညအိပ်ချိန်နဲ့ခွာပြီး စောစောစားခြင်းဖြင့် ကျန်းမာရေးအကျိုးကျေးဇူးများစွာ ရရှိနိုင်ကာ အစာမကြေခြင်းများကို ကာကွယ်နိုင်ပါတယ်။

အစာခြေခြင်းနဲ့ ပတ်သက်ပြီး ပြဿနာတွေရှိနေတယ်ဆိုရင် ညစာစောစော စားသင့်တဲ့အကြောင်းအရင်းများကို အာဟာရပညာရှင် လော့ဗ်နိဘာထရာက ဖော်ပြထားပါတယ်။
 
(၁) ပိုမိုကောင်းမွန်စွာ အစာခြေနိုင်ခြင်း
ညစာကို နောက်ကျမှစားခြင်းဖြင့် လေပွခြင်း၊ လေထခြင်းတို့ ဖြစ်တတ်ကာ စောစီးစွာ စားသုံးပါက အစာခြေခြင်းကို ကောင်းမွန်စေပြီး အစာမကြေပြဿနာများ ဖြစ်နိုင်ခြေ သက်သာစေပါတယ်။
 
(၂) အူလမ်းကြောင်းကျန်းမာရေး ကောင်းမွန်စေခြင်း
ညစာစောစောစားခြင်းဖြင့် အူလမ်းကြောင်းရှိ အကျိုးပြုဘက်တီးရီးယားများ ဖွံ့ဖြိုးမှုကို ကောင်းမွန်စေကာ အစာခြေခြင်းကို ထောက်ပံ့ပေးပါတယ်။
 
(၃) အာဟာရစုပ်ယူမှု ကောင်းမွန်စေခြင်း
ညစာအချိန်မှန်စားခြင်းဖြင့် အစာကြေစေကာ အစားအစာများမှ အာဟာရဓာတ်များ စုပ်ယူမှုကို အားကောင်းစေပြီး ခန္ဓာကိုယ်မှ အသုံးချနိုင်စေပါတယ်။
 
(၄) ပုံမှန်ဝမ်းသွားစေခြင်း
ညစာစောစီးစွာစားပါက အစာတွေက အစာခြေစနစ်အတိုင်း ရွေ့လျားပြီး ဝမ်းသွားခြင်းဖြစ်စဥ်ကို ထိန်းညှိပေးပါတယ်။
 
(၅) အစာအိမ်အက်ဆစ်လျှံတက်ခြင်းမှ ကာကွယ်ပေးခြင်း
ညစာစားချိန် မမှန်ခြင်းကြောင့် အက်ဆစ်လျှံတက်တာမျိုးက ဖြစ်လေ့ရှိပြီး ညစာစောစောစားခြင်းဖြင့် ဒီပြဿနာဖြစ်နိုင်ခြေကို လျှော့ချပေးနိုင်ပါတယ်။
Source: DoctorNDTV.
#World_Health
#Published_ 05 April 2024
#YMG_News #Yangon_Times #Yangon_Media_Group

Published_ 5 April 2024

မြန်မာနိုင်ငံအနေဖြင့် ကုလသမဂ္ဂ ဝန်ထမ်းများ၏ ဘေးကင်းလုံခြုံမှုကို အလေးပေး ဆောင်ရွက်ပေးလျက်ရှိတယ်လို့ ဒုတိယဝန်ကြီးချုပ်နှင့် နိုင်ငံခြားရေးဝန်ကြီး ဦးသန်းဆွေ က ပြောကြားခဲ့ပါတယ်။

ကုလသမဂ္ဂ ဘေးအန္တရာယ်ကင်းရှင်းရေးနှင့် လုံခြုံရေးဌာန (UN Department of Safety and Security- UNDSS) ၏ အကြီးအကဲ Under-Secretary-General Mr. Gilles Michaud ကို ဧပြီ ၄ ရက်တွင် နေပြည်တော်၌ လက်ခံတွေ့ဆုံစဉ် ပြောကြားခဲ့တာ ဖြစ်ပါတယ်။

တွေ့ဆုံစဉ် Under-Secretary-General Mr. Gilles Michaud က ကုလသမဂ္ဂ ဝန်ထမ်းများ၏ ဘေးကင်းလုံခြုံရေးနှင့် မြန်မာနိုင်ငံ၌ကုလသမဂ္ဂအဖွဲ့ အစည်းများ၏ လုပ်ငန်းများဆောင်ရွက်ခွင့်တို့နှင့် ပတ်သက်၍ အဓိက ဆွေးနွေးခဲ့ပါတယ်။

ထို့ပြင် လုပ်ငန်းများဆောင်ရွက်ရန်အတွက် သွားလာခွင့်ကို အတတ်နိုင်ဆုံး ညှိနှိုင်း ဆောင်ရွက်ပေးလျက်ရှိပြီး နိုင်ငံဖြတ်ကျော်မှုခင်းများနှင့် ပတ်သက်၍လည်း နွေးခဲ့ပါတယ်။

အဆိုပါအစည်းအဝေးသို့ နိုင်ငံခြားရေးဝန်ကြီးဌာနမှ အဆင့်မြင့်အရာရှိကြီးများ၊ မြန်မာနိုင်ငံဆိုင်ရာ ကုလသမဂ္ဂယာယီဌာနေ ညှိနှိုင်းရေးမှူးနှင့် လူသားချင်း စာနာထောက်ထားမှုဆိုင်ရာ ယာယီညှိနှိုင်းရေးမှူး Mr. Marcoluigi Corsi နှင့် မြန်မာနိုင်ငံရှိ ကုလသမဂ္ဂ လုံခြုံရေးအကြံပေး Mr. Marco Smoliner တို့ တက်ရောက်ခဲ့ကြပါတယ်။
Ymg_mnn
#Local_News
#Published_ 05 April 2024
#YMG_News #Yangon_Times #Yangon_Media_Group

Published 05 April 2024

တစ်ပတ်ကို အယ်လ်ကိုဟောပါဝင်တဲ့ သောက်စရာ ၈ ခွက်ထက် ပိုမိုသောက်သုံးတဲ့ အမျိုးသမီးတွေဟာ နှလုံးရောဂါဖြစ်နိုင်ခြေ ပိုမိုများပြားတယ်လို့ လေ့လာတွေ့ရှိထားပါတယ်။

ကယ်လီဖိုးနီးယားမြောက်ပိုင်းမှ ကျန်းမာရေးအဖွဲ့ အစည်းတစ်ခုက အသက် ၁၈ နှစ်မှ ၆၅ နှစ်ကြား လူတွေကို လေ့လာခဲ့ပါတယ်။

ယနေ့ခေတ်မှာ အယ်လ်ကိုဟော သောက်သုံးခြင်းက နှလုံးကျန်းမာရေးအတွက် ကောင်းမွန်တယ်လို့ ယူဆလာကြပေမယ့် အထောက်အထားတွေအရ ဒီလိုယူဆဖို့ ခက်နေကြောင်း နှလုံးအထူးကု ဒေါက်တာ ဂျာမယ်လ်ရာနာက ပြောပြပါတယ်။

တစ်ပတ်အတွင်းမှာ အမျိုးသားများအနေနဲ့ ၃ ခွက်မှ ၁၄ ခွက်သောက်သုံးခြင်းက သာမန်ပမာဏလို့ ယူဆပြီး အမျိုးသမီးတွေမှာတော့ ၃ ခွက်မှ ၇ ခွက်အထိက သာမန်လို့ ယူဆနိုင်ပါတယ်။

၄ နှစ်ကြာ စောင့်ကြည့်လေ့လာပြီးနောက် လူ ၃၁၀၀ ကျော်မှာ နှလုံးသွေးကြောရောဂါ တွေ့ရှိခဲ့ပြီး အယ်လ်ကိုဟော သောက်သုံးမှုပိုများလေ ရောဂါဖြစ်နိုင်ခြေ ပိုများလေ ဖြစ်ပါတယ်။

သက်ငယ်ပိုင်းနဲ့ သက်လတ်ပိုင်း အမျိုးသမီးတွေမှာ အယ်လ်ကိုဟော သောက်သုံးလာကြပြီး အသက်မအိုသေးသရွေ့ နှလုံးရောဂါ မဖြစ်နိုင်ဘူးလို့ ယူဆနေကြတာ ဖြစ်နေနိုင်တယ်လို့ ရာနာကဆိုပါတယ်။

အမျိုးသမီးတွေဟာ တစ်နေ့ကို တစ်ခွက်ထက် ပိုမိုသောက်သုံးခြင်းဖြင့် နှလုံးသွေးကြောရောဂါ ဖြစ်နိုင်ခြေများတယ်လို့ လေ့လာတွေ့ရှိခဲ့ပါတယ်။

အမျိုးသမီးတွေရဲ့ ခန္ဓာကိုယ်က အယ်လ်ကိုဟောကို ချေဖျက်တဲ့အခါ အမျိုးသားတွေ ခန္ဓာကိုယ်နဲ့ ကွဲပြားပါတယ်။

ဒါပေမဲ့ ဒီလေ့လာချက်တွေဟာ လူနာတွေက သူတို့ဘာသာ အကဲဖြတ်ပြောပြတာသာ ဖြစ်ပြီး သူတို့အမှန်တကယ် သောက်သုံးတာထက် နည်းပါးစွာ တင်ပြတာလည်း ဖြစ်နိုင်ပါတယ်။
Source: New York Post
#World_Health
#Published_ 04 April 2024
#YMG_News #Yangon_Times #Yangon_Media_Group

၄ ဧပြီ ၂၀၂၄

နေပြည်တော်ကောင်စီနယ်မြေအေလာမြို့နယ်နှင့် ဇေယျာသီရိမြို့နယ်တို့ရှိ အရေးကြီးနေရာများဖောက်ခွဲဖျက်ဆီး   မည့် fixed Wing ဒရုန်းများအားလုံး ပစ်ချဟန့်တားနိုင်ခဲ့ပြီး လေကြောင်းရန်ကာကွယ်ရေးအဖွဲ့အနေဖြင့် ဟန့်တား  နိုင်မှုစွမ်းရည် အပြည့်အဝရှိတယ်လို့ နစက သတင်းထုတ်ပြန် ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ပြောပါတယ်။

fixed Wing ဒရုန်း ၁၃ စီးသိမ်းဆည်းရမိပြီး အချို့ ဒရုန်းများတွင် ဖောက်ခွဲပစ္စည်းများတပ်ဆင်ထားတယ်လို့လည်း ဗိုလ်ချုပ်ဇော်မင်းထွန်းကဆက်ပြောပါတယ်။

ဗိုလ်ချုပ်ဇော်မင်းထွန်းရဲ့ ပြောကြားချက်အပြည့်အစုံကို ဖော်ပြပေးပါတယ်။

-ymg/knl

ရွှေ့ပြောင်းလာတဲ့လူအုပ်ကြီးဟာ အမေရိကသို့ ဝင်ရောက်ရန် ကြိုးပမ်းနေပြီး အမေရိကန်နဲ့ မက္ကဆီကိုနယ်စပ်သို့ ဝင်လာကြပါတယ်။
စာရင်းမရှိတဲ့ ရွှေ့ပြောင်းလာသူလူအုပ်ကြီးဟာ ဂွာတီမာလာနိုင်ငံအနီး တာပါချူလာနယ်စပ်မြို့မှ ထွက်ခွာလာကာ အပူချိန် ၃၈ ဒီဂရီဆဲလ်စီးယပ်စ်ကို ကြံ့ကြံ့ခံပြီး ၁၀၀ ကီလိုမီတာ အကွာအဝေးရှိ မက္ကဆီကိုတောင်ပိုင်းသို့ ၄ ရက်ကြာအောင် ထွက်လာကြပါတယ်။
#World_News
#Published_ 04 April 2024
#YMG_News #Yangon_Times #Yangon_Media_Group

#Daily_News
Published_ 04 April 2024

၁။ ရွှေတိဂုံအနီးရှိ ကျူးကျော်ဈေးတန်းများကို စည်ပင်နှင့်ပေါင်းပြီး ရှင်းလင်းလိုက်ပြီဖြစ်

၂။ ကြက်သွန်နီဈေး မတတ်သော်လည်း သယ်ယူစရိတ်များ ယခင်ထက် ဈေးမြင့်တတ်လာဟုဆို

၃။ ဆန်ချော‌များ ဈေးကွက်အေး၍ တစ်အိတ်ကျပ်ငါးထောင်အထိ ကျဆင်းလာ၊ သက်ြန်ပြီး အရောင်းအဝယ်ပြန်ဖြစ်လာနိုင်

၄။ ရွှေ့ပြောင်းလူအုပ်ကြီး မက္ကဆီကိုနှင့် အမေရိကန်နယ်စပ်သို့ ဖြတ်သန်းဝင်ရောက်နေ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG_News #Yangon_Media_Group

၄ ဧပြီ ၂၀၂၄

တရုတ်နိုင်ငံ တောင်ပိုင်းတိုင်းတပ်ပေါင်းစုဟာ မြန်မာနိုင်ငံရဲ့ နယ်စပ်တလျောက်မှာ အင်္ဂါနေ့ကမြေပြင်နှင့်ဝေဟင် ကျည် အစစ်သုံး စစ်ရေးလေ့ကျင့်ခန်းတွေ ဆောင်ရွက်ခဲ့ကြပါတယ်။

စစ်ရေးလေ့ကျင့်မှုတွေကို အင်္ဂါနေ့ မနက် ၈နာရီမှာစတင်ခဲ့ကြပြီး ဗုဒ္ဓဟူးနေ့ ညနေ ၆နာရီအထိ ကြာမြင့်မယ်လို့ ရည်မှန်း ထားကြပါတယ်။ စစ်ရေးလေ့ကျင့်ရာမှာ တရုတ်နိုင်ငံ အနောက်တောင်ပိုင်း ယူနန်ပြည်နယ်၊ တယ်ဟုန်နှင့်ဂျင်းဖော   ကိုယ်ပိုင်အုပ်ချုပ်ခွင့်ရဒေသရဲ့  မြို့တွေဖြစ်တဲ့ ရှီမာ၊နွန်ကျန်း၊ လောင်ပါနှင့် ကျန်ဖန်းတို့ ပါဝင်ပါတယ်လို့ တောင်ပိုင်းတိုင်း တပ်ပေါင်းစုက သတင်းထုတ်ပြန်ပါတယ်။

Source CCTV+

Published_ 04 April 2024

မြန်မာ့ ဖူဆယ်လောကပိုမိုအဆင့်အတန်း မြင့်မားစေရေးအတွက်ဖူဆယ်လေ့ကျင့်ရေးကွင်းသစ်တည်ဆောက်ရန်စီစဉ်‌နေသလို ဖူဆယ်လိဂ်ကော်မတီဖွဲ့စည်းရန်လည်းရှိကြောင်း မြန်မာနိုင်ငံဘောလုံးအဖွဲ့ချုပ်မှသိရသည်။

လက်ရှိ မြန်မာ့ဖူဆယ် လောကအတွက် Indoor Futsal Stadium တစ်ခုအား တည်ဆောက်ပြီးစီးခဲ့ပြီး ဖူဆယ်လိဂ်(၁)၊ လိဂ်(၂)၊ အပျော်တမ်း စသည့်ပြိုင်ပွဲများ ကျင်းပလျက်‌ကြောင်းနှင့်ဖူဆယ်လက်ရွေးစင်အသင်းများနှင့် ကလပ်အသင်းများအတွက် ဖူဆယ်လေ့ကျင့်ရေး အဆောက်အဦ တစ်ခုကိုလည်း မကြာမီ တည်ဆောက်သွားရန် စီစဉ်ဆောင်ရွက်လျက်ရှိသည်ဟုဆိုသည်။

ယင်းကဲ့သို့ ဆောင်ရွက်မည့် အကြောင်းကိုမြန်မာနိုင်ငံ ဘောလုံးအဖွဲ့ချုပ် ဥက္ကဋ္ဌ ဦးဇော်ဇော်၊ ဒုတိယဥက္ကဋ္ဌ ဦးထိပ်ခွန်နောင်မြင့်ဝေ၊ အဖွဲ့ချုပ် အမှုဆောင်များနှင့် ဖူဆယ်လိဂ် ကလပ်အသင်းများသည် ဧပြီလ ၃ ရက်၊ နံနက်ပိုင်းက နိုဗိုတယ် ရန်ကုန်မက်စ်တွင် တွေ့ဆုံ၍ မြန်မာ့ ဖူဆယ်လောက ပိုမိုအဆင့်အတန်း မြင့်မားစေရေး အတွက် တွေ့ဆုံဆွေးနွေးမှု၌ ထည့်သွင်းဆွေးနွေးခဲ့သည်။

အစည်းအဝေးတွင် ဖူဆယ် ကလပ်အသင်းများမှ ကိုယ်စားလှယ်များပါဝင်သည့် ဖူဆယ်လိဂ်ကော်မတီကို စနစ်တကျ ဖွဲ့စည်း၍ ဖူဆယ်ပြိုင်ပွဲများ စနစ်တကျ ပိုမိုကျင်းပသွားရန်နှင့် မြန်မာ့ဖူဆယ်လောက ပိုမိုအဆင့်အတန်း မြင့်မားစေရေး ကြိုးပမ်း ဆောင်ရွက်ရန်၊ ဖူဆယ်ကလပ်အသင်းများ ပါဝင်သည့် Standing Committee များ ဖွဲ့စည်း၍ ဘဏ္ဏာရေး၊ ပြိုင်ပွဲကျင်းပရေး၊ မီဒီယာနှင့် စျေးကွက်ရှာဖွေရေး စသည်တို့အား စနစ်တကျ လုပ်ဆောင်၍ ရုပ်သံထုတ်လွှင်မှုနှင့် ပရိသတ်စိတ်ဝင်စားမှု မြင့်မားစေရန်၊ ဖူဆယ် ကလပ်အသင်းများ ပိုမိုအင်အားကောင်း စေရန်နှင့် မြန်မာ့လက်ရွေးစင် ဖူဆယ်အသင်း အောင်မြင်မှုရရှိစေရန်၊ ဖူဆယ် မျိုးဆက်သစ်ကစားသမားများ ပေါ်ထွက်လာစေရန် ဝိုင်းဝန်းဆွေးနွေးခဲ့ကြသည်။ 

မြန်မာ့လက်ရွေးစင် အမျိုးသား ဖူဆယ်အသင်း အနေဖြင့် ထိုင်းနိုင်ငံ ဘန်ကောက်မြို့တွင် ဧပြီလ ၁၇ မှ ၂၈ အထိ ကျင်းပမည့် အာရှဖလား ဖူဆယ်ပြိုင်ပွဲကို သွားရောက်ယှဉ်ပြိုင်ရမည်ဖြစ်ကြောင်း သိရသည်။
Yangon_Times/tthl
#Local_News
#Published_ 04 April 2024
#YMG_News #Yangon_Times #Yangon_Media_Group

Published_ 04 April 2024

EV တပ်ဆင်ထုတ်လုပ်မည့် လုပ်ငန်းတစ်ခုအား မြန်မာနိုင်ငံရင်းနှီးမြှုပ်နှံမှု ကော်မရှင် (MIC) မှ ရင်းနှီးမြှုပ်နှံခွင့်ပြုပေးခဲ့ကြောင်း သိရသည်။

MIC သည် နိုင်ငံအတွင်း၌ လျှပ်စစ်သုံးယာဉ် တပ်ဆင်ထုတ်လုပ်မည့်  လုပ်ငန်းတစ်ခုကို ရင်းနှီးမြှုပ်နှံခွင့်ပြုကြောင်း ၄/၂၀၂၄ အစည်းအဝေး၌ ဆုံးဖြတ်လိုက်ခြင်းဖြစ်သည်။

ထိုသို့ခွင့်ပြုခဲ့ရာတွင် အမေရိကန်ဒေါ်လာ ၃၃.၉၁၁ သန်းနှင့် ကျပ်သန်းပေါင်း ၈၄၀,၀၀၀ ကျော် ပမာဏရှိသည့် ရင်းနှီးမြှုပ်နှံမှုလုပ်ငန်းသစ် ၆ ခု တွင်EV တပ်ဆင် ထုတ်လုပ်ငန်းလည်း တစ်ခုအပါအဝင် ဖြစ်ကြောင်းသိရသည်။

အဆိုပါEV တပ်ဆင် ထုတ်လုပ်သည့် ကုမ္ပဏီအနေဖြင့် ကျပ်ဘီလီယံ ၃၀ ခန့် ရင်းနှီးမြှုပ်နှံသွားမည်ဖြစ်ပြီး လုပ်ငန်းအမည်ကို မကြာခင် ထုတ်ပြန်သွားရန် ရှိနေကြောင်း၊ ခွင့်ပြုချက်ရရှိထားသည့်  EV စက်ရုံသည် ပြည်တွင်း၌  SKD စနစ်နှင့်  EV ၊ E Bike များအား  ထုတ်လုပ်ရောင်းချရန်  ရှိနေကြောင်းလည်းသိရသည်။
Yangon_Times/NN
#Local_News
#Published_ 04 April 2024
#YMG_News #Yangon_Times #Yangon_Media_Group