#World_Health
Published 12 April 2024

ဗြိတိန်ဆရာဝန်တစ်ဦးက ကျားအင်္ဂါအလွှာပါးလေးကို အဏုကြည့်မှန်ဖြင့် ကြည့်ရှုပုံကို တစ်တော့ပေါ်မှာ တင်ခဲ့ပါတယ်။

အကျယ်ချဲ့ကြည့်ရာမှာ ပန်းရောင်သမ်းနေတဲ့ပုံကို ဒေါက်တာ ကာရန်ရာဂျ်က ဗီဒီယိုတင်ခဲ့ပါတယ်။

ထိုပစ္စည်းဟာ ဆလင်ဒါ ၃ ခုဖြင့်ဖွဲ့စည်းထားပြီး ပထမ ၁ ခုနဲ့ ၂ ခုက ကော်ပိုရာကာဗာနိုဆာတို့ ဖြစ်တယ်လို့ ဆိုပါတယ်။

ကော်ပိုရာကာဗာနိုဆာက အကြီးဆုံးဆလင်ဒါ ၂ ခုဖြစ်ပြီး အင်္ဂါအလျားလိုက်အတိုင်း ရှိနေကာ ထောင်မတ်စဥ်မှာ သွေးတွေပြည့်လာတဲ့ နေရာဖြစ်ပါတယ်။

ပုံကိုထပ်မံအကျယ်ချဲ့ရာမှာ ကော်ပိုရာကာဗာနိုဆာထဲမှာ အကိုင်းခက်များကဲ့သို့ သွေးကြောမျှင်လေးများက သွေးတွေကို သယ်ပို့ပေးပါတယ်။

သွေးကြောများနဲ့ အင်္ဂါအဖောင်းအပွများကြား နေရာလွတ် သေးသေးလေးတွေက ကျယ်လာတဲ့နေရာ ဖြစ်ပါတယ်။

တတိယမြောက် ဆလင်ဒါကတော့ ဆီးလမ်းကြောင်းရှိနေတဲ့ ကော်ပတ်စ်စပွန်ဂျီယိုစမ် ဖြစ်ပါတယ်။

ထိုဆလင်ဒါက ထောင်မတ်စဥ် သွေးများပြည့်လာပြီး ဆီးလမ်းကြောင်းကို ဖိလိုက်တာ ဖြစ်ပါတယ်။

ဒါကြောင့် လိင်အင်္ဂါထောင်မတ်စဥ် ဆီးသွားဖို့ ခက်ခဲတာဖြစ်ပါတယ်။

တစ်တော့ကြည့်သူတွေကတော့ ကျားအင်္ဂါအသားလွှာကို ဘယ်ကရလဲလို့ မေးနေကြပါတယ်။

ဘယ်လိုပဲဖြစ်ဖြစ် ဒီလိုနည်းနဲ့ လူအများစိတ်ဝင်စားအောင် ပြုလုပ်နိုင်ခဲ့ပါတယ်။

#World_Health #ကျားအင်္ဂါအလွှာပါးလေး #Source: New York Post #အဏုကြည့်မှန်ဖြင့်မြင်ရပုံ

အက်ရှင်သရုပ်ဆောင်ပညာရပ်အတွက် ရည်ရွယ်သည့် ကိုယ်ခံပညာစခန်းသွင်းသင်တန်းအား ဂျက်ကီချန်းစတန့်အဖွဲ့မှ စီစဥ်ဖွင့်လှစ်သွားမည်

ဂျက်ကီချန်းစတန့်အဖွဲ့ဟာ ပေကျင်းမှာ ဧပြီ ၁၉ ရက်နေ့မှ မေလ ၂၁ ရက်နေ့အထိ ကိုယ်ခံပညာလေ့ကျင့်ရေးစခန်း ဖွင့်လှစ်ရန် စီစဥ်နေပြီး အခုလက်ရှိမှာ စာရင်းပေးသွင်းနိုင်ပြီ ဖြစ်ပါတယ်။
#Asia_Entertainment
Published 11 April 2024
#ကိုယ်ခံပညာစခန်းသွင်းသင်တန်း #ဂျက်ကီချန်းစတန့်အဖွဲ့
#YMG_News #Yangon_Times #Yangon_Media_Group

#Daily_News
Published_ 11 April 2024

၁။ နေတအားပြင်းပါက  ခန္ဓာကိုယ်တွင်းသွေးကြောများပြတ်ပြီး အသက်ဆုံးရှုံးနိုင်ဟုဆို

၂။ ငွေတောင်ကမ်းခြေသို့ ခရီးသွားလေးသောင်းခန့်လာရောက်အပန်းဖြေပြီး ရန်ကုန်တိုင်းမှအများဆုံးလာရောက်

၃။ တရုတ်သို့ တရားဝင်လုပ်သားစေလွတ်ရန် သဘောတူညီမှုရရှိပြီး လွှတ်မည့်အခြေနေ အသေးစိတ်ကိုသာဆက်လက်ဆွေးနွေးရမည်ဟုဆို

၄။ အက်ရှင်သရုပ်ဆောင်ပညာရပ်အတွက် ရည်ရွယ်သည့် ကိုယ်ခံပညာစခန်းသွင်းသင်တန်းအားအား ဂျက်ကီချန်းစတန့်အဖွဲ့မှစီစဥ်ဖွင့်လှစ်သွားမည် ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG_News #Yangon_Media_Group

ဧရာဝတီတိုင်းဒေသကြီး၊ ငွေတောင်ကမ်းခြေသို့တစ်လတာအတွင်း ခရီးသွားလေးသောင်းခန့်လာရောက်အပန်းဖြေပြီး ရန်ကုန်တိုင်းမှအများဆုံးလာရောက်တယ်လို့ ခရီးသွားလုပ်ငန်းလုပ်ကိုင်သူတွေဆီက သိရပါတယ်။
#Local_News
Published 11 April 2024
#ငွေတောင်ကမ်းခြေ #ခရီးသွားလုပ်ငန်းလုပ်ကိုင်သူ
#YMG/NN #Yangon_Times

တရုတ်နိုင်ငံကို တရားဝင်လုပ်သားစေလွှတ်နိုင်ရန်အတွက် နှစ်နိုင်ငံသဘောတူညီမှုရရှိထားပြီး စေလွှတ်ရေးကိစ္စများကိုသာ ဆက်လက်ညှိနှိုင်းမှုတွေ ပြုလုပ်ရတော့မှာဖြစ်တယ်လို့ မြန်မာပြည်ပအလုပ်အကိုင်ဝန်ဆောင်မှုလုပ်ငန်းရှင်များအသင်း(MOEAA)ထံက သိရပါတယ်။
#Local_News
Published 11 April 2024
#မြန်မာပြည်ပအလုပ်အကိုင်ဝန်ဆောင်မှု #(MOEAA)
#YMG/LW #Yangon_Times

အပူချိန်‌(၃၇)ဒီဂရီဆဲဆီးယပ်ကျော်ရင် လူ့ခန္ဓာကိုယ်က သွေးလည်ပတ်မှုမမှန်‌တော့ဘဲ ခန္ဓာကိုယ်တွင်းရှိသွေးကြော‌တွေပြတ်နိုင်တယ်။ နေအပြင်းဆုံး နေ့ခင်းနေ့လည်မှာ နေရောင်တိုက်ရိုက်ကြတဲ့နေရာတွေမှာသွားလာနေထိုင်မိရင် ဦးနှောက်သွေးကြောနဲ့ ခန္ဓာကိုယ်တွင်းရှိသွေးကြော တွေပြတ်ဖိုများတဲ့အတွက် နေအိမ်အခန်းတွင်းနဲ့အရိပ်ရနေရာ‌တွေမှာသာနေထိုင်ဖို့လိုတယ်။
(ပြည်သူ့ကျန်းမာရေး‌ဖောင်ဒေးရှင်းဥက္ကဌ ဒေါက်တာ သန်းစိန်)
#Local_News
Published 11 April 2024
#ခန္ဓာကိုယ်တွင်းသွေးကြောများပြတ် #အသက်ဆုံးရှုံးနိုင်
#tthl #Yangon_Times

#Local_News
Publised 11 April 2024

တရုတ်-မြန်မာပူးပေါင်းပြီး အွန်လိုင်းလောင်းကစားမှုများအပြင် အွန်လိုင်းလိမ်လည်မှုများကိုလည်းပူးတွဲ၍ ဆက်လက်တိုက်ဖျက်မည်ဖြစ်ကြောင်း မြန်မာနိုင်ငံဆိုင်ရာ တရုတ်သံရုံးမှ သိရသည်။

ယင်းကဲ့သို့ တိုက်ဖျက်မည့်အကြောင်းမြန်မာနိုင်ငံဆိုင်ရာတရုတ်သံအမတ်ကြီး Mr. Chen Hai နှင့် မြန်မာနိုင်ငံ ပြည်ထဲရေးဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီး ရာပြည့်နှင့် ဧပြီလ ၁၁ ရက်နေ့တွင် နေပြည်တော်၌ တွေ့ဆုံစဉ် ထည့်သွင်းဆွေးနွေးခဲ့ခြင်းဖြစ်သည်။

နှစ်ဦးနှစ်ဖက်က တရုတ်-မြန်မာနှစ်နိုင်ငံက အွန်လိုင်းလိမ်လည်မှုနှင့် အွန်လိုင်းလောင်းကစား ပူးတွဲတိုက်ဖျက်ရေးလှုပ်ရှားမှုတွင် အရေးပါတိုးတက်မှုများရရှိခြင်းကို အပြုသဘောဆောင်စွာ သုံးသပ်ခဲ့ပြီး အွန်လိုင်းလိမ်လည်မှု စသည့် တရားဥပဒေစိုးမိုးရေး လုံခြုံရေးဆိုင်ရာပူးပေါင်းဆောင်ရွက်မှုနှင့် သီးသန့်လှုပ်ရှားမှုကို ဆက်လက်နက်ရှိုင်းစွာဖော်ဆောင်သွား၍ နှစ်နိုင်ငံနှင့် နှစ်နိုင်ငံပြည်သူများအကျိုးစီးပွားကို ပိုမိုကောင်းမွန်စွာ ကာကွယ်စောင့်ရှောက်သွားမည်ဖြစ်ကြောင်း ပြောကြားခဲ့ကြောင်း သိရသည်။

#Local_News #တရုတ်-မြန်မာ #အွန်လိုင်းလောင်းကစားမှု #tthl #Yangon_Times

၁၁ ဧပြီ ၂၀၂၄

ဗီယက်နမ် အိမ်ခြံမြေလုပ်ငန်းရှင်သူဋ္ဌေးမကြီးတစ်ဦးကို ဗီယက်နမ်တရားရုံးတစ်ခုက ငွေကြေးလိမ်လည်မှုဖြင့် သေဒဏ်  အပြစ်  ပေးခဲ့ကြောင်း နိုင်ငံပိုင်မီဒီယာများက သတင်းထုတ်ပြန်ပါတယ်။

အိမ်ခြံမြေ လုပ်ငန်းရှင် ထရွန်မိုင်လန်ဟာ ဗီယက်နန် ဒွန်ငွေ ၃၀၄ထရီလီယံ( အမေရိကန် ဒေါ်လာ ၁၂.၄၆ ဘီလျံ)တန်ဖိုးရှိတဲ့ ဗီယက်နမ်ရဲ့ အကြီးမားဆုံးသော ငွေကြေးလိမ်လည်မှုကို ကျူးလွန်ခဲ့တဲ့အတွက် သူမကို သေဒဏ်အပြစ်ပေးခဲ့တာဖြစ်ပါတယ်။

လန်ဟာ ဗီယက်နမ်ရဲ့  အိမ်ခြံမြေလုပ်ငန်းကြီးဖြစ်တဲ့ ဗန်သင်ပက်ဟိုးလ်ဒင်း အုပ်စုကြီးရဲ့ ဥက္ကဋ္ဌဖြစ်ပါတယ်။ သူမဟာ ငွေကြေး  အလွဲသုံးစားပြုမှု၊လာဘ်ပေးလာဘ်ယူမှုနှင့် ဘဏ်စည်းမျဉ်းစည်းကမ်းတွေကိုချိုးဖောက်မှုတို့ဖြင့် အပြစ်ရှိကြောင်း ဟိုချီမင်းမြို့ မှာရှိတဲ့ တရားရုံးက တရားစီရင်ခဲ့တာပါ။

မတ်လ ၅ရက်နေ့က စတင်ခဲ့တဲ့ တရားရုံးစစ်ဆေးမှုဟာ သတ်မှတ်ထားတဲ့ အချိန်ကာလထက် စောပြီး စစ်ဆေးပြီးစီးခဲ့ပါတယ်။ သူမရဲ့အမှုနှင့်ဆက်စပ်ပြီး အစိုးရထိပ်ပိုင်းအရာရှိကြီးတွေနှင့် နာမည်ကြီး စီးပွားရေးလုပ်ငန်းအကြီးအကဲတွေလည်း တရားစွဲခံရ တာတွေ၊ ရာထူးပြုတ်သွားတာတွေဖြစ်ခဲ့ရပါတယ်။

လန်နှင့်သူမရဲ့ကြံရာပါတွေဟာ ဆိုင်းဂုံပူးတွဲစတော့ခ်ကော်မာရှယ်ဘဏ်( အက်စ်စီဘီ)ကနေ ၃၀၄ ထရီလီယံဒွန်ငွေတွေကို ထုတ် နုတ်ယူခဲ့ကြပါတယ်။အဲဒီဘဏ်ကို သူမဟာ သူမရဲ့ ကြားခံကိုယ်စားလှယ်လူတစ်ဒါဇင်ကျော်ကနေတစ်ဆင့် ထိန်းချုပ် ခဲ့တာဖြစ်ပါတယ်လို့ အမှုစစ်ဆေးသူတွေထံမှသိရပါတယ်။

၂၀၁၈ခုနှစ်စောစောပိုင်းကနေ့ ၂၀၂၂ အောက်တိုဘာအထိ လန်ဟာ ကုမ္ပဏီတွေကို အကာအကွယ်ပေးဖို့အတွက် ဥပဒေမဲ့ ချေးငွေများစွာကို စီစဉ်ပြီး အဲဒီဘဏ်ကနေ ငွေကြေး အကြီးအကျယ်ထုတ်ယူခဲ့ပါတယ်။ အဲဒါကြောင့် ဘဏ်မှာ အာမခံငွေတွေ ကုန်ဆုံးသွားတဲ့အတွက် နိုင်ငံတော်က ဝင်ပြီး အာမခံပေးဆောင်ခဲ့ရပါတယ်။

လန်က တရားရုံးဆုံးဖြတ်ချက်အပေါ် အယူခံတင်သွင်းမယ်လို့ မိသားစုဝင်တွေက ရိုက်တာသတင်းဌာနကိုပြောပါတယ်။

Source Reuters

#World_Health
Published 11 April 2024

အမျှင်ဓာတ်ကြွယ်ဝတဲ့ အစားအစာများ စားသုံးခြင်းဖြင့် အစာခြေစနစ် ကောင်းမွန်စေခြင်း၊ ကိုယ်အလေးချိန်ထိန်းခြင်း၊ နာတာရှည်ရောဂါများ ကာကွယ်ပေးနိုင်ကာ အူလမ်းကြောင်း ကျန်းမာရေးကို ကောင်းမွန်စေပါတယ်။

အမျှင်ဓာတ်ထောက်ပံ့ပေးမယ့် အစားအစာတွေကတော့ ..

(၁) ငှက်ပျောသီး

ငှက်ပျောသီးမှာ ပါဝင်တဲ့ အမျှင်ဓာတ်တွေက သွေးတွင်းသကြားဓာတ်ကို ထိန်းသိမ်းပေးပြီး အစာကြေစေပါတယ်။

(၂) အုတ်စပါး

အုတ်စပါးမှာပါဝင်တဲ့ ပျော်ဝင်အမျှင်ဓာတ်က  ကိုလက်စထရောလ် ကျစေပြီး ဗိုက်ပြည့်ဝနေစေပါတယ်။

(၃) ပဲအမျိုးမျိုး

ပဲကြီး၊ ပဲနီလေး၊ ကုလားပဲတို့က အမျှင်ဓာတ်ကြွယ်ဝပြီး ဗိုက်ပြည့်ဝနေစေကာ ကိုယ်အလေးချိန် ထိန်းသိမ်းနိုင်ပါတယ်။

(၄) ပန်းဂေါ်ဖီစိမ်း

ဝမ်းကိုပျော့စေကာ ပုံမှန်ဝမ်းသွားစေပြီး ကိုလက်စထရောလ် လျှော့ချပေးနိုင်ပါတယ်။

(၅) ဘယ်ရီသီးများ

စတော်ဘယ်ရီသီး၊ ရက်စ်ဘယ်ရီသီး၊ ဘလူးဘယ်ရီသီးတို့ဟာ အမျှင်ဓာတ်ကြွယ်ဝတဲ့အပြင် ဓာတ်တိုးဆန့်ကျင်ပစ္စည်းများ၊ ဗိုက်တာမင်၊ သတ္တုဓာတ်များလည်း ပါဝင်ပါတယ်။

(၆) ကွီနိုအာ

ဂလူတန်မပါတဲ့ စပါးမျိုးဖြစ်ပြီး အစာခြေခြင်းကို ကူညီပေးကာ ဗိုက်ပြည့်ဝနေစေပါတယ်။

(၇) ကန်စွန်းဥ

အမျှင်ဓာတ် ပေါများစွာပါဝင်ပြီး သွေးတွင်းသကြားဓာတ် ထိန်းသိမ်းပေးကာ အာဟာရဓာတ်များ ရရှိစေပါတယ်။

(၈) ချီယာစေ့

ပျော်ဝင်စေတဲ့ အမျှင်ဓာတ်များပါဝင်ကာ အစာခြေခြင်းကို ကူညီပေးပြီး ဗိုက်ပြည့်ဝနေစေပါတယ်။

(၉) ဂျုံစပါးမျိုးများ

ဆန်ညို၊ ဘာလီ၊ ဂျုံတို့ဟာ သွေးတွင်းသကြားဓာတ်ကို ထိန်းညှိပေးပြီး ဗိုက်ပြည့်တင်းစေပါတယ်။

(၁၀) အခွံမာသီးများနှင့်အစေ့များ

ဗာဒံစေ့၊ လျှော်စေ့၊ ဖရုံစေ့တို့ဟာ အမျှင်ဓာတ်ပေါများပြီး အာဟာရဓာတ်အမျိုးမျိုး ပါဝင်ပါတယ်။

#World_Health #အမျှင်ဓာတ်ကြွယ်ဝ #ပုံမှန်စားသုံးသင့်သည့်အစားအစာ #Source: DoctorNDTV

#World_News
Published 11 April 2024

ဗုဒ္ဓဟူးနေ့က ဂါဇာကမ်းမြောင်မှာ အစ္စရေးလ်တို့ လေကြောင်းတိုက်ခိုက်ရေး ပြုလုပ်ခဲ့ရာမှာ ဟားမတ်စ်ခေါင်းဆောင် အစ္စမေးလ်ဟာနီယက်ရဲ့ သား ၃ ဦးသေဆုံးသွားခဲ့ကြောင်း ပါလက်စ်တိုင်း အစ္စလာမ်အဖွဲ့နဲ့ ဟာနီယက်မိသားစုတို့က ပြောကြားလိုက်ပါတယ်။

အစ္စရေးလ်စစ်တပ်က တိုက်ခိုက်မှုပြုလုပ်ခဲ့ကြောင်း အတည်ပြုလိုက်ကာ ဟားမတ်စ်လက်နက်ကိုင်အဖွဲ့ထဲမှ ထို ၃ ဦးကို ပစ်မှတ်ထားခဲ့တာ ဖြစ်တယ်လို့ ဖော်ပြခဲ့ပါတယ်။

ဟာဇမ်၊ အေမီယာ၊ မိုဟာမက်တို့ ၃ ဦးဟာ ဂါဇာမှ အယ်လ်ရှာတီစခန်းမှာ ကားမောင်းနေစဥ် ဗုံးကျဲခံရကာ သေဆုံးခဲ့တာ ဖြစ်တယ်လို့ ဟားမတ်စ်တို့က ဆိုပါတယ်။

ဟာနီယက်ရဲ့ မြေးယောက်ျားလေး တစ်ဦးနဲ့ မြေးမိန်းကလေး ၃ ဦးတို့ဟာလည်း တိုက်ခိုက်မှုအတွင်း သေဆုံးခဲ့တယ်လို့ ဆိုပါတယ်။

သား ၃ ဦးနဲ့ မြေး ၄ ဦးတို့ဟာ မွတ်ဆလင်အစ်အယ်လ်ဖီတာ အားလပ်ရက် ပထမနေ့အတွင်း ရှာတီမှာ မိသားစုလည်ပတ်နေတာ ဖြစ်ပါတယ်။

၆ လကျော်ကြာမြင့်ပြီဖြစ်တဲ့ ဂါဇာစစ်ပွဲသက်တမ်းမှာ အစ္စရေးလ်ရဲ့ အပစ်အခတ်ရပ်စဲရေး အဆိုပြုချက်ကို ဟားမတ်စ်တို့ လေ့လာနေခဲ့တာဖြစ်ပြီး ပါလက်စ်တိုင်း လိုအပ်ချက်တွေနဲ့ တစ်ခုမှ မကိုက်ညီဘူးလို့ အင်္ဂါနေ့က ဆိုလိုက်ပါတယ်။

အစ္စရေးလ်တို့က ဂါဇာကို ဖျက်ဆီးထားပြီး ဟားမတ်စ်တို့က အစ္စရေးလ် စစ်ရေးလှုပ်ရှားမှုရပ်ဆိုင်းရေး၊ ကမ်းမြောင်မှ ဆုတ်ခွာရေး၊ စစ်ဘေးရှောင် ပါလက်စ်တိုင်းများ အိမ်ပြန်နိုင်ရေးတို့ကို အလိုရှိနေပါတယ်။

ဟာနီယက်ရဲ့ အကြီးဆုံးသားက သူ့ညီတွေ အသတ်ခံရတာကို အတည်ပြုလိုက်ပါတယ်။

အစ္စရေးလ်က ဟားမတ်စ်ခေါင်းဆောင်ပိုင်းတွေကို အကြမ်းဖက်သမားများအဖြစ် သတ်မှတ်လိုက်ကာ ဟာနီယက်နဲ့ အခြားခေါင်းဆောင်တွေက ဟားမတ်စ်အကြမ်းဖက် အဖွဲ့အစည်းကို ကြိုးကိုင်နေတယ်လို့ စွပ်စွဲလိုက်ပါတယ်။

#World_News #အစ္စရေးလ်လေကြောင်းတိုက်ခိုက်မှု #ဟားမတ်စ်ခေါင်းဆောင်၏သားသုံးဦးသေဆုံး #Source: Reuters

#Local_News
Published_ 11 April 2024

အမျိုးသားပို့ကုန်မဟာဗျူဟာ ဒုတိယအဆင့်ဖြစ်သော ၂၀၂၀-၂၀၂၅ ကာလအတွက် ကဏ္ဍ (၁၈) ခုကို ထိရောက်စွာ အကောင်အထည်ဖော်ဖို့ အမျိုးသား ပို့ကုန်မဟာဗျူဟာ အစိုးရ-ပုဂ္ဂလိက ပို့ကုန်မြှင့်တင်ရေးကော်မတီဥက္ကဋ္ဌ နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌရုံး ဝန်ကြီးဌာန-၂ ဝန်ကြီး ဦးအောင်နိုင်ဦးက ပြောကြားခဲ့ပါတယ်။

အမျိုးသားပို့ကုန် မဟာဗျူဟာ အစိုးရ-ပုဂ္ဂလိက ပို့ကုန်မြှင့်တင်ရေးကော်မတီ၏ (၂/၂၀၂၄)ကြိမ်မြောက် အစည်းအဝေးကို ဧပြီ (၁၀)ရက်တွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၌ ကျင်းပစဉ်ပြောကြားခဲ့တာ ဖြစ်ပါတယ်။

ကဏ္ဍအလိုက် ဖွဲ့စည်းထားတဲ့ ပို့ကုန်ဖွံ့ဖြိုးတိုးတက်ရေးကော်မတီများ ကျစ်လျစ်စွာ ပြန်လည်ဖွဲ့စည်းရေး၊ ကဏ္ဍအလိုက်လုပ်ငန်းစီမံချက်များအနက် လက်တွေ့လျင်မြန်စွာ အကျိုးဖြစ်ထွန်းနိုင်မည့် လုပ်ငန်းစဉ်များ ရွေးချယ်ဆောင်ရွက်နိုင်ရေးတို့ကို ဦးစွာဆောင်ရွက်ပြီး အကောင်အထည်ဖော်ဖို့ ဝန်ကြီးက ပြောဆိုပါတယ်။

ထို့ပြင် ဦးစားပေးရွေးချယ်ဆောင်ရွက်မည့် လုပ်ငန်းများက ပို့ကုန်တိုးမြှင့်တင်ပို့နိုင်ရေးကို အချိန်တိုအတွင်း အထောက်အကူပြုနိုင်မည့် လုပ်ငန်းများဖြစ်ဖို့လည်း လိုအပ်တယ်လို့ ဝန်ကြီးကဆိုပါတယ်။

ဆက်လက်၍ မြန်မာကုန်သွယ်မှု မြှင့်တင်ရေးအဖွဲ့ ညွှန်ကြားရေးမှူးချုပ်က အမျိုးသားပို့ကုန်မဟာဗျူဟာ ကဏ္ဍအလိုက် ကော်မတီများ ပြန်လည်ဖွဲ့စည်းမှုပိုင်းနှင့် လုပ်ငန်းစီမံချက်များ ပြင်ဆင်ရေးဆွဲမှုများကို ရှင်းလင်းတင်ပြခဲ့ပါတယ်။

ကဏ္ဍအလိုက် ကော်မတီဥက္ကဋ္ဌများက သက်ဆိုင်ရာကဏ္ဍများအလိုက် ကော်မတီများ ပြန်လည်ဖွဲ့စည်းထားရှိမှုနှင့် လုပ်ငန်းစီမံချက်များ ပြင်ဆင်ရေးဆွဲ ဆောင်ရွက်ထားမှုများ၊ ဦးစားပေးဆောင်ရွက်မည့် လုပ်ငန်းများ ရွေးချယ်ထားရှိမှုများကို ရှင်းလင်းတင်ပြကြရာ အမျိုးသားပို့ကုန်မဟာဗျူဟာ အစိုးရ-ပုဂ္ဂလိက ပို့ကုန်မြှင့်တင်ရေး ကော်မတီအဖွဲ့ဝင်များက ပြန်လည်သုံးသပ်ဆွေးနွေးခဲ့ကြောင်း သတင်းရရှိပါတယ်။

#Local_News #အမျိုးသားပို့ကုန်မဟာဗျူဟာ #ပို့ကုန်မြှင့်တင်ရေးကော်မတီ #Ymg_mnn #Yangon_Media_Group

#World_Health
Published 11 April 2024

ဆီးချိုရောဂါအတွက် အသုံးပြုတဲ့ဆေးတစ်မျိုးဟာ ပါကင်ဆန်ရောဂါ လက္ခဏာ ဆိုးရွားလာခြင်းကို နှောင့်နှေးစေနိုင်ကြောင်း သုတေသီများ တွေ့ရှိထားပါတယ်။

ပါကင်ဆန်ရောဂါ ဆိုတာဟာ ဦးနှောက်မှာ အာရုံကြောဆဲလ်များ တဖြည်းဖြည်း ဆုံးရှုံးလာပြီး ရွေ့လျားမှု၊ ဟန်ချက်ထိန်းခြင်း၊ မှတ်ဉာဏ်ပိုင်းတို့မှာ ပြဿနာရှိလာကာ ကမ္ဘာပေါ်မှာ လူပေါင်း ၁၀ သန်းကျော် ခံစားနေရပါတယ်။

ဆီးချိုရောဂါ ဒုတိယအမျိုးအစားအတွက် အသုံးပြုတဲ့ exenatide လိုမျိုးဆေးဟာ လူအချို့မှာ လှုပ်ရှားမှုဆိုင်ရာ လက္ခဏာများ ဆိုးရွားလာခြင်းကို နှောင့်နှေးစေတယ်လို့ မကြာသေးမီက တွေ့ရှိထားပါတယ်။

ဆီးချိုရောဂါအတွက် နောက်ထပ်ဆေးတစ်မျိုးဖြစ်တဲ့ lixisenatide ဟာလည်း အလားတူသက်ရောက်မှုရှိပြီး ပါကင်ဆန်ရောဂါဟာ ဦးနှောက်ထဲက အင်ဆူလင်မတိုးတာနဲ့ ဆက်စပ်နေတယ်လို့ ကောက်ချက်ချနိုင်ပါတယ်။

ပြင်သစ်သုတေသီများက ပါကင်ဆန်ရောဂါရှိသူ ၁၅၆ ဦးကို အဖွဲ့နှစ်ဖွဲ့အဖြစ် အညီအမျှ ပိုင်းခြားလိုက်ပါတယ်။

နှစ်ဖွဲ့စလုံးကို ပုံမှန်အတိုင်း ပါကင်ဆန်ရောဂါ ဆေးများပေးထားကာ တစ်ဖွဲ့ကို lixisenatide နေ့စဥ်ဆေးထိုးပေးကာ နောက်တစ်ဖွဲ့ကိုတော့ အာနိသင်မရှိတဲ့ဆေး ပေးခဲ့ပါတယ်။

၁၂ လကြာပြီးနောက် lixisenatide ထိုးတဲ့လူနာတွေမှာ လှုပ်ရှားမှုပြဿနာ ပိုမိုဆိုးရွားလာခြင်းမရှိဘဲ အာနိသင်မဲ့ဆေးပေးတဲ့ သူတွေမှာတော့ ရောဂါလက္ခဏာများ ဆိုးရွားလာပါတယ်။

Lixisenatide ထိုးတဲ့သူတွေက အာရုံကြောဆိုင်ရာ ဆုံးရှုံးခြင်းမှ ကာကွယ်နိုင်ပြီး လူနာ ၁၃ ရာခိုင်နှုန်းလောက်ကတော့ အော့အန်ခြင်းနဲ့ တဝက်လောက်က မူးဝေခြင်း ခံစားခဲ့ရပါတယ်။

ထိုဆေးက ပါကင်ဆန်ရောဂါ လက္ခဏာများ ဆိုးရွားလာခြင်းကို အမှန်တကယ် နှောင့်နှေးစေသလားဆိုတာကို ဆုံးဖြတ်ဖို့အတွက် နောက်ထပ်လေ့လာမှုများ ပြုလုပ်ရန် လိုအပ်ပါသေးတယ်။

#World_Health #ပါကင်ဆန်ရောဂါလက္ခဏာဆိုးရွားလာခြင်း #Source: WION