ကမ္ဘာမှာ မျိုးသုဉ်းလုနီးပါး အန္တရာယ်ရှိတဲ့ မျိုးစိတ်ဖြစ်တဲ့ စာဝါကျားငှက်ကို ဧရာဝတီတိုင်း၊ ဝါးခယ်မမြို့နယ်၊ ကျုံကပြင်ကျေးရွာမှာသုတေသနပြုလုပ်ရာ အကောင်ရေ ၄၀၀၀၀ နီးပါး တွေ့ရှိရတယ်လို့ ဟောင်ကောင်ငှက်ကြည့်အဖွဲ့အစည်း (HKBWS)က အခုမတ်လဆန်းမှာ ထုတ်ပြန်ထားပါတယ်။
#Local_News
Published 14 March 2025
#ကမ္ဘာ့ရှားပါးငှက်မျိုးစိတ် #စာဝါကျားငှက်
#YMG/NN #Yangon_Times

#Local_News
Published 14 March 2025

▪️ “၂၀၂၅ အလွန် ဗဟုဝင်ရိုးကမ္ဘာတွင် မြန်မာနိုင်ငံ ကြုံတွေ့လာရမည့် စိန်ခေါ်မှုများနှင့် အခွင့်အလမ်းများ” သုံးသပ်ဆွေးနွေးပွဲ  (Forum on Myanmar Beyond 2025; Challenges and Opportunities in the Multipolar World) ကို မတ်လ (၂၁) ရက်နေ့တွင် နေပြည်တော်ရှိ မြန်မာအပြည်ပြည်ဆိုင်ရာကွန်ဗင်းရှင်းဗဟိုဌာန-၁ (MICC-I)တွင် ကျင်းပမည်ဖြစ်ရာ  စိတ်ပါဝင်စားသူများအား တက်ရောက်ရန် ဖိတ်ခေါ်ကြောင်း သိရသည်။

▪️ အဆိုပါ သုံးသပ်ဆွေးနွေးပွဲကို ပြန်ကြားရေးဝန်ကြီးဌာနမှ  ကြီးမှူး၍ မြန်မာ့ပုံရိပ်ဖော်ညွှန်းရေးအဖွဲ့ (Myanmar Narrative Think Tank) က စီစဉ်ကျင်းပခြင်းဖြစ်သည်။

▪️ ဆွေးနွေးပွဲတွင်  “ပြောင်းလဲနေသော ဗဟုဝင်ရိုးကမ္ဘာတွင် မြန်မာနှင့်အာရှ၏ အခန်းကဏ္ဍ”၊ “၂၀၂၅ အလွန် ဗဟုဝင်ရိုးကာလတွင် မြန်မာနိုင်ငံကြုံတွေ့ရမည့် ပထဝီစီးပွားရေး စိန်ခေါ်မှုများနှင့် ရရှိနိုင်သည့်အခွင့်အလမ်းများ” ၊ “၂၀၂၅အလွန် ဗဟုဝင်ရိုးကာလတွင် မြန်မာနိုင်ငံကြုံတွေ့ရမည့် ပထဝီနိုင်ငံရေးစိန်ခေါ်မှုများနှင့်ရရှိနိုင်သည့် အခွင့်အလမ်းများ” စသည့် ခေါင်းစဉ်သုံးခုကို တရုတ်၊ ရုရှား၊ အိန္ဒိယ၊ ဂျပန်၊ ထိုင်း၊ အီတလီ၊ နီပေါနိုင်ငံတို့မှ ပထဝီစီးပွားရေးနှင့် ပထဝီနိုင်ငံရေးဆိုင်ရာကျွမ်းကျင်ပညာရှင်များနှင့် ပြည်တွင်းမှပညာရှင်များက ပါဝင်ဆွေးနွေးသွားမည်ဖြစ်ပြီး နိုင်ငံတကာမှလေ့လာသုံးသပ်သူများ (Observers) လည်း ပါဝင်တက်ရောက်သွားမည်ဖြစ်ကြောင်း သိရသည်။

▪️ ထို့အပြင် သုံးသပ်ဆွေးနွေးပွဲကို နိုင်ငံရေးအပြောင်းအလဲနှင့်အတူ နိုင်ငံတော်၏အခြေအနေမှန်ကို ကမ္ဘာကသိရှိစေပြီး မြန်မာနိုင်ငံအပေါ် နားလည်မှု၊ စာနာမှုများဖြင့် ပူးပေါင်းဆောင်ရွက်လာစေရန်၊ မဟုတ်မမှန်စွပ်စွဲပြောဆိုမှုများကို တန်ပြန်ချေဖျက်၍ နိုင်ငံ့ပုံရိပ်မြှင့်တင်ရန်နှင့် ၂၀၂၅ ခုနှစ်အလွန် ပြောင်းလဲလာနေသည့် ကမ္ဘာ့အခင်းအကျင်းဖြစ်သော ဗဟုဝင်ရိုးကမ္ဘာ (Multipolar World) တွင် ပေါ်ပေါက်လာမည့် စိန်ခေါ်မှုများနှင့် အခွင့်အလမ်းများအား သိရှိပြီး ကြိုတင်ပြင်ဆင်နိုင်မည့် နည်းလမ်းများရရှိစေရန် ရည်ရွယ်ကျင်းပခြင်းဖြစ်ကြောင်း သိရသည်။

▪️ ၂၀၂၅ အလွန် ဗဟုဝင်ရိုးကမ္ဘာတွင် မြန်မာနိုင်ငံကြုံတွေ့လာရမည့် စိန်ခေါ်မှုများနှင့် အခွင့်အလမ်းများ သုံးသပ်ဆွေးနွေးပွဲသို့ တက်ရောက်ရန် စိတ်ပါဝင်စားသူများအနေဖြင့်  https://myanmarnarrative.org/ ၏ Registration Form မှတစ်ဆင့် အမည်စာရင်းပေးသွင်းနိုင်ပြီး အစီအစဉ်နှင့်ပတ်သက်၍ သိရှိလိုသည်များကို ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ သုတေသနနှင့်သတင်းအချက်အလက်ဌာနခွဲ၊ တယ်လီဖုန်းအမှတ် ၀၆၇ ၃၄၁၂၁၈၇ သို့ ရုံးချိန်အတွင်း ဆက်သွယ်မေးမြန်းနိုင်ကြောင်း သိရသည်။

#YMG/NN #Yangon_Times

#Local_News
Published 14 March 2025

▪️ ရွှေတိဂုံစေတီတော်မြတ်ကြီး ၏ တပေါင်းလပြည့်နေ့ ဆွမ်းတော်ကြီး တင်လှူ ဆက်ကပ်လှူဒါန်းပွဲနှင့် (၂၆၁၃) နှစ်မြောက် ဗုဒ္ဓပူဇနိယတပေါင်းပွဲတော် အသံမစဲမဟာပဋ္ဌာန်းရွတ်ဖတ်ပူဇော်ပွဲ အောင်ပွဲရေစက်ချအခမ်းအနားကို ယမန်နေ့က စေတီတော်ရင်ပြင်သတ်မှတ်နေရာများ၌ကျင်းပခဲ့ကြောင်း ရွှေတိဂုံစေတီတော်ဘဏ္ဍာတော်ထိန်းဂေါပက အဖွဲ့မှ သိရသည်။

▪️ အဆိုပါပွဲတော်အား ရွှေတိဂုံစေတီတော် ဘဏ္ဍာတော်ထိန်းဂေါပက အဖွဲ့က ကြီးမှူးကျင်းပခြင်းဖြစ်ကာ မနက် ၅ နာရီတွင် ရွှေတိဂုံစေတီတော်မြတ်ကြီး၏ တပေါင်းလပြည့်နေ့ ဆွမ်းတော်ကြီးတင်လှူ ဆက်ကပ်လှူဒါန်းပွဲကို ရွှေတိဂုံစေတီတော် ရင်ပြင်မြောက်ဘက်မုခ်ရှိအောင်မြေ၌ ဂေါပကအဖွဲ့ဝင်များ၊ ဗုဒ္ဓဝေယျာဝစ္စအကျိုးဆောင်အသင်းအဖွဲ့များနှင့် ရုံးဝန်ထမ်းများက ဆွမ်းတော်တင်လှူဆက်ကပ်လှူဒါန်းကြကြောင်း သိရသည်။

▪️ ထို့နောက် ရွှေတိဂုံစေတီတော်(၂၆၁၃) နှစ်မြောက် ဗုဒ္ဓပူဇနိယတပေါင်းပွဲတော် အသံမစဲမဟာပဋ္ဌာန်းရွတ်ဖတ်ပူဇော်ပွဲ အောင်ပွဲရေစက်ချအခမ်းအနားကိုရွှေတိဂုံစေတီတော်ရင်ပြင် ရာဟုထောင့်ရှိ ချမ်းသာကြီးတန်ဆောင်း၌ ဆက်လက် ကျင်းပရာရွှေတိဂုံစေတီတော် ဘဏ္ဍာတော်ထိန်း ဂေါပကအဖွဲ့၏ ဩဝါဒါစရိယဆရာတော်ကြီးများနှင့် သံဃာတော်များ ကြွရောက်တော်မူကြပြီး ရန်ကုန်တိုင်းဒေသကြီးဝန်ကြီးချုပ် ဦးစိုးသိန်း၊ တိုင်းဒေသကြီးဝန်ကြီးများ၊ ဂေါပကအဖွဲ့ဝင်များ၊ ဗုဒ္ဓဝေယျာဝစ္စအကျိုးဆောင်အသင်းအဖွဲ့များနှင့် အလှူရှင်များ တက်ရောက်ကြည်ညိုကြသည်။

▪️ ယင်းနောက် ရွှေတိဂုံစေတီတော် ဘဏ္ဍာတော်ထိန်းဂေါပကအဖွဲ့၏ ဩဝါဒါစရိယ တိပိဋကဓရ၊တိပိဋကကောဝိဒ၊ ဓမ္မဘဏ္ဍာဂါရိကစွန်းလွန်းဆရာတော် ဘဒ္ဒန္တသုန္ဒရ ထံမှ ဧည့် ပရိသတ်များက ကိုးပါးသီလခံယူဆောက်တည်ကြပြီး  ရွှေတိဂုံစေတီတော် ဘဏ္ဍာတော်ထိန်းဂေါပကအဖွဲ့ အလှည့်ကျသဘာပတိ ဂေါပကအဖွဲ့ဝင် ဦးကျော်ဇေယျက ဗုဒ္ဓပူဇနိယ မင်္ဂလာအနုမောဒနာ အား လျှောက်ထား ကြောင်းသိရသည်။

▪️ ထို့နောက် ဩဝါဒါစရိယဆရာတော်ကြီးများနှင့် သံဃာတော်များအား တိုင်းဒေသကြီးဝန်ကြီး ချုပ် ဦးစိုးသိန်း၊ တိုင်းဒေသကြီးဝန်ကြီးများနှင့်ဂေါပကအဖွဲ့ဝင်များ က လှူဖွယ်ပစ္စည်းများ ဆက်ကပ်ကြပြီး ရွှေတိဂုံစေတီတော်ဘဏ္ဍာတော်ထိန်းဂေါပကအဖွဲ့၏ ဩဝါဒါစရိယ၊ တိပိဋကရွေးချယ်ရေးအဖွဲ့ ဩဝါဒါစရိယ၊ နိုင်ငံတော်ဗဟိုသံဃာ့ဝန်ဆောင်၊ အဂ္ဂမဟာပဏ္ဍိတ၊ အဂ္ဂမဟာဂန္ထဝါစကပဏ္ဍိတ၊ အဂ္ဂမဟာသဒ္ဓမ္မ ဇောတိကဓဇ၊ သ.စ.အ ဓမ္မာစရိယ၊ ဝဋံသကာပါဠိပါရဂူ ၊ စေတိယင်္ဂဏပဝရသိရီမဟာဓမ္မဂုရု၊ ဘဒ္ဒန္တနာရဒါဘိဝံသ(လှရတနာဆရာတော်) ထံမှဧည့်ပရိသတ်များက အနုမောဒနာ တရားနာကြား၍ ရေစက်ချအမျှပေးဝေကြပြီး ဗုဒ္ဓသာသနံစိရံတိဋ္ဌတု သုံးကြိမ်ရွတ်ဆိုဆုတောင်းကာ အခမ်းအနားကို ရုပ်သိမ်းခဲ့ကြောင်း သိရသည်။

▪️ ဆက်လက်၍ စေတီတော်ရင်ပြင် ရှေးဟောင်းဗုဒ္ဓရုပ်ပွားတော်များတန်ဆောင်း၌ ရွှေတိဂုံစေတီတော် ဩဝါဒါစရိယ ဆရာတော်ကြီးများနှင့် သံဃာတော်များအား တိုင်းဒေသကြီးဝန်ကြီးချုပ်နှင့် တာဝန်ရှိသူများ၊ ဂေါပက အဖွဲ့ဝင်များက နေ့ဆွမ်းဆက်ကပ်လှူဒါန်းကြကြောင်း သိရသည်။

#YMG/NN #Yangon_Times

#Local_News
Published 14 March 2025

▪️ ရန်ကုန်-မန္တလေးအမြန်လမ်းမကြီးတွင် ခရီးသည်တင်ယဥ်တစ်စီး တိမ်းမှောက်မှု ဖြစ်ပွားခဲ့ပြီး ယာဥ်ပေါ်ပါ ခရီးသည် ၁၀ဦး ဒဏ်ရာရရှိခဲ့ကြောင်း အမြန်လမ်းမီးသတ်တပ်ဖွဲ့မှ သိရသည်။

▪️ ဖြစ်စဥ်မှာ ယမန်နေ့ မတ်လ ၁၃ရက် ည၆နာရီ ၅၀မိနစ်အချိန်ခန့်က ရန်ကုန်-မန္တလေးအမြန်လမ်းမကြီး မိုင်တိုင်အမှတ်(၁၁၇/၃) ဖာလုံကြားတွင် ယာဉ် မတော်တဆမှုဖြစ်ပွား‌ကြောင်းသတင်းရ ဖြူးအမြန်လမ်းမီးသတ်စခန်းမှတပ်ဖွဲ့ဝင်များနှင့် ဖြူးအမြန်လမ်းရဲစခန်းမှ တပ်ဖွဲ့ဝင်များ ကူညီကယ်ဆယ်ရေးလုပ်ငန်းသွားရောက် ဆောင်ရွက်ခဲ့ရာနေပြည်တော်ဘက်မှ ရန်ကုန်ဘက်သို့ မောင်းနှင်လာသော၊ YUTONG အမျိုးစား၊ အပြာရောင် Express ခရီးသည်တင်ယာဉ်သည် အခင်းဖြစ်မိုင်တိုင်အရောက်တွင် အရှိန်မထိန်းနိုင်ဘဲ လမ်းယာဘက်မြေသားလမ်းပေါ်တွင်တိမ်းမှောက်ရပ်တန့်သွားခဲ့ကြောင်း၊ ယာဥ်မတော်တဆမှုကြောင့် ယာဉ်ပေါ်တွင်၊ ယာဉ်မောင်းနှင့် ယာဉ်နောက်လိုက်အပါ ကျား(၇ဦး၊ မ(၅)ဦး၊ ကလေးကျား(၁)ဦး၊ ပေါင်း(၁၃)ဦးအနက်၊ ကျား(၅)ဦး၊ မ(၄)ဦး၊ ကလေးကျား(၁)ဦး ပေါင်း(၁၀)ဦး၊ မစိုးရိမ်ရထိခိုက်ဒဏ်ရာများရရှိခဲ့ကြောင်း သိရသည်။

▪️ အဆိုပါ ဒဏ်ရာရရှိသူများအား ဖြူးမြို့နယ်ဆေးရုံသို့ ပို့ဆောင်ကူညီပေးခဲ့‌ကြောင်း သိရသည်။

#YMG/SW #Yangon_Times

#World_News
Published 14 March 2025

▪️ နိုင်ငံတကာ လုံခြုံရေးမြှင့်တင်ရန်အတွက် ဂရင်းလန်းကို အမေရိကန်ထိန်းချုပ်ဖို့ လိုအပ်တယ်လို့ သမ္မတ ဒေါ်နယ်ထရမ့်က နေတိုး(NATO) အတွင်းရေးမှူးချုပ် မာ့ခ်ရူတာကို ကြာသပတေးနေ့က ပြောပြခဲ့ပြီး ဗျူဟာကျတဲ့ အာတိတ်ကျွန်းကို သိမ်းပိုက်သွားမယ့်အရေး အရှိန်မြှင့်တင်လိုက်ပါတယ်။

▪️ အိမ်ဖြူတော် ဘဲဥပုံရုံးခန်းမှာ ထရမ့်က ရူတာကို "နိုင်ငံတကာ လုံခြုံရေးအတွက် ဂရင်းလန်းရရှိဖို့ လိုအပ်တယ်။ ကမ်းရိုးတန်းနားမှာ သတိထားစောင့်ကြည့်ရမယ့်သူတွေ လှည့်ပတ်နေတယ်" လို့ ပြောသွားပါတယ်။

▪️ ထရမ့်ဟာ ဇန်နဝါရီ ၂၀ ရက်နေ့ သမ္မတတာဝန်ယူချိန်ကစပြီး ဂရင်းလန်းကို အမေရိကန်သိမ်းယူမယ့်အကြောင်း အဓိကပြောဆိုနေခဲ့ပါတယ်။

▪️ ကိုယ်ပိုင်အုပ်ချုပ်ခွင့်ရ ဒိန်းမတ်နယ်မြေဖြစ်တဲ့ ဂရင်းလန်းကျွန်းကို သိမ်းယူဖို့အတွက် နေတိုးကို ပါဝင်စေလိုတယ်လို့ ထရမ့်က အကြံပြုလိုတာပါ။

▪️ "အမေရိကန်သမ္မတက ကျွန်ုပ်တို့ကို သိမ်းယူဖို့အကြံအစည်ကို နောက်တဖန် ထုတ်လွှင့်နေပြန်ပြီ။ တော်လောက်ပြီ" လို့ ဂရင်းလန်းဝန်ကြီးချုပ် မျူ့အက်ဂက်ဒ်က ဖေ့စ်ဘွတ်ခ်မှာ ဖော်ပြထားပါတယ်။

▪️ ဂရင်းလန်းပါလီမန် ရွေးကောက်ပွဲမှာ အနိုင်ရခဲ့တဲ့ Demokraatitပါတီခေါင်းဆောင် ယန်းစ်ဖရက်ဒရစ်နီလ်ဆင်ကလည်း "ထရမ့်ထုတ်ပြန်ချက်က လက်သင့်ခံစရာမရှိဘဲ ကျွန်ုပ်တို့ ဒီလိုအခြေအနေမျိုးမှာ စည်းလုံးရပ်တည်ကြောင်း ပြသရမယ်" လို့ ရေးထားပါတယ်။

▪️ ထင်မြင်ချက်စစ်တမ်းများအရ ဂရင်းလန်းပြည်သူအများစုဟာ အမေရိကန်ထံ ပူးပေါင်းရေးကို ဆန့်ကျင်သလို ဒိန်းမတ်ထံကနေ ဖြည်းဖြည်းချင်း ခွဲထွက်လွတ်လပ်ခွင့်ကိုလည်း လိုချင်နေကြပါတယ်။

▪️ ဂရင်းလန်းရဲ့ ဗျူဟာကျတည်နေရာနဲ့ သတ္တုရင်းမြစ် ကြွယ်ဝခြင်းတို့က အမေရိကန်ကို အကျိုးဖြစ်စေနိုင်ကာ ဥရောပကနေ မြောက်အမေရိကသို့သွားတဲ့ အတိုဆုံးလမ်းကြောင်းတလျှောက်မှာ ရှိနေပါတယ်။

▪️ ထရမ့်က ကနေဒါကို အမေရိကန်ရဲ့ ၅၁ ခုမြောက်ပြည်နယ် ဖြစ်လာဖို့လည်း တင်ပြထားပြီး ပနားမားတူးမြောင်းမှာလည်း အမေရိကန် ပိုမိုလွှမ်းမိုးမှုရဖို့ အလိုရှိနေပါတယ်။

▪️ မာ့ခ်ရူတာကတော့ ဂရင်းလန်းအနာဂတ်အကြောင်း တခြားသူတွေအပေါ် မူတည်ပြီး နေတိုးကို ဆွဲမထည့်ချင်ဘူးလို့ ပြောသွားပါတယ်။

#Source: Reuters

#Local_News
Published 14 March 2025

▪️ ယနေ့ မတ်လ၁၄ရက် နံနက်စောပိုင်းက ဖျာပုံမြို့အနီး အင်အားအနည်းငယ်ရှိသော မြေငလျင်တစ်ခုလှုပ်ခတ်သွားကြောင်း သိရသည်။

▪️ မတ်လ ၁၄ ရက်နေ့၊ မြန်မာစံတော်ချိန် (၀၀)နာရီ၊ (၂၆)မိနစ်၊ (၄၆) စက္ကန့် အချိန်တွင် ကမ္ဘာအေးမြေငလျင်စခန်းမှ တောင်-အနောက်တောင်ဘက် (၁၄၆) မိုင်ခန့် ကွာဝေး သော မြန်မာ့ပင်လယ်ပြင်၊ (ဖျာပုံမြို့၏ တောင်-အရှေ့တောင်ဘက် (၁၀၅)မိုင်ခန့်အကွာ) မြောက် လတ္တီတွဒ် (၁၄.၇၆) ဒီဂရီ၊ အရှေ့လောင်ဂျီတွဒ် (၉၅.၈၇)ဒီဂရီ၊ အနက်(၁၀) ကီလိုမီတာကို ဗဟိုပြု၍ အင်အားရစ်(ခ်)တာစကေး (၃.၅) အဆင့်ရှိ အင်အားအနည်းငယ်ရှိသော မြေငလျင် တစ်ခု လှုပ်ရှားသွားကြောင်း တိုင်းထွာရရှိသည်ဟု မိုးလေဝသနှင့်ဇလဗေဒဦးစီးဌာနမှ ထုတ်ပြန်ထားသည်။

#YMG/SW #Yangon_Times

#World_Lifestyle
Published 14 March 2025

▪️ ငါးဖမ်းသမားတစ်ဦး ဖမ်းမိတဲ့ အထူးအဆန်း ပင်လယ်နေသတ္တဝါရဲ့ ဗီဒီယိုကို မျှဝေပြီးနောက်မှာ သတင်းရိုက်ခတ်မှု ဖြစ်ခဲ့ပါတယ်။

▪️ ရိုမန်ဖက်ဒေါ်ဆော့ဗ်ဆိုတဲ့ ရုရှားဆွဲပိုက်ချငါးဖမ်းသမားက ပင်လယ်ထဲလွှင့်နေစဉ် ဖမ်းမိခဲ့တဲ့ ပင်လယ်သတ္တဝါတွေကို ကင်မရာရိုက်ကူးကာ တင်ခဲ့တာဖြစ်ပါတယ်။

▪️ အဆိုပါ ငါးဖမ်းသမားမှာ အင်စတာဂရမ်ဖော်လိုဝါ ၆ သိန်းလောက်ရှိပြီး ပင်လယ်ရေနက်ထဲမှ ငါးသတ္တဝါအထူးအဆန်းတွေ ဖမ်းမိခဲ့တာ ဖြစ်ပါတယ်။

▪️ နောက်ဆုံးတင်ထားတဲ့ ပုံမှာဆိုရင် မီးလုံးပုံသဏ္ဍာန် သတ္တဝါတစ်ကောင်ကို တွေ့နိုင်ပါတယ်။

▪️ ဒါဟာ ကမ္ဘာဂြိုဟ်ပြင်ပမှ သတ္တဝါတည်ရှိမှု အထောက်အထားဖြစ်တယ်လို့ အင်စတာဂရမ် အသုံးပြုသူတွေကြား အငြင်းပွားနေကြပါတယ်။

▪️ "ဒါဟာ ဂြိုဟ်သားဆိုတာ လုံးဝသေချာပါတယ်။ ဂြိုဟ်သားတွေ မွေးထားတဲ့ ရေအောက်ထဲက သတ္တဝါတွေပါ" လို့ ကြည့်ရှုသူတွေ ရေးသားထားပါတယ်။

▪️ နောက်တစ်ယောက်ကတော့ အဲဒါကို သတ်ပစ်ရှို့ပစ်သင့်ပြီး နောက်ထပ်မဖမ်းဖို့ ပြောထားပါတယ်။

▪️ အချို့တွေကတော့ စိတ်ကူးယဉ်ဇာတ်လမ်းတွေထဲက အထူးအဆန်း ဂြိုဟ်ပြင်ပသတ္တဝါများနဲ့ နှိုင်းယှဉ်နေကြပါတယ်။

▪️ အဆိုပါ ငါးသတ္တဝါရဲ့ လုံးဖောင်းနေတဲ့ခန္ဓာကိုယ်က ရေမျက်နှာပြင်သို့ တက်လာချိန်မှာ ဖိအားရုတ်တရက်ပြောင်းလဲမှုကြောင့် ဖြစ်ပေါ်နိုင်ပါတယ်။

▪️ ဒီလိုထူးဆန်းဖြစ်ရပ်က ဒါပထမဆုံးမဟုတ်ဘဲ ယခုလအစောပိုင်းကလည်း ဖမ်းရမိတဲ့ငါးတစ်ကောင် ရေမျက်နှာပြင်သို့ ကူးသွားပြီးခဏအကြာမှာပဲ သေဆုံးခဲ့တဲ့အကြောင်း ဝမ်းနည်းခဲ့သူတွေ ရှိခဲ့ပါတယ်။

#Source: New York Post

#World_Health
Published 14 March 2025

▪️ ယနေ့ခေတ် ရုံးထိုင်အလုပ်တွေမှာ အထိုင်များလာခြင်းကြောင့် ကျန်းမာရေးအပေါ် တိုက်ရိုက်ထိခိုက်လာနိုင်ပါတယ်။

▪️ နာရီများစွာ ထိုင်ခြင်းကြောင့် ဆိုးကျိုးဖြစ်ပေါ်မှုများကို လျှော့ချဖို့အတွက် ကိုယ်လက်လှုပ်ရှားခြင်း အရေးကြီးပုံကို American Academy of Neurologyမှ သုတေသီများ လေ့လာဖော်ပြခဲ့ကြပါတယ်။

▪️ ကိုယ်လက်လှုပ်ရှားမှု ပြုလုပ်သူတွေဟာ ဒီမန်ရှာရောဂါ၊ လေဖြတ်ခြင်း၊ စိုးရိမ်ပူပန်ခြင်း၊ စိတ်ဓာတ်ကျခြင်း၊ အိပ်စက်မှုပြဿနာတွေကနေ ခံစားရနိုင်ခြေ နည်းစေတယ်လို့ ဆိုပါတယ်။

▪️ ပျမ်းမျှအသက် ၅၆ နှစ်ရှိတဲ့ လူပေါင်း ၇၃,၄၁၁ ဦးကို ၇ ရက်ဆက်တိုက် ကိရိယာများတပ်ဆင်ပြီး လှုပ်ရှားမှုများကို တိုင်းတာကာ လေ့လာခဲ့ကြပါတယ်။

▪️ ကိုယ်လက်လှုပ်ရှားမှု သာမန်ကနေ အပြင်းအထန်ပြုလုပ်ပြီး စွမ်းအားအသုံးချသူတွေမှာ အထက်ပါ ရောဂါပြဿနာ ၅ မျိုးဖြစ်နိုင်ခြေ ၁၄ ကနေ ၄၀ ရာခိုင်နှုန်းအထိ လျော့နည်းတာ တွေ့ရပါတယ်။

▪️ အထိုင်များတဲ့သူတွေကတော့ အဆိုပါရောဂါများ ဖြစ်နိုင်ခြေ ၅ ကနေ ၅၄ ရာခိုင်နှုန်းအထိ ပိုများနေပါတယ်။

▪️ အထက်ပါ ရောဂါအခြေအနေတစ်ခုမှ မဖြစ်ခဲ့သူတွေက နေ့စဉ်လှုပ်ရှားမှုများ ပြုလုပ်ကြပြီး ကိုယ်အလေးချိန် ၁ ကီလိုဂရမ်မှာ စွမ်းအင် ၁.၂၂ ကီလိုဂျိုးလ်အသုံးချနိုင်ပြီး ဒီမန်ရှာဖြစ်တဲ့သူတွေကတော့ ၀.၈၅ သာရှိပါတယ်။

▪️ လေ့လာချက်မှာ ပါဝင်စမ်းသပ်သူ အများအပြားပါဝင်ပြီး ကိရိယာများအသုံးပြုပြီးတော့ ရောဂါဖြစ်ပွားမှုကို ရှာဖွေနိုင်တာ ဖြစ်ပါတယ်။

▪️ နေထိုင်စားသောက်မှုပုံစံများကို ပြောင်းလဲခြင်းဖြင့် အနာဂတ်မှာ ရောဂါဖြစ်နိုင်ခြေတွေကို လျှော့ချနိုင်စေမယ်လို့ လူတွေကို တိုက်တွန်းရာရောက်မယ်လို့ ရှန်ဟိုင်း ဖူဒန်တက္ကသိုလ်မှ ကျားယိဝူက ပြောပါတယ်။

▪️ ဒီလေ့လာချက်နဲ့ ပတ်သက်ပြီး သတိထားစရာတစ်ခုက စမ်းသပ်ပါဝင်သူတွေဟာ လူဖြူလူမျိုးတွေသာ ဖြစ်ပါတယ်။

#Source: India Today

#World_Health
Published 13 March 2025

▪️ အသက် ၁၀၆ နှစ်ပြည့်မွေးနေ့ ကျင်းပနိုင်ခဲ့တဲ့ အမျိုးသမီးကြီးက အသက်ရှည်ရတဲ့ လျှို့ဝှက်ချက်ဟာ ချောကလက်စားခြင်းဖြစ်တယ်လို့ ဆိုလိုက်ပါတယ်။

▪️ အက်ဒစ်ဟေးလ်ဟာ အသက် ၁၀၀ ပြည့်ပြီးချိန်မှာ လူအိုစောင့်ရှောက်ဂေဟာသို့ ရွှေ့ပြောင်းခဲ့တာဖြစ်ကာ နေ့စဉ်ချောကလက်စားခြင်းနဲ့ ပါတီပျော်ပါးခြင်းတို့က နုပျိုကျန်းမာစေတယ်လို့ ပြောပါတယ်။

▪️ သူမရဲ့ အကြိုက်ဆုံးချောကလက်က Cadbury Dairy Milkဖြစ်ပါတယ်။

▪️ ၁၉၁၉ မတ်လ ၃ ရက်နေ့ ဗြိတိန်မှာမွေးဖွားခဲ့တဲ့ အငြိမ်းစားအတွင်းရေးမှူးဖြစ်ပြီး ကမ္ဘာစစ် ၂ ခုနဲ့ ကြုံတွေ့ခဲ့ကာ မင်း ၅ မင်းအပြောင်းအလဲဖြစ်ခဲ့ပြီး ဒေါင်းနင်းလမ်းမှာ ဝန်ကြီးချုပ် ၂၃ ဦး ရောက်ရှိခဲ့ပါတယ်။

▪️ အသက်ရှည်ကျန်းမာခြင်းရဲ့ လျှို့ဝှက်ချက်အကြောင်း မေးမြန်းကြည့်ရာမှာ ချောကလက်များများစားပြီး ပါတီပျော်ပါးတယ်လို့ ပြန်ဖြေခဲ့ပါတယ်။

▪️ Aspen Lodge သက်ကြီးစောင့်ရှောက်ရေးဂေဟာမှာ နေထိုင်နေပြီး ဝန်ထမ်းတွေက မွေးနေ့အထူးပွဲအတွက် ပြင်ဆင်နေခဲ့ပါတယ်။

▪️ ဂေဟာထိန်းသိမ်းရေးမှူးချုပ် အန်နီတာတင်ဒယ်က ဒီအဖြစ်အပျက်ဟာ နှလုံးသားကို ထိမိလှပြီး ဒီအသိုင်းအဝိုင်းမှာ လူတွေက ကူညီပေးချင်ကြကြောင်း၊ သူမဟာ နှစ်လိုဖွယ်ကောင်းတဲ့ အမျိုးသမီးကြီးဖြစ်ကြောင်း ပြောပြပါတယ်။

▪️ သူမဟာ လူတစ်သန်းမှာတစ်ယောက် တွေ့ရခဲတဲ့သူမျိုး ဖြစ်ပြီး အင်္ဂလန်အတွက် စံပြဖြစ်တယ်လို့ ဆိုပါတယ်။

▪️ အက်ဒစ်က ပါတီပွဲမှာ ၁၉၄၀၊ ၁၉၅၀ ဝန်းကျင်လောက်က သူမအကြိုက်ဆုံးဖြစ်ခဲ့တဲ့ အဆိုတော် ၂ ယောက်ဖြင့် ပြုလုပ်သွားမှာဖြစ်ပါတယ်။

▪️ အသက် ၈၆ နှစ်ရှိ တူမဖြစ်သူ အန်နီတာနာက အက်ဒစ်ဟာ မိသားစုတွေအကြောင်း မပြတ်သိလိုပြီး အလွန်အမှီအခိုကင်းသူဖြစ်တယ်လို့ ပြောသွားပါတယ်။

#Source: New York Post

အမေရိကန်နိုင်ငံက လက်နက်တင်ပို့ရောင်းချမှုစာရင်းမှာ ထိပ်ဆုံးနေရာက ဦးဆောင်နေဆဲဖြစ်ပြီး ဥရောပရှိ နေတိုး(NATO)အဖွဲ့ဝင်နိုင်ငံတွေကတော့ ကိုယ်ပိုင်ထုတ်လုပ်နိုင်စွမ်းမှာ အောင်မြင်မှုမရှိဘူးလို့ ဆွီဒင်အကြံပေးအဖွဲ့တစ်ခုက တနင်္လာနေ့မှာ တင်ပြခဲ့ပါတယ်။
#World_News
Published 12 March 2025
#လက်နက်တင်ပို့ရောင်းချမှုအများဆုံးနိုင်ငံ #အမေရိကန်ရပ်တည်
#YMG #Yangon_Times #Yangon_Media_Group

#Daily_News

Published 12 March 2025

၁။ နေပြည်တော်မဟာသင်္ကြန်ကို ယခင်နှစ်များထက်ပိုခမ်းနားစွာကျင်းပမည်

၂။ သီလဝါအိမ်ရာရှိ အခန်းများအား ယာယီနေထိုင်ခွင့် ထုတ်ပေးမည်

၃။ PJ ပတ်စပို့ဖြင့် ပြည်ပထွက်ခွာမည့်သူများ OWIC ကတ်အပြင် ခွင့်ပြုချက်ပါ ရယူရမည်

၄။ လက်နက်တင်ပို့ရောင်းချမှုအများဆုံးနိုင်ငံအဖြစ် အမေရိကန်ရပ်တည်နေဆဲ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#Local_News
Published 12 March 2025

▪️ ရန်ကုန်မြို့ ၊မဟာဗန္ဓုလမ်းနှင့်ဗိုလ်ချုပ်လမ်းတွင်လမ်းမီးလုံး (၂၀၀ )ထွန်းညှိသွားမည်ဖြစ်ကြောင်းရန်ကုန်လျှပ်စစ်ဓာတ်အားပေးရေးကော်ပိုရေးရှင်းမှ သိရသည်။

▪️ ထိုသို့ဆောင်ရွက်ခြင်းမှာ မြို့တော်အင်္ဂါရပ်များနှင့်အညီသန့်ရှင်းသာယာလှပမှုရှိစေရေး၊လျှပ်စစ်အန္တရာယ်ကင်းရှင်းရေး၊ဓာတ်အားပျောက်ဆုံးမှုလျော့နည်းရေး၊ ညအချိန်ပြည်သူများ ယာဥ်အန္တရာယ်၊လမ်းအန္တရာယ်ကင်းရှင်းစေရေး၊ညအချိန်အလင်းရောင်ကောင်းစွာရရှိပြီး ဒုစရိုက်မှုများကင်းရှင်းစေရေးတို့အတွက်ဖြစ်ပြီး မဟာဗန္ဓုလမ်းတွင် ၅.၁၁ မိုင်၊ ဗိုလ်ချုပ်လမ်းတွင် ၄.၁၈ မိုင်အားမြေအောက်ဓာတ်အားလိုင်းများချမြှုပ်လျက် လမ်းလယ်ကျွန်းဓာတ်မီးတိုင် စုစုပေါင်း ၈၉ တိုင်စိုက်ထူကာLED(150)Wလမ်းမီးလုံး (၂၀၀ )ထွန်းညှိသွားမည်ဖြစ်ကြောင်း သိရသည်။

▪️ အဆိုပါ လုပ်ငန်းစဉ်များကို ရန်ကုန်တိုင်းဒေသကြီးအစိုးရအဖွဲ့၏ လမ်းညွှန်ချက်အရအကောင်အထည်ဖော်ဆောင်ရွက်လျက်‌နေခြင်းဖြစ်ပြီး မဟာဗန္ဓုလ လမ်းတစ်လျှောက်(လမ်းသစ်လမ်းမှ ဆူးလေဘုရားအဝိုင်းအထိ)နှင့်ဗိုလ်ချုပ်လမ်းတစ်လျှောက်(ပန်းဆိုးတန်းလမ်းမှ ပုဇွန်တောင်ပန်းခြံအထိ)လမ်းလယ်နှင့်လမ်းဘေး ဝဲ/ယာ ရှိ ကောင်းကင်ဓာတ်အားလိုင်းများအားမြေအောက်ဓာတ်အားလိုင်းအဖြစ်ပြောင်းလဲတည်ဆောက်ခြင်းနှင့်လမ်းလယ်ကျွန်းတစ်လျှောက်တွင်လမ်းမီးတိုင်များစိုက်ထူရေးလုပ်ငန်းခွင်သို့လျှပ်စစ်စွမ်းအားဝန်ကြီးဌာန၊ ရန်ကုန်လျှပ်စစ်ဓာတ်အားပေးရေးကော်ပိုရေးရှင်းဥက္ကဋ္ဌ ဦးအောင်ကျော်ဦးသည် ရုံးချုပ်မှတာဝန်ရှိသူများလိုက်ပါလျက်မတ် ၁၁ ရက်ကသွားရောက်ကွင်ဆင်းစစ်ဆေးခဲ့‌ကြောင်း သိရသည်။

#YMG/SW #Yangon_Times