#Daily_News

Published 15 March 2025

၁။ အွန်လိုင်းမှတဆင့် ဂျပန်ဗီဇာလျှောက်ထားမှုကို ဧပြီလ ၁ရက်တွင် ပြန်လည်လက်ခံသွားမည်

၂။ ရန်ပုံငွေမလုံလောက်မှုကြောင့် လူဦးရေတစ်သန်းအတွက်စားနပ်ရိက္ခာအထောက်အပံ့များ ရပ်ဆိုင်းမည်

၃။ နှစ်ပတ်တာအတွင်း စက်သုံးဆီဈေးနှုန်းများ တစ်လီတာ ၁၅၀ကျပ်ဝန်းကျင်အထိကျဆင်း

၄။ လူ့ဆံပင်ထက်အဆသိန်းချီပါးလွှာသော ကမ္ဘာ့ပထမဆုံးအက်တမ်လွှာသတ္တုပြားအား တရုတ်သုတေသီများအောင်မြင်စွာထုတ်လုပ် ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#World_News
Published 15 March 2025

▪️ တောင်ကိုရီးယားသမ္မတမှ စစ်အုပ်ချုပ်ရေးဥပဒေ ခေတ္တခဏချမှတ်ခဲ့ခြင်းနဲ့ နျူကလီးယားလက်နက်များ ထုတ်လုပ်ရေးအကြောင်း ဆွေးနွေးမှုများ ပြုလုပ်ပြီးနောက် အမေရိကန် စွမ်းအင်ဌာန(DOE)က တောင်ကိုရီးယားကို စောင့်ကြည့်ကြပ်မတ်ရမယ့် နိုင်ငံများစာရင်းထဲ ထည့်သွင်းသတ်မှတ်လိုက်ကြောင်း ပြောရေးဆိုခွင့်ရှိသူတစ်ဦးက သောကြာနေ့မှာ ပြောသွားပါတယ်။

▪️ သမ္မတဟောင်း ဂျိုးဘိုင်ဒင်ရာထူးမှ မဆင်းခင် ဇန်နဝါရီလက စောင့်ကြည့်ကြပ်မတ်ရမယ့် နိုင်ငံများစာရင်းထဲမှာ တောင်ကိုရီးယားကို အောက်ဆုံးအလွှာမှာ ထားခဲ့တယ်လို့ DOEက ဖော်ပြထားပါတယ်။

▪️ ဘာကြောင့် တောင်ကိုရီးယားကို ဒီစာရင်းထဲ ထည့်သွင်းတာလဲဆိုတာ မရှင်းပြထားသလို သမ္မတဒေါ်နယ်ထရမ့်မှ ဒီသတ်မှတ်ချက်ကို ပြန်ပြောင်းချင်တဲ့ပုံစံလည်း မပြထားပါဘူး။

▪️ သိပ္ပံနဲ့ နည်းပညာပိုင်း နှစ်နိုင်ငံပူးပေါင်းဆောင်ရွက်မှုတွေမှာတော့ ကန့်သတ်ချက်တွေ မရှိပါဘူး။

▪️ ဧပြီ ၁၅ ရက်နေ့ အဆိုပါထည့်သွင်းသတ်မှတ်ချက် မစတင်ခင်မှာ ဒီကိစ္စကိုဖြေရှင်းဖို့ တောင်ကိုရီးယားက အမေရိကန်နဲ့ ဆွေးနွေးနေတယ်လို့ ယွန်ဟပ်သတင်းဌာနက ဖော်ပြထားပါတယ်။

▪️ DOEရဲ့ စောင့်ကြည့်နိုင်ငံများစာရင်းထဲမှာ တရုတ်၊ ထိုင်ဝမ်၊ အစ္စရေးလ်၊ ရုရှား၊ အီရန်၊ မြောက်ကိုရီးယားတို့ ပါဝင်ပြီး အီရန်နဲ့ မြောက်ကိုရီးယားတို့ကို အကြမ်းဖက်များအဖြစ် သတ်မှတ်ထားပါတယ်။

▪️ မြောက်ကိုရီးယားဘက်က နျူကလီးယားလက်နက်များနဲ့ ပဲ့ထိန်းဒုံးကျည်အစီအစဉ်များ အရှိန်မြှင့်လုပ်ဆောင်လာတဲ့အပေါ် စိုးရိမ်ပြီး တောင်ကိုရီးယားကလည်း နျူကလီးယားလက်နက်လမ်းစဉ် ကျင့်သုံးသွားဖို့အကြောင်းကို သမ္မတ ယွန်ဆော့ယောလ်နဲ့ ကာကွယ်ရေးဝန်ကြီးဟောင်း ကင်မ်ယုံဟျွန်းတို့ ရှုမြင်ခဲ့ကြပါတယ်။

▪️ ဒီဇင်ဘာလက တောင်ကိုရီးယား စစ်အုပ်ချုပ်ရေးဥပဒေ ၆ နာရီမျှကြာအောင် ထုတ်ပြန်ခဲ့ခြင်းအပေါ် ယွန်ဆော့ယောလ်နဲ့ ကင်မ်ယုံဟျွန်းတို့ကို တရားစွဲဆိုခဲ့ကြပါတယ်။

▪️ တောင်ကိုရီးယားက ယင်းတို့ကိုယ်တိုင် နျူကလီးယားဗုံး မထုတ်လုပ်ဘူးဆိုတဲ့ ကတိပြုချက်ကို ပေးထားပါတယ်။

▪️ နိုင်ငံခြားရေးဝန်ကြီး ချိုထယ်ယူက နိုင်ငံတကာ အခြေအနေတွေဟာ ခန့်မှန်းလို့မရဘဲ ဖြစ်နေတာကြောင့် ဖြစ်နိုင်ခြေအားလုံးအတွက် ပြင်ဆင်ထားရမယ်လို့ ပါလီမန်မှာ ပြောခဲ့ပါတယ်။

▪️ DOEရဲ့ စောင့်ကြည့်စာရင်းက နိုင်ငံတော်လုံခြုံရေး၊ နျူကလီးယားကိစ္စ၊ အကြမ်းဖက်ထောက်ပံ့မှု အကြောင်းပြချက်တွေနဲ့ ပတ်သက်တဲ့ နိုင်ငံများကို ထည့်သွင်းတာဖြစ်ပြီး အမေရိကန်နဲ့ ဆက်ဆံရေး ပျက်ပြားသွားတဲ့ သဘောတော့ မဟုတ်ပါဘူး။

#Source: Reuters

တိုင်းနဲ့ပြည်နယ်တွေမှာ နေ့အပူချိန်တွေမြင့်တက်လာတာကြောင့် လေပြင်းတိုက်တာ၊ မိုးသီးကြွေတာ အပါအဝင် နွေကာလမှာ  ဖြစ်ပေါ်တတ်တဲ့  မိုးလေဝသဖြစ်စဉ်တွေ ဖြစ်ပေါ်နိုင်တာကြောင့် ယင်းဖြစ်စဉ်တွေနဲ့  ပတ်သက်လို့  ကြိုတင်သတိထားကြဖို့ မိုးလေဝသနှင့်ဇလဗေဒညွှန်ကြားမှုဦးစီးဌာနက မတ်လ ၁၅ရက်‌နေ့မှာ သတိပေးထားပါတယ်။
#Local_News 
Published 15 March 2025
#နေ့အပူချိန်မြင့်တက် #မိုးသီးကြွေခြင်းများဖြစ်ပွားနိုင်
#YMG/NN #Yangon_Times

#Local_News
Published 15 March 2025

▪️ ကနဦးယာဉ်မှတ်ပုံတင်ကြေး ပေးသွင်းရာတွင် PO ၊ ဘဏ်ငွေသွင်းချလန်ဖြင့် ပေးသွင်းခြင်းကို လတ်တလောတွင် ခေတ္တရပ်နားထားမည်ဖြစ်ကြောင်း ကုန်းလမ်းပို့ဆောင်ရေးညွှန်ကြားမှုဦးစီးဌာနက ထုတ်ပြန်ကြေညာထားသည်။

▪️ ထိုသို့ခေတ္တရပ်နားခြင်းမှာ ၂ဝ၂၄-၂ဝ၂၅ ခုနှစ်၊ ဘဏ္ဍာရေးနှစ် ကုန်ဆုံးချိန်တွင် နှစ်ချုပ်စာရင်းများ ဆောင်ရွက်ရန်အတွက်ဖြစ်ပြီး ကနဦးယာဉ်မှတ်ပုံတင်ကြေးအား PO နှင့် ဘဏ်ငွေသွင်းချလန်ဖြင့် ပေးသွင်းခြင်းများကို မတ်လ ၁၆ ရက်မှ ၃၁ ရက်အထိ ယာယီရပ်နားထားမည်ဖြစ်ကြောင်း ၊ လုပ်ငန်းဆောင်ရွက်သူများ အဆင်ပြေမှုရှိစေရန် မတ်လ ၂၆ ရက်မှ မတ်လ ၃၁ ရက် နံနက် ၁၂ နာရီအထိ ငွေသားဖြင့် လက်ခံဆောင်ရွက်ပေးမည်ဖြစ်ပြီး လာမည့် ဧပြီလ ၁ ရက်မှစ၍ ကနဦးယာဉ်မှတ်ပုံတင်ခများ ပေးသွင်းခြင်းအား PO နှင့် ဘဏ်ငွေသွင်းချလန်တို့ဖြင့် ပြန်လည်လက်ခံဆောင်ရွက်ပေးသွားမည်ဖြစ်ကြောင်း သိရသည်။

▪️ ကုန်းလမ်းပို့ဆောင်ရေးညွှန်ကြားမှုဦးစီးဌာနအနေဖြင့် ကနဦးမှတ်ပုံတင်ခြင်းဆိုင်ရာ မှတ်ပုံတင်အခငွေများကို POစနစ်ဖြင့်လည်းကောင်း ၊ ဘဏ်ငွေသွင်းချလန်ဖြင့် လည်းကောင်း၊ငွေသားဖြင့်လည်းကောင်း ရုံးချုပ်၊ ကနဦးမော်တော်ယာဉ်မှတ်ပုံတင်ဌာန (နေပြည်တော်)၊ ရုံးချုပ်၊ ကနဦးမော်တော်ယာဉ်မှတ်ပုံတင်ဌာန (ထောက်ကြန့်)၊ ရုံးချုပ်၊ ကနဦးမော်တော်ယာဉ်မှတ်ပုံတင်ဌာန (ရွာသာကြီး)နှင့် ရုံးချုပ်၊ ကနဦးမော်တော်ယာဉ်မှတ်ပုံတင်ဌာန (မန္တလေး)တို့တွင် လက်ခံဆောင်ရွက်ပေးလျှက်ရှိကြောင်း သိရသည်။

#YMG/SW #Yangon_Times

စက်သုံးဆီရည်ညွှန်းဈေးနှုန်းတွေကတော့ ရန်ကုန်ဈေးကွက်ထဲမှာ အမျိုးအစားအားလုံး ဈေးဆက်လက်ကျဆင်းနေပြီး နှစ်ပတ်တာအတွင်း တစ်လီတာကို ၁၅၀ကျပ်ဝန်းကျင်အထိကျဆင်းလာတယ်လို့ စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီက သိရပါတယ်။
#Local_News
Published 15 March 2025
#စက်သုံးဆီဈေးနှုန်းကျဆင်း #စက်သုံးဆီတင်သွင်းသိုလှောင်
#YMG/NN #Yangon_Times

#Local_News
Published 15 March 2025

▪️ မုန်းဇလဲကျေးရွာရှိ ဘုန်းတော်ကြီးကျောင်း (၃) ကျောင်းတွင် ဖွင့်လှစ်ထားရှိသော ယာယီမီးဘေးရှောင်စခန်းမှာ မီးဘေးသင့်ပြည်သူ ၁၄၄၅ ဦးအား ထောက်ပံ့ငွေနှင့် စားနပ်ရိက္ခာများ ပေးအပ်ခဲ့ကြောင်း သိရသည်။

▪️ မကွေးတိုင်းဒေသကြီးအစိုးရအဖွဲ့ဝန်ကြီးချုပ် ဦးတင့်လွင်သည် တိုင်းဒေသကြီးအစိုးရအဖွဲ့ဝင် ဝန်ကြီးများ၊ တိုင်းဒေသကြီး/ ခရိုင်နှင့် မြို့နယ်အဆင့် ဌာနဆိုင်ရာ တာဝန်ရှိသူများနှင့်အတူ မုန်းဇလဲကျေးရွာ ဘုန်းတော်ကြီးကျောင်း (၃) ကျောင်းတွင် ဖွင့်လှစ်ထားရှိသော ယာယီမီးဘေးရှောင်စခန်းသို့ သွားရောက်၍ မီးဘေးသင့်ပြည်သူ ၁၄၄၅ ဦးအား တွေ့ဆုံ၍ အားပေးစကားများ ပြောကြားကာ မီးဘေးသင့်ပြည်သူများ၏ တင်ပြချက်များအပေါ် ကူညီဖြည့်ဆည်းဆောင်ရွက်ပေးနိုင်ရေး သက်ဆိုင်ရာဆက်စပ်ဌာနများနှင့် ပေါင်းစပ်ညှိနှိင်းဆောင်ရွက်ပေးခဲ့ကြောင်း သိရသည်။

▪️ ထိုသို့တွေ့ဆုံစဥ် မီးဘေးသင့် အိမ်ထောင်စု ၃၇၂ စု ၊ လူဦးရေ ၁၄၄၅ ဦးတိုအတွက် နေထိုင်စားသောက်ရေး အဆင်ပြေစေရန် ထောက်ပံ့ငွေ ၊ ဆန် ၊ ဆီ ၊ ကုလားပဲ ၊ အဝတ်အထည်ကယ်ဆယ်ရေးပစ္စည်းများနှင့် သောက်ရေသန့်ဗူးကြီးများကို မီးဘေးသင့် ပြည်သူများထံ ထောက်ပံ့ပေးအပ်ပြီး ကျေးရွာတွင်း မီးလောင်ပျက်စီးမှုအခြေအနေများကို လိုက်လံကြည့်ရှုစစ်ဆေးခဲ့ကြောင်း သိရသည်။

မကွေးတိုင်း‌ဒေသကြီး၊ ပွင့်ဖြူမြို့နယ် မုန်းဇလဲကျေးရွာ၌ မတ် ၁၂ ရက်နေ့က ပေါ့ဆမှုကြောင့် မီးလောင်မှုဖြစ်ပွားခဲ့ပြီး ကျေးရွာရှိ အိမ်ခြေ ၄၅၀၊ အိမ်ထောင်စု ၄၇၀ ရှိသည့်အနက် အိမ်ခြေ ၃၆၀ မီးလောင်ပျက်စီးဆုံးရှုံးခဲ့ပြီး အိမ်ထောင်စု ၃၇၂ စု၊ လူဦးရေ ၁၄၄၅ ဦး မီးဘေးဒဏ်သင့်ခဲ့ကာ ဌာနဆိုင်ရာတာဝန်ရှိသူများက မီးဘေးသင့်ပြည်သူများ အဆင်ပြေစွာ နေထိုင်နိုင်ရေးအတွက် ဘုန်းတော်ကြီးကျောင်း (၃) ကျောင်းတွင် ယာယီမီးဘေးရှောင်စခန်းဖွင့်လှစ်ထားရှိပြီး လိုအပ်သည့် ထောက်ပံ့ကူညီမှုများ ဆောင်ရွက်ပေးလျက်ရှိသည့်အပြင် ဒေသတွင်းရှိ လူမှုကူညီရေးအသင်းအဖွဲ့များ၊ ရပ်ဝေးရပ်နီးမှ စေတနာအလှူရှင်များက မိမိတို့တတ်အားသရွေ့ အလှူငွေများ၊ အခြေခံစားသောက်ကုန်ပစ္စည်းများ၊ အဝတ်အထည်များနှင့် အိမ်အသုံးအဆောင်ပစ္စည်းများကို လာရောက်ကူညီထောက်ပံ့ပေးလျက်ရှိကြောင်း သိရသည်။

#YMG/SW #Yangon_Times

#Local_News
Published  15 March 2025

▪️ ဆော်ဒီအာရေဗျနိုင်ငံတွင် အခက်အခဲကြုံနေသည့် မြန်မာအမျိုးသမီးကို မြန်မာသံရုံးမှ အမိနိုင်ငံသို့ပြန်လည်ပို့ဆောင်ပေးခဲ့ကြောင်း သိရသည်။

▪️ အဆိုပါ ဆော်ဒီအာရေဗျနိုင်ငံ Tabuk မြို့တွင် အခက်အခဲကြုံတွေ့နေရသည့် မညိမ်းညိမ်းခက်ဆိုသူ မြန်မာနိုင်ငံသား အမျိုးသမီးတစ်ဦးကို အမိနိုင်ငံသို့ အမြန်ဆုံး ပြန်လည်ပို့ဆောင်နိုင်ရန်အတွက် မြန်မာသံရုံးနှင့် ကောင်စစ်ဝန်ချုပ်ရုံးတို့က သက်ဆိုင်ရာနိုင်ငံ လူဝင်မှုကြီးကြပ်ရေးဌာန၊ သက်ဆိုင်ရာတာဝန်ရှိသူများနှင့်ချိတ်ဆက်၍ ညှိနှိုင်းဆောင်ရွက်ပေးခဲ့ခြင်းဖြစ်သည်။

▪️ ထိုသို့ဆောင်ရွက်ပေးခဲ့မှုကြောင့်ပင် မညိမ်းညိမ်းခက် ဆိုသူမြန်မာနိုင်ငံသားမှာ မတ် ၁၀ ရက်တွင် ရီရတ်ဒ်-နယူးဒေလီ-ဗန်ကောက်-ရန်ကုန် လေကြောင်းခရီးစဉ်ဖြင့် ပြန်လည်ထွက်ခွာနိုင်ခဲ့ပြီး မတ်လ ၁၃ ရက်၊ မနက်အစောပိုင်းတွင် အမိနိုင်ငံ ရန်ကုန်မြို့သို့ ပြန်လည်ရောက်ရှိခဲ့‌ကြောင်း သိရသည်။

▪️ နိုင်ငံတော်အစိုးရအနေဖြင့် ပြည်ပတွင်အလုပ်လုပ်ကိုင်စဉ် အခက်အခဲကြုံတွေ့ရသည့် မြန်မာနိုင်ငံသားများကို မြန်မာသံရုံးနှင့် ကောင်စစ်ဝန်ချုပ်ရုံးတို့၏ ညှိနှိုင်းကူညီဆောင်ရွက်မှုဖြင့် အမိနိုင်ငံသို့ ပြန်လည်ခေါ်ဆောင်ပေးလျက်ရှိသဖြင့် အခက်အခဲကြုံတွေ့နေရသူများအနေဖြင့် ဆက်သွယ်အကူအညီတောင်းခံနိုင်ကြောင်း သိရသည်။

#YMG/NN #Yangon_Times

#Local_News
Published  15 March 2025

▪️ မြန်မာနိုင်ငံ ပြည်ပနိုင်ငံအသီးသီးရှိ ဆိပ်ကမ်းအသီးသီး၏ သင်္ဘောများပေါ်တွင် တာဝန်ထမ်းဆောင်ရင်း အကြောင်းအမျိုးမျိုးကြောင့် မြန်မာနိုင်ငံသို့ပြန်လာရန် အခက်အခဲကြုံတွေ့နေရသော မြန်မာသင်္ဘောသားများကို မြန်မာနိုင်ငံပင်လယ်ကူးသင်္ဘောသား အလုပ်သမားများ အဖွဲ့ချုပ် (MSF) မှ  ကူညီပေးသွားမည်ဖြစ်ကြောင်း သိရသည်။

▪️ ထို့ကြောင့်  သင်္ဘောများပေါ်တွင် တာဝန်ထမ်းဆောင်ရင်း အကြောင်းအမျိုးမျိုးကြောင့် ထိန်းသိမ်းခံရပြီး မိခင်မြန်မာနိုင်ငံသို့ ပြန်လာရန် အခက်အခဲဖြစ်ပေါ်နေခြင်း၊ လုပ်ငန်းခွင်ထိခိုက်ဒဏ်ရာရရှိခြင်း စသည့်ပြဿနာများ ကြုံတွေ့နေရသည့် သင်္ဘောသားများ၏ မိသားစုများအနေဖြင့် မည်သည့်နိုင်ငံ၊ မည်သည့်ဆိပ်ကမ်း၌ ထိန်းသိမ်းခံထားရသည်ကို အကြောင်းကြားရန် (MSF) က အသိပေးထားသည်။

▪️ ထိုသို့ အခက်အခဲကြုံတွေ့နေရသည့် မြန်မာသင်္ဘောသား မိသားစုများအနေဖြင့် သင်္ဘောသားအမည် ၊ CDC နံပါတ် ၊ Passport နံပါတ်၊ သင်္ဘောအချက်အလက်များ၊ မြန်မာနိုင်ငံတွင်ရှိသော ဒေသခံကိုယ်စားလှယ်အမည်နှင့် ရုံးလိပ်စာအပြင် နိုင်ငံခြားတွင်ရှိသော သင်္ဘောပိုင်ရှင်အမည်နှင့် ရုံးလိပ်စာများကို MSF သို့ တင်ပြရမည်ဖြစ်ကြောင်း သိရသည်။

▪️ ထို့အပြင်အထိန်းသိမ်းခံရသည့်အကြောင်းအရင်းနှင့် နေရာတို့ကိုလည်း တင်ပြရမည်ဖြစ်သကဲ့သို့  ထိန်းသိမ်းခံရမှုအပေါ် ဒေသခံကိုယ်စား လှယ်က ဆောင်ရွက်ထားခြင်း ရှိမရှိနှင့် ရှိခဲ့လျှင် မည်သို့ဆောင်ရွက်ထားသည်ဆိုသည့် အချက်အလက်များကို အထောက်အထားနှင့်တကွ တင်ပြရမည်ဖြစ် ကြောင်း သိရသည်။

#YMG/NN #Yangon_Times

ဂျပန်နိုင်ငံသို့ သွားရောက်ဖို့အတွက် ဗီဇာလျှောက်ထားရာမှာ အွန်လိုင်းမှ တဆင့် လျှောက်ထားမှုကို ဧပြီလ ၁ရက်မှာ ပြန်လည်လက်ခံသွားမယ်လို့ မြန်မာနိုင်ငံဆိုင်ရာ ဂျပန်သံရုံးကထုတ်ပြန်လိုက်ပါတယ်။
#Local_News
Published 15 March 2025
#အွန်လိုင်းမှတဆင့်ဂျပန်ဗီဇာလျှောက်ထား #မြန်မာနိုင်ငံဆိုင်ရာဂျပန်သံရုံး
#YMG/SW #Yangon_Times

ကုလသမဂ္ဂကမ္ဘာ့စားနပ်ရိက္ခာအစီအစဉ်(WFP) အနေနဲ့ ရန်ပုံငွေလိုအပ်ချက် အလွန်ကြီးမားမှုကြောင့် ဧပြီလမှ စတင်ကာ မြန်မာနိုင်ငံရှိ လူဦးရေတစ်သန်းကျော်အတွက် အသက်ကယ်ဆယ်ရေး စားနပ်ရိက္ခာအကူအညီတွေ ရပ်ဆိုင်းရတော့မှာ ဖြစ်တယ်လို့ ယမန်နေ့က သတင်းထုတ်ပြန်ခဲ့ပါတယ်။
#Local_News
Published 15 March 2025
#ကုလသမဂ္ဂကမ္ဘာ့စားနပ်ရိက္ခာ #အထောက်အပံ့များရပ်ဆိုင်း
#YMG/SW #Yangon_Times

#World_Science
Published 15 March 2025

▪️ နေစကြဝဠာအဖွဲ့အစည်း စတင်မွေးဖွားလာချိန် ကမ္ဘာမြေကြီး မူလဖြစ်ပေါ်မှုအဆင့်များအတွင်း ရေစတင်ထွက်ပေါ်လာတယ်လို့ ယူဆခဲ့ကြပေမယ့် မကြာသေးမီက စာတမ်းတစ်ခုမှာတော့ ဘစ်ဘန်းဖြစ်စဉ်ပြီးနောက် နှစ်ပေါင်းသန်း ၁၀၀-၂၀၀ကြား ရေစတင်ဖြစ်ပေါ်ခဲ့ဟန်ရှိတယ်လို့ ဖော်ပြလာပါတယ်။

▪️ ကမ္ဘာပေါ်က သစ်ပင်ပန်းမန်များနဲ့ သတ္တဝါအားလုံးအတွက် ရေက အလွန်အရေးပါပါတယ်။

▪️ ရေက သတ္တုဓာတ်နည်းပါးတဲ့ ဓာတ်ငွေ့ထဲမှာ ဖြစ်ပေါ်နိုင်တယ်လို့ သုတေသီများ ဖော်ပြထားပါတယ်။

▪️ ကမ္ဘာဂြိုဟ် မူလဖြစ်ပေါ်မှုအဆင့်များအတွင်း မီးတောင်လှုပ်ရှားမှုများ၊ ဥက္ကာခဲသက်ရောက်မှုများကနေ လေထုထဲသို့ ရေငွေ့အများအပြား ထွက်သွားပြီး ဖြည်းဖြည်းချင်းဖွဲ့စည်းသွားကာ သမုဒ္ဒရာ၊ မြစ်၊ ရေကန်များ ဖြစ်ပေါ်လာတယ်လို့ ယူဆထားပါတယ်။

▪️ ရေမော်လီကျူးက ဟိုက်ဒရိုဂျင်အက်တမ် ၂ ခုနဲ့ အောက်ဆီဂျင်အက်တမ်တစ်ခု ပေါင်းစည်းထားတာဖြစ်ပြီး သက်ရှိတွေအတွက် မရှိမဖြစ်လိုအပ်ပါတယ်။

▪️ ဟိုက်ဒရိုဂျင်၊ ဟီလီယံတို့လို ပေါ့ပါးတဲ့ဒြပ်စင်တွေက ဘစ်ဘန်းဖြစ်စဉ်မှာ ထွက်ပေါ်လာပြီး ပိုလေးတဲ့ အောက်ဆီဂျင်လို ဒြပ်စင်တွေကတော့ ကြယ်ပေါက်ကွဲမှုအတွင်း နျူကလီးယား ဓာတ်ပြုမှုတွေကနေ ဖြစ်ပေါ်လာတယ်လို့ ရှင်းပြထားပါတယ်။

▪️ ဒန်နီယယ်ဝယ်လန်နဲ့ သုတေသီအဖွဲ့က နေဂြိုဟ်ထက် အဆပေါင်းများစွာ ထုထည်ကြီးတဲ့ ကြယ်ပေါက်ကွဲမှုကြီး ၂ ခုကို ကွန်ပျူတာမော်ဒယ်ဖြင့် ပြုလုပ်ဖန်တီးခဲ့ပါတယ်။

▪️ အောက်ဆီဂျင်ဓာတ်ငွေ့ အေးမြလာပြီး ဘေးနားက ဟိုက်ဒရိုဂျင်နဲ့ ပေါင်းစည်းပြီး ရေဖြစ်လာတာ သုတေသီများ တွေ့ခဲ့ကြပါတယ်။

▪️ ရေဖြစ်ပေါ်ရာ မူလနေရာတွေက သိပ်သည်းတဲ့ မော်လီကျူးတိမ်တိုက်တွေဖြစ်ကာ ဂြိုဟ်စတင်ဖြစ်ပေါ်မှုအတွက် အရာတွေဖြစ်နိုင်တယ်လို့ ဖော်ပြထားပါတယ်။

▪️ ယင်းတို့ သရုပ်ဖော်လေ့လာချက်များအရ ရေက ပထမဆုံးဂလက်ဆီများအတွက် အရေးပါတဲ့ ပါဝင်ဖွဲ့စည်းမှု ဖြစ်နိုင်ခဲ့ဖွယ် ရှိပါတယ်။

#Source: WION

#World_Health
Published 15 March 2025

▪️ ကလေးငယ်ပေါင်း ၂ သန်းကျော်ရဲ့အသက်တွေကို ကယ်တင်နိုင်ခဲ့တဲ့ ဩစတြေးလျမှ အမျိုးသားကြီး ဂျိမ်းစ်ဟာရစ်ဆန်ဟာ အသက် ၈၈ နှစ်အရွယ်မှာ ကွယ်လွန်သွားခဲ့ပါပြီ။

▪️ ရွှေလက်ပိုင်ရှင်လို့ ခေါ်ကြတဲ့ ဟာရစ်ဆန်ဟာ ဆယ်စုနှစ် ၆ ခုကျော်အတွင်း နှစ်ပတ်တစ်ခါ သွေးရည်ကြည်လှူဒါန်းခဲ့ကာ စုစုပေါင်း အကြိမ်ရေ ၁,၁၀၀ ကျော် သွေးလှူခဲ့တာ ဖြစ်ပါတယ်။

▪️ ထိုလူသွေးလှူတာနဲ့ ပတ်သက်ပြီး အရေးပါတာက သန္ဓေသားတွေ ဝမ်းဗိုက်ထဲရှိနေစဉ် ရီဆပ်စ်ရောဂါဖြစ်ခြင်းမှ ကာကွယ်ပေးနိုင်တဲ့ ရှားပါးပဋိဇီဝပစ္စည်း သူ့မှာပါဝင်နေတာကြောင့် ဖြစ်ပါတယ်။

▪️ သူ့အသက် ၁၄ နှစ်မှာ အဆုတ်ခွဲစိတ်မှုပြုလုပ်ခဲ့ရာမှာ သွေးအများအပြား သွင်းခဲ့ရပါတယ်။

▪️ လိုအပ်တဲ့ သွေးလှူဒါန်းမှု ရရှိခဲ့တဲ့အတွက် ကျေးဇူးတင်ရှိခဲ့ကာ ထိုအချိန်ကစပြီး အသက် ၈၁ နှစ်အထိ သွေးလှူဒါန်းနေခဲ့ပါတယ်။

▪️ ဟာရစ်ဆန်ရဲ့သွေးမှာ ပါဝင်တဲ့ ရှားပါးပဋိဇီဝပစ္စည်း Anti-Dက ရီဆပ်စ်ရောဂါရှိတဲ့ ကိုယ်ဝန်ဆောင် အမျိုးသမီးတွေမှာ အသုံးပြုနိုင်ပါတယ်။

▪️ ရီဆပ်စ်ရောဂါက မိခင်အတွက် အန္တရာယ်မရှိနိုင်ပေမယ့် ပဋိဇီဝပစ္စည်းတွေက ကလေးရဲ့ သွေးဆဲလ်တွေကိုဖျက်ဆီးပစ်ကာ အသက်အန္တရာယ်အထိ ရှိနိုင်ပါတယ်။

▪️ "ဂျိမ်းစ်ဟာရစ်ဆန်က ထင်ရှားပြီးတော့ ရက်ရောတဲ့လူမျိုးဖြစ်ပြီး တစ်ကမ္ဘာလုံးက လူအများအပြားရဲ့ အသည်းနှလုံးကို သိမ်းပိုက်နိုင်ခဲ့တယ်" လို့ Lifeblood စီအီးအို စတီဖင်ကော်နယ်လီဆန်က ပြောပါတယ်။

▪️ အံ့ဩလောက်စရာ အမွေအနှစ်ကို ထားခဲ့ပြီး တစ်နေ့နေ့မှာ သူသွေးလှူတဲ့စံချိန်ကို ချိုးဖျက်နိုင်သူပေါ်လာဖို့ မျှော်လင့်ကြောင်း ပြောပါတယ်။

▪️ သူ့ဘဝသက်တမ်းတလျှောက် ဆုအများအပြားအပါအဝင် ဩစတြေးလျရဲ့ အမြင့်ဆုံးဂုဏ်ပြုဆုတံဆိပ်လည်း ရရှိခဲ့ပါတယ်။

▪️ ယခုနှစ် ဖေဖော်ဝါရီ ၁၇ ရက်နေ့ သက်ကြီးရွယ်အို စောင့်ရှောက်ဂေဟာမှာ အိပ်နေရင်း ငြိမ်းချမ်းစွာ ကွယ်လွန်သွားခဲ့ပါတယ်။

▪️ ဟာရစ်ဆန်ရဲ့ ရက်ရောလှူဒါန်းမှုကြောင့် အသက်ဆက်ရှင်နေရတဲ့ မိသားစုတွေရှိနေတာ ကြားရတဲ့အတွက် ဂုဏ်ယူနေခဲ့တယ်လို့ သမီးဖြစ်သူ ထရေစီမယ်လိုရှစ်က ပြောသွားပါတယ်။

#Source: New York Post