Published 1 June 2024

နေပြည်တော်အပါအဝင် တိုင်းဒေသကြီးနှင့် ပြည်နယ် ကိုးခုရှိ မွေးမြူရေးလုပ်ငန်းများကို ‌ချေးငွေထုတ်ချေးသွား မည်ဖြစ်ကြောင်း နေပြည်တော်မွေးမြူရေးနှင့် ကုသရေးဦးစီးဌာနက သိရသည်။

နေပြည်တော်ကောင်စီနယ်မြေ၊ ရန်ကုန်တိုင်းဒေသကြီး၊ မန္တလေး တိုင်းဒေသကြီး၊ ပဲခူးတိုင်းဒေသကြီး၊ ဧရာဝတီတိုင်းဒေသကြီး၊ မကွေး တိုင်းဒေသကြီး၊ တနင်္သာရီတိုင်းဒေသကြီး၊ ရှမ်းပြည်နယ်နှင့် မွန် ပြည်နယ်တို့ရှိ မွေးမြူရေးလုပ်ငန်းများပါဝင်ကြောင်းသိရသည်။

ယခုဇွန်လမှစတင်ကာ ၂၀၂၄-၂၀၂၅ ဘဏ္ဍာနှစ် အတွင်း ငွေကျပ် ၁၂ ဘီလီယံ ထုတ်ချေးပေးသွားမည်ဖြစ်ကြောင်း သိရသည်။

အဆိုပါဒေသများက စိစစ်ရွေးချယ်ထားသည့် အသားတိုးနွားမွေးမြူ ရေးလုပ်ငန်းများ၊ နို့စားနွားမွေးမြူရေးလုပ်ငန်းများ၊ ဥစားကြက်မွေးမြူ ရေးလုပ်ငန်းများနှင့် သိုး၊ ဆိတ် မွေးမြူရေးလုပ်ငန်းများ စသည်တို့ကို ဇွန်လမှစတင်၍ ထုတ်ချေးပေးရန် စီစဉ်ဆောင်ရွက်နေကြောင်း သိရသည်။

ယင်းချေးငွေကို နိုင်ငံ့စီးပွားမြှင့်တင်ရေးရန်ပုံငွေမှ အတိုးနှုန်း သက်သာစွာဖြင့် ထုတ်ချေးပေးမည်ဖြစ်ပြီး နို့စားနွားမွေးမြူရေး လုပ်ငန်းများကို ဦးစားပေးထုတ်ချေးပေးရန် စီစဉ်ထားကြောင်း သိရသည်။

ထို့ပြင် နို့စားနွားမွေးမြူရေးလုပ်ငန်းများကို နှစ်ရှည်ချေးငွေအဖြစ် သုံးနှစ်အထိထား၍ ချေးပေးမည်ဖြစ်ပြီး အသားတိုး နွား၊ ဥစားကြက် နှင့် သိုး၊ ဆိတ်မွေးမြူရေးလုပ်ငန်းလုပ်ကိုင်သူများကို ကာလနှစ်နှစ် သတ်မှတ်၍ ထုတ်ချေးပေးသွားရန် သတ်မှတ်ထားသည်။
Yangon_Times/LW
#Local_News
#Published 1 June 2024
#YMG #Yangon_Times #Yangon_Media_Group

Publicshed 1 June 2024

သက်တမ်းရင့်ရေနံမြေများရှိပေနက်တွင်းများအောင်မြင်စွာတူးဖော်နိုင်ရေးဆောင်ရွက်နေပြီး ၂၀၂၄-၂၀၂၅ ဘဏ္ဍာနှစ်အတွင်း ပြီးမြောက်အောင် တူးဖော်မည့် တွင်းသစ် နှစ်တွင်းသည် ရေနံထွက်ရှိရန် အတည်ပြုထားကြောင်း စွမ်းအင်ဝန်ကြီးဌာနမှ သိရသည်။

သက်တမ်းရင့်ရေနံမြေများတွင် အထွက်တိုးစေရန်အတွက် ပေနက်တွင်းများ အောင်မြင်စွာ တူးဖော်နိုင်ရေးနည်းပညာပိုင်းဆိုင်ရာများကိုဆောင်ရွက်လျှက်ရှိကြောင်းသိရသည်။

ထို့အပြင် ၂၀၂၄-၂၀၂၅ ဘဏ္ဍာနှစ်အတွင်း ပြီးမြောက်အောင် တူးဖော်မည့် တွင်းသစ် နှစ်တွင်းသည် ရေနံထွက်ရှိရန် အတည်ပြုထားပြီးဖြစ်သည့် ပေနက်သဲကြောဖြစ်၍ ရည်မှန်းချက်အနက်ထိ ရောက်ရှိအောင်တူးဖော်ပြီး သမိုင်းမှတ်တိုင်သစ်စိုက်ထူရန် ကြိုးစားရမည်ဖြစ်‌ ကြောင်းသိရသည်။

အဆိုပါ တူးဖော်မည့် တွင်းသစ်နှစ်တွင်းကို မြန်မာ့ရေနံနှင့် သဘာဝဓာတ်ငွေ့လုပ်ငန်းမှ ကိုယ်တိုင်တူးဖော်၍ MPRL E&P Companyမှ နည်းပညာနှင့် အတွေ့အကြုံများ မျှဝေကူညီပေးမည်ဖြစ်ကြောင်းသိရသည်။

စွမ်းအင်ဝန်ကြီးဌာနအနေဖြင့် နိုင်ငံတော်၏ စွမ်းအင်ဖူလုံရေးနှင့် စွမ်းအင်လုံခြုံရေးကို စီမံဆောင်ရွက်လျက်ရှိရာ သက်တမ်းရင့်ရေနံမြေများတွင် ပေနက်တွင်းများ တူးဖော်၍ ရေနံနှင့် သဘာဝဓာတ်ငွေ့ တူးဖော်ထုတ်လုပ်ရယူရခြင်းသည် အစိတ်အပိုင်း တစ်ရပ်အနေဖြင့် ပါဝင်ကြောင်းသိရသည်။
Yangon_Times/NN
#Local_News
#Published 31 May 2024
#YMG #Yangon_Times #Yangon_Media_Group

Published 01 June 2024

ရီပတ်ဘလစ်ကန် သမ္မတဟောင်း ဒေါ်နယ်ထရမ့်ကို နယူးယော့ခ်ဂျူရီတရားသူကြီး အဖွဲ့က သမိုင်းဝင်ပြစ်မှုတစ်ခုဖြင့် အပြစ်ရှိကြောင်း ပြန်လည်ဆုံးဖြတ်ပြီးနောက် သမ္မတဟောင်းကို ထောက်ခံတဲ့သူတွေက နေအိမ်အပြင်ဘက်မှာ အမေရိကန်အလံတွေကို ဇောက်ထိုးချိတ်ဆွဲထားကြပြီး ဆိုရှယ်မီဒီယာတွေမှာလည်း ဖော်ပြလာကြပါတယ်။

ရီပတ်ဘလစ်ကန် ကိုယ်စားလှယ် မာဂျရီတေလာဂရင်းနဲ့ ကန်းထရီးအဆိုတော် ဂျေဆန်အယ်လ်ဒင်းတို့လည်း အလံဇောက်ထိုး ဖော်ပြခဲ့သူတွေထဲ ပါဝင်ပါတယ်။

ဒါဟာ နှစ်ပေါင်း ၂၀၀ ကျော်အတွင်း အမေရိကမှာ ဆန္ဒပြကန့်ကွက်တဲ့ ပြယုဂ်တစ်ခု ဖြစ်လာပါတယ်။

အပြာကားမင်းသမီးတစ်ယောက်ကို နုတ်ပိတ်ခပေးတာနဲ့ ပတ်သက်ပြီး ဖုံးအုပ်ဖို့အတွက် စာရွက်စာတမ်းတုများ ပြုလုပ်တယ်ဆိုကာ ကြာသပတေးနေ့က ထရမ့်ကို အပြစ်ရှိကြောင်း ဆုံးဖြတ်ပြီးနောက် ဆိုရှယ်မီဒီယာတွေမှာ ထရမ့်ထောက်ခံသူတွေက အလံဇောက်ထိုးပုံ ဖော်ပြလာကြပါတယ်။

တရားရေးဆုံးဖြတ်ချက်ထွက်ပေါ်လာပြီး မိနစ်အနည်းငယ် အကြာမှာပဲ ထရမ့်သစ္စာခံ ဂရင်းက X ဆိုရှယ်မီဒီယာမှာ အမေရိကန်အလံကို ဇောက်ထိုးတင်ခဲ့ပြီး သောကြာနေ့မွန်းလွဲအချိန်အထိ ကြည့်ရှုသူ ၈ သန်းကျော် ရှိနေပါတယ်။

အယ်လ်ဒင်းကလည်း အလံဇောက်ထိုးပုံတင်ကာ တိုင်းပြည်အနေနဲ့ ကြောက်ရွံ့စရာ အခြေအနေကို ရင်ဆိုင်နေရကြောင်း၊ ယခုအချိန်မှာ ရဲရဲဝံ့ဝံ့ ထုတ်ဖော်ပြောဆိုသင့်ပြီဖြစ်ကြောင်း ဖော်ပြသွားပါတယ်။

ရီပတ်ဘလစ်ကန် အလှူရှင် ဒွန်တာပီယာကလည်း အရီဇိုးနားက သူ့အိမ်အပြင်ဘက်မှာ အလံဇောက်ထိုး လွှင့်ထားပါတယ်။

အင်တာနက်ပေါ်မှာ ထရမ့်ထောက်ခံသူများကြား အဓိကရုဏ်းတွေ၊ တော်လှန်ရေးတွေ၊ အကြမ်းဖက်မှုတွေ ပြုလုပ်ဖို့ တောင်းဆိုနေကြပါတယ်။

ထရမ့်ဟာ ရာဇဝတ်မှုဖြင့် စွပ်စွဲခံရတဲ့ ပထဆုံးသော သမ္မတဟောင်းဖြစ်လာပြီး ထိုတရားရေးဆုံးဖြတ်ချက်ကို အယူခံဝင်သွားမယ်လို့ ဆိုလိုက်ပါတယ်။

အမေရိကန်အလံ ဇောက်ထိုးလွှင့်တဲ့ သင်္ကေတက ၁၇၀၀ ခုနှစ်ဝန်းကျင်တွေမှာ သင်္ဘောသားများက မကျေနပ်ကြောင်း ထုတ်ဖော်ခဲ့စဥ်က ပထမဆုံးအသုံးပြုခဲ့တာ ဖြစ်ပါတယ်။

၁၈၀၀ ခုနှစ်အလယ်ပိုင်းတွေမှာ ကျွန်ပြုဆန့်ကျင်ရေး လှုပ်ရှားမှုတွေနဲ့ ၁၉၆၀ ဝန်းကျင် ဗီယက်နမ်စစ်ပွဲ ဆန့်ကျင်ရေးတို့မှာ အလံဇောက်ထိုးလွှင့်တဲ့ လုပ်ရပ်များ ပြုလုပ်ခဲ့ကြကြောင်း ကိုလံဘီယာတက္ကသိုလ်မှ ပရော်ဖက်ဆာ တင်မိုသီနက်ဖ်တာလီက ပြောပြသွားပါတယ်။
Source: Reuters
#World_News
#Published 01 June 2024
#YMG #Yangon_Times #Yangon_Media_Group

Published 1 June 2024

လေထုညစ်ညမ်းခြင်းနဲ့ ကိုယ်ဝန်ဆောင်များကြား ဆက်စပ်နေပြီး မွေးဖွားလာတဲ့ ကလေးရဲ့ ကိုယ်အလေးချိန် ကျဆင်းပုံတို့ကို ဟီဘရူးတက္ကသိုလ် ဟာဒါဆာဘရွန် ပြည်သူ့ကျန်းမာရေးကျောင်းမှ ရောဂါဗေဒကျွမ်းကျင်သူများက ဆန်းစစ်ဖော်ပြလာကြပါတယ်။

ကိုယ်ဝန်ဆောင်ချိန်မှာ လေထုညစ်ညမ်းမှု အတိုင်းအတာ PM2.5 ထိတွေ့ခြင်းနဲ့ မွေးဖွားလာတဲ့ ကလေးကိုယ်အလေးချိန် ကျဆင်းခြင်းတို့ကြား ဆက်စပ်မှုကို လေ့လာခဲ့ကြတာ ဖြစ်ပါတယ်။

လေထုအခြေအနေက သန္ဓေသားဖွံ့ဖြိုးမှုအပေါ် သက်ရောက်နေကာ လေထုညစ်ညမ်းခြင်းကို ထိန်းချုပ်ဖို့ အရေးတကြီး လိုအပ်နေကြောင်းကို အလေးပေးဖော်ပြလာပါတယ်။

ညစ်ညမ်းရတဲ့ အဓိကအကြောင်းအရင်းတွေက သယ်ယူပို့ဆောင်ရေးနဲ့ စက်မှုလုပ်ငန်းတွေကနေ ထွက်လာတဲ့ အမှုန်အမွှားများနဲ့ သက်ဆိုင်နေပါတယ်။

ကလေးမွေးဖွားချိန်မှာ ကိုယ်အလေးချိန် နည်းပါးခြင်းက နောက်ပိုင်းမှာ ကျန်းမာရေးပြဿနာများ ဝင်ရောက်လာနိုင်ပြီး နှလုံးရောဂါ၊ ဆီးချို၊ ဖွံ့ဖြိုးမှုပိုင်းချို့ယွင်းမှုများ ဖြစ်လာနိုင်ပါတယ်။

၂၀၂၄ မှာ အစ္စရေးလ်ရဲ့ အချို့နေရာတွေမှာ လေထုညစ်ညမ်းမှု အခြေအနေ လျော့နည်းလာကြောင်း မှတ်တမ်းတင်ရရှိခဲ့ပြီး ဒီမတိုင်ခင် မီးသတ်ဌာနက ရိုးရာမီးပုံပွဲတွေကို သတ်မှတ်ထားတဲ့ နေရာတွေမှာသာ ပြုလုပ်ဖို့ အမိန့်ထုတ်ခဲ့ပါတယ်။

ပတ်ဝန်းကျင်မှာ ကျန်းမာရေးနဲ့ ညီညွတ်မယ့် အလေ့အထတွေ ထိန်းသိမ်းပြုကျင့်ဖို့ ပတ်ဝန်းကျင်ပညာရှင်များက တိုက်တွန်းထားပါတယ်။

အစ္စရေးလ်လိုနိုင်ငံမှာ ရိုးရာမီးပုံပွဲတွေ ပြုလုပ်လေ့ရှိပြီး ထိုအစား မိသားစုလိုက် လမ်းလျှောက်ထွက်ဖို့ကို ကျန်းမာရေးဝန်ကြီးဌာနက တိုက်တွန်းလိုက်ပါတယ်။
Source: The Jerusalem Post.
#World_Health
#Published 1 June 2024
#YMG #Yangon_Times #Yangon_Media_Group

Published 1 June 2024

အမျိုးသမီးတစ်ဦးရဲ့ တင်ပါးကြွက်သားထဲမှာ ၃ နှစ်ကျော်လောက် စိုက်ဝင်နေတဲ့ အပ်ချုပ်အပ်ကို ဒေလီမြို့ ဆာဂမ်ဂါရမ်ဆေးရုံမှ ဆရာဝန်များက အောင်မြင်စွာ ဖယ်ထုတ်နိုင်ခဲ့ပါတယ်။

လူနာဟာ ၂၀၂၁ တုန်း အပ်ပေါ် မတော်တဆလဲကျခဲ့ပြီးနောက် နေမထိထိုင်မသာဖြစ်နေပြီး နာကျင်မှု ခံစားနေခဲ့ရပါတယ်။

တစ်ရက်မှာ လူနာက အပ်ချုပ်နေရင်း အပ်ကို ကုတင်ပေါ်မှာ ခဏထားခဲ့ပါတယ်။

မတ်တပ်ထပြီး တစ်ခုခုယူပြီးနောက် ချော်လဲကာ ကုတင်ပေါ်သို့ကျပြီး စူးရှတဲ့ခံစားမှု ခံစားလိုက်ရပါတယ်။

အပ်က တဝက်ကျိုးသွားပြီး နောက်ရက်တွေအထိ ကျန်တဲ့အပ်တပိုင်းကို ရှာခဲ့ပေမယ့် မတွေ့ခဲ့ပါဘူး။

အခန်းထဲက တစ်နေရာရာမှာ ကျသွားလိမ့်မယ်လို့ ထင်နေခဲ့ပြီး တင်ပါးက နာကျင်မှုကလည်း ပိုပိုဆိုးလာတယ်လို့ လူနာက ပြန်ပြောပြပါတယ်။

၃ နှစ်အတွင်း ဆရာဝန်အများအပြားနဲ့ ပြသခဲ့ပေမယ့် ပြဿနာရင်းမြစ်ကို မသိရှိကြပါဘူး။

မကြာသေးမီ ဓာတ်မှန်ရိုက်ခဲ့ရာမှ ပျောက်နေတဲ့ အပ်ချောင်းက တင်ပါးမှာ စိုက်ဝင်နေခဲ့တာကို သိရှိခဲ့ကြပါတယ်။

ဖယ်ရှားဖို့ ဆုံးဖြတ်ပြီး ခွဲစိတ်ဆရာဝန်တွေနဲ့ တိုင်ပင်ခဲ့ပေမယ့် အပ်ဝင်နေတဲ့ ဒဏ်ရာအနက်နဲ့ အနီးနား အာရုံကြောများမှ သွေးထွက်လာမှာကို စိုးရိမ်ပြီး ငြင်းပယ်ခဲ့ကြပါတယ်။

နောက်ဆုံးမှာတော့ ဆာဂမ်ဂါရမ်ဆေးရုံ အထွေထွေခွဲစိတ်ဌာနမှ ဒေါက်တာ တာရန်မစ်တယ်လ်နဲ့ တွေ့ဆုံခဲ့ပြီး သေချာကြည့်ရှုစစ်ဆေးပြီးနောက် အလွန်ရှုပ်ထွေးတဲ့ ခွဲစိတ်မှုကို ပြုလုပ်ရန် စီစဥ်ခဲ့ကြပါတယ်။

C-Arm ပုံရိပ်မြင်ကိရိယာဖြင့် ကြွက်သားတစ်ရှူးများ ကြားထဲက အပ်ကို နေရာတိကျစွာ တွေ့ရှိခဲ့ကြပါတယ်။

အန္တရာယ်တွေကြားထဲကပဲ ခွဲစိတ်ပြီးနောက် စိုက်ဝင်နေတဲ့ အပ်အပိုင်းအစကို အောင်မြင်စွာ ဖယ်ထုတ်နိုင်ခဲ့ပါတယ်။

ဒေါက်တာ မစ်တယ်လ်၊ ဒေါက်တာ အာရှစ်ဒီး၊ ဒေါက်တာ အန်မိုလ်အာဟူဂျာ၊ ဒေါက်တာ တာနူရှရီး၊ ဒေါက်တာ ကာသစ်တို့က ခွဲစိတ်ပေးခဲ့တာ ဖြစ်ပါတယ်။

ဆရာဝန်တွေက ကျွမ်းကျွမ်းကျင်ကျင်ဖြင့် ဇွဲရှိရှိခွဲစိတ်ပေးတဲ့အတွက် ကျေးဇူးတင်ရှိပါတယ်လို့ လူနာက ပြောဆိုသွားပါတယ်။
Source: India Today
#World_News
#Published 1 June 2024
#YMG #Yangon_Times #Yangon_Media_Group

ရုရှားနဲ့ ယူကရိန်းတို့ကြား အီလက်ထရွန်နစ်စစ်ရေး ပြင်းထန်လာတာနဲ့ အမေရိကန်ထောက်ပံ့ လက်နက်များရဲ့ ပစ်ခတ်တိကျမှုစွမ်းရည်ကို နှောင့်နှေးစေပြီး ယူကရိန်းကတော့ ရုရှားဒရုန်းတွေကို တန်ပြန်နိုင်ရန်အတွက် ယင်းတို့ရဲ့ အီလက်ထရွန်နစ်စစ်ပွဲကို မြှင့်တင်နေရကြောင်း မီဒီယာများက ဖော်ပြထားပါတယ်။
#World_News
#Published 31 May 2024
#YMG #Yangon_Times #Yangon_Media_Group

#Daily_News
Published_ 31 May 2024

၁။ ကမ္ဘာ့ဖလားခြေစစ်ပွဲ ဂျပန်-မြန်မာပွဲစဉ် သုဝဏ္ဏဘောလုံးကွင်းနှင့် ရုပ်သံလိုင်း၌ ကြည့်ရူနိုင်

၂။ ပြည်တွင်းဝယ်လိုအား ရှိနေသည့်အတွက် ကြက်သွန်ဖြူဈေး ဆက်လက်မြင့်တတ်နိုင်

၃။ ဓာတ်ဆီနှင့် ဒီဇယ်ဈေးများ ကျဆင်း

၄။ အမေရိကန်ထောက်ပံ့လက်နက်များ၏ ထိရောက်မှုကျဆင်းလာသဖြင့် အီလက်ထရွန်နစ်စစ်ပွဲကို ယူကရိန်းအားထားလာ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Daily_News #Yangon_Times #Yangon_Media_Group #TV Yangon Times

Published 31 May 2024

လွန်ခဲ့သော(၂၄)နာရီအတွင်း  အနောက်တောင်မုတ်သုံလေသည် မြန်မာနိုင်ငံတစ်ဝန်းလုံးသို့ ဝင်ရောက်ခဲ့ပြီးဖြစ်ကြောင်းမေလ(၃၁)ရက်၌ မိုးလေဝသနှင့်ဇလဗေဒညွှန်ကြားမှုဦးစီးဌာနမှ ထုတ်ပြန်လိုက်သည်။

မုတ်သုံလေသည်အားအသင့်အတင့်မှ အားကောင်းနေပြီးမေလ(၃၁)ရက်ညနေပိုင်းမှာတော့မကွေးတိုင်းဒေသကြီး၊ ချင်းပြည်နယ်နှင့် ရခိုင်ပြည်နယ်တို့တွင် နေရာကွက်ကျား၊ နေပြည်တော်၊ စစ်ကိုင်းတိုင်းဒေသကြီးအောက်ပိုင်း၊ မန္တလေးတိုင်း‌ဒေသကြီး၊ ရှမ်းပြည်နယ်နှင့် ကယားပြည်နယ်တို့တွင် နေရာကျဲကျဲ၊ စစ်ကိုင်းတိုင်းဒေသကြီးအထက်ပိုင်း၊ ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီးနှင့် ကချင် ပြည်နယ်တို့တွင် နေရာစိပ်စိပ်နှင့် ကျန်တိုင်းဒေသကြီးနှင့် ပြည်နယ်တို့တွင် နေရာအနှံ့အပြား မိုးထစ်ချုန်းရွာပြီး၊ တနင်္သာရီ တိုင်းဒေသကြီး၊ ရခိုင်ပြည်နယ်နှင့် မွန်ပြည်နယ်တို့တွင် နေရာကွက်၍ မိုးကြီးနိုင်သည်ဟုဆိုသည်။

နောက်(၂)ရက် ‌ဇွန်(၁)ရက်နှင့် (၂)ရက်အတွက်ခန့်မှန်းချက် အနေဖြင့် ကချင်၊ချင်း၊စစ်ကိုင်းစသည့်မြန်မာနိုင်ငံမြောက်ပိုင်းဒေသများတွင် ထစ်ချုန်းမည့်အခြေအနေများ ဆက်လက် ဖြစ်ပေါ် နေမည်ဖြစ်ကြောင်း သိရသည်။

မိုးတိမ်တောင်ဖြစ်ပေါ်မှုအခြေ အနေအဖြစ်စစ်ကိုင်းတိုင်းဒေသကြီးအောက်ပိုင်း၊ မန္တလေးတိုင်း‌ဒေသကြီးနှင့် ဧရာဝတီတိုင်း ဒေသကြီးတို့တွင် မိုးတိမ်တောင်များ ဖြစ်ထွန်းမှု အားကောင်းလျက်ရှိပြီး အဆိုပါ မိုးတိမ်တောင်များ ရွေ့လျားရာ နေရာ တစ်လျှောက်တွင် မိုးရွာသွန်းခြင်းနှင့်အတူ လေပြင်းတိုက်ခတ်ခြင်း၊  မိုးထစ်ချုန်းခြင်း၊  မိုးကြိုးပစ်ခြင်း၊  လျှပ်စီးလက်ခြင်း နှင့် မိုးသီးကြွေခြင်းစသည့် မိုးလေဝသဖြစ်စဉ်များ ဖြစ်ပေါ်နိုင်ပါသဖြင့် ကြိုတင်သတိပြုနိုင်ပါရန် အကြံပြုထားသည်။

မုတ္တမကွေ့၊ မွန်-တနင်္သာရီကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့တွင် တစ်ခါတစ်ရံ မိုးသက်လေပြင်းများကျရောက်ပြီး လှိုင်းအသင့်အတင့်မှ လှိုင်းကြီးနိုင်ကြောင်း သိရသည်။
Yangon_Times/tthl
#Local_News
#Published 31 May 2024
#YMG #Yangon_Times #Yangon_Media_Group

Publicshed 31 May 2024

အများပြည်သူများသုံးစွဲရန်မသင့်သည့် ဆေးဝါး ၁၄ မျိုးကိုစစ်ဆေးတွေ့ရှိရကြောင်း  အစားအသောက်နှင့်ဆေးဝါးကွပ်ကဲရေး ဦးစီးဌာနက FDA  အသိပေး ထုတ်ပြန် လိုက်ကြောင်းသိရသည်။

အဆိုပါ အရည်အသွေး၊ အာနိသင်၊ ဘေးအန္တရာယ်အာမခံချက်မရှိသည့်အပြင်  ဆေးဝါးမှတ်ပုံတင်မရှိသော ဆေးဝါး ၁၄ မျိုးကို ဈေးကွက်အတွင်း ရောင်းချနေသည်ကိုတွေ့ရှိရ‌ေသာ ကြောင့် အများပြည်သူများ  သတိပြုရန်နှင့် သုံးစွဲမှုရှောင်ရှားရန် အတွက် မှတ်ပုံတင်ရှိသည့် ဆေးဝါးနှင့် တရားမဝင်ဆေးဝါးများကို ဓာတ်ပုံများနှင့် တကွ FDAက အသိပေးထုတ်ပြန်ထားခြင်းဖြစ်သည်။

FDAသည်  ဈေးကွက်အတွင်းရှိ ဆေးဝါးများ ကို ပုံမှန်စစ်ဆေး ရာတွင်  ယခုကဲ့သို့တွေ့ရှိရကြောင်း၊ အဆိုပါ  ဆေးဝါး ၁၄ မျိုး၏ ဓာတ်ပုံများတွင်  တရားဝင်တင်သွင်းထားသည့်  ဆေးဘူးနှင့် ဆေးကဒ်များမှာ မြန်မာနိုင်ငံဆေးဝါးမှတ်ပုံတင်အမှတ်များ  ဖော်ပြပါ ရှိပြီး စာသားများ မှာလည်း အင်္ဂလိပ် ဘာသာများဖြင့် ဖော်ပြထား‌ကြောင်းသိရသည်။

ယခုစစ်ဆေးတွေ့ရှိရသည့်တရားမဝင် တင်သွင်းထားသည့်  ဆေးဘူးနှင့် ဆေးကဒ်များမှာ  မြန်မာနိုင်ငံ ဆေးဝါးမှတ်ပုံတင်အမှတ်များ  မပါရှိသကဲ့သို့  စာသားများမှာလည်း တူရကီဘာသာ များဖြင့် ဖော်ပြထား ကြောင်း သိရသည်။
Yangon_Times/NN
#Local_News
#Published 31 May 2024
#YMG #Yangon_Times #Yangon_Media_Group

31 May 2024

နိုင်ငံခြားငွေကြေးဈေးကွက်တွင် ပို့ကုန်သွင်းကုန်လုပ်ငန်းရှင်များအား Online Trading Platform မှတစ်ဆင့် အမေရိကန်ဒေါ်လာ (၅) သန်း နှင့် တရုတ်ယွမ် (၅) သန်းထပ်မံရောင်းချပေးမည်ဖြစ်ကြောင်း  မြန်မာနိုင်ငံတော်ဗဟိုဘဏ်မှ မေလ(၃၁)ရက်၌ ထုတ်ပြန်လိုက်သည်။

ပြီးခဲ့သည့် မေလ(၂၀)ရက်၌လည်းမြန်မာနိုင်ငံတော်ဗဟိုဘဏ်အနေဖြင့်  နိုင်ငံခြားငွေကြေးဈေးကွက်တွင် ပို့ကုန်သွင်းကုန်လုပ်ငန်းရှင်များအား Online Trading Platform မှတစ်ဆင့် တရုတ်ယွမ် ၁၀ သန်း ရောင်းချပေးခဲ့သေးသည်။

မြန်မာနိုင်ငံတော်ဗဟိုဘဏ်အနေဖြင့် (၉-၅-၂၀၂၄) ရက်နေ့တွင်လည်း နိုင်ငံခြားငွေကြေးဈေးကွက်တွင် ပို့ကုန်သွင်းကုန်လုပ်ငန်းရှင်များအား Online Trading Platform မှတစ်ဆင့် အမေရိကန်ဒေါ်လာ ၅ သန်း ရောင်းချပေးကြောင်းနှင့်

 (၇-၅-၂၀၂၄) ရက်နေ့တွင် နိုင်ငံခြားငွေကြေးဈေးကွက်တွင် ပို့ကုန်သွင်းကုန်လုပ်ငန်းရှင်များအား Online Trading Platform မှတစ်ဆင့် တရုတ်ယွမ် ၂.၅ သန်း၊

 (၂-၅-၂၀၂၄) ရက်နေ့၊ နိုင်ငံခြားငွေကြေးဈေး ကွက် တွင် ပို့ကုန်သွင်းကုန်လုပ်ငန်းရှင်များအား Online Trading Platform မှတစ်ဆင့် တရုတ်ယွမ် ၅ သန်း နှင့်ထိုင်းဘတ် သန်း ၃၀ ရောင်းချပေးခဲ့ကြောင်း ထုတ်ပြန်ထားသည်။

ဗဟိုဘဏ်အနေဖြင့် ပို့ကုန်သွင်းကုန်လုပ်ငန်းရှင်များအတွက် Online Trading Platform မှတဆင့် ဒေါ်လာ၊ တရုတ်ယွမ်နှင့် ထိုင်းဘတ်များကို ဖေဖော်ဝါရီ (၂) ရက်မှစတင်၍ ရောင်းချပေးနေပြီးနိုင်ငံခြားငွေပမာဏ ဒေါ်လာ (၃၁) သန်း၊ တရုတ်ယွမ် (၃၁. ၅) သန်းနှင့် ထိုင်းဘတ် (၁၉၆) သန်းခန့် ‌ရောင်းချပေးထားပြီးဖြစ်ကြောင်း  သိရသည်။
Yangon_Times/tthl
#Local_News
#Published 31 May 2024
#YMG #Yangon_Times #Yangon_Media_Group

ကိုရီးယားရောက် မြန်မာနိုင်ငံသား တွေရဲ့ နိုင်ငံကူးလက်မှတ်သက်တမ်းတိုးခြင်းကို မြန်မာသံရုံးကနေ လူကိုယ်တိုင်ရက်ချိန်းယူတဲ့စနစ်နဲ့ ဆောင်ရွက်ပေးလျက်ရှိရာမှာ လာမယ့်ဇူလိုင်လ ၂၂ရက် က စပြီး online appoint ment စနစ် နဲ့သာ ပြောင်းလဲဆောင်ရွက်ပေးတော့မယ်လို့ မြန်မာသံရုံး ဆိုလ်းမြို့ က မေလ ၃၁ရက် မှာ ကြေညာလိုက်ပါတယ်။
Yangon_Times/LW
#Local_News
#Published 31 May 2024
#YMG #Yangon_Times #Yangon_Media_Group

ဧည့်မထဆန် တစ်ပြည် ၃၀၀၀ ကျပ်နှုန်းဖြင့် မြန်မာနိုင်ငံဆန်စပါးအသင်းချုပ်ကမြို့နယ် (၁၈)မြို့နယ်က ဆန်ဆိုင်(၅၈)ဆိုင်မှာရောင်းပေး နေပါတယ်။ (မြန်မာနိုင်ငံဆန်စပါးအသင်းချုပ်)
ဧည့်မထဆန်တစ်ပြည် ၃၀၀၀ကျပ်ဖြင့် ဆန်အိတ်(၆၀)ရောင်းချပေးခဲ့ပြီး ထပ်‌ရောက်လာရင် ထပ်‌ရောင်းပေးဖို့ရှိပါတယ်။ (မြောက်ဒဂုံရှိဆန်ဆိုင်)
Yangon_Times/tthl
#Local_News
#Published 31 May 2024
#YMG #Yangon_Times #Yangon_Media_Group