#LocalNews
Published - 5 Mar 2022

ရှမ်းပြည်နယ်၊နမ္မတူမြို့နယ်အတွင်းမှာ ဖြစ်ပွားခဲ့တဲ့တိုက်ပွဲတွေကြောင့် ဒေခံတွေရဲ့ နေအိမ်တွေပျက်စီးဆုံးရှုးခဲ့ရပြီး လိုအပ်နေတဲ့နေထိုင်ရေးအတွက် အိမ်သစ်ဆောက်လုပ်ပေးခြင်းနဲ့ ဆောက်လုပ်ရေးသုံးပစ္စည်းများ ထောက်ပံ့ပေးခဲ့တယ်လို့ ICRC က သိရပါတယ်။

၂၀၂၁ ခုနှစ်မှာ တိုက်ပွဲတွေကြောင့် နမ္မတူမြို့နယ်မှ ထောင်နှင့်ချီတဲ့ရွာသားတွေရဲ့ အိုးအိမ်တွေနဲ့ သူတို့ရဲ့သက်မွေးလုပ်ငန်းတွေ ဆုံးရှုံးခဲ့ရပြီး နေအိမ်အချို့မီးလောင်ဆုံးရှုးခဲ့ရတာကြောင့် ICRC အနေနဲ့ ရပ်ရွာလူထုတွေနဲ့အတူ ရွာနှစ်ရွာမှာ အိမ်အသစ် ၁၈ လုံး ဆောက်လုပ်ကူညီပေးခဲ့ပြီး တခြားရွာသုံးရွာက မိသားစု ၉၇ စုအတွက် အိမ်ဆောက်ပစ္စည်းတွေ ထောက်ပံ့ခဲ့တယ်လို့ သိရပါတယ်။

”မိသားစုတွေ လျှပ်စစ်မီးသုံးစွဲနိုင်ဖို့ အိမ်သုံးဆိုလာပြားတွေ ထောက်ပံ့ပေးပြီး ရေအရင်းအမြစ်တွေကို ထိန်းသိမ်းပြုပြင်ဖို့လည်း ကူညီပေးနေပါတယ်” လို့ အိုင်စီအာရ်စီရဲ့ အင်ဂျင်နီယာတစ်ဦးဖြစ်သူ ဒေါ်နန်းဇာခြည်ထွန်းက ပြောပါတယ်။

"အခြားအရေးတကြီး လိုအပ်ချက်တွေသိနိုင်ဖို့ ရပ်ရွာအသိုက်အဝန်းတွေနဲ့ ကျေးရွာကော်မတီတွေနဲ့အတူ အနီးကပ်လုပ်ဆောင်နေပါတယ်။"လို့ ဒေါ်နန်းဇာခြည်ထွန်းကဆက်လက်ပြောကြားပါတယ်။

ဖေဖေါ်ဝါရီလမှာ ဆောက်လုပ်ပြီးစီးဖို့ဖြစ်ပေမယ့်လည်း ပဋိပက္ခဒဏ်ခံစားနေရတဲ့ ရပ်ရွာအသိုက်အ၀န်းတွေအတွက် ပြန်လည်ထူထောင်ရေးနဲ့ အခြေအနေတွေကိုကြံ့ကြံ့ခံနိုင်ဖို့ အမြဲတမ်းဆက်လက်ပံ့ပိုးနေမယ်လို့ ICRCက ထုတ်ပြန်ထားပါတယ်။

yng/hm
#Yangon_Media_Group

#LocalNews
Published - 5 March 2022

နိုင်ငံရေးပါတီ ၈၁ ပါတီရဲ့ နိုင်ငံရေးဆိုင်ရာ အချက်အလက်များကို စစ်ဆေးပြီးပြီလို့ ပြည်ထောင်စုရွေးကောက်ပွဲကော်မရှင်က ထုတ်ပြန်ထားပါတယ်။

နိုင်ငံရေးပါတီများရဲ့ ပါတီဝင်အင်အား၊ ပါတီပိုင်ရန်ပုံငွေနဲ့ ပစ္စည်းများစုဆောင်ခြင်း၊ ထိန်းသိမ်းခြင်း၊ သုံးစွဲခြင်း၊ စစ်ဆေးခြင်းနဲ့ စာရင်းရှင်းလင်းဖျက်သိမ်းခြင်း၊ ပါတီဆိုင်ရာလုပ်ငန်းများကို စနစ်တကျဆောင်ရွက်ထားခြင်း ရှိ၊ မရှိတို့ကို စစ်ဆေးတာတွေ UEC အနေနဲ့ လုပ်ဆောင်နေပါတယ်။

စစ်ဆေးခဲ့ရာမှာ ကချင်ပြည်နယ်အခြေစိုက်ပါတီ ငါးပါတီ၊ ကရင်ပြည်နယ်အခြေစိုက်ပါတီ နှစ်ပါတီ၊ စစ်ကိုင်းတိုင်းဒေသကြီး အခြေစိုက်ပါတီ နှစ်ပါတီ၊ တနင်္သာရီတိုင်းဒေသကြီး အခြေစိုက်ပါတီ တစ်ပါတီ၊ ပဲခူးတိုင်းဒေသကြီး အခြေစိုပါတီ သုံးပါတီတို့ ဖြစ်ပါတယ်။

ဒ့ါအပြင် မန္တလေးတိုင်းဒေသကြီး အခြေစိုက်ပါတီ ၃၆ ပါတီ၊ ရှမ်းပြည်နယ်အခြေစိုက် ပါတီ ၁၅ ပါတီ၊ ဧရာဝတီတိုင်းဒေသကြီး အခြေစိုက်ပါတီနဲ့ ပြည်ထောင်စုနယ်မြေအခြေစိုက်ပါတီ လေးပါတီ စုစုပေါင်း နိုင်ငံရေးပါတီ ၈၁ ပါတီကို စစ်ဆေးခဲ့ပြီးပြီလို့ ဆိုပါတယ်။

ဆက်လက်ပြီး မတ်လ ၇ ရက်နေ့ကနေ ၁၁ ရက်နေ့အထိ ရန်ကုန်တိုင်းအခြေစိုက်ပါတီဖြစ်တဲ့ မြန်မာ့လူ့ဘောင်သစ် ဒီမိုကရက်တစ်ပါတီ၊ လူ့ဘောင်သစ်ဒီမိုကရက်တစ်ပါတီနဲ့ ကရင်မျိုးပါတီတို့ကို စစ်ဆေးခံနိုင်ဖို့ အကြောင်းကြားထားတယ်လို့ သိရပါတယ်။

မတ်လ ၁၀ ရက်နေ့မှ ၁၂ ရက်အထိ ရခိုင်ပြည်နယ်အခြေစိုက်ပါတီ ဖြစ်တဲ့ ရခိုင်ဒီမိုကရေစီအဖွဲချုပ်ပါတီနဲ့ ချင်းပြည်နယ်အခြေစိုက်ပါတီဖြစ်တဲ့ ခူမီး(ခမီး)အမျိုးသားပါတီတို့ကို ရခိုင်ပြည်နယ်တွင်လည်းကောင်း၊ ချင်းပြည်နယ်အခြေစိုက်ပါတီဖြစ်တဲ့ တိုင်းရင်းသားလူမျိုးစုများဖွံ့ဖြိုးရေးပါတီနဲ့ ရန်ကုန်တိုင်းဒေသကြီး အခြေစိုက်ပါတီဖြစ်တဲ့ ဇိုမီးဒီမိုကရေစီအဖွဲ့ချုပ်ပါတီတို့ကို ချင်းပြည်နယ်တွင်လည်းကောင်း စစ်ဆေးခံနိုင်ဖို့ အကြောင်းကြားထားတယ်လို့ ထုတ်ပြန်ထားပါတယ်။

ymg/ei
#Yangon_Media_Group

#DailyNews
Published - 5 Mar 2022

၁။ မြန်မာနိုင်ငံသို့ အာဆီယံအထူးကိုယ်စားလှယ် လာရောက်ပါက တွေ့ဆုံနိုင်ရန် PPST အဖွဲ့ဝင်တစ်ခုချင်းစီတက်ရောက်နိုင်ရေး နစက အကြောင်းကြား

၂။ ရခိုင်ပြည်နယ်က စစ်တွေ ပြည်တော်သာ-ရေချမ်းပြင် ရထားလမ်းပိုင်းကို မတ်လအတွင်း ပြေးဆွဲမည်

၃။ မိုးလေဝသ သတင်း

၄။ တူရကီတွင်ငွေကြေးဖောင်းပွမှုဖြစ်ပေါ်နေမှုကြောင့် အိမ်ငှားခများအဆမတန်မြင့်တက်.......အစရှိတဲ့သတင်းတွေကိုတင်ဆက်ပေးသွားမှာပဲဖြစ်ပါတယ်။

#Yangon_Media_Group

#LocalNews
Published - 5 Mar 2022

ကိုယ်ဝန်ဆောင်သည်တွေအနေနဲ့ ကိုဗစ်ကာကွယ်ဆေးကို မပျက်မကွက်ထိုးနှံကြဖို့ ကျန်းမာရေးပညာရှင် ဒေါက်တာခင်ခင်ကြီး တိုက်တွန်းပြောကြားလိုက်ပါတယ်။

ကိုယ်ဝန်ဆောင်တွေ ကိုဗစ်ကာကွယ်ဆေးထိုးရန်လိုအပ်ပြီး နို့တိုက်မိခင်တွေလဲ ကာကွယ်ဆေးထိုးလို့ရကြောင်းနှင့် ကာကွယ်ဆေးထိုးခြင်းကြောင့် အန္တရာယ်မရှိကြောင်း သုတေသနများစွာက ပြဆိုပြီးဖြစ်တယ်လို့လည်း ဒေါက်တာခင်ခင်ကြီးက ဆိုပါတယ်။

"WHO, CDC ကလည်းကာကွယ်ဆေးထိုးရန် တိုက်တွန်းထားပါတယ်။ ကာကွယ်ဆေးမထိုးမိပါက ဖြစ်ပေါ်လာမည့်အန္တရာယ်က မိခင်အတွက်ရော ကလေးငယ်အတွက်ရော များစွာဆိုးကျိုးဖြစ်စေပါတယ်။

ဒါ့ကြောင့်ကာကွယ်ဆေးကို ထိုးဖြစ်အောင်ထိုးဖို့ တိုက်တွန်းအပ်ပါတယ်။"လို့ ဒေါက်တာ ခင်ခင်ကြီးက သူရဲ့ လူမှုကွန်ရက် ဖေ့ဘုတ်စာမျက်နှာကနေတစ်ဆင့် အသိပေးရေးသားခဲ့တာဖြစ်ပါတယ်။

ကျန်းမာရေးဝန်ကြီးဌာနအနေနဲ့လည်း ကိုဗစ်-၁၉ ရောဂါကာကွယ်ထိန်းချုပ်ဖို့ ကာကွယ်ဆေးရာနှုန်းပြည့်ထိုးနှံကြဖို့ကိုလည်း တိုက်တွန်းထားတာပါ။

ဒါ့အပြင် ကိုဗစ်-၁၉ ရောဂါ ကာကွယ်ထိန်းချုပ်ရေးအတွက် တိုင်းဒေသကြီး/ပြည်နယ်များတွင် ကိုဗစ်-၁၉ ရောဂါကာကွယ်ဆေးကို ဦးတည်အုပ်စုများသတ်မှတ်၍ ထိုးနှံပေးလျက်ရှိရာ ၂၀၂၂ ခုနှစ်၊ မတ်လ ၃ ရက်နေ့အထိ လူဦးရေ စုစုပေါင်း(၂၃,၆၅၂,၄၃၂)ဦးအား ထိုးနှံပေးပြီးဖြစ်၍ ကာကွယ်ဆေးနှစ်ကြိမ် အပြည့်ထိုးနှံပြီးစီးသူ (၂၁,၀၃၃,၄၃၆)ဦးနှင့် ပထမအကြိမ်ထိုးနှံပြီးစီးသူ (၂,၆၁၈,၉၉၆)ဦး ရှိပြီဖြစ် တယ်လို့ သိရပါတယ်။

ထို့ကြောင့် အဆိုပါရက်နေ့အထိ မြန်မာနိုင်ငံတွင် ကိုဗစ်-၁၉ ရောဂါကာကွယ်ဆေး အကြိမ်ရေ စုစုပေါင်း (၄၄,၆၈၅,၈၆၈)ကြိမ်အား ထိုးနှံပေးခဲ့ပြီးဖြစ်တယ်လို့လည်း ကျန်းမာရေးဝန်ကြီးဌာန၏ နောက်ဆုံးထုတ်ပြန်ထားသော အချက်အလက်များအရ သိရပါတယ်။

ဒါ့အပြင် ယနေ့အထိ မြန်မာနိုင်ငံတွင် ဓာတ်ခွဲနမူနာစုစုပေါင်း(၇,၂၁၂,၉၀၁)ခုအား စစ်ဆေးခဲ့ပြီး အဆိုပါစစ်ဆေးမှုရလဒ်အရ ကိုဗစ် ၁၉ ဓာတ်ခွဲအတည်ပြုလူနာ စုစုပေါင်း(၅၉၅,၈၂၁)ဦး ရှိခဲ့ပြီဖြစ်ပါတယ်။

ထို့အပြင် ယနေ့အထိ (၅၄၄,၀၅၆)ဦးက ဆေးရုံဆင်းခွင့်ရရှိခဲ့ပြီးဖြစ်သလို ကိုဗစ် ၁၉ ရောဂါဖြင့် သေဆုံးသူ စုစုပေါင်းက(၁၉,၃၈၃)ဦး ရှိခဲ့တယ်လို့လည်း ကျန်းမာရေးဝန်ကြီးဌာန၏ သတင်းထုတ်ပြန်မှုအရ သိရပါတယ်။

Photo - Internet

ymg/kg
#Yangon_Media_Group

Published 5 March 2022

ယူကရိန်သမ္မတ ဗိုလိုဒီမာ ဇီလင်စကီးက  သူ့နိုင်ငံအပေါ် လေယာဉ်မပျံသန်းရဇုန်သတ်မှတ်ဖို့ ငြင်းဆန်လိုက်တဲ့အတွက် နေတိုးအဖွဲ့ကို ပြင်းထန်စွာ ဝေဖန်လိုက်ပါတယ်။ အနောက်နိုင်ငံတွေရဲ့မဟာမိတ်စစ်တပ်တွေဟာ ရှရှားရဲ့ နောက်ထပ် ကျူးကျော်လာမှုတွေကို ဖြစ်နိုင်ဖွယ်ရှိတာကိုသိထားတယ်။ ဒီနေ့ကျင်းပတဲ့ နေတိုးထိပ်သီးအစည်းအဝေးဟာ ပျော့ညံ့တဲ့ စိတ်ရှုပ်စရာကောင်းတဲ့ အစည်းအဝေးပဲလို့ သူကပြောသွားပါတယ်။ အခုကစပြီး နောက်သေဆုံးကြမယ့် ပြည်သူတွေဟာ ခင်ဗျားတို့ကြေင့်ပဲလို့ သူက ဒေါသတကြီးဝေဖန်သွားတာဖြစ်ပါတယ်။

Source AFP

#LocalNews
Published - 5 Mar 2022

မောင်တောတွင် နယ်စပ်ခြံစည်းရိုးမှတဆင့် တရားမဝင်ခိုးဝင်လာသူများဖမ်းဆီးရမိခဲ့ကြောင်း မောင်တောမြို့နယ်ရဲတပ်ဖွဲ့ကသိရပါတယ်။

ဖြစ်စဥ်မှာမတ်လ ၄ ရက်နေ့ နေလည်ပိုင်းက မောင်တောမြို့နယ်၊ လှဖိုးခေါင်ကင်းစခန်းစစ်ဆေးရေးဂိတ်တွင် ပူးပေါင်းအဖွဲ့ဝင်များမှ စစ်ဆေးမှုများဆောင်ရွက်နေစဉ် လမ်းလျှောက်လာသော ဘင်္ဂါလီကျား ၁ ဦး၊ မ ၁ ဦး၊ ကလေး(ကျား) ၂ ဦးတို့အား မသင်္ကာသဖြင့် စစ်ဆေးမှုများ ပြုလုပ်ခဲ့ရာ ၎င်းတို့မှာ တစ်ဖက်ဘင်္ဂလားဒေ့ရှ်နိုင်ငံဘက်မှတဆင့် နှစ်နိုင်ငံနယ်စပ်ခြံစည်းရိုးအား ဖြတ်ကျော်ကာ တရားမဝင်ပြန်လည်ဝင်ရောက်လာသူများဖြစ်ကြောင်း စစ်ဆေးပေါ်ပေါက်ခဲ့ကြောင်း သိရပါတယ်။

ထို့အပြင် ယင်းနေ့တွင် မောင်တောမြို့နယ်၊ သရက်အုပ်ကျေးရွာအတွင်း လုံခြုံရေးအဖွဲ့ဝင်များမှ လှည့်ကင်းဆောင်ရွက်နေစဉ် ၎င်းရွာအနီး ပုဇွန်ကန်တာဘောင်ပေါ်တွင် ဟူဆောန်အာမတ်(ဘ) အဘူကာလင်၊ ၂၃ နှစ်၊ ဘင်္ဂါလီ/ အစ္စလာမ်အား တွေ့ရှိဖမ်းဆီးရမိခဲ့သဖြင့် စစ်ဆေးမေးမြန်းခဲ့ရာ တစ်ဖက်ဘင်္ဂလားဒေ့ရှ်နိုင်ငံဘက်မှတဆင့် နယ်စပ်ခြံစည်းရိုးအားဖြတ်ကျော်ကာ တရားမဝင်ပြန်လည်ဝင်ရောက်လာသူဖြစ်ကြောင်း စစ်ဆေးပေါ်ပေါက်ခဲ့တာကြောင့် ဖမ်းဆီးရမိတရားခံများအား ဥပဒေနဲ့အညီ အမှုဖွင့်အရေးယူနိုင်ရေးဆောင်ရွက်လျက်ရှိတယ်လို့ သိရပါတယ်။

ymg/hm
#Yangon_Media_Group

#LocalNews
Published - 5 March 2022

ပြည်ထောင်စုအဆင့်ပုဂ္ဂိုလ်များနဲ့ တိုင်းဒေသကြီး၊ ပြည်နယ်အဆင့် ပုဂ္ဂိုလ်များကို စက်သုံးဆီသုံးစွဲခွင့်နှုန်းထားများ ဧပြီလမှ စတင်ပြီး လျှော့ချသုံးစွဲမယ်လို့ နစက ဒုတိယဥက္ကဋ္ဌက နေပြည်တော်မှာ ကျင်းပတဲ့ ၂၀၂၂ - ၂၀၂၃ ဘဏ္ဍရေားနှစ်အတွက် ပြည်ထောင်စုရဲ့ အရအသုံးခန့်မှန်းခြေ ငွေစာရင်းဆိုင်ရာ အစည်းအဝေးမှာ ပြောဆိုခဲ့တာပါ။

“အစိုးရက ခံစားခွင့်ပြုထားတဲ့ လူပုဂ္ဂိုလ်တွေဟာ အဆောင်အယောင်များဆိုင်ရာ ဥပဒေအရ ခံစားခွင့်ပြုထားတဲ့ မော်တော်ယာဉ်များရဲ့ စက်သုံးဆီသုံးစွဲခွင့်ပြုနှုန်းထားတွေကိုလည်း လက်ရှိနိုင်ငံတော်ရဲ့ ရငွေပိုင်းအခြေအနေအရ ခြိုးခြံချွေတာရေးအရ ၂၀၂၂ ခုနှစ် ဧပြီလမှ စတင်ပြီး လျှော့ချသုံးစွဲကြမယ်”လို့ ဒုတိယ ဥက္ကဋ္ဌက ပြောပါတယ်။

၂၀၂၂-၂၀၂၃ ဘဏ္ဍာရေးနှစ် စက်သုံးဆီနဲ့ ပတ်သတ်ပြီး ဌာန၊ အဖွဲ့အစည်းတွေက ဝန်ထမ်းရာထူး အဆင့်အလိုက် သတ်မှတ်လျာထားတဲ့ စက်သုံးဆီ၊ အုပ်ချုပ်မှုသုံးနဲ့ လုပ်ငန်းသုံးယာဉ်တွေအတွက် လျာထားတဲ့ စက်သုံးဆီအရေအတွက် ဂါလန်တွေဟာ ယခင် ဘဏ္ဍာနှစ်နဲ့ နှိုင်းယှဉ်မယ်ဆိုရင် များစွာလျော့နည်းသတ်မှတ်ထားတယ်လို့ ဆိုပါတယ်။

စက်သုံးဆီတွေကို ပြည်ပမှ ဝယ်ယူတင်သွင်းနေရတဲ့အတွက် နိုင်ငံခြားငွေသုံးစွဲမှုလျော့နည်းစေဖို့ အသုံးစရိတ်လျှော့ချနိုင်ဖို့ စက်သုံးဆီသုံးစွဲမှုနဲ့ပတ်သက်ပြီး အသုံးစရိတ်လျှော့ချနိုင်ဖို့ စီစဉ်နေတာဖြစ်တယ်လို့ သိရပါတယ်။

ymg/ei
#Yangon_Meida_Group

#LocalNews
Published - 5 Mar 2022

ပဲခူးတိုင်းဒေသကြီး၊ ပဲခူးမြို့နယ်၊ ကျွန်းသာယာရပ်ကွက်၊ နယ်မြေ(၆)၊ စက်လမ်းနှင့်ပွင့်သစ်လမ်းထောင့်တွင် မီးလောင်မှုဖြစ်စဥ်တစ်ခု ဒီကနေ့ မတ်လ ၅ ရက်၊ နံနက် ၃ နာရီ ၅ မိနစ် အချိန်ခန့်မှာ ဖြစ်ပွားခဲ့တယ်လို့ သိရပါတယ်။

အဆိုပါ မီးလောင်မှုကို ပဲခူးတိုင်းဒေသကြီး မီးသတ်ဦးစီးမှူးရုံးမှ အုပ်ချုပ်မှုယာဉ်(၁)စီး၊ မီးငြှိမ်းသတ်ယာဉ်(၂)စီး၊ မီးသတ်ရေသယ်ယာဉ်(၁)စီး၊ ပဲခူးခရိုင်မီးသတ်စခန်းမှ အုပ်ချုပ်မှုယာဉ်(၁)စီး၊ မီးသတ်ရေသယ်ယာဉ်(၃)စီး၊ ပဲခူးမြို့နယ်မီးသတ်စခန်းမှ မီးငြှိမ်းသတ်ယာဉ် (၃)စီး၊ ပဲခူးနယ်မြေမီးသတ်စခန်းမှ မီးသတ်ရေသယ်ယာဉ်(၂)စီးတို့ဖြင့် သွားရောက်ငြှိမ်းသတ်ခဲ့ရတယ်လို့ သိရပါတယ်။

ယင်းမီးလောင်မှုကို နံနက် ၃ နာရီ ၅၅ မိနစ်အချိန်ခန့်တွင် ငြိမ်းသတ်နိုင်ခဲ့ပြီး မီးလောင်မှု အကြောင်းအရင်းအသေးစိတ်ကိုတော့ မီးသတ်တပ်ဖွဲ့က စုံစမ်းစစ်ဆေးလျက်ရှိပါတယ်။

အဆိုပါ မီးလောင်မှုကြောင့် လူထိခိုက်ဒဏ်ရာရမှုတော့မရှိခဲ့ဘူးလို့ သိရပါတယ်။

Photo - MFSD

ymg/kg
#Yangon_Media_Group

#WorldHealth
Published - 05 March 2022
Johnson & Johnson (J&J) ကိုဗစ်ကာကွယ်ဆေးထိုးထားတဲ့သူတွေရဲ့ ဆေးရုံတက်ကုသခံယူမှုနှုန်းဟာ ဖိုင်ဇာ-ဘိုင်အိုတက်ခ်ကာကွယ်ဆေး ထိုးထားတဲ့သူတွေထက် ၅ ဆပိုများကြောင်း ပြင်သစ်မှလေ့လာမှုကြီးတစ်ခုမှာ ဖော်ပြထားပါတယ်။

အဆိုပါစမ်းသပ်မှုတွင် စမ်းသပ်ခံသူ ၇ သန်းနီးပါးပါဝင်ကာ လူတဝက်လောက်က ဖိုင်ဇာ-ဘိုင်အိုတက်ခ်ကာကွယ်ဆေး ၂ ကြိမ်ထိုးနှံထားသူတွေဖြစ်ပြီး နောက်တဝက်ကတော့ တစ်ကြိမ်တည်းထိုးရတဲ့ J&J ကိုဗစ်ကာကွယ်ဆေးထိုးထားသူတွေဖြစ်ပြီး အားလုံးရဲ့ပျမ်းမျှအသက်က ၆၆ နှစ်ရှိပါတယ်။

စမ်းသပ်ခံသူတဝက်ခန့်က ကိုဗစ်ကာကွယ်ဆေးအကြိမ်ရေအပြည့်ထိုးပြီးသည်မှာ အနည်းဆုံး ၆ ပတ်ရှိနေတဲ့အချိန်မှာ J&J ကာကွယ်ဆေးထိုးထားသူတွေထဲက ၁၂၉ ဦးက ဆေးရုံတက်ကုသခံယူခဲ့ရကာ ဖိုင်ဇာ-ဘိုင်အိုတက်ခ်ထိုးထားသူတွေထဲကတော့ ၂၃ ဦးသာ ဆေးရုံတက်ကုသခံယူခဲ့ရကြောင်း သုတေသီတွေက JAMA Network Open ဂျာနယ်မှာ ဗုဒ္ဓဟူးနေ့ကဖော်ပြခဲ့ပါတယ်။

ရရှိလာတဲ့အချက်အလက်တွေအရ ဖိုင်ဇာ-ဘိုင်အိုတက်ခ်ကာကွယ်ဆေးရဲ့ ဆေးရုံတက်ကုသခံယူမှုကာကွယ်နိုင်စွမ်းက ၉၂ ရာခိုင်နှုန်းရှိပြီး J&J ကာကွယ်ဆေးကတော့ ၅၉ ရာခိုင်နှုန်းကာကွယ်ပေးနိုင်မယ်လို့ ခန့်မှန်းထားကြပါတယ်။

"ဒီတွေ့ရှိချက်တွေအရ J&J ကာကွယ်ဆေးအရင်ထိုးထားတဲ့သူတွေမှာ mRNA ကာကွယ်ဆေးတစ်မျိုးမျိုးကို အားမြှင့်ကာကွယ်ဆေး(booster)အဖြစ် ထိုးသင့်ကြောင်း ခိုင်မာတဲ့အထောက်အထားတွေဖြစ်ပါတယ်" လို့ အဆုံးသတ်မှာဖော်ပြထားပါတယ်။

#WorldPolitics
Published 05 March 2022

ရည်ရွယ်ချက်ရှိရှိဖြင့် သတင်းမှားထုတ်ပြန်ဖော်ပြခြင်းအတွက် ထောင်ဒဏ် ၁၅ နှစ်အထိ အပြစ်ပေးလို့ရတဲ့ဥပဒေတစ်ခုကို ရုရှားသမ္မတ'ဗလာဒီမီယာပူတင်'က သတ်မှတ်ပြဌာန်းလိုက်ပြီးနောက် ရုရှားနိုင်ငံမှာရှိတဲ့ BBC, CNN, Bloomberg သတင်းဌာနတွေဟာ လုပ်ငန်းလုပ်ဆောင်မှုရပ်ဆိုင်းလိုက်ပြီဖြစ်ပါတယ်။

အဆိုပါသတင်းမှားတိုက်ဖျက်ရေးဥပဒေအသစ်ကို သောကြာနေ့က အတည်ပြုထုတ်ပြန်ပြီးတဲ့နောက် CNN က ရုရှားနိုင်ငံအတွင်းရှိ သူတို့ရဲ့ရုပ်သံထုတ်လွှင့်မှုတွေကို ရပ်တန့်ထားမှာဖြစ်ပြီး နောက်ထပ်ဆောင်ရွက်ရမယ့်ကိစ္စတွေနဲ့ အခြေအနေတွေကို အကဲဖြတ်သုံးသပ်သွားမှာဖြစ်ကြောင်း ပြောကြားလိုက်ပါတယ်။

အမေရိကန်ဘီလျံနာ'မိုက်ကယ်ဘလွန်းဘာ့ဂ်'တည်ထောင်ထားတဲ့ Bloomberg သတင်းဌာနကလည်း ရုရှားနိုင်ငံမှာရှိတဲ့ ဂျာနယ်လစ်တွေကို ယာယီအလုပ်ရပ်နားထားခိုင်းပြီး ရုရှားနိုင်ငံဟာ သတင်းမီဒီယာလွတ်လပ်ခွင့်ကို ချိုးဖောက်နေတယ်လို့ စွပ်စွဲလိုက်ပါတယ်။

သတင်းမှားထုတ်ပြန်ခြင်းကို နှိမ်နင်းအရေးယူနေခြင်းက နိုင်ငံတွင်းရှိ ပုံမှန်သတင်းမှန်ဖော်ပြရေးလုပ်ငန်းစဉ်တွေ ဆက်လက်ဆောင်ရွက်လို့မရတော့ကြောင်း ပြောဆိုလိုက်ပါတယ်။

ဒါ့အပြင် ယူကေအခြေစိုက် BBC သတင်းဌာနကလည်း အဆိုပါဥပဒေဟာ သတင်းမီဒီယာလွတ်လပ်ခွင့်ကို အရေးယူဖို့ထုတ်ပြန်လိုက်တာဖြစ်ကြောင်း၊ ရုရှားဘာသာစကားဖြင့် ဖော်ပြထားတဲ့သတင်းတွေကိုလည်း ရုရှားနိုင်ငံပြင်ပကသာ ဆက်လက်ဆောင်ရွက်သွားမှာဖြစ်ကြောင်း ကြေညာလိုက်ပါတယ်။

သတင်းမီဒီယာဥပဒေအသစ်အရ ရုရှား-ယူကရိန်းစစ်ရေးပဋိပက္ခနဲ့ပတ်သက်ပြီး ရုရှားနိုင်ငံတော်လုံခြုံရေးကိုထိပါးစေတဲ့ သတင်းမှားတွေကို တမင်တကာထုတ်ပြန်ဖော်ပြနေသည်ဟုတွေ့ရှိပါက ထောင်ဒဏ် ၁၅ နှစ်ချမှတ်သွားမှာဖြစ်ပါတယ်။

ရုရှားစစ်တပ်ကို ဂုဏ်သိက္ခာကျဆင်းအောင် ပြုလုပ်သည်ဟုတွေ့ရှိပါက ဒေါ်လာ ၁၃,၅၀၀ ဒဏ်ကြေး သို့မဟုတ် ထောင်ဒဏ် ၃ နှစ်ချမှတ်မှာဖြစ်ပြီး ရုရှားဆန့်ကျင်ရေးဒဏ်ခတ်ပိတ်ဆို့မှုများပြုလုပ်ဖို့ တောင်းဆိုပါက ဒေါ်လာ ၅,၀၀၀ ဒဏ်ကြေးရိုက်သွားမှာဖြစ်ပါတယ်။

ရုရှားဖက်ဒရယ်အောက်လွှတ်တော်ဥက္ကဌ 'ဗျာချက်စ်လက်ဗ်ဗိုလိုဒင်'က ဒီလိုဥပဒေထုတ်ပြန်ရခြင်းဟာ ရုရှားတပ်ဖွဲ့တွေနဲ့ အမှန်တရားကိုကာကွယ်ဖို့ဖြစ်ကြောင်း၊ ဝါရှင်တန်ကချုပ်ကိုင်ထားတဲ့ အမေရိကန်သတင်းဌာနတွေက ရုရှားတို့နဲ့စစ်ပွဲစတင်ဖို့ သတင်းတွေထုတ်ပြန်နေကြောင်း၊ သတင်းမှားထုတ်ပြန်မှုကိုတားဆီးနိုင်ရန်အတွက် ဥပဒေထုတ်ပြန်ဖို့ဆုံးဖြတ်ခဲ့တာဖြစ်ကြောင်း တုန့်ပြန်ပြောကြားလိုက်ပါတယ်။

ယူကရိန်းကို အထူးစစ်ဆင်ရေးဖြင့်တိုက်ခိုက်ရတဲ့ရည်ရွယ်ချက်က ရုရှားအသိအမှတ်ပြုဒွန်ဘက်စ်ဒေသနှစ်ခုမှ ပြည်သူတွေကိုကာကွယ်နိုင်ရန်အကြောင်းပြချက်ဖြင့် ယူကရိန်းနိုင်ငံအတွင်း စစ်ရေးအချက်အခြာနေရာများနဲ့ နာဇီဝါဒလွှမ်းမိုးမှုတွေကို ချေမှုန်းဖို့ဖြစ်ပါတယ်။

ယူကရိန်းဘက်က တုန့်ပြန်ဖြေကြားရာမှာ ဒိုနက်စ်နဲ့လူဟန့်စ်ဒေသတို့ကို အင်အားသုံးပြန်လည်သိမ်းပိုက်ဖို့ အစီအစဉ်မရှိသလို ရုရှားတို့ကျူးကျော်တိုက်ခိုက်လာတာကလည်း အကြောင်းမဲ့တိုက်ခိုက်ခြင်းဖြစ်ကြောင်း ဆိုပါတယ်။

၂၀၁၃ ခုနှစ် ယူကရိန်းတော်လှန်ရေးကာလမှာ အစိုးရအားဖြုတ်ချပစ်ခဲ့ပြီး ၂၀၁၄ ခုနှစ်မှာတော့ အဆိုပါဒေသနှစ်ခုဟာ ယူကရိန်းကနေခွဲထွက်သွားကာ အဲဒီအချိန်ကတည်းက နှစ်ရှည်လများတိုက်ခိုက်မှုတွေ ဖြစ်ပွားနေခဲ့တာဖြစ်ပါတယ်။

Source: RT/Agencies
#Yangon_Media_Group

#WorldHealth
Published - 05 March 2022
ကိုဗစ်နောက်ဆက်တွဲလက္ခဏာခံစားနေရသူအရေအတွက် စံချိန်တင်မြင့်မားလာပြီး ယူကေရှိလူပေါင်း ၁ သန်းနီးပါးဟာ ကိုဗစ်နောက်ဆက်တွဲဝေဒနာတွေကြောင့် နေ့စဉ်ဘဝနေထိုင်လှုပ်ရှားမှုတွေမှာပါ ထိခိုက်လာစေတယ်လို့ အကြောင်းကြားလာကြပါတယ်။

ဇန်နဝါရီ ၃၁ ရက်နေ့အထိ စုစုပေါင်းရက်သတ္တပတ် ၄ ပတ်အတွင်း ကိုဗစ်နောက်ဆက်တွဲလက္ခဏာခံစားနေရသူ ၁.၅၂ သန်းမျှရှိနိုင်ကြောင်း နိုင်ငံတော်စာရင်းအင်းရုံး(ONS)မှ ခန့်မှန်းဖော်ပြလိုက်ပြီး ဒီမတိုင်ခင် ၁ လတုန်းက လူပေါင်း ၁.၃၃ သန်းခန့်ရှိရာကနေ ၁၅ ရာခိုင်နှုန်းမြင့်တက်လာတဲ့အနေအထား ဖြစ်ပါတယ်။

အဆိုပါလူပေါင်း ၆၈၅,၀၀၀ ဦးဟာ အနည်းဆုံးလွန်ခဲ့တဲ့တစ်နှစ်ခန့်က ကိုဗစ်ရောဂါကိုပထမဆုံးကူးစက်ခံခဲ့ရသူတွေဖြစ်ပါတယ်။ကိုဗစ်နောက်ဆက်တွဲလက္ခဏာတွေကြောင့် လူပေါင်း ၉၈၉,၀၀၀ ရဲ့ နေ့စဉ်နေထိုင်ဘဝတွေကို ဆိုးဆိုးရွားရွားထိခိုက်နေတယ်လို့ ခန့်မှန်းရပါတယ်။

အဲဒီထဲကမှ လူဦးရေ ၃ ပုံ ၂ ပုံဟာ နောက်ဆက်တွဲလက္ခဏာပေါ်ပေါက်ကြောင်း အကြောင်းကြားခဲ့ကြပါတယ်။ထိုထဲမှ လူပေါင်း ၂၈၁,၀၀၀ ဦးက သူတို့ရဲ့နေ့စဉ်ဆောင်ရွက်ချက်တွေကို လုပ်ကိုင်ရာမှာ အခက်အခဲရှိလာကြောင်း အကြောင်းကြားထားကြောင်း ONS က ဖော်ပြလိုက်ပါတယ်။

မောပန်းနွမ်းနယ်ခြင်းဝေဒနာက အဖြစ်အများဆုံးလက္ခဏာဖြစ်နေပြီး နောက်ဆက်တွဲလက္ခဏာခံစားရကြောင်း သတင်းပေးပို့သူတွေထဲက ၅၁ ရာခိုင်နှုန်းလောက်က မောပန်းနွမ်းနယ်ခြင်းခံစားခဲ့ရပါတယ်။

အသက်ရှူရခက်ခဲခြင်းဝေဒနာခံစားရသူက ၃၅ ရာခိုင်နှုန်း၊ အနံ့အာရုံပျောက်ဆုံးသူက ၃၄ ရာခိုင်နှုန်း၊ အရသာအာရုံပျောက်ဆုံးသူနဲ့ အာရုံစူးစိုက်မှုလျော့နည်းခြင်းခံစားရသူတို့က ၂၅ ရာခိုင်နှုန်း အသီးသီးရှိပါတယ်။

ကိုဗစ်နောက်ဆက်တွဲလက္ခဏာခံစားနေရသူ ၁.၅၂ သန်းထဲမှ ၁.၁ သန်းက လက္ခဏာမပေါ်ပေါက်ခင် ရှေ့ ၁၂ ပတ်လောက်က ကိုရိုနာဗိုင်းရပ်စ်ကို ပထမဆုံးကူးစက်ခံခဲ့ရသူတွေဖြစ်ပါတယ်။

ကိုဗစ်နောက်ဆက်တွဲလက္ခဏာခံစားရနိုင်ချေအများဆုံးသူတွေက အသက် ၃၅ မှ ၄၉ နှစ်ကြားလူတွေ၊ အမျိုးသမီးတွေ၊ ပိုမိုဆင်းရဲချို့တဲ့နေရာတွေမှာ နေထိုင်ရတဲ့သူတွေ၊ ပညာရေးကဏ္ဍ လူမှုစောင့်ရှောက်ရေးနဲ့ ကျန်းမာရေးကဏ္ဍများမှ လုပ်သားဝန်ထမ်းတွေ၊ ရောဂါဝေဒနာအခံရှိသူတွေနဲ့ မသန်မစွမ်းသူတွေပါဝင်ပါတယ်။

ONS ရဲ့ခန့်မှန်းဖော်ပြချက်တွေဟာ ဇန်နဝါရီ ၃၁ ရက်နေ့အထိ နောက်ဆုံး ၄ ပတ်အတွင်း ကိုယ်ပိုင်အိမ်ထောင်စုများမှ ကိုယ်စားပြုသူတွေရဲ့ ကိုဗစ်နောက်ဆက်တွဲလက္ခဏာခံစားရမှုတွေကို အခြေခံထားတာဖြစ်ပါတယ်။

ကိုဗစ်နောက်ဆက်တွဲလက္ခဏာတွေဟာ ကိုရိုနာဗိုင်းရပ်စ်ပထမဆုံးအကြိမ်ကူးစက်ခံရပြီး ရက်သတ္တပတ် ၄ ပတ်ကျော်ကြာတဲ့အထိ လက္ခဏာဝေဒနာခံစားနေရခြင်းကို ဆိုလိုတာဖြစ်ပြီး ဒီလိုလက္ခဏာတွေပေါ်ပေါက်လာရတဲ့ အကြောင်းအရင်းကို မရှင်းပြနိုင်ကြသေးပါဘူး။
#Yangon_Media_Group

#WorldArchaeology
Published 04 March 2022

အီရတ်မြို့တော်ဘဂ္ဂဒက်ရှိ လူစည်ကားရာဒေသတစ်ခုမှာ ဝင်ပေါက်နားက ဟီဘရူးဘာသာစကားနဲ့ရေးထားတဲ့ ကမ္ဗည်းစာကလွဲပြီး အုတ်ဖြင့်ဆောက်လုပ်ထားတဲ့ အဆောက်အအုံအတုအယောင်တွေကို ခွဲခြားသိရှိဖို့ခက်ခဲပါတယ်။

#Yangon_Media_Group