#WorldHealth
Published - 07 March 2022
ကိုဗစ်ရောဂါဖြစ်ပွားစေတဲ့ အိုမီခရွန်မျိုးဗီဇကွဲက ရာသီအလိုက်ဖြစ်ပွားတတ်တဲ့ တုပ်ကွေးရောဂါထက် ပိုပြီးအန္တရာယ်များကြောင်း ဂျပန်သုတေသီတွေက သတိပေးလိုက်ပါတယ်။

ကပ်ရောဂါထိန်းချုပ်ကန့်သတ်ချက်တွေကို ဖြေလျှော့ဖို့ စောလွန်းသေးကြောင်း၊ ဗိုင်းရပ်စ်ကြောင့် ကျန်းမာရေးအန္တရာယ်တွေဖြစ်လာနိုင်ကြောင်း အထူးသတိပေးခဲ့ပါတယ်။

ဂျပန်နိုင်ငံအတွင်း အိုမီခရွန်မျိုးဗီဇကွဲကြောင့် ရောဂါကူးစက်မှုနှုန်းနဲ့ယှဉ်ရင် အသက်သေဆုံးမှုနှုန်းက ဝ.၁၃ ရာခိုင်နှုန်းရှိနေကြောင်း နိုင်ငံတော်ကျန်းမာရေးဝန်ကြီးအတိုင်ပင်ခံ သိပ္ပံပညာရှင်များက သုံးသပ်ထားပါတယ်။

ပြီးခဲ့တဲ့ကူးစက်မှုလှိုင်းတုန်းက သေဆုံးမှုနှုန်း ၄.၂၅ ရာခိုင်နှုန်းနဲ့ယှဉ်ရင် အခုကူးစက်မှုလှိုင်းက သေဆုံးမှုနှုန်းနည်းနေပေမယ့် ရာသီတုပ်ကွေးကြောင့် အသက်သေဆုံးမှုနှုန်းထက်တော့ များနေတာဖြစ်ပါတယ်။

ကမ္ဘာတဝန်းကနိုင်ငံတွေမှာ နှာခေါင်းစည်းတပ်ဆင်ခြင်းကနေ ရောဂါပိုးစမ်းသပ်ခြင်းများအထိ ကိုဗစ်စည်းကမ်းတွေကို ဖြေလျှော့နေပြီဖြစ်ကာ ပုံမှန်အတိုင်းပြန်လည်နေထိုင်သွားကြဖို့ ဆောင်ရွက်နေကြပါတယ်။

လူအများစုက ကန့်သတ်ထိန်းချုပ်ချက်တွေကို စိတ်ကုန်နေပြီဖြစ်ပြီး အိုမီခရွန်က ရောဂါပြင်းထန်ခြင်းနည်းပါးတာကြောင့် စည်းမျဉ်းကန့်သတ်ချက်တွေ မလိုအပ်တော့ဘူးလို့ ယူဆလာကြပါတယ်။

ဂျပန်နိုင်ငံမှာလည်း စည်းမျဉ်းဖြေလျှော့ခြင်းတွေ သိပ်မပြုလုပ်သေးပေမယ့် ပြည်ဝင်ခွင့်ပိတ်ပင်ထားခြင်းကို ဖွင့်ပေးလိုက်ကာ ခရီးသွားဧည့်သည်တွေ၊ အရေးပါတဲ့ဝန်ထမ်းလုပ်သားတွေ၊ ရောဂါပိုးရှိသူနဲ့ထိတွေ့ရသူတွေကို ကွာရန်တင်းသတ်မှတ်ချက်အတိုင်းနေခိုင်းပြီး စီးပွားရေးမှာရှေ့ဆက်နေကြပါတယ်။

ကန့်သတ်ပိတ်ပင်ချက်အားလုံးကို တပြိုင်တည်းဖြေလျှော့ပေးလိုက်ပါက ဖြစ်လာနိုင်တဲ့အကျိုးဆက်ကို ထပ်မံလေ့လာဖို့ လိုအပ်နေသေးကြောင်း ကျန်းမာရေးဝန်ကြီးဌာနအကြံပေးအဖွဲ့မှ ဥက္ကဌဖြစ်သူဒေါက်တာ'တာကာဂျီဝါကီတာ'က ပြောကြားလိုက်ပါတယ်။

အခုလက်ရှိလေ့လာထားတဲ့ ကိန်းဂဏန်းအချက်အလက်တွေဟာ ထိန်းချုပ်ကန့်သတ်ချက်တွေ ထားရှိထားဆဲအချိန်မှာ ရယူထားတာဖြစ်ပါတယ်။

ကိုဗစ်ရောဂါနဲ့ တုပ်ကွေးရောဂါကြားမှာ အရင်က အသက်သေဆုံးမှုနှုန်းကွာခြားခဲ့ပေမယ့် အိုမီခရွန်ပေါ်ပေါက်လာချိန်မှာတော့ သိပ်ပြီးမကွာခြားတော့ဘူးလို ဒေါက်တာ'ဝါကီတာ'က ဆိုပါတယ်။
Source: The Straits Times

#Local_News
Published_ 7 March 2022

အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိျင်းရေးကော်မတီ နှင့် နိုင်ငံရေးပါတီများအစုအဖွဲ့၏ အလုပ်အဖွဲ့တို့ ယမန်နေ့နံနက်ပိုင်းတွင် နေပြည်တော်၌ တွေ့ဆုံဆွေးနွေးခဲ့ကြောင်း သိရပါတယ်။

တွေ့ဆုံပွဲတွင် အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ ဥက္ကဋ္ဌ ဒုတိယဗိုလ်ချုပ်ကြီးရာပြည့်နှင့် နိုင်ငံရေးပါတီများအစုအဖွဲ့၏ အလုပ်အဖွဲ့ခေါင်းဆောင် ရှမ်းတိုင်းရင်းသားများ ဒီမိုကရက်တစ်ပါတီဥက္ကဋ္ဌ ဦးစိုင်းအိုက်ပေါင်းတိုက နှုတ်ခွန်းဆက်အမှာစကား ပြောကြားခဲ့ကြပါတယ်။

ထို့နောက် ၂၀၂၀ အလွန် အဆင့်လိုက်လုပ်ငန်းစဉ်များနှင့် အဆင့်လိုက် အကောင် အထည်ဖော်မှုများ (ဇယား-၂) ပါ ကိစ္စရပ်များနှင့်စပ်လျဉ်း၍ နှစ်ဖက်အပြန်အလှန် ဆွေးနွေးညှိနှိုင်းကြပါတယ်။

တွေ့ဆုံပွဲသို့ နိုင်ငံတော်စီမံအုပ်ချုပ်ရေးကောင်စီအဖွဲ့ဝင်၊ အမျိုးသားစည်းလုံး ညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီဥက္ကဋ္ဌ၊ ပြည်ထောင်စု အစိုးရအဖွဲ့ရုံးဝန်ကြီးဌာန(၁) ပြည်ထောင်စုဝန်ကြီး ဒုတိယဗိုလ်ချုပ်ကြီးရာပြည့်နှင့် ကော်မတီဝင်များ၊ နိုင်ငံရေးပါတီများအစုအဖွဲ့၏ အလုပ်အဖွဲ့ခေါင်းဆောင် ရှမ်းတိုင်းရင်းသားများ ဒီမိုကရက်တစ်ပါတီဥက္ကဋ္ဌ ဦးစိုင်းအိုက်ပေါင်းနှင့် အလုပ်အဖွဲ့ ကိုယ်စားလှယ်များ တက်ရောက်ခဲ့ကြပါတယ်။

ymg_mnn
#Yangon_Media_Group

Published 7 March 2022

တိုက်ပွဲဝင်အသင့်ဖြစ်နေတဲ့ ယူကရိန်းရဲ့ လေယာဉ်တွေအားလုံးကို ဖျက်ဆီးပစ်လိုက်နိုင်တယ်လို့ ရုရှား ကာကွယ်ရေး ဝန်ကြီးဌာန ပြောရေးဆိုခွင့်ရပုဂ္ဂိုလ် အီဂိုကွန်နာရှင်ကို က မတ်(၆)ရက်ကပြောပါတယ်။ အဲဒီအပြင် ယူကရိန်းကို စစ်လေယာဉ်ထောက်ပံ့တဲ့ ဘယ်နိုင်ငံမဆို လက်နက်ကိုင်ပဋိပက္ခတစ်ခုထဲပါဝင်ပတ်သက်မှုနှင့် အဆုံးသတ်ရလိမ့်မယ်လို့လည်း သူက သတိပေးလိုက် ပါတယ်။

Source AFP/MOD-Russia

#WorldHealth
Published- 07 March 2022

SARS-CoV-2 ဗိုင်းရပ်စ်က လူ့ခန္ဓာကိုယ်ထဲသို့ဝင်ရောက်လာပြီး အဆုတ်ဆဲလ်တွေထဲရောက်တဲ့အခါ အပေါ်ယံအလွှာတစ်ခုဖြင့် ဖုံးအုပ်လိုက်တာကြောင့် ခန္ဓာကိုယ်ထဲက ပဋိပစ္စည်း(antibody)တွေရဲ့ ပစ်မှတ်ထားတိုက်ခိုက်ခြင်းကို မခံရတော့ပါဘူး။

အခုအခါသုတေသီတွေ စမ်းသပ်နေတဲ့ကိုဗစ်ကာကွယ်ဆေးက ထိုဗိုင်းရပ်စ်တွေမှာဖုံးအုပ်ထားတဲ့အလွှာကို ဖယ်ရှားလိုက်ကာ ခန္ဓာကိုယ်မှရောဂါခုခံအားစနစ် အလုပ်လုပ်နိုင်အောင် လုပ်ဆောင်ပေးဖို့ဖြစ်ပါတယ်။

ထိုကာကွယ်ဆေးကိုထုတ်လုပ်ရာမှာ သုတေသီတွေက အင်ဇိုင်းတစ်မျိုးကိုအသုံးပြုကာ အပေါ်ယံအလွှာမပါတဲ့ ကိုရိုနာဗိုင်းရပ်စ်စပိုက်ခ်ပရိုတိန်းကို ဖန်တီးခဲ့ကြတယ်လို့ ကယ်လီဖိုးနီးယားရှိ စခရစ်သုတေသနတက္ကသိုလ်မှ 'ချီဟွေဝေါင်'က ပြောကြားခဲ့ပါတယ်။

အခြားကာကွယ်ဆေးအမျိုးအစားတွေနဲ့မတူတာက ဒီကာကွယ်ဆေးက အပေါ်ယံအလွှာမဖုံးအုပ်ထားတဲ့စပိုက်ခ်ပရိုတိန်းတစ်ခုလုံးကို ခန္ဓာကိုယ်သိရှိမှတ်မိအောင်ပြုလုပ်စေပြီး ကိုရိုနာဗိုင်းရပ်စ်မျိုးဗီဇကွဲတွေကို ပိုပြီးထိရောက်စွာကာကွယ်ပေးနိုင်မှာဖြစ်ပါတယ်။

ဘာကြောင့်လဲဆိုတော့ အဆိုပါအပေါ်ယံအလွှာက မျိုးဗီဇကွဲအားလုံးမှာရှိနေတဲ့ စပိုက်ခ်ပရိုတိန်းအစိတ်အပိုင်းအဖြစ် ဟန်ဆောင်တည်ရှိနေတာကြောင့်ဖြစ်ပါတယ်။

ကြွက်တွေနဲ့စမ်းသပ်ကြည့်တဲ့အခါ ကာကွယ်ဆေးမှာပါဝင်တဲ့ အပေါ်ယံလွှာမဖုံးအုပ်ထားတဲ့ စပိုက်ခ်ပရိုတိန်းကြောင့် ခန္ဓာကိုယ်ရောဂါခုခံအားပိုမိုကောင်းမွန်စေပြီး အခြားကာကွယ်ဆေးအမျိုးအစားတွေထက် မျိုးဗီဇကွဲအမျိုးမျိုးကို ကာကွယ်ပေးနိုင်မှာဖြစ်ကြောင်း Science Translational Medicine မှာ အင်္ဂါနေ့ကဖော်ပြခဲ့ပါတယ်။

စပိုက်ခ်ပရိုတိန်းမှ ဂလိုင်ကန်အလွှာကိုဖယ်ရှားလိုက်ခြင်းဖြင့် ဆင့်ကဲပြောင်းလဲခြင်းမရှိတဲ့ပရိုတိန်းအစိတ်အပိုင်းကို ထင်ပေါ်စေတာကြောင့် SARS-CoV-2 ဗိုင်းရပ်ကွဲအမျိုးမျိုးကို ထိထိရောက်ရောက်ကာကွယ်ပေးနိုင်မယ့် ကာကွယ်ဆေးရရှိလာမှာဖြစ်ကြောင်း သုတေသီများက ထုတ်ဖော်ပြောကြားလိုက်ပါတယ်
#Yangon_Media_Group 

#local_news
Published_ 6 March 2022

ဓာတ်အားတိုးတက်ထုတ်လုပ်နိုင်ဖို့ ထပ်မံတူးဖော်တွေ့ရှိသော တွင်းသစ်နှစ်တွင်းမှ ရေအောက် သဘာဝဓာတ်ငွေ့ပိုက်လိုင်းအသစ်တွေ သွယ်တန်းရန်ရှိတဲ့အတွက် မဂ္ဂါဝပ် ၁၃၀၀ကျော်လျော့နည်းရရှိမယ့်အခြေအနေ ရှိပြီး အဲဒီရက်ပိုင်းအတွင်း အချို့နေရာတွေမှာ ၂၄နာရီ ဝန်အားလျှော့ချခြင်းတွေရှိလာမယ်လို့ သိရပါတယ်။

နိုင်ငံတော်ဓာတ်အားစနစ်သို ပို့လွှတ်လျက်ရှိသော လျှပ်စစ်ဓာတ်အားပမာဏ ရက်သတ္တပတ်တာအတွင်း လျော့နည်းထုတ်လုပ်ဖြန့်ဖြူးသွားမည့်အပေါ် ပြည်သူများသိရှိ နိုင်ရန် နစကရဲ့ လျှပ်စစ်နှင့်စွမ်းအင်ဝန်ကြီးဌာနက အသိပေးပန်ကြားချက် ထုတ်ပြန်ရာမှာ အဲဒီအချက်ကိုဖော်ပြထားခြင်းဖြစ်ပါတယ်။

လျှပ်စစ်နှင့်စွမ်းအင်ဝန်ကြီးဌာနမှ လျှပ်စစ်ဓာတ်အားထုတ်လုပ်မှုအနေဖြင့် ရေအားနှင့် နေရောင်ခြည်စွမ်းအင်သုံး ဓာတ်အားပေးစက်ရုံများမှ (၆၆၇.၈) မဂ္ဂါဝပ်ခန့်၊ ဓာတ်ငွေ့သုံး အပူစွမ်းအင်ဓာတ်အားပေးစက်ရုံများနှင့် ကျောက်မီးသွေးသုံးဓာတ်အားပေး စက်ရုံများမှ (၁၅၀၀.၃) မဂ္ဂါဝပ်ခန့်နှင့် ဒီဇယ်ဓာတ်အားပေးစက်များမှ (၈.၉) မဂ္ဂါဝပ်ခန့် စုစုပေါင်း (၂၁၇၇) မဂ္ဂါဝပ်ခန့်ကို ဓာတ်အားစနစ်သို့ ပို့လွှတ်လျက်ရှိကြောင်း သိရပါတယ်။

တစ်နိုင်ငံလုံးမှ တစ်ရက်တာပျှမ်းမျှ ရယူသုံးစွဲမှုအနေဖြင့် နေ့ဘက်တွင် အများဆုံး (၃၄၀၀) မဂ္ဂါဝပ်ခန့်၊ ညဘက်တွင် အများဆုံး (၃၆၀၀) မဂ္ဂါဝပ်ခန့်ရှိပြီး တစ်ရက်တာ ပျှမ်းမျှဓာတ်အား သုံးစွဲလိုမှုမှာ (၂၆၀၀) မဂ္ဂါဝပ်ခန့် သုံးစွဲလျက်ရှိပါကြောင်း သိရပါတယ်။

LNG ဓာတ်အားပေးစက်ရုံများရဲ့ ထုတ်လုပ်မှု (၇၅၀) မဂ္ဂါဝပ်ခန့်မှာ ဓာတ်ငွေ့ ဈေးနှုန်းမြင့်တက်နေသဖြင့် ရပ်တန့်ထားရပြီး ဘီလူးချောင်းရေအားလျှပ်စစ် ဓာတ်အား ပေးစက်ရုံမှ ၂၃၀ ကေဗွီ ဘီလူးချောင်း (၂)-ရွှေမြို ဓာတ်အားလိုင်း၊ ၂၃၀ ကေဗွီ ဘီလူး ချောင်း (၂)-တောင်ငူ ဓာတ်အားလိုင်းနှင့် ၁၃၂ ကေဗွီ ဘီလူးချောင်း (၂)-တီကျစ် ဓာတ်အား လိုင်းများမှာ ဖောက်ခွဲဖျက်ဆီးခံခဲ့ရသဖြင့် ပြင်ဆင်နိုင်ရန် ဆောင်ရွက်လျက်ရှိနေပါတယ်။

အဆိုပါ ဓာတ်အားလိုင်းသုံးလိုင်းမှ နိုင်ငံတော်ဓာတ်အားစနစ်သို ပုံမှန်ပို့လွှတ် လျက်ရှိသည့် (၂၂၀) မဂ္ဂါဝပ်ခန့်မှာ ပို့လွှတ်နိုင်ခြင်းမရှိဘဲ ဓာတ်အားပြတ်တောက်လျက်ရှိ ရာ စုစုပေါင်းဓာတ်အား ထုတ်လုပ်နိုင်မှု (၉၇၀) မဂ္ဂါဝပ်ခန့်မှာ ဆက်လက်လျော့နည်းနေ သဖြင့် အလှည့်ကျဓာတ်အားဖြန့်ဖြူးခြင်းများ ဆောင်ရွက်လျက်ရှိတယ်လို့ ဆိုပါတယ်။

ကမ်းလွန်ဓာတ်ငွေ့စီမံကိန်းများဖြစ်သော ရတနာ၊ ဇောတိကနှင့် ရွှေကမ်းလွန် စီမံကိန်းများနှင့် ကုန်တွင်းဓာတ်ငွေ့တွင်းများမှ သဘာဝဓာတ်ငွေ့ကို အသုံးပြု၍ ဓာတ်အား (၁၄၅၅) မဂ္ဂါဝပ်ခန့်ကို ထုတ်လုပ်ဖြန့်ဖြူးပေးလျက်ရှိပြီး လက်ရှိအချိန်တွင် ရွှေကမ်းလွန် စီမံကိန်း မှ တစ်ရက်လျှင် သဘာဝဓာတ်ငွေ့ကုဗပေသန်းပေါင်း (၁၃၀) သန်းကို အသုံးပြု၍ ဓာတ်အား (၆၆၈) မဂ္ဂါဝပ်ခန့်ကို ထုတ်လုပ်ဖြန့်ဖြူးပေးလျက်ရှိပါတယ်။

ရွှေကမ်းလွန်စီမံကိန်းတွင် ထပ်မံတူးဖော်တွေ့ရှိသော တွင်းသစ်နှစ်တွင်းမှ သဘာဝ ဓာတ်ငွေ့များကို လက်ရှိပိုက်လိုင်းအတွင်းသို ထည့်သွင်းပို့လွှတ်နိုင်ရန်အတွက် ရေအောက် ပိုက်လိုင်း ဆက်သွယ်ခြင်းလုပ်ငန်းများကို မတ် ၁၂ ရက်မှ ၁၈ ရက်နေ့ထိ ဆောင်ရွက်မည် ဖြစ်သောကြောင့် ဓာတ်အား (၃၃၄) မဂ္ဂါဝပ်ခန့်သာ ပိုလွှတ်ဖြန့်ဖြူးနိုင်မှာ ဖြစ်ပါတယ်။

အဲဒါကြောင့် ပိုက်လိုင်းအသစ်ချိတ်ဆက်ခြင်းလုပ်ငန်းများ ဆောင်ရွက်နေစဉ်အတွင်း လျော့နည်း သွားမယ့် ဓာတ်အားထုတ်လုပ်မှု (၃၃၄) မဂ္ဂါဝပ်ခန့်အပါအဝင် စုစုပေါင်းလျော့နည်းမယ့် (၁၃၀၄) မဂ္ဂါဝပ်ခန့်အတွက် ဝန်အားထိန်းညှိမှုအရ အချို့သောနေရာများတွင် (၂၄) နာရီ ဝန်အားလျှော့ချရခြင်းများ ဆက်လက်ဆောင်ရွက်သွားမှာ ဖြစ်ကြောင်း သိရပါတယ်။

ဖောက်ခွဲဖျက်ဆီးခံခဲ့ရသည့် ဓာတ်အားလိုင်းများကိုလည်း အမြန်ဆုံးပြင်ဆင်၍ ဘီလူးချောင်းရေအားလျှပ်စစ် ဓာတ်အားပေးစက်ရုံများမှ ထွက်ရှိသည့် (၂၂၀) မဂ္ဂါဝပ်ကို ဓာတ်အားစနစ်သို့ ပြန်လည်ပို့လွှတ်နိုင်ရေး စီမံဆောင်ရွက်နေကြောင်း သိရပါတယ်။

လျှပ်စစ်ဓာတ်အား တိုးမြှင့်ထုတ်လုပ်နိုင်ကိုလည်း စီမံဆောင်ရွက်လျက်ရှိရာ ကျောက်ဖြူ (၁၅၀) မဂ္ဂါဝပ် သဘာဝဓာတ်ငွေ့ သုံးဓာတ်အားပေးစက်ရုံသစ်မှ ဓာတ်အား (၆၀) မဂ္ဂါဝပ်ခန့်ကို ဖေဖော်ဝါရီ ၁၀ ရက်မှစတင်၍ ထပ်တိုးဖြန့်ဖြူးနိုင်ခဲ့ကာ၊ ဇွန်လမှ စတင်၍ အဆိုပါဓာတ်အားပေးစက်ရုံမှ (၁၅၀) မဂ္ဂါဝပ်ထိ ဓာတ်အားတိုးမြှင့် ထုတ်လုပ် နိုင်မှာဖြစ်ကြောင်း နစက လျှပ်စစ်နှင့်စွမ်းအင်ဝန်ကြီးဌာနက သတင်းထုတ်ပြန်ထားပါတယ်။
#ymg_mnn
Yangon_Media_Group

Published 6 March 2022

ဘိုလစ်ဗီးယားနိုင်ငံရဲ့ အကျော်ကြားဆုံး ကာနီဗယ်ပွဲတော်ဟာ အူယူရိုမြို့ရဲ့ လမ်းမတွေပေါ် ပြန်လည်ရောက်ရှိလို့လာပြီဖြစ်ပါတယ်

ကိုဗစ်-၁၉ ကပ်ဘေးကြောင့် ပြီးခဲ့တဲ့နှစ်က အဲဒီပွဲတော်ကိုဖျက်သိမ်းခဲ့ရပြီးနောက် ယခုနှစ်မှာ အပြည့်အဝ ပြန်လည်ဆင်နွှဲခွင့်ရခဲ့ပါတယ်

ညခင်း ကာနေဗယ်မှာ ရာပေါင်းများစွာသော ဂီတသမားတွေနှင့် ကချေသည်တွေဟာ မီးတုတ်တွေကထွက်လာတဲ့ အလင်းရောင်တွေဖြာနေတဲ့ အူယူမြို့လမ်းတွေပေါ်မှာ ပျော်ရွှင်ကခုန်ကြပါတယ်

ဘိုလစ်ဗီးယားရဲ့အကျော်ကြားဆုံး ညကာနေဗယ်ကို ပျော်ရွှင်စွာ ဆင်နွှဲနေကြတဲ့ မြင်ကွင်းတွေကို တင်ဆက်ပေးလိုက်ပါတယ်

Source AFP

Published 6 March 2022

စင်္ကာပူနိုင်ငံက ယူကရိန်းမှာဆက်လက်ဖြစ်ပွားနေတဲ့ မော်စကိုရဲ့ စစ်ဆင်ရေးတွေကြောင့် ရုရှားအပေါ် ပိတ်ဆို့ဒဏ်ခတ်မှု ပြုလုပ်ဖို့ ဆုံးဖြတ်ကြောင်းကြေညာခဲ့ပါတယ်။

အရေးယူပိတ်ဆို့မှုမှာ စင်္ကာပူက လက်နက်အဖြစ်အသုံးပြုလို့ရမယ့် ပစ္စည်းအမျိုးအစားတွေကို တင်ပို့မှုထိန်းချုပ်မှာဖြစ်ပြီး အချို့သောရုရှားဘဏ်တွေနှင့်  ရုရှားနှင့်ချိတ်ဆက်ငွေကြေးလွှဲပြောင်းပေးပို့မှုတွေကိုလည်းပိတ်ပင်သွားတာတွေပါဝင်ပါတယ်။

ဒါပေမယ့် ဒီပိတ်ဆို့အရေးယူမှုဟာ ရုရှားအပေါ် သက်ရောက်မှု အကန့်အသတ်ပဲရှိလိမ့်မယ်လို့ စီးပွားရေးပညာရှင်တစ်ဦးက သုံးသပ်ပါတယ်။

Source CCTV Plus

 #LocalNews
Published -6 Mar 2022

ယနေ့ နံနက်ပိုင်းက ပဲခူးတိုင်းဒေသကြီး ရန်ကုန်-မန္တလေး လမ်းဟောင်းတွင်ခရီးသည်တင်ယာဥ်နှင့် ကုန်တင်ယာဥ်တို့ မျက်နှာချင်းဆိုင်တိုက်မိရာ ယာဥ်ပေါ်ပါသူ ၂ ဦးထိခိုက်ဒဏ်ရာရရှိခဲ့တယ်လို့ သိရပါတယ်။

ဖြစ်စဥ်မှာ ယနေ့ နံနက် ၇နာရီကျော်ခန့်ကပဲခူးတိုင်းဒေသကြီးအရှေ့ အုတ်တွင်းမြို့ နယ်အုတ်ဖိုကျေးရွာအုပ်စု ချမ်းအေးသာစည်ရွာသစ်မင်းရဲလမ်းထိပ် ရန်ကုန်မန္တလေးလမ်းဟောင်းမိုင်တိုင်အမှတ် ၁၄၂မိုင်၂ဖာလုံနှင့် ၁၄၂မိုင် ၃ဖာလုံအကြားတွင် ရှမ်းပြည်တောင်ပိုင်း လဲချားမြို့ မှ ပြောင်းဆန်များတင်ဆောင်လာသော nissan diesel တွဲယာဥ်နဲ့ စစ်တောင်းအရှေ့ ခရီးသည်တင်ယာဥ်တို့ မျက်နှာချင်းဆိုင်ပွတ်တိုက်မှုဖြစ်ပွားရာ အမျိုးသမီး တစ်ဦးပေါင်ကျိုး ၊ တစ်ဦး ပါးထိုးသွင်းဒဏ်ရာ ရရှိ(မစိုးရိမ်ရ) ၂ နှစ်ဦးဒါဏ်ရာရခဲ့တယ်လို့ သိရပါတယ်။

ymg/hm
#Yangon_Media_Group