#LocalNews
Published_7 March 2022

နေပြည်တော်-စစ်တွေ ၊ စစ်တွေ-နေပြည်တော် လေယာဉ်ခရီးစဉ်ကို အခု ရက်ပိုင်းမှာ စတင်ပြေးဆွဲနေပါ။

#Yangon_Media_Group

#Local_News
Published_ 7 March 2022

ပုဂံမြို့ လောကနန္ဒာဘေးမဲ့တောဥယာဉ်မှ ကြယ်လိပ်မတစ်ကောင်သည် ၂၀၂၂ ခုနှစ် တွင် ကမ္ဘာပေါ်တွင် အကြီးဆုံးကြယ်လိပ်အဖြစ် သတ်မှတ်နိုင်ကြောင်းသိရပြီး အသက် (၂၂) နှစ်ခန့် ရှိကြောင်း MOI ကသတင်းထုတ်ပြန်ထားပါတယ်။

လောကနန္ဒာဘေးမဲ့တောဥယျာဉ်ရှိ ကမ္ဘာ့အကြီးဆုံးသတ်မှတ်ခံရသည့် ကြယ်လိပ်မကြီးမှာ လိပ်အမှတ် (၁၄၆) ၊ အတန်းအစားအနေဖြင့် အရွယ်ရောက်နေပြီဖြစ်ကာ ကျောခွံအလျား ၄၇ ဒသမ ၈ စင်တီမီတာ၊ ကျောခွံအနံ ၃၂ ဒသမ ၇ စင်တီမီတာ၊ ရင်ခွင်အလျား ၄၀ စင်တီမီတာ၊ ရင်ခွင်အနံ ၂၇ စင်တီမီတာ၊ အမြင့် ၂၅ ဒသမ ၅ စင်တီမီတာ၊ အလေးချိန် (၁၈ ကီလိုဂရမ်) ၃၉ ဒသမ ၆၉ ပေါင်ရှိပြီး ထူးခြားချက်အနေဖြင့် အပျိုကြီး ကြယ်လိပ်မ ဖြစ်ပါတယ်။

ကမ္ဘာ့ရှားပါး ကြယ်လိပ်များအား ၂၀၀၁ ခုနှစ်က တရားမဝင်ကုန်သွယ်မှုမှ ဖမ်းဆီးရမိသည့် မြန်မာ့ကြယ်လိပ် အထီး ၄၂ ကောင်၊ အမ အကောင် ၄၀ အား ပုဂံမြို့ လောကနန္ဒာ ဘေးမဲ့တောဥယျာဉ်တွင် ခြံလှောင်စနစ်ဖြင့် မွေးမြူခဲ့ပြီး မြန်မာတစ်နိုင်ငံထဲသာရှိသည့် ရှားပါးမျိုးစိတ် ကြယ်လိပ်သားပေါက်များအား နေရင်းဒေသများသို့ ပြန်လွှတ်ပေးခဲ့ကြောင်း သိရပါတယ်။

ကြယ်လိပ်များ၏ ကျောပေါ်နှစ်စဉ် ထွက်ပေါ်လာလေ့ရှိသော လိုင်းများကို ရေတွက်၍ အနီးစပ်ဆုံး သက်တမ်းအား ခန့်မှန်းထားခြင်းဖြစ်တယ်လို့ဆိုပါတယ်။

မန္တလေးတိုင်းဒေသကြီး ညောင်ဦးမြို့နယ် ပုဂံမြို့ လောကနန္ဒာ စွယ်တော်မြတ်စေတီအနီးရှိ လောကနန္ဒာဘေးမဲ့တောဥယျာဉ်တွင် ကြယ်လိပ်ကြီးအား လာရောက်လေ့လာ ကြည့်ရှုနိုင်တယ်လို့ ဆိုပါတယ်။

ကြယ်လိပ်များမှာ ပျမ်းမျှသက်တမ်း နှစ် (၈၀) ကျော်ထိ နေထိုင်နိုင်ကြပြီး ခြံလှောင်မွေးမြူရေးစနစ်တွင် (၅/၆) နှစ်တွင် အရွယ်ရောက်ကြကာ သဘာဝတောတွင် (၁၀/၁၁) နှစ်၌ အရွယ်ရောက်ကြကာ၊ အရွယ်ရောက်ကြယ်လိပ်များအား ကြယ်လိပ်များ၏ မူရင်းဒေသဖြစ်သည့် မကွေးတိုင်းဒေသကြီး မင်းဘူးခရိုင် မင်းဘူး/စကုမြို့နယ် ရွှေစက်တော်ဘေးမဲ့တောဥယျာဉ်နှင့် မန္တလေးတိုင်းဒေသကြီး မြင်းခြံခရိုင် နွားထိုးကြီးမြို့နယ် မင်းစုံတောင်တို့တွင် ပြန်လည်လွှတ်ပေးကြောင်း သိရပါတယ်။

ဓာတ်ပုံ_ ကိုထိန်(ကျောက်ပန်းတောင်း)

ymg_mnn
#Yangon_Media_Group

#LocalNews
Published_7 March 2022

ရွှေကမ်းလွန်စီမံကိန်းမှာ ထပ်မံတူးဖော်တွေ့ရှိတဲ့ တွင်းသစ်(၂)တွင်း က သဘာဝဓာတ်ငွေ့တွေကို လက်ရှိပိုက်လိုင်းအတွင်း ထည့်သွင်းပို့လွှတ်နိုင်ဖို့အတွက် ရေအောက်ပိုက်လိုင်းဆက်သွယ်တဲ့လုပ်ငန်းတွေကို ဆောင်ရွက်ရမှာဖြစ်တာကြောင့် လက်ရှိပေးဝေနေတဲ့ လျှပ်စစ်မဂ္ဂါဝပ်ထက် လျော့နည်းသွားမှာဖြစ်တယ်လို့ လျှပ်စစ်နဲ့စွမ်းအင်ဝန်ကြီးဌာနက ပြောပါတယ်။

#Yangon_Media_Group

#DailyNews
Published - 5 Mar 2022

၁။ နေပြည်တော်-စစ်တွေ လေကြောင်းလိုင်းပြေးဆွဲပြီ။

၂။ ရေအောက်လျှပ်စစ်ပိုက်လိုင်းလုပ်ငန်းများတစ်ပတ်ခန့်ကြာလုပ်ဆောင်နေစဉ် လက်ရှိလျှပ်စစ်ပေးဝေနေမှုထက် လျော့ကျသွားမည်။

၃။ နေ့စဉ်မိုးလေဝသသတင်း။

၄။ ပြည်ပမှဝယ်လိုအားလျော့ကျလာခြင်းကြောင့် တရုတ်နိုင်ငံစီးပွားရေးဖွံ့ဖြိုးမှုအားနည်းလာကာ ပြည်တွင်းထုတ်လုပ်သုံးစွဲမှုကိုအားထားလာရ.......အစရှိတဲ့သတင်းတွေကိုတင်ဆက်ပေးသွားမှာပဲဖြစ်ပါတယ်။

#Yangon_Media_Group

#LocalNews
Published - 7 March 2022

IBEC -ဆရာတော်ဒေါက်တာအရှင်သောဘိတ (အဂ္ဂမဟာသဒ္ဓမ္မဇောတိကဓဇ-ကမ္ဘာ့ငြိမ်းချမ်းရေးသံတမန်)သည် ဥရောပတိုက်နယ်သာလန် Stichting IBEC ကျောင်းတော်မှ ထိုင်းနိုင်ငံ၊ ဘန်ကောက်မြို့သို့ ငြိမ်းချမ်းရေးခရီးစဥ်အဖြစ် ဆက်လက်ကြွချီသွားပြီဖြစ်တယ်လို့ သိရပါတယ်။

ထိုင်းနိုင်ငံသို့ ငြိမ်းချမ်းရေးခရီးစဥ် ကြွချီသွားခဲ့တဲ့ IBEC -ဆရာတော်ဟာ ယနေ့ မတ်လ(၇)ရက်နေ့၊ဒေသစံတော်ချိန် နေ့လည်(၂)နာရီ(၅)မိနစ်အချိန်မှာ သုဝဏ္ဏဘူမိလေဆိပ်သို့ ရောက်ရှိခဲ့ပြီဖြစ်တယ်လို့လည်း သိရပါတယ်။

ထိုင်းနိုင်ငံတွင် ဒီကနေ့ မတ်လ ၇ ရက် နေ့မှ ၁၀ ရက် နေ့ အထိ နေထိုင်သွားမည်ဖြစ်ပြီး ထိုင်းနိုင်ငံရှိ မဟာချူလာလောင်ကွန်တက္ကသိုလ်အကြီးအကဲများဖြင့် တွေ့ဆုံဆွေးနွေးပြီး တက္ကသိုလ်နှစ်ခုကြား နားလည်မူစာချွန်လွှာ(MOU)လက်မှတ်ရေးထိုးနိုင်ရေးကိစ္စရပ်များကို ဆွေးနွေးသွားမှာဖြစ်တယ်လို့ သိရပါတယ်။

စတော့ဟုမ်းကမ္ဘာ့ငြိမ်းချမ်းရေးဆုရှင် -ကမ္ဘာ့ငြိမ်းချမ်းရေးသံတမန်ရဟန်းတော် IBEC ဆရာတော် ဒေါက်တာအရှင်သောဘိတသည် ဥ ရောပနိုင်ငံများသို့ ငြိမ်းချမ်ရေးခရီးစဥ်အဖြစ် ကြွချီနေတာဖြစ်ပြီး IBEC ဆရာတော်၏ ဥရောပတိုက်နိုင်ငံများ ငြိမ်းချမ်းရေးခရီးစဥ်ဟာ (၁)လတာ ကြာမြင့်ခဲ့တာဖြစ်ပါတယ်။

IBEC ဆရာတော်၏ ဥရောပတိုက်နိုင်ငံများ ငြိမ်းချမ်းရေးခရီးစဥ်အတွင်း မြန်မာပြည်ငြိမ်းချမ်းရေးအတွက် အာဆီယံဒေသတွင်းနှင့် ဥရောပသမဂ္ဂအတွင်း အပြုသဘောဆောင်မူပြရုပ်များကိုဆောင်ရွက်ကြရန် ငြိမ်းချမ်းရေးသတင်းစကားများကိုလည်း ပြောကြားခဲ့တာဖြစ်ပါတယ်။

ဓါတ်ပုံ - IBEC - သတင်းထုတ်ပြန်ရေးအဖွဲ့။

ymg/kg
#Yangon_Media_Group

#LocalNews
Published - 7 March 2022

ဝန်အားထိန်းညှိလျော့ချမောင်းနှင်သည့် ကာလအတွင်း အပိုင်းလိုက် အချိန်ပိုင်းအလိုက် လျှပ်စစ်ဓါတ်အားများကို ဖြန့်ဖြူးပေးမှာဖြစ်လို့ပြည်သူများအနေနဲ့ မစိုးရိမ်ကြဖို့ လျှပ်စစ်နှင့်စွမ်းအင်ဝန်ကြီးဌာနက ဒီကနေ့(မတ်လ ၇)ရက်တွင် သတင်းထုတ်ပြန် ခဲ့ပါတယ်။

လျှပ်စစ်နှင့်စွမ်းအင်ဝန်ကြီးဌာနမှ ယမန်နေ့က ထုတ်ပြန်ခဲ့သည့် အများပြည်သူသို့ပန်ကြားချက်တစ်ခုကို ထုတ်ပြန်ခဲ့တာဖြစ်ပြီး အဆိုပါ ပန်ကြားချက်တွင် ဓာတ်အားတိုးတက်ထုတ်လုပ်နိုင်ဖို့ ထပ်မံတူးဖော်တွေ့ရှိသော တွင်းသစ်နှစ်တွင်းမှ ရေအောက်သဘာဝဓာတ်ငွေ့ ပိုက်လိုင်းအသစ်တွေ သွယ်တန်းရန်ရှိတဲ့အတွက် မဂ္ဂါဝပ် ၁,၃၀၀ ကျော် လျော့နည်းရရှိမယ့်အခြေအနေရှိပြီး အဲ့ဒီရက်ပိုင်းအတွင်း အချို့နေရာတွေမှာ ၂၄ နာရီ ဝန်အားလျှော့ချခြင်းတွေရှိလာမယ်လို့ ထုတ်ပြန်ခဲ့တာပါ။

အဆိုပါ ထုတ်ပြန်ချက်အပေါ်တွင် ပြည်သူလူထု၏ ဝေဖန်ချက်မြင့်တက်လာခဲ့ပြီးနောက် ဒီကနေ့မှာ ထပ်မံ၍ ပြည်သူသို့ ပန်ကြားချက်ကို ထုတ်ပြန်ပေးခဲ့တာဖြစ်ပါတယ်။

ဒါ့အပြင် ဝန်အားထိန်းညှိလျော့ချမောင်းနှင်မည့်ကာလဖြစ်သည့် ယခု မတ်လ(၁၂)ရက် နေ့မှ (၁၈)ရက်နေ့အတွင်း အချို့သောနေရာများတွင် အပိုင်းလိုက်၊အချိန်ပိုင်းအလိုက် ဖြန့်ဖြူးပေးမည်ဖြစ်ကြောင်း ပြည်သူလူထုအနေဖြင့် စိုးရိမ်ပူပန်မှုမရှိကြပါရန် အသိပေးပန်ကြားအပ်ကြောင်း ယနေ့ထုတ်ပြန်ချက်မှာ ဖော်ပြထားတာဖြစ်ပါတယ်။

ဓါတ်ပုံ - လျှပ်စစ်နှင့်စွမ်းအင်ဝန်ကြီးဌာန။

ymg_kg
#Yangon_Media_Group

#LocalNews
Published - 7 March 2022

ရန်ကုန်အထိုင်ဈေး အခြေခံလက်ကား ရည်ညွှန်းဈေးနှုန်းအနေနဲ့ စားအုန်းဆီ တစ်ပိဿာကို အနိမ်ဆုံး ငွေကျပ် ၅,၉၄၀ မှ အမြင့်ဆုံး ၆,၅၇၅ ကျပ်ဖြစ်တယ်လို့ စားသုံးဆီတင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီက ထုတ်ပြန်ကြေညာထားပါတယ်။

ကမ္ဘာ့စားအုန်းဆီ ထုတ်လုပ်တင်ပို့တဲ့နိုင်ငံတွေမှာ စားအုန်းဆီဈေးနှုန်းတွေမြင့်တက်နေပြီး တစ်ပတ်အတွင်းဖြစ်ပေါ်ခဲ့တဲ့ FOB ဈေးနှုန်းတွေအပေါ် အခြေခံတွက်ချက်မှုတွေအရ မတ်လ ၇ ရက်မှ ၁၃ ရက်အထိ ရည်ညွှန်းဈေးကို သတ်မှတ်တာလို့ဆိုပါတယ်။

မတ်လ ၇ ရက်နေ့မှာတော့ စားအုန်းဆီ တစ်ပိဿာကို ၇,၆၅၀ ကျပ်ဖြစ်ပြီး၊ ပဲဆီ တစ်ပိဿာကိုတော့ ၈,၀၀၀ ကနေ ၈,၅၀၀ ကျပ်ဖြစ်နေပြီး ပဲဆီနဲ့ စားအုန်းဆီဈေးနှုန်းမှာ ၁,၅၀၀၊ ၂,၀၀၀ ကျပ်နီးပါးသာ ကွာခြားတာကိုတွေ့ရပါတယ်။

ယခင် ၂၀၂၀ ခုနှစ်က စားအုန်းဆီ တစ်ပိဿာကို ၂,၀၀၀ ကျပ်သာ ရှိခဲ့တာဖြစ်ပြီး ၂၀၂၁ ခုနှစ်မှာ ကျပ် ၄,၀၀၀ ကျော်ကနေ ယခုအခါမှာတော့ ၇,၀၀၀ ကျော်အထိ မြင့်တက်ခဲ့တာဖြစ်ပါတယ်။

စားအုန်းဆီထက် နေကြာဆီက ဈေးသက်သာနေတာကိုတွေ့ရပြီး နေကြာဆီတစ်ပိဿာကို ၆,၀၀၀ ကနေ ၆,၅၀၀ သာရှိတယ်လို့ ပွဲစား၊ ကုန်သည်၊ စက်ပိုင်များ မဟာကထိန်တော်အသင်း မန္တလေးမြို့ထံက သိရပါတယ်။

အခုလက်ရှိ နိုင်ငံတကာမှာ ဖြစ်ပေါ်နေတဲ့အခြေအနေအရ ကမ္ဘာ့စားအုန်းဆီ ထုတ်လုပ်တင်ပို့နေတဲ့ နိုင်ငံတွေရဲ့ စားအုန်းဆီဈေးနှုန်းတွေမှာလည်း မြင့်တက်နေပါတယ်။

မြန်မာနိုင်ငံအနေနဲ့ စားအုန်းဆီထုတ်လုပ်တင်ပို့နေတဲ့ မလေးရှားနိုင်ငံနဲ့ အင်ဒိုနီးရှားနိုင်ငံတွေကနေ ဝယ်ယူနေရတာဖြစ်ပြီး ယခင်ဘဏ္ဍာနှစ်တုန်းက စားအုန်ဆီ တန်ချိန် ၈ သိန်းကျော်ကို တန်ဖိုးငွေအားဖြင့် အမေရိကန်ဒေါ်လာ သန်း ၈၃၀ ကျော် ဝယ်ယူခဲ့ရပါတယ်။

ymg/ei
#Yangon_Media_Group

#LocalNews
Published - 7 Mar 2022

ကချင်ပြည်နယ်၊ ပူတာအိုဒေသတွင် စစ်ဘေးရှောင်ပြည်သူတွေ တိုးလာနေပြီး လက်ရှိမှာ စစ်ဘေးရှောင်ပြည်သူအရေအတွက်က ထောင်နဲ့ချီပြီးရှိနေတယ်လို့ ပူတာအိုမြို့ဒေသခံများထံမှ သိရပါတယ်။

ဒါ့အပြင် စစ်ဘေးရှောင်ပြည်သူများအတွက် လတ်တလောမှာ အရေးပေါ်အကူအညီများကိုလည်း အပူတပြင်းလိုအပ်နေပြီး စစ်ဘေး ရှောင်ပြည်သူတွေအနေနဲ့ ကတုတ်ကျင်းတွေမှာ ပုန်းခိုနေကြရသလို နီးစပ်ရာတော၊ တောင်များထဲသို့ ထွက်ပြေးတိမ်းရှောင်နေရတာဖြစ်တယ်လို့ အဆိုပါဒေသခံများက ပြောပါတယ်။

"တိုက်ပွဲတွေလည်း ဖြစ်နေသလို စစ်ဘေးရှောင်ပြည်သူတွေကလည်း တဖြေးဖြေးတိုးလာပါတယ်။ တိုက်ပွဲတွေဖြစ်နေတော့ သူတို့ရွာမှာ နေလို့မရဘူး။ နီးစပ်ရာ တောတောင်တွေထဲမှာပဲ ခိုလှုံနေကြရတယ်။ လတ်တလောမှာ သူတို့အတွက် စားစရာတွေလိုမယ်၊ နေရာ
ထိုင်ခင်းအတွက် အမိုးအကာတွေလိုပါမယ်။ ကျွန်တော်သိရသလောက်ဆိုရင် စစ်ဘေးရှောင်ပြည်သူအရေအတွက်က ၃,၀၀၀ ကနေ ၄,၀၀၀ ကြားလောက် ရှိနိုင်ပါတယ်။"လို့ ပူတာအိုမြို့ဒေသခံတစ်ဦးက ပြောပြခဲ့ပါတယ်။

အဆိုပါ ပူတာအိုဒေသရှိ လုံရှာယာန်ကျေးရွာနှင့် ဖတ်မာကျေးရွာကြားတွင် တပ်မတော်နှင့် ဒေသခံကချင်လွတ်မြောက်ရေတပ်(KIA)နှင့် ဒေသခံပြည်သူလက်နက်ကိုင်(PDF) ပူးပေါင်းတပ်တို့အကြား ယခုနှစ် ဖေဖော်ဝါရီလဆန်းမှစတင်၍ ယနေ့အထိ ထိ တွေ့တိုက်ပွဲများ ဖြစ်ပွားနေခဲ့တာဖြစ်ပါတယ်။

လတ်တလောမှာလည်း အဆိုပါတိုက်ပွဲတွေကြောင့် ဒေသခံပြည်သူတွေအနေနဲ့ နေရပ်စွန့်ခွာ၍ ရွာလုံးကျွတ် ထွက်ပြေးတိမ်းရှောင်နေရမှုတွေလည်း ရှိနေတာပါ။

ယင်းထိတွေတိုက်ပွဲတွေဟာ ပူတာအိုနဲ့ မြစ်ကြီးနားသွားသည့် ကားလမ်းတွေပေါ်မှာ ဖြစ်ပွားနေခြင်းဖြစ်ပြီး ပူတာအိုမြို့နဲ့ဆိုပါက (၁၀)မိုင်ကျော်ခန့်သာကွာဝေးသည့်နေရာတွင် တိုက်ပွဲများဖြစ်ပွား နေခြင်းဖြစ်တယ်လို့ ဒေသခံများထံမှ သိရပါတယ်။

လက်ရှိဖြစ်ပွားနေတဲ့တိုက်ပွဲတွေကြောင့် စစ်ဘေးရှောင်ပြည်သူများကို အကူအညီပေးဖို့ အခက်အခဲတွေလည်းရှိနေပြီး ယခုလို ရေရှည်တိုက်ပွဲတွေ ဆက်လက်ဖြစ်ပွားနေမည်ဆိုပါက စစ်ဘေးရှောင်ပြည်သူအရေအတွက်က ထပ်မံတိုးလာနိုင်တဲ့ အနေအထားမှာရှိနိုင်မယ်လို့ စစ်ဘေးရှောင်အရေးကိစ္စရပ်များကို ကူညီဆောင်ရွက်ပေးနေသူများက ဆိုပါတယ်။

ဒါ့အပြင် ကုလသမဂ္ဂ လူသားချင်းစာနာမှုဆိုင်ရာ ပေါင်းစပ်ညှိနှိုင်းရေးရုံး(UNOCHA)ရုံးက ဖေဖော်ဝါရီလ ၃ ရက်နေ့ကတည်းက ဖြစ်ပွား နေတဲ့တိုက်ပွဲတွေကြောင့် ပူတာအိုမြို့နယ်အတွင်းရှိ ကျေးရွာ ၅ ရွာက လူဦးရေ ၆,၀၀၀ ကျော်ဟာ တိုက်ပွဲရှောင်ထွက်ပြေးနေရတယ်လို့ ထုတ်ပြန်ထားတာဖြစ်ပါတယ်။

Photo - CJ
ymg/kg
#Yangon_Media_Group

#LocalNews
Published - 7 Mar 2022

မြိတ်မြို့အရှေ့ဘက်ရှိ တနင်္သာရီမြစ်အတွင်းမှာ ဒီကနေ့ မတ်လ ၇ ရက်၊နံနက် ၆ နာရီ မိနစ် ၅၀ အချိန်
ခန့်က ကမ်းဝေးငါးဖမ်းလှေတစ်စီး မီးလောင်မှုဖြစ်ပွားခဲ့တယ်လို့ သိရပါတယ်။

မီးလောင်မှုဖြစ်ပွားခဲ့သည့် ကမ်းဝေး ငါးဖမ်းလှေသည် မြိတ်မြို့ ပထက်ကမ်းကျေးရွာအနီးရှိ မြစ်အတွင်းမှာ ဖြစ်ပွားခဲ့ခြင်းဖြစ်ပါတယ်။

အဆိုပါ မီးလောင်မှုကို မြိတ်မြို့နယ်မီးသတ်စခန်းမှ မီးငြိမ်းသတ်ယာဉ်(၂)စီးဖြင့်ထွက်ခွာပြီး မီးလောင်ရာသို့ အပေါ့စားမီးသတ်စက်များကို ရေသမ္ပာန်ဖြင့်တင်ဆောင်၍ သွားရောက်ငြှိမ်းသတ်ခဲ့ရတယ်လို့လည်း သိရပါတယ်။

ဒါ့အပြင် ယင်းမီးလောင်မှုကို အချိန်တစ်နာရီကျော်အကြာ ငြိမ်းသတ်ခဲ့ရပြီး နံနက် ၈ နာရီအချိန်တွင် ငြိမ်းသတ်နိုင်ခဲ့တယ်လို့ မီးသတ်တပ်ဖွဲ့က သတင်းထုတ်ပြန်ခဲ့ပါတယ်။

Photo - MFSD
#Yangon_Media_Group

#LocalNews
#Published - March 7 2022

ရန်ကုန်တိုင်းဒေသကြီး ဒဂုံမြို့နယ်၊ သိင်္ဂုတ္တရ ကုန်းတော်၌ တည်ထားတော်မူသည့် လေးဆူဓာတ်ပုံရွှေတိဂုံစေတီတော်ကြီး၏ (၂၆၁၀) နှစ်မြောက် ဗုဒ္ဓပူဇနိယ တပေါင်းပွဲတော်ကြီးကို ယနေ့ မတ်လ ၇ ရက်တွင် စတင်ပြီဖြစ်ကြောင်း သိရသည်။

မတ်လ ၁၆ ရက်ထိ ဗုဒ္ဓပူဇာ၊ ဓမ္မပူဇာ၊ သံဃပူဇာ ဟုဆိုအပ်သည့် ပူဇော်မှုအမျိုးမျိုးတို့နှင့်အတူ ၁၀ ရက်ကြာကျင်းပမည်ဖြစ်ကြောင်း ရွှေတိဂုံစေတီတော် ဘဏ္ဍာတော်ထိန်း ဂေါပကအဖွဲ့က သိရသည်။

ယနေ့ မတ်လ ၇ ရက်တွင် ဗုဒ္ဓပူဇနိယ တပေါင်းပွဲတော်ကို ဖွင့်ပွဲပြုလုပ်ခဲ့ပြီး မတ်လ ၁၆ ရက်ထိ သံဃာတော် ၁၈ ပါးတို့က နာရီပေါင်း ၂၁၆ နာရီတိုင် အသံမစဲပဌာန်းပွဲ ရွတ်ဖတ်ပူဇော်ကြမည်ဖြစ်ကြောင်း သိရသည်။

တပေါင်းလပြည့်နေ့ဖြစ်သော မတ် ၁၆ ရက် နံနက် ၅ နာရီခွဲအချိန်တွင် ဆွမ်းတော်ကြီး ဆက်ကပ်လှူဒါန်းခြင်း၊နံနက် ၉ နာရီအချိန်တွင် ချမ်းသာကြီးတန်ဆောင်း၌ လှူဒါန်းမှုအစုစုအတွက် ရေစက်ချ၍ နေ့ဆွမ်းကပ်လှူခြင်းများ ပြုလုပ်ကြမည်ဖြစ်ကြောင်းလည်း သိရသည်။

အဆိုပါပွဲတော်ကျင်းပခြင်းကို ကိုဗစ်-၁၉ ရောဂါကာကွယ်ထိန်းချုပ်ရေးကော်မတီမှ ထုတ်ပြန်ထားသော စည်းကမ်းချက်များနှင့်အညီ ပြုလုပ်သွားမည်ဖြစ်ကြောင်းလည်း သိရသည်။

ymg/mt
#Yangon_Media_Group

#LocalNews
Published-7 mar 2022

ကွန်ဟိန်းမြို့နယ်နှင့် မိုင်းပျဉ်းမြို့နယ်တို့တွင် ငွေကျပ် ၅ ဒသမ ၅ ဘီလီယံကျော်တန်ဖိုးရှိ မူးယစ်ဆေးဝါးများ ဖမ်းဆီးရမိခဲ့တယ်လို့ မူးယစ်ဆေးဝါးတာဆီးနှိမ်နှင်းရေးရဲတပ်ဖွဲ့က သိရပါတယ်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် ဖေဖော်ဝါရီလ ၂၆ ရက်နေ့ ညနေ ၃ နာရီခွဲအချိန် ရှမ်းပြည်နယ်(တောင်ပိုင်း)၊ ကွန်ဟိန်းမြို့နယ်၊ တောင်ကြီး-တာချီလိတ် သွားကားလမ်း၊ တာကော်တံတားပူးပေါင်းစစ်ဆေးရေးစခန်းတွင် ကာလိမှ မိုင်းပျဉ်းဘက်သို့ စိုင်းပေါင်းနွံခမ်း(ခ)ခမ်းဟန်စင့် (၃၀)နှစ် မောင်းနှင်လာသည့် NISSAN DIESEL ၁၂ ဘီးယာဉ်အား သတင်းအရရှာဖွေရာ ယာဉ်ပေါ်မှ ပြောင်းအိတ်များဖြင့် ဖုံးအုပ်သယ်ဆောင်လာသည့် အိုက်စ်(မက်သ်အဖက်တမင်း) ၁၅၀ ကီလိုနှင့် စိတ်ကြွရူးသွပ်ဆေးပြား ၉ သိန်း သိမ်းဆည်းရမိခဲ့တယ်လို့ သိရပါတယ်။

ထပ်မံ၍ သတင်းကွင်းဆက်အရ ၂၇ ရက်နေ့ နံနက် ၁၀ နာရီအချိန် ရှမ်းပြည်နယ်(အရှေ့ပိုင်း)၊ မိုင်းပျဉ်းမြို့နယ်၊ တောင်ကြီး-တာချီလိတ် သွားကားလမ်း၊ မိုင်တိုင်အမှတ်(၂၈၄)အနီး၊ ကားလမ်းဘေးတွင် ရပ်တန့်ထားသည့် NISSAN DIESEL ၁၂ ဘီးယာဉ်အား စစ်ဆေးရှာဖွေရာ ယာဉ်ပေါ်မှ ပြောင်းအိတ်များဖြင့် ဖုံးအုပ်သယ်ဆောင်လာသည့် အိုက်စ်(မက်သ်အဖက်တမင်း) ၄၀၀ ကီလို ထပ်မံသိမ်းဆည်းရမိခဲ့သဖြင့် ဒေသကာလ တန်ဖိုးငွေကျပ် ၅ ဒသမ ၅ ဘီလီယံကျော်တန်ဖိုးရှိ စုစုပေါင်းအိုက်စ်(မက်သ်အဖက်တမင်း) ၅၅၀ ကီလို၊ စိတ်ကြွရူးသွပ်ဆေးပြား ၉ သိန်း သိမ်းဆည်းရမိခဲ့တယ်လို့ သိရပါတယ်။

စစ်ဆေးဖော်ထုတ်ချက်များအရ သိမ်းဆည်းရမိမူးယစ်ဆေးဝါးများအား ရှမ်းပြည်နယ်(အရှေ့ပိုင်း) နယ်စပ်မှတစ်ဆင့် ပြည်ပသို့ သယ်ဆောင်ခြင်းဖြစ်ကြောင်းသိရှိရသဖြင့် ဥပဒေအရ အရေးယူထားရှိပြီး ကွင်းဆက်ပြစ်မှုကျူးလွန်သူများအား ဆက်လက်စစ်ဆေးဖော်ထုတ်လျက်ရှိတယ်လို့သိရပါတယ်။

ymg/hm
#Yangon_Media_Group

#WorldPolitics
Published 07 March 2022

နေတိုး(NATO)အဖွဲ့က ရုရှားနိုင်ငံသားတွေအပေါ် မလိုမုန်းတီးစိတ်ထားမှာမဟုတ်သလို ရုရှားနိုင်ငံရဲ့ ကမ္ဘာ့အင်အာကြီးရပ်တည်ချက်အခြေအနေကိုလည်း မေးခွန်းထုတ်သွားမှာမဟုတ်ကြောင်း ဗြိတိန်ဝန်ကြီးချုပ်'ဘိုရစ်ဂျွန်ဆန်'ရဲ့ ပြောကြားချက်ကို New York Times မှာ တနင်္ဂနွေနေ့ကဖော်ပြခဲ့ပါတယ်။

"ရုရှားပြည်သူတွေကို ရန်ငြိုးရန်စပြုသွားမှာမဟုတ်သလို ကမ္ဘာပေါ်ကအင်အားကြီးနိုင်ငံကိုလည်း စော်ကားလိုစိတ်မရှိပါဘူး။ များမကြာခင်အချိန်မှာ ယူကရိန်းအနေနဲ့ နေတိုးအဖွဲ့ဝင်ဖြစ်မြောက်လာဖို့ အလားအလာသိပ်မရှိပါဘူး" လို့ 'ဘိုရစ်ဂျွန်ဆန်'က ပြောကြားခဲ့တာဖြစ်ပါတယ်။

"အခုကိစ္စက နေတိုးအရေးကိစ္စမဟုတ်တဲ့အပြင် နောင်လည်းဖြစ်လာမှာမဟုတ်ပါဘူး။ ဘယ်သူကမှ ယူကရိန်းထံသို့ တိုက်ခိုက်ရေးအဖွဲ့တွေ စေလွှတ်ခြင်းမရှိပါဘူး" လို့လည်း ထပ်ဆင့်ပြောကြားလိုက်ပါတယ်။

အဲဒီမတိုင်ခင်တုန်းက 'ဘိုရစ်ဂျွန်ဆန်'ဟာ ယူကရိန်းကို နိုင်ငံတကာအကူအညီများထောက်ပံ့ဖို့ နေတိုးမဟာမိတ်နိုင်ငံတွေကို တောင်းဆိုခဲ့ပါတယ်။

နိုင်ငံတကာမှလူသားချင်းစာနာထောက်ထားမှုအဖွဲ့များ လှုံ့ဆော်ပေးခြင်း၊ ယူကရိန်းထံ စစ်လက်နက်ကာကွယ်ရေးပစ္စည်းများထောက်ပံ့ခြင်း၊ ရုရှားနိုင်ငံအပေါ် စီးပွားရေးအရေးယူပိတ်ဆို့မှုများ အရှိန်မြှင့်ဆောင်ရွက်ခြင်း၊ ယူကရိန်းနိုင်ငံအတွင်း ရုရှားရဲ့အပြောင်းအလဲဆောင်ရွက်ချက်များအား တားဆီးခြင်း၊ ယူကရိန်းအစိုးရက ဖြေရှင်းချက်တွေကိုအပြည့်အဝတာဝန်ယူနိုင်မှ ပဋိပက္ခတင်းမာမှုလျှော့ချရေး သံတမန်လမ်းစဉ်ကို စဉ်းစားသုံးသပ်ခြင်း၊ ဥရောပ-အတ္တလန်တစ်လုံခြုံရေးအားဖြည့်ခြင်း စသည့်အကြောင်းအရာများပါဝင်ပါတယ်။

အနောက်အုပ်စုနဲ့ နိုင်ငံတကာအသိုင်းအဝိုင်းတစ်ခုလုံးက ဒီအကြောင်းအရာကိစ္စတွေကို ထောက်ခံအားပေးသင့်ကြောင်း 'ဂျွန်ဆန်'က ယူဆထားတာဖြစ်ပါတယ်။

နောက်အပတ်မှာ 'ဘိုရစ်ဂျွန်ဆန်'က အဆိုပါအကြောင်းအရာတွေနဲ့ပတ်သက်ပြီး ကနေဒါဝန်ကြီးချုပ်'ဂျက်စတင်ထရူဒူ'နဲ့ တွေ့ဆုံဆွေးနွေးဖို့ရှိသလို မတ်လ ၇ ရက်နေ့ တနင်္လာနေ့မှာ လန်ဒန်ကိုလာရောက်လည်ပတ်မယ့် နယ်သာလန်ဝန်ကြီးချုပ်'မာ့ခ်ရု'နဲ့လည်း ဆွေးနွေးသွားဖို့ရှိပါတယ်။

နောက်တစ်နေ့ဖြစ်တဲ့ မတ်လ ၈ ရက် အင်္ဂါနေ့မှာတော့ ပိုလန်၊ ချက်ပြည်သူ့သမ္မတနိုင်ငံ၊ ဆလိုဗေးကီးယား၊ ဟန်ဂေရီနိုင်ငံတို့ပါဝင်တဲ့ Visegrád အဖွဲ့မှခေါင်းဆောင်များနဲ့ ဗြိတိန်ဝန်ကြီးချုပ်တို့တွေ့ဆုံဆွေးနွေးမယ့် ယူကရိန်းအရေးကိစ္စအစည်းအဝေးပွဲကို ဗြိတိန်မြို့တော်မှာ ပြုလုပ်သွားမှာဖြစ်ပါတယ်။

Source RT/Agencies.
#Yangon_Media_Group