#LocalNews
Published - 18 March 2022

ပြည်တွင်းမှာ စားသုံးဆီဈေးနှုန်းတွေ တစ်ပိဿာကို ၈,၀၀၀ ကျော်အထိ ဈေးမြင့်လာတဲ့အချိန်မှာ စားသုံးဆီလိုအပ်ချက်ကို ဖြည့်ဆည်းဖို့ဆိုပြီး နေကြာပင်တွေ တိုးချဲ့စိုက်ပျိုးဖို့ ဝန်ကြီးဌာနအနေနဲ့ စီစဉ်လာပါတယ်။

#Yangon_Media_Group

#DailyNews
Published - 18 Mar 2022

၁။ အောင်ဘာလေထီရောင်းအား ၃၀ ရာခိုင်နှုန်းအထိပြန်တက်လာ

၂။ ရာသီအမှန်နေကြာစိုက်နိုင်ရန်အတွက် လယ်ထွန်စိုက်ပျိုးရာမှာ အစိုးရအစီအစဉ်ဖြင့် လယ်ထွန်စက်များ စီစဉ်ပေးရန်လိုအပ်

၃။ မိုးလေဝသ သတင်း

၄။ ပါကစ္စတန်မှ ကုန်တင်ကားအလှဆင်ပန်းချီဆရာက ရှူးဖိနပ်များတွင်လည်း အလှဆင်ရေးဆွဲပေးနေ.......အစရှိတဲ့သတင်းတွေကို တင်ဆက်ပေးသွားမှာပဲဖြစ်ပါတယ်။

#Yangon_Media_Group

#LocalNews
Published - 18 March 2022

     လျှပ်စစ်မီးပြတ်တောက်မှုများကြောင့် ရန်ကုန်မြို့ရှိ ဆင်ခြေဖုံးမြို့နယ်အချို့တွင် သုံးရေများပြတ်လပ်မှုများဖြစ်ပေါ်နေပြီး ပရဟိတအဖွဲ့များက ရေများကို ဘောက်ဆာကားများဖြင့် ဝေငှလှူဒါန်းပေးနေရတယ်လို့ သိရပါတယ်။

     "မီးမလာတော့ ရေတင်လို့မရဘူးပေါ့။ နေ့စဥ်ဝယ်သုံးဖို့ဆိုတာကလည်း အဆင်မပြေဘူးလေ။ မီးလာတဲ့အချိန်ကိုပဲစောင့်ပြီး ရေကိုအလုအယက်တင်နေရတာ။ တခါတလေလည်း ရေရလိုက်တာရှိသလို ရေအားမပြည့်လို့ ရေမရလိုက်တာတွေလည်းရှိတယ်။လျှပ်စစ်မီးက တော်တော်လေးပြတ်နေတော့ ရေတင်ဖို့က လုံးဝကိုအဆင်မပြေတာပါ။"လို့ ဒဂုံဆိပ်ကမ်းမြို့နယ်မှာ နေထိုင်သူပြည်သူတစ်ဦးက သုံးရေအခက်အခဲနဲ့ပတ်သက်ပြီး အခုလိုပြောပြပေးခဲ့ပါတယ်။

     ယင်းကဲ့သို့ သုံးရေပြတ်လပ်နေမှုများကြောင့် ရန်ကုန်မြို့၏ မြို့နယ်အချို့တွင် အခကြေးငွေဖြင့် ရေတင်မီးစက်ဖြင့်ရေတင်ပေးသည့် ဝန်ဆောင်မှုလုပ်ငန်း လုပ်ကိုင်သူအချို့လည်း ရှိလာခဲ့ပါတယ်။

     "တစ်ခါတစ်လေ တစ်ရက်လုံးမှ မီး သုံး၊ လေး နာရီပဲလာတဲ့ရက်တွေရှိတယ်။ လာလိုက်၊ပျက်လိုက်နဲ့ မီးမလာတာက ချက်ရေးပြုတ် ရေးကျ မီးသွေးနဲ့ချက်လို့ရပေမယ့် ရေကျတော့ အခက်အခဲရှိတယ်။ ဘဝတွေက ဘယ်လိုတွေဖြစ်နေလဲဆိုတော့ တူရာတွေစုကယ်ပါတွေအော်ကူရာတွေပျောက် ကောက်ရိုးတမျှင်ကောက် အဲ့လိုဖြစ်နေတာပေါ့။"လို့ တောင်ဒဂုံမြို့နယ်အတွင်းမှာ နေထိုင်သူတစ်ဦးက ပြောပြခဲ့ပါတယ်။

     ဒါ့အပြင် ရန်ကုန်မြို့ရဲ့ မြို့နယ်အချို့တွင် သုံးရေကို ဝယ်ယူသုံးစွဲနေရသည်များလည်းရှိနေပြီး သုံးရေတစ်စည်လျှင် တိုက်ခန်းအလွှာအလိုက် ကျပ် ၁,၅၀၀ မှ ကျပ် ၃,၀၀၀ အထိ ပေါက်စျေးရှိနေတယ်လို့ သိရပါတယ်။

     "အလှူရှင်တွေလှူဒါန်းတဲ့ ပိုက်ဆံလေးတွေစုပြီး ရသလောက်လေးတော့ ရေဘောက်ဆာကားတွေနဲ့ လိုက်လံလှူဒါန်းပေးနေပါတယ်။ အဓိက သုံးရေလိုတဲ့ မြို့နယ်/ရပ်ကွက်တွေကို ဦးစားပေးပြီးတော့ လိုက်လှူဒါန်းပေးနေပါတယ်။ ဒါကလည်း တစ်ပိုင်၊တစ်နိုင် ပေါ့၊ ရေရှည်လှူဖို့ကျတော့လည်း အခက်အခဲလေးတွေရှိပါတယ်။"လို့ ပရဟိတသမားတစ်ဦးကလည်း YMG ကို ပြောပြခဲ့ပါတယ်။

Photo - CJ

ymg/kg
#Yangon_Media_Group

#LocalNews
Published - 18 March 2022

     ဧရာဝတီတိုင်းဒေသကြီး၊ ပုသိမ်မြို့၊ အမှတ်(၄)ရပ်ကွက်၊ ရွှေစေတီလမ်းရှိ မိုဘိုင်းဖုန်းဆိုင်တွင် ဒီကနေ့ မတ်လ ၁၈ ရက်၊ နံနက်ပိုင်းအချိန်က မီးလောင်မှုဖြစ်ပွားခဲ့တယ်လို့ သိရပါတယ်။

     အဆိုပါ SUN MOBILE ဖုန်းဆိုင်ဟာ မီးအားမြှင့်စက်အပူလွန်ကဲရာမှတစ်ဆင့် မီးစတင်လောင်ကျွမ်းခဲ့တာဖြစ်တယ်လို့ ဆိုပါတယ်။"ဖုန်းဆိုင်ဝါယာရှော့ဖြစ်ပြီး မီးလောင်တာပါ။ သိပ်ကြီးကြီးမားမားတော့ မရှိခဲ့ပါဘူး။ သူ့ဆိုင်ခန်းတစ်ခန်းပဲ လောင်သွားတာပါ။ ဆိုင်ထဲမှာရှိတဲ့ ဖုန်းတွေနဲ့ သိုလှောင်ထားတဲ့ ပစ္စည်းတွေတော့ မီးလောင်ဆုံးရှုံးသွားတာပေါ့။ သူက တိုက်ခန်းဆိုတော့ သူ့တစ်ခန်းပဲလောင်သွားတာပါ။"လို့ ပုသိမ်မြို့ဒေသခံတစ်ဦးက YMG ကို ပြောပြခဲ့ပါတယ်။

     အဆိုပါမီးလောင်မှုကို မီးငြှိမ်းသတ်ယာဉ်(၁)စီး၊ အထောက်အကူပြုယာဉ်(၁)စီး၊ ပုသိမ်ခရိုင်မီးသတ်စခန်းမှ မီးငြှိမ်းသတ်ယာဉ်(၁)စီး၊ ရေသယ်ယာဉ်(၁)စီး၊ ပုသိမ်မြို့နယ်မီးသတ်စခန်းမှ မီးငြှိမ်းသတ်ယာဉ်(၂)စီး၊ ရေသယ်ယာဉ်(၁)စီး၊ ပုသိမ်နယ်မြေမီးသတ်စခန်းမှ မီးငြှိမ်းသတ်ယာဉ်(၂)စီး၊ ရေသယ်ယာဉ်(၁)စီး၊ ငဝန်ကျွန်းသာနယ်မြေ မီးသတ်စခန်းမှ မီးငြှိမ်းသတ်ယာဉ်(၁)စီး၊ ရေသယ်ယာဉ်(၁)စီး၊ ဘက်စုံလူမှုကူညီရေးအသင်းမှ ရေသယ်ယာဉ်(၂)စီးတို့ဖြင့် ထွက်ခွာငြှိမ်းသတ်ခဲ့ရတယ်လို့လည်း မီးသတ်တပ်ဖွဲ့က သတင်းထုတ်ပြန်ထားပါတယ်။

     ယင်းမီးလောင်မှုကို မနက် ၁ နာရီ ၁၅ မိနစ်အချိန်မှာ ငြိမ်းသတ်နိုင်ခဲ့ပြီး စတင်လောင်ကျွမ်းတဲ့ဖုန်းဆိုင်သာ ပျက်စီးဆုံးရူံးခဲ့ပြီး လူထိခိုက်ဒဏ်ရာရမှုလည်း မရှိခဲ့ဘူးလို့သိရပါတယ်။

     လက်ရှိမှာတော့ အဆိုပါ SUN MOBILE ဖုန်းဆိုင်၏ မန်နေဂျာဖြစ်သူကို မီးသတ်တပ်ဖွဲ့က မီးပေါ့ဆမှုပုဒ်မဖြင့် အမှုဖွင့်အရေးယူထားတယ်လို့လည်း သိရပါတယ်။

Photo - MFSD

ymg/kg
#Yangon_Media_Group

#LocalNews
Published -18 Mar 2022

မြန်မာတစ်နိုင်ငံလုံးမှာ ၂၀၂၁ ခုနှစ်၊ ဖေဖေါ်ဝါရီလမတိုင်ခင်က ၃၇၀,၀၀၀ ဦးနဲ့ ဖေဖော်ဝါရီလနောက်ပိုင်းမှာ ၄၉၅,၃၀၀ ဦး အပါအဝင် ၈၆၅,၇၀၀ ဦးဟာ နေရပ်စွန့်ခွာထွက်ပြေးရလျက်ရှိတယ်လို့ OCHAရဲ့သတင်းအချက်အလက်တွေအရ သိရပါတယ်။

ထုတ်ပြန်ချက်မှာမြန်မာနိုင်ငံရဲ့အရှေ့တောင်ပိုင်းမှာ တပ်မတော်နဲ့လက်နက်ကိုင်တပ်ဖွဲ့တွေကြားက တိုက်ပွဲတွေဟာ ပိုမိုပြင်းထန်လျက်ရှိနေပြီး အရပ်သားတွေဟာ နေရပ်စွန့်ခွာထွက်ပြေးနေရကာ ကရင်ပြည်နယ်၊ ဖာပွန်မြို့နယ်က နေရာအတော်များများဟာ လေကြောင်းမှတိုက်ခိုက်မှု၊ လက်နက်ကြီးသုံးတိုက်ခိုက်မှုဒဏ်တွေကိုခံရပြီး အရပ်သားသေကြေဒဏ်ရာရမှု၊ တိုက်ပွဲရှောင်စွန့်ခွာထွက်ပြေးရမှုတွေရှိနေတယ်လို့ ဆိုပါတယ်။

တည်ငြိမ်မှုမရှိတဲ့ လုံခြုံရေးအခြေအနေတွေကြောင့် မတ်လရဲ့ ပထမနဲ့ ဒုတိယရက်သတ္တပတ်အတွင်း ဖာပွန်မြို့နယ်က လူဦးရေ ၇၀၀ ခန့်ဟာ ကမာမောင်းမြို့နယ်နဲ့ လှိုင်းဘွဲမြို့နယ်တွေမှာ အိုးအိမ်စွန့်ခွာထွက်ပြေးခဲ့ကြရသလို တနင်္သာရီတိုင်းဒေသကြီးအတွင်းမှာလည်း မတ်လဆန်းကတည်းကဖြစ်ပွားနေတဲ့ တိုက်ပွဲတွေကြောင့် လူဦးရေ ၁၅၀ ခန့်ဟာ ပုလောမြို့နယ်အတွင်းမှာ တိုက်ပွဲရှောင်ထွက်ပြေးနေရတယ်လို့ ထုတ်ပြန်ချက်မှာ ဖော်ပြထားပါတယ်။

ဒါ့အပြင်ဖေဖေါ်ဝါရီ ၂၈ ရက်နဲ့ မတ်လ ၆ ရက်နေ့အတွင်း ရှမ်းပြည်နယ်တောင်ပိုင်းမှာ ယာယီနေထိုင်ခဲ့ကြတဲ့ လူဦးရေ ၃,၀၅၀ ခန့်ဟာ လွိုင်ကော်မြို့နယ်ထဲက ၎င်းတို့မူလနေထိုင်ရာနေရာများသို့ ပြန်လာခဲ့ကြကာ အလွန်တင်းကြပ်တဲ့ သွားလာခွင့်ဆိုင်ရာ အခြေအနေထဲကမှ လူသားချင်းစာနာမှုလုပ်ငန်းဆောင်ရွက်သူတွေဟာ အကူအညီလိုအပ်နေသူများထံ အရေးပေါ်အကူအညီနဲ့ အကာအကွယ်ပေးရေးဆိုင်ရာ ဝန်ဆောင်မှုတွေရောက်ရှိအောင် ပူးပေါင်းကြိုးစားလျက်ရှိတယ်လို့ဆိုပါတယ်။

မတ်လ ၇ ရက်နေ့က ကိန်းဂဏန်းများအရ ၂၀၂၁ ခုနှစ် ဖေဖေါ်ဝါရီလကတည်းကဖြစ်ပွားတဲ့ ပဋိပက္ခနဲ့ မတည်ငြိမ်မှုတွေကြောင့် လူဦးရေ ၂၂၈,၉၀၀ ခန့်ဟာ မြန်မာနိုင်ငံအရှေ့တောင်ပိုင်းမှာ ဆက်လက်တိုက်ပွဲရှောင်နေထိုင်ရလျက်ရှိကာ အဆိုပါတိုက်ပွဲရှောင်နေထိုင်ရသူတွေဟာ ကယားပြည်နယ်မှာ ၉၃,၈၀၀ဦး၊ ကရင်ပြည်နယ်မှာ ၆၉,၁၀၀ဦး၊ ရှမ်းပြည်နယ်တောင်ပိုင်းမှာ ၅၄,၀၀၀ဦး၊ မွန်ပြည်နယ်မှာ ၇,၅၀၀ ဦး၊ တနင်္သာရီတိုင်းဒေသကြီးမှာ ၃,၇၀၀ ဦးနဲ့ ပဲခူးတိုင်းဒေသကြီးမှာ ၈၀၀ ဦးတို့ဖြစ်တယ်လို့ သိရပါတယ်။

ymg/hm
#Yangon_Media_Group

#WorldPolitics
Published - 18 March 2022
ယူကရိန်း-ရုရှားစစ်ပွဲဖြစ်ပွားရခြင်းအပေါ် နေတိုး(NATO)အဖွဲ့အား တောင်အာဖရိကသမ္မတ'ဆယ်ရဲလ်ရာမာဖိုဆာ'က ကြာသပတေးနေ့က အပြစ်တင်ပြောကြားလိုက်ပါတယ်။
ရုရှားကိုရှုတ်ချဝေဖန်ဖို့ တောင်းဆိုမှုများကိုလည်း 'ရာမာဖိုဆာ'ကငြင်းဆန်လိုက်တာကြောင့် တောင်အာဖရိကကို ကြားနေဖြန်ဖြေသူအဖြစ်ဆောင်ရွက်ပေးဖို့ ကိစ္စမှာ ယူကရိန်းရော အနောက်နိုင်ငံအနေနဲ့ပါ လက်ခံဖို့ ခက်ခဲသွားနိုင်ပါတယ်။

နေတိုးတပ်ဖွဲ့ တွေ ဥရောပအရှေ့ဘက်ကို တိုးချဲ့လာခြင်းဖြင့် ယင်းဒေသအတွင်း မတည်ငြိမ်မှုများဖြစ်ပေါ်လာနိုင်ကြောင်း တာဝန်ရှိသူခေါင်းဆောင်များရဲ့သတိပေးချက်ကို နေတိုးအဖွဲ့အနေနဲ့လိုက်နာခဲ့ပါက စစ်ပွဲဖြစ်လာမှာမဟုတ်ဘူးလို့ 'ရာမာဖိုဆာ'က ပါလီမန်ဆွေးနွေးပွဲမှာ ပြောကြားခဲ့ပါတယ်။

ဒါပေမဲ့ ဖေဖော်ဝါရီ ၂၄ ရက်နေ့ကစပြီး ယူကရိန်းကို ရုရှားတိုကျူးကျော်ခဲ့ခြင်းဟာလည်း အင်အားသုံးအနိုင်ကျင့်တာဖြစ်ပြီး နိုင်ငံတကာဥပဒေကိုချိုးဖောက်ရာကျတဲ့အတွက် တောင်အာဖရိကအနေနဲ့ လက်သင့်ခံစရာမရှိကြောင်း ဖြည့်စွက်ပြောကြားခဲ့ပါသေးတယ်။

ယူကရိန်းစစ်အင်အားကိုဖြိုခွဲရန်၊ လူမျိုးရေးဝါဒဆန့်ကျင်တိုက်ဖျက်ရန်၊ နေတိုးတပ်ဖွဲ့များတိုးချဲ့လာခြင်းကိုကာကွယ်ရန် စတဲ့အကြောင်းပြချက်များဖြင့် ရုရှားတို့အထူးစစ်ဆင်ရေးပြုလုပ်ခဲ့တာဖြစ်ကြောင်း ရုရှားသမ္မတ'ဗလာဒီမီယာပူတင်'က ပြောကြားခဲ့ပါတယ်။

ယူကရိန်းကိုချေမှုန်းရန်ရည်ရွယ်ချက်ဖြင့် ရုရှားတိုအကြောင်းမဲ့သက်သက် တိုက်ခိုက်ခဲ့တာဖြစ်မယ်လို့ ယူကရိန်းနဲ့အနောက်မဟာမိတ်နိုင်ငံတွေက ယူဆထားကြပါတယ်။

ဆွေးနွေးညှိနှိင်းမှုတွေက အခြေအနေတိုးတက်မှုရှိကြောင်း 'ပူတင်'ကအခိုင်အမာဆိုထားတယ်လို့ 'ရာမာဖိုဆာ'က ထုတ်ဖော်ပြောကြားလိုက်ပါတယ်။ တောင်အာဖရိကသမ္မတဟာ ယူကရိန်းသမ္မတ'ဗိုလိုဒီမီယာဇယ်လန်စကီ'နဲ့ မတွေ့ဆုံရသေးပေမယ့် သူနဲ့လည်းပြောဆိုဖို့ဆန္ဒရှိနေပါတယ်။

ရုရှား-ယူကရိန်းအရေးကိစ္စမှာ တောင်အာဖရိကကို ကြားဝင်ဖြန်ဖြေဖို့ တောင်းဆိုခဲ့ကြတယ်လို့ 'ရာမာဖိုဆာ'က သောကြာနေ့က ပြောကြားခဲ့ပေမယ့် ဘယ်သူကအဲဒီလိုတောင်းဆိုသလဲဆိုတာကိုတော့ မထုတ်ဖော်ခဲ့ပါဘူး။

"ရုရှားကို တောင်အာဖရိအနေနဲ့ ပြင်းပြင်းထန်ထန်ဆန့်ကျင်သင့်တယ်လို့ တိုက်တွန်းပြောဆိုသူတွေရှိနေပါတယ်။ ကျွန်တော်တို့ ချဉ်းကပ်နေတဲ့နည်းလမ်းက ပြောဆိုဆွေးနွေးဖို့ ပါပဲ။ ပဋိပက္ခကိုဖြေရှင်းရာမှာ အော်ဟစ်ဆူပူနေလို့ ဘာမှမထူးပါဘူး" လို့ 'ရာမာဖိုဆာ'က ဆိုပါတယ်။

၁၉၉၄ ခုနှစ်နောက်ပိုင်း တောင်အာဖရိကမှာ 'ရာမာဖိုဆာ'ရဲ့အာဖရိကအမျိုးသားကွန်ဂရက်ပါတီက အုပ်ချုပ်လာခဲ့တာဖြစ်ပြီး အရင်ဆိုဗီယက်ပြည်ထောင်စုနဲ့ ခိုင်မာတဲ့ဆက်ဆံရေးရှိထားဖူးပါတယ်။

ဆိုဗီယက်ပြည်ထောင်စုဟာ စစ်အေးကာလအတွင်း လူမျိုးခွဲခြားရေးဆန့်ကျင်လှုပ်ရှားသူများကို ထောက်ပံ့လေ့ကျင့်ပေးခဲ့ကြပါတယ်။ ဒါကြောင့် အနောက်ပိုင်းရှိ ရုရှားပြိုင်ဘက်တွေကြားမှာ တောင်အာဖရိကကို သံသယဖြင့်စောင့်ကြည့်နေခဲ့ကြတာဖြစ်ပါတယ်။

ဒီမိုကရေစီစနစ်သို့ ငြိမ်းချမ်းစွာကူးပြောင်းပြီးကတည်းက စီးပွားရေးအင်အားထက် သံတမန်ရေးရာပိုင်းက ပိုပြီးဩဇာလွှမ်းမိုးမှုရှိနေခဲ့ပါတယ်။

တောင်အာဖရိကက ဘယ်ဘက်ကိုမှမလိုက်တာကြောင့် ကြားနေဖြန်ဖြေသူအဖြစ်ဆောင်ရွက်ပေးဖို့ တောင်းဆိုလာကြတာပါဆိုပြီး 'ရာမာဖိုဆာ'က ကြာသပတေးနေ့က ပြောကြားလိုက်ပါတယ်။

"အခြားနိုင်ငံတွေလို အင်အားကြီးနိုင်ငံမျိုးအဖြစ် ဘယ်တော့ကမှ ဟန်ဆောင်မနေခဲ့ပါဘူး။ ဒါပေမဲ့ တစ်ယောက်ယောက်ကို ပြစ်တင်ရှုတ်ချဖို့ တောင်းဆိုလာမှုတွေရှိနေပါတယ်" လို့ ပြောကြားသွားပါတယ်။
Source: Reuters

#LocalNews
Published_18 March 2022

ရခိုင်ပြည်နယ်၏ အကြီးဆုံးစာပေဆုချီးမြှင့်ပွဲတစ်ခုဖြစ်သည့် “တန်းခိုးဆရာထွန်းစာပေဆုချီးမြှင့်ပွဲ” ကို လာမည့်ဧပြီလ ၉ ရက်တွင် ရခိုင်ပြည်နယ် ပုဏ္ဏားကျွန်းမြို့နယ်၊ တန်ခိုးကျေးရွာ၌ ကျင်းပသွားမည်ဖြစ်ကြောင်း သိရသည်။

  အဆိုပါဆုပေးပွဲတွင် တစ်သက်တာစာပေဆု၊ ဂီတစာဆိုဆု၊ ကဗျာဆု၊ ဝတ္ထုဆု၊ ဆောင်းပါးဆု ၊ ကလေး ကဗျာဆု(အချေကဗျာဆု) စုစုပေါင်း ၇ ဆုကို ချီးမြှင့်သွားမည်ဖြစ်ကြောင်း၊ပြိုင်ပွဲအတွက် ပြီးခဲ့သည့် ၂၀၂၁ ခုနှစ် အောက်တိုဘာလ ၃ဝ ရက်က နောက်ဆုံးထားပေးပို့ယှဉ်ပြိုင်ထားကြသည့် စာမူများကို ဆုချီးမြှင့်ရေးကော်မတီမှ သတ်မှတ်စံချိန်စံညွှန်းများနှင့်အညီ ရွေးချယ်စိစစ်နေကြောင်းနှင့် ထိုက်သင့်သည့်ဆုကြေးများကို ချီးမြှင့်ပေးသွားမည်ဖြစ်ကြောင်း သိရသည်။

 ကိုလိုနီခေတ်ကထင်ရှားကျော်ကြားခဲ့သည့် ရခိုင်ဂန္ထဝင်တေးရေးနှင့် စာရေးဆရာ တန်းခိုးဆရာထွန်းအားဂုဏ်ပြုသောအားဖြင့် ကျင်းပသည့် ယင်း “တန်းခိုးဆရာထွန်းစာပေဆုချီးမြှင့်ပွဲ” ကို ၂၀၁၁ ခုနှစ်မှစတင်ကျင်းပခဲ့ခြင်းဖြစ်သော်လည်း ၂၀၁၂ ခုနှစ် ၊ ၂၀၁၃ ခုနှစ် နှင့် ၂၀၁၈ ခုနှစ်တို့တွင် အခြေအနေအမျိုးမျိုးကြောင့် မကျင်းပနိုင်ခဲ့ပေ။

 ပြီးခဲ့သည့်နှစ်ကကျင်းပခဲ့သည့် “တန်းခိုးဆရာထွန်းစာပေဆုချီးမြှင့်ပွဲ” ဆုချီးမြှင့်ပွဲတွင် တန်းခိုးထွန်းတစ်သက်တာစာပေဆုကို ဆရာအနောက်သား(စစ်တွေ)ကလည်းကောင်း၊ ဝတ္ထုဆုကို ဆရာမမေလှိုင်းဖြူ(သံတွဲ)ကလည်းကောင်း၊ ဆောင်းပါးဆုကို ကိုယ်တော်ရိုးနွယ်(ကျောက်ဖြူ)ကလည်းကောင်း၊ ကလေးကဗျာဆု(အချေကဗျာဆု)ကို ဆရာ ဈာန်ဟိန်း(မြောင်းဘွေ)ကလည်းကောင်း၊ ကဗျာဆုကို ကိုယ်တော်ဥက္ကာမင်းညိုကလည်းကောင်း၊ ဂီတစာဆိုဆုကို အဆိုတော်ဝင်းကိုခိုင်ကလည်းကောင်း အသီးသီး ရရှိခဲ့ကြသည်။

ymg/mt
#Yangon_Media_Group

#Local_Health
Published_ 18 March 2022

ဆေးဝါးစက်ရုံခွဲ(ရွာသာကြီး)တွင် စမ်းသပ်ထုတ်လုပ်အောင်မြင်ပြီးဖြစ်တဲ့ ကိုဗစ်-၁၉ ရောဂါကာကွယ်ဆေး Myancopharm စတင်ထုတ်လုပ်ခြင်းနှင့် မိတ်ဆက်ခြင်း အခမ်းအနားကို မတ် ၂၃ ရက်တွင် ကျင်းပမှာဖြစ်ကြောင်း သိရပါတယ်။

နစက စက်မှုဝန်ကြီးဌာနကထုတ်လုပ်သော အဆိုပါကာကွယ်ဆေးများကို ကျန်းမာရေးဝန်ကြီးဌာနသို့ ၂၀၂၂ ခုနှစ် ဧပြီလမှစ၍ ဖြန့်ဖြူးပေးသွားရန် ညှိနှိုင်းဆောင်ရွက်ထားတယ်လို့ ဆိုပါတယ်။

Myancopharm ကိုဗစ်-၁၉ ရောဂါကာကွယ်ဆေးကို ၂၀၂၁-၂၀၂၂ ဘဏ္ဍာရေးနှစ်နှင့် ၂၀၂၂-၂၀၂၃ ဘဏ္ဍာရေးနှစ်တို့တွင် အရေအတွက် Dose ၁၀ သန်း ထုတ်လုပ်ရန် ဆောင်ရွက်လျက်ရှိကြောင်း သိရပါတယ်။

ကာကွယ်ဆေး ထုတ်လုပ်ရန်အတွက် တရုတ်ပြည်သူ့သမ္မတနိုင်ငံ Sinopharm CNBG မှပညာရှင်များ၊ စက်မှုဝန်ကြီးဌာန၊ ကျန်းမာရေးဝန်ကြီးဌာနနှင့် ဆေးဝန်ထမ်း ညွှန်ကြားရေးမှူးရုံးမှ ပညာရှင်များပူးပေါင်း၍ ဆောင်ရွက်ခဲ့ကြခြင်း ဖြစ်ပါတယ်။

ကိုဗစ်-၁၉ ရောဂါကာကွယ်ဆေးထုတ်လုပ်မှုကို ရေတိုအစီအစဉ်အနေဖြင့် တရုတ် ပြည်သူ့သမ္မတနိုင်ငံ Sinopharm CNBG နှင့်ပူးပေါင်း၍ ပုလင်းသွင်းဖြည့်တင်းရန်အဆင့် ကာကွယ်ဆေး (RFT Bulk) ဝယ်ယူ၍ ပုလင်းသွင်းဖြည့်တင်းခြင်း (Fill/Finish) ပြုလုပ် ခြင်းကို ဆေးဝါးစက်ရုံခွဲ (ရွာသာကြီး) တွင်ဆောင်ရွက်ခဲ့ပြီး၊ စီးပွားဖြစ်ထုတ်လုပ်ခြင်းကို မတ် ၁၀ ရက်တွင် လုပ်ဆောင်ခဲ့ပါတယ်။

#ymg_mnn
#Yangon_Media_Group

#Local_News
Published_ 18 March 2022

ဆောက်လုပ်ရေးဝန်ကြီးဌာနတွင် ကန်ထရိုက်မှတ်ပုံတင် ထုတ်ပေးထားသည့် ကုမ္ပဏီပေါင်း ၁,၈၁၈ ခု ရှိပြီး သက်တမ်းတိုးရန်လိုအပ်သော ကုမ္ပဏီများအနေဖြင့် သက်တမ်းတိုးဆောင်ရွက်ရန် ဆောက်လုပ်ရေးဝန်ကြီးဌာနက ကြေညာထားပါတယ်။

ဆောက်လုပ်ရေးဝန်ကြီးဌာနအနေဖြင့် ပြည်ထောင်စုအဆင့် အဖွဲ့အစည်းများ၊ ပြည်ထောင်စုဝန်ကြီးဌာနများ၊ နေပြည်တော်ကောင်စီနှင့် တိုင်းဒေသကြီး/ပြည်နယ် အစိုးရအဖွဲ့များရဲ့ လုပ်ငန်းများကို ကန်ထရိုက်စနစ်ဖြင့် ဆောင်ရွက်လိုတဲ့ကုမ္ပဏီများအား ကန်ထရိုက်မှတ်ပုံတင်များ ထုတ်ပေးထားခြင်းဖြစ်ပါတယ်။

တင်ဒါခေါ်ယူသော ဌာန၊ အဖွဲ့အစည်းများအနေဖြင့် ကန်ထရိုက်မှတ်ပုံတင်လက်မှတ်ရရှိပြီးသော ကုမ္ပဏီစာရင်းကိုသိရှိစေရန်၊ အတုအပမပြုလုပ်နိုင်ရေး တိုက်ဆိုင်စစ်ဆေးနိုင်ရန်နှင့် မှတ်ပုံတင်လက်မှတ်သက်တမ်းကုန်ဆုံးနေသော ကုမ္ပဏီများကို သိရှိနိုင်ရန် အသိပေးကြေညာထားခြင်း ဖြစ်ပါတယ်။

၂၀၂၂ ခုနှစ်၊ ဖေဖော်ဝါရီ ၂၁ ရက် စာရင်းများအရ အရည်အသွေးစစ်ဆေးရေး (QA/QC) ၇၆ ခု၊ အင်ဂျင်နီယာပညာရပ်ဆိုင်ရာအကြံပေး (Consultant) ၂၆ ခု၊ အင်ဂျင် နီယာပညာရပ်နှင့် ဝန်ဆောင်မှု (Service) ၃၂ ခု၊ တည်ဆောက်ရေး (Construction) ၁,၆၃၂ ခု၊ အဓိကတည်ဆောက်ရေးပစ္စည်းများပေးသွင်းခြင်း (Trading) ၅၂ ခု၊ စုစုပေါင်း ကုမ္ပဏီ ၁,၈၁၈ ခုကို ဆောက်လုပ်ရေးဝန်ကြီးဌာနက ကန်ထရိုက် မှတ်ပုံတင်ထုတ်ပေးထားပြီး တည်ဆောက်ရေးကုမ္ပဏီအများစုမှာ သက်တမ်းတိုးရန် ကျန်ရှိနေကြောင်းသိရပါတယ်။

#ymg_mnn
#Yangon_Media_Group

#WorldHealth
Published - 18 March 2022
အိုမီခရွန်မျိုးဗီဇကွဲက မူလ SARS-CoV-2 ဗိုင်းရပ်စ်ထက် အရာဝတ္ထုမျက်နှာပြင်တွေမှာ ပိုမိုအချိန်ကြာရှည်စွာ ရှင်သန်ကူးစက်စေနိုင်ကြောင်း ဓာတ်ခွဲခန်းစမ်းသပ်ချက်များအရ သိရှိရပါတယ်။

သုတေသီတွေက မူလကိုရိုနာဗိုင်းရပ်စ်အမှုန်တွေနဲ့ အိုမီခရွန် BA.1 မျိုးနွယ်ခွဲဗိုင်းရပ်စ်အမှုန်တွေကို အရာဝတ္ထုမျက်နှာပြင်အမျိုးမျိုးပေါ်မှာ သာမန်အခန်းအပူချိန်အတွင်း စမ်းသပ်ထားရှိခဲ့ကြပါတယ်။

ဖန်၊ စတီးလ်၊ ပလတ်စတစ်မျက်နှာပြင်တွေပေါ်မှာ အိုမီခရွန်က ၇ ရက်ကြာတဲ့တိုင်အောင် ရှင်သန်နေနိုင်ပြီး မူလ SARS-Cov-2 ဗိုင်းရပ်စ်က စတီးလ်နဲ့ပလတ်စတစ်မျက်နှာပြင်တွေမှာ ၄ ရက်ကြာတဲ့အခါနဲ့ ဖန်မျက်နှာပြင်ပေါ်မှာ ၇ ရက်ကြာတဲ့အခါ မကူးစက်နိုင်တော့ကြောင်း bioRxiv ဝက်ဘ်ဆိုက်မှာ ကြာသပတေးနေ့က ဖော်ပြခဲ့ပါတယ်။

တစ်ရှူးစာရွက်တွေနဲ့ စက္ကူစာရွက်တွေမှာ မူလဗိုင်းရပ်စ်က မိနစ် ၃၀ ကြာရင် မကူးစက်နိုင်တော့ပါဘူး။ အိုမီခရွန်ကတော့ မိနစ် ၃၀ တိုင်တဲ့အထိ ကူးစက်နိုင်ပေမယ့် တစ်နာရီအထိတော့ မခံပါဘူးလို့ သုတေသီက ဖော်ပြထားပါတယ်။

အကူးအများဆုံးကတော့ SARS-CoV-2 က လေထဲကအမှုန်တွေကနေတဆင့် ကူးစက်နိုင်ပါတယ်။ ရောဂါပိုးရှိနေတဲ့မျက်နှာပြင်တွေကနေ ရောဂါကူးစက်ခြင်းက အဖြစ်နည်းပေမယ့် လက်သန့်စင်ခြင်းနဲ့ လူအများကိုင်တွယ်ထားတဲ့ မျက်နှာပြင်တွေကို ပုံမှန်သန့်ရှင်းခြင်းတို့က အရေးကြီးကြောင်း ဟောင်ကောင်တက္ကသိုလ်မှ စာတမ်းပြုစုသူ'လီယိုပွန်း'က ဆိုပါတယ်။

ကိုဗစ်ရောဂါပိုးရှိတဲ့သူတွေ ထိတွေ့ထားတဲ့ပစ္စည်းတွေကို သေချာစွာသန့်ရှင်းဖို့လိုအပ်ပါတယ်လို့ ပြောပြသွားပါတယ်။
Source: Reuters

#WorldHealth
Published - 18 March 2022

အသက် ၃၄ နှစ်ရှိ 'ကင်မ်လော့ဝုဒ်'ဆိုတဲ့အမျိုးသမီးဟာ ၂၀၂၁ မတ်လက အက်စ်ထရာဇန်နီကာကာကွယ်ဆေးထိုးပြီး ၈ ရက်အကြာမှာ အလွန်အမင်းခေါင်းကိုက်ခဲခြင်းဝေဒနာခံစားခဲ့ရကြောင်း သတင်းပို့ခဲ့ပါတယ်။

သူ့ရဲ့အခြေအနေက ပိုမိုလျင်မြန်စွာဆိုးရွားလာခဲ့ကာ ရော့သာဟမ်ဆေးရုံတင်ပြီး ၁၇ နာရီအကြာမှာပဲ အသက်သေဆုံးသွားပြီဖြစ်ကြောင်း ကြေညာခဲ့ပါတယ်။ ယော့ခ်ရှိင်းယားတောင်ပိုင်းမှစစ်ဆေးရေးမှူး 'နီကိုလာမန်ဒီ'က မစ္စလော့ဝုဒ်ဟာ အလွန်ကံမကောင်းအကြောင်းမလှလို့ ကွယ်လွန်ခဲ့ရတာဖြစ်ကြောင်း ဆိုခဲ့ပါတယ်။

ဒွန်ကက်စတာတရားစစ်ဆေးရေးရုံးမှာ သေဆုံးရသည့်အကြောင်းအရင်းကို ကာကွယ်ဆေးကြောင့်ဖြစ်တဲ့ သွေးခဲပိတ်ဆို့ခြင်း(VITT)လို့ သတ်မှတ်လိုက်ကြပါတယ်။
ကိုဗစ်ကာကွယ်ဆေးနဲ့ VITT အခြေအနေတို့ ကြား ဆက်စပ်မှုကိုသိပ်ပြီးမသိရှိရသေးဘဲ ကနဦးကာကွယ်ဆေးစတင်ထိုးနှံပြီးကတည်းက ဘေးထွက်ဆိုးကျိုးဖြစ်လာနိုင်ချေကို ပိုမိုသိရှိလာရကြောင်း စစ်ဆေးရေးမှူးကဆိုပါတယ်။

မစ္စလော့ဝုဒ်ခံစားခဲ့ရတဲ့ ဝေဒနာက အလွန်ရှားပါးတဲ့ဖြစ်စဉ်တစ်ခုဖြစ်ကြောင်း အစိုးရကချပြခဲ့ပါတယ်။ အက်စ်ထရာဇန်နီကာကို ပထမအကြိမ်ထိုးနှံသူ ၂၄.၉ သန်းနဲ့ ဒုတိယအကြိမ်ထိုးနှံသူ ၂၄.၂ သန်းရှိခဲ့ရာမှာ ရောဂါကူးစက်သူ ၄၃၈ ဦးရှိခဲ့ပြီး သေဆုံးသူ ၇၈ ဦးရှိခဲ့ပါတယ်။

မတ်လ ၂၂ ရက်နေ့မှာ ရော့သာဟမ်ဆေးရုံအရေးပေါ်ဌာနသို့ မစ္စလော့ဝုဒ်သွားရောက်ခဲ့ရာ အကြာကြီးစောင့်ဆိုင်းရပြီးနောက် ကုသမှုမခံယူဘဲပြန်သွားခဲ့ပါတယ်။
နောက်နေ့နံနက်မှာ ခေါင်းကိုက်ဝေဒနာပိုဆိုးလာခဲ့ပြီး အမြင်ဝါးခြင်း၊ အော့အန်ခြင်းတို့ ဖြစ်ခဲ့ကာ နေ့ဝက်လောက်ရောက်တဲ့အခါ စကားဆုံးအောင်တောင်မပြောနိုင်တော့ပါဘူး။

မတ်လ ၂၄ ရက်နေ့ ၂ နာရီခန့်မှာတော့ ကလေးနှစ်ယောက်အမေဖြစ်သူ မစ္စလော့ဝုဒ်ဟာ တုန့်ပြန်နိုင်ခြင်းမရှိတော့ဘဲ သူ့ရဲ့မိသားစုဝင်တွေကို နောက်ဆုံးနှုတ်ဆက်ခွင့်ရအောင် ခေါ်ကြားခဲ့ပါတယ်။

သွေးပြစ်ခြင်းဖြစ်စေတဲ့ ပလိတ်လက်တွေထိုးပေးခဲ့ပြီး ခါးအောက်ကျောရိုးထိုးဖောက်ခြင်းပြုလုပ်ခဲ့ပေမယ့် ဦးနှောက်တွင်းသွေးထွက်ခြင်းကို မတားဆီးနိုင်ခဲ့ပါဘူး။

တရားရုံးကြားနာခြင်းတွင် ၂၀၁၆ ခုနှစ်က ဦးနှောက်တွင်းသွေးဖိအားများခြင်း ဖြစ်ပေါ်ခဲ့ဖူးပြီး ဒါဟာခေါင်းကိုက်ခြင်းဝေဒနာဖြစ်ရတဲ့ အဓိကအကြောင်းအရင်းဖြစ်နိုင်ကြောင်း တင်ပြခဲ့ပါတယ်။

မစ္စလော့ဝုဒ်ရဲ့အမျိုးသားဖြစ်သူကို ခေါင်းကပေါက်ထွက်တော့မယ့်အတိုင်းခံစားရတယ်လို့ ပြောဆိုခဲ့ဖူးပြီး သူ့ရဲ့အဖေဖြစ်သူ'ဝိန်းမာရေးလ်'ကလည်း သမီးဖြစ်သူက ခေါင်းကိုက်ခြင်းကို သေမလောက်ခံစားနေရတယ်လို့ နောက်ဆုံးစကားပြောခဲ့ပါတယ်။

အခုဆိုရင် ကာကွယ်ဆေးထိုးနှံခြင်းနဲ့ VITT ဖြစ်စဉ်တို့အကြား ဆက်စပ်မှုကို ပိုမိုသိရှိလာပြီဖြစ်ပြီး ပလိတ်လက်နည်းပါးတဲ့လူနာတွေအနေနဲ့ သွေးတွင်းဆိုင်ရာကျွမ်းကျင်ပညာရှင်များနဲ့ပြသဖို့ ရော့သာဟမ်ဆေးရုံဖောင်ဒေးရှင်းက ညွှန်ကြားထားပါတယ်။

လူအများစုမှာ ကာကွယ်ဆေးထိုးနှံခြင်းကရတဲ့ အကျိုးကျေးဇူးက ဘေးထွက်ဆိုးကျိုးထက် ပိုမိုသာလွန်သေးကြောင်း အစိုးရက ထပ်မံဖော်ပြထားပါတယ်။
Source: BBC

Published 17 March 2022

အနောက်နိုင်ငံတွေရဲ့ စီးပွားရေးမိုးကြိုးမုန်တိုင်းဆင်တာကို အတူတကွကျော်လွှားကြဖို့ ရုရှားသမ္မတပူတင်က သူ့နိုင်ငံကို‌ ဆော်ဩလိုက်ပါတယ်။ အဲဒီအပြင် သာမာန်ပြည်သူတွေနှင့် စီးပွားရေးလုပ်ငန်းတွေကိုလည်း ငွေကြေးအကူအညီပေးဖို့ သူက ကတိပေးလိုက်ပါတယ်။ အစိုးရအစည်းအဝေးတစ်ခုမှာ သူ့ရဲ့ပြောကြားချက်ကို ရုပ်သံထုတ်လွှင့်ရာမှာ “ ရုရှားကို စီးပွားရေးမိုးကြိုးမုန်တိုင်းဆင်တာတွေ မအောင်မြင်ဖြစ်သွားတယ်” လို့လည်း ထည့်သွင်းပြောကြားပါတယ်။

Source AFP